رواية النصيب الفصل الواحد والعشرون 21 بقلم رحاب القاضي
#النصيب
ـ الحلقه الـ 21
ـــــــــــــــــــــــــــــــــــــــــــــــــــــــــــ
ليلٌ طويلُ وعَيْنٌ حَشْوُها أَرَقُ!
ـ صباحاً كان أسر قااعد في اوضته وهو ماسك موبيله وفاتح صوره ليه مع بنت جميله جداً ، وفي الوقت ده طلعت شهد من اوضة اللبس وأخدت موبيلها اللي كان في الشاحن والشنطه بتاعتها وجات تخرج بس هو سألها وقال
أسر
رايحه فين ؟
_ما ردتش عليه وجات تخرج بس قام هو ومسكها من دراعها جامد وقال بعصبيه
أسر
لما اكلمك تردي عليا ، رايحه فين ؟
ردت عليه من غير ما تبصله وقالت
عندي محاضرات مهمه وهتأخر عليها
ساب دراعها وقال
طيب تروحي وترجعي علي هنا علي طول ، ولو هتروحي اي مكان تاني تقوليلي قبلها ..اتفقنا ؟؟
شهد بضيق
طيب
أسر بهدوء
هو انتي ليه ما قولتليش انك لسه بنت قبل كده ؟
شهد بغيظ
حااجه ما تخصكش
أسر
لا تخصني وما تخصش حد غيري واي حاجه تخصك تخصني من النهارده ، وانا عايز افهم الموضوع ده يا ما فيش خروج من البيت
شهد
تمام انا مش عايزه اخرج ارتحت كده
_وراحت قعدت علي الكنبه وهي متعصبه جدا وهو راح وقعد جنبيها وقال بجديه
أسر
والله حضرتك مش عايزه تروحي لمحاضراتك برحتك بس انا برضو عايز اعرف
شهد بدموع
انتي عايز مني ايه بقي ما تسيبني في حالي انا مش طايقه اتكلم معاك
أسر بهدوء
روحي يا شهد
بصتله بعدم فهم وهو قال بجديه
مش عندك محاضرات روحي يلا ولما تهدي نبقي نتكلم
شهد بسخريه
كتر خيرك والله
أسر قرب منها وقال بخبث
وبلاش الطريقه دي انتي كنتي راضيه بكل حااجه امبارح
بعدت عنه وقالت بتوتر
رضيت عشان كنت خايفه علي اهلي منك
أسر بسخريه
لا وانتي خايفه علي اهلك اووي ، انتي حوراتك كتير يا شهد وهعرفها ومنك
شهد
وتعرف ليه بلاش والنبي تعيش الدور انك جوزي احنا هنطلق لما حضرتك تزهق
أسر بجديه
لا مش هطلقك ولو كان جوازي منك في الاول بأتفااق فانا مش هحطه في بالي الاتفاق ده وعودي نفسك علي الوضع ده، حبيت الجواز معاكي ومش هطلقك ، هتفضلي مراتي علي طول يا شهد
شهد بعدم تصديق
انت كدااب انت في حااجه في دماغك لما هتوصلها كل كلامك ده هيتغير
أسر
ليه بتقولي كده ؟
شهد بدموع
عشان انت كدااب واللي متعود علي الكدب ما بيتصدقش
ـ قالت كلامها وسابته ومشيت واول ما نزلت تحت كانت هاله داخله البيت وقالتلها
هاله
اتأخرتو كده ليه ما نزلتوش بدري ، تيام صدعني وكان عايز يطلع يصحيكم وخليته يروح المدرسه بالعافيه قال ايه عايز يستناكي تروحو سوا
شهد
راحت عليا نومه ومتأخره والله علي المحاضرات بتاعتي
هاله
طيب استني هجيب الشنطه بتاعتي من جوه واوصلك في طريقي انا رايحه النادي انا كمان
شهد
ماااشي
ـ وبعد شويه كانت شهد قاعده جنب هاله في عربيتها اللي قالتلها وهي باضه للطريق
هاله
أسر قالك ان النهارده المستثمر اللي معاهم في الشغل ده عازمنا علي العشا في الاوتيل بتااعه
شهد
لا ما قاليش واصلا مش هروح عشان عندي مذاكره
هاله
لا لا ما فيش الكلام ده واصلا فؤاد عايزك تيجي معانا عشان يعرفك علي الناس اللي احنا نعرفها وكده
شهد بضيق
بلاش احسن انا كده كده مش هكمل في عيلتكم فمافيش داعي حد يعرفني ولا اعرف حد كفايه اللي عرفته لحد دلوقتي
هاله
بقولك ايه ما تيجي في يوم تعزمي صحاابك الجداد عندنا في البيت وهاتي رحمه معاهم انا بحب البنت دي اوووي وعايزاها تاخد علينا اكتر وتيجي عندنا كتير
شهد
حاضر هبقي اقولهم
هاله
شهد هو أسر مزعلك في حاجه اتكلمي معايا يا حبيبتي شكلك مدايقه اووي وانا مش بحب اشوفك كده
ابتسمت شهد وقالت
لا عادي يعني والله ما يفسده اخوكي انتي بتصلحيه فعادي
ضحكت هاله وقالت
طيب اي خدمه اهو يا ستي ، وادينا وصلنا هتيجي معايا بالليل انا مش هروح العشا ده لوحدي وما تنسيش تعزمي صحاابك
شهد بهدوء
حاااضر
ونزلت شهد من العربيه وكلمت هاله أسر وقالتله
انت عملت ايه بالظبط يالا ده كانت حياتها بايظه في الاول بس ما كانتش بالبؤس ده
أسر بضيق
ما قالتلكيش حااجه عليا
هاله بخبث
ولا طايقه تسمع سيرتك لسه بنطق اسمك قامت قالتلي لو سمحتي يا هاله افتكريلنا حااجه كويسه
أسر بضيق
اممم
هاله
هو ايه اللي اممم اتصرف وصالحها ده لو يعني عايز تكمل معاها علي طول زي ما بتقول وصدقني والله العظيم مش هتندم افتكر نفسك قبل شهد كنت ازاي ودلوقتي بقيت ازاي انت حبيت البيت عشانها وحبيت قعدتنا وشغلك ، انت لما رجعت من بره مصر وانت بعيد عن كل حاجه وجودها معاك هو الحياه الجديده اللي انت تستاهلها بلاش المره دي كمان تفشل وتخسرها يا أسر
أسر
باي يا هاله
قفل في وشها وهي بصت للفون بعصبيه وقالت بصوت عالي
يا رخممممممم يا رخمممم يتحرق دمك يا مستفز زي ما بتحرق دمي
ــــــــــ #بقلم_الكاتبه_رحاب_القاضي ــــــــ
ـ في شقة سعيد ونسمه كانت قااعده هي وسعيد بيفطرو وكانت بصاله وساكته فأبتسم هو وقال...
