رواية موضوع عائلي الفصل الثاني والعشرون 22 الجزء الثالث بقلم رحاب القاضي
#موضوع_عائلي
"بيت الهنا"
_الحلقه الـ 22
ـــــــــــــــــــــــــــــــــــــــــــــــــــــــ
أوَكلّما وجهتُ قلبيَ وجهةً
يأتي غرامك أول الوجهاتِ؟
_في بيت الاستاذ حسن الباب خبط وقامت ريناد فتحت ولقيت يزن واقف قدامها..
ابتسم بهدوء وقال
ده يا مساء الفل اوووي..
ريناد
مساء النور انت بتعمل ايه هنا؟
يزن
طيب قولي اتفضل الاول بدل ما انا واقف كده علي الباب، هو انتي كنتي بتعيطي اصل عيونك حمرا وكلها دموع..
ريناد بحزن
ااه كنت بعيط وما تسألنيش ليه لانك مش ام زيي فمش هتفهم..
يزن ابتسم وقال
ولا عمري هفهم عشان عمري ما هبقي ام ممكن ابقي اب..
_ضحكت ريناد بهدوء وفي الوقت ده جه سيف عشان ياخد بنته وشافها واقفه مع يزن وهي بتضحك واتعصب جدا وقال
سيف
طيب ما نجيب شجره واتنين لمون احسن عشان تعرفو تتكلمو براحتكم..
يزن بهدوء
هو حضرتك مين؟
قبل ما يرد سيق قالت ريناد بحده
طليقي اللي مالوش دعوه اصلا واقفه بتكلم ولا قاعده، ثانيه واحده هجيبلك بنتك..
قالت كلامها وسابتهم ودخلت، وبص سيف ليزن وقال
انت. بقي تطلع مين وبتعمل ايه هنا؟
يزن
هو ده بيتك؟
سيف بجمود
بيت خالي
يزن
طيب لما يبقي بيتك ابقي اسألني..
_اتعصب سيف اكتر وقبل ما يرد عليه جات ليلي وهي شايله تيا وقالت ليزن..
ليلي
اهلا وسهلا يا ابني اتفضل جوه حسن مستنيك..
يزن
ميرسييي يا طنط.. بعد اذنك...
وسابهم. يزن ودخل وليلي قالت لسيف بجمود
امسك بنتك اهي وخلي بالك. منها وبكره زي دلوقتي البنت تبقي عندنا يا سيف وحاجتها اهي...
اخد منها سيف البنت وقال
انتي مش هتوصيني علي بنتي يا طنط ليلي، بعد اذنك..
_اخد سيف بنته ونزل تحت واول ما ركب عربيته كلم عزالدين اللي رد عليه وقاله..
عزالدين
ايه يا سيف عايز ايه؟
سيف بضيق
عامل ايه يا خالي...
عز
لسه فاااكر دلوقتي تسأل علي خالك عامل ايه. ما علينا عايز ايه؟
سيف
مش عايز حاجه بس شايف بنت اخوك بقالها كام يوم ماشيه مع ابن يونس الصاوي هو ايه علاقتهم ببعض.
افتكر عز انه بيتكلم علي رضوي ويوسف فقال
اااه ده واقع فيها لاخره الواد مجنون بيها بس البنت يا حرام اتعقدت من صنف الرجاله...
سيف بحده
ده كان عندهم في البيت يا خالي؟
عز
يبقي جاي يخطبها تاني يارب بقي بنت خالك تعقل وتوافق، بقولك ايه اقفل عشان انا مش فاضيلك زين بيعمل في تحاليل مهمه ولازم ابقي جنبيه يلا سلام...
قفل معاه عز وسيف قال بغيظ
قال وانا اللي كنت فاكر انها هتقعد تربي بنتها، لا ما هو غصب عنك يا ريناد انا ما تترباش مع راجل غريب وهتشوفي...
_وقرب من بنته وباسها بحنان وحب وقعدها علي الكرسي مرتاحه وساااق العربيه ومشي راح لبيته هو وشرين...
ــــــــــ #بقلم_الكاتبه_رحاب_القاضي ــــــــ
_وفي شقة الاستاذ حسن كان قاااعد يزن مع حسن في الصاله وريناد واقفه في المطبخ بتعمل في القهوه وهي بتعيط، ودخلت عندها ليلي وقالت بحزن..
ليلي
قال وانا اللي كنت فاكره انه جااي هنا عشان يتكلم في موضوع اخوه مع رضوي اتاريه جاي يتكلم علي الشغل...
مسحت ريناد دموعها وقالت
يا ماما الموضوع بتاع اخوه خلاص اتقفل..
ليلي
وانتي بتعيطي كده ليه انتي كمان؟
ريناد ببكاء
يعني واخدين بنتي مني وعايزني ابقي مبسوطه..
ليلي
هو احنا خدناها ورميناها في الشارع ولا ايه، ما البت عند ابوها يا ريناد واتعودي علي كده مش هنحرم اب من بنته احنا..
ريناد
طيب كنتو استنو تكبر شويه هي يعني الست هانم مراته هتعرف تهتم ببنتي هتعرف تأكلها ولا تغيرلها انا غلطااانه اني سمعت كلامكم..
ليلي
مش ابوها معاها هناااك يبقي اهدي كده وهو هياااخد باله من بنته
ريناد بسخريه
انتي هتقوليلي علي سيف اللي كان بيتلخبط. في أسمها، انا نفسي افهم اشمعنا يعني مصمم ياخدها دلوقتي وتبااات عنده كمان..
ليلي
ريناد انا دماغي وجعاني لوحدها من اخواتك اللي خدو الاجازه ومطلعين عيني دول مش نقصاكي انتي كمان يا كبيره يا عاقله، وروحي يلا طلعي القهوه للراجل اللي بره ده كمان..
ريناد
اندهي لبابا يجي ياخدها انا رايحه اصحي رضوي عشان تشوف هتعمل ايه يارب بقي تعقل وتروح تشوف شغلها..
_وعند يزن بره حط قداامه حسن القهوه وقاله بهدوء..
حسن
اتفضل يا ابني اشرب قهوتك..
اخد يزن فنجان القهوه بتاعه وقال
ميرسي يا استاذ حسن، اتمني حضرتك بس تكون فااهم موقفي ده اهم. مشروع للشركه واحنا لسه بنبدأ يعني لو فشلت مش هعرف اوصل شغلي للمكانه اللي انا عايزها والبشمهندسه رضوي بدأت المشروع معانا وصعب اجيب مهندس يكمل مكانها معايا كده الدنيا هتخرب..
حسن
لا لا ان شاء الله خير بس انا ما اقدرش اغصب علي بنتي حاجه هي مش عايزاها، انت اتكلم معاها ولو اقنعتها ما عنديش مشكله ده شغلها وهي حره فيه وانا هحاول اقنعها معاك..
يزن
والله يا استاذ حسن هو الغلط مني انا اللي خليت يوسف يستعجل ويجي يتقدم في وقت هما الاتنين مش جاهزين فيه واخويا كمان اتأثر باللي حصل جدا..
حسن بهدوء
الجواز قسمه ونصيب وانا طريقة بنتي كانت غلط معاه وحتي في شغلها غلط انها تسيبه كده وانا هتكلم معاها وان شاء الله خير..
يزن
طيب انا ممكن اتكلم مع رضوي دلوقتي ولا مش هينفع..
حسن
لا عادي هي جايه حالا واتكلم معاها وان شاء الله تقتنع بكلامك والمشروع يكمل وينجح زي ما انتو عايزين...
ــــــــــ #بقلم_الكاتبه_رحاب_القاضي ــــــــ
_وعند عبدالله وروان كان لسه واقف امير عند الباب وروان قالت لعبدالله بخوف...
روان
خليه يمشي من هنا وانا هقولك كل حاجه والله..
عبدالله بجمود
وانا بسأله هو مش بسألك انتي..
_جه امير يمشي بس عبدالله مسكه من هدومه بقوه ودخله جوه الشقه غصب عنه وقفل الباب وقال بحده..
عبدالله
انطق يالااا ايه اللي بينك وبينها يخليك تيجي لحد هنا وكمان كانت هي تروحلك بيتك....
امير بقلق
مراتك تقولك وخليني امشي من هنا احسنلك انت ما تعرفش انا ابقي ابن مين...
طلع عبدالله سلاحه وصوبه في وش أمير وقال بغضب
وانت برضو ما تعرفش انازمين وممكن اعمل ايه، انطق يالا ايه اللي بينك وبينها....
_تزلت دموع روان بخوف ورعب وامير كان في نفس حالتها وقال بتوتر وخوف...
امير
انا وروان كنا مرتبطين اتقابلنا في النادي اكتر من مره وارتبطنا وكنا متفقين بعد ما اتخرج اروح اتقدملها، وفي يوم طلبت منها تجيلي بيتي وهي جات وزي اي اتنين بيحبو بعض قربنا شويه وكله كان برضاها لحد ما ابوها جه وما استنااش افهمه حااجه واخدها ومشي وخلاها تبعد عني وبعدها عرفت انها هتتجوزك وعرفت من صحابها انها هتتجوزك غصب عنها بسبب ابوها..
روان بصدمه
والله العظيم هو كدااب يا عبدالله هو اللي ضحك عليا وانا كنت موافقه بيك..
امير بقلق
بالعقل كده يعني واحده متجوزه وحياتها مستقره انا هقرب منها ليه الا لو هي مفهماني العكس، وانا خلاص مش هقرب منها تاني مدام مكدباني وبتنكر اللي بيني وبينها...
روان ببكاء
يا حيوان انت ازاي كده..
نزل عبدالله سلاحه وقال بجمود
اطلع بره...
