رواية موضوع عائلي الفصل التاسع عشر 19 الجزء الثالث بقلم رحاب القاضي
#موضوع_عائلي
"بيت الهنا"
_الحلقه الـ 19
ـــــــــــــــــــــــــــــــــــــــــــــ
ربَّما تجمعُنا أقدارُنا
ذاتَ يومٍ بعدَ ما عزَّ اللقاءْ
- إبراهيم ناجي
ــــــــــــــــــــــــ
_ من لما قالتله رضوي انها مش هتكمل شغل في المشروع لو هو فضل موجود وساب المكان كله ومشي وكله غضب من كل اللي حصل وكل الظروف والمواقف اللي بتبعده عنها برغم انه اعترفلها وللكل انه "صدقاً يعشقها"، وافتكر كلام حامد وخصوصا لما قاله "انا لما يزن قالي انك واقع لاخرك كده ما صدقتش"...
سااق عربيته بسرعه أكبر وقال بغيظ
ماااشي يا يزن.. ماااشي..
_وفي الوقت ده كانت قااعده يارا في البلكونه وبتكلم زين اللي قالها بضيق..
زين
انا اخدت قرار وخلاص مش هرجع فيه..
يارا
انت كده هتتعب اكتر الدكتور محددلك المعاد..
زين
وانا مش عايز المعاد ده، لما تبقي تخلصي امتحاناتك واكلم باباكي علينا ابقي وقتها اعمل العمليه..
يارا بحزن
علي فكره بعد الشر يعني بس لو تعبت في العمليه انا هبقي حاسه بالذنب، اصلا مش مهم اي حاجه غير انك. تخف..
زين ابتسم بهدوء وقال
وعلي فكره برضو مش مهم اي حااجه بالنسبالي غير انك تنجحي وتطلعي الاولي زي كل سنه عشان انا ما احسش بالذنب لان لو ده ما حصلش هيبقي بسببي..
يارا
هيبقي بسببك ازاي بقي؟
زين
عشان انا اللي بعطلك انا اللي بكلمك وانا اللي بخليكي تفكري فيا وبشغلك بالحورات اللي بتحصل بينا دي..
يارا
لا عادي انا بذااكر والله، انا اصلا بقالي فتره كبيره ما طلعتش من البيت وبذااكر بس ويعتبر مخلصه المواد..
زين
هو انتي امتحاناتك بعد اسبوع من دلوقتي؟..
يارا
بعد اربع ايااام..
زين
انتي تحمدي ربنا ان مدرستك مش حكومي كنتي اتنفختي..
يارا
هو انا كده يعني مش منفوخه، اصلا فكرة انهم ضاغطين عليا اني اطلع الاولي دي موترااااني..
زين
انتي اللي عودتيهم علي كده ودي حاجه حلوه، انا برضو هزعل لو ما طلعتيش الاولي..
_شاقت يارا يوسف جه بعربيته ونزل منها وشكله متعصب فقالت لزين بقلق..
يارا
زين هقفل معاك دلوقتي واكلمك وقت تاني عشان يوسف اخويا جاي..
زين
اوكي خلي بالك من نفسك ومذاكرتك..
يارا
وانت كمان، باي باي..
_قفلت معاه وراحت ناحية السلم عشان تنزل تشوف يوسف بس لقيته طالع وهو متعصب وقبل ما تتكلم سألها وقال..
يوسف
يزن فين؟..
يارا
لسه جااي من شويه وفي اوضته، في حاجه ولا ايه؟..
يوسف
ما فيش خليكي في حالك..
_ورااح وهو متعصب لاوضة يزن وراحت ورااه يارا وهي خايفه ليتخانقو، وفتح يوسف باب اوضة يزن من غير ما يخبط وكان في الوقت ده يزن لسه هينام، فبصلهم بضيق وقال..
يزن
ايه قلة الذوق دي ما تخبطو علي الباب قبل ما تدخلو...
يوسف بحده
تصدق انك عيل زباله وواطي، وانا غلطان اني عملتك راااجل وقولتلك حااجه...
قام يزن ورد عليه بقلق وقال
في ايه يا يوسف ما تحترم نفسك ايه الكلام اللي بتقوله ده؟..
يوسف بعصبيه
انت ايه اللي يخليك تقول لحامد علي رضوي، ماله هو بيها وتتكلم عنها معاه ليه تتكلم عليها ليه اصلا؟..
يارا بقلق
خلاص يا يوسف بالراااحه شويه الموضوع مش مستاهل..
رد عليها يوسف بحده وقال
لا مستاهل لما الكلام يبقي علي البنت اللي بحبها يبقي يستاهل كده واكتر من كده كمان..
يزن بهدوء
يا سيدي انا غلطاان ومن غير ما اعرف هو قالك ايه اصلا، بس اهدي وفهمني ايه اللي حصل..
بص يوسف ليارا وقال بضيق
امشي يا بت انتي اطلعي بره..
يارا
وانا مالي انا وبعدين انا عايزه اعرف ايه اللي حصل..
قرب منها يزن وقال بصوت واطي وقال
عيب ممكن يبقي في كلام رجاله ما ينفعش تسمعيه، بس لو حاجه مهمه هاجي اقولك..
يارا بغيظ
اصلا مش عايزه اعرف حاجه، ليه يارب خلقتني بنت مع الشحطين دول اقول ايه بس استغفر الله..
_طلعت يارا ويزن ضحك علي كلامها بهدوء وقفل الباب وقعد جنب يوسف وقال بهدوء..
يزن
حصل ايه بالظبط؟..
يوسف بغيظ
ابن ال... جه الشغل بيعزمني علي خطوبة عائشه وفضل يقول كلام سخيف وعديت واتحملت لحد. ما بصوته كله قدام العمال والمهندسين قال اني بجري وراها عشان اوقعها واوصل لغرضي واسيبها، شكلها بقي زي الزفت قدام الكل بسببي..
يزن بضيق
هو بيعمل كده ليه، وبعدين انا اقسم بالله ما كان قصدي اقوله علي رضوي، كل الحكايه اننا اتقابلنا من كام يوم وقالي ان عائشه اتخطبت لدكتور ابن صاحب ابوها باين وفضل بقي يمجد في العريس وان دي الجوازه الصح، انا اتعصبت بصراحه وحبيت ابينله انك انت كمان مش واقف علي حاجه ولا هتفضل زي ما انت بالعكس بقيت متفوق في شغلك وهتتخرج من الجامعه وهتتجوز وقولتله علي رضوي انها مهندسه شاطره وبنت ناااس..
يوسف بضيق
يا ابني الحاجات دي بتتنظر ما كنتش قولت..
كتم يزن ضحكته وقال
طيب انت عملت ايه؟..
يوسف
اتخانقت معاه وطردته، ورضوي صدقت للاسف كلامه وقالتلي ما نشتغلش انا وهي في مكان واحد ولو انا كملت هتقدم استقالتها وتمشي..
يزن
معاها حق بصرااحه يعني الموقف اللي اتحطت فيه وحش والناس هتصدق بسبب سمعتك اللي سبقاااك..
يوسف
بص انت هتكمل شغل مع رضوي وانا سيبوني من الشغل دلوقتي المهم اتخرج..
يزن
لا انا كتير عليا كل ده، انت تبقي معايا في الشركه..
يوسف
انا داااخل علي امتحانات..
يزن
طيب بعيد. عن الموضوع ده انت هتعمل ايه مع رضوي..
يوسف
سيبها بس كده تهدي. شويه وانا هتصرف، مستحيل اسيبها ولا اخليها تبعد عني اصلا..
ــــــــــ #بقلم_الكاتبه_رحاب_القاضي ــــــــ
_وبالليل في بيت الاستاذ حسن كانو قااعدين بيتعشو كلهم معادا هنا، وقال حسن لـ ليلي..
حسن
هي هنا اتعشت يا ليلي؟..
ليلي
فضلت اتحايل عليها قد كده تيحي تاكل مش راضيه..
ريناد
هي مدايقه اووي من اللي عملته هند، وكمل الموضوع عليها طارق..
طارق بغيظ
طيب خليكي محضر خير يا كبيره يا عاقله..
حسن بحده
الموضوع يتقفل يا طارق وتبطل حركات العيال دي..
ريناد
بابا معاه حق البنت صغيره جواز ايه دلوقتي..
ليلي
وفيها ايه لو اتجوزها وهي صغيره ما انا اتجوزتك وانا في سنها يا حسن..
حسن
كان الزمن غير الزمن يا ليلي..
وبص لطارق وقاله بحده
الموضوع يتقفل دلوقتي يا طارق واكتر من ازيك عامله ايه ما تقولهااش لهنا وكلامي مش هيتكرر تاني..
طارق
لامتي ده بقي ان شاء الله..
حسن
لحد ما تجهز والبنت تخلص امتحانات وتشوف هتدخل كلية ايه، ولا انت فاكر عشان قاعده عندنا فانت هتتجوزها كده وخلاص، لا يا طارق بص علي الاصول قبل ما تتكلم وشوف نفسك قد الجواز ولا لا..
رضوي بهدوء
بابا معاه حق علي فكره يا طارق وكلامه ما يزعلش..
اتنهد طارق بضيق وحسن قال لروز
روز روحي قولي لهنا تعالي كلمي بابا..
روز
حاضر..
_وراحت فعلا روز ندهت لهنا اللي طلعت من اوضتها وهي لابسه اسدال الصلاه بتاعها وحجابها كالعاده واتجاهلت وجود طارق تماما وهو كمان عمل نفسه مشغول في موبيله وهو بياكل..
