رواية الجمال جمال الروح الفصل الثامن عشر 18 والاخير بقلم ملك ابراهيم
#الحلقة_الأخيرة
#الجمال_جمال_الروح
#بقلمي_ملك_إبراهيم
بصلي يوسف وفضل يضحك وقال ( شوفتوا بقى اهو انا اكلت نصها وقولت حلوه 😭😂) .. بصله ياسين بقرف وقاله ( حلوة ايه كتك القرف دا انت كرهتني في الشكولاته ) .. طبعا يوسف مقدرش يمسك نفسه من كتر الضحك وهو عمال يبصلي ومش قادر وانا طبعا كنت متغاظه منه جدا وعماله ابصله بغضب وغيظ علي ضحكه وتريقته عليا وعلي الكيك بتاعي وقولتله بغضب ( علي فكره دمك مش خفيف ) .. حاول يرد عليا ومكنش قادر من كتر الضحك وطبعا ياسين كان عمال يبصلنا ومش فاهم حاجه بس خطيبته فهمت ان انا الا عمله الكيكه دي وفضلت تضحك هي كمان وبصلنا ياسين وهو برضه مش فاهم هما بيضحكوا علي ايه ووقف وقال لخطيبته ( قومي نمشي دول اتنين مجانين وانا غلطان اني جبتك تتعرفي عليهم ) .. ضحكت خطيبته وقالتله برقه ( ابدا والله دول لطاف اوي وفرحت جدا اني اتعرفت عليهم ) .. حاول يوسف يوقف ضحك واتكلم بصعوبه وقالها ( وهتفرحي بينا اكتر لو دوقتي كيكة الشكولاته بتاعنا😂 ) .. حطت البنت اديها علي بطنها وضحكت اكتر وقالتله ( لأ شكرا انا حبيتكم من غير حاجه كفايه ياسين داقها😂 ) .. بصلهم ياسين وهو برضه مش فاهم في ايه ويوسف حرفيا كان هيموت من كتر الضحك وبصله ياسين وقال لخطيبته ( طبعا مش هتصدقي لما اقولك ان المجنون الا انتي شيفاه بيضحك قدامك دا يبقى من اكبر دكاترة القلب في العالم وداليدا مراته الا شكلها هتقتله دلوقتي دي نفس الجنان بتاعه برضه وكمان حامل في بنت وربنا يستر وماتطلعش البنت المجنونه التالته بتاعهم عشان تبقى كملت ) .. بصتله خطيبته ومقدرتش ترد عليه من كتر الضحك واخدها ياسين ومشيو وانا طبعا كنت ببص للاستاذ يوسف ومنتظراه يخلص ضحك وقولتله بزعل ( علي فكره يا يوسف انت متكلمنيش تاني انت فاهم ) .. حاول يوقف ضحكه وقالي بمرح ( ليه يا حبيبتي بس انا كنت بهزر معاكي والله وبعدين مش انتي الا بدأتي وقولتي عليا مجنون ) .. وقفت بغضب وقولتله ( خلاص يا يوسف ماتكلمنيش تاني ) .. وقف بسرعه ومسك ايدي وقالي ( خلاص متزعليش وصدقيني الكيكه بتاعك جميله بس ياسين هو الا مش بيفهم 😂) .. بصتله بحزن وقولتله ( لا يا يوسف هي مش حلوه وانا عارفه ان انا مش عارفه اعملها