رواية اميرة اخر الزمان الفصل الاربعون 40 بقلم ملك ابراهيم
#الحلقة_40
#أميرة_اخر_الزمان
#بقلمي_ملك_إبراهيم
توترت بشدة وتحدثت بهدوء.
ـ لان الوقت دلوقتي مش مناسب وحاسه اني مش هقدر اركز
تحدث اليها ببساطه.
ـ لا متقلقيش انا هكون معاكي واي حاجه مش فهماها انا هساعدك وكمان ولاء هتساعدك
رفعت عينيها تنظر اليه بخجل قائلة له.
ـ حضرتك عارف ظروفي وعارف اني شايله مسؤلية طفلتين وكمان فلوس المستشفى اللي انا المفروض اسددها كل شهر، يعني الحمل تقيل عليا وده مش الوقت المناسب عشان افكر اني ادرس
حرك رأسه بتفهم قائلاً لها بهدوء.
ـ طب لو قولتلك ان في شخص اتبرع للمستشفي بمبلغ كبير للعمليات المجانيه والمستشفي اعتبرت عملية جنه من العمليات المستحقه واعفتك من دفع تكاليف العمليه
فتحت اميرة عينيها بصدمة قائلة له.
ـ يعني ايه؟!!!
تحدث بهدوء.
ـ يعني المستشفى بلغوني إمبارح ان اسم جنه جه من أسماء المستحقين وخلاص مش هتدفعي فلوس العمليه للمستشفى
امتلئت عينيها بالدموع قائلة بزهول.
ـ دا بجد؟!
حرك رأسه لها بالايجاب، انسالت دموعها من شدة الفرحه قائلة له.
ـ انا مش مصدقه
ابتسم لها بهدوء قائلاً.
ـ لا صدقي يا اميرة وان شاء الله انا هقدملك في المستشفى بس هحتاج منك شوية اوراق كده تجهزيها
تحدثت اليه بسعاده كبيرة.
ـ انا مش عارفه اشكر حضرتك ازاي
تأمل سعادتها بعينين لا تريد رؤية اي أمرأة سواها وقلب اصبح ينبض بأسمها، اراد ان يخبرها انه لا يريد ان تشكره فقط يريدها سعيده ويريد رؤية ابتسامتها تزين وجهها.
وقفت اميرة وشكرته مرة أخرى وخرجت من الغرفة بحماس، ابتسم محمد وهو ينظر امامه ويتمنى اسعادها اكثر.
___________
عند شاهنده..
كانت تسير بالطريق ويسير يوسف بجوارها، اقترب منها ومسك بيدها وهو يسير بجوارها وضغط عليها قائلاً لها بنبره دراميه كي يظهر لها كم يعشقها.
ـ وحشتيني اوي، عايزين نقعد في مكان مفيهوش ناس كتير عشان نتكلم برحتنا
تحدثت اليه شاهنده بخجل.
ـ بس انا مش هينفع اتأخر اوي انا قولت لماما ان انا رايحه عند سمر
اخذها وتحدث معها بمرح.
ـ متخافيش يا حبيبي مش هنتأخر
ثم اضاف بطريقة دراميه.
ـ امتي بقى اتخرج من الكليه بتاعي دي واجي اتقدملك وتبقي مراتي ونروح ونيجي برحتنا
فرحت شاهنده كثيرا بحديثه عن الزواج، اقتربوا من احدى الحدائق وجلسوا بمكان بعيدا في الحديقه بعيدا عن الاضواء ويحاوطه الظلام قليلا وتحدث اليها يوسف.
ـ احنا هنقعد هنا عشان مفيش حد يشوفنا
جلست شاهنده بجواره وهي تشعر بالخوف قليلا، وضع يوسف يديه فوق خصرها ضمها اليه وتحدث اليها.
ـ نفسي تبقي مراتي ونبقى في اوضتنا عشان نبقى برحتنا مع بعض
خجلت شاهنده كثيرا، ضمها يوسف اليه اكثر وتحدث اليها بمكر.
ـ بس قبل الجواز لازم ناخد علي بعض الاول
تحدثت بخجل وهو يتحسس جسدها بيديه.
ـ ازاي يعني؟!
خطف قبله من شفاتيها قائلاً لها.
ـ يعني كده
وقفت شاهنده من مكانها بخوف قائلة له.
ـ لا يا يوسف مش هينفع كده
تحدث اليها مدعي الحزن.
ـ اااه قولي ان انتي مش بتحبيني بقى
جلست بجواره مرة أخرى قائلة له.
