رواية بترتيب من القدر الفصل الحادي عشر 11 بقلم نشوه عادل
ـ انتى بتقولى ايه انتى كبرتى وخرفتى بجد بقى
انتصار بدموع: بالعكس فوقت بس بعد ما ضيعت عمرى وشبابى مع واحد كان معايا بجسمه وقلبه وعقله مع غيرى انا منسيتش ي احمد لما كنت بتنام وبتحلم بيها وتقول اسمها بصوت عالى وتقول ارجعى ي سماح رجعيلى روحى اللى اخدتيها ومنسيتش لما كنت تغلط باسمها واحنا مع بعض انا منسيتش اى حاجة والله
احمد: لا حول ولا قوة إلا بالله شيلى الافكار دى من دماغك ي انتصار انتى مش صغيرة للكلام ده
انتصار: بس انا مصممة ع موقفى وهتطلقنى ي احمد
احمد: انا مش هاخد ع كلامك وهعتبر ان نفسيتك تعبانة واذا كان ع اللى يسيب البيت فهو انا مش انتى ده بيتك ي ام عمر
نظر لعمار وقاله: خلى بالك من مامتك وبنت خالك انت دلوقتى راجل البيت ف غيابى انا واخوك
مشى احمد ووقف عمار يبص ع الباب بحزن ونظر لامه بعتاب واخدها هو وسهر دخلوها الاوضة اما احمد راح ع شقة مصطفى
مصطفى بفرحة: خالى ايه الزيارة الغالية دى الحبايب كلها عندى
عمر بضحك: انت كمان ملقتش ليك مكان ي والدى وجه اليوم اللى نحتاج فيه لواحد زى ده
مصطفى: خلى بالك انت ف بيتى ها يعنى ممكن اطردك دلوقتى
عمر: لا ابن عمتى شاب رجولة ميطردش حد من بيته انصاص الليالى يرضيك تخرجنى ف الشارع ف وقت زى ده للشباب الوحشين
مصطفى بضحك: لا ميرضنيش يا قطة
قعد احمد بحزن وهو حاطط راسه بين ايده ...عمر: مالك ي بابا
احمد: انا وامك اتخانقنا وزعلتها اوى ي عمر اول مرة ف حياتى اقسى عليها بالشكل ده امك مفكرة انى مش بحبها ويمكن انا نفسى محسيتش بحبى ليها اد النهاردة وانا شايفها شايلة شنطتها وماشية وبتطلب منى الطلاق
عمر: يعنى انت بجد بتحبها؟!
احمد: ايه السؤال الغبى ده ايوة بحبها وجدا كمان دلوقتى امنت ان فيه حب بيتولد بالعشرة الطيبة انا مشوفتش من امك غير الحنان والدفا وقفت جنبى ومسابتنيش أيدها بايدى واستحملت كتير معايا وعشانى وعمرى ما انكر جميلها اى نعم هى تبان قاسية وعصبية لكن والله مفيش ف حنيتها وقلبها ابيض
عمر بارتياح وفرحة: انا مبسوط اوى بكلامك ده بس تعرف ي بابا انت برضه غلطان
احمد: انا! غلطان ف ايه
عمر: انك عمرك ما بينت ليها حبك انت كنت بس بتبين احترامك ليها لكن الحب لا يمكن ده اللى شوفته والاكيد بقى ان بنات حواء كلها عقلية واحدة سواء كانت صغيرة او عجوزة
مصطفى: ي سيدى ع العقل والرزانة
عمر: ما تدخل تنام وتريحنا مش عندك شغل بكرة
مصطفى : لا ما انا ناوى اخد اجازة فترة كده
احمد: ده اللى هو ازاى يعنى انت عارف انى مش هروح الفترة دى انا كمان
مصطفى:اطمن ي خالى انا وكلت امين ياخد باله وكده كده انا متابع معاهم اول بأول اونلاين
احمد: طب ليه يعنى؟!