حلو بس انا كنت عايزه اعملك الحاجه الا انت بتحبها ) .. ضمني بعشق وقالي ( انتي الحاجه الا انا بحبها وصدقيني انا فعلا كنت باكلها وانا مستمتع جدا بوجودك معايا وكلامنا مع بعض ودا عندي اجمل من اي طعم ) .. ابتسمت وقولتله ( علي فكره انت بتعرف ازاي تضحك عليا بس المرادي مش هتعرف تصالحني لاني زعلانه منك بجد ) .. ضحك وقال ( ما احنا كنا قاعدين مبسوطين وبنتكلم مع بعض وبناكل الكيك بتاعنا الجميله لازم يعني ياسين يجي ويبوظ الليله ) .. ضحكت وقولتله ( طب سبني بقى عشان بجد زعلانه ) .. ضمني وقالي ( لأ مش هسيبك وهنسهر مع بعض ونكمل الليله وايه رأيك بقى ان انا هاكل دلوقتي بقيت كيكة الشكولاته دي كعقاب ليا عشان زعلتك ) .. طبعا انا مقدرتش امسك نفسي وفضلت اضحك علي كلامه وقولتله ( يعني الكيكه بتاعي بقت عقاب ليك كمان ) .. ضحك وقالي ( دا احلى عقاب ) .. طبعا مقدرتش افضل زعلانه منه اكتر من كدا وسهرت معاه وفضلنا نتكلم عن خطيبة ياسين الا واضح انها بنت كويسه ورقيقه ومحترمه وافتكرت سهر بنت عمي وحزنت علي الا بقت فيه دلوقتي وافتكرت اخر مكالمه بيني وبين ماما لما قالتلي ان سهر هتتجوز راجل كبير في السن وزوجته متوفيه وعنده اولاد كبار وقالتلي ان عمي وافق عليه من غير ما ياخد رأي سهر وقال انه مش مقتنع بقسيمة الزواج والطلاق الا بقوا معاها دلوقتي وانه مش هيرتاح غير وهي علي زمة راجل بجد ووافق علي اول عريس جالها وللأسف كان كبير عنها بكتير ومش مناسب ليها ابدا بس هي الا دمرت حياتها من الاول وغلطت غلطه مابيجيش بعدها اي حاجه صح 😔 واتكلم معايا يوسف وخرجني من تفكيري في موضوع سهر وكملنا سهرتنا واحنا بنتكلم وبنضحك وطبعا اكل يوسف باقي الكيكه فعلا يا حرام 😂... وكانت حياتنا انا ويوسف كدا وبجد انا عشت معاه اجمل ايام في حياتي واجمل حاجه ان معاه كل يوم مختلف عن اليوم الا قبله وكنت دايما متابعه كل تحركاته عشان اشوف اخرتها مع موضوع انه مابيحبش يزعل حد دا وجريت ايام ورا بعض وبقيت في الشهر ال7 من الحمل وطبعا كنت متابعه الحمل مع دكتور معتز صاحب يوسف وليكم طبعا التخيل البنت الا في بطني دي لما يكون باباها يوسف وانا مامتها ومعتز الدكتور المجنون الا متابعه معاه الحمل تخيلوها هتطلع عامله ازاي😂 .. رواية الجمال جمال الروح بقلمي ملك إبراهيم.