سعيد
في ايه يا نسمه بتبصيلي كده ليه؟
نسمه
هو انت كنت قاااعد فين يا سعيد الفتره دي كلها ؟
سعيد بخبث
في مكان كده يعني
نسمه
ايوه يعني المكان ده فين ومع مين ؟
سعيد
مع جماعه صحابي
نسمه بحده
يعني ايه الكلام ده هو انت ليه مش عايز تقولي انت كنت فين ، ومخبي عليا ايه يا سعيد ؟
سعيد
هو في ايه يا نسمه علي الصبح بقولك كنت عند جمااعه صحابي اكيد ما كنتش هنام في الشارع يعني ، وكمان كنت بشتغل معاهم
نسمه
بتشتغل ايه ؟
سعيد
في سوبر ماركت بتاع واحد صاحبي اللي كنت قاعد عنده ، وبصراحه ما كنتش ناوي ارجع اصلا لو كنا اطلقنا
نسمه
وانت كنت هتطلقني بسهوله كده ، يعني ما كنتش ناوي تيجي تصالحني ؟
سعيد بجديه
بصي يا نسمه احنا الاتنين غلطنا وحلينا الموضوع خلاص بتفتحيه ليه تاني ؟
نسمه
معاك حق الباب بيخبط تلاقيها امك افتحلها بقي وبلاش اخليها تشوفني دلوقتي
_قام سعيد وفتح الباب وكان متوقع انها امه بس لقي كريم ابن محمد واقف بهدوم المدرسه بتاعته وقال بضيق
كريم
ستي بتقولك انزلها ضروري عشان عايزااك
اتنهد سعيد بضيق وقال
طيب يا كريم
جه يقفل الباب بس كريم قاله بسرعه
استني هات مصروفي
سعيد
وانا مالي انا بمصروفك روح قول لابوك
كريم
ما انا لو روحت قولت لابويا هيضربني عشان هو اداني مصروفي وستي ضحكت عليا وخدته
ضحك سعيد بهدوء وطلعله فلوس وقال
خد اهو يا سيدي بس اوعي ستك تضحك عليك تاني
ـ نزل كريم وسعيد دخل شقته تاني بعد ما قفل الباب ولقي نسمه دخلت نامت ، فوقف عند باب الاوضه وقال بهدوء
سعيد
طيب مش هتيجي تقوليلي حتي مع السلامه
بصتله بهدوء وقالت
مع السلامه يا سعيد ، وبعدين انت مش مهاجر يعني انا لو وقفت في البلكونه هشوفك
سعيد
خلاص يا نسمه كملي نوووم
ـ وقفلها سعيد الباب وطلع بره الشقه ونسمه اتنهدت بضيق وقالت بدموع
نسمه
والله انت بقيت مخوفني منك يا سعيد اني اتعشم فيك وفي الاخر تخزلني تاني
ـ وفي شقة ام محمد راحلها سعيد ومحمد مع بعض وهي كانت قااعده عامله نفسيها بتعيط....
محمد بسخريه
اول مره اشوف حد بيعيط بصوت بس من غير دموع
سعيد
في ايه يا اما انا عندي شغل
ام محمد
والله افتكرته دلوقتي الشغل ما انت سايبه بقالك شهر ، هان عليك شهر بحاله ما تخلنيش اشوفك يا سعيد اخص عليك يا ابني ياللي اتطبعت من الواطي اللي جنبك
سعيد بحده
هو انتي عايزاني اعمل ايه بعد ما كنتي هتخربيلي بيتي ، بلاش الشويتين دول عشان انا عارف انهم تمثيل وعارف انك جيباااني هنا عشان تطلعي نفسك مظلومه وانا افضل اصالح فيكي بس ده كان زماان انتي مش بس بتخربي بيتي لا انتي بتدمريني انا ولولا محمد انا كان زماني قاعد جنبك لا شغله ولا مشغله ولا ليا اي لازمه ، عارفه يا اما انا بسمع كلامك ليه مش عشان بحبك لا انا عمري ما حبيتك انا بخاف منك
اتملت عيونه دموع وقال
انتي خلتيني اوصل لدرجة اني اقول امتي امي هتموت عشان اقدر اخد نفسي وانا مرتاح
محمد بضيق
خلاص يا سعيد غلط اللي بتقوله ده ، ما تنسااش انها امك ومن واجبنا عشان خاطر ربنا نستحملها
وقف سعيد وقال بحده
انا مش هتحمل تاني يا محمد هي مالهاش دعوه بيا تاني ولا بحيااتي والا والله هاخد مراتي وامشي من البلد دي كلها لاخر العمر مش هخليها تشوف وشي تاني لا حيا ولا في ممات ، انا مش هسمحلها تعمل في نسمه اللي عملته في شهد اللي لحد النهارده مش عارف اسامح نفسي علي اللي حصل فيها وانا اللي كنت جوزها ما كنتش عارف احميها
ـ قال كلامه وسابهم ومشي ومحمد بص لامه بحزن اللي كانت بتعيط بجد المره دي ، وقالت لمحمد ببكاء
ام محمد
وانت كمان مستنيني اموت عشان ترتاح ، اخوك عايزني اموت يا محمد
قام محمد وقعد جنبيها وقال بهدوء
ما يقصدش والله هو قال كده عشان زعلان منك، وانا هكلمه وهخليه يجي يصالحك
ذقته ام محمد وقالت بحده
ما هو كله بسببك انت يا ابن الجزمه ده كان زي الخاتم في صباعي انت اللي خليته يتفرعن عليا انت وبنت ناديه اللي فوق دي بس والله ما هعديهالكم علي خير عايزين تدفنوني بالحيا وما يبقاش ليا كلمه في البيت ده بس ماااشي يا كلاب
محمد بصدمه
ده انتي كنتي لسه هتصعبي عليا ، بس كويس ورجعتي لطبيعتك بسرعه عشان انا مش فاضيلك وعندي شغل
ـ قال كلامه ومشي وام محمد فضلت قاااعده متعصبه وبتفكر ازاي ترجع سعيد لصفها تاني
ــــــــــ #بقلم_الكاتبه_رحاب_القاضي ــــــــ
_وفي المعهد بتاع شهد كانت قااعده مع صحابها وهي حاطه ايدها علي خدها وبتتفرج علي رحمه وشيري وشريف وهما بيتكلمو..
شيري
سوري يا رحمه بس انا ما فهمتش برضو ايه اللي زعلك؟..
رحمه
وانا ماليش خلق اتعامل مع اغبيه اسكتي..
شريف
لا هي مش غبيه انتي في واحده اصغر منك اتجوزت فين المشكله..
رحمه
شهد ردي علي الاشكال ولاد النااس دول..
شريف
هو انتي كده بتشتمينا يعني، رحمه انتي مش طبيعيه..
شهد
هي قصدها ان عندنا احنا الناس البسيطه لما واحده تتجوز صغيره وفي واحده كبيره لسه ما اتجوزتش بيفضلو بقي يقولو عليها كلام كتير بقي ان ما حدش بيتقدملها وكده..
رحمه
ودي سبب عقدتي اصلا في الموضوع ده كل ما واحده تتجوز في الشارع امي تنكد. عليا..