مصطفى بتهرب: عادى ي خالى فترة راحة ده انا لو موظف حكومى هأجز اكتر من كده
تانى يوم ف الشركة ..... سهر: سالى ازيك مستر مصطفى ف مكتبه
سالى: لا ي سيتى مستر مصطفى مجاش النهاردة
سهر باستغراب: ليه دى الساعة بقت ١٢ الضهر اهو ولو حد عاوزه ف حاجة مهمة يعمل ايه
سالى: مستر مصطفى واخد اجازة مفتوحة ومحددش هيرجع امتى ولو فيه حاجة مهمة استاذ امين مكلف بمتابعة الشغل
سهر: تمام ...قدر جات
سالى: لا برضه استأذنت ف اجازة لمدة أسبوع عشان تريح اعصابها بس انا وايمان هنروح ليها بعد الشغل
سهر: تمام وانا كمان هاجى معاكم
سالى: اوك ي فلة
دخلت سهر ع مكتبها ورنت ع مصطفى لكن مصطفى كان قافل فونه اترددت شويه لكن بعتت ليه ماسدج بتقول: ع فكرة الصاحب مينفعش يتخلى عن صاحبه وانا محتاجة ليك
بعد الشغل خرجوا البنات وراحوا ع بيت قدر واستقبلتهم سماح بترحاب وجات قدر وقعدت معاهم
سهر: مش تفوقى بقى ي حب
قدر: سهر معليش تعالى عاوزاكى ف موضوع مهم جدا
اخدتها قدر ع اوضتها وقالت: هو كلام مدام انتصار ده كان حقيقى
سهر: اللى هو ايه؟!
قدر: انك كنتى بتحبى عمر وانا اخدته منك وخربت علاقتكم
سهر: الكلام ده مش حقيقى ي قدر والله عمر طول عمره بيعاملنى انى اخته وبس
قدر: طب وانتى
سهر بتنهيدة: كنت مفكرة انى بحبه وطلعت مشاعرى مجرد تعود مش اكتر يعنى والله كل اللى اتقال ده مكنش حقيقى عمتو بس كانت عاوزة عمر يتجوزنى وكانت عارفة انى بحبه وده اللى كان مشجعها لكن الحقيقة بقى ي مزة ان قلبه مدقش غير ليكى وبصراحة الواد عنده نظر بصراحة
ضحكت قدر وقالت: فرحتينى اومال مالك شكلك مش مظبوط
سهر بتردد لكن قررت تحكى: مصطفى مجاش النهاردة الشركة وبرن عليه فونه مقفول
قدر بخبث: مصطفى ااااه
سهر بتوتر: ايه ده انتى فهمتى ايه انتى انا ومصطفى اصحاب وبس
قدر: اصحاب اه ما انا عارفة هو انا قولت غير كده
سهر: تصدقى انك رخمة وانا غلطانة انى حكيتلك
ومسكت المخدة خبطتها بيها ودخلت سالى وايمان سلكوا بينهم وكانت سماح واقفة ع الباب بتبص عليهم بفرحة جريت عليها سهر وقالت: ابعدى بنتك الشريرة دى عنى ي موحة
سماح: هو انا كنت ممكن امنعها لكن بعد موحة دى رجعت ف كلامى
اتصل عمر ع قدر وطلب انها تنزل يخرجوا شويه وفعلا بعد البنات ما نزلوا راحت معاه ع كافيه ع النيل
قدر: ف ايه ي عمر مالك؟!
عمر: زعلان ي قدر اول مرة بابا وماما يتخانقوا كده وبابا حالته النفسية وحشة ومخرجش من البيت النهاردة وكلمت عمار قالى ان ماما برضه تعبانة ونفسيتها وحشة ومبطلتش عياط
قدر بتفكير: طب واللى يصالحهم ع بعض ويرجعوا احسن من الاول وووووو....يتبع
#بترتيب_من_القدر الحادى عشر
#بقلم_نشوه_عادل