بعد كام يوم كنت قاعده انا ويوسف وتليفونه رن ولقيته رد وقال ( الو .. اهلا أنسه بهيجه .. لأ ابدا مفيش قلق ولا حاجه انتي تكلميني في اي وقت ... تمام ماتقلقيش انا نص ساعه وهكون عندك اطمني .. مع السلامه ) .. وقفل تليفونه وقام وقف وقالي ( حبيبتي انا لازم اروح المستشفى حالا ) وطلع علي اوضتنا عشان يلبس .. وطبعا انا كنت هتجنن وانا بفكر مين بهيجه دي الا بيكلمها وعايز يروحلها بسرعه وطلعت وراه علي اوضتنا ولقيته لبس وكان حلو أووي بجد قمر ودا كان بيجنني اكتر لاني كل ما بشوفه قمر كدا بتزيد غيرتي عليه اكتر ...ووقفت قدامه وقولتله ( انت متشيك اوي كدا ليه ) .. بص لنفسه بدهشه وقالي ( انا زي ما انا حبيبتي ودا لبسي العادي ) .. رديت بغيظ وقولت في سري ( ما هو دا الا هيجنني ان دا العادي بتاعك انك تكون قمر كدا ) .. قرب مني وهو بيبتسم وقالي ( سرحانه في ايه ) .. بصتله وانا بفكر في حجه عشان اروح معاه المستشفى واشوف البنت الا كلمته دي شكلها ايه وقولتله ( انا افتكرت ان انا عندي ميعاد المتابعه النهارده مع معتز ) .. بصلي بدهشه وقالي ( لأ يا حبيبتي انتي ميعاد المتابعه بتاعك الاسبوع الجاي انا فاكر ) .. بصتله وانا عارفه ان عنده حق بس حاولت اشتت تركيزه وقولتله ( لأ ميعاد المتابعه النهارده وبجد مش مصدقه ان انت تنسي حاجه زي دي ..انت مابقتش مركز معايا ولا بقيت مهتم بيا زي الاول انت مابقتش تحبني يا يوسف ) .. بصلي بدهشه وقالي ( ياحبيبتي انا عمري ما انسي اي حاجه تخصك وصدقيني انا متأكد ان ميعاد المتابعه بتاعك لسه الاسبوع الجاي ) .. قولتله ( وانا متأكده انها النهارده ولو انت مش عايز تاخدني معاك المستشفى روح انت وانا هاجي ب تاكسي ).. بصلي بقلة حيلة وقالي ( لا طبعا يا حبيبتي هاخدك معايا واجهزي يلا وانا هستناكي ) .. وفعلا جهزت بسرعه وروحت معاه المستشفى وانا هتجنن واشوف البنت الا كلمته دي واخدني ودخلنا غرفة الكشف عند معتز الا بصلنا بدهشه اول ما دخلنا وسألنا بقلق ( يوسف!!داليدا!! في ايه خير ) ..بصلي يوسف وقاله ( النهارده ميعاد المتابعه بتاع داليدا انت نسيت ولا ايه ) .. رد عليه معتز بتأكيد وقاله ( لأ طبعا مش النهارده دا الاسبوع الجاي ) .. ضحك يوسف وبصلي بسخريه وبعدين بص ل معتز وهو بيتريق عليا وقاله( لأ ميعاد المتابعه النهارده وبجد مش مصدق ان انت تنسي حاجه زي دي ..انت مابقتش مركز معايا ولا بقيت مهتم بيا زي الاول انت مابقتش تحبني يا معتز ) .. بصله معتز وهو مش فاهم هو بيقول ايه و رد عليه ( لا بقى انا متأكد ان الميعاد بتاعكم لسه الاسبوع الجاي وشكلك كدا انت ومراتك فاضين وجاين تتسلوا صح ؟ ) ..طبعا يوسف كان بيتريق عليا وبيردد كلامي الا انا قولتهوله في البيت وطبعا معتز مكنش فاهم حاجه ولا فاهم يوسف يقصد ايه وانا طبعا كان شكلي وحش اوووي قدام يوسف😂 وفضلت ابصله وانا محروجه بجد وبصلنا معتز وقال ( هي ايه الحكايه بالظبط ) .. اتكلم يوسف عادي عشان مايحرجنيش قدام صاحبه وقال ( الحكايه ان داليدا حسه بشوية تعب وانا قولتلها تيجي معايا المستشفى عشان انت تكشف عليها ) .. خلص كلامه مع معتز وضمني وقالي (انا عندي حالة دلوقتي ولازم اشوفها ضروري جدا هروح 10 دقايق بس اشوفها بسرعه وارجعلكم تاني ماشي حبيبتي ) .. هزيت راسي وانا شايفه الضحك والتسليه جوه عنيه وسابني في غرفة الكشف مع معتز وراح هو يشوف الحالة بتاعه وطبعا اكيد الحالة دي الا تبع البنت الا كلمته وكنت سرحانه وبفكر ولقيت معتز خرجني من تفكيري وقالي ( هي ايه الحكايه وتعب ايه الا انتي حساه دا) .. بصيت قدامي بشرود وقولتله ( تعب قلبي ) .. ضحك وقالي ( للأسف دا مش تخصصي بس انا اعرف دكتور قلب ممتاز ممكن تلاقي عنده العلاج المناسب لحالتك ) .. بصتله بحماس وقولتله ( طب تعالى وديني عنده بسرعه ) .. بصلي بدهشه وقالي( انا طبعا عارف ان اكيد مرات يوسف لازم تكون مجنونه زيه بس الا معرفوش انها تكون اجن منه ، دكتور قلب ايه الا اوديكي عنده ماهو عايش معاكي في نفس البيت ) .. بصتله بقوة وقولتله ( معتز تعالى وديني عند يوسف دلوقتي حالا ).. بصلي بدهشه وقالي ( داليدا هي ايه الحكايه بالظبط ) .. حطيت ايدي علي خدي بحزن وقولتله ( بحبه ، بحبه اوي ) .. ضحك وقالي ( دا انتي حالتك صعبه اوي وفعلا محتاجه دكتور قلب واظن مش هتلاقي احسن من دكتور يوسف مهران دا احسن دكتور قلب هنا ، بس انا عايز اقولك علي حاجه مهمه جدا دكتور يوسف متجوز وبيحب مراته جدا جدا ومستحيل اي واحده في الدنيا تملى عينه غير مراته ) .. ابتسمت وانا عارفه ان كلامه صح وفعلا يوسف بيحبني ومستحيل عينه تشوف غيري بس انا بغير عليه اوي ودا غصب عني انا بجد بغير ومش عايزه اي واحده غيري تشوفه هو ملكي انا وحبيبي انا وجوزي وابو بنتي وهو كل حياتي ودنيتي ...
ابتسم معتز وقالي تعالي معايا عشان تطمني ) .. ووقف وجه معايا وسأل واحده من الممرضات عن الحالة الا عندها دكتور يوسف وعرفته انه في العنايه المركزه وروحنا قدام غرفة العنايه وكان في بنت جميله جدا واقفه تبكي قدام غرفة العنايه وبصراحه بكائها دا وجع قلبي وقربت منها وسألتها بتبكي ليه و ردت عليا واتكلمت عربي وواضح انها من دولة عربيه وقالتلي ان مامتها تعبانه وحالتها صعبه وانها قلقانه عليها اوي والدكتور بيشوفها دلوقتي ومنتظره خروج الدكتور عشان يطمنها .. اتكلم معتز وسألها ( دكتور يوسف مهران الا بيتابع حالة والدتك ؟ ) .. هزت البنت راسها ب اه وهي بتبكي وبصلي معتز وكأنه بيقولي اطمنتي ؟ هزيت راسي بخجل وبصيت للبنت بحزن وافتكرت لما بابا تعب ويوسف هو الا عالجه وبجد كنت حاسه بالفخر بيه وان جوزي مش بس احن وارق واجمل راجل في العالم دا كمان دكتور شاطر جدا وبيكون سبب في انقاذ حياة ناس كتير اوي وبيعالج القلوب التعبانه وبيخفف ألامهم ووقفت جنب البنت وانا فعلا حزينه عشانها وبعد وقت قليل جدا خرج يوسف من غرفة العنايه وبصلي بدهشه وقرب مني بقلق وقالي ( حبيبتي في ايه انتي كويسه ؟؟) .. ابتسمتله بحب وقولتله ( اطمن يا حبيبي انا الحمدلله كويسه ) .. بصلي وبص لمعتز وقالي ( طب انتوا طلعتوا هنا ليه ؟) ..بصيت لمعتز وانا مش عارفه اقول ايه ، ماهو اكيد يعني مش هقوله انا جايه اراقبك يا حبيبي ولا هقوله ان انا هموت من الغيره عليه وعماله الف وراه... طب وبعدين في الموقف دا اطلع منه ازاي طب اقوله ايه واعمل ايه وبصيت لمعتز عشان يساعدني ويقول اي حاجه واتكلم معتز وياريته ماتكلم 😭😭