هنا بضيق
نعم..
حسن
انتي كمان اللي زعلانه، اقعدي اتعشي يا هنا..
هنا بضيق.
انا مش جعانه هدخل اكمل مذاكره..
حسن
معلش اتعشي الاول وبعدين ذاكري..
ليلي
وتتعشي كويس كمان عشان المذاكره وتبقي مركزه، قلة الاكل دي هتضعف تركيزك..
هنا
معلش بس والله مش جعانه لما هجوع هبقي اكل..
حسن قام وقال
مااشي اعمليلي كوباية شاي وهاتيهالي البلكونه مدام مش هتاكلي..
طارق
وانا كمان شبعت وعايز شاي..
حسن
انت امك تعملك وتشربه وتروح تنام..
_ضحكو اخواته البنات عليه وهنا دخلت المطبخ وعملت شااي لحسن وقبل ما تطلع من المطبخ دخلت عندها ليلي وقالت..
ليلي
هنا حقك عليا يا بنتي ما تزعليش من اللي عملته هند، هما خلاص حسن حلف انهم يمشو من العماره..
هنا بضيق
لا انا ما كنتش عايزه اعمل مشاكل بين بابا حسن وقرايب حضرتك وانا اللي كنت همشي..
ليلي
تاني هتقولي تمشي، ده بيتك. يا هنا هتسيبي بيتك وتروحي فين واقسم بالله لو قولتي همشي تاني قدامي لهزعل منك وروحي اساليهم بره علي زعلي بيكون ازاي هتلاقي شباشب بتطير حواليكي من. كل ناحيه..
ابتسمت هنا بهدوء وقالت
طيب انا هروح اودي الشاي لبابا حسن.
ليلي
مااشي يا حبيبي وبعدها تروحي تذاكري علي طول، واستني هنا هو حسن بس اللي بيتقاله يا بابا وانا ايه ما استاهلش كلمة ماما..
هنا بتوتر
لا والله مش قصدي بس..
ليلي بهدوء
لو مش عايزه تقوليلي يا ماما براحتك يا حبيبتي مش هزعل بس انا هكون مبسوطه لو بقيتي تقوليها زي باقي اخواتك كده..
_ابتسمت هنا بسعاده من. كلام ليلي اللي قدر يبدل حزنها من اللي عملته هند معاها ويرجعها لحالتها الطبيعيه، وردت علي ليلي وقالت..
هنا
حاضر يا ماما..
ليلي بدموع
قلب ماما والله، امشي بقي من قدامي هتخليني اعيط..
هنا ضحكت بهدوء وقالت
لا ده العادي انتي وبابا حسن ما فيش اكتر من الدموع عندكم، بعد اذنك..
_وجات تطلع من المطبخ لقيت طارق في وشها وقبل ما يقولها اي حااجه سابته ومشيت، وليلي قالتله بجديه..
ليلي
وبعدين معاك..
طارق
ده انا جايلك عشان تساعديني يا ماما وتحنني قلب جوزك ده عليا..
ليلي
انا جوزي معاه حق، ولو عايز تتجوزها لازم تبقي جاهز لكل شروطنا..
طارق بغيظ
هو انتو ليه بتعاملوني كده وكأني غريب ده انا ابنكم..
ليلي
اصبر يا طارق علي الاقل جهز شقتك اللي فوق وبعدين اتكلم واحنا كده كده هنساعدك بس لما تثبت لابوك انك ناوي علي الموضوع بجد..
طارق بضيق
ماااشي يا ماما براحتكم..
ليلي
طيب رايح فين مش كنت عايز شاي...
طارق وهو طالع
لا مش عايز حاجه..
_ومشي طارق وفي اوضة حسن كان قاعد هو وروفان اللي بصاله بحزن وساكته..
حسن
روحي ذاكري يا روفاان..
روفان
لا..
حسن
استغفر الله العظيم ياارب، البنات المؤدبين بيقولو حاضر لباباهم ومامتهم مش لا..
روفان
انا مش عايزه اذاكر، صالحني الاول واروح اذاكر..
كتم حسن ضحكته بصعوبه وقال
لا مش هصالحك عشان زعلان منك..
روفان بدموع
بس انا ما عملتش حاجه تزعلك يا بابا..
حسن بجديه
لا عملتي انا مليون مره اقولك يا روفاان اسمعي الكلام وما تدخليش في كلام الكبار وما تقوليش لماما علي حاجه لا وما تجبيش سيرة حد وهو مش موجود وما تتريقيش علي صحابك ولا علي اخواتك وانتي ما بتسمعيش كلامي يبقي حقي ازعل ولا لا..
روفان بحزن
انا بعمل كده عشان تضحكو عليا وعلي كلامي وابقي حلوه..
حسن
انتي كده مش حلوه خالص اللي بيقولك انتي حلوه وبيضحك بعد ما انتي تمشي هيقول عليكي وحشه زي ما انتي عملتي في غيرك واتريقتي عليه وهو مش موجود هيجي غيرك بيتريق عليكي..
روفان
طيب مش هتريق علي حد تاني وهسمع. كلام ماما بس صالحني..
حسن
وهتنجحي..
روفان
لا بقي انت بتطلب حاجات فوق طاقتي..
حسن
خلاص انا مش هصالحك..
روفان
خلاص خلاص هنجح..
حسن.
لما تبقي تنجحي هبقي اصالحك وما ترخميش علي اختك يا روفاان سيبي روز تذاكر من غير ما تعطليها..
روفان
يعني مش هتصالحني..
حسن
لما اشوفك سمعتي كلامي الاول ولا لا..
روفان بحزن
ماشي يا ابو علي ماااشي بكره اتجوز واسيبك وامشي وتقول ياريتني كنت صالحتك يا روفان..
_قالت كلامها وطلعت وهو ضحك بقوه عليها وعلي كلامها، وكان قااصد ما يصلحهاااش لحد ما تسمع كلامه، وخبطت هنا علي الباب اللي كان مفتوح وقالها حسن بهدوء
حسن
تعالي يا هنا انتي كمان...
دخلت وحطت الشاي قدامه وقالت بهدوء
انا اسفه ما كانش ينفع اخد قرار من غير ما اقول لحضرتك الاول، بس انا كنت زعلانه اووي ومش عارفه اعمل ايه..
حسن
اقعدي يا هنا خلينا نتكلم شويه ولا هعطلك عن المذاكره؟..
قعدت هنا علي الكرسي اللي قدامه وقالت
لا مش هتعطل ولا حاجه..
حسن
طيب بصي بقي لما تزعلي من حاجه او من حد حتي لو انا تيجي تقوليلي انا او ليلي زي ما اخواتك بيعملو..
ابتسمت هنا بدموع وقالت
عارف لما بتقول انت وماما ليلي اخواتك دي اكتر حااجه بتفرحني، لاني من زمان كان نفسي يبقي عندي اخوات..
حسن
ما هما اخواتك فعلا من اول ما بقيتي عايشه معانا وهما اخواتك، بالنسبه بقي لطارق..
قاطعت هنا كلامه وقالت بسرعه
والله العظيم انا مظلومه هو اللي فجأني وقبل اي رد فعل اعملو انتو دخلتو..
حسن بجمود
لو كررها تاني هو او اي حد فكر يقرب منك بالقلم علي وشه علي طول، وهو مش هيكررها تاني حالياً..
هنا بتوتر
يعني ايه حالياً..
حسن بخبث
يعني تقومي تشوفي المذاكره بتاعتك ده انتي رغايه اووي يلا قوومي..
_ضحكت هنا بهدوء وقبل ما تقوم دخلت روفان عندهم وقالت بسرعه..
روفاان
بابا الحق عمتو الحربا... قصدي عمتو لميااء بره..
حسن
ايوه نعدل كلامنا، جايه لوحدها ولا هي وجوز اختك..
روفان
لا لوحدها وماما قااعده معاها بره بس علي اخرها سيكا كمان وهتولع فيها فألحق بسرعه واطلع..
حسن
طيب يا هنا خديها قعديها في اوضتها وما تطلعش منها اتفقنا..
هنا
حاضر...
_وسمعت هنا كلامه ورااحت قعدت مع روفان وروز وتيا في اوضتهم وطلع حسن عند لمياء و؟....
ــــــــــ #بقلم_الكاتبه_رحاب_القاضي ــــــــ
ـ وفي الوقت ده في الصعيد في بيت القاضي كان قااعد عزالدين مع كمال وعلياااء اللي كانت متعصبه جداً وقالت..
علياء
اهو رد عليه انت يا عز عايز يرمي بنته ويمشي.
كمال
انا مش برميها يا ماما، انا سايبها معاكي انتي وعبدالله..
عزالدين
عبدالله كمان هيربيلك بنتك، هو مش ليه دلوقتي بيت وكمان شويه هيبقي عنده عياله محتاجين اهتمامه، وامك ست كبيره هناخد بالنا احنا منها ولا نجيبلها شيله كمان نتعبها بيها..
كمال
عندها اسرار اهو تساعدها انا مش هقعد هنا علي طول عشان اعرف اخد بالي منها..
علياء
وهي اسرار هتقعد عندنا العمر كله مش هتتجوز هي كمان وهتبقالها حياتها بعيد عن هنا..
كمال بضيق
يبقي خلاص سيبوني اوديها الملجأ اللي قولتلكم عليه ولما امها هتعرف ان بنتها هناااك هتيجي تاخدها..
