رواية النصيب الفصل الثاني 2 بقلم رحاب القاضي
#النصيب
_الحلقه الثانيه
ــــــــــــــــــــــــــــــــــــــــ
شهد ببكاء ـ
لا انا مستحيل اشتغل عند حد...
ام محمد بحده ـ
لا هتنزلي والنهارده كمان، انا هكلم صاحبة المكتب تظبطلك الشغل...
_طلعت شهد شقتها ومعاها سعيد جوزها اللي كان بياكل في ضوافره وساكت...
شهد بدموع _
وبعدين يا سعيد انت هتفضل ساكت؟..
سعيد بضيق _
وانا اعمل ايه مانتي شايفه الظروف لوحدك اهو يا شهد...
شهد_
يعني هتسكت وهتسيب مراتك يوم صباحيتها تشتغل في البيوت؟...
قعد علي الكنبه رد عليها ببرود _
عادي يعني يا شهد الشغل مش عيب...
شهد بحده _
هو انت ايه معندكش نخوه، ده اخوك وقف قدام مامتك وضمن حق مراته وخلاها خدت ايصال امانه علشان ميزعلهاش وانت مش هاين عليك تقولها مينفعش مراتي تشتغل في البيوت حتي علي الاقل دلوقتي وانا لسه عروسه..
رد عليها سعيد وزعق فيها وقال _
يوووه بقي ياا شهد، بصي امي عندك تحت عايزه تعترضي علي حاجه انزلي قوليلها...
شهد _
انا مش هنزل بس انا ليا اهل وهما اللي هيجو ويقفو ليك ولامك انا بنت ناس مش من الشارع عشان تعملو فيا كده..
_دخلت شهد اوضتها وكلمت مامتها في الموبيل وحاكتلها اللي حصل، واتصدمت اكبر صدمه في حياتها لما مامتها ردت عليها وقالت..
ام شهد _
اعملي زي ما حماتك وجوزك عايزين...
نزلت دموع شهد وقالتلها _
ازاي يعني يا ماما انتي مستوعبه هما عايزيني اشتغل ايه؟...
ام شهد بعصبيه _
ايوه مستوعبه، استوعبي انتي بقي الهم اللي احنا رمينا نفسنا فيه عشان نجوزك ونفرح بيكي...
شهد ببكاء _
هم اي بس يا ماما، هو في هم في الدنيا اكبر من اللي انا فيه؟...
ام شهد بحده _
ايوه في، هم ابوكي اللي نزل بقاله يوم بحاله بيلف علي خلق الله قرايبنا اللي هنا وهناك عشان يلاقي حد يسلفه قسط الاجهزه الكهربائيه اللي جيبنهالك...
شهد _
طيب ليه جوزتوني مدام هتتداينو كده كنتو خلتوني قاعده معاكم بدل ما انتو اتذنقتو وانا كرامتي اتبعترت هنا...
ام شهد بحزن _
وبعد ما نقعدك جنبنا تبوري وتوقفي حالك وحال اخواتك وراكي، اقفلي يا شهد وروحي نفذي كلام حماتك اتعودي علي حياتك ومع الوقت هتعرفي تتعاملي معاهم وترتاحي وتطبعي منهم...
شهد _
كتر الف خيرك يا ماما انا بجد اسفه اني كلمتك، وربنا يفك زنقتكم ويسامح اللي ظلم التاني...
_قفلت مع مامتها وفضلت تبكي وعدي اكتر من ساعه وهي قاعده بتبكي ومحستش بالوقت، وبعد شويه فتحت حماتها عليها الباب وقالتلها بحده...
ام محمد _
انتي لسه قاعده عندك ياا بت انتي...
وقفت شهد وردت عليها بحزن وهي باصه للارض _
نعم يا حماتي اؤمريني...
ابتسمت ام محمد بخبث وقالتلها _
ايوه كده تعجبيني، البسي عبايه سمرا علي البجامه الطويله دي، وتعالي معايا عشان اوصلك الشغل...
نزلت دموع شهد بحزن كبير وردت عليها وقالت _
حاضر يا حماتي جايه وراكي اهو...
_ مشيت حماتها وراحت هي غيرت البجامه ولبست ديرس حلو وعملت حجابها بشكل جميل، وطلعت عبايه بتاعت بيت واسعه وحطتها في شنطتها وطلعت لحماتها اللي اول مشافتها لوت بوقها وقالت...