اتكلم معتز وقاله ( ااصل اناا وانا بكشف عليهاا لقيييت.... اه لقيت بنتك زهقانه و عايزه تتمشي شويه في المستشفى وقولتلها تعالي وانا امشيكي شويه علي ما يوسف يخلص الحاله الا معاه ) .. بصله يوسف وهو مش فاهم منه حاجه وسأله ( قولت لبنتي تعالي وانا امشيكي شويه ) .. رد معتز وقاله ( لأ قولت ل داليدا ) .. بصلي يوسف وقاله ( هي مين فيهم الا زهقانه ) .. طبعا انا حاولت اصلح العك الا قاله معتز وقولت ل يوسف ( ماهو انا يا حبيبي وبنتك واحد مش هي جوه بطني يبقى لازم انا الا اتمشى عشان هي كمان تتمشى جوايا صح ) .. بصلنا يوسف وهو حرفيا مش فاهم احنا بنقول ايه وقربت مننا البنت الا مامتها في العنايه واتكلمت معاه تسأله عن حالة مامتها وانقذتنا الحمدلله .. رد يوسف عليها وطمنها ( ما تقلقيش يا انسه بهيجة مامتك ان شاءالله هتكون بخير والا حصلها دا طبيعي جدا يحصل بعد العمليه ) .. شكرته البنت كتير وقالتله ( شكر لحضرتك يا دكتور وأسفه لو كنت ازعجت حضرتك بس انا حقيقي كنت مرعوبه علي ماما ) .. ابتسم يوسف ابتسامته الجميله و رد عليها وقالها بكل ذوق ( ماتقوليش كدا وتقدري تكلميني في اي وقت ) .. شكرته البنت كتير جدا واستأذنت منه وبعدت عننا شويه وانا طبعا كنت ببص لحبيبي وفخوره بيه جدا واتكلم معتز وقال ( يوسف انت تعرف البنت دي ) .. رد عليه يوسف بدهشه وقاله ( مش فاهم بتسأل ليه) .. اتكلم معتز وعينه علي البنت وقاله ( اصلها بصراحه جميله ورقيقه اوي حقيقي خطفت قلبي ) .. رد عليه يوسف بقوة وقاله ( معتز البنت دي محترمه ووالدتها معندهاش الا هي والبنت ملهاش في السكه دي خالص ) .. رد معتز بصدق وقاله ( انا بتكلم بجد يا يوسف البنت فعلا خطفت قلبي ) .. رد يوسف بسخريه وقاله ( يعني عايز تفهمني انها خطفت قلبك من اول نظره ؟ ) .. طبعا انا بصيت ل يوسف وقولته ( وفيها ايه لما تخطف قلبه من اول نظره ) .. واتكلم معتز وقاله ( المفروض ان انت الوحيد الا متستغربش انها خطفت قلبي من اول نظره ، انت نسيت انت اتجوزت ازاي ) .. بصلي يوسف بعشق وقاله ( انا مستحيل انسي اجمل يوم في حياتي ، يوم ماشوفت حبيبتي الا مش بس خطفت قلبي دي خطفت روحي ) .. يا الله علي كلامه الا بيسحرني ونظرت عنيه الا بتحسسني اني اجمل ست في الدنيا ، وقفت قدامه واحنا بنتأمل بعض بعشق وكأننا في الكون لوحدنا واتكلم معتز وخرجنا من حالة العشق الا كنا فيها وقال بمرح ( داليدا كلها شهرين وهتبقي تحت ايدي في غرفة العمليات يعني من مصلحتك تقفي في صفي ) .. بصيت ليوسف علي طول وقولتله ( يووسف انت هتقف في طريق سعادتهم ) .. بصلي وضحك وقالي ( سعادة مين يا حبيبتي دا مجنون واي بنت يشوفها يقولي الكلمتين دول ) .. رد معتز بتأكيد وقاله ( المرادي بجد يا يوسف صدقني ) .. بصله يوسف وبدأ يحس انه صادق في كلامه وقاله ( خلاص يبقى تنتظر لحد ما والدتها تبقى كويسه وانا هفاتحها في الموضوع دا ) .. فرح معتز جدا وشكر يوسف ورجع يكمل شغله .. ويوسف مسك ايدي وقالي ( يلا يا حبيبتي ) .. ابتسمت وقولتله ( هنرجع البيت ؟ ) .. ضحك وقالي ( لأ هاخد بنتي امشيها شويه مش هي زهقانه وعايز تتمشى برضه😉) .. ضحكت وانا عارفه انه طبعا بيتريق عليا وهو ضمني وهو بيضحك واخدني خرجني و قضينا اليوم كله بره البيت وكان يوم جميل من ايامي الجميله مع يوسف ... رواية الجمال جمال الروح بقلمي ملك إبراهيم.