ـ لا طبعا انا بحبك اوي بس انا خايفه
ضمها اليه قائلاً لها.
ـ متخافيش يا حبيبتي طول ما انا معاكي
عانقته شاهنده بتوتر وشيطانها يحلل لها ما يحدث بينهما.
رواية أميرة آخر الزمان بقلمي ملك إبراهيم.
___________
في نهاية اليوم.. انتهت اميرة من عملها وعادت في طريقها الي المنزل وهي سعيده جدا وتشعر ان الحياة تفتح لها ذراعيها كي تعيش حياتها من جديد وتنطلق الي المستقبل بدون الم بدون خوف من احد لكنها وجدت من يقف امامها ويقطع عليها الطريق، نظرت اليه بصدمة وتحدثت اليه بصوت غاضب.
ـ ايه اللي وقفك قدامي كده؟!!
تحدث فتحي وهو يتأملها بوقاحه.
ـ مشتااق
تحدثت اليه بتهديد.
ـ طب ابعد عن وشي احسنلك ودي اخر مرة تتعرضلي في طريق يا اما والله هفضحك وهوديك في ستين داهيه
استغرب فتحي من قوتها وتحدث اليها.
ـ ايه يا اميرة دا انا حتى عايز مصلحتك، انا بحبك يا اميرة من زمان وسبت اماني عشانك ولو عيزاني اطلقها هطلقها دلوقتي حالا عشان خاطر عيونك
غضبت منه كثيرا وتحدثت اليه بغضب.
ـ تطلقها عشان خاطر عيوني!! ، تطلق مراتك عشان واحده تانيه ليه، تبص اصلا لوحده تانيه ومراتك معاك ليه، انت ترضى ان مراتك تبص لراجل غيرك؟!، ترضي مراتك تطلب منك الطلاق عشان عايزه تتجوز راجل غيرك!! هو انتوا ليه كلكم انانيين ومبتفكروش غير في نفسكم وبس، مبتفكروش غير في اللي يسعدكم انتم ومش مهم احنا، علي فكره انا كرهت كل الرجاله بسبب اشكالكم وهعرف اماني بكلامك ده واخليها تطلق منك وتخلص من واحد زيك
غضب منها فتحي وتحدث اليها بتهديد.
ـ لو جبتي سيرة لاماني انا هفضحك واقول ان انتي اللي كنتي بتشاغليني وهقولها كمان ان انتي طلبتي مني اطلقها عشان تنتقمي منها بسبب اللي اخوها عمله معاكي
اتصدمت اميرة من حديثه وتحدثت اليه بغضب.
ـ لو عملت كده انا مش هستغرب خالص لانك واحد واطي واللي زيك يعمل اكتر من كده
ثم نظرت اليه باستحقار وتابعت سيرها، وقف فتحي بصدمة وتوعد لها بداخله ويندمها علي رفضها له.
عادت اميرة الي المنزل وصعدت الي الشقه بالاعلي وجدت اماني تجلس تشاهد التلفاز والبنات نائمين بجوارها.
جلست معها اميرة وهي تحاول ان تخفي غضبها، نظرت اليها اماني بستغراب قائلة لها.
ـ مالك يا اميرة شكلك مضايقه
نظرت اليها اميرة بتفكير، تريد ان تخبرها بمطاردت فتحي لها لكنها لا تريد ان تحزنها، تحدثت اليها بهدوء.
ـ مفيش يا اماني انا تعبانه بس شويه من الشغل
صمتت قليلا ثم اضافت بفضول.
ـ قوليلي يا اماني انتي ناويه تعملي ايه في موضوعك مع جوزك؟
تحدثت اماني بحزن.
ـ ناويه اطلق منه يا اميرة، كفايه لحد كده
تحدثت اليها اميرة بالايجاب.
ـ عين العقل يا اماني هو اصلا ميستاهلكيش والله انتي تستهلي راجل بجد يحبك ويحافظ عليكي
حركت اماني رأسها بحزن قائلة بحيرة.
ـ بس انا مش عارفه اعمل ايه دلوقتي ومش عايزه ادخل جمال اخويا في اي حاجه تخصني بعد كده
تحدثت اليها أميرة بعد تفكير.
ـ ايه رأيك ترفعي عليه قضية طلاق
نظرت اليها اماني بقلق قائلة لها.
ـ ازاي؟!
تحدثت اميرة بهدوء.
ـ بصراحه معرفش بس ممكن نروح لاستاذ طارق المحامي وهو يقولنا ازاي
فكرت اماني قليلا بحيره، تحدث اليها اميرة.
