رواية غرام السلطان الفصل السابع عشر 17 الجزء الثاني بقلم عادل عبدالله
#رواية_غرام_السلطان
#الجزء_الثاني
#للكاتب_عادل_عبد_الله
الحلقة ١٧
بسام : سيبك من الكلام ده خلينا في المفيد ، انا عندي طريقة ممكن تاخدي بيها كل فلوسه بسهولة لكن ليا شرط وحيد ، اننا نتجوز وتكون الفلوس دي بالنص بيني انا وانتي .
منار : مين قالك اني هوافق ؟ انا اصلا بحب نور !!
بسام : الكلام ده ممكن اي حد يصدقه غيري ، انا لأ ، انا بفهم الناس من نظرات عينيهم وانتي نظرة عينك مفيهاش حب غير للفلوس .
منار : انا مسمحلكش ...
بسام : متسمحيش زي ما تحبي لكن صدقيني مش هتعرفي تاخدي منه ورقة بعشرة جنية ، انما لو جيتي معايا دوغري هنستفيد احنا الاتنين ، وانا اعرف ازاي اوصلك للي انتي عايزاه .
بعد ايام
في المستشفي
تفاجئ منار بنور يقف امامها يبتسم !!!
يبدو علي وجهها السخط وتدير وجهها عنه وتهم بالأنصراف لكنه يقف امامها ليمنعها !!!
نور " يبتسم " : مش هتمشي من قدامي .
منار : وسع عايزة اشوف شغلي .
نور : لما تسمعيني الاول .
للكاتب عادل عبد الله
منار : اسمع ايه ؟!! عايز تزعقلي هنا كمان وتفرج عليا زملائي والمرضي ؟!!
نور : اسف ، مقدرتش اتحكم في نفسي لما شوفته دخل مكتبك وبيكلمك .
منار : وفيها ايه ؟ ما انا بحكم شغلي بكلم ناس كتير !!!
نور : لكن ده بالذات انا كنت عارف انه عينه منك من زمان لما عاكسك في الكافيه ، علشان كده كنت هتجنن .
منار : وده يديلك الحق انك تزعقلي بالشكل ده ؟!! ده الموظفين كلهم سمعوا وكان شكلي وحش قوي !!! انت بتشك فيا يا نور ؟؟!!
نور : دي غيرة يا حبيبتي مش شك .
منار : لأ ، اللي انت عملته ده شك مش غيره .
نور : خلاص بقي سامحيني ، الايام اللي عدت دي انتي متعرفيش عدت عليا ازاي !!! انا بحبك قوي ومقدرش اعيش من غيرك .
منار : وانا اضمن منين انك متعملش معايا كده تاني ؟؟
نور : خلصي شغلك وتعالي نتكلم احسن .
منار : طيب امري لله ، استناني تحت في العربية ربع ساعة وانزل .
في الشركة
يذهب باسل الي نور في الشركة ...
باسل : ازيك يا نور ؟
نور : الله يسلمك ، تعالي اتفضل .
باسل : كنت فاكرك هتطردني زي ما طردت بسام !!!
نور : باسل ، انا طردت بسام علشان بيعاكس مراتي ، كنت عايزني اعمل معاه ايه ؟!!
باسل : لأ يا نور ، بسام اخويا ميعملش كده ابدا .
نور : يعني انا كداب ؟؟
باسل : بسام زي اخوك ، انت اتغيرت يا نور ، الفلوس غيرتك !!!
نور : هو كل ما حد يكلمني يقولي الفلوس غيرتك ؟؟!! هو انا كنت مش لاقي اكل ودلوقتي بقيت غني !! انا طول عمري غني ومعايا فلوس ومفيش فيا حاجة اتغيرت .
باسل : علي العموم ده مش موضوعنا ، انا جايلك في موضوع تاني اهم .
نور : موضوع ايه ؟؟
باسل : فلوس اختك غرام .
نور : مش فاهم !!!
باسل : اختك غرام لها نصيب في الشركة والفلوس والفيلا وفي كل ممتلكات اونكل سلطان .
نور : وهي اللي طلبت منك تيجي تقولي كده ؟؟
باسل : ايوه .
نور : انا اسف كان نفسي اساعدك لكن مفيش .
باسل : مفيش ايه ؟؟
نور : مفيش فلوس .
باسل : مفيش فلوس ازاي ؟؟!!
نور : يعني غرام مراتك ملهاش اي نصيب في الشركة والفيلا والفلوس ، كل دي ممتلكاتي انا الخاصة .
باسل : ممتلكاتك منين يا نور ؟؟!! كل دي فلوس اونكل سلطان .
