رواية الوشم السائر الفصل الثاني 2 بقلم اسماعيل موسي
#الوشم_السائر
٢
لازم تعرف يا عونى ان أى كلمه تنطقها ممكن تكون دليل إدانة
او؟ ونفخ معاون المباحث دخان لفافة التبغ فى وشى فيها نجاتك.
قلت يا باشا انا مش محتاج اكدب، مفيش اى علاقه تجمعنى بمدام نيرة
صمت معاون المباحث __انا مقلتش ان فيه علاقه تجمعك بمدام نيره يا عونى
قلت بوضوح تعرف مدام نيره؟
وشعرت ان معاون المباحث ينتوى توريطى او ببساطه يشعر بالملل
رفع معاون المباحث بصره تجاه النافذه كأنه يرى عبر الجدار وهمس مدام نيره طلبتك انت تحديدا عشان تساعدها
حط نفسك مكانى يا اخى، واحد بيدعى انه ميعرفش واحده ولا ليه اى علاقه بيها وبعد ما تحصل جريمة قتل تكون هى فيها المتهم الرئيسى تطلبه هو بالأسم علشان يساعدها؟
وقبل ان افتح فمى قال المعاون لازم تعرف انك مش متهم هنا، نيره فى الغرفه إلى جنبى تقدر تقابلها ولو عرفت اى حاجه يا ريت تبلغنى....
فى الرواق بلعت ريقى وشفت واحده قاعده متوتره حسيت انى اعرفها كان جنبها راجل على ما يبدو جوزها وكان بيحاول يهديها
سألت العسكرى مين دى؟ همس دى اخت المجرمه
فتح الشرطى الباب وقال انا هكون هنا لو احتجت حاجه
نيره المكبله بالحديد كانت تجلس على كرسى خشبى
نحيله ورقيقه مثل الورده الذابله
__استاذ عونى؟
ازيك يا مدام نيره
_الحمد لله استاذ عونى
قعدت على الكرسى مش عارف اقول ايه
_مقتلتوش يا عونى والله ما قتلته، انا رجعت الشقه اجيب أوراق الورث بتاعت بابا، اخدتها ومشيت، واحمد مكنش موجود وقتها
وكنت على وشك ان اسألها ليه انا؟ ليه اخترتى شخص ميعرفش عنك اى حاجه علشان يساعدك؟
لكن لسانى رفض ان يطاوعنى، قربت المقعد من نيره
ولمست بعيونى خجلها، بعد ما فتحتى الشقه عملتى ايه؟
_همست نيره مفتحتش الشقه، الشقه كانت مفتوحه
ها وبعدها عملتى ايه؟
_دخلت على اوضة المكتب اخدت الأوراق ومشيت
يعنى مدخلتيش اى غرفه تانيه؟
_لا
محسيتيش ان فيه حاجه غريبه فى الشقه؟ أوراق مبعثره؟
مقعد مقلوب؟
فنجان مهشم؟
__كل حاجه كانت طبيعيه يا عونى
وفكرت، انها تقول عونى دون القاب رغم أنها اول مره اتحدث فيها إليها، ايه إلى عايزه توصلهولى؟
كنت اعرف ان حوارنا مسجل والكاميرات تصورنا وان رفع الكلفة بتلك الطريقه قد يبدو امر مريب
لاحظتى اى حاجه تانيه يا مدام نيره؟
_وانا طالعه الشقه قابلت شخص معالمه مش واضحه كان نازل السلم بسرعه لكن مشفتش وشه
قلت ودا قولتيه فى محضر التحقيق؟
همست ايوه قولته لكن محدش صدقنى، عونى انا مش عايزه اموت ارجوك ساعدنى
لكن انا مش محامى يا مدام نيره هساعدك ازاى؟
__همست نيره انت هتساعدنى، لازم تساعدنى، لازم ونهضت فجأه والقت بجسدها على ووضعت حافة زجاجه مكسوره على رقبتى، لو تحركت هقتلك
