رواية مكتوبة علي اسمي الفصل الرابع عشر 14 الجزء الثاني بقلم ملك ابراهيم
#الحلقة_14
#الجزء_الثاني
#مكتوبة_على_إسمي
#بقلمي_ملك_إبراهيم
قاعدة طول المحاضره متوتره وخايفه من اللي بيحصل.
بعد انتهاء المحاضره آيات قامت بسرعه عشان تخرج او بمعني اصح تهرب من الكلام معاه لكن رساله منه وصلت ل تليفونها وقفتها.
"آيات ياريت تيجي مكتبي عايز اتكلم معاكي في موضوع مهم"
قربت بنت زميلتها منها واتكلمت معاها: آيات وقفتي ليه؟ تعالي نقعد نشرب حاجة في الكافتيريا قبل المحاضره التانيه.
آيات بصت للبنت وهي محتاره ومتردده ومشيت معاها علي الكافيتريا وهي بتفكر بقلق وبتسأل نفسها ياترى عايزها ليه وتروح مكتبه فعلا ولا لا!!!
رواية مكتوبة على إسمي بقلمي ملك إبراهيم.
في شركة الجارحي.
عامر وصل الشركة ودخل مكتبه وكان متحمس يشوف رد فعل آيات في الاجتماع لما يقولهم إنه هيبقى موجود علي طول في الشركة ومش هيسافر تاني..
بيسان وهاجر دخلوا الشركة وهاجر وقفت قدام بيسان وقالت: بيسان روحي انتي على غرفة الاجتماعات وانا هروح مكتب شريف اتكلم معاه.
بيسان ضحكت وقالتلها: ماشي من لقى أحبابه نسي اصحابه .
هاجر ضحكت وهي ماشيه في اتجاه مكتب شريف وبيسان كملت طريقها لغرفة الاجتماعات، وهي في طريقها قابلت امجد وكانت مكسوفه منه بعد ما اتهمته انه سحب منهم المشروع عشان ينتقم منها وكانت عايزه تعتذر له علي سوء ظنها فيه.
امجد اول لما شافها قرر يتجاهلها وقرب من السكرتيرة واتكلم معاها وطلب منها تجهز غرفة الاجتماعات بسرعه عشان الاجتماع هيبدأ بعد ربع ساعة.
بيسان قربت منه ووقفت قدامه واتكلمت بخجل: امجد..
امجد بصلها واتكلم برسميه: اهلا يا باشمهندسه.. الاجتماع هيبدأ بعد ربع ساعة.
بيسان بخجل: امجد انا اسفه.
امجد بصلها وقال بدهشة: اسفه على ايه؟
بيسان: لاني ظلمتك.. انا عرفت ان عامر هو اللي سحب مننا المشروع.. مش انت ولا شريف.
امجد بصلها اوي وقال: اللي حصل ده خلاني اعرف انتي بتشوفيني ازاي! شايفه اني ممكن اضرك في شغلك عشان انتقم منك لانك محبتنيش زي ما انا حبيتك.. بس اطمني يا باشمهندسه.. انا عارف ان الحب مش بالعافيه وصدقيني مش هضغط عليكي تاني.
بيسان اتصدمت من كلامه وقالت: امجد انا محبتش في حياتي غيرك بس في حاجات انت متعرفهاش.
امجد حاس براحة لما اعترفت انها بتحبه بس كان هيتجنن ويعرف ايه الحاجات اللي بتمنعها تكون معاه وبتبعدهم عن بعض.
امجد: ممكن اعرف ايه الحاجات اللي انا معرفهاش وبسببها بتبعدي عني كل ما احاول اقرب منك؟؟
بيسان سكتت وخفضت وشها في الأرض.. امجد بصلها بضيق وقال: عارف انك هتسكتي.. برحتك يا بيسان بس لازم تعرفي انك كده بتسدي اي طريق بيني وبينك وانا تعبت من كتر ما استنيتك تيجي وتحكيلي ايه اللي بيبعدك عني بس اوعدك من اللحظة دي هعرف بنفسي كل اللي مخبياه عني.
