رواية عندما تجد الامان الفصل السادس 6 بقلم نشوه عادل
- حلو يبقى انت اللى اختارت وورقتى توصلنى ف اقرب وقت وياريت من غير شوشرة ومحاكم
عز بصدمة: الله ده انتى مخططة بقى وراسمة كل حاجة بس انتى غلطانة يا مدام مش عز الالفى اللى يتلوى دراعه ويتهدد حتى اسألى رفعت بيه وهو يقولك
رنا: وانا مبقتش طايقاك ي اخى افهم بقى انا عاوزة اخلص منك خلى عندك كرامة وطلقنى
عز بوجع: اللى يسمعك يقول انى ميت عليكى وعاوزك معايا انا كنت بستحملك ومستحمل قرفك عشان خاطر بنتنا عشان تتربى بشكل سوى بس ازاى وانتى اصلا متعرفيش يعنى ايه امومة طلعت غلطان بجد انى باقى ع واحدة بايعة بس انا بقى عندى ليكى عرض مقابل الطلاق
رنا: عرض ايه؟!
عز: هطلقك ومؤخر الصداق بتاعك اللى كان نص مليون هخليه ٢ مليون كمان بس بشرط
رنا: ايه هو؟!
عز: تتنازلى عن بنتنا لارين مدى الحياة ولا تحاولى تقربى منها بأى شكل من الاشكال من الاخر كده اعتبرى انك مخلفتيش ها قولتى ايه؟!
رنا بدون تفكير: موافقة هتبعتلى ورقتى امتى؟!
عز: انا هكلم المحامى النهاردة يخلص اجراءات التنازل بكرة وبمجرد ما تمضى عليه هتاخدى الفلوس وورقة الطلاق ووراهم تفة مش بوسة
رنا: اوك بس ياريت بسرعة عشان عاوزة اسافر اتفضل مع السلامة
خرج عز من بيت رفعت وحزن الدنيا كله ف قلبه معقول دى ام انانيتها وطمعها وحبها للفلوس يخلوها تتنازل عن بنتها ببساطة كده طب ازاى؟!
رفعت: انتى اتجننتى يا رنا بتتنازلى عن بنتك!
رنا: يا بابا افهم انت سمعت قالى هاخد كام بالفلوس هعمل الاتليه اللى بحلم بيه من غير ما اغرمك ولا مليم وهسافر وهعيش براحتى اما بنتى هتحتاج ليا ف يوم من الايام وهى اللى هتطلبنى ووقتها هو اللى هيجى يبوس ايدى عشان اشوفها ووقتها اساومه ع فلوس تانى
رفعت: ده انتى دماغك سم زى امك بالظبط سبحان الله بعدت ومبعدتش
رنا: تربيتك يا رورو يلا سلام الشلة مستنيانى من بدرى باى
تانى يوم كانت نورهان بتفتح الفون بالصدفة ولقت بوست سهام عاملة فيه منشن لسلوى وبتبارك لحسن ع خطوبته ابتسمت بحزن ولقت الباب بيخبط ولما فتحت لقيتها سلوى
نورهان: صاحبى الندل لسه فاكرة تزورينى فينك من يومها يا بت
سلوى: كنت مكسوفة ومش عارفة اوريكى وشى ازاى بعد اللى حصل
نورهان: تانى احنا مش اتكلمنا ف الموضوع ده وقفلناه خلاص بتفتحى فيه تانى ليه بقى؟!
سلوى: عشان حاسة بالذنب اتجاهك بسببى انتى عرفتى حسن وبسببه انا هخسرك
نورهان: ممكن تبطلى هبل لان مفيش اى حاجة من دى هتحصل انتى اختى قبل ما تكونى صاحبتى وانتى نصحتينى بالرغم انه اخوكى وقولتى انه مش شبهك وانا اللى اصريت وحبيته يعنى اللى حصل نتيجة اختيارى انتى ملكيش ذنب فيه وبعدين الحمدلله ان ده حصل ع بر
سلوى: انتى عرفتى انه قرأ فاتحته وخطوبته النهاردة!