_اتنهد امير بارتياااح انه صدقه وهيخليه يمشي، وفعلا مشي بسرعه وفضلت روان مع عبدالله لوحدهم اللي قالها...
عبدالله
كلمي ابوكي خليه يجي..
روان بدموع
والله العظيم هو كدااب ومش كل اللي قاله صح..
عبدالله بغضب
بالعكس ده هو كلامه كله يتصدق هو ايه يعني اللي خلاكي فجأه كده توافقي بيا، وبعد ما اتجوزنا ولا مره حسيت انك فعلا عيزااني ومش مخليااني اقرب منك بحجج مش مقنعه يبقي ده معنااه ايه؟..
سكتت روان وعبدالله بسخريه
انا عارف معنااه كويس وهنشوف بقي ابوكي اللي عشان يخلص منك لبسك ليااا..
_وطلع موبيله وكلم حسن وفي الوقت ده في بيت خسن كان واقف حسن مع طارق قداام شقة عز وقال لعبدالله..
حسن
حاضر يا عبدالله جاي حالا اهو، بس في ايه طمني؟..
عبدالله بجمود
مستنيك يا خالي ياريت ما تتأخرش..
قفل معاه حسن وقال لطارق
انت لسه واقف ادخل اقعد مع الراجل واختك جوه..
طارق
يا بابا انا عايز انام انت ادخل اقعد معاهم ولما يبقي يمشي الرااجل ده ابقي روح لعبدالله..
حسن بحده
وانت لو ما نمتش الدنيا هتطير، وانا مش فاضي اجازتي خلصت والمفروض ابقي في الشغل دلوقتي..
طارق
خلاص دااخل اهو قال وانا فاكر هاخد. الاجازه وانام براحتي..
حسن
نامت علي راسك حيطه ده بدل ما تستغل الاجازه دي وتروح تشوف الكافي بتاعك هتعمل فيه ايه، واسمع ادخل عند. اختك وما تدايقهااش في حاجه...
طارق
انا اصلا مش طايق اتكلم معاها وطبعا حضرتك مش شايف انها غلطانه..
حسن
لا غلطانه وانا عارف ومتأكد انها غلطانه بس انا عارف بنتي وعارف دماغها لو هتعاتبها وهي زعلانه هتعند اكتر مستنيها تهدي وهديها علي دماغها...
طارق
اااه يا بابا يا لئيم..
حسن
اومال اب بالسااهل ما كل واحد فيكم ليه شخصيه مختلفه وبتعامل مع كل واحد فيكم. بالطريقه اللي تنفع معاه مش كل حاجه بالعصبيه والقفش يا طارق..
ابتسم طارق وقال
خلاص روح انت شووف عبدالله وانا هدخل اقعد مع رضوي واا اسمه ايه اللي جوه ده؟..
حسن
يزن.. اسمه يزن الصاوي..
طارق
تمام وابقي وانت جاي هاتلنا حواوشي هقول لماما ما تعملش عشا..
قال كلامه ودخل جوه بسرعه وحسن قال بغيظ
انا مخلف بغل في صورة بني ادم والله..
_ودخل طارق وسلم علي يزن وقعد معاه هو ورضوي اللي كانت مدايقه وقالتله..
رضوي
معلش يا بشمهندس انا مش هقدر اكمل الشغل ده تاني..
يزن
بس المشروع ده مسؤليتك انتي ولو ما كنتيش قده. من الاول كنتي قولتي انما انتي دلوقتي بتسيبي الشغل قي وقت حرج اووي وبتحطيني انا في وش كل حاجه...
طارق بجديه
معاك حق انتي خلصي شغلك وبعد كده امشي براحتك...
رضوي
انا ما بعرفش اشتغل في مكان مش هكون مرتاحه فيه..
يزن
لو علي يوسف هو مش هيجي اللوكيشن تاني انا اللي هكون معاكي وهو خلاص هيمسك الاداره في الشركه..
رضوي بضيق
لو سمحت انا مش هقدر اكمل في الشغل ده ياريت تحترم رغبتي بعد اذنك..
_قالت كلامها وسابته وقامت دخلت اوضتها، وطارق بصلها بغيظ وقال ليزن..
طارق
انا بعتذر جداً يا استاذ يزن هي بس نفسيتها وحشه اليومين دول..
قام يزن وقال
لا حصل خير انا ان شاء الله هتصرف..
طارق
عمي عزالدين ممكن يفيدك في الموضوع ده ولا استني انت ابن يونس الصاوي يعني اكيد مش محتاج مساعده..
ابتسم يزن وقال
معاك حق هو بابا فعلا هيساعدني بس كنت حابب اعتمد علي نفسي..
طارق
ما انصحكش هتفشل وهترجع تقوله الحقني يا بابا..
يزن ابتسم وقال
لا وعلي ايه انا خلاص هخليه يساعدني من الاول احسن..
طارق
ربنا يوفقك هو يوسف كويس يعني حاولت اكلمه اكتر من مره ما بيردش عليا..
يزن بخبث
انا عازمك. النهارده بالليل في يخت بتاع العيله واخليك تشوفه يمكن لما تتكلم معاه يعقل اصله اتجه لطريق اوحش من اللي كان فيه الاول...
طارق بحزن
ليه كده. بس خلاص هات رقمك ونتواصل سوا وانا هجيله، وبعتذر مره تانيه علي طريقة رضوي هي الكبيره اااه بس دماغها اصغر من روفان اللي هي اصغر واحده في العيله..
طلعت روفان من البلكونه جنبيهم وقالت
ومالها روفاان بقي يا عين امك..
ابتسم يزن وطارق قال بغيظ
لامؤخذه بس دي بنت الشغاله بتاعتنا مش من العيله خالص..
روفان
ماما الحقي طارق بيقول عليكي الشغاله بتاعتنا..
_ضحك. يزن بهدوء واخد رقم طارق ومشي وطارق جري وراا روفان وقال بحده..
طارق
تعالي هنا بقي عشان انتي عايزه تتربي من اول وجديد يا حيوانه..
روفان جريت وقالت
يا هنا يا هنااا تعالي بسرعه احكيلك علي سندس..
_طلعت هنا من. اوضتها وهي بتظبط في حجابها وقالت بعدم. فهم..
هنا
في ايه يا روفان بتزعقي كده ليه، ومين سندس دي اللي هتحكيلي عليها..
حط طارق ايده علي بوز روفان وقال بقلق
ما فيش البت دي بتقول علي واحده صحابتها حكايات عيال تافهه اااه يا بت العضاضه..
_مسك. طارق ايده بألم وجريت هي علي هنا وقالت بسرعه...
روفان
سندس دي. حبيبته القديمه. ده. كان بيموت فيها..
هنا بغيظ
والله ده. متعود بقي..
طلعت ليلي من اوضتها وقالت بحده
روفان خدي هنا..
اتخبت روفان في هنا وقالت
لا مش جايه..
طارق بغيظ
اديها. يا ماما دي قليلة ادب ولا بتحترم. عندنا. ضيوف ولا حاجه هيقولو علينا مش عارفين نربي..
ليلي بحده
خدي هنا يا بت انتي..
قربت منها روفان وقالت بخوف
هو اللي عصبني والله يا ماما..
قرصتها ليلي في دراعها جامد وقالت
يا قليلة الادب انا قولت مليون مره لما تبقي عندنا ضيوف تتلمي ولا لا..
روفان ببكاء
خلاص والله يا ماما ايدي وجعتني..
قربت منها هنا وبعدتها عن روفان وقالت
خلاص يا ماما هي مش هتعمل كده تاني..
ليلي
اوعي يا بت انتي من قدااامي بدل. ما اطلعهم. عليكي....
طارق
انتي بتقرصيها بس يا ماما دي اقطعيلها لسانها...
ليلي بحده
انت تخرس خالص انت كمان، وانتي غوري علي اوضتك...
_دخلت روفان اوضتها وهي بتعيط وليلي بصت لهنا بحده وقالت..
ليلي
وانتي مش اخدتي الاجازه يبقي تتنيلي معايا في شغل البيت..
هنا بأحراج
حاضر..
وقالت هنا بصوت عالي
والهوانم اللي كل واحده فيهم قعدالي في اوضتها تعالو هنا..
طلعت ريناد من اوضتها ورضوي كمان اللي قالت
في ايه يا ماما بتزعقي كده ليه؟.
ليلي
انا اعمل اللي انا عايزاااه ومدام. يا روح امك. قعدتيلي في البيت ومش. هتشتغلي يبقي تشوفي شغل البيت معايا، من النهارده. انا هقعد واحط رجل علي رجل وانتو التلاته تنفذو اللي اقوله مفهوم..
طارق قعد جنبيها وقال بصوت واطي
اعملي في بناتك اللي انتي عايزااه بس بالراحه علي هنا..
ليلي بغيظ
قوم من جنبي بدل ما اقلع اللي في رجلي واقطعه عليك..
_ضحكو عليه اخواته وهنا كمان وهو قام بسرعه من جنب ليلي وقال..
طارق
في ايه يا ست الكل انا بهزر معاكي، انا اصلا رايح انام تصبحي علي خير..
_طلع طارق من عندهم وجات ريناد تمشي بس ليلي قالتلها بحده..
ليلي
استني هنا يا بت انتي يلا يا حلوه منك. ليها واحده تنزل تجيب الطلبات وواحده تنشر الغسل وتمسح الشقه وواحده تروق الشقه وتجهز الغدا يلاااا...
بصو هما التلاته لبعض ورضوي قالت
انا هجيب الطلبات من تحت..
هنا
وانا هجهز الغدا واروق الشقه...
ريناد
وسبتولي انا اصعب حاجه مااشي..
