رواية مكتوبة علي اسمي الفصل الثامن والعشرون 28 بقلم ملك ابراهيم
#الحلقة_28 (هدية لكل متابعيني 🎁❤️)
انا متوقعتش انها تكون بالجراءة دي!! بس هي قالت انها مش هتقول حاجة لعامر!
عزيز بجنون: وبقت ماسكه علينا حاجة كمان وتقدر تهددنا في اي وقت.. انا قولت من الاول ان البنت دي مش سهله ابدا.
ميرنا كانت قاعده مش مهتمه بكلامهم وقربت من ميسرة وهمست لها: طنط انتي معاكي فلوس.
ميسرة بصتلها بغضب وقامت طلعت علي غرفتها.
ميرنا بصت ل باباها باحباط وقالتله: بابا انا عايزة فلوس.
...
عند آيات في غرفتها.
قعدت على الفراش تفتكر حديثها مع ميسرة والدة عامر واخدت تليفونها واتصلت على هاجر وانتظرت الرد.
هاجر: الو.. آيات.
آيات: هاجر فاضيه نتكلم دلوقتي ؟
هاجر: اه طبعا يا حبيبتي فاضيه طمنيني عليكي عامله ايه؟
آيات بصت قدامها وافتكرت حديثها مع هاجر لما كانت بتزورها اخر مرة وآيات كانت بتبكي على باباها وهاجر بتحاول تخفف عنها وآيات حكتلها ان والدة عامر عايزة تفرقهم عن بعض وهاجر قالتلها انها لازم تدافع عن علاقتها بجوزها وتحارب الكل لان عامر يستاهل انها تدافع عن علاقتهم.
ردت آيات بعد ما خرجت من شرودها وقالت: انا اتكلمت مع مامت عامر وقولتلها ان انا سمعتها.
ََََ......
في البلد عند صباح.
صباح اتصلت على سيد وقالتله: إسماعيل راح ل آيات بنت اخوه ومحدش عارف راحلها يعمل ايه! .. حتى فارس ابنه ميعرفش!
سيد: هيكون راح ليه يعني!
صباح بقلق: خايفه تكون آيات هتقوله حاجة عننا! قلبي مش مطمن!
اتكلم سيد: كان زمانا خلصنا منها بس الزفت ده طمع فينا وطالب ضعف الفلوس عشان ينفذ!
صباح بغضب: انا مش هدفعله حاجة تاني.. ادفع انت.
سيد بصدمة: ادفع منين!
صباح : من فلوس مراتك!! البت لو اتكلمت مش انا لوحدي اللي هتفضح.. إسمك هيبقى قبل اسمي.
سيد بغضب وجنون: عايزة تفضحيني يا صباح!
صباح: اومال عايزني اعمل ايه وانت حاطت ايدك في المايه الباردة.. انا بعت الدهب بتاعي عشان ادفعله الفلوس ومبقاش حيلتي اي حاجة ومقدرش اتصرف في اي حاجة باسم عرفان!
سيد بص قدامه بغضب وقال: افهم من كده انك بتهدديني يا صباح؟
صباح بنبرة حادة: افهم زي ما تفهم.. انا مش هتفضح لوحدي يا سيد.. انا عملت اللي عليا وانت اتصرف بقى..
وقفلت المكالمة بغضب وسيد بص قدامه بصدمة وهمس: هي حصلت تهدديني يا صباح.
رواية مكتوبة على إسمي بقلمي ملك إبراهيم.
عند عامر وآيات.
عامر دخل الغرفة وآيات كانت قاعده شارده بعد ما خلصت كلام مع هاجر صحبتها.. كانت بتفكر في حياتها اللي بتتغير من بعد ما سابت البلد وجت القاهرة.. رغم العذاب اللي كانت عايشه فيه مع أبوها ومراته لكنها كانت حاسه بالأمان هناك والناس حواليها كانوا طيبين.. لكن هنا الكل بيجري ويتسارع ولازم تكون قويه عشان تقدر تحمي نفسها من شرهم!..
عامر قعد جمبها واتكلم بنبرة مرحة: ممكن اقعد مع مراتي شويه.