نورهان بقوة مزيفة: اها لسه شايفة البوست ع صفحتك
سلوى: انا مش هروح الخطوبة دى ولا هيكون ليا علاقة بيها اصلا
نورهان: لا اوعى تعملى كده هى ملهاش ذنب هى مكنتش تعرف باللى بينى وبين اخوكى واكيد هى كويسه وبنت ناس والا اخوكى مكنش دخل من الباب اتعاملى معاها عادى هى مأخدتوش منى هى اخدته بعدى تفرق كتير
سلوى: بس انا مش عاوزة اروح بجد عاوزة افضل معاكى انا لا لبست ولا جهزت نفسى يبقى بلاش المشوار ده
نورهان: بلاش تلكيك انتى زى القمر اصلا من غير اى حاجة ولو ع الميك اب انا هعملك وشوفى اى دريس من عندى
بالفعل لبست سلوى ونزلت وهى عارفة وحاسة بحزن نورهان ووصلت ع بيت العروسة وكانت اسمها منة
منة: اهلا يا سلوى اتأخرتى كده ليه؟!
سلوى: عادى كنت بظبط نفسى مبروك
منة: الله يبارك فيكى انا من زمان كان نفسى اتعرف عليكى من كلام حسن عنك
سلوى باستغراب: من زمان ازاى؟! هو انتى تعرفى حسن من امتى؟!
منة: بقالنا شهرين تقريبا انا بشتغل معاه ف نفس الشركة
غمضت سلوى عيونها بغضب فمعنى كلام منة انه كان بيكلمها وهو خاطب نورهان ...سلوى: ويا ترى بقى كنتى عارفة انه ف الوقت ده كان خاطب؟!
منة بتوتر: هو ...هو انا كنت بشوف الدبلة بايده ولما سألته قال انه ف مشاكل بينهم ومش هيكمل معاها
جه حسن وقال: ايه القمر ده يا لولو مقولتليش ايه رأيك ف منة؟!
سلوى: اكيد اختيارك هيكون شبهك اومال ماما فين؟!
حسن: واقفة هناك اهى
مشيت سلوى وبصت منة لحسن: هى تقصد ايه بكلامها ده؟!
حسن بتمثيل: اننا لايقين ع بعض مبسوطة يا روحى اظن وعدت ووفيت
منة: ايوة يا قلبى انا مبسوطة جدا واخيرا هتكون ليا انا وبس
عدى اليوم بتفاصيله وتانى يوم ف الشركة دخل عادل ع عز ف مكتبه وقال: عز اللى سمعته من المحامى ده صح؟!
عز وهو باصص بالملف: سمعت ايه؟!
عادل: انك طلبت منه اوراق تنازل عن لارين؟؟
عز: ايوة ليه ؟!
عادل: انت بتتكلم بجد انت هتستغنى عن بنتك ده انت متقدرش تعيش من غيرها
عز: استنى بس انت اكيد حصل عندك لبس الاوراق عشان مدام رنا تمضى عليها
عادل بعدم فهم: لا واحدة واحدة بقى عشان دماغى عملت ايرور فهمنى براحة
حكى عز لعادل اللى حصل والاتفاق اللى بينه وبين رنا ....عز: بس ي سيدى وهى وافقت
عادل: ايوة بس ده غلط يا عز انت بتحرم بنتك من امها حرام
عز: اذا كانت امها نفسها مستبيعة وبنتها مش فارقة معاها وبعدين انا واثق ان بنتى هتعيش بشكل افضل وهى بعيد عنها ع القليل هعرف اربيها ومتبقاش امها قدوتها وتكون زيها
عادل: والله انا مش عارف اقولك ايه انت اللى عملت ف نفسك كده من الأول
عز: غلطة وانا اتعلمت منها وان شاء الله المرة الجاية هختار صح
ف الوقت ده دخل المحامى وقال: عز بيه الاوراق جاهزة يا فندم وووو...يتبع
#عندما_تجد_الامان السادس
#بقلم_نشوه_عادل