امجد بصلها بنظرة طويله بعد ما انتهى من كلامه وسابها ومشي وبيسان وقفت مكانها مصدومة ومش عارفه تعمل ايه.
رواية مكتوبة على إسمي بقلمي ملك إبراهيم.
في غرفة مكتب شريف.
هاجر خبطت علي باب الغرفه وفتحت الباب وطلت منه وقالت برقه: ممكن ادخل؟
شريف كان قاعد علي مكتبه بيراجع أوراق مهمة.. بصلها وهز راسه وقال بجمود: اتفضلي.
هاجر دخلت وهي مكسوفه منه وشريف بص علي الاوراق اللي قدامه واتجاهلها تماما.
هاجر وقفت قدامه وقالت: شريف.. انت لسه زعلان مني بسبب اللي قولته إمبارح؟
شريف رد وهو بيبص علي الورق اللي قدامه: وانتي شايفه انك عملتي حاجة تزعل إمبارح ؟؟
ردت هاجر برقه: لا!
شريف رفع وشه وبصلها وقال بغيظ: شايفه انك معملتيش حاجة تزعل ؟؟
هاجر اتوترت جدا من نبرة صوته القوية ونظراته الحادة وقالت: اناا..انا كنت مضايقه وفاكره ان انت اللي سحبت مننا المشروع ومحستش بالكلام اللي انا قولته.
شريف هز راسه وقال: تمام مفيش مشكله.. عموما انا عملت بالكلام اللي انتي قولتيه وكلمت مسؤل القاعة ولغيت الحجز ولغيت كل حاجة.
هاجر بصت له بصدمة وعيونها لمعت بالدموع وقالت بنبرة مهزوزه: شريف متهزرش!! انت اكيد معملتش كده صح؟
رد شريف ببرود: دا طلبك وانا نفذته.. انتي قولتي مفيش فرح وانا لغيت كل حاجة.
هاجر قعدت على الكرسي اللي كان قدامها ودموعها نزلت وهي مصدومة من اللي شريف عمله.
شريف مقدرش يشوفها في الحالة دي وقام من على مكتبه وقرب منها وقعد قدامها وقال: بتعيطي ليه دلوقتي ؟ مش ده اللي انتي كنتي عايزاه؟
ردت بصوت مكتوم من البكاء: انا مكنتش اقصد كده بس انت لما صدقت وروحت لغيت كل حاجة..
وبصت له بعيونها الحمرا الممتلئه بالدموع وقالت: دا انت كنت مستنى الفرصه بقى عشان تلغي كل حاجة.. يعني كنت بتكدب عليا لما قولت انك بتحبني..
شريف اتصدم من هجومها المفاجئ عليه وقامت فجأة من مكانها وقالتله بتحذير: ماشي يا شريف برحتك بس صدقني هتندم ولو انت اخر راجل في الدنيا انا مش هتجوزك.
شريف قام بسرعه وقف قدامها عشان يمنعها من الخروج وقالها بصدمة: اهدي يا مجنونه انتي انا بهزر معاكي! مفيش فرح اتلغى ولا حاجة انا قولت كده عشان زعلت منك بسبب إللي عملتيه إمبارح.
اتكلمت هاجر ببكاء: لا انت بتقول كده دلوقتي عشان مزعلش.
شريف: صدقيني مفيش حاجة اتلغت والفرح هيتعمل في ميعاده ، دا لو انتي عايزه الفرح يتعمل.
ردت هاجر ببكاء: يعني انت بجد ملغتش حاجة ؟
رد شريف وهو بيبتسم: هلغي الفرح ازاي كده هو لعب عيال!! اصلا لو كنتي فكرتي نلغي الفرح بجد انا كنت هخطفك واتجوزك غصب عنك.
هاجر ابتسمت بخجل وقالت: للدرجة دي بتحبني يا شريف؟
رد شريف وهو بيضحك: مش حكاية حب بس آنتي متعرفيش انا صرفت قد ايه لحد دلوقتي عشان الفرح ده.