خلصوا الشهرين علي خير وبقيت في الشهر التاسع من الحمل وكان فاضل حوالي اسبوع علي ميعاد الولاده و كان يوسف في المستشفى عنده عملية مهمه وخطيره جدا ومامته كانت قاعده معايا لاني كنت تعبانه وفجأه صرخت بوجع وبقيت اصرخ بقوة وانادي علي يوسف وانا حسه بوجع قوي وبيزيد اكتر .. اتكلمت والدته وقالتلي بقلق ( داليدا انتي هتولدي ؟ ) .. صرخت وقولتلها ( مش عارفه ارجوكي كلمي يوسف يا ماما انا خايفه اوي ) .. طبعا انا كنت خايفه اوي والوجع كان جامد وكنت محتاجه يوسف لان وجوده حقيقي بيطمني وكمان كنت محتاجه ايده تلمس ايدي وامسك ايده واعضها بكل غيظ واطلع كل الوجع الا انا حساه دا فيه😭😂 ...
حاولت والدته تكلمه وتليفونه كان مغلق وكلمت طبعا ياسين الا جه علي طول وسأل في ايه ومامته قالتله ان انا هولد دلوقتي ويوسف تليفونه مغلق ... كلم ياسين معتز بسرعه وعرفه ان انا تعبانه وشكلي هولد ومعتز قاله انه يوديني المستشفى عنده بسرعه وفعلا ياسين اخدني انا ومامته معاه في عربيته ومش محتاجه اقولكم طبعا علي كل الكلام الا انا قولته علي يوسف وانا بتوجع طول الطريق في عربية ياسين ( عااااااااا يووووسف انا عايزه يوسف دلوقتي حالاااااا ) ..