ليلي
بطلو رغي وانجزو يلاااا
ــــــــــ #بقلم_الكاتبه_رحاب_القاضي ــــــــ
_وفي اليخت اللي قااعد فيه يوسف، صحي من نومه علي صوت دوشه في الاوضه اللي نايم فيها وبص قداامه لقي يونس قااعد علي الكرسي اللي قدام السرير وباصصله بغضب، رفع يوسف الغطا عليه وقال بضيق وهو بيبص حواليه...
يوسف
في حاجه ولا ايه؟..
يونس
ما تقلقش خليت البت اللي كانت بايته معاك تمشي..
يوسف بأحراج
طيب حاسبتها؟..
ضربه يونس المخده اللي جنبيه وقال بحده
يا برودك يا بجح، مش اتلمينا وبطلنا القرف ده ليه رجعت تاني ولا انت غاوي تتعبنا معاك..
يوسف بضيق
بابا انا عايز انام مش بصحي دلوقتي..
يونس بخبث
كل ده عشان رضوي رفضتك..
بصله يوسف بغضب ويونس قال بهدوء
عزالدين قالي انك روحت واتقدمت لبنت اخوه ورفضتك، طيب كنت قولي اروح معاك كانت هتتكسف ترفضك قدامي..
يوسف بسخريه
وانت بقي كنت هتعمل ايه المره دي، كان ايه العرض اللي هتقدمه ليها عشان توافق زي ما اقنعتها تشتغل معانا عشان تربيني كنت متفق معاها تقرب مني مش كده؟...
يونس بهدوء
لا طبعا انا اتفقت معاها تشتغل وتخليك تلتزم في الشغل، وقتها انت كنت خاطب بنت عمك اصلا فأزاي هخلي واحده تقرب منك وانت خاطب بنت اخويا، واكيد انت عارف برضو ان رضوي مش بالاخلاق دي..
يوسف بجمود
اهو اللي حصل بقي انا اصلا قفلت موضوع الجواز والحب والكلام الفاضي ده..
يونس
امك واخواتك مدايقين عشانك وانا مش هصبر عليك كتير يا يوسف، يعني لو ما اتلمتش واحترمت نفسك وبطلت القرف ده ورحمة ابويا اربيك من اول وجديد...
يوسف ببرود
ما هو انا كده من زمان ايه اللي اتغير؟
يونس
انت قبل كده قولتلي انك هتتغير عشان نفسك مش عشااان حد وانا صدقتك، قولتلي انك عارف ان رضوي عمرها ما هتوافق بيك بس انت بتحبها وهتتغير عشان نفسك وعشان تبقي حد نااجح مش ده كان كلامك..
يوسف بضيق
لقيتها سكه خسرااانه واللي زيك هو اللي بينجح...
يونس بعدم فهم
اللي زيي ازاي؟..
يوسف قام ولبس هدومه ورد عليه وقال بهروب
انا ماشي وهبقي ان شاء الله ارجع البيت
مسكه يونس من دراعه جامد وقال بغضب
استني هنا يالا هو انت هترمي كلمه وتمشي، ولا انا هسيبك تتصرمح تاني زي زمان اكبر كده وخليك راااجل..
يوسف
حاضر اوعدك اني هبقي زيك نسخه مصغره من يونس الصاوي، وقتها لو اتجوزت واحده وخونتها ولعبت بمشاعرها واستغليت حبها ليا هنجح، كنت هنجح مع عائشه لو كملت زي ما انت بالظبط ناجح مع امي ومع كل اللي حواليك....
يونس بقلق
ايه الكلام ده مين قالك اني بخون امك وانت اي حد تصدقه؟..
.
يوسف بدموع
كنت بشوفك انت كنت بالنسبالي مثالي في كل حاجه كنت بتمني اكبر وابقي زيك بس دلوقتي انا بقيت اكره ان حد. يقولي انت شبه ابوك اصلا...
يونس بحزن
حتي لو انا غلط انا عايزك انت تبقي احسن مني ومتبقااش زيي، واقولك علي حاجه كمان سواء اتغيرت وبقيت كويس او لا ده لنفسك. مش ليا ولا لاي حد، انا غلط ااه بس ما كنتش يا حبيبي بغلط زيك كده ما كنتش بدمر نفسي زي ما انت بتعمل وكمان انا كنت بعمل كده من فلوسي مش لسه باخد المصروف من ابويا واروح اصرفه في الحاجات الزباله اللي بتعملها دي..
يوسف
والله ده حقي انك تصرف عليا..
يونس بحده
وحقي اديك بالجزمه ولو فاكر يالا انك هتكسر عيني باللي قولته ده يبقي بتحلم، ودي اخر مره هتكلم معاك واديك فرصه تبقي بني ادم كويس ولو ما سمعتش كلامي هخليك تبقي غصب عنك بني ادم.محترم، وبلاش تدور علي مبررات للغلط خليك راجل وقول انك غلط وابدأ من جديد وانجح بدل ما انت بتدمر نفسك كده، رضوي زمانها دلوقتي بتقول انا صح انا كنت هتجوز واحد زي ده ليه واهلها كمان زمانهم بيقولو كده مع ان المفروض شااب زيك لما يتقدم لاي عيله كفايه اسمه والكل يتمنااه بس انت شوهت وبتشوه في نفسك وانا مش هخسر قدك انت فاللي بتعمله ده ومن حقك عليا اني اربيك كويس لو لقيتك بتتمادي في الغلط، واديني بقولك دي اخر فرصه وما تلومش غير نفسك علي اللي هعمله فيك..
_قال يونس كلامه وساابه ومشي بره اليخت ويوسف قعد مكانه وهو مدااايق وبيفكر في كلام باباه ولاول مره يكون مقتنع بكلامه وكمان خايف وقلقان من رد فعل يونس الصاوي لو غلط تاني..
ــــــــــ #بقلم_الكاتبه_رحاب_القاضي ــــــــ
_وفي شقة عبدالله وروان رااح هناااك حسن معاهم وقالو عبدالله اللي حصل كله..
حسن بجديه
والمطلوب ايه؟
عبدالله بغضب
هو عادي يعني اللي حصل ده يا خالي؟
حسن
لا مش عادي بس اللي حصل حصل وده كان قبل ما تتجوزك بس دلوقتي الوضع اتغير وانا واثق في بنتي انها قفلت الموضوع ده..
بص عبدالله لروان بحده وقال
لا ما اتقفلش عشان لو كان اتقفل ما كانتش بنتك لحد النهارده محسساني انها مغصوبه عليا، ما كانتش لحد النهارده رافضه اني اقرب منها او المسها...
بصلها حسن بغضب وهي اتوترت جداً وعبدالله قال بحده
ها يا خالي لسه برضو مصمم انه موضوع واتقفل..
حسن بضيق
انت عايز ايه دلوقتي يا عبدالله؟
عبدالله بجمود
ولا حاجه عايز زي ما دخلنا بالمعروف نخرج بالمعروف وكل واحد فينا يروح لحاله...
روان ببكاء
علي فكره والله يا عبدالله انا كنت هقولك علي كل حاجه..
حسن بحده
روااان ولا كلمه ادخلي هاتي هدومك وتعالي معايا يلا..
_نزلت دموعها بحزن وبصت لعبدالله اللي سابهم وقااام طلع بره الشقه كلها وهي فضلت تعيط، وحسن زعق فيها وقال...
حسن
ما تخلصي يلااا...
روان ببكاء
والله العظيم امير كداب في كل كلمه قالها لعبدالله يا بابا..
حسن
بس تصرفاتك اللي مليون مره اقولك تعقلي وتتصرفي فيها كويس هي اللي خلت جوزك يكدبك ويصدقه هو، قومي يا روان هو اخره معاكي كلمه هيطلقك وخلصت انما انتي بنتي ولاخر عمري هفضل شايل مسؤليتك وما حدش هيشيل همك قدي ولا غيري..
روان بدموع
انا اسفه يا بابا..
حسن بضيق
قومي واخلصي يلااا...
_قامت روان دخلت اوضتها وهو عيونه اتملت دموع بحزن علي حال بناته وان روان هي كمان هتطلق زي ريناد، مسح دموعه بسرعه وقال بكل حزن...
حسن
هونها يارب عليا انا والله تعبت...
ــــــــــ #بقلم_الكاتبه_رحاب_القاضي ــــــــ
_وبعد شويه في بيت يونس الصااوي كان قااعد هو وشهد مع زيد وقال يونس بهدوء..
يونس
البنات مبسوطين انهم هيقعدو الفتره دي مع بعض..
زيد
انا بجد مش عارف اشكرك ازاي يا يونس بيه انك هتستضيف بنتي الفتره دي عندك في بيتك..
يونس
ما تقولش كده دي زي يارا بنتي بالظبط وربنا يرجعك ليها بالسلامه..
زيد بنبره حزينه
ياسمين ما تعرفش غيركم هي من لما عرفت يارا وبقيو صحاب وهي مش بتتكلم معايا غير عليكم ونفسها كان يبقي عندها عيله زيكم كده، يعني انا لو ما قدرتش ارجع اتمني تفضلو جنبيها وخصوصا انتي يا شهد لانها بتحبك اوووي..
شهد بدموع
والله ان شاء الله هترجع وهتبقي كويس وما حدش هيفضل جنبها ويفرح بيها غيرك انت، وانا هفضل علي طول اكلمك واطمن عليك لحد ما تقوم بالسلامه ان شاء الله..
اتنهد يونس بضيق وزيد رد. عليها وقال
المهم بس ان ياسمين تبقي فاهمه اني مسافر عشان شغلي ما تعرفش موضوع العمليه والعلاج ده..
يونس
اطمن وبعدين هي هنا مع اهلها واخواتها برضو...
زيد
شكرا يا يونس همشي انا بقي وخلو بالكم منها معلش انا اول مره اسيبها فالموضوع بالنسبالي صعب شويه..