ام محمد _
ايه اللي انتي لابساه ده يا بت انتي هو انتي فاكره اني واخداكي افسحك، فوقي يا اختي انتي رايحه تشتغلي في بيت تروقي وتنضفي مش تضايفي...
ردت عليها شهد بهدوء ـ
مش معايا هدوم غير زي كده، انا عودي نحيف والعبايات السمرا مش بتليق عليا فما جبتش منها...
ام محمد بضيق _
طيب تعالي ورايا انجزي يلاا..
_ نزلت معاها شهد واخدو تاكسي وراحو لمكتب الخدمه واول ما شافتها صاحبت المكتب قالت..
الست _
بسم الله مشاء الله يا ام احمد مرات ابنك حلوه اووي، انتي مش خايفه عليها من شغل البيوت..
ردت عليها ام محمد بسخريه وقالت _
ويفيد بايه مش نفعاني بحاجه ومسهتنه كده ومش فاهمه اي حاجه يا ابله سيده..
سيده بهدوء سالت شهد _
انتي عندك كام سنه يا شهد؟..
ردت عليها شهد بصوت حزين _
عندي 18 سنه...
سيده بضيق قالت لـ ام محمد _
لا ملكيش حق يا ام محمد البنت صغيره وكمان مشتغلتش خالص في البيوت حرام ابعتها لبيت كامل بيه....
ام محمد وهي بتمثل البكاء _
والله عارفه كلامك ده كله يا ابله سيده بس اعمل اي، العين بصيره والايد قصيره ولو مشغلتهاش مش هلاقي اكلها ولا هلاقي فلوس اديها للي ما يتسمي اخويا عشان ميطردنيش من البيت...
سيده بحزن _
خلاص طيب يا ام محمد صلي علي النبي واهدي وان شاء الله شهد هترفع راسك وتشرفنا في الشغل ده صح يا شهد؟..
شهد بدموع نزلت علي وشها وقالت _
ان شاء الله يا ابله سيده...
_قامت ام محمد مشيت، واخدت الست سيده شهد وودتها البيت اللي هتشتغل فيه وقابلها راجل كبير وست في سن الراجل تقريبا وقالو...
الست بضيق _
انتي عندك كام سنه يا شاطره؟...
شهد بتوتر _
عع عندي 18 سنه...
الراجل بخبث _
مش صغيره شويه علي الشغل دي يا مدام سيده؟..
سيده بهدوء _
هي ايوه صغير بس لهلوبه وسريعه في الشغل، وانا جربتها بنفسي في اماكن تانيه والله يا كمال بيه وملكش عليا حلفان انا في ناس طلبتها مني بالاسم وانا قولت لا بنت هاديه وشاطره وامينه زي دي اولي بيها بيت كمال بيه...
الست _
ميرسي يا سيده تعالي اديكي حسابك..
وبعدين بصت لشهد وقالت بحده _
وانتي يا بنت انتي روحي المطبخ واستنيني اجي اوريكي شغلك اللي هتعمليه...
_مشيت شهد ودخلت المطبخ وفضلت تعيط علي الشغل كل الحاجات اللي شافتها من لما اتجوزت، وبعد شويه دخل الراجل الكبير وهو بيبصلها بخبث من فوق لتحت، وقفت بسرعه وسألته...
شهد _
خير حضرتك عايز حاجه اعملهالك...
كمال بخبث _
انتي لسه انسه صح؟...
اتوترت شهد وخافت من نظراته وردت عليه _
لا انا متجوزه...
كمال بهدوء _
حلو اووي، هتتبسطي معانا اووي في الشغل ده يا شهد ...
ردت شهد عليه وهي خايفه وقالتله _
شكرا لحضرتك..
_دخلت في الوقت ده مرات كمال واول ما شافت جوزها بيتكلم مع شهد اتعصبت وزعقت في شهد وقالتلها...
الست _
انتي واقفه عندك بترغي في اي، روحي غيري القرف ده وتعالي نضفي المطبخ ده واطلعي نضفي البيت كمان لحد ما اجهزلك قائمة الاكل بتاعت الاسبوع عشان تنظمي وقتك...
