رواية النصيب الفصل الخامس 5 بقلم رحاب القاضي

 رواية النصيب الفصل الخامس 5 بقلم رحاب القاضي

#النصيب

_الحلقه الخامسه 

ـــــــــــــــــــــــــــــــــــــ 

_ وبعد كام يوم في العياده بتاعت ادهم.. كان قااعد في اوضة الكشف ودخل عنده حسام وقال.. 

حسام 

اومال فين العيانين بتوعك يلا ده انا كنت باجي الاقي الناس فوق بعضها.. 

ادهم

لا ما انا اخدت عدد كشوفات قليل النهارده عشان عندي معاد مهم.. 

حسام 

معاد ايه ده ان شاء ومن غيري كمان؟.. 

ادهم 

هقابل شهد انا مش مصدق انها كلمتني وقالتلي انها هتقابلني النهارده البنت دي والله خساره في المكان اللي هي فيه ده.. 

حسام بضيقامم

اممم مش هنخلص احنا من المدام شهد بتاعتك دي، يا ابني ده انت لفيت وسافرت واتجوزت بنت كانت ملكة جمال وفي الاخر تبص للبت دي.. 

ادهم بضيق

انت ايه اللي جابك يا حسام، عايز ايه؟.. 

حسام 

ما فيش افتكرتك شغال قولت اجي اقولك تفضي نفسك بعد. الشغل نخرج ونروح نسهر في مكان حلو كده.. 

قام ادهم وقال

لا مش فاضي.. 

حسام بغيظ 

ادهم سيبك من البنت دي، دي تلاقيها بتضحك عليك اصلا.. 

ادهم 

اسكت يا حسام انا عارف انا بعمل ايه؟.. 

حسام 

علي فكره انت كده بتجبرني اكلم طنط ناديه واقولها علي اللي انت بتعمله ده.. 

ادهم بحده 

اقسم بالله يا حسام لو عملتها وامي عرفت حاجه عن شهد هيبقي اخر ما بينا ولا هتبقي صاحبي ولا اعرفك.. 

حسام بضيق

هو انت متأكد انها صعبااانه عليك وبس.. 

ادهم 

مالكش دعوه وانا مش عيل صغير عشان استني حد. يعرفني اللي بعمله ده صح ولا غلط.. 

_ قال كلامه وسابه ومشي وحسام كمان مشي من العيااده... 

ـــــــــــــــــــــــــــــــــــــ 

_وفي الحاره اللي ساكنه فيها شهد طلعت من بيتهم وهي لابسه نقااب وعبايه سودا وكانت خايفه جداً لحد يعرفها وبتبص حواليها وفجأه خبطت في سعيد اللي كان معدي وقالها.. 

سعيد 

مش تفتحي با حجه انتي.. 

_اتنفضت بخوف وما ردتش عليه وجات تمشي بس هو وقف قدامها وقال.. 

سعيد

انتي من هنا؟.. 

_ هزت راسها بمعني لا ومشيت بسرعه ووقفت تاكسي وصلها لحد بيت رحمه صاحبتها وطلعت عندها شقتها فوق واول ما خبطت علي الباب فتحتلها ام رحمه وقالت... 

عفاف

نعم؟.. 

شهد 

انتي مش عرفاني يا طنط عفاف.. 

عفاف

شهد ايه ده هو انتي اتنقبتي تعالي ادخلي.. 

دخلت شهد وشالت النقاب وقالت 

لا ما اتنقبتش ولا حاجه بس لابسه كده عشان اقدر اخرج من الحاره ودي فكرة الموكوسه بنتك.. 

عفاف

يا بنتي لتحصل مشكله مع ابوكي وانا عارفااه روحو في مناخيره.. 

شهد 

ما انا هروح قبل ما هو يرجع من الشغل، المهم فين رحمه؟.. 

عفاف

قااعده في اوضتها ادخلي عندها لحد. ما انشر الغسيل واعملك موز باللبن من اللي بتحبيه.. 