هاجر بصتله بصدمة وشريف ضحك بقوة وهو بيبصلها وهي اتعصبت وقالت: طب ايه رأيك بقى ان....
قاطعها شريف بسرعه: بحبك والله العظيم بحبك.
هاجر بصت له بخجل وشريف كمل كلامه وقال: دا انا مستني يوم الفرح ده يجي بفارغ الصبر.
هاجر خفضت وشها بخجل وقالت: وانا كمان.. نفسي اليوم ده يجي عشان البس الفستان واتصور مع اصحابي وانا بفستان الفرح.
شريف بصلها بصدمة وقال: انتي عايزة يوم الفرح يجي عشان كده وبس؟؟!
ردت هاجر وهي بتكتم ضحكتها: اه طبعا اومال انت فاكر ايه؟!
رد عليها بغيظ: انا مبقتش بفكر خلاص.. يلا يا هاجر روحي علي الاجتماع يا حبيبتي عشان متتأخريش علي أصحابك.
هاجر كانت بتكتم ضحكتها وخرجت من غرفة المكتب وشريف اخد أوراق من على مكتبه وهو هيموت من الغيظ وخرج وراها علي الاجتماع.
رواية مكتوبة على إسمي بقلمي ملك إبراهيم.
دخلوا غرفة الاجتماعات وكانت بيسان قاعده شارده وامجد قاعد قصادها بيبصلها من وقت للتاني وواضح عليه الغضب وهو بيسأل نفسه ياترى مخبيه عني ايه يا بيسان؟.
هاجر دخلت وهي بتضحك بدون صوت وشريف بيبصلها بغيظ وبيحاول يكتم غيظه منها.
هاجر قعدت جنب بيسان وشريف سلم على بيسان وقعد جنب امجد وقال: هي آيات مجتش ولا ايه؟
ردت بيسان: آيات عندها محاضرات مهمه النهاردة ومش هتقدر تحضر الاجتماع.
شريف هز راسه بتفهم وبعد لحظات الباب اتفتح ودخل عامر اللي اول لما دخل قلبه انقبض بقلق لما ملقاش آيات موجوده.
دخل وسلم عليهم وقعد مكانه وهو بيدور بعيونه عنها وكلهم بيبصوا ل عامر منتطرين انه يبدأ الاجتماع وشريف همس ل عامر وقال: عااامر.. يلا ابدأ كلنا موجودين.
عامر بص ل شريف وقال بتردد: كده كله موجود ؟
بصوا لبعض وبيسان كانت فاهمه ان عامر بيقصد آيات ومش قادر يسأل عنها بطريقة مباشرة وقالت: اه يا عامر كله موجود اتفضل احنا سامعينك.
عامر كان مضايق ان آيات محضرتش الاجتماع لكنه حاول يكون طبيعي قدامهم وبدأ يتكلم في الشغل وهما بيسمعوه بتركيز.
رواية مكتوبة على إسمي بقلمي ملك إبراهيم.
عند آيات في الجامعة.
كانت لسه بتفكر وهي قاعده في الكافتيريا ومتردده تروح مكتب دكتور مالك ولا لا.. كانت حاسه انه مهتم بيها بزيادة ومش بيتعامل معاها زي باقي الطلبه وكانت خايفه من اهتمامه الغريب ده وخايفه تفسره التفسير الواضح لكل تصرفاته معاها وكلامه وكلام بيسان عن غيرة عامر عليها من مالك.
بعد تفكير وتردد قررت تكلم بيسان وتاخد رأيها تروح له مكتبه ولا لا واتصلت عليها.
--------
في الشركة عند عامر.
كانت بيسان مركزة مع كلام عامر عن شغلهم المشترك بين الشركتين وفهمت من كلامه انه عايز يطور الشغل بينهم ويكثفه لكن بشروط ان الإدارة تكون لشركة الجارحي فقط وقدملها عروض مغريه جدا وكلها هتفيد شركتها.