ردت عليها شهد بهدوء وقالت _
حاضر...
زعقت فيها الست وقالت _
اسمها حاضر يا شاديه هانم اي اوامر تانيه، فهمتي هتقولي اي؟...
شهد بدموع لمعت فعنيها ردت عليها وقالت _
حاضر يا شاديه هانم اي اوامر تانيه؟..
شاديه بضيق _
لا يلا غوري من وشي..
_ مشيت شهد وراحت تغير هدومها في الحمام وهي بتعيط، وبصت شاديه لكمال جوزها بغيظ وقالتله...
شاديه بضيق _
بقولك اي انا مش ناقصه دي كمان تطفش الناس بقيت تخاف تبعت البنات هنا بسببك وبسبب اللي بتعمله فيهم...
كمال ببرود _
وانا بعمل ايه ده هما اللي بيترمو عليا...
زعقت شاديه فيه وقالت _
فهمت قولت ايه ولا لا؟..
كمال بضيق _
يوووه فهمت يا شاديه، انا رايح الشغل عايزه حاجه...
ردت عليه شاديه وقالت _
لا شكرا، روح انت شغلك وابقي كلم الولاد اطمن عليهم وعلي عيالهم...
كمال بخبث _
انتي مش رايحه الشغل النهارده ولا اي؟..
شاديه بهدوء _
لا قاعده النهارده عشان اشوف البنت الجديده دي وشغلها عامل ازاي؟...
ادايق كمال وقالها _
طيب ياختي سلام...
_ طلعت شهد بعد شويه وروقت المطبخ وبعد كده نضفت البيت كله،وكمان غسلت الهدوم وكاوتها وستفتها في الدواليب كويس، ودخلت المطبخ تاني وبدأت تعمل الاكل اللي طلبته منها شاديه، حست انها تعبت بس مقدرتش تقف وعملت الاكل كله وكانت شاديه كل شويه تدخل وتشوفها بتعمل اي، وبالليل جه كمال وكان قاعد هو مراته علي السفره اللي جهزتها شهد بشكل مرتب ومنظم...
شاديه بأعجاب _
طلعت شاطره بجد البنت دي...
سالها كمال وهو بيدور علي شهد بعنيه _
هي هتبات هنا ولا هتروح وتيجي بكره...
ردت عليه شاديه بهدوء _
لا هتروح وهتيجي بكره، ليه بس بتسأل؟...
كمال بخبث _
ابدا انا بس بسأل عادي، بيني وبينك احسن وهتمشي احنا لسه منعرفهاش عشان نخليها تبات عندنا وننام احنا ونسيبلها البيت كله تحت كده ليها...
ردت عليه شاديه بضيق وقالت _
لا حرام يا كمال البنت شكلها غلبانه ومحترمه...
كمال بخبث _
امممم اما نشوف...
_بعد شويه كان كمال ومراته قاعدين في الجنينة وعملتلهم شهد شاي زي ما طلبو منها ووديته ليهم، واخدت شاديه الكوبايه بتاعتها، ولما قربت شهد من كمال مد ايده عشان ياخد الشاي بس مسك ايد شهد بطريقه مش كويسه وهي اتوترت جدا والصنيه وقعت منها، فقامت شاديه وزعقت فيها...
شاديه ـ
انتي متخلفه اتنيلي لمي القرف ده وغوري من وشي..
بكت شهد وقالتلها _
انا اسفه والله العظيم مكان قصدي...
كمال ببرود _
خلاص يا شاديه محصلش حاجه، وانتي يا شاطره لمي الحاجه دي وروحي اعمليلي شاي تاني...
_ قالتله شهد حاضر ولمت الازاز كله ودخلت المطبخ غسلت ايدها جامد مكان لمست كمال ليها وبعد كده مسحت دموعها وعملتله شاي تاني بس حطتهولو قدامه علي الترابيزه وقالت..
شهد بضيق _
الشاي يا كمال بيه...
رد عليها بهدوء _
طيب روحي انتي...
وهي ومعديه من جنبه قالها بصوت واطي مسمعتوش مراته...
كمال _
اتقلي براحتك مسيرك تقعي تحت ايدي واعمل اللي عايزه يا شهد...
_جريت شهد علي المطبخ وهي خايفه وفضلت تعيط، وقررت تقول لحماتها عشان متخليهاش تيجي تاني...