شهد 

والله احلي عفاف في الدنيا كلها.. 

_ ودخلت شهد عند رحمه اللي كانت قااعده علب سريرها بتسمع اغاااني ولما شافت شهد شالت السماعه وقالت.. 

رحمه 

انتي جيتي امتي؟.. 

شهد 

لسه جايه اسكتي انا وطالعه من الحاره خبطت في سعيد وكان هيعرفني والله كنت هموت من الخوف.  

رحمه 

ما يشوفك ولا يعرفك هو ماله بيكي اصلا مش طلقك خلاص.. 

شهد 

ما هو اكيد هيروح يقول لامه لو كان عرفني وامه مش هتبطل بقي كلام والحته كلها هتعرف اني خرجت من البيت وانا مطلقه وابويا وقتها مش هيرحمني.. 

رحمه بضيق

ابوكي ده راجل مفتري وانا مش بحبه، ذنبك ايه انتي ان هو جوزك لواحد زي سعيد ده وليه علي طول قافل عليكي كده ده حتي كان محرمك تكلميني بعد ما خلصنا المدرسه.. 

شهد بدموع 

نصيبي بقي كده المهم ادهم قصدي الدكتور ادهم كان باعتلي رساله وبيقولي انتي فين وانا ما عرفتش ارد عليه اقول ايه؟.. 

رحمه

ردي عليه وقوليلو انك هنا عندي وشوفي هيبعتلك العنوان ولا هيجي ياخدك.. 

شهد 

انتي بتقولي ايه لا طبعاً امك تقول عليا ايه لما تشوفه، انا هروحله وهديه الموبيل بتاعه وامشي بسرعه لاحسن انا سايبه امي علي اعصابها في البيت من لما عرفت اني جيالك.. 

رحمه 

طيب اعملي زي ما قولتلك يلا... 

_ وفي بيت ادهم كان واقف في المطبخ بيعمل شااي ولما سمع صوت وصول رساله علي موبيله، ساب اللي في ايده ومسك الموبيل بسرعه ولقاها بعتتله انها عند صاحبتها، فرد عليها برساله صوتيه وقال.. 

ادهم 

طيب انا هبعتلك اللوكيشن بتاع المطعم اللي هستناكي فيه انا هروح علي طول اهو ما تتأخريش عليا بقي.. 

_ وعند شهد اول ما سمعت رسالته ابتسمت اووي ورحمه غمزتلها وقالت بخبث.. 

رحمه

طيب مش يلا بقي يا شوشو عشان ما تتأخريش عليه.. 

شهد 

طيب انا هروح بشكلي كده لازم طبعا اروح كده احسن حد يشوفني.. 

رحمه 

بت انتي هو مين من الحاره بتاعتكم بيروح مطاعم، يلا يا شهد تعالي هلبسك الطقم الجديد اللي جيباه من كام يوم.. 

حضنتها شهد وقالت 

انتي احسن صاحبه في الدنيا يا رحمه.. 

_ ولبست فعلا شهد بنطلون جينز واسع شويه وبلوزه طويله وشكلها كان حلو اووي عليها وحجابها اللي عملته ليها رحمه بشكل حلوه ورفضت تحط اي مكياج في وشها، ونزلت وقفت تاكسي وراحت للعنوان اللي بعتهولها ادهم ووقفت بره المطعم اللي كان شكله راقي جداً وقالت.. 

شهد 

يا نهار مش فااايت انا هدخل ازاي دلوقتي... 

ومسكت موبيله وكلمته فرد عليها بسرعه وقال

ايوه يا شهد وصلتي ولا لسه؟.. 

شهد بتوتر

ايوه وصلت بس انا مش هينفع ادخل ممكن انت تيجي تاخد الموبيل بتاعك وخلاص.. 

ادهم 

طيب انا طالع اهو خليكي عندك بس اوعي تمشي.. 