شهد
في عنينا والله ما تقلقش..
_ابتسم زيد وسابهم ومشي وشهد قعدت وفضلت تعيط ويونس بصلها بغيظ وقال..
يونس
بتعيطي عليه؟
بصتله شهد بحده وهو قال بتوتر
يعني انتي بتبكي ليه دلوقتي؟
شهد بدموع
الموقف مؤثر يا عديم الاحساس..
يونس
عديم الاحساس؟! وايه كمان هطمن عليك كل شويه دي احنا هنكلمه لما نبقي قاعدين مع بعض وبلاش سهوكه يا شهد...
اتنهدت بضيق وقالت
يوسف فين ما رجعش معاك ليه؟
يونس
هيرجع اصبري بس وهيرجع احسن من الاول كمان، وبعدين بلاش تحسسيني انك رجعالي عشان خاطر عيالك وبس..
شهد بضيق
انا مش فايقه لكلامك ده دلوقتي هروح اشوف البنات..
قرب منها يونس بسرعه وقال
البنات قاعدين مع بعض وكويسين لسه راجعين بقي وبقالنا كتير بعيد عن بعض..
شهد بحده
بالله عليك هو ده وقته..
يونس بجديه
ايوه وقته وهنرجع زي ما كنا تقولي حاضر ونعم وبس...
اتنهدت شهد بحزن وقالت
حاضر يا يونس اللي انت عايزه..
ــــــــــ #بقلم_الكاتبه_رحاب_القاضي ــــــــ
_وفي بيت سيف كانت شرين قااعده وشايله تياا علي رجلها وبصتلها شرين بغيظ وحطتها علي الكنبه جنبيها وقالت لصاحبتها اللي بتكلمها في الفون وقالت..
شرين
اكيد طبعا يا رنا انا مش عايزه اتعب نفسي بالبنت دي، بس انا هستفاد لما تقعد عندي..
رنا
هتستفادي ايه غير الدوشه والصداع..
شرين بخبث
اولا لما هتفضل عندي سيف هينشغل فيها ومش هيفكر في خلفه ومش هيكتشف الحوار القديم لما ضحكت عليه وقولتله ان انا حامل وسقطـ ـ ـت وانا اصلا ما بخلفش، ثانياً بقي انا عايزه اقطع اي علاقه بينه وبين طليقته بدل ما تفضل البنت بينهم وكل شويه يروحلهم ومصاريف البنت طبعا لا انا هخليها عندي وخلاص واجيبلها اي مربيه تاخد بالها منها..
رنا
اممم مش ساهله انتي برضو يا شرين عايزه سيف ليكي لوحدك، بس علي فكره مراته الاولي مش هتفكر في جوزك تاني..
شرين
اشمعنا يعني بتقولي كده؟
رنا
يا بنتي ده انتي شوفتيها معايا وهي قاعده مع يزن الصاوي، هتسيب واحد زي ده وهترجع لواحد اتجوز عليها وطلقها..
شرين بغيظ
ما يخصنيش اصلا المهم تبقي بعيده عن جوزي، واكيد برضو يا حبيبتي يزن الصاوي مش هيبص لواحده مطلقه زي ريناد دي...
رنا
هي بنتها دي اللي بتعيط مش كده، هقفل انا بقي مش ناقصه صدااع وانتي شوفي المسؤليه اللي وراكي يلااا..
_قالت كلامها رنا بكل سخريه وخلت شرين تتعصب من تيا اللي كانت قاعده جنبيها بتعيط وزعقت فيها شرين وقالت بحده..
شرين
هو انتي ما بتتعبيش من العياط يا بنتي ما تسكتي شويه ايه الصدااع ده..
_اول ما زعقت فيها زادت تيا في العياط وبكل عصبيه وحقد ضربتها شرين بالقلم علي وشها وقالت بحده..
شرين
ما تخرسي بقي ايه القرف ده، يا فايزه فااايزه..
_راحتلها الشغاله اللي كانت واقفه عند. باب المطبخ وشافتها وهي بتضرب تيا اللي فضلت تعيط اكتر واكتر وقالت بضيق..
فايزه
تحت امرك يا هانم..
شرين
خدي البنت دي خليها تسكت بأي طريقه انا مش طايقه اسمع صوتها، المهم سيف يرجع تكون سكتت فاهمه..
فايزه شالت تيا بحنان وقالت
حاضر يا دكتوره شرين...
_واخدتها فايزه ودخلت بيها اوضتها وخلتها فعلا تبطل عياااط ونيمتها علي سريرها وبصتلها بحزن وقالت..
فايزه
انا مش عارفه ازاي الوليه اللي بره دي يجيلها قلب تمد ايدها على طفله زيك كده، ربنا ينتقم منها دي اكيد مش طبيعيه وانا والله لاقول للست لمياء واريح ضميري...
ــــــــــ #بقلم_الكاتبه_رحاب_القاضي ــــــــ
_وقدام بيت حسن وقف بعربيته وقال لروان اللي قاعده جنبيه بضيق..
حسن
انزلي وما تقوليش حاجه لامك واخواتك وخصوصا طارق
روان بقلق
هو هيحصل ايه دلوقتي يا بابا، عبدالله هيطلقني
حسن
هنشوف يا روان واللي فيه الخير يقدمه ربنا
روان بدموع
يا بابا انا مش عايزه اطلق والله العظيم امير ده صفحه وقفلتها خالص وكنت هبدأ مع عبدالله من جديد..
حسن بحده
لا ما هو واضح من تصرفاتك معاه...
روان بأحراج
انا كنت محتاجه وقت والله مش اكتر وهو كويس وبيحبني وانا متأكده من حبه ليا وبدأت ادي نفسي فرصه معاه بجد والله..
حسن بجديه
ده. جوزك. يا روان يعني ما فيش حاجه اسمها فرصه في انه ليه حق عليكي وهو مش مقصر معاكي في حاجه يعني لو ربنا لسه كاتب ليكم نصيب مع بعض حطي ربنا ديما في علاقتكم شوفي ايه اللي يرضي ربنا من ناحية جوزك واعمليه وقتها ربنا هيبعد. عنك كل شر وحزن..
روان بجديه
انا هروحله وهتكلم معاه ومش هطلق يا بابا ومش هخسر عبدالله..
ابتسم حسن وقال
كنتي محتاجه درس جامد يفوقك يا روان والدرس اللي انتي فيه صعب ومهما كانت النتيجه هتكسبي نفسك وهتبقي واحده جديده دماغها وتفكيرها هيكبرو انا متأكد من كده..
ابتسمت روان بدموع وقالت
ده بفضل دعمك ليا يا بابا ووقفتك جنبي...
حسن
ده. بفضل ربنا علينا، انزلي يلا وقولي لامك اني هروح الشغل وارجع اخدها ونروح نطمن علي ابن عمك في المستشفي وزي ما اتفقنا ما تقوليش حاجه لحد انتي جايه تغيري جو كام. يوم عندنا وهتمشي..
روان
حاضر يا بابا...
_ونزلت روان وطلعت شقتهم فوووق وراح حسن لشغله....
ــــــــــ #بقلم_الكاتبه_رحاب_القاضي ــــــــ
_وبالليل في عربية يزن كان سايق عربيته ومروح وهو بيتكلم في الفون مع طارق وقاله..
يزن
تمام يا طارق خلاص روحله انت وانا ااا..
_سكت اول ما بص جنبيه من الشباااك وشاف ريناد قااعده علي ترابيزه بسيطه جداً علي النيل وقدامها حمص شامي وماسكه موبيلها وبتقلب فيه، فوقف اربيته فجأه وقال وهو ناسي ان طارق معاه علي الفون..
يزن
مش معقول انا ربنا بيحبني علي الصدف دي..
طارق
صدف ايه انت شوفت جورجينا ولا ايه؟..
ابتسم يزن وقال
انت لسه معايا.. المهم روح انت ليوسف وانا شويه وهجيلكم..
طارق
تمام يا اسطا سلام..
_قفل معاه طارق ويزن ركن عربيته علي جنب ونزل منها ورااح وقف قدام ريناد وقال بخبث..
يزن
كده كتير بجد كل ما اروح مكان الاقيكي موجوده فيه؟!..
بصتله ريناد بتوتر وقالت
لا كده كتير فعلا والله انا ممكن اقوم امشي علي فكره..
يزن قعد قدامها وقال بسرعه
لا لا ده انا ما صدقت اني اشوفك واقدر اتكلم معاكي لوحدنا..
ريناد بقلق
ليه يعني وايه لوحدنا دي علي فكره انت فاهمني غلط خالص
يزن
انتي اللي فهماني غلط..
ريناد بضيق
حتي لو ما ينفعش تقعد معايا كده في اي مكان ولما كنا في النادي قولتلك الكلام ده، انا ظروفي دلوقتي مش زي اي حد عشان اتصرف براحتي..
يزن بجديه
انا فاهم ظروفك كويس بس انا شاايف انه عادي، ولو هدايقك خلاص هقوم اقعد بعيد بس هاتي رقمك
ريناد
نعممم؟!..
يزن بخبث
عشان عايز اكلمك في موضوع مهم فهقعد بعيد عنك شويه ونتكلم شاات علي الفون..
ريناد بقلق
يعني هو موضوع مهم اووي كده؟..
يزن
اوووي اوووي كمان..
وفتح موبيله وحطه قدامها وقالها
اكتبي رقمك عشان اقوم اقعد بعيد والا مش هقوم انا بقولك اهو..
_اتنهدت ريناد بضيق ومسكت موبيله وكتبت رقمها وهو اخد الفون ورااح قعد علي ترابيزه تانيه قدامها وسجل رقمها عنده بسرعه وبعتلها علي الوتساب علي طول..