بصلها شريف بخبث وقال
ده انتي كنز يا بنتي وربنا الواد اسعد ده مُرزق هو بيدور علي حاله معقده يعمل عليها رسالة الدكتورااه بتاعته..
ضحكت شيري هي وشهد ورحمه قالت بعدم فهم
اسعد مرزوق مين وحالة ايه، انا ليه حاسه ان كلامك فيه سخريه واستهزااء مني..
شيري
هفهمك انا اسعد اخويا ده دكتور علم نفس وعنده رسالة دكتوراااه فمحتاج حالة حد مريض يعني يعمل عليها رسالة الدكتوراااه...
رحمه بغيظ
قصدك اني انا مجنونه يا ابن المعزه انت، من حظك ان المعهد ده نضيف والا كنت مسكت طوبه وفتحت دماغك..
قام شريف وهو بيضحك وقال
طيب احنا عندنا محاضره تحبي تيجي معانا بما انك سيبتي جامعتك وبقيتي مقيمه عندنا.
رحمه
جامعة ايه اللي سيبتها بقي انا اسيب كلية الادب عشان حتت معهد..
شيري
طيب قااعده ليه عندنا..
رحمه
عشان ما عنديش صحاب في الكليه بتاعتي ما حدش بيرضي يصاحبني عشان لسااني طويل..
ضحك شريف وقال
ههههههههه مش بقولك انتي كنز كمية عقد غير طبيعيه..
رحمه
بقولك ايه انا همشي كن هنا بدل ما افرج عليك الناس اللي هنا كلهم..
شهد
رايحه فين؟..
رحمه
رايحه لجوزك..
شهد
ليه عايزه منه ايه؟..
رحمه
عايزاااه في خدمه كده هبقي اقولك عليها بعدين يلا باااي..
_مشيت رحمه وراحت شهد مع شيري وشريف للمحاضره بتاعتها وبعد شويه جات رساله علي موبيلها من أسر واول ما فتحها اتنهدت بضيق لما لقيته باعتلها..
أسر
"انتي هتخلصي محاضراتك امتي، وحشتيني بصراحه وعايز اشوفك بسرعه "..
قفلت شهد الموبيل من غير ما ترد عليه وقالت لنفسها
وقح وقليل الادب..
شيري
هو مين ده؟..
شهد
ما تشغليش بالك خلينا في المحاضره...
وبعد اقل من دقيقه جات رساله تاني فشيري قالتلها
صوته عالي اعمليه silent عشان الدكتور ما ياخدش باله..
شهد
حاضر..
_وفتحت الرساله ووشها قلب احمر بكسوف اول ما لقيته باعتلها..
أسر
" ليلة امبارح مش رايحه من دماغي ولازم تتكرر "..
_قفلت الموبيل كله بسرعه وبان عليها التوتر والكسوف جدا، فسألتلها شيري بقلق..
شيري
في ايه يا بنتي مالك؟..
شهد
هاا لا ما فيش حاجه بس اا بس فكرت الدكتور شافني وانا ماسكه الفون فأتوترت..
شيري
ااه لا ما متخافيش ما اخدش باله بس انتي ركزي معاه لانها محاضره مهمه..
شهد
حاضر..
_وحاولت فعلا تطلع كلام أسر من دماغها علي قد ما تقدر..
ــــــــــ #بقلم_الكاتبه_رحاب_القاضي ــــــــ
_وفي شركة أسر دخلت عنده السكرتيره وقالتله بهدوء واحترام..
السكرتيره
بعد اذن حضرتك يا أسر بيه في واحده بره اسمها رحمه عايزه تقابل حضرتك..
أسر بعدم تركيز
ما قالتلكيش مين دي انا مش فاضي دلوقتي..
السكرتيره
هي بتقول انها اخت المدام..
أسر بأهتمام
ااااه طيب دخليها بسرعه..
السكرتيره
تحت امرك يا افندم..
طلعت السكرتيره ودخلت رحمه وقالتله
يا ابن اللعيبه بقي دي سكرتيره برضو..
أسر بسخريه
لا مهندسه ومقعدها هنا منظر..
قعدت رحمه قدامه وقالت
لا مش القصد يعني انا بقول بس انها عامله زي اللي في الافلام سكرتيره سكرتيره..
أسر
انتي عايزه ايه وايه اللي جايبك عندي..
رحمه
طيب شوفني اشرب ايه الاول..
أسر
لا.. واخلصي انا مش فاضي وعايز اخلص اللي ورايا بسرعه..
رحمه
ما علينا اذا كان ليك حاجه عند البوبي قوله يا كلب، فبص يا بوبي قصدي يا أسر انا عايزه منك خدمه بصراحه...
أسر بخبث
انا ما بحبش اخدم حد هاا ايه تاني..
رحمه بغيظ
برميل رزاله اقسم بالله ده انا حتي في مقاام اخت مراتك يعني، لو مش عشاني خليها عشان شهد..
أسر
عايزه ايه؟..
رحمه بصوت واطي
كنت عايزاااك تروح للواد اكرم هو خريج كلية تجاره وشاطر، هاته شغله هنا والله الواد غلباان وابن حلال ووحيد ويتيم..
أسر
انتي موطيه صوتك ليه؟..
رحمه
عشان ما حدش يسمعني...
أسر
ولو حد سمعنا فيها ايه؟..
رحمه
لا فيها وفيها يا جوز اختشي، سمعتشي يا اخويا ما حلتيش غيرها..
أسر
انتي عبيطه يا بنتي هو في حد يعرفك هنا اصلا غيري..
رحمه
ولو برضو المهم انت هتنفذ اللي طلبته منك..
أسر بغيظ
شهد اللي قالتلك تيجي تقوليلي مش كده؟..
رحمه
لا والله شهد ما تعرفش اصلا انا جيالك ليه، هو انا قولتلها اني جيالك بس كانت قاعده مع شيري وشريف وما عرفتش اقولها قدامهم..
أسر
شريف مين؟..
رحمه
صاحب مراتك... ااا قصدي زميلها في المعهد اخو شيري برضو الاتنين صحابها، المهم هتساعد الواد..
أسر
خليه يجيلي في اي وقت وو..
رحمه
لا هو نفسه عزيزه عليه ما بيروحش لحد، انت خد عنوانه من شهد وروحله..
أسر
انا اللي اروحله كمان، هو انتو عايزين مني ايه يا شوية مجانين انتي وصاحبتك وحطي اختي الهبله عليكم كمان..
رحمه
المثل بيقولك لما توصل ما تصعبهاااش علي غيرك يا عالم يمكن يجي زلزال والشركه دي تقع..
أسر
غوري يا بت انتي من هنا جايه تفولي علينا..
رحمه
قايمه عشان مش فاضيه بس انا اول مره اطلب منك حاجه يا أسر..
أسر
طيب يا رحمه هبقي اروحله واخليه يجي يشتغل هنا، بس قوليلي مين شريف ده اللي شهد تعرفه؟..