شهد 

حاضر مستنيه اهو.. 

_ وفضلت واقفه وبعد اقل من دقيقتين هو طلع واول ما شافته بيقرب عليها زاد توترها اضعااف وبسرعه طلعت موبيله وقالتله.. 

شهد 

اتفضل الموبيل بتاعك اهو، انا لازم امشي بقي.. 

ادهم بجديه 

يلا بينا يا شهد هندخل جوه نتغدي مع بعض.. 

شهد بتوتر وقلق

لا لا مش هينفع بجد ادخل جوه، انا اصلاً لازم امشي.. 

مسك ايدها وقال

مستحيل اسيبك تمشي النهارده ده انا مصدقت انك تيجي واشوفك.. 

_ واول ما مسك ايدها وشها قلب احمر وما قدرتش ترد عليه بولا كلمه ودخلت معاه المطعم واول ما وصلو قدام الترابيزه سحبلها الكرسي وقال بأبتسامه بسيطه.. 

ادهم 

اتفضلي يا شهد... 

_قعدت وهي بتبص حواليها بتوتر وخوف وهو قعد قدامها وحط ايده علي خده وفضل يبصلها بهدوء وهي اتكسفت جداً وقالتله.. 

شهد 

اا اا انا سجلت رقم رحمه صحبتي عندك مم مكن تمسحه.. 

ادهم 

ده موبيلك اصلا يا شهد يعني براحتك تعملي فيه اللي انتي عايزااه.. 

شهد 

لا طبعاً ما ينفعش اا انا ما اقدرش اخده.. 

ادهم 

اعتبريه هديه مني ليكي هترفضي الهديه يعني ده حتي عيب.. 

شهد 

بس انا ما اقدرش اردلك هديتك دي بهديه زيها لانها غاليه اوووي عليا.. 

رد عليها بهدوء وقال

اللي بيهدي حد بيحبه حاجه يا شهد ما بيبقاش مستني مقابل.. 

شهد بصدمه 

ايه؟... 

ادهم بهروب 

بصي انا جيبتلك خط جديد عشان اخد. بتاعي وانتي تعرفي تتعاملي مع الموبيل بطريقه تريحك وعاملك عليه باقة نت ومكالمات كبيره وكل شهر هتتجددلك.. 

شهد 

لا بجد. كده كتير انت ليه بتعمل كل ده معايا اصلا.؟. 

ادهم بخبث

عادي يا ستي اعتبرينا صحاب اعتبريني زي رحمه ولا هي رحمه احسن مني مثلا.. 

ضحكت شهد بهدوء وقالت

بص انا هقبل الموبيل بس بلاش النت والحاجات دي ارجوك.. 

ادهم 

ان شاء الله المهم بقي تاكلي ايه؟.. 

شهد 

لا انا مش جعانه انا عايزه امشي.. 

ادهم 

انتي لسه جايه يا شهد وما اتكلمناااش.. 

شهد 

وهنتكلم في ايه؟.. 

ادهم 

بعد ما نطلب الاكل الاول، هجيبلك علي ذوقي وان شاء الله يعجبك.. 

_ وفي الوقت ده في الحاره كان سعيد قااعد في المحل بتاعه وعدت من قدامه ملك اخت شهد الصغيره اللي عندها 12 سنه فندهلها وقال.. 

سعيد 

ملك تعالي يا بت هنا.. 

راحتله ملك وقالت

نعم؟.. 

سعيد 

قوليلي يا بت اختك فوق ولا فين؟.. 

ملك 

ما اعرفش وبعدين انا امي قالتلي ما اتكلمش معاك تاني... 

سعيد بخبث

ليه كده ده انا كنت هجيبلك شيبسي وشوكلاته بس قوليلي هي شهد فين؟.. 

ملك بقلق

هقولك بس لو امي عرفت اني قولتلك هتكسر رقبتي.. 