آيات ابتسمت وبصتله اوي وقالت: انا تعبتك معايا الفترة اللي فاتت.. شكرا على وقفتك معايا.
ابتسم ومسك أيديها قبلها بحب وقال: اظن انتي عارفه ان مفيش واحدة تقول لجوزها شكرا صح؟
آيات ابتسمت وقالت: بس انت صبرت عليا وكنت جنبي وتستحق اقولك شكرا.
عامر بصلها بنظرات كلها عشق وقال: انتي متعرفيش انا كنت حاسس ب ايه الايام اللي فاتت وانتي حزينه وقافله على نفسك وانا مش عارف اعملك حاجة.
آيات بصتله بحزن وقالت: الصدمة كانت كبيرة عليا.. عارف يعني إيه تعرف ان انت بقيت لوحدك في الدنيا وملكش حد!
عامر وهو ماسك ايديها بصلها بعشق وقال: عمرك ما هتكوني لوحدك.. انا موجود معاكي وبكره عيلتنا تكبر ويبقى عندنا اولاد كتير يقولولك يا ماما وتفضلي تصرخي فيا وتقوليلي اولادك مجننني!
آيات ابتسمت بخجل وعامر بصلها بعشق وقال: معرفش ازاي وامتى امتلكتي قلبي يا آيات.. انتي مش بس مكتوبة على إسمي.. انتي مكتوبه على قلبي وعلى روحي وكأنك جيتي الدنيا عشاني انا.
آيات بصتله بخجل وقالت: انا اول مرة اسمع الكلام الحلو ده من حد.
عامر بثقة: محدش يقدر يقولك الكلام ده غيري.
آيات ابتسمت بخجل وحاولت تغير الموضوع وقالت: انا هبدأ شغل بكره ؟
عامر فهم انها بتتهرب منه وقال: تقدري تبدئي في اي وقت.
آيات هزت راسها بتوتر وقالت: بس انا مش هينفع اجي معاك الشركة.. زي ما اتفقنا مش عايزة حد يعرف اني مراتك.
عامر اتنهد بقلة حيلة وقال: حاضر يا آيات هخلي السواق هو اللي يوصلك.
آيات هزت راسها وقالت بتوتر: انا هنام دلوقتي.. تصبح على خير.
عامر وقف وهو بيبصلها بحزن لانها محافظة علي الحدود بينهم وهو مش عايز يخوفها او يغصبها علي اي حاجة في علاقتهم.
رواية مكتوبة على إسمي بقلمي ملك إبراهيم.
صباح يوم جديد علي جميع الابطال.
آيات صحيت بدري وجهزت عشان تبدأ اول يوم شغل ليها.. خرجت من غرفتها وقابلت عامر وهو خارج من غرفته وكان جاهز عشان يروح الشركة.
آيات وقفت قدامه قالت بأبتسامة: صباح الخير.
عامر رد بنبرة هاديه: صباح الخير.. انا هروح الشركة وهتلاقي السواق تحت في انتظارك عشان يوصلك واول لما توصلي اسألي عن الباشمهندس شريف هو اللي هيعرفك مكان شغلك وهيفهمك كل حاجة.
آيات بصتله بستغراب لانها لاحظت نبرة صوته وطريقة كلامه الرسمية معاها!
عامر نزل وهي نزلت وراه وهو ركب عربيته واتحرك بيها وهي ركبت مع السواق.
....
عند امجد.
امجد كان واقف منتظر اخته هاجر تجهز عشان ياخدها يوصلها لشركة عامر وتبدأ شغلها هنا.
هاجر نزلت وركبت معاه عربيته وقالت بملل: انا مش فاهمه ليه اشتغل في شركة تانيه وشركتك موجودة!
رد امجد بسخرية: يمكن لان الموظفين عندي بيجاملوكي.. بس اطمني انا موصي شريف عليكي جامد.
هاجر بصتله وقالت: عارفه يا ابيه انك اكيد موصي عليا ربنا يستر.
امجد ابتسم وقالها: هوصلك النهاردة ومن بكره تروحي بعربيتك.
هاجر هزت راسها وقالت بهمس: دا لو كملت شغل هناك لبكره!
....
في شركة الجارحى.