_في الوقت ده كانت أسرار طالعه من المطبخ وسمعت اللي قاله كمال وبصتله بحزن وغضب من طريقة كلامه علي بنته، وفي نفس الوقت اخدت بالها من بنته اللي كانت قااعده قريب منهم وباصه لكمال بدموع وحزن لا يليق بطفولتها، قربت منها أسرار وقالتلها...
أسرار
تعالي نقعد في الجنينه في حصان هناك شكله حلو قووي تيجي اخليكي تشوفيه..
_هزت الطفله راسها بمعني نعم واخدتها أسرار وطلعت وفي الوقت ده بصلهم عزالدين بخبث وقال لكمال..
عز
انا عندي الحل انت تتجوز بنت حلال كده ومنكم وعليكم وتاخد بالها من بنتك وتخويهالك كمان....
كمال بحزن
ما رضوي وخالي حسن قفلو الباب في وشي.
عز
لا هو من البجاحه انك تزعل انهم عملو كده، دول عملو كده متأخر ومالكش دعوه برضوي لانها مش هترجعلك تاني خلاص موضوع واتقفل، انت بتكلم علي اسرار بنت عمك انت من ناحيه هتجيب واحده امينه وطيبه لبنتك ومن ناحيه تانيه هتحل مشكله كبيره لبنت عمك وتحميها من خالها..
وقرب منه وقال بصوت واطي
والبت صغيره وحلوه مش هندبسك في جوازه اي كلام يعني..
علياء ابتسمت بحمااس وقالت
طيب والله خالك ده اول مره اعرف انه بيفهم، بنت عمك موجوده تدور ليه علي الغريبه...
كمال
والله؟.. بنت عمي اللي انا وانتو عارفين انها بتحب عبدالله اخويا.
علياء بجديه
ورحمة ابوك الموضوع ده اتقفل من لما اخوك اتجوز وانا متاكده من الكلام ده، حتي النهارده كانت قااعده اليوم كله مع روان بتعلمها الطبخ، مش معقول يعني تكون لسه بتحبه وبتساعد مراته عشان حياتهم تبقي حلوه من غير مشاكل.
عز
ده. كلام عيال صغيره الواقع انت محتاج للبنت دي عشان بنتك وهي محتجالك عشان تحميها، هاا قولت ايه؟....
علياء
قبل ما يرد هو مش هيتجوز البنت ويرميها هنا ويروح يتصرمح بره تاني..
كمال
شغلي بقي في القاهره يا ماما..
علياااء
تاخدها معااااك هي وبنتك..
كمال
ايوه عشان بدل ما تبقي مسؤليه واحده يبقو اتنين، هما هيقعدو هنا وانا هبقي اجيلكم..
علياء
لو كل سنه مره يبقي لا من الاول، البت امانه عندي ولازم اجوزها لواحد. ترتاح معاه...
عز
اسبوع هنا واسبوع هناك لحد. ما يظبط اموره كويس ويااخد. مراااته وبنته..
كمال
خلتوها مراتي كمان..
عز غمزله وقال
هتبقي ان شاء الله وهتدعيلي انا نظرتي ما تخيبش ابداً..
دخل في الوقت ده عبدالله عندهم وقال
البيه صاحي اهو ما جيتش ليه المصنع زي ما قولتلك..
كمال بضيق
انا لسه صاحي من شويه..
علياء
تعالي يا حبيبي اقعد عايزااك في موضوع مهم...
قعد عبدالله معاهم وقال
خير ان شاء الله في ايه؟..
عليااء
كمال اخوك. قرر يتجوز..
عبدالله
هو لحق ده لسه مرفوض من رضوي امبارح..
ضحك عز وكمال قاله بغيظ
لا مش هتجوز رضوي يا حبيب اخوك انا هتجوز اسرار..
اختفت ابتسامة عبدالله وقال
أسرار بنت عمك.؟.
كمال
تعرف أسرار غيرها حضرتك؟..
عبدالله
لا طبعا مستحيل..
كمال بغيظ
لا طبعا ومستحيل ليه؟..
علياء
في ايه يا عبدالله هو اولي ببنت عمه من الغريب..
عبدالله
كمال يتجوز اسرار يا امي، هي البت نااقصه مشاكل وبلاوي ما كفايه اللي هي فيه..
ضحك عز وقال
ياد براحه علي جبهة اخوك. مش كده بعترتها..
عبدالله
استني يا خالي انا بهزرش، قولي بقي يا استاذ كمال اشمعنا عايز تتجوز اسرار دلوقتي؟..
كمال بغيظ
مزاااج ووالله يا عبدالله لاتجوزها وانت تعمل كبير علي بلدك دي واي حد بس مش عليا..
وقال لعليااء بجمود
كلميها يا ماما وشوفي رأيها ايه في الموضوع ولو رفضت انا هقنعها وخلال الاسبوع ده هكتب عليها واتجوزها..
عبدالله بضيق
حقك تتقدملها بس لو قالت لا مش عايزاااك مش هيبقي في كلام تاني، وانا كبير غصب عنك مش عاجبك تعالي اعمل كبير معايا بدل ما انت هربان وبتاخد كل حااجه علي الجاهز وبترجع ببلاويك..
_قال كلامه وطلع اوضته وهو متعصب، واول ما دخل اوضته لقي روان قااعده علي الكنبه وماسكه كتابها الدراسي في ايدها فزعق فيها بعصبيه وقال..
عبدالله
يعني هي بقيت حلوه المذاكره النهارده انتي كمان..
روان بخوف
بب بذاكر عادي امتحاناتي قربت..
_قلع جاكيت بدلته ورمااه علي الكنبه جنبيها وقرب منها اوووي وقال بجمود ونبره غاضبه..
عبدالله
وانا قولتلك ايه امبارح؟..
روان بخوف شديد
انا مش جاهزه دلوقتي لـ اللي انت عايزه ده..
عبدالله بحده
اللي عايزه ده حقي ولا انتي خايفه من حااجه بقي؟..
روان بصتله بدموع وقالت
لا يا عبدالله مش خايفه من حاجه، انا خايفه منك انت دي ما كانتش طريقتك معايا اصلا بقيت كل جاجه عندك بالغصب وبس حتي طريقة تعاملي معاك بتفرضها عليا عشان اعاملك بالطريقه اللي ترضيك..
عبدالله بهدوء
اومال اسيبك تتعاملي بطريقتك واسيبك تركبيلي قروون، لو كنتي متعوده تعملي كده مع ابوكي واخوكي فانا غيرهم، وقوليلي بقي يا مراتي مش جاهزه ليه؟..
نزلت دموعها بحزن من كلامه وردت عليه. قالا
امتحاناتي قربت فاضلها ايااام وانا عايزه اذاكر وانجح السنه دي..
عبدالله بغيظ
يعني دي الحجه الجديده، بس ما عجبتنيش ولو علي المذاكره اجليها للسنه الجايه..
بصتله روان بصدمه وقالت
هو ايه اللي هأجله للسنه الجايه، كل ده عشان ليله؟..
عبدالله
ايوه وعشان ما تفكريش تاني تمشي كلامك عليا ويلا قومي معايا..
مسكها من دراعها جامد بطريقه مهينه وروان قالت بدموع
هسمع كلامك في اللي انت عايزه بس خليني امتحن السنه دي عشان عايزه انجح بجد واصالح بابا وماما اللي مش راضيين يكلموني وزعلانين مني..
اتنهد بضيق اول ما شااف دموعها وقال بجمود
عارفه مشكلتي معاكي ايه، اني بحبك يا روان ولما بقسي عليكي انا اللي بتوجع اكتر منك..
بصت للناحيه التانيه بحزن وهو قال بهدوء
براحتك اعملي اللي انتي عايزاااه، ولما تبقي جاهزه قوليلي...
_قال كلامه وبعد عنها وسابها ودخل الحمام، وهي اتنهدت بأرتياااح انه بعد عنها ومسكت الكتااب بتاعها من تاني ورجعت تذاااكر، وهو طلع من الحمام بعد ما غير هدومه ورااح نااام علب طول من غير ما يوجهلها ولا كلمه، وهي اتجاهلت وجوده وشغلت نفسها بالمذاكره بتاعتها
ــــــــــ #بقلم_الكاتبه_رحاب_القاضي ــــــــ
_وفي بيت الاستاذ حسن كانت قااعده ليلي مع لمياء قبل ما يطلع حسن من اوضته وجه طااارق من بره وقال..
طارق
يا اهلا يا طنط لمياء...
لمياء
لا يا طارق انا مش هكلمك بقي كده تمد ايدك علي ابن عمتك، وبعدين هو سيف ده مش في مقام اخوك الكبير..
طارق بحده
لا ابنك. مش كبير عليا. انا اختي الكبيره ريناد وابنك مد ايده عليها وانا اللي يزعل اختي بكلمه ادفنه مكاانه وتحمدي ربنا اني ما كسرتش ليه ايده اللي اتمدت علي اختي..
لمياء بغيظ
شايفه يا ليلي ابنك بيقول ايه...
ليلي ببرود
ده. كانت تسلم ايدك اووي يا طارق لو كنت كسرتله ايده بحق وحقيقي..
_طلع في الوقت ده حسن وهو ماشي بهدوء لانه لسه متأثر من العمليه اللي عملها، واول ما شافته لميااء قامت بسرعه ومسكت ايده وقالت..
لمياء
الف مليون سلامه عليك. يا حبيبي تعالي اقعد ارتااااح، طيب يا ليلي مالكيش حق كنتي قوليلي ادخله جوه وما نتعبوش..
قعد حسن وسحب ايده من ايدها بقوه وقال
وانا ما عجزتش يا لمياء اديني قدامك اهو بقوم وبتحرك عادي..