سعيد بضيق

ما تخافيش يلا قوليلي وهجيبلك كل اللي عايزااه.. 

ــــــــــــــــــــ

_ وبعد شويه كانت طالعه شهد مع ادهم من المطعم وقالها.. 

ادهم 

الاكل ما عجبكش صح؟.. 

شهد بهدوء

لا حلو والله.. 

ادهم 

بامارة انك ما اكلتيش لقمتين علي بعض... 

شهد بتوتر

بصراحه هو انا ما حبتوش يعني حسيته غريب عليا شويه.. 

ادهم 

طيب كنتي قولتي وكنت طلبتلك حاجه تانيه.. 

شهد 

لا عادي خلاص وبعدين انا اكلت برضوو.. 

ادهم 

تتعوض المره الجايه.. 

شهد 

هو هيكون في مره تانيه ولا ايه؟.. 

رد عليها بثقه وقال

تانيه وتالته وكتير كمان، تعالي بس نجيب خط جديد لموبيلك تحبي يكون ايه؟.. 

شهد

لا خلاص انا معايا واحد في البيت هبقي اشغله.. 

ادهم 

تمام رقمي معاكي هتكلميني منه عشان اسجله... 

شهد بضيق

هو انت ليه بتعمل معايا كده بص حضرتك انا مش بتاعت نتصاحب والجو ده وواحده في ظروفي كويس انها عرفت تخرج لو لمره اصلا.. 

ادهم 

هو انتي ليه بتعاقبي نفسك مرتين؟.. 

شهد 

ازاي يعني مش فاهمه؟.. 

ادهم 

يعني الاول عاقبتي نفسك بأختيار اهلك. ليكي في جوازه مش كويسه، ودلوقتي بتعاقبي نفسك تاني بأنك تشيلي ذنب الجوازه الفاشله دي مع ان الفشل ما كانش منك انتي، بالعكس برغم انك صغيره حاولتي تعيشي بس في ناس ما ينفعش معاها ولاد الاصول اللي زيك.. 

شهد بدموع 

نصيبي كده بقي، انا همشي وما فيش داعي نتكلم تاني.. 

ادهم 

لا ليه داعي يا شهد،اصلا اننا نتقابل ونتكلم وتاخدي قرار مهم في حياتك بعد كلامك معايا واني اجيلك وادور عليكي ونتقابل تاني كل ده يخلي ان في داعي اننا نتكلم تاني.. 

شهد 

ليه نتكلم وليه تشوفني ولا عشان خلاص دي واحده مطلقه وما هتصدق.. 

ادهم 

انتي ايه اللي بتقوليه ده؟.. 

شهد بدموع 

دي الحقيقه واحد زيك بيعمل كل ده معايا ليه ما هو يا اما صعبانه عليك او حاجه تانيه، بس في كلا الحالتين انا اكتشفت دلوقتي ان ابويا معاه حق انا مدام اطلقت لازم اقعد في البيت عشان الناس وحشه ومش بيفرقو بين الظالم واللي اتظلم بالعكس بيجو علي المظلوم اووي.. 

وطلعت الموبيل بتاعه من شنطتها وقالتله 

ومش هينفع اقبل الهديه بتاعتك لانها ما تناسبنيش، بعد اذنك... 

_ اخد. منها الموبيل وهي وقفت تاكسي ومشيت، اتنهد هو بضيق وكلامها اثر فيه جداً ورجع بيته لقي حسام قااعد في العربيه مستنيه ولما شافه نزل بسرعه من العربيه وقال.. 

حسام 

انت فين كل ده يا ابني امك صدعتني وعرفت اني بكدب عليها.. 

ما ردش عليه حسام ودخل العماره وحسام راح وراه وركب معاه الاسانسير وقال.. 

حسام 

هي خزوقتك وما جاتش ولا ايه؟.. 

ادهم بضيق 

لا جات واتغدينا سوا و.. ومشيت.. 