ردت والدته بحنيه وقالتلي ( احنا معاكي اهو يا حبيبتي عايزه يوسف في اي بس دلوقتي شوفي الا انتي عيزاه واحنا هنعملهولك ) .. صرخت وقولتلها ( الا انا عيزاه مش هينفع اعمله الا في يوسف لأنه هو السبب ، هو الا عمل فيا كدا اااا) .. اتكلم ياسين بانفعال وقالي ( احنا رايحين المستشفى اهوه وهتلاقي يوسف هناك وابقى ولعي فيه برحتك بس اهدي شويه دماغي وجعتني ) .. فضلت اصرخ واتوجع لحد ما وصلنا واخدوني علي غرفة العمليات وانا صرخت وسألت علي يوسف وقالي معتز ان يوسف في العمليات وممكن يتأخر .. صرخت وقولتله ( مش هولد غير وهو معايااااا هو وعدني انه هيبقى معايا ومش هحس بحاجه ) .. بصلي معتز بغيظ وقالي ( وهو هيعملك ايه يعني ما انا الا هولدك ) .. اتكلم ياسين وقالي ( طب ادخلي غرفة العمليات مع معتز وانا اوعدك هروح اجبلك يوسف وادخلهولك حالا بس مش هينفع كدا انتي فضحتينا في المستشفى ) .. بصيت حواليا لقيت كل المستشفى حوالينا وعملين يتفرجوا علي الجنون الا انا فيه ودخلت مع معتز غرفة العمليات وكلم ياسين مامته وقالها ( خليكي هنا يا ماما و انا هروح اشوف المجنون جوزها دا فين هو كمان ) .. ابتسمت والدته وقالتله ( معلش يا حبيبي داليدا بتحب اخوك ووجوده بيطمنها ) .. ابتسم ياسين وقالها ( عارف يا ماما ، ربنا يقومها بالسلامه ويخليهم لبعض ) .. وراح ياسين يشوف يوسف ولقاه خارج من غرفة العمليات وكل الدكاتره بيقولوله مبروك نجاح العمليه يا دكتور وقرب منه ياسين بسرعه وقاله ( يوسف مراتك المجنونه بتولد ولمت علينا المستشفى كلها ) .. ابتسم يوسف بسعاده وقاله ( يعني انا هبقى اب ) .. رد ياسين بغيظ وقاله ( للأسف والله يكون في عونها بنتكم الا هتعيش مع اتنين مجانين زيكم) .. ابتسم يوسف اكتر وجري بسرعه علي غرفة العمليات ودخل وانا اول ما شوفته بكيت اكتر وقولتله ( يوسف الحقني ) .. قرب مني ومسك ايدي وقالي متخافيش يا حبيبتي انا جنبك ومعاكي ) .. مسكت ايده وقربتها من شفايفي وعضتها بكل قوة وكتمت فيها صرختي وفي اللحظه دي سمعوا 3 اصوات " صوت صراخي من وجع الولاده وصوت صراخ يوسف من العضه وصوت صراخ بنتنا الا جت الدنيا😍 " ونورت حياتنا واول ما سمعنا صوتها نسينا اي وجع وكنا فرحانين اوي وقرب مني يوسف بحنيه وقالي مبروك يا حبيبتي بقيتي " ماما" ابتسمت بتعب وقولتله عايزه اشوفها .. ابتسم واخدها من ايد معتز وكنت شايفه حنان جوه عين يوسف مايتوصفش وكان شايلها بكل حب وحنان وقربها مني وأول ما شوفتها ابتسمت بسعاده لانها كانت حرفيا نسخه من يوسف وكانت شبهه اوووي وابتسم يوسف وضمها وقال بسعاده هنسميها ( لارا ) لارا يوسف مهران ❤❤
وخرجت من غرفة العمليات واتنقلت غرفة عاديه ويوسف كان شايل البنت ومش بيسمح لحد يقرب منها حتى مامته و ياسين شافوها وهي في ايد يوسف وكان واخدها في حضنه ومش راضي يسيبها ابدا وكان دا حاله حتى بعد ماخرجت من المستشفى وكان طول ماهو في البيت دايما شايلها ويلاعبها ..❤