لمياء بقلق
بعد الشر عليك من العجز يا اخويا وربنا يطولنا في عمرك..
حسن بحده
هتفضلي واقفه فوق رااسي اتفضلي اقعدي.
رجعت لمياء قعدت جنب طارق وقالت
انا عارفه انك شايل مني اووي يا حسن، بس والله انا مغلطه سيف وهو كمان ندمان وبيحب ريناد وروحه فيها بس هو شيطان ودخل بينهم..
ليلي
بيحبها وروحه فيها ايه يا لمياء هو انتي شيفانا يا حبيبتي عيال برياله ابنك حتي ما هانش عليه يجي يطمن علي مرااته وهي اا..
قطع حسن كلامها وقال بهدوء
خلاص يا ليلي مالوش لازمه الكلام ده، المهم انتي جايه ليه يا لميااء جايه تطمني عليا ولا جايه تحكي في موضوع ابنك وبنتي؟..
لمياء بقلق
هو انا طبعا جايه اطمن عليك يا حبيبي وبرضو انا بحاول ارجع ريناد لبيتها..
حسن
وانا بطمنك عليا انا كويس، ابعتي بقي خلي ابنك صاحب الشأن خليه يجي دلوقتي حالا عشان نحل الموضوع ده..
لمياء بقلق
اووي اووي يا اخويا انا هكلمه يجي علي طول ما هيصدق انه يكلمك هو اصلا مستنيك تخف عشان يجي يصلح اللي حصل ده كله..
ليلي بحده
يصلح ايه ما فيش حاجه هتتصلح يا حبيبتي..
حسن
ما خلاص يا ليلي قولت...
_وطلعت لمياااء موبيلها وكلمت سيف، بس ردت عليها شرين مراته اللي قالت بهدوء..
شرين
ايوه يا طنط خير؟..
بصتلهم لمياء بتوتر وقالت
فين سيف؟..
شرين
ناايم لما يصحي هبقي اخليه يكلمك بااي..
قالت كلامها وقفلت في وشها فقالت لمياء بغيظ
دي قليلة الذوق وعديمة الربايه اللي اتجوزها، هكلمه تاني اصله نايم..
ابتسمت ليلي بشماته وقالت
سبحااانه بنتي كانت تتمنالك الرضا ترضي وانتي وابنك وما قدرتوش يا لمياء واهي ذنوب وبتخلص
حسن
ليلي ادخلي عند ريناد يلااا...
_سمعت ليلي كلامه وقامت دخلت عند ريناد اللي كانت نايمه وهي حاضنه بنتها بهدوء، بصتلها ليلي بحزن وقربت منها وقالت بنبره حنونه..
ليلي
ريناد.. ريناد..
فتحت ريناد عيونها بهدوء وقالت
نعم يا ماما في ايه؟..
ليلي بحزن
عمتك لمياء بره..
قعدت ريناد بسرعه وقالت بدموع
عشان خاطري يا ماما انا مش عايزه اقابل حد، والست دي بالذاات انا مش عايزه اشوفها دلوقتي خالص..
ليلي بهدوء
حاضر يا حبيبتي اللي انتي عايزااه، بس هو ابوكي قالها تكلم سيف ويخليه يجي..
دموعها نزلت بحزن وقالت
ياربي بقي انا مش عايزه اشوفه، خلصو انتو كل حاحه من غير ما اشوفه، عشاان خاطري انا مش عايزه اقابلهم يا ماما..
ليلي حضنتها وقالت بدموع
حاضر يا حبيبتي منهم لله علي كسرة قلبك دي..
_دخل عندهم حسن في الوقت ده بعد ما خبط علي الباب وقال بجمود..
حسن
في ايه بتعيط ليه البت العبيطه دي..
ليلي ببكاء
بس يا حسن ما تقولش علي بنتي عبيطه انا عيالي كلهم ما فيهمش حد عبيط،دول احسن عيال في الدنيا بس هو الحظ...
حسن قعد علي الكرسي اللي قدامهم وقال
ماله حظهم الحمد لله علي كل حال، وامسحي دموعك يا ريناد وتطلعي دلوقتي تسلمي علي عمتك ولما يجي جوزك عايزه تتكلمي معاه الاول ما فيش مشكله عايزه الموضوع يخلص علي طول براحتك برضو، بس المهم تطلعي وتقابليهم واوعي تباني مكسوره او زعلانه هو وجعك وخانك وكدب عليكي وانتي اهو بتسبيه مش هو اللي بيسيبك وبكل شيااكه واحتراام هنخلص الموضوع ده وهنبدأ من جديد مش هنقف علي حد..
ردت عليه ببكاء وقالت
حاضر يا بابا...
حسن
حاضر ازاي بقي وانتي بتعيطي كده، اهدي واغسلي وشك كده والبسي حاجه حلوه وسرحي شعرك ده ياريناد من لما جيتي البيت هنا وانتي مش بتسرحي شعرك ليه يا حبيبتي..
ابتسمت ريناد بهدوء وقالت
لا والله يا بابا بسرحه بس كنت نايمه فأتنعكش..
ملس حسن علي شعرها بحنان وقال
انتي زي القمر في كل حالاتك يا حبيبتي، يلا اجهزي واطلعي وانا جنبك وما فيش حد هيزعلك منهم تاني ولا هيقولك نص كلمه تدايقك..
_وفعلا طلعت ريناد سلمت علي لمياء اللي حاولت تتكلم معاها علي موضوع سيف بس حسن رفض اي كلام منها لحد ما يجي سيف، واول ما جه سيف وخبط علي الباب قال حسن لطارق..
حسن
افتح الباب يا طارق ومن غير ولا كلمه انزل هات المأذون وكلم زين ابن عمك وهات اي حد تاني عشان يشهد علي الطلاق..
لمياااء بصدمه
مأذون ايه بس يا حسن، صلي علي النبي كده وما تخلينااش نخرب عليهم..
حسن بهدوء
عليه افضل الصلاة والسلام، يلا يا طارق لسه واقف مكانك..
_رااح طارق فتح الباب لسيف وسابه ونزل من غير حتي ما يقوله يدخل، اتنهد سيف بضيق واول ما دخل بص لريناد بضيق وقرب من حسن ومد ايده وقال..
حسن
الف حمدلله علي سلامتك يا خالي..
_بصله حسن بلوم ووقف قدامه ورد عليه لما ضربه بالقلم علي وشه بكل قوته والكل اتصدم من اللي عمله وقبل ما حد يتكلم قال حسن بحده..
حسن
انا بنتي ما تضربش يا سيف، ده القلم اللي بنتي خدته منك من غير ذنب..
قبل ما يرد سيف قالت لمياء بسرعه
حقك والله يا حسن وكسر عضمه كماان، بس بلاش موضوع الطلاق ده قوله يا سيف انك مش هتطلق مرااتك...
سيف بضيق
لا يا ماما اللي عايزينه مدام عايزين طلاق ما فيش مشكله اطلقها انا العيله دي اتحملت منها كتير وخلاص بقي جيبت اخري..
_قعد حسن بهدوء جنب ريناد ومسك ايدها بأيديه الاتنين وكأنه بيمنحها القوه عشان ما تعيطش ولا تبين حزنها قدامه، ورد علي سيف وقال..
حسن
واحنا هنرحمك بقي من التعب ده، طارق هيجيب المأذون وجاي اقعد. جنب امك انت مش غريب برضو للاسف هتفضل ابن اختي..
_قعد سيف جنب لمياء وفي اللحظه بصتله ريناد وهو كمان وافتكرت ريناد في اللحظه دي نفس القعده دي اللي هما فيها لما كان سيف جااي يخطبها من سنين...
_فلااااااش بااااااك..
حسن
في ايه بقي يا لمياااء جايبه ابنك وجايه ليه وايه الورد ده؟..
لمياء
جرا ايه يا حسن دي مقابله تقابلها لينا، ده احنا حتي جايين في خير..
حسن
هو ايه الخير ده بقي وو..
سيف
بصراحه كده يا عمي.. قصدي يا خالي معلش بقي اندمجت المهم انا جاي اتجوز ريناد..
حسن
ده اللي هو ازاي هتتجوزها كده علي طول يعني، في حد يقول كده ما تحفظي ابنك يا لمياااء..
ضحكو كلهم وليلي قالت بهدوء
خلاص بقي يا حسن الواد متوتر وبعدين هو انت يعني لسه هتفكر مثلا ولا هتتشرط والكلام ده، سيف ده انت اللي مربيه...
حسن ابتسم وقال
بالظبط كده وكنت ناوي كمان ان انا اللي اروح اخطبله لما يجي يتجوز ما كنتش اعرف انه عايز يتجوز بنتي..
وبص حسن لريناد اللي قاعده متوتره ومكسوفه وقال
وانتي بقي يا روح بابا رئيك ايه؟..
ريناد بتوتر
اللي تشوفه حضرتك يا بابا.
حسن بخبث
البنت مش موافقه اهي..
ريناد بسرعه
لا لا والله موافقه..
ضحكو كلهم وهي بصت للارض بكسوف وسيف قال بسعاده
طيب نتفق بقي يا عم.. يا خالي وانا تحت امرك في اللي انت تطلبه..
طبطب حسن علي كتفه وقال
اطلب ايه يا عبيط ده انت ابني يا سيف ده انا اللي مربيك واديهالك وانا مطمن انك هتحافظ عليها.
بصلها سيف وابتسم بهدوء وقال
دي هتبقي في عينيا يا خالي واغلي من عينيا كمان..