يزن
"هو انا اطلب ايه اشربه دلوقتي"
فتحت ريناد موبيلها ولما شافت رسالته بصتله بحده وكتبت
"يعني هو ده الموضوع المهم اللي انت عايزني فيه؟"
يزن
"لا انا بسألك اشرب ايه عشان شكلي وحش وانا قااعد كده ومش عارف الراجل ده عنده ايه يتشرب"..
ريناد
" انا هخليه يجيبلك زي اللي بشربه انا، هو انت بتحب الشطه؟ "
يزن
"لا طبعا هو في حد عاقل يحب الشطه"
ريناد بغيظ
"ايوه انا بحب الشطه"
يزن بتوتر
"وانا كمان بحبها جدا ده انا بهزر معاكي"..
بصتله ريناد بخبث وقال للراجل اللي بيقدم الطلبات
لو سمحت واحد كمان زي اللي طلبته للاستاذ اللي هناك ده وكتر الشطه علي قد ما تقدر..
بصلها يزن بخوف وكتبلها
" انتي بتهزري صح؟ "
ابتسمت بهدوء وردت عليه
"مش انت اللي قولت انك بتحب الشطه😁"..
ابتسم لابتسامتها اللي زادتها جمال وكتب
" هَل خُلق الجَمال لتّختصرهُ عيناكِ؟
أم خُلقت عيناكِ لتُِقنِعيني أن لا جمال بعدها؟"
_اول ما قرأت رسالته اتوترت جدا ووشها قلب احمر وبصتله بسرعه بخجل وتوتر وهو كمان اتوتر من تسرعه في اللي بعته ليها وكتب بسرعه..
يزن
" سوري ما كنتش اقصد اتبعتتلك بالغلط "
حاولت تخفي توترها وخجلها منه وردت عليه وكتبت
"ايه الموضوع المهم بقي اللي انت عايزني فيه"..
يزن لنفسه
اقولها ايه بقي دلوقتي افتح معاها كلام فيه، بس لقيتها..
وكتبلها بسرعه
" يوسف ورضوي الموضوع مدايقني وعايزهم يتصالحو"
ريناد
"هما ما فيش بينهم حاجه عشان يتصالحو، موضوع كله قسمه ونصيب"
يزن
"علي فكره اختك لو ما فيش حاجه جواها ليوسف ما كانتش سابت الشغل هي بتهرب من مشاعرها ليه، وبتهرب من انها تحبه وانا متأكد ان حتي بعد اللي حصل ده اخويا لسه بيحبها"
ريناد بجديه
"طيب وهو المفروض نعمل ايه بقي؟"
يزن
"نخليهم يتقابلو نسيبهم بس يهدو شويه وبعدين نخليهم يتقابلو يتكلمو ويحلو الخلاف اللي بينهم ده"
ريناد
"تمام يا يزن شوف وقت يبقي مناسب ونخليهم يتقابلو"
ابتسم يزن وكتبلها
"اتفقنا يا ريناد، قوليلي بنتك رجعت ولا لسه؟"
اتنهدت بحزن وردت عليه
"هي لو كانت رجعت كان زماني انا هنا دلوقتي يعني، بايته عند باباها النهارده"
يزن
"ما فيش داعي تخافي عليها هي مع باباها"
ريناد
"ما انا قولتلك انت مش ام عشااان تحس بيا"
ضحك يزن بهدوء وقال
"معاكي حق خلاص مش هتناقش معاكي في الموضوع ده"
_ابتسمت بهدوء وسابت الفون وفضلت قاعده وهو حط ايده علي خده وفضل مركز معاها وكانت متجهلااه هي جدا، لحد ما اشتغلت اغنبة مياده الحناوي "كان يا مكان" في الكاست جنب الراجل اللي بيعمل حمص الشامي فقالتله هي بتلقائيه..
ريناد
ممكن لو سمحت تعلي الصوت شويه..
_سمع الراجل كلامها وعلي صوت الاغنيه وفي الوقت ده بعتلها يزن وقال...
يزن
"هو انتي بتحبي مياده الحناوي؟"
مسكت الفون وردت عليه وقالت
"ايوه بحبها جدا"
يزن ابتسم وقال
"وانا كمان بحبها اوووي"..
_بصتله ريناد بهدوء وهو ابتسم وعيونه ما نزلتش من عليها فزاد توترها اكتر فقامت بسرعه وراحت دفعت حسابها هي ويزن ووقفت تاكسي واول ما ركبت فيه بعتتله فويس صوت وقالتله.
ريناد
قبل كده عزمتني علي عصير في النادي، وانا رديتهالك وعزمتك النهارده كده. خالصين ياريت بقي ما يبقاااش لينا وجايب علي بعض تاني..
سمع الفويس بتاعها ورد عليها قال
ليه كده بس ده احنا ممكن. نبقي نسايب فيما بعد ويبقي الواجب كله بينا، واقصد بالنسايب دي رضوي ويوسف عشان انتي ديما فهماني غلط..
_سمعت. هي رسالته وابتسمت وطلعت من الشات من غير ما ترد عليه، وكلمت سيف عشان تطمن علي بنتها بس كالعاده ما ردش عليها، فاتنهدت بضيق وقالت لنفسها بقلق...
ريناد
يارب طمني علي بنتي يارب ورجعهالي وهي كويسه وبخير..
ــــــــــ #بقلم_الكاتبه_رحاب_القاضي ــــــــ
_وفي اليخت بتاع عيلة الصاوي كان قااعد طارق مع يوسف اللي قعد. جنبيه وهو بيحطله عصير قدامه وقال بضيق..
يوسف
يعني يزن راح عندكم واتكلم مع رضوي؟
طارق
ايوه بس اتكلم في الشغل بس..
يوسف
وهي رضوي سابت الشغل ليه اصلا، ايه العلاقه بين الشغل واني بحبها او كنت يعني..
طارق بخبث
مش عارف بصراحه بص هي رضوي متسرعه شويه وخصوصا لما تبقي متأثره بالحاجه..
يوسف
وهي متأثره بيا مثلاً، دي اهانتني وطردتني بطريقه وحشه من عندكم خلتني اندم اني اصلا حبيتها من الاول..
طارق
حقك بصراحه بس ما تخليش الموضوع ده يأثر فيك انت بطريقه وحشه، بص احنا شباب زي بعض وانا جيتلك هنا وبكلمك عشان حطيت نفسي مكانك قبل ما اقول ان رضوي اختي..
يوسف
ما بقاش بجد. ليا نفس لاي حاجه..
طارق
يبقي هي معاها حق ترفضك وده اللي كلنا هنقوله لو حصل وجيبنا سيرتك في يوم، ومش احنا بس اي حد بعد. كده هيشوفك وحش وسيرتك هتتجاب مع اي حد بكل حاجه وحشه وهو البني ادم ايه اصلا غير سيره وسط النااس يا يبقي كويس يا وحش وانت مش وحش ما تحاولش بقي توحش نفسك وتشيل غلط مش هيليق عليك..
يوسف بأقتناع
معاك حق انا لازم اتغير للاحسن عشان نفسي مش. عشانها..
طارق
صح انت كده معاك حق..
يوسف بغيظ
هي اصلا ما تستاهلش اتغير عشانها.
طارق
لا بقي كده انا اللي هغلط فيك دي اختي يا عم..
ابتسم يوسف وقال
ما اقصدش. خلاص بس والله انت طلعت جدع ولو طلعت بمسكب من العلاقه دي هو اني عرفت راجل جدع زيك..
طارق
وانا كمان والله كسبت صااحب ابن نااس وطيب زيك كده، قولي بقي ناوي تعمل ايه انت خسرت سنه تاني اهو في الدرااسه..
يوسف بخبث
هعوض السنه الجايه بس السنه دي النااس كلها هتشوف يوسف تاني خالص...
دخل يزن وقاله
هتعمل ايه يعني وايه الكركبه دي. كلها؟
يوسف
فكك اطلبلنا عشا جعان وطارق هيتعشي معانا..
طارق
لا لا بالهنا والشفا ليكم انا هروح عشان الحج بيدايق لما بتأخر بره البيت..
يزن
احنا كمان نفس الحكايه والله هنتعشي بس سوا وبعدين نمشي..
يوسف
امشي انت انا هبات هنا النهارده وهبقي اجيلكم الصبح..
ــــــــــ #بقلم_الكاتبه_رحاب_القاضي ــــــــ
_وفي الوقت ده في بيت الاستاذ حسن كانت قااعده رضوي في اوضتها هي وهنا وروان اللي قالت لهنا بهدوء..
روان
اولا كده انا بعتذرلك يا هنا عشان كنت بعاملك طريقه مش لطيفه الفتره اللي عدت..
هنا
لا ولا يهمك عادي بالعكس انا اللي اسفه يعني متطفله عليكي واخدت مكانك انا قولت لبابا حسن والله اقعد في اي مكان تاني..
روان
لا دي اوضتك انتي خلاص والله..
رضوي بصدمه
روان انتي بتتكلمي جد انتي بتعتذري زي البني ادمين..
روان
اقسم بالله اسيبك واقوم انام انا اصلا فيا اللي مكفيني..
هنا
هو فيها ايه يعني لما تعتذر..
رضوي
لا ما فيش بس روان مش دي طريقتها هي تعترف انها غلطانه ااه بس ما تعتذرش تقولك عادي مش قصدي، فالشخصيه الجديده دي مش واخده عليها..
قعدت ريناد معاهم في الوقت ده وهي ماسكه موبيلها وقالت
البركه في عبدالله بيه القاضي هو اللي غيرها وهيخليها تطبع منه..
روان
وماله لما اطبع منه مش جوزي..
ريناد ابتسمت وقالت
دي بقي عجايب الدنيا السابعه روان بتدافع عن عبداله وتقول جوزي كمان سبحاااانه..