رحمه بتوتر
اا شريف زميلها بيهتم بيها وبياخد باله من ااا مش بيهتم اووي يعني عادي يعني، بص هي شهد كيوت وتتحب كده علي طول وهو بيحبها وو مش بيحبها بالمعني انه بيحبها ده اا..
أسر بجمود
بره..
رحمه
انا بقول كده برضو..
_طلعت رحمه وأسر مسك موبيله وهو متدايق وكلم شهد بس لقي موبيلها مقفول فخبط الفون علي الترابيزه وقال بعصبيه..
أسر
مهتم وبيحبها كمان... وتيجي عندي انا تصدرلي الوش الخشب.. ماااشي يا شهد..
_واخد موبيله وطلع من الشركه وقرر انه هيروح المعهد لشهد..
. ــــــــــ #بقلم_الكاتبه_رحاب_القاضي ــــــــ
_وبعد ما خلصت شهد المحاضرات كانت طالعه هي وشريف من المعهد وقالتله شهد..
شهد
هي شيري فين؟
شريف
قالت هتجيب ورق من جوه وجايه مش عارف ورق اي انا اصلا معايا كل حاااجه مهمه..
شهد
بالمنااسبه انت لو سجلت المحااضرات بتاعت النهارده ابعتهملي، عشان ما كنتش عارفه اركز مع الدكتور خالص النهارده...
شريف
ايوه انا كنت عايز اسألك انتي في حاجه معاكي شكلك مدايق لو في مشكله احنا صحااب وممكن نتشارك المشكله سوا ونحلها مع بعض...
ابتسمت شهد وردت عليه
شكرا يا شريف علي اهتمامك بس ما فيش حاجه يعني شوية ارهاق مش اكتر..
شريف
طيب الحمد لله وما تشليش هم حاجه اي حاجه ناقصه معاكي انا موجود وهساعدك فيها..
_وفي الوقت ده كان أسر متابعهم من بعيد وقرب منهم بسرعه ووقف جنب شهد ولف دراعه علي كتفها وقربها منه وقال بابتسامه صفرااء..
أسر
خير يا شهد في حاااجه، شايفك واقفه مع السكر ده بقالك شويه؟...
اتفاجئت شهد من وجوده وردت عليه وقالت
ده شريف زميلي هنا واخو شيري صاحبتي.. وو وده أسر يا شريف يبقي جوزي..
شريف بهدوء
اهلا وسهلا بحضرتك، انا هدخل اشوف شيري يا شهد ونتقابل بكره بلاش تتأخري عشان اول محاضره مهمه وهبعتلك محاضرات النهارده اول ما اروح..
شهد
ماشي ومعلش يا شريف تعبتك..
شريف
لا عادي براحتك بعد اذنكم..
_سابهم شريف ودخل المعهد تاني وشهد قالت لأسر بضيق وهي بتبعد عنه..
شهد
يا نعم جاااي هنا ليه؟..
أسر بحده
انا أجي براحتي مدام انتي هنا، ومين الواد ده؟..
شهد
ما قولتلك زميلي هنا واخو شيري..
أسر
اممم والسكر يعرف انك متجوزه ولا لا؟..
شهد
ايوه عرف مؤخرا لاني ما كنتش حابه حد يعرف اني متجوزه..
أسر
والله.. ليه بقي؟..
شهد بضيق
انت جاي ليه؟..
مسك أسر ايدها وقال
تعالي معايا وانتي هتعرفي انا جاااي ليه..
_وفتحلها باب عربيته وهي ركبت فيها وكانت مدايقه جدا من تصرفاته اللي مش فهماها، وهو ركب جنبيها ومشي بالعربيه ووقف قدام محل مجوهرات كبير..
شهد
هو احنا مش هنروح البيت؟
أسر
لا انزلي..
_نزلت شهد من العربيه ودخلو هما الاتنين المحل مع بعض، وقرب منهم العامل وقال بهدوء..
العامل
تحت امرك يا افندم خير؟..
أسر
عايزين دبلتين يكون شكلهم راقي كده وحلو..
بصتله شهد بعدم فهم والعامل رد عليه
تمام يا افندم اتفضلو اقعدو هنا وانا هجيب لحضرتك طلبك واحسن حاجات عندنا...
سمع أسر كلامه وراح قعد هو وشهد في الريسبشن اللي موجود في المحل، وهي قالتله بضيق...
شهد
هو انت بتعمل ايه، وليه هنجيب دبلتين اصلا؟..
أسر
عشان لو حضرتك مش عايزه تقولي لحد انك متجوزه الدبله هي اللي تقول..
شهد بغيظ
هو بالعافيه.. هو انا بسألك ليه انت فعلا اللي عايزه بتعمله وما بيفرقش معاك حد..
_بصلها بحده وقبل ما يرد عليها جه العامل ومعاه صاحب المحل اللي سلم علي أسر وقال..
_اهلا وسهلا بخضرتك يا أسر بيه، نورتو المحل..
أسر
اهلا بيك..
وفضل يتفرج علي الحاجات اللي جابها العامل اللي قاله
دي اغلي وارقي القطع عندنا..
_مسك أسر دبله شكلها حلو جداً ومد ايده لشهد. عشان يمسك ايدها ويلبسها ليها، بس هي بصتله بعصبيه وقالت..
شهد
انا مش عايزه حاااجه....
مسك ايدها بعنف ولبسها الدبله غصب عنها وقال
ما انا متعود اعمل كل حاجه بالعافيه..
_سحبت ايدها منه وقلعت الدبله ورمتها في وشه وقالت بعصبيه...
شهد
وانا مش عايزه منك حاجه...
_اتحولت ملامحه للغضب وبص لصاحب المحل والعامل وقال بجمود..
أسر
ممكن مقاس اصغر شويه..
_مسك العامل الدبله اللي علي الارض وحطها في العلبه بتاعتها وقال بهدوء..
العامل
موجود يا افندم..
واداه فعلا دبله مقاسها اصغر ومسك هو ايد شهد للمره التانيه ولبسها الدبله بصعوبه وكانت دايقه جدا علي شهد اللي عيونها اتملت دموع وقالت..
شهد
يعني انت مش شايف انها مش مقاسي وهتوجعلي ايدي...
أسر بحده
عشان ما تقدريش تقلعيها وترميها في وشي تاني..
_قامت وطلعت قعدت بره في العربيه وحاولت تقلع الدبله من ايدها بس ما كانتش قااادره، وجه هو بعد شويه قعد جنبيها وقال...
أسر
هتعوري ايدك كده سبيها...
ـ ما ردتش عليه وبصت للناحيه التانيه، وهو ساق العربيه ومشي وبعد شويه وقف قداام عماره راقيه جدا وقالها..
أسر
انزلي..
شهد بقلق
احنا رايحين فين؟..
أسر بهدوء
شقتي هنا اللي قولتلك عليها قبل كده..
شهد بقلق
لا انا عايزه اروح البيت..
أسر
انزلي يا شهد من غير عند والنبي..