_فااقت ريناد من ذكرياتها السعيده علي اللحظه التعيسه في حياتها لما المأذون جه وبدأ في اجراءات الطلاق وقال لسيف...
المأذون
ارمي عليها يمين الطلاق يا استاذ تلات مرات..
سيف بجمود
انتي طالق انتي طالق انتي طالق..
المأذون
اتفضل امضي هنا وانتي كمان يا مدام وبعدكم الشهود..
_ومضت علي طلاقها منه ومشي المأذون مع الشهود ومشي معاهم زين، وسيف قال ببرود. شديد..
سيف
وبالنسبه لبنتي بقي هيحصل ايه؟..
رد عليه حسن وقال
يوم اجازتك ابقي تعالي خدها تقعد. معاك اليوم كله وترجعها بالليل لامها، ولما يبقي يرجع خالك عز من البلد هبقي اخليه هو يجيبهالك لحد عندك ويرجع ياخدها، ولما تبقي تكبر شويه ابقي خليها تبات عندك اليوم ده..
سيف
تمام وما تقلقوش انا هبعتلها مصاريفها وبزيااده..
ابتسم حسن بسخريه وقال
ما نقلقش من ايه يا حبيبي هو انا هستني منك المصروف عشان اصرف علي حفيدتي لا انا مش عايز منك حااجه ولا هاخد. منك ولا قرش، عادي زي ما صرفت عليك وكبرتك وانت عيل صغير لحد ما بقيت راجل وبتتكلم اهو هصرف علي بنتك واكبرها برضو...
_بصي سيف للارض بأحرااج وقام مشي من غير ما يقول ولا كلمه كمان، ولمياء قربت من حسن ومسكت ايده وقالت بدموع..
لمياء
حقك عليا يا حسن انا ما عرفتش اربيه، وانتي يا ريناد ما تزعليش مني يا بنتي انا كنت علي طول غلطاانه في حقك..
حسن بجمود
اتفضلي روحي يا لميااء وصل عمتك يا طارق وتعالي يلاا..
لمياء
لا لا انا قولت لزين يستناني يوصلني هو، مالوش لازمه يا طارق خليك جنب اختك..
_مشيت لمياء وكلهم كانو قاعدين ساكتين وزعلانين من اللي حصل لريناد وانها خلاص اطلقت، وحسن بصلها وابتسم وقال..
حسن
ايه رئيكم تخلص هنا وروفان وروز امتحانات نطلع كلنا السخنه..
ليلي
السخنه ايه يا حسن واحنا في عز الشتا..
طارق بسخريه
مغلش يا بابا اصل بابا بياخد بالالقاااب..
_ضحكوو كلهم حتي ريناد ابتسمت وطارق قرب منها ومسك ايدها وقال بخبث..
طارق
قومي معايا يا ريناد وانتي يا بت يا رضوي خدي بالك من تيا..
حسن
واخد اختك فين؟..
طارق
هاخد اختي عشان اخطفها يا بابا، هننزل نتمشي شويه بدل القعده دي والدكتور اصلا قالها تتمشي..
ريناد بحزن
لا لا انا عايزه اناام يا طارق..
طارق
عليا الطلاق هننزل دلوقتي وهنروح مكانك المفضل كمان نشرب قهوه وعلي حسابك ها معاكي فلوس..
ابتسمت ريناد بهدوء وحسن قالها
روحي مع اخوكي ده عرض مش هيتكرر كتير..
رضوي
وانا كمان عايزه اخرج، ما انا كمان كنت متخزوقه ما اخدتنيش خرجتني..
طارق
يا شيخه ده انتي لما بتبقي مدايقه لو حد قرب منك بتبلعيه وهو واقف، انما الغلباانه دي هتفضل تسح دموع للصبح..
رضوي
ماشي يا طارق ابقي افتكرها..
_ما ردش عليها طارق واخد ريناد ونزلو الشارع، وفي الوقت ده دخلت رضوي اوضة ريناد ونامت جنب تيا ومسكت موبيلها تقلب فيه ولقيت ان في رساله من يوسف علي الوتساب وباعتلها فيها.
يوسف
"يزن هيبقي مكاني معاكي ما تسبيش شغلك يا رضوي"..
ردت عليه وكتبت بحزن
" وانت ما تتكلمش معايا تاني انا اصلا هعملك بلوك من كل حااجه "
_في الوقت ده في بيت يونس الصاوي وفي اوضة يوسف كان قااعد بيذااكر ولما شاف رساله رضوي رمي الفون علي الترابيزه قداامه وقال بغيظ..
يوسف
اشوف فيك يوم يا حامد يا ابن هاجر ما كانت هتحن خلاااص..
_وسااب المذاكره وقااام رااح لاوضة يزن اللي كان واقف في شباااك اوضته وهو ماسك موبيله وبيتفرج علي صورة سيدرا مع باباها وبطه وشكلها مبسوط جداً، ودخل يوسف ومشي بهدوء ووقف جنبيه وقال..
يوسف
واتنسينا من ناااس كانو غالين علينا 🎶
قفل يزن الموبيل وقال
انت تبطل تدخل من غير ما تخبط يا حيوان انت، وتحترم خصوصيتي زي ما بحترم خصوصياتك..
يوسف
خصوصيات ايه يا يزن ده انا قايلك كل حاجه يا يزن، المهم انا اتعملي بلوك من كل حاجه..
يزن
احسن تستاهل..
يوسف
لا ابوس ايدك انا عايز حل، والله العظيم بحبها بجد ومستعد اعمل اي حاجه تثبتلها اني مش بتسلي بيها ولا الكلام الزباله اللي قالو حامد ده..
يزن
يبقي روح اخطبها وخلي كل حاجه رسمي وبالحلال..
يوسف بقلق
ولو اترفضت..
يزن
تتقدم تاني لحد ما تخليها تصدق انك بتحبها وانك فعلا عايزها معاك لاخر العمر والكلام ده..
يوسف
بص انا هتقدم وانا لوحدي الاول بحيث لو اترفضت ابوك ما يشمتش فيا..
ضحك يزن بهدوء وقال
اللي انت عايزه يا يوسف، اطلع بقي وسيبني قااعد مع نفسي..
يوسف
ما ترجعلها يا يزن واعملها اللي هي عايزاااه،وهي بدأت تتغير وو..
يزن ببرود
ارجع لمين بالظبط؟.
يوسف
محسسني انهم كتير دي هي واحده ولما قولتلها انك بتحبها خطبتها في نفس اليوم..
يزن
وفيها ايه اي راجل المفروض يعمل كده يبقي قد كلامه..
يوسف
طيب رجعها اتكلم معاها وانا يا عم مسامحها مهما كانت برضو دي بنت عمو يوسف..
يزن
الموضوع اتقفل وانتهي وحتي لو رجعتها ثقتي فيها مش هترجع حبي ليها مش زي الاول، انا يمكن دلوقتي بس بتابعها فضول ومع الوقت كل حاجه هترجع لطبيعتها..
يوسف
طيب قولي من رئيك اروح خطوبة عائشه ولا لا؟..
يزن
انت اعمل اللي هيريحك فكر في موضوع العزومه ده علي انها بنت عمك وبس عايز تحضر تجمع عائلي وكده روح مش عايز يبقي ما تروحش وانت كده كده مش بيفرق معاك كلام حد ولا حتي لو روحت هتغير وجهة نظرهم عنك...
يوسف
خلاص يبقي مش هروح وربنا يسعدها عائشه طيبه وتستاهل كل خير..
يزن
يا حنين..
يوسف
اومال يا ابني هروح انا بقي اكمل مذااكره.. وخلي بالك من مرات اخوك المستقبليه بكره..
_قال يوسف كلامه وطلع وفضل يزن يضحك عليه وعلي كلامه...
ــــــــــ #بقلم_الكاتبه_رحاب_القاضي ــــــــ
_وعند. طارق وريناد كانو قااعدين في كافي بسيط جداً في الشارع وبيشربو قهوه والترابيزه قدامهم ملياانه منديل..
طارق
كفايه بقي يا بومه انتي الناااس بتتفرج علينا..
ريناد ببكاء
ناااس ما عندهاش احساس المفروض يقدرو حالتي..
طارق
مش انا غلطان كنت سيبتك تبربري كده في البيت بدل الفضايح دي..
ريناد ببكاء
شوفت يا طارق بكل برود طلقني ده ما صدق..
طارق
عيل واطي بقي بس ولا تزعلي بكره اجوزك واحد احلي منه..
ريناد بدموع
لا لا مش عايزه خلاص دول صنف واطي يا طارق الرجاله دول طلع منهم بابا بس والله والباقي كلهم ولاد كلب..
طارق بغيد
لا ما انتي غلطتي في ابوكي اهو يا ناصحه ولا انتي مش حسباني من ضمن الرجاله..
ريناد
ايوه صح بس انت ما اضمنكش برضو مش واثقه فيك..
طارق
يا نهار اسود دي اعرااض تروما..
ريناد بخوف
احلف..
طارق ضحك وقال
والله العظيم انتي هبله..
ريناد بدموع
انا هعمل ايه دلوقتي يا طارق مش عارفه بجد، كل حاجه باظت وهبدأ ارتبها من جديد..
طارق
بالظبط كده هتبدأي من الاول بس رتبيها صح..
ريناد
هشتغل انا عايزه اشتغل..
طارق
بس انتي هتشتغلي ايه ما عندكيش خبره لاي شغل ومش لسه صغيره عشان تبدأي انتي 30 سنه..