عامر وصل الشركة وطلع علي مكتبه وآيات وصلت بعده ووقفت قدام موظفة الاستقبال وطلبت تقابل الباشمهندس شريف.
الموظفة ساعدتها توصل لمكتب الباشمهندس شريف وآيات وقفت تخبط علي باب مكتبه وشريف اول لما شافها قام بسرعه واستقبلها ورحب بيها.
شريف: اهلا يا آيات نورتي الشركة تشربي ايه؟
ردت آيات برسمية: شكرا انا عايزة ابدأ شغل علي طول.
شريف هز راسه بالايجاب والباب خبط فجأة ودخل امجد ومعاه هاجر.
امجد اول لما دخل مكتب شريف وشاف آيات عنده اتصدم وقلبه دق بسرعه وكان مستغرب وجودها وهاجر ابتسمت بسعادة وجريت على آيات تحضنها وقالتلها بسعادة: آيات ايه المفاجأة الحلوة دي انتي بتعملي ايه هنا؟
ردت آيات بابتسامة: انا هبدأ شغل هنا.
هاجر ابتسمت وقالت بحماس: وانا كمان هبدأ شغل هنا.
امجد بص ل آيات وقالها: عامله ايه يا آيات دلوقتي؟
ردت آيات بهدوء: الحمدلله يا باشمهندس.
شريف رحب ب امجد وقاله: اتفضل يا امجد اقعد.
رد امجد وهو بيبص علي آيات بتوتر: لا انا هروح شركتي.. انا جيت بس اوصل هاجر وطبعا مش هوصيك يا شريف.
شريف هز راسه بالايجاب وقال: متقلقش يا امجد.
امجد هز راسه وقالهم : بالتوفيق.
وخرج من مكتب شريف وآيات همست ل هاجر: مقولتليش ليه إنك هتشتغلي هنا؟
ردت هاجر وهي بتضحك: انا جايه بالغصب اصلا!
آيات ابتسمت وهمست لها: وانا كمان جايه بالغصب.
شريف بصلهم وقال: دي العقود بتاعكم جاهزة على التوقيع وهتلاقوا المرتب مكتوب تحت.
آيات أخدت العقد بتاعها ووقعت عليه بدون ما تقرأ وهاجر قالت بستغراب: انتي بتوقعي على العقد قبل ما تقرأيه!!
آيات بصتلها بدهشة لانها مفكرتش فعلا تقرأ العقد وهاجر ابتسمت وقالتلها: صحيح انتي هتقرئي العقد ليه دي الشركة كلها بتاع جوزك!
آيات بصتلها بخجل وشريف قام وقف وقال برسميه: قبل ما تبدؤ الشغل لازم تقابلوا الباشمهندس عامر الأول.
آيات اتوترت وهاجر همستلها: ايوا بقى على الرومانسية اللي هشوفها دلوقتي قلبي مش هيتحمل!
آيات بصتلها وضحكت وقالت بهمس: آنتى هتشوفي رومانسيه عمرك ما شوفتيها في حياتك.
شريف كان قدامهم ودخل هو الأول غرفة مكتب عامر وطلب منهم يدخلوا.
آيات دخلت هي وهاجر.. عامر كان قاعد على مكتبه وشريف وقف قدامه وقاله: الموظفات الجداد!
عامر بص على العقود بتاعهم وكان عقد آيات هو اللي قدامه في الاول وقرأ اسمها وقال برسمية: آيات عرفان..
آيات قربت منه ووقفت قدامه وعامر بص على العقد بتاعها وسألها: اشتغلتي قبل كده ولا دي اول مرة؟
ردت آيات بتوتر: إشتغلت قبل كده.
هاجر وشريف بصولهم بستغراب وعامر بص قدامه تاني وسألها: ممكن اعرف سيبتي شغلك ليه ؟
آيات بصتله بغيظ وقالت: جوزي.. جوزي هو اللي طلب مني اسيب الشغل.
عامر بصلها وقال بهدوء: هو حضرتك متجوزة ؟؟... بقلمي ملك إبراهيم.
.... يتبع
عايزة العلاقة تبقى رسمية في الشغل يا آيات😂😂 اتفضلي أهو تقريبا نسي تاني انه متجوز🏃😅