شهد
لا انا عايزه اروح البيت، مالي انا بشقتك دي..
أسر بغيظ
طيب ايه رئيك بقي اننا مش هنقعد غير هنا بعد كده، وهيبقي ده بيتنا..
شهد بحده
هو انت بتلعب بيا علي كيفك، روحني يا اسر يا توديني بيت اهلي يا تسيبني انا اروح لوحدي..
أسر بهدوء
انزلي يا شهد ومش هقول تاني والكلمه اقولها مره واحده لانك كده مش هتخلصي يلاا..
_نزل أسر وهي نزلت معاه من العربيه وكانت مدايقه جدا من وجودها معاااه واول ما دخلت الشقه بتاعته برغم جمالها وتصميماتها الراقيه بس ما كانت مرتاحه بوجودها معاه لوحدهم..
أسر قفب الباب وقال
يارب يكون ذوقي عجبك..
شهد بضيق
انا مش عايزه اقعد هنا، معلش رجعني عند هاله...
أسر ببرود
لا.. علي فكره صباح كانت هنا ظبطت الدنيا جابت اكل وجابتلك هدوم كمان عشان مش هنرجع دلوقتي هنااك..
شهد بنفاذ صبر
وانا مش عايزه اقعد هنا، كنت كلف نفسك شويه وأسألني، ولا تسألني ليه ما انت اشتريتني فأعملك اللي انت عايزه وعلي مزاجك واسكت..
نزلت دموعها وقالت
تمام عايز ايه بقي تاني ايه المطلوب يا أسر بيه؟..
أسر بهدوء
مش عايز حاجه غير انك تهدي وتتعودي لاننا هنبقي مع بعض علي طول، وبطلي كلامك ده..
شهد بسخريه
الكلام ده كلامك انت انا بقوله بعد. ما سمعته منك..وبعدين ايه هنكمل مع بعض علي طول دي افرض انا مش عايزه..
أسر بضيق
بصي انا بحاول ابقي هادي واتمالك اعصابي علي قد ما اقدر، بس ايه مش عايزه دي هو انا بعرض عليكي الجواز، احنا متجوزين يا شهد وطبيعي نكمل مع بعض..
شهد
بس انت قولت انك. هتطلقني قريب..
أسر بخبث
احلفي؟ انا قولت كده مش فاكر..
اتنهدت شهد بضيق فقال هو بجديه
ايوه قولت عشان ما كنتش عارف انا عايز ايه وقتها كان جوايا احساس عايزك جنبي علي طول واحساس تاني عايز ابعدك وارجع لوحدي، بس ما قدرتش ابعدك كل ما كنت اعمل كده بلاقي نفسي بقرب منك اكتر وبتعلق بوجودك اكتر..
شهد
وده لحد امتي، هتزقق امتي وتطلقني؟..
أسر بغيظ
هتقولي طلااق برضو..
شهد بسخريه
لان ده اللي هيحصل انا مش عارفه اصدقك، انا اللي مقتنعه بيه دلوقتي انك قربت مني وبتعمل الشويتين دول عشان هدف في دماغك اول ما هتوصله مش هيفرق معاك حاجه لا انا ولا مشاعري اللي عمري ما هخليها تبقي تحت رحمتك..
أسر بحزن
هو للدرجه دي انا وحش في نظرك وما عندكيش ثقه فيا خالص..
شهد بهدوء
لا ما عنديش ثقه فيك، انت بتضحك علي فؤاد اللي بيحبك مش كأنك اخوه لا ده بيعاملك زي ابنه وجوز اختك وبتستغفله ومش هيفرق معاك هو هيشوفك ازاي بعد ما تضحك عليه ولا فارق معاك ثقته فيك اللي هتخسرها، فمبالك انا الغريبه عنكم بقي هتخاف علي مشاعري مثلا، انت ايوه ساعدتني بس لمصلحتك انا ما شوفتش منك حاجه كويسه عملتها عشاااني انا، انت ما بتعملش حاجه عشان حد. انت اناني وبس..
ابتسم بسخريه ورد عليها وقال
تصدقي معاكي حق..
وقاام وقف قداامها وقال بجمود
انا لما قررت اكمل معاكي الهدف اللي كنت عايز اوصله انك تبقي معايا علي طول وبس، عشان نعمل عيله مع بعض ام واب واطفال واتحمل مسؤليه ونبقي زي هاله وفؤاد كده، فكرت بالطريقة دي لما حسيت اني حبيتك بس شكلي غلطان لا انتي بتثقي فيا ولا انا عندي ثقه فيكي برضو،ومدام ما فيش ثقه يبقي ما فيش حاجه اسمها حب اصلا...
جات مشي من قداامه بس مسك ايدها جامد وقال
لما قولتلك قدام هاله اني ناوي اطلقك واتخانقنا بعدها وهددتك وسيبتك ومشيت، رجعت بالليل وانتي كنتي نايمه كنت عايز اصحيكي واقولك اني بحبك وقتها وما كنش قصدي ازعلك كنت عايز احكيلك كل حااجه بس ما كانتش عندي الجراءه اتكلم فكتبتلك كل حاجه جوايا ليكي في كشكول المحاضرات بتاعتك اللي جيبناااه سوا، اتعصبت عليكي واتصرفت بهمجيه شويه لما روحتي لاكرم بس ده لان ما بتحملش تنطقي اسم راجل تاني غيري اصلا، ايوه بغير عليكي وقبل ما نتجوز كمان من اول لحظه شوفتك فيها وانا بقيت افكر فيكي وكل يوم قضينااه سوا كنت بتعلق بيكي اكتر كنت بتعمد اتهددك وابان بتاع مصلحتي عشان تبعدي عني او اقنع نفسي اني مش هحبك بس ما عرفتش ما احبكيش..
_وراح مسك شنطتها وفتح الكشكول بتاع محاضراتها وقطع الورقه اللي كانت كاتب فيها عن مشاعره وضحك وقال..
أسر
ما عملتهاش في طفولتي اني كتبت لوحده كلام حلو والجو ده، اصلها حركات غبيه اووي...
_وقطع الورقه ورمااها علي الارض قدامها وهي واقفه مش مستوعبه كلامه ولا عارفه تصدقه ولا تكدبه...
أسر
انا هرجع الشغل واا هنقعد هنا لحد ما اللعبه دي تخلص وبعد كده انتي من طريق وانا من طريق وانا لسه عند وعدي ليكي في اللي اتفقنا عليه ولو عايزه زيااده عشان اللي حصل بينا امبارح ما فيش مشكله..
بصتله بحزن ودموع وهو سابها ومشي وكان متعصب جداً من اعترافه ليها بحبه وفي نفس الوقت اهانته ليها في أخر كلامه، انما هي قعدت علي الكنبه اللي جنبيها ودموعها نزلت بحزن وفي الوقت ده موبيلها رن برقم هاله فمسحت دموعنا واخدت نفس عميق وردت عليها وقالت..
شهد
ايوه معاكي يا هاله..
هاله
انتي فين كل ده يا بنتي؟..