ريناد
انت ايه الاحبااط ده مش شرط يعني اشتغل بدراستي لا انا هشتغل اي حااجه وهطلع وهتفسح وهرجع اكلم صحابي اللي قطعتهم وهلبس علي الموضه وهعمل كل حاجه هو كان حارمني منها يا طارق..
طارق بهدوء
حاضر اعملي اللي انتي عايزااه واخوكي في ضهرك وهيسااعدك..
ريناد
وانت بقي قولي ناوي علي ايه مع هنا؟..
طارق
والله انا كنت ناوي تخلص امتحانات واتجوزها، بس شكل كده ابوكي ليه رأي تاني..
ريناد
هي لسه صغيره اووي يا طارق..
طارق
مش اووي يعني هي اصغر من روان اللي اتجوزت بسنتين تلاته يعني مش حوار..
ريناد
هي بنت اموره وطيبه ويا بختك بيها لو اتجوزتها وقتها هطمن انك مش هتسيبنا ابدا..
طارق
اسيبكم ليه مين قال اني هسيبكم..
ريناد
ما انا واخواتك ديما بنقول طارق هتيجي واحده حربايه صفرا هتاخده مننا وتغير عليه مننا والجو ده..
طارق
انا بس اتجوز هنا وانا اللي هرميكم اصلا ولا اعرفكم من نفسي..
_ضحكت ريناد بهدوء وفضلت قااعده مع طاارق اللي بقي بيتكلم معاها في اكتر من موضوع عشان يبعد عنها التفكير في موضوع الطلاق اللي حصل وما ترجعش تعيط تاني..
ــــــــــ #بقلم_الكاتبه_رحاب_القاضي ــــــــ
_وتاني يوم في بيت القاضي، نزل عبدالله من اوضته ولقي امه وأسرار قاعدين مع بعص بيتكلمو واول ما شافوه سكتو وأسرار كان شكلها مدايق جداً...
عبدالله
قولتيلها يا امي؟..
علياء
الناس تقول صباح الخير الاول يا عبدالله..
عبدالله
قولتيلها يا امي ان كمال عايز يتجوزها ولا لا؟..
علياء بضيق
قولتلها واهي بتفكر لسه ما ردتش عليا..
عبدالله
تردي عليا انا يا أسرار قبل اي حد وما حدش هيغصبك علي حاجه سواء وافقتي او رفضتي..
أسرار بتوتر
ان شاء الله خير يا عبدالله..
عبدالله
والبيه فين بقي؟..
علياء
فضل سهران مع خالك عز لوش الصبح وناايمين لسه ده حتي بنته طالعه لابوها وفضلت صاحيه الليل كله واهي لسه نايمه..
عبدالله
هي اسمها ايه صح بنته دي؟..
ابتسمت أسرار وعلياء قالت بغيظ
رضوي..
ضحك عبدالله بهدوء وقال
لا والنبي هو من كل عقله سماها رضوي كان فاكر بقي ان رضوي هتعديها لما تلاقي البنت علي اسمها..
بصتله علياء بطرف عينها علي اسرار وقالت
خلاص موضوع واتقفل يا قلب امك، المهم مراتك نزلت ما رضيتش تفطر معانا وقالت هتجهزلك الفطار وتفطر معاك..
عبدالله
اسرار.. ورحمة الغاليين يا شيخه روان قالت كده؟..
أسرار بقلق
لا بس يعني هي والله بتعملك الفطار مع الشغالين جوه..
علياء
انا اللي اقنعتها فيها حااجه دي، والبنت سمعت كلامي فأهدي شويه..
عبدالله
هو انا عملت حاجه يا ست الكل، اما ادخل اشوفها بتعمل ايه..
ودخل عبدالله المطبخ وعلياء قالت لاسرار
سيبك من كلام عبدالله وفكري فيها كويس كمال هو اكتر حد مناسب ليكي دلوقتي يا أسرار، وصدقيني هو اللي طلبك بنفسه واكيد قال كده لما عجبتيه وبدأ ياخد باله منك..
أسرار بكسوف وتوتر
هفكر يا مرت عمي واللي فيه الخير يقدمه ربنا..
_وجوه المطبخ كانت واقفه روان بتعمل فعلا في الاكل، فابتسم بهدوء ووقف عند الباب بيتفرج عليها وفي الوقت ده الشغالات اللي في المطبخ فضلو مركزين معاهم وهما بيتهامسو مع بعض علي نظرات عبدالله لروان وحبه ليها اللي باين عليه جدا، وفي الوقت ده اتلسعت ايد روان اللي قالت بألم وعصبيه..
روان
اااه يا ايدي منك لله يا عبدالله كان يوم اسود يوم ما شو...
وقف عبدالله قدامها وهي اتوترت وقالت
مش قصدي والله حاجه بس انا ايدي كانت هتتحرق
مسك عبدالله ايدها وقال بهدوء
طيب مش تخلي بالك، وبعدين ما فيهاش حاجه اهو..
سحبت ايدها منه وقالت بضيق
طيب شكراً...
عبدالله بصوت واطي
انتي زعلانه من ايه هو انا اللي بتهرب منك ومنيمك زعلانه بالليل..
روان بغيظ
بتلف وتدور وترجع لنفس الموضوع، وبعدين انا زعلانه عشان مش عارفه اعملك الفول بقوطه اللي انت بتفطر بيه الناس كلها بتفطر عادي فول بزيت لا انت لازم تحط طماطم وفلفل وسمنه وبيض ايه ده..
ابتسم بهدوء وقال
نفس يا روان عادي، وبعدين ساهل جدا تعمليه أصلاً
روان بضيق
مش ساهل علي فكره ومش عارفه اعمل اي حاجه، ممكن اعملك شندوتشات جبنه وده اخري..
ضحك بهدوء وقالها
ما تقلقيش انا هساعدك وهعلمك تعمليه ومش بفطر كل يوم فول..
روان
اومال ايه؟..
عبدالله
انتي وشطارتك بقي كل يوم تعمليلي حاجه مختلفه..
روان بسخريه
انت بتحلم..
قرب منها بهدوء وقال
وكل احلامي بتتحقق واكبر حلم فيهم كان انتي واهو انتي قدامي ومراتي..
بعدت عنه كام. خطوه لورا وقالت بكسوف
الشغالين هنا احنا مش لوحدنا..
عبدالله بخبث
علي اساس لما نبقي لوحدنا هتبقي في حاجه يعني، علي العموم تعالي اعلمك الفول اللي بحبه بيتعمل ازاي عشان ما تصدعنيش تاني.
روان
انت هتعلمني بجد..
عبدالله بجديه
ايوه تعالي اقفي جنبي..
_وقفت فعلا روان جنبيه وبدأ يجهز هو في الفطار قدامها وبيعلمها فعلا ازاي تهتم بيه بالطريقه اللي ترضيه، وكانو الشغالين واقفين مصدومين ان كبير البيت والبلد كلها واقف في المطبخ مع مراته بيعلمها ازاي تجهزله الفطار..
ــــــــــ #بقلم_الكاتبه_رحاب_القاضي ــــــــ
_في بيت يونس الصااوي، صحيت شهد علي صوت موبيلها اللي بيرن مسكت الفون ولقيت ان اللي بيكلمها زيد، بصت بسرعه علي الكنبه اللي بيناام عليها يونس ولقيته مش موجود، وعرفت انه في الحمام فردت بصوت واطي وقالت..
شهد
الو..
زيد
صباح الخير يا شهد..
شهد
صباح النور
زيد
هتروحي امتي شغلك؟..
شهد بقلق
مش عارفه والله هقدر اروح النهارده ولا لا..
زيد بقلق حقيقي
انتي كويسه طيب..
شهد
ايوه كويسه بس عشان يارا بتذاكر وباخد بالي منها وكده..
زيد
تمام بس انا عايز اشوفك النهارده، هعملك التوكيل وعايز اعرفك علي الموظفين اللي عندي..
شهد بهدوء
بص يا زيد انا مش قصدي حاجه بالكلام اللي هقوله ده، بس انت اكيد عارف التاتش اللي بينك وبين يونس وانا ما اقدرش اعمل حاجه من ورااه فانا هاخد رأيه الاول وبعدين موافقه علي كل اللي انت عايزه..
زيد
تمام.. بس ارجوكي يا شهد انا ماليش غيرك دلوقتي اقدر اثق فيه واطمن علي بنتي معاه..
شهد بحزن
ان. شاء الله خير ما تقلقش كل حاجه هتبقي تمام..
زيد
ان شاء الله انا هقفل لاني بخلص في اورااق تخص السفر بتاعي ونبقي نتكلم بعدين..
شهد
ماشي مع السلامه..
_قفلت معاه وفضلت قااعده قلقانه وخايفه من رد فعل يونس لما يعرف ان زيد هيخليها تمسك كل املاكه لحد ما يرجع من سفرية علاجه، وفي الوقت ده طلع يونس من الحمام وهو بينشف شعره بالمنشفه الصغيره اللي في ايدها ولما شافها صاحيه قال بضيق.
يونس
انا مش هنام علي الكنبه دي تاني، ضهري اتكسر خلاص..
شهد بهدوء
يونس عايزه اتكلم معاك في حااجه مهمه..
يونس بجديه
في ايه؟..
قامت شهد وقفت قدامه وقالت بقلق
الموضوع بخصوص زيد..
يونس بضيق
ماله زي سي زفت ده؟
شهد
هو كان قالي انه اا..
يونس بحده
قالك فين انتي لسه بتكلميه، كنتي بتكلميه هو دلوقتي صح؟..
شهد
يا يونس اسمعني الاول عايزه اقول ايه..