روان
طيب سيبكم مني انا دلوقتي ومن جوزي هااا، وخلينا في رضوي ماما قالتلي اكلمك اقنعك ترجعي شغلك وتعتذري لـ يوسف..
ريناد
وانا كمان اتفق مع كلام ماما..
هنا
وانا كمان يعني الولد جه لحد البيت لو وحش او نيته وحشه زي ما بتقولي ما كانش هيجي..
رضوي بحده
هو في ايه بجد مش انا رفضته وسيبت الشغل عندهم بتفتحو الموضوع تاني ليه، وبصو بقي اللي هتفتح معايا في الموضوع ده. تاني والله هقطع معاها ومش هكلمها اللهم بلغت..
قالت كلامها وسابتهم ونامت وريناد قالت بحده
علي فكره ده اسمه هروب يا رضوي مش رفض، وبراحتك ما حدش هيندم غيرك احنا مش ديما هنلاقي نااس بتحبنا ومتمسكه بينا هي فرصه بتيجي مره واحده والشاطر هو اللي يستغلها صح..
روان بصت لريناد وقالت
ايوه انتي معاكي حق هي فرصه بتيجي مره واحده وعشان كده انا هتنازل المره دي واصالحه..
قامت رضوي وقالت بعدم فهم
تصالحي مين وانتي مالك اصلا تعرفي يوسف منين اصلا عشان تصالحيه..
ضحكو كلهم وهنا قالتلها بخبث
تقصد جوزها ما تتحمقيش اووي كده..
رضوي بتوتر
لا عادي انا مش عايزاها بس تحتك بواحد زي ده مش كويس ومش محترم..
ريناد بخبث
ام ام وايه كمان قولي احنا سامعينك..
ما ردتش عليها رضوي ورجعت نامت وروان قالت
انا كمان هروح انام تصبحو علي خير..
_قامت روان وكانت ربناد هتقوم بس هنا قالتلها بسرعه بصوت واطي وقلق..
هنا
استني يا ريناد انا عايزه اسألك علي حاجه..
ريناد
حاجه ايه؟
هنا بتوتر
بصي من غير ما تفهميني غلط، هي مين سندس دي وايه علاقتها بطارق وما تقوليش لحد اني سألتك وعمري ما هسامحك لو قولتي لحد..
ضحكت ريناد وقامت رضوي بسرعه وقالت بخبث
لا مش هنقول لحد ما تخافيش بس انتي ليه بتسألي؟..
اتوترت هنا اكتر وقالت
عادي يعني يا رضوي فضول مش اكتر..
ريناد
بصي هو احنا مش من حقنا نقولك المفروض اللي يحكيلك حاجه زي دي هو طارق..
هنا
لا خلاص هو يحكيلي ليه اصلا انا بقولكم عايزه اعرف فضول مش اكتر وما حدش يقوله اني سألتكم..
رضوي
ما تقلقيش مش هنقول وسندس يا ستي دي كانت واحده صاحبتي في ثانوي بس اصغر مني في سن طارق ما اعرفش ازاي لفت عليه واتفاجئت انهم مرتبطين بس بعد فتره خانته مع صاحبه وطارق عاش اسوأ فتره في حياته بسببها وبسبب صاحبه الكداااب اللي كان عامل فيها انه بيحبه..
ريناد
ولولا ان عبدالله وقف جنبيه وجابله حقه كان طارق خسر حاجات كتير بسببهم هما الاتنين...
هنا بسخريه
بقي كل ده حصله وليه نفس يحب تاني..
ضحكو هما الاتنين وريناد قالت
ما هو الحب اللي بجد ده هو اللي بيجي من غير ترتيب لاكتر شخص كنا بنقول عليه ما ينفعش ونلاقي نفسنا فجأه وقعنا فيه يبقي هو ده الحب اللي بجد..
رضوي
لقحي عليا لقحي كان القرد نفع نفسه يا ست الفليسوفه..
ريناد
وغصب عنك كمان واتفلسف براحتي، وياريت تفكري كويس قبل فوات الاوان يا رضوي..
رضوي بجديه
انا بعمل الصح واللي هيريحني يا بنات، يلا بقي تصبحو علي خير بره يا ريناد وانتي يا هنا اقفلي النور..
ريناد بقلق
وانا هيجيلي نوم ازاي وبنتي بعيد عني ياتارا نامت ولا بتعيط ومين بيهتم بيها بالليل لما تبقي عايزه تغير او تنام في حضني، منك لله يا سيف..
هنا
ربنا يطمنك عليها ان شاء الله وهي معاها باباها ما تقلقيش....
ــــــــــ #بقلم_الكاتبه_رحاب_القاضي ــــــــ
_وبعد كام يوم في بيت يونس الصاوي كانت قاااعده شهد في اوضة يارا وبتسرحلها شعرها كالعاده ويارا قالتلها بعدم تصديق...
يارا
يعني بابا جاي معانا واحنا رايحين لزين مش معقول..
شهد
ليه يعني مش معقول هو مش زين ابن عزالدين صاحبه لازم يروحله ويعمل الواجب..
يارا بقلق
طيب هو عادي يعني ياخدني انا معاكم..
شهد
ايوه عادي هو انتي مش عايزه تطمني علي زين انتي كمان..
يارا بضيق
لا مش عايزه ومش هروح اصلاً..
خلصتلها شهد شعرها وقعدت قدامها وقالت
ليه مش عايزه تروحي ده انا فكرتك هتفرحي..
يارا بدموع
عشان هو اصلا بطل يكلمني توقعت لما بابا هيرجعلي موبيلي هلاقيه كان مكلمني او باعتلي رسايل بس مالقيتش حاجه ولما انا اتنازلت وكلمته ما ردش عليا ولا علي رسايلي..
شهد
ما الواد تعبان وبعدين قولي ان انا جيباكي معايا او رايحه لطنط فيروز مثلا..
يارا بعند
لا مش رايحه برضو..
شهد بغيظ
دماغ ابوكي انتي كمان نفس العِند، وبراحتك ما تجيش بس علي فكره هو مش بيكلمك عشان ابوكي هو اللي قاله يعمل كده..
يارا بصدمه
ايييه؟ بابا ازاي يعني انتي قولتي لبابا ولا ايه يا نهار اسود..
شهد
مش انا اللي قولت زين هو اللي راحله واتقدملك كمان..
يارا بصدمه
لا لا انتي بتهزري يا ماما او انا بحلم لا مستحيل يكون ده. بجد، زين راح لبابا وخطبني يعني بابا عارف اللي بيني انا وزين وساكت كده ما جاش ولع فيا..
شهد بثقه
ادعيلي يا روح ماما بس ابوكي بيختبره..
يارا
بيختبره ازاي؟
شهد
يعني لا هيكلمك ولا هيشوفك تاني غير قدامنا لحد ما يعمل العمليه ويخف ويتخرج من الكليه بتاعته وبعدين يبقي ابوكي يقرر هيوافق بيه ولا لا...
يارا
نعم نعم وانا هستني كل ده..
شهد
هو انتي كنتي لاقيه واحمدي ربنا انه ما صممش علي حامد ابن عمك وقال انك مخطوبه..
يارا
اولا انا مش. مخطوبه ومش هتجوز حامد ده لو ايه حصل، ثم ان بابا يلاقي فين عريس لبنته زي زين ده المفروض كان وافق علي طول اصلا..
شهد
قولي كده لابوكي بتقوليلي انا ليه؟
يارا
ما انا اقدرش اقول لبابا كده فانتي اللي هتقوليلو يا مامي يا سكر انتي..
شهد بسخريه
دلوقتي بقيت سكر ومن يومين كنتي مخصمااني ومش راضيه تكلميني..
يارا
ما دي كانت خطة بابا والله عشان تتصالحو..
شهد
نعم يا اختي خطه؟!
يارا
ااه والله حتي اسألي يزن هو كان عارف ومتفق مع بابا وخلوني اتدبس معاهم في الخطه دي..
شهد بضيق
ماشي يا يارا روحي شوفي هتلبسي ايه يلا عشان لما يجي باباكي نمشي علي طول..
_قامت يارا وراحت تغير هدومها فعلا وطلعت ياسمين من الحمام وهي بتنشف شعرها فأبتسمتلها شهد وقالت...
شهد
تعالي با حبيبتي عشان اسرحلك شعرك..
ياسمين
مش عايزه اتعب حضرتك يا طنط..
شهد
لا مافيش تعب ولا حااجه يلا تعالي اقعدي قدامي..
ابتسمت ياسمين باتساع وقالت
حاضر..
_قعدت ياسمين قدامها وشهد بدأت تسرحلها شعرها وقالتلها بهدوء..
شهد
شعرك. حلو اووي بسم الله مشاء الله، قوليلي كلمتي باباكي؟
ياسمين
ايوه كل شويه بيكلمني يطمن عليا وزعلان عشان لما كان بيسافر يوم واحد كنت بعيط وببقي زعلانه لحد ما يرجع بس المره دي وجودي معاكم هنا مش مخليني زعلانه زي كل مره..
شهد
طبعا عشان انتي في بيتك وربنا يرجهعولك بالسلامه يا حبيبتي...
وفتح يوسف في الوقت ده الباب وقال
انا جييييت.. ايه ده مين دي؟..
شهد بحده
مش تخبط الاول يا حيوان انت..
ياسمين قامت وقالت بتوتر
ما هو يا طنط اكيد ما كانش يعرف ان انا هنا
يوسف
ايوه والله ما كنتش اعرف، بس افتكرت يزن قالي انك هتقعدي هنا لحد باباكي ما يرجع والله زعلت اووي يا ياسمين لما عرفت اللي عنده وو..
شهد
عنده ايه يا يوسف ما تهزرش ده سافر شغل وراجع، وتعالي معايا يلا عشان تقولي انت كنت فين بقي..