شهد
في شقة اسر لو تعرفيها..
هاله
هو عندك..
شهد
لا هو جابني هنا ومشي..
هاله
شهد هو انتو الامور بينكم تمام يعني ولا في حااجه، ما تخفيش منه واتكلمي معايا..
شهد بدموع
لا ما فيش حاجه احنا تمام..
هاله
طيب انتي هتيجي معايا النهارده العشا اللي معزومين عليه ده..
شهد
لا لا انا مش عايزه اروح..
هاله
عشان خاطري انا مش عايزه ابقي لوحدي هناااك، اول مره اطلب منك حااجه يا شهد عشان خاطري..
شهد
حاضر بس كلمي اخوكي وقوليلو عشان انا مش عايزه اكلمه..
هاله
بس كده من عينيا، وخليت صباح تجيبلك وهي جايه عندكم.من شويه. فستان حلو من اللي جيبناهم قبل كده بالحجاب بتاعه والشنطه والشوذ وكل حاجه..
شهد
اممم ما انتي عارفه اهو ان انا مع اخوكي عامله ليه بقي نفسك مش عارفه حاااجه..
هاله بتوتر
هااا شوفتي اللي ما بيعرفش يكدب لما يلف ويدور بيعك الدنيا ازاي، يلا بقي باااي مش ناقصين عك اكتر من كده..
_قفلت معاها هاله وهي ابتسمت برغم حزنها، وقامت فضلت تتفرج علي الشقه اللي هتقعد فيها...
ــــــــــ #بقلم_الكاتبه_رحاب_القاضي ــــــــ
_وبالليل في شقة سعيد ونسمه كان قااعد بيتعشي ونسمه قااعده جنبيه وقالتله بضيق..
نسمه
رد عليا يا سعيد انا بكلمك..
سعيد. ببرود.
الرز معجن وناااقص ملح..
نسمه
والله اللي عرفت اعمله معلش، انت بقي رد عليا ليه قولت لامك. الكلام اللي زي الفزفت ده، هي كده هتعاملني كويس دي هتكرهني اكتر..
سعيد
علي اساس انها بتحبك.، مالكيش دعوه يا نسمه وشيلي اكلك اللي يسد النفس ده..
نسمه
لا مش هشيله انت قولتلي اطبخي وانا طبخت وانت هتاكل مش هتعب انا وفي الاخر يترمي، وانا عارفه ان امك لا بتحبني ولا بتحب اختي، بس ما تدعيش علي امك بالموت بسببي ما تشيلنيش الذنب يا سعيد..
سعيد
هو انتي فاكره اني اتخانقت معاها عشانك، لا غلطانه انا اتخنقت منها عشان الحال اللي انا فيه ده، انا عايز اعيش مرتاح من غير وجع دماغ وانتي دماغك اصغر من العيال الصغيره وكنت لازم اقول كده لامي عشان ابعدها عنك عشان انا ارتااح، واصلا كنت لازم اعمل كده من زمان من لما كنت متجوز شهد..
نسمه بغيظ
اممم وانت بقي ندمان انك ما عملتش كده من زمان وندمان علي شهد مش كده..
سعيد
نكد نكد نكد لو مش امي تبقي نسمه ياارب انا عملت ايه في حيااتي عشان يحصلي كده بس الحمد لله علي ما ابتلينا بيه، في مقوله بتقول لقد بلينا بقوم اذا رؤوك مبسوط بينكدو علي اللي جابوك..
نسمه
بقي كده..طيب ليه يارب انا كمان ما وافقتش بأول عريس اتقدملي وما اتجوزتش الكائن الغريب العجيب ده..
بصلها سعيد. بحده فقالتله
شوفت اتحرق دمك ازاي اهو انا كده غيرت علي. جوزي..وكل الاكل ده يلا..
ابستم. سعيد. وقال
حاضر هاكل..
حط سعيد معلقة رز في بوقه وبصلها بضيق وقال
مش هعرف انا اكل الحاجات اللي اول مره ادوقها انا دي..
نسمه بخبث
اللي يحبك يبلعلك الظلط..
سعيد
حلو انا عايز ابلع ظلط. هيبقي احلي من الاكل الللي لا ليه طعم ولا لون ده..
نسمه
خلاص خليك جعان..
سعيد
هو انتي ما بتاكليش ليه؟..
نسمه
ما هو ده اكل مش حلو فروحت اكلت عند. نعمه قبل انت ما تيجي..
سعيد بغيظ
ومدام هو مش حلو بتخليني اطفحه ليه يا مفتريه..
نسمه
خلاص اطلبلنا بيتزا...
سعيد
اطلبلنا... هو انتي هتاكلي تاني..
نسمه
في ايه يا عم الله واكبر، وبعدين ما اكلتش كويس عند نعمه اصلا..
سعيد. بسخريه
اممم عليا انا برضو يا مدام بطن هانم...
نسمه. بغيظ
طيب مش عايزه منك. حااجه..
وقامت شالت الاكل من قدامه وهو ضحك وقال
عايزااها بأيه؟..
طلعت راسها من المطبخ وقال
انا عايزه فرااخ وانت هاتها باللحمه عشااان هاخد. منك حته..
ضحك سعيد بقوه وقال
هههههههه ماشي يا بنت المجانين..
ــــــــــ #بقلم_الكاتبه_رحاب_القاضي ــــــــ
ـ وفي الوقت ده في شقة أسر رجع من شغله ودخل البيت وهو مدااايق ، وشاف نور اوضته مفنوح فعرف انها هناك ، اتنهد بنفااذ صبر ودخل هنناك لقاها واقفه قداام المرايا وهي لابسه فستان ازرق طويل ودايق شويه بأكمام طويله وشعرها مفرود علي ضهرها وشكلها كان رائع جدا ، وكانت واقفه بتحاول تقله الدبله بتاعته اللي جبهالها من شويه ، ولما شافته واقف وراها في المرايا بصتله بتوتر وقالت
شهد
دايقه اووي علي ايدي ووجعتني ومش قادره اقلعها اصلا
_قالت كلامها واتملت عيونها دموع وصباع ايدها اللي كانت فيه الدبله كان لونه احمر جداً ، فقرب منها ومسك ايدها واخدا ووقفو في الحمام وفتح المايه علي ايدها وحطلها صبون عليها وبسهوله شال الدبله من ايدها وطلع من جيبه علبه صغيره وحطه قدامها وقال بجمود
أسر
الدبله اللي رمتيها في وشي هناك ، عايزه تلبسيها براحتك مش عايزه براحتك برضو
اتنهدت بضيق وهو قال ببرود
عايز استخدم الحمام هتفضلي واقفه كده كتير
شهد بأحراج
لا لا طالعه اصلا
ـ واخدت العلبه اللي فيها الدبله اللي جابها وطلعت وهو قفل الباب جامد وراها فبصتله بغيظ وقالت
شهد
كمان هو اللي زعلان ايه ده
ـ واخدت الحجاب بتاعها ولبسته ومسكت الميكأب اللي بعتااه ليها هاله وفضلت تحط منه بلمسات بسيطه وطلع أسر بعد شويه وهو بينشف شعره بالمنشفه اللي في ايده وبصلها بضيق وقال
أسر
امسحي اللي بتحطيه ده
شهد
مش باين علي فكره
أسر
يبقي مالوش لازمه وقولت امسحيه
شهد بغيظ
وانت مالك
أسر
للاسف انتي لسه مراتي
شهد بخبث
وانت ايه اللي مزعلك ما انت كنت عايزني اقلع الحجااب والبس قصير قبل كده ولا نسيت
أسر
ده كان الاول قبل ما ا.... قبل ما اتجوزك وبعد ما نطلق اعملي اللي عايزااه
_مسكت شهد منديل ومسحت الميكأب كله وهو بدأ يغير هدومه ، وبعد شويه وصلو الاوتيل اللي معزومين فيه واول ما دخلو المطعم شافو فؤاد قااعد هو وهاله مع راجل وست كبار شويه في السن ...