يونس بحده
لا مش هسمع والموضوع بتاع الراجل ده يتقفل مالوش علاقه بينا، بنته صاحبة بنتك وبس واقسم بالله يا شهد لو عرفت انك شوفتيه او اتكلمتي معاه هقلب الدنيا كلها فووق دمااغك..
شهد بغيظ
ليه كل ده هو انت فاكر اني ممكن اخونك معاه، انت ازاي تفكر كده انا لو بعمل حاجه غلط مش هاجي واتكلم معاك عنه دلوقتي وابقي عايزااك تسمعني..
يونس
اسمعك في اي حاجه غير انك. تتكلمي عن الراجل ده....
شهد بضيق
انا غلطاانه اصلا اني بتكلم معاك. يا يونس انت امتي بتفهمني اصلا المهم كلامك يمشي وبس، وانا رايحه شغلي النهارده عندي حاجات مهمه ولازم اخلصها، ويزن هيوصلني وهيرجع ياخدني واحنا مروحين..
يونس
تمام بس لو عرفت انك شوفتي الراجل ده مش هيحصل كويس، وانا متأكد انك عمرك ما هتحبي حد غيري ولا هتشوفي رااجل غيري اصلا بس هو نظرته ليكي مش كده من زمااان وانا ما اقدرش اتحمل حاجه زي دي ابداً..
شهد بسخريه
هو انا ايوه مش هحب حد تاني ولا هفكر في الموضوع ده تاني عشان انا خلاص كبرت وبقي عندي ولادي رجاله وبنتي ما شاء الله عليها عروسه، مش عشان عشان بحبك ولا بسببك انت خالص، انا بطلت احبك من زمااان..
ابتسم بثقه وقال
هعمل نفسي مصدقك عشان ما تتعصبيش بس مهما قولتي انا ما حدش بيحبني قدك يا شهد..
_اتعصبت فعلا من كلامه وانه كاشفها ديما وانها حتي بعد كل اللي حصل منه لسه بتحبه ولسه مش قادره حتي تطلق منه وديما بتتحجج بولادها عشان تبرر وجودها معاه..
_وما ردتش عليه وسابته ودخلت الحمام وكالعاده وقفت قدام المرايا وبصت لنفسها بحزن ودموع علي ضعفها قدامه برغم انه غلطان مش مش عارفه حتي تاخد حقها منه..
شهد
ماشي يا يونس انا بقي هثبتلك انك ولا فارق معايا اصلا، وهقابل زيد وهساعده واعمل اللي تعمله بقي..
ــــــــــ #بقلم_الكاتبه_رحاب_القاضي ــــــــ
_وفي موقع الشغل بتاع رضوي كانت واقفه هي ويزن اللي قالها بهدوء.
يزن
كده تمام اتفقنا يعني في خلال شهرين تلاته هنخلص المشروع سوا..
رضوي
ان شاء الله..
يزن بهدوء
طيب بصي بقي بعيد عن الشغل، موضوع يوسف انا الغلطان فيه..
رضوي بضيق
لو سمحت يا بشمهندس احنا هنا هنشتغل سوا وبس اي كلام في اي حاجه شخصيه مش هقبل بيه، واصلا ما فيش حااجه نتكلم فيها تمام..
يزن بحزن
تمام اللي تشوفيه يا بشمهندسه نبدأ شغل بقي..
رضوي وهو ماسكه موبيلها
ياريت انا هرد علي الفون وجايه..
_سابها يزن وكان رايح ناحية باقي المهندسين بس وقف اول ما سمعها قالت..
رضوي
ايوه يا ريناد معاكي انتي كويسه دلوقتي..
ريناد
ايوه بس هبعتلك شوية حاجات كده لتيا تجبيهم وانتي جايه..
رضوي
ما عندك طارق يا ريناد مش فاضيه..
ريناد
يا بنتي انتي وجااايه مش دلوقتي..
رضوي
اوكي خلاص ابعتيهم وانا هجيبهم يا ستي، وبقولك ابقي ردي علي روان عايزه تطمن عليكي
ريناد
انا مش عايزه اكلمها هي لسه فاكره تكلمني دلوقتي..
رضوي
معلش كلنا زعلانين منها بس بابا وماما وطارق مش بيكلموها، مش هنبقي احنا كمان يا ريناد واسكتي اصلا عبدالله مطلع عينها..
ريناد
والله تستاهل... هبقي ارد عليها كملي شغلك بقي وخلي بالك. من نفسك..
رضوي
حاضر...
_قفلت معاها ولقيت يزن واقف قريب منها وماسك موبيله، فسابته ومشيت ويزن قال بسخريه..
يزن
يخربيت اختيارك. يا يوسف دي خوفتني انا كمان...
_وفضلو قاعدين شغالين مع بعض وبعد شويه راحت شهد عندهم واول ما نزلت من الاوبر وشافها يزن فراحلها بسرعه وقال..
يزن
في ايه يا ماما حضرتك جايه بنفسك لحد هنا ليه؟..
شهد
عايزااك معايا في مشوار مهم هنروح سوا انا وانت..
يزن
دلوقتي انا عندي شغل..
شهد
ساعه بالظبط وارجع تاني..
يزن
هو مهم اووي كده يعني؟..
شهد
ايوه بالنسبالي، قولي بس الاول فين رضوي؟..
يزن
رضوي؟! انتي كمان عرفتي موضوع رضوي يا ماما..
شهد
ايوه يارا قالتلي هي فين بقي؟..
يزن بص ورااه وقال
شايفه اللي ضاربه بوز هناااك دي ام. شعر طويل هي رضوي..
شهد ابتسمت وقالت
حلوه اخوك ذوقه حلو...
يزن
هي تبان حلوه بس مقفله اووي، ومطلعه عين ابنك...
شهد
انت ولا هو؟..
يزن
لا انا هنا المدير ما حدش يقدر عليا، مطلعه عينه هو بس انا هظبط الموضوع..
شهد
طيب عرفني عليها بسرعه يلاا..
يزن
وانا مالي انا خليه هو يعرفك عليها..
شهد
ولد اسمع الكلام اندهلها وعرفني عليها.
يزن بغيظ
والله انتو عيله تافهه اصلا..
وبص لرضوي وقال
يا بشمهندسه رضوي بعد اذنك. لحظه لو سمحتي.
قربت منهم رضوي وقالت
نعم؟..
يزن
شهد هانم الصاوي والدتي حابه تتعرف عليكي..
رضوي بصتلها بانبهار وقالت
احلف دي. مامتك.. سوري يعني بس شكلها صغير شويه..
شهد بصت ليزن وقالت
دخلت قلبي خلاص..
يزن
طيب نتقل شويه مش هنبقي احنا وابنك..
ابتسمت شهد وسلمت عليها وقالت
ده من ذوقك يا حبيبتي، انا حبيت بس اتعرف عليكي عشان بقالي فتره كده بسمع عنك كلام حلو من يونس ويزن واكتر حد. بيتكلم عنك يوسف..
كتم يزن ضحكته علي كلام مامته وتوتر رضوي اللي قالت
شكرا وانا كمان مبسوطه اني اتعرفت علي حضرتك يا شهد هانم..
شهد بتلقائيه
لا قوليلي يا طنط احلي...
يزن بسرعه قال
عندنا مشوار يا ماما وهنتأخر، انتي مكاني بقي يا رضوي لحد ما ارجع ساعتين بالكتير وجاااي..
رضوي
تمام ما فيش مشكله..
_ومشي يزن مع شهد وجه اسلام وقف جنب رضوي وقال وهو بيبص لشهد بأعجااب.
اسلام
هي مين المزه اللي مع البشمهندس يزن دي مرااته..
رضوي
لا يا اسلام دي مامته مرات يونس بيه الصاوي..
اسلام بصدمه
نعم دي ام ده ازاي، يعني دي ام. يوسف..
رضوي
ايوه ومراات يونس بيه..
اسلام
طبعا يونس الصاوي فريد من نوعه في كل حااجه اجعل حظي ربع حظه ياارب..
رضوي
طيب يلا علي شغلنا وبطل تفاهه..
ــــــــــ #بقلم_الكاتبه_رحاب_القاضي ــــــــ
_وعدي يوم في التااني وبدأت الامتحامات وكانت هنا رايحه الامتحان بتاعها وطالعه من اوضتها لقيت حسن قااعد في الصاله وقالت بهدوء..
هنا
صباح الخير يا بابا حسن..
حسن
صباح النور يا حبيبتي، جاهزه للامتحان..
هنا بقلق
مش عارفه بس هي ماده ساهله ان شاء الله خير.
حسن
ربنا يوفقك يا بنتي، معاكي فلوس..
هنا بتوتر
ايوه ماما ليلي اديتني..
حسن
ليلي اديتك من اسبوع تعالي خدي..
وطلع. فلوس من المحفظه بتاعته وقال
كفايه دول ولا هتحتاجي تاني..
هنا بأحراج
انا معايا فلوس شكراً..
حسن بمرح
شكراً. ايه بقالك اكتر من شهرين معانا اهو ولسه ما اتعلمتيش من اخواتك...
هنا
اتعلم ايه؟..
حسن
البجاحه يا حبيبتي دول شطافة فلوس كلهم،حتي رضوي اللي بتشتغل بتاخد مني مصروف..
هنا
بس انا مش عايزه اتقل علي حضرتك..
حسن بهدوء
علي فكره باباكي الله يرحمه كان ليه تأمين وانا خليت طارق يحوله علي الفيزا بتاعتي فانتي بتاخدي حقك واقل كمان، فأوعي تتكسفي وانتي بتطلبي حاجه لان دي فلوسك..