وبعد شهر من الولاده كان في حفلة تكريم ل أكبر دكتور قلب وكان الدكتور دا جوزي وحبيبي يوسف والمرادي يوسف قرر انه يحضر حفلة التكريم دي وانه مش هيختفي تاني واصر ان انا ولارا نكون جنبه في اليوم دا واخد يوسف جائزه مهمه جدا في حفلة التكريم وكل القنوات الفضائيه وكل الصحف كانوا بيصوروا لحظة استلامه الجائزه ووقف يوسف وقال بكل حب ( اسمحولي اقول حاجه من جوه قلبي قدام العالم كله ) .. حالة من الحماس اقتحمت الحفلة والكل كان منتظر يسمع اجمل الكلمات من جوه قلب اكبر دكتور قلب ❤ اتكلم يوسف بصوت يدخل القلب ويخطف الروح وقال ( القلب مش مجرد جهاز بينبض في جسمك عشان تعيش ، القلب هو الروح و الجمال جمال الروح و جمال الروح هو الجمال الحقيقي الدائم.. هو الطاقة الإيجابية الدافعة للحياه .. والروح الجميلة التي لا يشعر بها إلا روح جميلة مثلها..... لأن الأرواح جنود مجندة إذا تآلفت تعارفت.. وإذا اختلفت تعاركت! .. واتمنى ان يتجاهل الجميع جمال الشكل لانه لا يدوم .. وانظروا الي جمال الروح فهو الجمال الذي يخطف القلوب قبل العيون ).. كنت فخوره بيه جدا وبتفكيره وكلماته الا بتخطف القلوب وقرب مني واهداني الجائزه بتاعه بكل حب وتقدير وسافرنا بعدها نقضي اجازة في مكان ساحر بس طبعا مش في سحر يوسف ولا جماله ورقته❤❤ وعشت معاه اجمل سنين من العمر وفات 6 سنين علي جوازنا والنهارده عيد ميلاد " لارا " بقى عندها 5 سنين ومش قادرة اقولكم هي متعلقة بيوسف اد ايه وبتغير عليه اد ايه لدرجة انها بتغير عليه مني بس بصراحه هو بيقدر يحتوينا احنا الاتنين لان حقيقي يوسف حنين أوووي وبيحبني انا وبنته أووووي وحقيقي انا عايشه معاه اجمل ايام حياتي واخيرا حبه اشكر اكتر 10 كانوا متفاعلين مع حكايتي😍😍
Gana Tamer🏆
🏆Febronia Louis
🏆Enas Ali
🏆Marina Batil
🏆Dody Abdo
🏆Batool Mohamad
🏆أم أميرة
🏆Rehab Nassar
🏆youssef Mohamed
🏆Heba Badran
يوسف: طب احنا كدا عايزين نحتفل بيهم ايه رأيك تعمليلهم كيكة الشكولاته بتاعك والف هنا وشفا😂😂😂
داليدا: يوووووسف
يوسف: هههههههه خلاص بهزر معاكي وانا كمان حقيقي حابب اشكرهم لأنهم استحملوا الجنان بتاعنا وكملوا معانا للأخر 😂
داليدا: عندك حق والله بس ماتقلقوش يا جماعه انا كدا وصلت لأخر الحكايه هي طبعا خلصت بالنسبه لكم لكن طبعا لسه مكمله بالنسبه ليا لأن حكايات يوسف مهران مابتنتهيش بس اطمنوا عليا انا فعلا عايشه مع يوسف اجمل ايام حياتي وبجد انا عايزه أشكر كل الناس الا كانوا متفاعلين مع حكايتي وكانوا بيشجعوني اني اكمل دايما ❤ واتمنى تكون حكايتي عجبتكم واتمنالكم كل الخير والسعاده و اسيبكم في رعاية الله ورحمته وغفرانه ❤❤❤❤❤رواية الجمال جمال الروح بقلم ملك إبراهيم
❤❤❤❤❤❤❤❤❤❤❤
هدف الروايه✍
الجمال جمال الروح حاول أن تتعامل دائما مع أرواح الناس وليس مع أجسادهم.
لأن الروح هي الأصل وهي الأساس أما الجسد فهو مجرد وعاء.. مجرد شكل زائف متغير... الأصل في الروح هو النقاء.. لان الله خلقها سوية نقية ولكن المشكلة في إغواء وتضليل الشيطان لهذه الروح التي كرمها الله .. الروح هي القائد الذي يقود الجسد والجسد مجرد تابع ذليل لها ...
اللهم اجمعنا بقدرتك ورحمتك في جنات الفردوس العليا ❤
واخيرا❤ لكم مني كل التحية والتقدير الكاتبه✍ ملك إبراهيم 😍
♡■♡■♡■♡■♡■♡■♡■♡
تمت