صوت رنة تليفون بيسان قاطعت الاجتماع وبيسان بصت على التليفون وشافت اسم آيات واعتذرت منهم وامجد بص ل بيسان بفضول كان عايز يعرف مين اللي اتصل عليها وبيسان قالت بهدوء: بعتذر منكم بس لازم ارد على آيات.
ملامح امجد استرخت براحة لما عرف ان آيات المتصل وعامر هز راسه لها بتفهم وعينيه كانت مركزة مع بيسان وهي بتقوم وتبعد عنهم بخطوات وردت علي آيات وكانت بتكلمها بصوت منخفض.
عند آيات وهي بتكلم بيسان.
اتكلمت آيات باختصار وقالتلها على الرسايل اللي دكتور مالك بعتهالها وقالتلها انها متردده. تروحله مكتبه زي ما هو طلب منها ولا لا؟ وبيسان كانت بتبتسم وهي بتسمعها وفهمت معنى كل اللي مالك بيعمله مع آيات وكان واضح جدا انه معجب بيها وبيحاول يتقرب منها وآيات كانت خايفه ومرعوبه من اللي بيحصل لانها كانت عايزة تفضل قافله علي نفسها من بعد عامر وقفلت قلبها وهي مقرره انها متدخلش في اي علاقة حب تاني وتعيش لنفسها وبس.
بيسان نصحتها باختصار انها تروح مكتب مالك وتشوف هو عايزها ليه. وقالتلها انهم هيكملوا كلامهم لما آيات ترجع من الجامعة لانها لسه في الاجتماع ومش عارفه تتكلم معاها.
قفلت بيسان المكالمة وعامر قلق علي آيات لان بيسان طولت في الكلام معاها وحس ان في مشكله عند آيات وسأل بيسان بدون تردد: هي آيات كويسه؟
كلهم بصوا ل عامر لكنه مهتمش بنظراتهم وعينيه كانت مركزة مع بيسان في انتظار ردها علي سؤاله.
بيسان ابتسمت وقالت بثقة: اه الحمدلله كويسه هي في الجامعة النهاردة ومقدرتش تحضر الاجتماع لان عندها محاضرة مهمه للدكتور مالك مكنش ينفع تفوتها.
عيون عامر اتحولت من لهفه وقلق ل غضب ونار وهو بيضغط علي قبضة ايديه بكل قوته بعد ما سمع اسم مالك اللي أصبح كابوس بالنسبه له وقام وقف فجأة وقال بصوت حاد: الاجتماع تقريبا انتهى واظن انتي يا بيسان فهمتي المطلوب من شركتك عشان شراكتنا تكمل في المشاريع الجديدة.
انتهى عامر من كلامه وخرج من غرفة الاجتماع بخطوات سريعه وكلهم بصوا ل بيسان ب لوم لانها طول الوقت بتكون قاصده تزعج عامر بس هي حقيقي زعلانه منه بعد اللي عمله مع آيات و هي آكتر واحدة كانت شاهدة على وجع آيات ومعاناتها طول فترة غيابه!
في غرفة مكتب عامر.
عامر دفع باب غرفة مكتبه بعنف وقفل الباب عليه وهو حاسس انه على وشك الجنون كل ما يسمع اسم مالك.
كان رايح جاي في غرفة المكتب بيحاول يهدي نفسه لكن النار في قلبه كانت بتشتعل اكتر كل ما يفكر ان ممكن آيات يكون جواها مشاعر متبادله ل مالك.
مقدرش يستحمل أفكاره وظنونه وخرج مندفع من غرفة المكتب وخرج من الشركة كلها وركب عربيته وهو بيسوق بأقصى سرعة.
رواية مكتوبة على إسمي بقلمي ملك إبراهيم.
في الجامعة داخل غرفة مكتب مالك.
وقفت آيات تخبط علي باب غرفة المكتب بتوتر ومالك سمح لها بالدخول.
دخلت آيات وقالت بهدوء: حضرتك طلبتني؟
مالك رد بثقة: اتفضلي ادخلي يا آيات.
