رواية وود الفصل السادس 6 بقلم اسماعيل موسي
#وود
٦
برأس مصدعه فتحت كريس عنيها وراقبت وود بعدها تحركت ناحيت الحديقه، مشت ببطيء فى الممر بين الأشجار
وقفت دقيقه تراقب وود والطفلة إلى كانت بتلعب معاها
انتبهت وود، نادت ماما؟
وجريت اخدت والدتها فى حضنها، ربتت كريس على ضهر بنتها
مين دى يا وود؟
دى صديقتى يا ماما بتلعب معايا
اسمها ايه صديقتك يا وود؟
اسمها وود ياماما
وود؟ فتحت كريس فمها، اسمها وود؟
ايوه يا ماما اسمها وود
وصديقتى دى جات من فين؟ تعرف كريس ان اقرب بيت منها على بعد اكتر من تلاته كيلو متر
هى جات وحدها ازاى وبعدين اسم وود دا غريب شويه
قربت كريس من البنت إلى كانت مدياها ضهرها وبتلعب بالطين، كانت فى طول بنتها بالضبط
ولما لمستها بلطف والبنت لفت كريس انصدمت
البنت كانت نفس شكل بنتها مفيش غير لبسها متغير
والاقراط فى ودنها بديعه وغريبه
وشعرها مربوط فيه اشرطه ملونه وفى عنقها عقد من نبات لا تعرفه كريس
بتردد سألت كريس انتى اسمك ايه يا شاطره؟
بأبتسامه قالت البنت أسمى وود
رنت الكلمه فى ودن كريس دا صوت بنتها
مش بنتها إلى فى حضنها لا دا صوت بنتها زمان
غمضت كريس عنيها، إلى بيحصل معاها دا امر مريب
ولما فتحت عنيه وهى بتهمس انتى ساكنه فين يا وود؟
ملقتش وود قدامها
البنت كانت بره سور الجنينه بتلوح ليها بايدها
دار عقل كريس بسرعه بصت على باب الحديقه
إلى كان كان مفتوح، وقالت وود انتى فتحتى باب الحديقه لصديقتك؟
لا ياماما انا صحيت لقيت البنت بتلعب فى الحديقه
ارتعش جسم كريس، باب الحديقه مش بينفتح غير من الداخل
مستحيل البنت دى تقدر تفتحه ومستحيل تقدر تنط السور
وسط تفكيرها هبت عاصفه فجأه خلت اعناق الاشجار تنحنى
وأوراق الأشجار تطير وارتفع صوت الريح المخيف
سحبت كريس بنتها فى صمت لكن شيء داخلها كان قد تغير
يستطيع الجان ان يحدث عاصفه ان يجعل الريح قاسيه
ان يتحكم فى بعض عناصر الطبيعه عندما يرغب
مالك يا ماما؟ همست وود ببرأه
مفيش يا وود، انا مش قولتلك قبل كده متلعبيش مع أى شخص من غير اذنى؟
لكن وود صديقتى يا ماما وود بنت لطيفه
كريس صديقتك ازاى؟
انتى مفيش عندك أصدقاء وعمرى ما شوفتك ماشيه مع أى طفله؟
همست وود، وود صديقتى بتجيى تلعب معايا بالليل وانتى نايمه لما اكون صاحيه
وبتفضل فى غرفتى لحد ما انام
اكتر من مره استيقظت كريس ولم تجد وود جوارها حتى انها فكرت ان وود بنتها بتمشى وهى نايمه
بتلعب معاكى؟
ايوه يا ماما كل ليله تقريبا
حاولت كريس تمسك اعصابها ولا تغضب
طيب ممكن يا حبيتى لما وود صديقتك تيجى تلعب معاكى تصحينى العب معاكم؟
حاضر ياماما وكمان تلعبى مع والدة وود صديقتى
سألت كريس.... والدة صديقتك؟ هى بتيجى معاها
يوه يا ماما ايوه طبعا، امال يعنى وود هتيجى فى الضلمه من وسط الغابه وحدها؟
كانت تلك اللحظه التى أدركت فيها كريس ان هناك شيء خاطيء
أمر خطير يحدث مع طفلتها، اسمعى يا وود ممنوع تلعبى مع أى شخص
لا وود ولا غيرها ولما والدة وود تظهر قوليلى على طول
صرخت وود بحزن، انا كل مره بصحيكى يا ماما لما هى بتيجى لكن انتى مش بترضى تفتحى عنيكى
