رواية عندما تجد الامان الفصل الرابع 4 بقلم نشوه عادل
- هو انتى كده هتقطعى علاقتك بيا صح عشان انا اخت اللى كان خطيبك وبسبب افعاله هخسرك مش كده؟!
نورهان وهى بتقوم بسرعة وتحضنها: ايه الكلام الاهبل ده انتى اختى وعشرة عمرى مش صاحبتى وبس ومهما كان اللى حصل من اخوكى ف حقى انتى ملكيش ذنب فيه انتى هتفضلى اختى وصاحبتى لاخر العمر معتقدش ان فيه ف عمرى اد اللى راح عشان الحق اعمل صاحبة زيك
دمعت سلوى وشددت من حضنها: انا بحبك اوى يا نور والله انتى اغلى واعز صديقة عندى
نورهان: وانتى اختى مش صاحبتى وبس وبعدين كفاية دموع انا مش واخدة عليكى كده فين لسانك اللى اطول منك
سلوى: يلا يا حيوانة
نورهان بضحك: ايوة هى دى سوسو حبيبتى
سلوى: هو بعد سوسو دى من فضلك اقطعى علاقتك بيا
ضحكوا الاثنين ودخلت دعاء وقالت: عملت عشانكم احلى كوبايتين عصير
سلوى: مكنش فيه داعى تتعبى نفسك يا طنط هو انا غريبة
دعاء: وانا لو بعتبرك غريبة هعملك عصير ليه يا اختى انا عارفة ان الجو حر الحق عليا تصدقى انى غلطانة يا بت اوعى هاتى العصير
سلوى بسرعة: ايه يا طنط انتى ماصدقتى دول كلمتين زوق مش اكتر
دعاء بضحك: ايوة كده اتعدلى
دخلت نورهان اوضتها وجابت شنطة فيها العلبة بالشبكة وقالت: اتفضلى يا روحى الشبكة اهى شوفيها برضه قبل ما تمشى واتأكدى انها كاملة
سلوى بزعل: انتى عبيطة ولا شكلك كده هو انا هخونك
نورهان: مش كده بس عشان اخوكى ميرجعش يقول ان نقص حاجة
سلوى: القليل عندك يزيد يا قلبى عن اذنكم همشى انا بقى
دعاء: لسه بدرى يا حبيبتى خليكى شويه
سلوى: بدرى من عمرك يا طنط انا معرفتش حد ف البيت انى هتأخر
نورهان: خلاص يا ماما سبيها ع راحتها بس خلى بالك المرة دى مش محسوبة ها
سلوى: اوك يا حب يلا باى
تعدى الايام ونورهان بتتأقلم ف الشغل اكتر وبتثبت كفائتها وشاطرتها اكتر واكتر اما عز المشاكل بينه وبين مراته يوم عن يوم بيزيد وف يوم كان فيه اجتماع مهم جدا ف الشركة وطبعا جمع اكفأ الموظفين ف الشركة والمصنع
عز: الوفد الفرنسى هيوصل امتى يا عادل؟!
عادل: كمان ربع ساعة ان شاء الله
عز: طب المترجم فين المفروض يكون هنا من بدرى؟؟
عادل: مش عارف والله انا رنيت عليه وقالى انه ف الطريق بس فيه زحمة عطلته متقلقش ان شاء الله يوصل قبل الميعاد
عز بتوتر: انت عارف يا صاحبى ان دى صفقة العمر لينا لو تمت ع خير بعدها هنتنقل ف حتة تانية خالص مش عاوز اى غلطة
عادل: يا ابنى بطل توتر بقى ما انا زيى زيك صاحب الشركة ومع ذلك مش قلقان كده
عز: طب انت معندكش دم طول عمرك فاكر ايام الامتحانات كنت انا افضل سهران من قلقى وانت نايم وبتش*خر
عادل: ي ابنى انا راجل فاهم الدنيا صح وباخد الامور ببساطة اصل هتوتر هتعصب هنسى هعك الدنيا يبقى ليه يعنى!
دخلت السكرتيرة وقالت: الوفد الفرنسى وصل يا فندم ودخلتهم ع غرفة الاجتماع
عز بقلق: ايه يا ابنى الناس وصلت والزفت لسه مجاش هنعمل ايه؟!