ـ بصي فكري برحتك الاول ولو حبيتي نروح لأستاذ طارق نسأله انا ممكن اجي معاكي
حركت اماني رأسها بالايجاب وهي تفكر هل هي تريد الطلاق من فتحي حقا ام لا تستطيع الابتعاد عنه وتتحمل لقب مطلقه.
_________
بعد اسبوع في شقة والدة الدكتور محمد..
جلست هويدا مع زوجة خالها وتحدثت اليها بحزن.
ـ انا مبقتش قادرة افهم محمد خالص يا طنط، تصرفاته كلها غريبه مع اميرة دي، دا بيعاملها وكأنه هو اللي بيشتغل عندها مش العكس
فتحت والدة محمد عينيها بصدمة قائلة لها.
ـ يعني ايه الكلام ده يا هويدا؟!
تحدثت هويدا بغيظ.
ـ يعني مش بيستحمل عليها كلمه وحتى لو عملت اي حاجه غلط في الشغل عادي جدا ميقولهاش حاجه ويتقبل اخطاءها بابتسامة غريبه جدا ولو حاولت اشد عليها شويه يقفلي ويبقى في صفها هي، بجد حاجه تجنن انا مبقتش فاهمه حاجه
خفضت والدة الدكتور وجهها تفكر بغضب في حديث هويدا، نظرت اليها هويدا وتحدثت بفضول.
ـ هو محمد بيحبها ولا ايه يا طنط؟!
نظرت اليها والدة محمد بصدمة قائلة.
ـ بيحبهاا!!!
حركت هويدا رأسها بالايجاب قائلة.
ـ كل اللي هو بيعمله معاها ملوش تفسير غير كده
نظرت والدة الدكتور امامها بشرود ثم تحدثت بصوت منخفض.
ـ دي تبقى مصيبه لو طلع فعلا بيحبها
نظرت اليها هويدا وتحدثت باصرار.
ـ انا لازم اتأكد من الموضوع ده
نظرت اليها والدة محمد وتحدثت بقلق.
ـ فعلا لازم نتأكد ولو طلع فعلا كده لازم نوقفه ونخرجها من حياته لاني مش هسمحله يدمر حياته مرة تانيه كفايه اللي حصل في جوازته الاولى
شردت هويدا بتفكير عميق وتحدثت بتأكيد.
ـ متقلقيش يا طنط وسيبي الموضوع ده عليا
رواية أميرة آخر الزمان بقلمي ملك إبراهيم.
______________
في مكتب استاذ طارق المحامي..
ذهبت اليه اميرة ومعها اماني الاستشارة.
جلست امامه اماني وهي تفرك بيدها بتوتر..
تحدثت اليه اميرة بهدوء.
ـ احنا كنا جاين لحضرتك النهاردة في استشاره تخص اماني
حرك طارق رأسه بالايجاب قائلاً.
ـ تحت امركم
نظرت اميرة الي اماني ثم تحدثت مرة أخرى.
ـ اماني كانت عايزه تطلق من جوزها وكانت عايزه تعرف يعني ايه الإجراءات
نظر طارق الي اماني وتحدث اليها باهتمام.
ـ ممكن اعرف ايه هي اسباب الطلاق؟
لم تستطيع اماني الرد عليه وجلست تخفض وجهها ارضا، تحدثت اميرة معها.
ـ اتكلمي يا اماني مع استاذ طارق عشان يعرف هيعمل ايه
رفعت اماني وجهها وتحدثت بصوت منخفض.
ـ انا عايزه اطلق منه لاني مش ماليه عينه وعايز يتجوز عليا
عقد طارق ما بين حاجبيه قائلاً لها.
ـ هو قالك كده؟
تحدثت اماني بخفوت.
ـ عينيه وتصرفاته كلها هي اللي قالت كده
حرك طارق رأسه بالايجاب قائلاً لها.
ـ تمام يا اماني واضح ان انتي مش حبه تتكلمي، عموما انا محتاج تعمليلي توكيل وانا هشوف شغلي معاه
حركت اماني رأسها بالايجاب، تحدثت اليه اميرة بتأكيد.
ـ المهم يا استاذ طارق احنا عايزين حضرتك تطلع عينه وتجبلها كل حقوقها
ابتسم لها طارق قائلاً.
ـ هيحصل ان شاءالله اطمنوا
ابتسمت اميرة الي اماني وربتت على يديها بدعم.
____________
في منزل والدة جمال بداخل شقتها..
جلست مروة براحه وهي تضع يديها فوق بطنها البارزة، خرجت شاهنده من غرفتها وهي ترتدي ملابس قصيره تلتصق بجسدها، نظرت اليها مروة بطرف عينيها قائلة لها بسخريه.
