رواية بترتيب من القدر الفصل الرابع عشر 14 بقلم نشوه عادل
ـ قدر هى صاحبة الفكرة دى وهى اللى كلمت دكتور طارق صاحب العيادة واستأذنت منه يوافق نعمل كده هنا عشان انتى وبابا ترجعوا لبعض
سهر: دى حقيقة والله ي عمتو قدر بنت كويسة اوى ودمها خفيف وطيبة وهتحبيها صدقينى
انتصار باستغراب: غريب انك بتدافعى عنها كده وكأنها اعز اصحابك
سهر: لا هى مش مجرد صاحبة دى اكتر من اخت كمان لانى فعلا مش شوفت منها الا الخير وانا بحبها جدا
انتصار بحزن: انا اسفة اوى ي احمد ع انفعالى انا فعلا كنت غلطانة وقاسية لكن بأى وش دلوقتى هقابل البنت ولا حتى سماح
سماح من وراها: انسى اللى فات ي انتصار احنا مش اعداء انتى كنتى ف يوم اعز اصحابى بالعكس كان حبى الوحيد هو حسين الله يرحمه وانتى حبك احمد واظن اللى حصل النهاردة اثبتلك ده
انتصار: انا اسفة حقك عليا ع كل اللى حصل ف بيتك وانفعالى
سماح بطيبة: ولا يهمك كان سوء تفاهم وراح لحاله
انتصار: اومال فين قدر؟!
قدر: احم انا هنا بس خايفة تجبينى من شعرى
ضحك الكل وقربت منها انتصار وقالت: انا اسفة ي بنتى حقك عليا انا حولت اسعد يوم ف حياتك لكابوس وزعلتك منى من اول مقابلة بينا بس انا غيرتى الزيادة هى اللى عمتنى سامحينى
قدر: ولا يهمك ي طنط وزى ما مامتى قالت ده كان مجرد سوء تفاهم وانتهى
عمر بفرحة: يعنى كده خلاص يا ست الكل بقيتى راضية عن العلاقة دى
انتصار: لا طبعا
الكل ف صوت واحد: ليه تانى
انتصار: عشان الخطوبة دى كده مش محسوبة احنا لازم نعمل خطوبة حلوة ونعزم فيها الاهل والصحاب ونفرح الولاد وقبل ده كله نيجى نطلب ايدها من تانى وكأنها اول مرة
اقترب منها عمر واحتضنها بفرحة وقال: انتى احن واعظم ام بالدنيا
ابتسم الجميع بفرحة ونظر مصطفى لسهر وكأنه بيقولها عقبالنا تفهمت نظراته وبعدت عيونها عنه باحراج وبالفعل راح الجميع ع منزل قدر وقرأوا الفاتحة
انتصار: من بعد اذنك ي سماح نأجل الخطوبة ليوم الخميس الجاى
سماح: وماله مفيش مشكلة
عمر: ليه ي ماما بس ما خير البر عاجله
انتصار بضحك: ي واد اتقل انت طالع واقع كده لمين ده ابوك نشف ريقى
ضحك الجميع وقالت سهر: بس ليه ي عمتو بجد التأخير ده
انتصار: ابوكى هينزل الاربعاء الجاى ودى فرصة يحضر الخطوبة معانا ويغير جو
مصطفى بفرحة: طب والله فكرة حلوة جدا عادى بقى ي عمر استحمل للخميس الجاى ع اما استاذ امين يرجع
عمر وهو بيضيق عينه: ماشى ي مصطفى حاضر
انتصار: ف ايه ي ولاد
عمر بخبث: ولا حاجة ي خبر النهاردة بفلوس كمان اسبوع يبقى ببلاش
احمد: انت بتتكلم عن ايه انا مش فاهم حاجة
مصطفى بتوتر وهو بيمسح مناخيره: ولا حاجة ي خالى ما انت عارف ابنك رخم
عمار: طب احنا هنفضل هنا كتير ولا ايه يلا بقى نروح نتغدى ف اى مكان انا واقع من الجوع