_ وبعد ما خلصت شغل رجعت علي شقتها وهي تعبانه جدا ولقيت جوزها قاعد قدام التلفزيون،واول ما شافها وصلت بصلها بسخريه وقال...
سعيد _
اهلا اهلا اخيرا جيتي....
_مردتش شهد عليه وجات تدخل اوضتها زعق فيها وقال...
سعيد _
انتي متنيله غايره فين ادخلي المطبخ جهزي العشا...
ردت شهد عليه وهي واقفه بالعافيه من التعب اللي شافته النهارده وقالت...
شهد _
مش قادره يا سعيد اقف قوم جهز لنفسك معلش...
قام وقف وزعق فيها وقال _
اومال انتي لازمتك اي، اتنيلي غوري جهزيلي العشا...
شهد بدموع _
حرام عليك انا اليوم كله شغل مقعدتش حتي خمس دقايق علي بعضهم...
طلعت حماتها من البلكونه وزعقت فيها وقالت _
جرا ايه يا بت انتي متروحي تجهزي العشا للواد، ايه خلاناكي صنعتي الطياره عشان تتعبي كده...
اتنهدت شهد بحزن وقالتلها _
حاضر يا حماتي هجهز العشا، بس لو سمحتي تعالي معايا في المطبخ عايزاكي في كلمتين..
ام محمد بقلق _
تعالي يا اختي وربنا يستر...
_دخلت شهد المطبخ وبدأت يجهز في العشا لسعيد جوزها وحماتها كانت واقفه جنبها، وحكتلها شهد علي اللي عملو كمال فيها واللي قالو...
ام محمد بهدوء _
طيب سيبك منه وخليكي في شغلك...
اتفاجئت شهد من ردها الهادي وقالتلها _
بس كده ده انا افتكرتك هتقوليلي متروحيش هناك تاني بقولك الراجل الكبير نيته مش خير من ناحيتي..
قربت منها حماتها وزعقت فيها وقالت ـ
جرا ايه يا بت انتي لتكوني فاكراني عبيطه وبرياله لااا ده انا اوديكي البحر وارجعك عطشانه انتي وعشره زيك...
بكت شهد وسألتها بحزن _
يعني، برضو هتطلعيني انا الغلطانه...
ام محمد بحده _
بطلي يا اختي دموع التماسيح دي، انا فهماكي كويس جايه تالفي عليا الكدبه دي عشان اقولك خلاص متروحيش الشغل..
ردت عليها شهد بسرعه وقالت _
والله العظيم ما بكدب انا بجد خايفه اروح هناك، والنبي يا حماتي وديني اي مكان الا عندهم...
ام محمد بغضب _
يووه بطلي زن وهتنزلي الشغل يعني هتنزلي فاهمه ولا لا....
ـ قالت ام محمد كلامها ونزلت تحت بيتها، وشهد ودت لسعيد الاكل واستنت لمته من قدامه بعد ما خلص اكل وعملتله شاي، وبعدين دخلت اوضتها روقتها وظبطتها ودخللت الحمام اخدت شاور، وطلعت نامت علي طول. وكانت من جواها بتدعي ما متصحاش عشان متروحش الشغل ده تاني...
ــــــــــــــــــــــــــــــــــــــــ
_تاني يوم راحت شهد الشغل وكانت بتجهز الفطار في المطبخ وقالت لنفسها انها هتحاول متطلعش من المطبخ خالص طول ما اللي اسمه كمال ده موجود، جهزت الفطار قبل ما ينزل كمال ومراته...
ـ وفطرو وراحو الشغل وهي قعدت تنضف وتروق في المطبخ وفجأه دخل عندها كمال وهو بيبصلها بخبث وقفل باب المطبخ عليهم....
شهد بخوف ودموع غرقت وشها _
انت عايز مني ايه؟...
كمال بخبث وهو بيقرب منها _
انا شكلي كده زعلتك امبارح وقولت اجي بدري من الشغل واصالحك...
شهد ببكاء وخوف _
حرام عليك سيبني في حالي..
_تفتكرو هيحصل ايه؟
ــــــــــــــــــــــــــــــــــــــــــــــــــــــــ
#بقلم_الكاتبه_رحاب_القاضي