آيات دخلت بتردد وفضلت واقفه مكانها ومالك قال بابتسامة: متوتره ليه كده يا آيات ؟ اتفضلي اقعدي.
ردت آيات برسميه: اصل انا عندي محاضرة بعد شويه ومش هينفع اتأخر.
مالك فهم انها متوتره وبتتهرب من الكلام معاه واتكلم بهدوء: وانا مش هعطلك يا آيات متقلقيش.. انا بس كنت عايز ابلغك ان في عندك امتحان الاسبوع الجاي وانا قولت الكلام ده في المحاضرة اللي فاتت وانتي مكنتيش موجودة.
آيات هزت راسها بتفهم وقالت: اه يا دكتور عرفت شكرا لاهتمام حضرتك.
مالك بصلها بنظرة طويله عميقه وآيات اتوترت اكتر وقالت: عن اذن حضرتك.
مالك هز راسه بالايجاب وآيات خرجت من غرفة مكتبه بسرعه وقفلت الباب وراها ومالك همس لنفسه بلوم: ايه شغل المراهقين اللي انا بعمله ده!! أكيد مش هتصدق اني طلبتها مكتبي عشان أقولها ان عندها امتحان!! ما الطبيعي ان زمايلها بلغوها!! مكنش لازم اعمل كده ابدا!!
وسند ضهره علي الكرسي وهو بيفتكر خجلها وتوترها منه ونطق إسمها باستمتاع وقال: وبعدين يا آيات انتي اول بنت انجذب لها بالشكل ده.
رواية مكتوبة على إسمي بقلمي ملك إبراهيم.
في المساء داخل شقة آيات وبيسان.
آيات خرجت من الحمام وهي لافه منشفه صغيرة فوق شعرها وبيسان كانت بتجهز عشا لهم هما الاتنين وآيات قعدت قدامها وهي بتاكل قطعة خيار وقالت بدهشة: بس الشروط إللي شركة الجارحي عايزينا نوافق عليها دي مش مبالغ فيها شويه؟
اتكلمت بيسان: بس مكسبنا هيكون كبير والمشاريع اللي هنشاركهم فيها من اكبر المشاريع في البلد وانا شايفه ان دي فرصه كبيرة لينا وخصوصا اننا ممكن منقدرش نقنع اياد المغربي انه يسحب مشروعه من شركة الجارحي واحنا نستلمه وكده شركتنا هتقف من غير شغل.. عموما انا طلبت منهم اسبوع نفكر فيه وارد عليهم.
آيات بصت قدامها بتفكير وبيسان قالت بتفهم: انا فاهمة ان وجود عامر هيكون هو مشكلتك الوحيدة في الاتفاق ده بس خلاص كلها كام يوم ويحضر فرح شريف وهاجر ويسافر تاني.
آيات هزت راسها بحزن وقالت: وجود عامر مبقاش يفرق معايا خلاص.. انا وهو حكايتنا انتهت من زمان.
آيات قالت كلامها واتحركت على غرفتها وبيسان بصت عليها بحزن وقالت: معتقدش ان حكايتكم انتهت يا آيات.. انا من رأيي انها لسه هتبدأ.
وقامت تجري وراها وهي بتقولها: استني انتي رايحه فين ، لازم تحكيلي دكتور مالك كان عايزك ليه ؟
رواية مكتوبة على إسمي بقلمي ملك إبراهيم.
بعد مرور أسبوع في شركة الجارحي.
عامر كان في غرفة مكتبه وشريف دخل عنده وفي ايديه ملف وقال: أتفضل ده ملف المشروع الجديد وانا كده اجازة من النهاردة لحد بعد الفرح ب شهر .
عامر ابتسم وقال: حقك يا عريس ربنا يتمم بخير.
دخل امجد وقال: عامر.. بيسان بعتتلنا دلوقتي انهم وافقوا على الشراكه معانا في المشاريع الجديدة.