نور : بابا باع كل ممتلكاته لماما وماما باعتهالي وكل اللي انت شايفه ده بتاعي .
باسل : مستحيل طبعا !! كل الاوراق دي عقود صورية ، و اختك تقدر تثبت صورية العقود دي بسهولة وبالتالي هترجع كلها لاونكل سلطان وساعتها كل واحد ياخد حقه .
نور : قصدك انها ترفع قضية ؟!! هي وصلت لكده ؟!!!
باسل : مادام طمعت في حق اختك يبقي ده الحل الاخير قدامها .
نور : ده انت اتجوزتها طمع في الشركة والفيلا والعز اللي انت شايفه ؟!
باسل :انت اكتر واحد عارف اني مش مادي ولا بهتم بالحاجات دي ، لكن لما اشوفك انت طمعان تاخد كل حاجة وهي بنفسها تطلب مني اتدخل يبقي لازم اتدخل .
يقف نور بعصبية : لأ خرج نفسك منها انت احسن ، ولا اقولك اعلي ما في خيلكم اركبوه .
باسل : يعني ايه ؟ مش هتدي اختك حقها ؟؟
نور : مفيش حد له عندي حاجى ، كل دي ممتلكاتي واللي يفكر ياخد منها جنية واحد علي جث.تي .
باسل : ده اخر كلام عندك ؟
نور : ايوه .
باسل : يبقي انت اللي اخترت يا نور .
ينصرف باسل ويتصل بغرام ويخبرها بما حدث ...
غرام : هو قالك كده ؟؟
باسل : ايوه ، انا بصراحة مش مصدق نور اتغير كده ازاي !!!
غرام : انا كنت مش مهتمة بموضوع نصيبي وحقي والكلام ده حتي بعد بابا ما كلمتي فيه ، لكن مادام نور قالك كده وعايز ياخد كل حاجة بالعافية يبقي لازم اخد حقي منه بالكامل .
باسل : انا شايف انك تقولي لأونكل سلطان قبل ما تعملي اي حاجة .
يزداد غضب شيماء حينما تعلم بما دار بين نور و ابنها باسل ، تلتقط هاتفها وتتصل باختها شهد ...
شيماء : شوفتي ابنك يا شهد ؟؟
شهد : ماله نور ؟ بسام راح له تاني ؟؟
شيماء : لأ المرادي باسل اللي راح له وكان بيكلمه في حق غرام مراته .
شهد : حق ايه يا شيماء ؟؟
شيماء : حقها في مال ابوها يا شهد ؟ ولا هي ملهاش حق في مال ابوها ؟؟
شهد : و باسل ايه اللي يدخله في موضوع زي ده ؟؟
شيماء : مراته اللي دخلته ، ومش عيب لما يطالب بحق مراته !!
شهد : انتي يا شيماء اللي بتتكلمي في حق غرام في مال ابوها دلوقتي ؟!! مش غرام دي اللي كنتي بتقولي عليها بنت الخدامة !!! دلوقتي بتدوري انتي وابنك علي حقوقها ؟؟!!!!
شيماء : اللي فات ما.ت احنا بنتكلم في دلوقتي .
شهد : مادام بنتكلمي عن دلوقتي يا شيماء يبقي سلطان لسه عايش وطول ماهو عايش وموجود علي وش الدنيا مفيش حد له حق في اي حاجة !!!
شيماء : لو سلطان مات ابنك مش هيدي للبنت حقوقها ، ده الطمع والجشع ملا قلبه .
شهد : اسكتي ولا تنطقي كلمة واحدة تاني !! اوعي تجيبي سيرة ابني علي لسانك .
شيماء : انتي بتكلميني كده ليه يا شهد ؟؟ اول مرة تكلميني بالطريقة دي !!!
شهد : اللي يجيب سيرة ابني اقطعله لسانه .
شيماء : تقطعي لسان مين يا شهد ؟؟ انتي نسيتي نفسك ولا ايه ؟؟ انتي طول عمرك بينضحك عليكي وانا اللي بقف جنبك ، تيجي النهاردة بتقولي تقطعي لساني ؟!!!
شهد : شيماء خرجي نفسك انتي وابنك بعيد عن الموضوع ده علشان منخسرش بعض .
شيماء : وانا مش هسكت عن حق مرات ابني مادام الجشع والطمع ملا قلوبكم !!!
في فيلا سلطان
ينزل سلطان من غرفته ليجد شهد تبدو متوترة بينما هو سمع جزء من مكالمتها مع شيماء ...
سلطان : مالها شيماء اختك كنتوا بتتخانقوا ليه مع بعض ؟؟
شهد : مفيش حاجة .