ـ على فين يا ست شاهنده؟
نظرت اليها شاهنده بغضب قائلة لها.
ـ وانتي مالك انتي ما تخليكي في حالك
خرجت والدة جمال من المطبخ علي اصواتها وتحدثت الي مروة بغضب.
ـ مالك ومال البت يا مروة، انتي هتفضلي قعده لي كده وعامله فيها هانم، ما تقومي تنضفي الشقه وجهزي الغدا
تحسست مروة بطنها ببرود قائلة.
ـ هقوم فين ببطني دي دا انا تعبانه وانا قاعده
عوجت حماتها فمها بسخرية قائلة.
ـ اللي قبلك كانت حامل في اتنين وكانت شايله البيت كله وعمرها ما شتكت
استرخت مروة في جلستها قائلة بفخر.
ـ انتي عايزه تجيبي حمل البنات زي حمل الولد
زفرت شاهنده بغيظ قائلة.
ـ يادي الولد اللي قرفتينا بيها
تحدثت والدة جمال الي ابنتها.
ـ انتي رايحه فين دلوقتي يا شاهنده؟!
توترت شاهنده قليلا وتحدثت.
ـ هكون رايحه فين يعني يا امي، رايحه عند سمر
ثم اضافت بصوت غاضب وهي تنظر الي مروة.
ـ مبقاش ليا نفس اقعد في الشقه هنا
ردت عليها والدتها وهي تنظر الي مروة.
ـ عندك حق والله يا بنتي
تجاهلتهم مروة وجلست تشاهد التلفاز ببرود، تحدثت والدة جمال الي ابنتها.
ـ روحي انتي يا شاهنده ومتتأخريش
ذهبت شاهنده وجلست والدة جمال امام مروة تنظر لها بغضب.
رواية أميرة آخر الزمان بقلمي ملك إبراهيم.
__________
بعد اسبوعين..
ذهب فتحي الي منزل ام جمال وهو يصرخ بأسم اماني بغضب ويحمل بيده اعلان قضية الطلاق.
خرج جمال من ورشته وركض الي فتحي بغضب قائلاً له.
ـ في ايه يا عم انت صوتك عالي ليه؟!
تحدث اليه فتحي بصوت مرتفع.
ـ بقى بتخلي اختك ترفع عليا قضية طلاق يا جمال، لييييه هو انا كنت بعمل اللي انت مبتعملوش
نظر اليه جمال بستغراب قائلاً له.
ـ قضية ايه؟!
تحدث فتحي بصراخ وهو يعطيه ورقة الدعوه.
ـ اتفضل وانت تعرف قضية ايه، الهانم اختك رافعه عليا قضية طلاق
استغرب جمال وهو يقرأ الدعوه وتحدث الي فتحي بهدوء.
ـ طب تعالي فوق نتكلم ونشوف ايه حكاية القضيه دي انا معرفش هي عملت ايه ومين اللي رفعلها القضيه
صعد معه فتحي وهو يزفر بغضب، دخلوا شقة والدة جمال ورحب به جمال بداخل الشقه، استغربت والدة جمال واقتربت منهم معتقده ان فتحي جاء من اجل ان يصالح زوجته، تحدث جمال الي والدته امام فتحي.
ـ هو انتي تعرفي يا امي ان اماني رفعت قضية طلاق علي فتحي؟
شهقت والدته بصدمة قائلة له.
ـ طلاق ايه كفى الله الشر؟!
نظر اليهم فتحي بستغراب قائلاً لهم.
ـ يعني ايه، يعني انتوا كلكم متعرفوش يعني اماني راحت لمحامي ورفعت قضيه من نفسها كده؟!
شردت والدة جمال قليلا ثم تحدثت بغضب.
ـ مفيش غيرها اميرة اكيد هي اللي عرفتها سكت المحامي دي عايزه تطلق بنتي وتقعدها مطلقه زيها
وقفت من مكانها بغضب وخرجت من الشقة كي تصعد الي شقة اميرة، تحدث جمال الي فتحي بهدوء.
ـ هنعرف دلوقتي ايه حكاية المحامي والقضيه دي بس انت عارف يا فتحي احنا منعملش كده وانا مرضيش ان بيت اختي يتخرب
صمت فتحي وهو يستمع الي حديث جمال ويخشي ان تكون اميرة اخبرت اماني بمطاردته لها.
في الاعلي امام شقة اميرة.
وقفت ام جمال تطرق علي الباب بعنف، ركضت اماني وفتحت لها الباب، صفعتها امها علي وجهها وهي تصرخ بها.