عامر ابتسم بثقة وهز راسه بالايجاب وشريف وقف وقال: حلو آوي اقعدوا أنتوا الاتنين بقى اتكلموا في الشغل برحتكم وانا من اللحظة دي بعيد عن الشغل وفي اجازة مفتوحة.. سلام.
امجد ضحك وقال: استنى بس هتهرب تروح فين دلوقتي؟
رد شريف: رايحين القاعة انا وهاجر نشوف التجهيزات اللي هي طلبتها.. خلاص الفرح باقي عليه يومين مفيش وقت.
امجد هز راسه وهو بيبتسم وشريف خرج من غرفة المكتب وامجد بص ل عامر وسأله: انت ناوي تسافر تاني بعد فرح شريف ولا هتستقر هنا فعلا؟
عامر بص له بتفكير وسكت.
اتكلم امجد: ياريتك تنسى موضوع السفر ده وتفضل جنبنا هنا يا عامر.. انت هنا في وسط أهلك وحبايبك وكمان الشغل محتاجك معانا.
عامر بص في الملفات قدامه وقال: سيب كل حاجة لوقتها يا امجد.
رواية مكتوبة على إسمي بقلمي ملك إبراهيم.
عند آيات داخل شركتها كانت بتتكلم في التليفون مع عمها وكان بيقولها ان شريف اتصل بيه وعزمه علي الفرح وطلب منه انهم يحضروا وهدير مرات فارس عايزة تحضر عشان العروسه صحبتها.
آيات فرحت انها هتشوف عمها وهدير وفارس ابن عمها في الفرح.
انتهت المكالمة بين آيات وعمها وقعدت على مكتبها تفكر في عمها بحزن ومش عارفه ايه هيكون رد فعله لما يقابل عامر في الفرح.
دخلت عليها بيسان المكتب وهي بتتكلم: آيات انتي لسه قاعدة يلا قومي بسرعه هنروح نشوف الفساتين بتاعنا اللي هنحضر بيها الفرح خلصت ولا لسه.
آيات قامت وقفت وخرجت معاها من الشركة.
.....
بعد مرور يومين.
ليلة فرح هاجر وشريف.
داخل قاعة فاخمة كانت متجهزة على أعلى مستوى لاستقبال المدعوين وكانت مامت هاجر بترحب بكل المدعوين بفخر وتباهي وميرفت مامت شريف كانت قاعدة على الكرسي المتحرك بتاعها وهي في قمة السعادة بفرح ابنها الوحيد وميسرة قاعده جنبها وبتراقب تصرفات مامت هاجر بغيظ لانها شايفه انهم احق يستقبلوا المعازيم لان هما اهل العريس.
عامر وامجد كانوا لابسين بدل زادت من وسامتهم وكانوا بيرحبوا بكل رجال الاعمال اللي مدعوين للفرح..
عامر شاف عم آيات وفارس ابن عمها وهدير مرات فارس وهما داخلين القاعة لوحدهم من غير آيات.
قرب منهم عامر وهو بيبص ل عم آيات اللي اول لما شافه ابتسم وسلم عليه بحب وقاله : حمدلله على السلامه يا باشمهندس.
فارس استغرب من ترحاب ابوه ب عامر لانهم المفروض مضايقين من اللي عامر عمله في آيات وطلاقه لها وسفره وهي في أصعب الظروف.
عم آيات وقف مع عامر في جنب لوحدهم وقاله: ايه باشمهندس.. قدرت تاخد قرارك الصح ولا السنه مكانتش كفايه ؟
رد عامر عليه: حضرتك كان عندك حق.. انا فعلا لو كنت طلقت آيات في لحظة غضبي وقتها كنت هندم عمري كله عليها.. شكرا ان حضرتك وقفتني في اخر لحظة... بقلمي ملك إبراهيم.
... يتبع
دا شكل في اتفاق بين عم آيات وعامر وشكله مطلقهاش! ♥️😂 ايه هو الاتفاق وامتى اتقابلوا واتكلموا قبل سفر عامر ؟كل ده هنعرفه الحلقة الجايه 😍♥️