حسام 

مش فاهم برضو انت كنت عايزها تيجي هنا معاك يعني ولا ايه... 

بصله ادهم بغيظ وقال

اخرس يا حسام وانت ايه اللي جايبك معاسا اصلا روح بيتك يلاا.. 

واتفتح الاسانسير وطلع ادهم ووراه حسام اللي قال

بقي انا طالبلك بيتزا زمانها علي وصول وانت تقول كده، وبعدين مش قصدس ان ست الحسن والجمال بتاعتك اخلاقها وحشه بس انا بحاول الاقي تفسير لزعلك.. 

دخل ادهم شقته وقفل الباب وقال

امي كانت عايزه ايه؟.. 

دخل حسام وراه وقفل الباب وقال

سألتني عليك قولتلها انك في العياده ما اعرفس عرفت منين انك سييت العياده بدري واني بكدب عليها وهزأتني وقالتلي هو انا جيبتلك شغل وشقه قريب منه عشان تجيبلي اخباره مش تكدب عليا.. 

ادهم بسخريه

طبعا ما هي عملتلك كل ده عشان توصلها اخباري اكيد.مش لسواد عيونك.. 

حسام 

طيب المهم ايه اللي حصل مع البنت اللي كانت شغاله عندك دي؟.. 

اتنهد ادهم بهدوء وقال

هتجوزها يا حسام... 

بصله حسام. بصدمه وسكت وادهم قال

مالك تنحت ليه، هستني عدتها تخلص وهتجوزها علي سنة الله ورسوله وهاخدها بعيد عن الجهل والقرف اللي هي فيه.. 

حسام بحده 

تبقي اتجننت يا ادهم، انت فاكر ان امك او ابوك هيوافقو انك تتجوز بنت زي دي ومن المستوي ده.. 

ادهم بأنفعال وغضب

وانا لما سمعت كلامهم واتجوزت بنت الحسب والنسب حصل ايه، طلعت واحده زباله وهما كلهم زباله اصلا.. 

حسام 

مش عارف اقولك ايه بس ما توصلش لجواز يا ادهم، انت ناسي انت ابن مين واهلك مين وهي منين ده الشغالين اللي عند اهلك انضف من احسن حد في منطقتهم... 

ادهم بجمود

انا ما يهمنيش غيرها وهتجوزها يعني هتجوزها واهلي مش هيعرفو حاجه كل حاجه هتكون في السر.. 

_ تفتكرو شهد هتوافق ولا هترفض؟ 

ــــــــــــــــــــ 

_ وعند شهد كانت لسه عند رحمه وقالتلها اللي حصل، وزعقت فيها رحمه وقالت.. 

رحمه 

يعني هو انتي يوم ما تعملي ناصحه يبقي علي الواد الغلبان ده.. 

شهد 

بالعقل يا رحمه واحد زي ده هيكون عايز ايه يعني بتصرفاته دي، وما جابش سيرة جواز واصلا جواز ايه هو انا حلمت بأيه ده واحد بعيد عني اووي.. 

رحمه 

طيب قومي روحي قفلتي اليوم علي نكد والحقي روحي قبل ما يجي ابوكي ويكمل النكد... 

شهد 

طيب هاتي الهدوم بس عشان ادخل اغير وابقي تعالي عندي واقعدي معايا لحد ما اتصرف واجيب اي موبيل اكلمك منه.. 

رحمه 

من غير ما تقولي هجيلك.. 

_ ودخلت شهد وغيرت هدومها ومشيت من عند رحمه واول ما وصلت الحاره ودخلت البيت اللي فيه شقتهم وكانت لسه طالعه علي السلم جه سعيد من وراها ومسكها من دراعها جامد وقال.. 

سعيد 

انتي كنتي فين يا بت انتي؟

ـــــــــــــــــــــــــــــــــــــــــــــــــــــــ 

#بقلم_الكاتبه_رحاب_القاضي

            الفصل السادس من هنا 

تعديل المقال