ـ قضية ايه يا بت اللي انتي رفعتيها علي جوزك، عايزة تطلقي وتفضحينا!
ركضت أميرة اليهم واتصدمت من رد فعل والدة جمال، تحدثت اماني الي امها ببكاء.
ـ اومال كنتي عايزاني اعمل ايه يعني، استناه يتجوز عليا وانا حاطه ايدي علي خدي؟!
نظرت امها الي اميرة وتحدثت بغضب.
ـ لا تسمعي كلام خرابة البيوت دي وتخربي علي نفسك
ثم اضافت بفضول وهي تنظر الي ابنتها.
ـ هي اللي خدتك للمحامي من ورانا صح؟
حركت اماني رأسها بالايجاب وهي تبكي، اقتربت منها امها وجذبتها من يدها وتحدثت الي اميرة بتهديد.
ـ ابعدي عن بنتي وملكيش دعوه بيها انا فاهمه حركاتك دي كويس وعارفه انك عايزه تخربي علي بنتي وتطلق زيك عشان تنتقمي مننا بس ده بعدك بنتي هترجع لجوزها وتنور بيتها
نظرت اميرة الي اماني كي تتحدث وترد علي والدتها وتخبرها انها هي من ارادت الطلاق من فتحي بكامل حريتها واميرة لم تجبرها علي شئ لكن اماني خيبت ظنها ولم ترد علي والدتها وانهارت في البكاء، جذبتها والدتها من يدها وتحدثت الي اميرة بتحذير.
ـ خليكي في حالك وابعدي عن عيالي ولو قربتي من عيالي تاني يا اميرة انا هكلك بسناني انتي فاهمه
وقفت اميرة مصدومه، اخذت والدة جمال ابنتها اماني ونزلوا شقتها بالاسفل، وقفت اميره ام الباب لا تصدق ما حدث، اغلقت الباب عليها هي وبناتها وهي تشعر بالخذلان من ضعف اماني.
في الأسفل..
دخلت والدة جمال شقتها واماني بيدها، اقتربت من فتحي وتحدثت اليه.
ـ مراتك اهي يا فتحي العقربه اللي فوق دي هي اللي لعبة في دماغها عشان ترفع عليك قضيه و تطلق منك
نظر فتحي الي زوجته وهي تخفض عينيها الي الارض وتبكي، فكر بمكر قليلا ثم تحدث الي حماته.
ـ انا كنت حاسس برضه ان هي اللي لعبة في دماغها عشان تطلق
ثم اضاف بمكر موجه حديثه الي اماني.
ـ واللي انتي متعرفهوش يا ست اماني ان أميرة من يوم ما اطلقت من اخوكي وهي عماله تلف عليا هي وامها عشان اتجوزها ولما ملقتش مني وش قالت تضحك عليكي وتخليكي تطلقي عشان اتجوزها
نظرت اليه اماني بصدمة، استغربت والدة جمال من حديث فتحي، نظر جمال الي فتحي بزهول قائلاً له.
ـ أميرة عايزه تتجوزك انت!!
توتر فتحي قليلا وتحدث بتأكيد.
ـ ايوه وحاولت معايا كتير بس انا مستحيل ابص لوحده تانيه غير مراتي
تحدثت اليه اماني ببكاء.
ـ بس انا عارفه يا فتحي ان انت اللي علي طول بتبص لاي وحده تشوفها ودايما حاسه اني مش ماليه عينك
توتر فتحي من حديثها الصحيح، تحدث جمال ردا علي شقيقته.
ـ كلنا بنبص يا اماني بس المهم ان في الاخر جوزك بينام في حضنك انتي اخر الليل
تحدثت امها بتأكيد علي حديث جمال.
ـ اخوكي بيتكلم صح يا اماني وبعدين انتي مش وش طلاق، جوزك بيحبك وملوش بركه اللي انتي صح يا فتحي؟
رد فتحي بتأكيد وهو يحمل الغدر بداخله.
ـ ايوه طبعا يا حماتي
تحدثت اليه حماته بابتسامة.
ـ طب قوم يلا يا فتحي بوس دماغ مراتك وراضيها متشمتوش الأعداء فينا
وقف فتحي وقبل اعلي رأس اماني، ابتسمت له اماني بخجل، تحدثت اليها امها بتأكيد.
ـ روحي مع جوزك دلوقتي للمحامي اللي انتي روحتيله مع العقربه اللي فوق دي وخليه يسحب القضيه احنا معندناش حد بيطلق... بقلمي ملك إبراهيم.
... يتبع