أسر
اهم قاعدين هناك يلا بينا
وقفت شهد مصدومه اول ما شافت كمال الراجل اللي شغلتها عنده ام سعيد لما اتجوزته ، ومسكت في ايد أسر بخوف وبصلها كمال وهو قاعد وقال لفؤاد
كمال
هي مين اللي مع أسر دي يا فؤاد ؟
بص فؤاد وراه هو وهاله اللي ردت عليه وقالت
دي مراته اتجوزو من فتره قريبه
فؤاد
هما مالهم واقفين ليه هناك ، ذقيقه هشوفهم وجااي يا كمال بيه
_وقام فؤاد وراحلهم وكانت شهد مصدومه وبدأت تفتكر اللي حصل وقتها...
_فلاااااش باااك
ـــــــــــــــــــــــــ
شهد ببكاء
حرام عليك سيبني في حالي...
بصلها كمال وقرب منها اووي وقال
اهدي متخفيش انا هديكي الفلوس اللي عايزاها...
خافت شهد جدا وجريت من قدامه وقالت
مش عايزه فلوس ولا عايزه اي حاجه بس سيبني امشي ابوس ايدك انا والله بنت ناس وجايه هنا غصب عني...
كمال بخبث
هيبقي برضاكي دلوقتي بس اهدي انتي..
_قفل باب المطبخ عليهم وكانت شهد مرعوبه من نظراته...
_فاقت من ذكرياتها اول ما أسر قالها بقلق لما حس بخوفها وانتفاض جسمها وهي ماسكه فيه بطريقه ملفته..
أسر
شهد انتي كويسه؟..
قام فؤاد وقرب منهم وقال
واقفين عندكم ليه ما تيجو يا ابني..
شهد بدموع
لا انا تعبت وعايزه امشي معلش..
_أسر بص لكمال ولاحظ نظرات شهد ليه اللي كلها خوف وقال
لا مش هينفع هنقعد شويه وهنمشي، ولا في حااجه تاني غير انك تعباانه..
شهد بتوتر
لا ما فيش..
_وراحو فعلا سلمو علي كمال وشاديه مراته اللي اول ما شااف شهد ابتسم بأتسااع ومسك ايدها هي وبتسلم عليه جاامد وقال..
كمال
اهلا يا مدام شهد مش كده؟..
سحبت شهد ايدها منه وقعدت جنب أسر اللي سأل كمال
هو انت تعرف اسم مراتي منين؟..
كمال
سمعته حد قالي ان مراااتك يا أسر اسمها شهد، بس ما كنتش اتوقع انها بالجمال ده..
اتنهد أسر بضيق وفؤاد قال بسرعه
اا بس يا كمال بيه برافو بجد. مشروع الاوتيل ده طلع نااجح جداً، خليتني اندم اني ما سمعتش كلامك لما قولتلي نبقي شركااء فيه..
كمال بص لشهد بخبث وقال
طبيعي انا اللي ما يسمعش كلامي بيندم يا فؤاد..
بصت شهد للناحيه التانيه وأسر مال عليها وقال بضيق
واضح انه يعرفك وكويس اووي، هي ايه الحكايه يا مدام شهد؟..
شهد بدموع
خلينا نمشي من هنا وانا هقولك كل حاااجه..
شاديه بصت لشهد وقالت بخبث
هو انتي منين يا شهد حاسه اني شوفتك قبل كده واتعاملت معاكي...
اتوترت شهد وهاله قالت بهدوء
شهد قريبتنا من بعيد وحبو بعض هي وأسر واتجوزو..
شاديه ضحكت وقالت
ههههههه قريبتكم ازاي يا مدام هاله، هما قرايب عيلة الفيومي بيشتغلو خدامين في البيوت....
_اتصدمو كلهم معادا هاله اللي كانت عارفه الموضوع ده بس ما توقعتش انها كانت شغاله عند كمال وشاديه، وشهد دموعها نزلت بحزن وأحراج، وكمال كمل كلامه وقال..
كمال
بس في حااجه غريبه انتي ليه سيبتي الشغل عندنا فجأه كده، اما وشاديه كنا مستغربين اووي هو حد زعلك في حاجه....
قامت شهد وقالت بعصبيه لأسر
انا عايزه امشي يا أسر عشاان خاطري..
قام أسر وقال جمود
اهدي طيب ويلا بينا ، بعد اذنكم
ـ مشي أسر هو وشهد وكنت طول الطريق ساكته ودموعها بتنزل وهي باصه من شباااك العربيه ، واول ما وصلو شقتهم قفل أسر الباب جامد فأتنفضت بخوف وبصتله وهو قال بحده
أسر
مين ده وايه حوار انك كنتي شغاله عندهم ده
شهد بحزن
انا قولت لهاله قبل كده اني اشتغلت فتره في البيوت وو
أسر بغضب
وكنتي شغاله عند الدكتور ادهم برضو مش كده ، مش غريبه ان الدكتور تروحي تشتغلي عنده يحبك والراجل ده يحبك وانا كمان هي اهداافك بتبقي علي كده يعني
نزلت دموعها بحزن من كلامه وردت عليه
ايوه دي اهدااافي وكانت في رجاله تانيه غيرهم كمان
مسكها من دراعها جامد وقال بغضب
شهد بلاش تستفزيني
شهد بحده
واستفزك ليه هو مش ده الكلام اللي انت بتقوله ومصدقه..
أسر بجمود
ايه علاقتك بالراجل ده يا شهد وليه من اول ما شوفتيه وانتي خايفه كده؟..
شهد بدموع
يعني لو قولتلك هتصدقني..
أسر
ايوه..