عمر: والحساب عندى
قدر أصرت ع طارق يروح معاهم وده لانها بتعتبره ف منزلة ابوها ووافق وراح معاهم
عدى الاسبوع واتى الخميس .....ايمان: انا مش فاهمة ليه معملتوش الخطوبة ف قاعة
قدر: ماما رفضت وقالت انها هتعملها هنا ف الشقة ع الضيق للاهل والصحاب بس
ايمان: طب ليه عشان التكاليف يعنى
قدر: لا ابدا عمر كان ع استعداد يتكفل بكل حاجة بس هى قالت ان دى مجرد خطوبة وي عالم هتكمل او لا وفضلت انها تكون تقليدية زى الاصول ما بتقول
سالى: والله مامتك عندها حق ي بختك بيها ربنا يطول ف عمرها
جات سهر وقالت: انا جيت
البنات باعجاب: وااااو ايه القمر ده ي مزة
قدر بغمزة: هو مش الليلة ليلتى ولا ايه ولا انتى العروسة وانا مش عارفة
خبطتها سهر بخفة: بطلى رخامة ويلا الجماعة وصلوا وبابا عاوز يتعرف عليكى
بالفعل خرجوا وكانت قدر جميلة جدا والمفاجأة انها اتحجبت ولما شافها عمر فرح جدا وكانه اول مرة يشوفها وقال باعجاب: والله ما زادك الحجاب الا جمال ع جمالك ي اميرتى
ابتسمت قدر بخجل وسلمت ع الجميع ...امين: ما شاء الله زى القمر بل اجمل من اللى وصفوه
قدر: شكرا لحضرتك وحمدالله ع سلامتك
عمر وهو بيميل ع مصطفى: ما تتلحلح ي جدع انت بقى وخلى الفرحة فرحتين
مصطفى: مش عارف ي عمر متوتر اوى وخايف
عمر: خايف من ايه هو هيعضك انجز بقى وانطق مستنى ايه ولا انت بتعمل جامد عليا انا بس
مصطفى: احم استاذ امين كنت عاوز اقولك حمدالله ع السلامة
امين باستغراب: الله يسلمك ي مصطفى بس دى سابع مرة تقولى حمدالله ع السلامة
عمر: هو عاوز يقولك حاجة ي خالى بس تقريبا القط اكل لسانه
امين: ليه ي ابنى انت محرج منى ولا ايه انت مش عارف غلاوتك عندى قول اساعدك ازاى
مصطفى بنفس وتوتر واضح: بص حضرتك انا ..انا بحب سهر وعاوز اتجوزها
لحظة صمت من الجميع ابتسم امين وقال: عارف
مصطفى بصدمة: عارف! ازاى!
امين: انا معود بنتى ع الصراحة معايا دايما يا مصطفى طول عمرى كنت ليها الصاحب وهى حكت ليا عن مشاعرها اتجاهك وعن اعترافك ليها وكمان قالتلى انك هتطلب ايدها منى ف اللحظة المناسبة عشان كده كنت مجهز نفسى ومستغربتش طلبك
احمد: انا لو كان عندى بنت حقيقى مكنتش أعزها عن مصطفى مش بقول كده لانه ابن اختى بس عشان هو راجل ويعتمد عليه والله ي امين واعتبرنى انا والده وانا اللى بطلب ايد سهر لابنى ها قولت ايه
امين: اكيد موافق وهكون مطمئن عليها مع مصطفى وكفاية انها هتكون وسطكم
عمار: حلو اوى الكلام ده يعنى عمر ومصطفى خطبوا طب وانا هفضل سنجل كده لحد امتى ي ناس
سالى: معليش ي ابو الصحاب هنفضل انا وانت وايمى ف قائمة السناجل لاجل غير محدود
ضحك الجميع ف سعادة واتفقوا ع ميعاد فرح قدر وعمر وسهر ومصطفى وووو.....يتبع
#بترتيب_من_القدر الرابع عشر
#بقلم_نشوه_عادل