_واخدته شهد وطلعو بره وقفلت الباب وراهم وقالتله بعصبيه..
شهد
انت متخلف البنت ما تعرفش ان باباها تعبان..
يوسف
ايه الجو الحمضان ده افرض مات دلوقتي مش هتعرف يعني..
شهد
فال الله ولا فالك وان شاء الله يرجعلها بالسلامه، قولي بقي ناويت علي ايه؟
يوسف
تعالي بس نقعد ونتكلم الاول وقوليلي انتي ليه روحتي لبابا وخلتيه يرجع، ليه عملتي كده يا ماما؟..
قعدت شهد قداامه علي الكنبه وقالتله
عشانكم انتو وعشان انا ما اعرفش اعيش من غير جوزي دي الحقيقه..
يوسف بضيق
حتي بعد كل اللي عملو..
شهد
اهو عدي وخلاص مش مهم..
يوسف بحزن
انا اسف عارف اني سيبتك واختفيت في وقت ما كنتي محتجالي، بس كان غصب عني والله..
شهد
خلاص يا يوسف المهم انك تفوق لنفسك وتبقي كويس وتخليني افتخر بيك وبتربيتك زي ما فخوره بأخواتك اهو علي الاقل تبقي تضحيتي عشانكم بفايده..
يوسف باس ايدها وقال
والله العظيم ما هعمل حاجه تزعلك تاني، ولو عايزه تطلقي ده حقك وانا هقف جنبك..
شهد
لا يا حبيبي انا مش هطلق بالعكس انا هكمل مع ابوك لحد. اخر عمري، يعني حتي لو سيبته وقولت للكل انه كان بيخوني وانه وانه ونتكلم ونجرح انا وهو في بعض هيفيد بأيه غير اني هتعبكم انتو وهخلي الناس تتكلم علينا وفي الاخر العمر عدي ومش هيرجع تاني فاضل فيه حاجات قليله خليها تعدي هي كمان زي ما عدي اللي قبلها، وابوك مش وحش بالعكس ده اب كويس جدا وبيحبكم اكتر من نفسه وبيحبني كمان وعملي حاجات كتير حلوه وخلاني احقق كل اللي نفسي فيه وانا سامحته خلاص..
يوسف بحزن
الكلام ده يصدقه يزن وتضحكي بيه علي يارا بس انا عارف ومتأكد انك مش عايزه الحياه دي معاه ومن زمان مش من دلوقتي..
شهد بضيق
خلاص بقي طيب انسي كل اللي عدي ده وخلينا نبدأ من جديد..
يوسف
ما انتي قولتي دلوقتي يا ماما ان العمر عدي خلاص هتبدأي في ايه؟
شهد بدموع
بتكلم عليك انت انا هكمل حياتي كده زي ما هي وراضيه بيها وهستناك انت واخواتك تعوضوني عن شوية التعب اللي شوفتهم دول لما اشوفكم مبسوطين..
يوسف باس ايدها مره تانيه وقال
انتي اعظم ام في الدنيا واطيب واحن واحده هشوفها في حياتي واحنا كلنا وصلنا للسن ده واحنا ناجحين وكويسن عشان انتي معانا يا ماما..
شهد مسحت دموعها وقالت
وانا مش عايزه غير اني هشوفكم كويسين، وانت تصالح ابوك وترجع شغلك وتنجح عشان تفرحني فاهم ولا لا..
يوسف ابتسم وقال
تحت امر حضرتك. يا شهد هانم انتي بعد كده تؤمري ويوسف ينفذ..
ــــــــــ #بقلم_الكاتبه_رحاب_القاضي ــــــــ
_وفي بيت الاستاذ حسن كان قاااعد حسن مع ريناد بيفطرو وطلعت عنده ليلي وقالت..
ليلي
كلمت روان شوفتها وصلت ولا لسه يا حسن؟
ريناد
انا كلمتها يا ماما قالت هتوصل بعد ساعتين كده..
ليلي
توصل بالسلامه يارب..
ريناد
ها قولتو ايه في موضوع الشغل بتاعي..
ليلي
والله انا شايفه مالوش لازمه طلوعك ودخولك اليومين دول وبنتك صغيره خليكي معاها واهتمي بيها..
حسن
بالعكس يا ليلي هي تطلع وتشتغل وتعتمد علي نفسها واحنا ناخد. بالنا من تيا لما تبقي هي في شغلها اومال هنساعدها وندعمها ازاي..
ليلي
يا اخويا ندعمها ما قولتش حاجه بس انا خايفه عليها دي بتغرق في شبر مايه..
ريناد
ما هو انا عشان كده يا ماما عايزه اطلع واشتغل واتعامل مع الناس واعتمد علي نفسي مش عيب ولا غلط علي فكره..
ليلي
طيب اصبري شويه اخوكي يفتح الكافي بتاعه واشتغلي عنده..
ريناد
لا لا انا عايزه اشتغل في مكان لوحدي ما حدش يعرفني فيه، وبعدين اطمني ده مطعم كبير جدا وراقي اووي..
ليلي بغيظ
هتروحي تخدمي علي النااس وتقوليلي شغل..
حسن
ايوه شغل يا ليلي والله انا اعرف شباب خرجين كليات قمه وعشان ظروف البلد بيشتغلو زي ما ريناد رايحه تشتغل ، وكويس اووي انها لقيت الشغل ده اصلا غيرها مش لاقي ويتمنااه..
ريناد
وافقي بقي يا ماما انا مرتاحه للموضوع وحابه الشغل..
ليلي بضيق
اللي عايزه تعمليه اعمليه..
ابتسم حسن لريناد وقال
اعتبريها موافقه خلاص وشوفي هتبدأي من امتي..
_فرحت ريناد وفي الوقت ده الباب خبط فقامت فتحت بسرعه وكان سيف وهو شايل تيا ومرجعها ليها، اخدتها منه ريناد بسرعه زحصنت بنتها بدموع وقالت..
ريناد.
وحشتيني اووي يا حبيبة ماما..
سيف
ما كنتش فاضي اجيبهالك اليومين اللي عدو..
ريناد بحده
ده اذا اخدتها تاني اصلا ابقي اتكلم واتحجج براحتك، وبعدين البنت مالها مسهتنه كده ليه ووشها احمر كده ليه برضو هي وقعت منكم؟
سيف بغضب
تيا كويسه اهي وانا وقت ما احب اخدها هاجي اخدها برضااكي او غصب عنك..
جه حسن في الوقت ده وقال بعصبيه
ده غصب عنها اللي هو ازاي يعني يا سيف؟
سيف بحده
زي ما سمعت ولا هتخلي الهانم بنتك تحرمني من بنتي وتحددلي اشوفها امتي وما اشوفهاش امتي..
حسن
اسمع يالا انا عملت اللي يريحني قدام ربنا واتفقنا تاخد البنت يوم واحد في الاسبوع انما بقالها 5 ايام عندك وكل يوم تقولنا هتجيبها وما تجيبهاش دي اسمها قلة ادب وانت مش راجل اخد. بكلمته لا ده انت عيل، والبنت مش هتاخدها تاني لا يوم ولا حتي ساعه عايز تشوفها ارفع قضية رؤويه وشوفها عن طريق المحكمه انما الهرجله دي واللعب في الكلام ما ينفعش معايا..
ريناد بقلق
يا بابا اصلا تيا جايه من عنده تعبانه اهي ومش عارفه مالها..
حسن
خدي بنتك وادخلي جوه واللي عندي قولته، وحاجه كمان بعد كده في نفقه هتدفعها انت غصب عنك لبنتك ده حقها من ابوها وكمان نفقه الحاضنه لبنتي ونفقة السكن ونفقة الهدوم والعلاج ولو قصرت فأي حاجه من الحاجات دي شهر واحد بس انت مش هتقدر تشوف بنتك حتي بالمحكمه، فأتلم احسنلك وريناد وراها اهلها انت مش هتقدر تعملها حاجه فاهم ولا مش فاهم..
_بصله سيف بغيظ ومشي وحسن اخد بنته ودخل جوه وكانت ريناد مدايقه وقلقانه من شكل تيا وليلي قالت..
ليلي
هكلم الدكتوره ونحجز كشف نروح نطمن علي البنت..
ريناد بدموع
كانت معيطه اووي يا ماما وصوتها رايح من كتر العيااط، هما عملو فيها ايه دول منهم لله، بس انا غلطاانه اني سمعت كلامكم وسيبتلو بنتي..
حسن بص لتيا بقلق وقال
اهدي يا ريناد تلاقيها واخده برد بس ولا حاجه..
ريناد بقلق
هو انا مش عارفه بنتي يا بابا وو.. ايه ده دي حد ضربها بص كده علي رجلها زي ما يكون حد قارصها فيها..
ليلي حات بسرعه وقالت
ااه يا حسن البنت رجلها مزرقه ده وضهرها كمان..
حسن بضيق
حد ضربها ايه انتي وهي بلاش سوء الظن ده هو حد. يضرب طفله، تلاقيها وقعت او حاجه قرصتها..
ريناد ببكاء
والله انا لو سمعت كلامكم تاني وخليته ياخدها ابقو تفو في وشي..
ــــــــــ #بقلم_الكاتبه_رحاب_القاضي ــــــــ
_وفي المستشفي عند. زين كانت قااعده فيروز جنبيه وهما بيتفرجو علي الموبيل بتاعتها وقالتله..
فيروز
فاكر الفديو ده صورتهولك من 15 سنه دي كانت اول مره انت تروح وتجيب حاجه لوحدك من تحت وتطلع..