مسحت دموعها وقالت
ام سعيد جوزي الاولاني هي اللي اجبرتني اشتغل في البيوت واهلي رفضو يتكلمو معاها حتي خافو من المشاكل وخصوصا انها طلبت مني كده يوم صبحيتي انا وابنها وروحت فعلا اشتغلت عند كمال ده وو وكان راجل حقير حاول يقرب مني اكتر من مره وانا والله العظيم كنت بصده ولما روحت قولت لحماتي ما صدقتش وخوفتني حتي اقول لجوزي، وفي يوم حاول يعتدي عليا بس عرفت اهرب منه كان ده اوحش يوم في حياتي كلها، افتكرت بقي ان خلاص مش هشتغل تاني عند حد بس حماتي كتمت علي الموضوع وخلتني اروح لادهم وهو وقتها كلمني وقالي اطلق وما اكملش في علاقه بتدمرني وياريتني ما سمعت كلامه اصلها ما فرقتش حاجه في الاخر ما ارتحتش برضو وبتدمر اهو..
حضنها بقوه وقال بهدوء
ما حدش هيقدر يعملك حاجه وانا معاكي، ما تخافيش..
فضلت شهد تعيط في حضنه وبعدت عنه بعد شويه وقالت
انا عايزه اروح بيت اهلي شويه..
أسر بهدوء
لا مش هتبعدي عني..
شهد بصتله بتوتر وقالت
بلاش والنبي التقلباات بتاعتك دي..
أسر ابتسم وقال
تقلبااات؟! ما علينا بس انا مش هسيبك بمزاجك او غصب عنك انتي هتفضلي معايا..
شهد بسخريه
امم وهتطلقني امتي؟..
أسر بخبث
بعد تلات اربع عيال كده يلا ورينا همتك..
شهد بغيظ
انا ما بهزرش علي فكره، ما هو انت مش هتحبني من يوم وليله يعني وبعدين انت من كام ساعه بس قولتلي انك هتطلقني..
أسر قرب منها وقال
ما هو ده المميز في علاقتنا اننا بنتخانق ونتصالح في نفس الوقت..
شهد بعدت عنه وقالت
امم بس انا محتاجه وقت افكر ما انا مش بزرار هتقولي متطلق اقولك حاضر وترجع تقولي بحبك وانا كمان..
أسر اتنهد بضيق وقال
واحنا هنا لوحدنا ناخد فرصه بجد...
شهد بقلق
طيب بس انا هقعد في اوضه لوحدي..
ضحك أسر بهدوء وقال
لا ما هو كله الا دي..
شهد
يبقي دي مش فرصه انت بتاخدني علي قد عقلي..
أسر
بلاش لعب عيال يا شهد احنا متجوزين شرعاً وقانوناً فجو الافلام ده ما ينفعش..
شهد بضيق
براحتك..
أسر
طيب يوم هنا ويوم هنا..
شهد
انا اصلا مش موافقه وبراحتك، افتكرت كلامك ليا وتمن اللي بيحصل بينا انا بقي ما عنديش حااجه تاني اديهالك..
أسر بغيظ
طيب وانتي عايزه ايه دلوقتي؟..
شهد
عايزه انام وافتح الاوض اللي انت قافلها دي مش هقعد معاك في اوضه واحده اصلا..
أسر بخبث
مفاتيحهم وقعت للاسف..
شهد بغيظ
ماشي انا هنام هنا..
بحركه سريعه شالها أسر بسرعه وقال
هو انا جايبك هنا كمان عشان تناميلي في الصاله. نعقل بقي ونتأقلم مع الوضع الجديد..
شهد بتوتر وكسوف
نزلني يا أسر احترم قراراتي..
أسر بهدوء
ما انا بحترمها بس في الموضوع ده القرار ليا، وبعدين انا قولتلك بحبك كده بطريقه رخمه فانا هصلح اللي عملتو بقي..
شهد بعصبيه
نزلني يا أسر بقولك..
نزلها أسر وقال بغيظ
نعمم نزلتك اهووو..
شهد بأنفعال
انا مش لعبه في ايدك عشان تعمل كده وقت ما تحب..
أسر
يعني ايه؟..
شهد
يعني انا مش عارفه اثق فيك وبعد كلامك اللي قولته النهارده وانك بتحبني بقيت متوتره اكتر، فمحتاجه وقت عشان لو قبلتك ابقي قبلااك بأردتي..
أسر
لسه مش واثقه فيا، اومال انا ليه بصدقك وواثق فيكي بس انا غلطاان..
شهد بغيظ
برضو عايزني امشي بمزاجك قولت انك بتحبني فشهد غصب عنها تقبلك قولت مش عايزني فشهد غصب عنها برضو تكرهك، اناني مش هقدر اقول غير كده..
أسر بعصبيه
انتي عايزه ايه دلوقتي عشان نتعامل زي اي اتنين متجوزين عادي..
شهد
اتقبلك برضايا مش خوف منك ولا وانا متوتره ومتردده، وكمان اعرف انت ناوي علي ايه مع فؤاد والراجل ابو طقيه كبيره اللي بتقابله ده..
أسر
ده موضوع يخصني مالكيش دعوه بيه، انما تتقبليني وبرضاكي بسيطه الايام بينا كتير اهي وانا هعرف اخليكي تتقبليني وتدوبي فيا كمان..
شهد
وقبل ده كله اعرف انت ناوي علي ايه، وليه مصمم تاخد الفلوس من فؤاد والراجل الغريب ده انت متورط معاه في ايه، انا كنت صريحه اخو معاك وقولتلك اللي حصل معايا كله، وانت لو عايز تكمل معايا قولي مين دول وانت عايز منهم ايه؟..
أسر بجمود
هقتل واحد بظبط كل حاجه هنا في مصر عشان اعرف اجيبه واوصله واقتله..
اتصدمت شهد من كلامه و؟...
_تفتكرو هيحصل ايه بين شهد وأسر بعد كلامه ده؟
ــــــــــ #بقلم_الكاتبه_رحاب_القاضي ــــــــ
_في الوقت ده في محل موبيلات بسيط دخلت ام محمد هنااك وقالت للولد اللي قااعد فيه..
ام محمد
مش انت هاني ابن سعديه يا واد؟
هاني
ايوه يا حجه خير؟..
ام محمد بصوت واطي
ومش انت برضو اللي كنت خاطب البت نسمه بنت فتحي من سنتين كده..
هاني بضيق
ايوه انا ونسمه دلوقتي بقيت مرات ابنك..
ام محمد
وسابوك بقي عشان ما حلتكش حاااجه مش كده، اخص عليهم نللاس قليلة الاصل بس البت كانت بتحبك مش كده..
هاني
انتي عايزه ايه يا حجه؟..
ام محمد بخبث
عايزه البت دي تتفضح..
وطلعت فلوس من البوك بتاعها وقالت
وده الف جنيه بداية اتفاقي معاك، بس تسمع اللي اقولك عليه وهديلك اللي انت عايزه..
بص هاني للفلوس بلهفه وقال
تمام يا ست الحجه بس اعرف الاول انتي عايزه ايه..
ام محمد بحقد؟؟..
_تفتكرو ام محمد بتخطط لايه؟..
ـ نتقابل الحلقه الجايه.. 👋🏻👋🏻👋🏻🌺
ـــــــــــــــــــــــــــــــــــــــــــــــ
#بقلم_الكاتبه_رحاب_القاضي
