رواية العداءة الفصل السادس 6 بقلم اسماعيل موسي
#العداءة
٦
انتهت مراسم الحفله المفاجئة، الخادمات فضلو شغالين للصبح علشان يرجعو القصر زى ما كان، رعد بيه مش بيحب يشوف القصر فوضاوى، ثم قدامهم النهار كله ممكن يقضوة فى النوم
الكل نام، لكن عقل شروق فضل شغال، ليه ارضى بدل رعد بيه والباشا التانى باين عليه محترم، لا هيزعق فيا ولا هيخوفنى ولا اى حاجه؟
الكارت كان فى ايدها لكن شروق مش معاها تليفون، لكزت تلا فى كتفها، تلا عايزه التليفون بتاعك اكلم أهلى فى البلد
وهى نايمه همست تلا، اهو عندك خديه
سجلت شروق الرقم، بخجل همست الووو
الووو، ايوه مين معايا؟
انا شروق يا بيه...
شروق مين؟
شروق الخدامه فى قصر رعد بيه
اها..... ازيك يا شروق عامله ايه؟
الحمد لله يا بيه
ها يا شروق اتكلمى؟ وسمعت شروق صوت ضحكة بنت جنبه
انا فكرت يا بيه وموافقه اشتغل عندك
هتدينى خمس تلاف جنيه صح؟
صح يا شروق، صح
طيب اقدر اجى اشتغل امتى؟ والعنوان ايه؟
من النهرده يا شروق، العنوان كذا كذا، متتأخريش انا مستنيكى
خرجت مستحبه، مرضتش تاخد معاها هدوم، فخرى كان شغال فى الجنينه مخدش باله منها
طلعت للطريق وسألت الناس توصل العنوان ازاى؟ تنقلت من اتوبيس لاتوبيس لحد ما وصلت العنوان
فيلا فى مكان راقي، دخلت على الفيلا وقابلها الحارس
عايزه صقر بيه؟
انتى مين يا شاطره؟
مسميش شاطره وصقر بيه مستنينى
ومالك مستعجله كده ليه؟
بدر سيبها تدخل؟ سمعت صوت صقر بيه من الشرفه
وصلها بدر مدخل الفيلا ودخلت شروق
نزل صقر من على السلم فى بقه سيجاره، نورتى مكانك يا شروق
الله يخليك يا بيه! انا هشتغل هنا؟
ايوه والله هشتغلى هنا يا شروق
هو مفيش خدم غيرى يا بيه؟
لا مفيش، انتى بس يا شروق، هتقدرى على الفيلا؟
هقدر يا بيه، هقدر، انا لهلوبه
طيب يلا ورينى همتك الفيلا محتاجه تتنضف
ادخلى غيرى هدومك وارجعى
دخلت شروق غرفة الخدم لكن الملابس إلى هناك معجبتهاش
رجعت بنفس هدومها لقيت صقر قاعد على الكرسى
لمت عبيتها وقعدت تنضف الارضيات وصقر مصوب عنيه عليها
مسحت بكل جد، خلت الارضيات تلمع، استعجب صقر من قوتها رغم نحافة جسمها
انا همشى بقا يا صقر عايز حاجه!؟
شافت شروق بنت نازله من الطابق العلوى ماشيه بترنح
لا امشى هبقى اكلمك
تصعبت شروق فى سرها، لكن قالت وانا مالى، انا خدامه مش اكتر
لبسها عجبك يا شروق؟
وقفت شروق المسح، سكتت، لكن مردتش
لو لبستى زيها هتبقى احلى منها يا شروق
لكن انا معنديش لبس زيها يا صقر بيه
ابتسم صقر متقلقيش، شايفه الغرفه إلى هناك دى؟ هتلاقى فيها هدوم كتير اختارى إلى يناسبك
اختفى صقر وهو مبتسم، خلصت شروق نضافه اخذت دش ودخلت الغرفه
كل ما تلبس فستان تتكسف منه، عمرها ما لبست حاجه محزقه كده اووى
فى الآخر لبست جيبه وبلوزه كانت فرحانه بيهم اووى
وقفت قدام المرايه، اخيرا لبست زى البنات إلى بتتفرج عليهم فى الشارع والتلفزيون
رعد بيه فيه حاجه حصلت!!
خير يا تلا قلقتينى
شروق اختفت
بتقولى ايه؟ اختفت ازاى؟
طلبت تليفونى تعمل منه مكالمه وبعدها سابت القصر ومشيت
فين الرقم سأل رعد
كتبت الرقم فى تليفونه ظهر اسم صقر
تنهد رعد بغضب!! هو البنى ادم ده مش هيبطل عك ابدا؟
انا شفتها واقفه مع صقر بيه يا رعد باشا!
. همس رعد اه دا رقم صقر
وهتعمل ايه يا رعد بيه؟
هعمل ايه يعنى يا تلا؟
معقول هتسيبها كده؟
لو كان دا اختيارها مفيش حاجه بايدى اقدر اعملها يا تلا
رعد، همست تلا، شروق غلبانه ومتعرفش حاجه، لازم تنقذها من ايد الولد ده
لما تلا تمسح الالقاب يعرف رعد انها جاده جدا
انت تروح تجيبها دلوقتى من شعرها، ولو كان لازم رجعها بلدها، لكن متسيبهاش فى فيلا صقر