زين ابتسم وقال
مش فاكر انا اي حاجه من الحاجات دي، بس معقوله انتي لسه محتفظه بيها لحد دلوقتي؟
فيروز
طبعا محتفظه بالحاجات دي كلها واكتر من كده هو انا معايا غيرك اهتم بيه، نسيت اقولك صح يونس الصاوي ومراته ويارا جاين دلوقتي يطمنو عليك..
زين بأهتمام
استني بس هو انا سمعت صح يارا جايه؟
فيروز
ايوه والله يارا جايه وانا هخليها تقعد معاك وتتكلمو مع بعض كمان..
زين
ده اذا كانت طيقاني بعد ما كنت بطنشها وهي بتكلمني..
فيروز
قولها كل حاااجه يا زين عشان تبقي عارفه انك بتعمل كده عشان تحاافظ عليها ليك مش بمزاجك يعني..
زين اتنهدت بضيق وقال
مش عارف يا ماما ربنا يستر بقي...
دخل عندهم عز في الوقت ده وقال
فيروز تعالي عايزك...
زين
في حاجه ولا ايه يا بابا؟
عز
لا يا حبيبي ما فيش حاجه هنتكلم في حاجات كده تخص اولياء الامور....
فيروز
اولياء امور ايه عايز ايه انت؟...
عز بغيظ
يا وليه عايزك في حاجه خاصه مش هينفع اقولها قدام الواد ما تفتحي مخك..
فيروز
طيب جايه ما تقلقش يا زين تلاقيها حاجه تافهه زي عادته..
عز
والله انا ما هرد عليكي احتراما لابني بس يخف ويطلع من هنا ولينا كلام تاني يا وليه يا قرشااانه انتي..
وطلعو هما الاتنين وقالتله هي بضيق
نعم عايز ايه؟
عز
قدام ابنك تتعاملي معايا بطريقه كويسه ومش قدام ابنك بس لا ده علي طول..
فيروز
انا اتعامل زي ما يعجبني وانت مطلعني عشان تقولي الكلمتين دول..
عز
دفعتي ليه مصاريف المستشفي؟
فيروز
مش فاهمه السؤال..
عز. بحده
انا كنت هدفع مصاريف المستشفي والعمليه لابني دفعتيهم ليه؟
فيروز بجديه
تفتكر بعد ما ربيته عشرين سنه لوحدي هستني منك حاجه، اطمن عليا عامله حسابي لكل حاجه ابني محتاجها كويس اووي، ولو فاكر اني خليته يجيلك ويعرف انك ابوه عشان محتاجه منك فلوس تبقي غلطان انا خليته يعرفك عشان للاسف هو اللي كان عايز كده وكان مصمم يعرف مين ابوه، انما انا مش مستنيه منك حااجه، مش مستنيه من واحد اتخلي عني بكام كلمه علي ورقه انه يبقالي سند انا وابني انت كتر خيرك علي وجودك وبرضو انا عامله حسابي انك هتتخلي عنه في اي وقت واطمن برضو انا هعرف احتوي ابني..
عز بضيق
انتي ايه السواد اللي جواكي ده كله؟
فيروز بسخريه
البركه فيك وفي عمايلك معايا...
جه في الوقت ده يونس وفيروز ومعاهم يارا ويونس قال
احنا جينا مستشفي ولا جينا محكمة الاسره..
عز بضيق
مش ناقصين خفة دمك علي فكره، ايه اللي جابك؟
يونس
مش جايلك انت انا جاي اطمن علي زين..
شهد سلمت علي فيروز وقالتلها
الف سلامه علي زين يا فيروز ان شاء الله هيقوم بألف سلامه..
فيروز
الله يسلمك يا شهد، عامله ايه يا يارا؟
يارا بهدوء
الحمد لله يا طنط والف سلامه علي زين..
رد عليها عز وقال بأبتسامه واسعه
الله يسلمك يا حبيبتي تعالي سلمي علي حماكي..
.
يونس بحده
عزز مش وقته..
عز بخبث
معاك حق مش وقته تعالي بس عايزك في موضوع مهم..
يونس
طيب استني اخش اطمن علي الواد..
عز
مش. هيطير الواد اهو قاعد تعالي بس معايا...
مشي عز هو ويونس وفيروز قالت ليارا بخبث
ادخلي يا يارا زين مستنيكي وانا ومامتك هنشرب حاجه تحت وجايين.
شهد بقلق
لا لا لو ابوها جه وشافها لوحدها هنا هيولع فيا وفيها..
فيروز
ما تقلقيش مش هنطول يلا بس الواد عايز يقولها حاجه وهما لوحدهم،وبعدين ما هو الموضوع بقي بينا كلنا اهو يا شهد خلاص بقي..
شهد
ماشي وربنا يستر كله في الاخر هيجي علي دماغي انا يا فيروز..
_ومشيت شهد مع فيروز ويارا اخدت نفس عميق وخبطت علي الباب بتاع اوضة زين اللي قال..
زين
ايوه اتفضل...
_تفتكرو بقي هيحصل ايه؟
ــــــــــ #بقلم_الكاتبه_رحاب_القاضي ــــــــ
_وفي الوقت ده في بيت عزالدين الباب خبط وفتح طارق وكان واقف قدامه ست كبيره شويه في السن ومعاها راجل في نفس سنها وبيبصوله بعصبيه وغضب..
طارق بقلق
في ايه؟
كوثر
انت الاستاذ حسن؟
طارق
لا انا ابنه انتو مين وعايزينه في ايه؟
مجدي
شايفه يا كوثر بنت اختك قاعده مع راجل غريب وابنه الشحط ده..
طارق بحده
جرا ايه يا جدع انت ما تحترم نفسك شحط في عينك اتكلم كويس..
مجدي
انا اتكلم زي ما انا عايز ودلوقتي حالا تندهلنا هنا بنت سيد..
طارق
وانتو مين اصلا وتقربو لهنا ايه؟
كوثر
انا خالتها يا دلعادي ومش هنمشي من هنا غير لما ناخدها معانا..
طارق بجمود
تاخدوها معاكم اممم طيب وسعو كده بس انهدلكم بابا يتصرف معاكم..
مجدي
ايوه يا اخويا انده بابا طول الباب وبيقول بابا زي العيال..
طارق بغيظ
اللهم. طولك ياروح احترم شيبتك يا حج عشان افضل محترمك انا كمان..
_وخبط طارق علي باب شقتهم وبص تاني لمجدي وافتكر كلام هنا علي جوز خالتها اللي كان بيحاول يتحرش بيها واتحولت ملامحه للغضب والعصبيه و؟؟.
_تفتكرو بقي هيحصل ايه؟
ــــــــــ #بقلم_الكاتبه_رحاب_القاضي ــــــــ
_وفي الصعيد كان قاعد عبدالله مع كمال في الجنينه بتاعت بيتهم وكمال قاله بضيق.
كمال
هو ايه اللي بعد. شهرين دا ان شاء الله؟
عبدالله
هتتجوز اسرار بعد. شهرين
كمال
وليه مش. دلوقتي ما هي موافقه
عبدالله
هي موافقه بس انا مش موافق وبعدين هي مش دي اول جوازه ليها وعلي الاقل نعمل ليله علي الدايق وتفرح..
كمال
مالكش دعوه بالموضوع ده كفايه انها هتتجوزني..
عبدالله
بص انا مش ناقص فقعة مراره هتتجوز بن شرقي يعني قال كفايه هتتجوزني، واصبر شويه كلهم شهرين وهتتجوز..
كمال
طب انا مسافر الاسبوع الجاي انت هتكملي باقي اورااق المشروع بتاعي اللي هيبقي هنا صح؟
عبدالله قام من جنبيه وقاله
حاضر يا كمال بس انت مسافر تعمل ايه؟
كمال
هخلص حاجات في الشغل في القاهره..
عبدالله
طيب ابقي روح لسيف وعايزك تشوفلي الدنيا هناك ايه عشان اخر مره كده حسيت في لخبطه معاه ومخبي عليا حاجه..
كمال
تمام هتصرف انا..
_وسابه عبدالله وطلع اوضته واول ما دخل اتفاجئ بروان قاعده ومعاها عليااء اللي قالتله بسرعه..
علياء
ورحمة ابوك لتقعد وتتكلم معاها كده بالهداوه، اهي جات لحد. عندك...
بصلها عبدالله بغضب وطلع موبيله وقال بجمود
هكلم السواق يوصلها لحد ابوها انا ما قولتلهاش تيجي وما بقيتش عايزها خلاص.
روان بدموع
وانا مش همشي يا عبدالله غير لما تسمعني..
علياء
استهدي بالله يا ابني مش من اول مطب كده عايز تنهي كل حاجه..
روان بحزن
قوليلو فالح بس يقول انه بيحبني بيحبني وهو مش راضي يصدقني ولا عنده ثقه فيا اصلا..
عبدالله بجمود.
تصبحي علي خير يا امي اتفضلي نامي..
بصتلها روان بخوف وهي قالت
طيب نتكلم الاول..
عبدالله بنبره غاضبه
تصبحي علي خير يا امي هي مش عايزه تتكلم تمام انا هتكلم معاها بس بمعرفتي..
علياء بتوتر
وماله يا ابني زي ما تحب تصبحو علي خير..
طلعت علياء وروان قالتلها بخوف
استني يا عمتو بس رايحه فين..
_كانت لسه هتروح وراها بس عبدالله مسك ايدها جامد وسحبها ناحيته وقال بحده..
عبدالله
علي فين يا روان مش جايه تقلبي عليا الترابيزه خلينا بقي نخلص الحوار ده كله بيني وبينك من غير لا ادخل اهلك ولا اهلي..
روان بخوف
انت هتعمل ايه؟
عبدالله بخبث؟؟..
ــــــــــــــــــــــــــــــــــــــــــــــــــــــــــــــ
#بقلم_الكاتبه_رحاب_القاضي