سلطان : اتكلمي يا شهد ، انتي هتخبي عليا ؟؟ مين اللي بيجبب سيرة ابنك ؟؟
شهد : انا هقولك بس من غير زعل ؟؟
سلطان : ماشي مش هزعل ، قولي فيه ايه ؟
شهد : باسل راح لنور الشركة وطلب منه حق غرام في الشركة والفيلا والفلوس .
سلطان : وابنك نور عمل ايه ؟
شهد : قاله مفيش حد له عندي حاجة .
سلطان : شوفتي اخر افعالك يا شهد ؟!!! العيال هيقعوا في بعض !!
شهد : وانا عملت ايه ؟؟
سلطان : علشان كتبتي كل حاجة باسم نور !!!
شهد : انا عملت كده لمصلحته ومصلحتنا كلنا .
سلطان : للأسف انتي بتفكري بقلبك مش بعقلك ودي كانت النتيجة .
في شقة غرام
تجلس غرام في حيرة !!!
باسل : مالك يا غرام ؟ بتفكري في ايه ؟
غرام : بفكر في حل لمشكلتنا .
باسل : ووصلتي لحل ؟؟
غرام : للاسف لأ .
باسل : انا سألت واحد محامي صاحبي وقالي ان الحل الوحيد دلوقتي انك ترفعي قضية حجر علي اونكل سلطان وتطالبي بحقك في ثروته ولما نور يخرج العقود اللي معاه تطعني فيها بأنها عقود صورية كتبها والدك وهو مش في كامل وعيه .
غرام : معقول انا اعمل كده !!!
باسل : ده الحل الوحيد ، او تسكتي لغاية بعد عمر طويل لاونكل سلطان ساعتها ترفعي قضية تمكين من ميراثك و بعدها طعن بصورية العقود ، لكن القضية وقتها مش هتكون مضمونة !!!
غرام : لأ انا مستحيل اوقف بابا قدام القاضي واقول عنه انه مش مسئول عن افعاله !!! لا لا لاااااا.
باسل : بصراحة يا غرام انا كمان مش عجبني الفكرة دي ، لكن اخوكي نور مسبش اي طريق تاني !!!
غرام : لا لا لااااا ، انا مش هعمل كده .
تأتي شيماء لزيارتهم .....
شيماء : مالكم يا ولاد ؟ شكلكم زعلانين !!
باسل : لا ابدا يا ماما مفيش حاجة .
شيماء : مالك يا غرام يا بنتي ؟ باسل زعلك ولا ايه ؟
غرام : لا والله يا طنط مفيش حاجة .
شيماء : عملتوا ايه في موضوع اخوكي نور ؟؟
باسل : سألت محامي صاحبي وقالي نرفع قضية حجر علي اونكل سلطان وبعدها نطعن علي العقود اللي مع نور بابصورية ونطلب التمكين من نصيب غرام في التركة .
شيماء : طيب ده حل كويس جدا .
غرام : لا طبعا يا طنط انا مستحيل اوقف بابا في المحكمة واقول عليه انه مش مسئول عن افعاله !!!
شيماء : انتي اللي بتقولي كده يا غرام ؟؟!! بتقولي كده علي سلطان اللي مشوفتيش منه يوم حلو !!!
#للكاتب_عادل_عبد_الله
غرام : لكن كفاية انه بابا .
شيماء : باباكي بالاسم بس ، انما مين اللي ربي وكبر وتعب عليكي ، امك طبعا ، وهو لو كان عايز يوصلكم كان وصلكم لكن هو كان مشغول بفلوسه ، ارفعي قضية يا بنتي وخدي حقك ، لو مش اخدتي حقك دلوقتي عمرك ما هتطولي من اخوكي نور حاجة .
غرام : لو الحل الوحيد علشان اخد حقي اني اعمل كده يبقي خلاص مش عايزة حاجة .
بعد شهر
نور في مكتبه في الشركة يفاجئ باتصال من منار !!!!!
نور : بتتصلي بيا ليه ؟ ما انا في المكتب اللي جنبك !!!
منار : ألحقني يا نور انا تعبانة قوي .
نور : مالك ؟
منار : انا دايخة وواقعة علي الارض في المكتب ، الحقني بسرعة .
يأتي نور مهرولا ... مالك يا حبيبتي ؟؟
منار : ألحقني يا نور انا تعبانة قوي اطلب الاسعاف .
بعد وقت قليل
في المستشفي
نور : خير يا دكتور ؟ منار مالها ؟؟
الطبيب : الف مبروك يا نور بيه ، المدام حامل .