عادل: رن عليه انت وانا هروح ارحب بيهم ع اما انت تيجى
فضل عز يرن ع المترجم كتير ومبيردش واخيرا بعد مدة طويلة رد ...عز بعصبية: انت فين يا بنى ادم؟
صالح: والله ف الطريق بس الكوبرى واقف بسبب الزحمة مش ذنبى
عز: انت بنى ادم مستهتر انت عارف ان فيه زفت صفقة مهمة المفروض كنت تيجى من بدرى
صالح: انا نزلت فعلا من بدرى بس الموضوع مش بايدى
دخلت السكرتيرة وقالت: مستر عز الوفد بيسأل عن حضرتك وعاوزين يبدأوا الاجتماع
قفل عز الفون ودخل ع القاعة بهيبة ورحب بالوفد وهمس لعادل: هنعمل ايه دلوقتى نطلع التليفونات ونقضيها ترجمة جوجل
عادل: اكيد مش هينفع طبعا
اتكلم بصوت مسموع: وبعدين هنتعامل ازاى احنا مش بنعرف فرنسى
وهنا سأل واحد من الوفد: Y a-t-il un problème monsieur ? ( فيه مشكلة؟!)
طبعا محدش فهم لكن اتفاجئوا بنورهان بترد عليهم فرنسى وبطلاقة
عز: انتى بتعرفى تتكلمى فرنسى؟!
نورهان: ايوة يا فندم متقلقش نقدر نبتدى الاجتماع
بدأ عز يهدى وياخد نفسه بانتظام وبعد ما انتهت الصفقة طبعا اتفقوا ان يكون فيه عشاء عمل ويوقعوا العقود وبعدها مشيوا
عز: انا متشكر جدا يا آنسة نورهان مش عارف لولا وجودك النهاردة كان حصل ايه؟
نورهان: لا شكر ع واجب يا فندم ده شغلى
عادل: انا اول مرة اشوفك انتى بتشتغلى ايه ولا فين؟!
نورهان: الادارة يا فندم ف المصنع
عادل: ايوة انا مش بروح المصنع عشان كده مشوفتكيش بس باين عليكى شاطرة
نورهان: ميرسى يا فندم شهادة اعتز بيها عن اذنكم
مشيت نورهان ....عز: انا هروح واعطى خبر لرنا عشان لازم تكون موجودة لان مرات رئيس الشركة الفرنسية هتكون موجودة
عادل: ماشى يا صاحبى
بالفعل رجع عز ع بيته وعرف رنا بالميعاد واخدت منه مبلغ كبير عشان تروح الكوافير وبالرغم انه مكنش مقتنع بس حب يعدى الامور ولما جه الميعاد راح ع الاوضة وخبط: رنا خلصتى لبس ولا لسه لازم ننزل دلوقتى
رنا: الله مش لسه نص ساعة؟!
عز: ايوة بس انا لازم اوصل بدرى قبلهم واكون ف استقبالهم
رنا: اوك خلاص انا بلبس الشوز بس تقدر تدخل
دخل عز واتصدم من لبسها ...عز بصدمة: ايه اللى انتى لابساه ده؟!
رنا وهى بتلف: ايه رأيك ف الفستان يجنن مش كده؟!
عز بعصبية: انتى فاكرة نفسك رايحة كباريه ده مطعم يا هانم وعشاء عمل ايه المنظر ده ..ده الفستان كاشف اكتر ما ساتر
رنا بغضب: هو ف ايه بجد انت دايما كده عاوز تعترض وخلاص انا عملت كل ده عشان اشرفك ادام ضيوفك
عز: وانا مش واخدك زينة يا هانم ولا بضاعة اعرضها ليهم
رنا: انت امتى هتبقى متحضر بقى وتبطل شغل الريف اللى انت جاى منه ده
عز: تمام حاضر ثانية واحدة
لاحظت رنا انه عمال يدور بالادراج والدولاب ع حاجة فسألته باستغراب: انت بتدور ع ايه؟!
عز بغضب: بدور ع الق*رون اللى كنت شايلها هنا ووو.....يتبع
#عندما_تجد_الامان الرابع
#بقلم_نشوه_عادل