ايتسمت هنا وقالت
حاضر يا بابا حسن مش هتكسف بعد. كده، بس كفايه 50 انا لسه معايا فلوس..
حسن
لا خديهم كلهم عشان تجيبب حاجه تاكليها برضو عشان ما تتعبيش..
هنا بهدوء
انا مش عارفه اقولك ايه بجد، بس وجود حضرتك عوض جزء كبير في حياتي عن غياب بابا وكلكم بصرااحه يعني الحمد لله ان ربنا عوضني بيكم..
طلعت روفاان وروز من اوضتهم وقالت روفان
اطلع بالمصروف بتاعي يا بابا عشان هنتأخر يلااا..
ليلي من جوه المطبخ
استنو افطرو الاول..
روز
هنفطر في المدرسه يا ماما..
حسن
طيب تركزو في الامتحان روز انتي شاطره بس بلاش كروته عشان خطك يبقي حلو..
روز
حاضر يا بابا..
حسن
روفاان ذاكرتي يا حبيبتي؟...
روفان
والله ذاكرت بس ما فهمتش حاجه خالص..
حسن
اومال هتروحي الامتحان ازاي؟..
روفان
بص احنا هنطبش تيجي صح اهي جات تيجي غلط. قدر الله وما شاء فعل..
ضحكت هنا وحسن قال بغيظ
اهو اللي انتي فالحه فيه، بس لو ما نجحتيش انا هفضل مخاصمك..
روفان بحزن
ما تقطعش بقي وانا هنجح ان شاء الله..
_الباب خبط في الوقت ده وراحت هنا فتحت وكان طارق اللي اول ما شافها ابتسم وقال.
طارق
صبااح الخير..
هنا بهدوء
صباح النور اتفضل.
وسابته ودخلت وهو دخل وراها وقال
هو انتي فضلي علي طول لابسه اسود. كده. يا هنا؟..
حسن
معاه حق كفايه بقي وغيري اللون ده..
هنا
بكره ان شاء الله عشان متأخره دلوقتي..
حسن
ماشي يا بنتي، وانت يا طارق تاخد اخواتك توصلهم لمدرستهم هما التلاته..
طارق بحمااس
من عينيا الاتنين بس هات مفتاح العربيه..
حسن
ما تحوش زي النااس وتجيبلك عربيه..
بص طارق لهنا وقال
لا ما انا دلوقتي بحوش عشان اتجوز..
اتكسفت هنا وبصت للارض وحسن ضربه بالمفاتبح وقال
اتنيل امسك ووصلهم من سكات احسنلك..
طارق
حاضر يا بابا..
_واخدهم فعلا معاه وكانت هنا قاعده هي وروز في الكنبه اللي ورا وركبت روفاان جنبيه، ووصل اخواته الاول وبعد ما نزلو بص لهنا وقال.
طارق
تعالي اقعدي جنبي..
هنا
لا انا مرتاحه هنا..
طارق
وانا مش السواق بتاعك تعالي اقعدي جنبي بقول..
هنا بغيظ
هخاف منك انا كده، طيب مش قاعده غير هنا بس..
طارق
تمام خلينا واقفين بقي لحد ما تبطلي عِند وتنزلي..
هنا بغيظ
الله انت مستفز ورخم..
_ونزلت وقعدت جنبيه وهو وصلها لحد المدرسه اللي هتمتحن فيها، وقبل ما تنزل مسك ايدها وقال..
طارق
خلي بالك من نفسك..
هنا بحده
سيب ايدي وما تلمسنيش تاني..
طارق ساب ايدهة وقال بجديه
تمام ما فيش مشكله مؤقتاً لحد ما تخلصي امتحانات واتقدملك..
هنا بتوتر
وانت مين قالك بقي اني هوافق.
قرب منها شويه وقال
هتوافقي يا هنا بالذوق بالعافيه هتوافقي يا هنا...
هنا بقلق
افتح الباب خليني انزل وابعد كده انت مقرب ليه.
طارق
طيب هتوافقي يا هنا انا اعترفت وكل حاجه خلي عندك دم بقي..
هنا بضيق
بقولك خليني انزل..
طارق بحده
ردي عليا الاول..
هنا
لا مش هوافق.
طارق
طيب مش هنزلك يا هنا.
طارق
انا الامتحان خلاص هيبدأ سيبني انزل..
طارق
يبقي تعقلي وتقولي موافقه ومش هنا بس قدام اي حد يسألك..
هنا بغيظ
انت مستفز وعصبتني واحسنلك سيبني انزل.
قرب منها اكتر وقال
ولما عصبتك اهو هتعملي ايه يعنى؟..
ضربته هنا بالقلم وقالت
هعمل كده زي ما قالي بابا حسن..
بصلها طارق بغيظ ومسكت في باب العربيه وقالت
نزلني والا والله هصوت لو عملت حاجه..
طارق بعصبيه
طيب ورحمة ابوكي يا هنا لاوريكي علي القلم ده واتنيلي انزلي، شدي الباب لورا الاول وافتحيه.
هنا بقلق
انت اللي قربت علي فكره وانا حذرتك
طارق بحده
قولتلك انزلي يلاا..
هنا بحزن
طيب نازله خلاص..
ـ نزلت فعلا من العربيه وهو حط ايده علي وشه وابتسم وقال لنفسه بهدوء..
طارق
كده الواحد يعرف يطمن عليكي يا شبر ونص، بس مااشي برضو انا هوريكي علي القلم ده..
_ ورااح الجامعه بتاعته هو كمان..
ــــــــــ #بقلم_الكاتبه_رحاب_القاضي ــــــــ
_واخر اليوم كانت يارا نايمه وصحيت علي صوت موبيلها اللي بيرن فردت علي طول وقالت..
يارا
ايوه يا ياسمين صحيت اهوو..
زين ابتسم وقال
انا زين يا يارا..
يارا ضحكت بهدوء وقالت
سوري يا زين اصل انا جيت من الامتحان ونمت ومستنيه ياسيمين تصحيني عشان اقوم اذااكر.
زين
طيب انا بس بطمن عليكي قومي ذااكري وانا شويه وهكلمك..
يارا
انت فين دلوقتي اصلا..
زين وقف بالعربيه قدام شركة الصاوي وقال
مشوار كده هبقي اقولك عليه بعدين، بس الاهم من اي حاجه اني والله العظيم بحبك اوووي اوووي كمان..
يارا وشها قلب احمر وردت عليه وقالت
علي فكره انت بتوترني بكلامك ده واهوو..
_قالت كلامها وقفلت في وشه وهو ضحك بهدوء ونزل من العربيه ودخل شركة الصاوي، وفي الوقت ده في مكتب يونس كان قاااعد مع المحامي اللي قاله.
المحامي
انا لما عرفت بالامر ده قولت لازم ابلغ حضرتك، بس لامؤخذه يعني يا باشاا هو ايه علاقة الراجل ده بيزن بيه عشان يعمله توكيل عااام..
يونس بجمود
مش عارف، روح انت يا صفوت مكتبك دلوقتي وكأنك ما قولتليش حاااجه.
صفوت قام وقال
تحت امر حضرتك يا افندم..
_قال كلامه وطلع من عنده، وفضل يونس قااعد مدايق وبيفكر ليه زيد عمل توكيل ليزن انه يدير ليه شركته..وفي الوقت ده دخلت السكرتيره عند يونس وقالت..
السكرتيره
بعد اذن حضرتك يا يونس بيه، في واحد بره اسمه زين عز عايز يقابل حضرتك..
يونس بهدوء
طيب دخليه بسرعه واطلبيلي قهوه مظبوط ليا وليه..
السكرتيره
تحت امرك يا افندم..
_طلعت السكرتيره ودخل زين اللي سلم علي يونس وقعد قدامه وقاله يونس بهدوء..
يونس
قولي اخبارك ايه واخبار الدراسه بتاعتك؟..
زين
بخير الحمد لله بس اجلتها السنه دي عشان العمليه بتاعتي..
يونس
ربنا يخفف عنك، انت نورتني النهارده ونورت الشركه كلها..
زين
ده نور حضرتك يا يونس بيه، انا الاول بعتذر اني جيت من غير معاد..
يونس
يا حبيبي براحتك ابوك ده في مقام اخويا وانت ابن اخويا وتيجي وقت ما تحب..
زين بتوتر
ربنا يخليكم لبعض، بس اللي انا جاي اكلم حضرتك فيه ده مالوش علاقه بـ بابا خالص..
يونس
اومال ليه علاقه بمين؟..
زين بجديه
بيا انا ويارا بنت حضرتك..
اختفت ابتسامة يونس وقال بجمود
يارا بنتي وانت ازاي يعني، انت تعرف بنتي منين اصلا؟..
زين
انا هقول لحضرتك كل حاااجه دلوقتي..
_تفتكرو بقي يونس هيعمل ايه؟..
_ويوسف هيروح يخطب رضوي ولا هتبقي فرصه ضايعه؟
_ويزن وريناد هل القدر هيجمعهم ولا لا؟
_وطارق وهنا هيحصل ايه لو اهلها طلبو ياخدوها مثلا؟.
_واسرار هتوافق بكمال ولا لا؟
_واخيراً عبدالله وروان هل هتتقبل روان حياتها معاه ولا هتخسره هو كمان؟
_نتقابل البارت الجاااي
ـــــــــــــــــــــــــــــــــــــــــــــــ
#بقلم_الكاتبه_رحاب_القاضي
