%20(1).jpeg)
رواية انا وابن خالتي الفصل الثامن 8 الجزء الخامس بقلم عمرو راشد
صعبانة عليا اوي شهيرة،، هتقضي ليلة صعبة
= هارون هينجح وهيرجع ان شاء الله
ياريت يا مروان
= كل دا هينتهي وهنرجع بيتنا ونعيش مع ابننا ونكمل حياتنا طبيعي
احنا عمرنا ما هنعرف نكمل حياتنا بشكل طبيعي
= ليه بتقولي كدا خليكي متفائلة
بحاول بس اللي باين غير مُبشر
= انا جنبك متخافيش
" باب الأوضة خبط،، قومت فتحت لقيته شاهر
في ايه يا شاهر؟
= تعالى عايز اقولك على حاجة
" استأذنت من هند وخرجت برا
في ايه؟
= كنت عايز اعتذرلك عن اللي هارون قاله،، وبقولك يا مروان انا المسؤول عن رجوعك انت ومراتك ل بيتكم مرة تانية
انت معملتش حاجة يا شاهر وعارف انك بتعمل اللي عليك،، ومتقلقش انا مش زعلان
= انا بس حبيت اقولك كدا
واحنا اللي بينا اكبر من كدا
" ابتسم في وشي و بعدها مشي،، خدت نفس عميق و فتحت باب الأوضة مرة تانية عشان الاقي... لا لا انا مش بحلم،، انا شايف قدامي هند قاعدة معايا،، انا واقف برا على باب الأوضة وشايف هند قاعدة معايا،، كأني في حلم وبتفرج على نفسي،، دقات قلبي كنت قادر أسمعها،، بعدها مروان اللي كان قاعد قدامي بص ليا و ابتسم،، دقايق وانا واقف وثابت في مكاني مش قادر اتحرك لحد ما لقيت حد بيخبط على كتفي،، بصيت ورايا لقيتها.. هند
مالك واقف كدا ليه يا مروان؟،، يلا ندخل
" ضربات قلبي كنت قادر أسمعها في الوقت دا من الرعب اللي كنت فيه،، رجعت بصيت بسرعة جوا الأوضة ولكن مكنش فيها حد
مالك يا مروان في ايه؟
= انتي كنتي فين دلوقتي؟
كنت في الحمام،، إحنا قبل ما ندخل الأوضة قولتلك هروح الحمام وانت ادخل عقبال ما اجيلك
= يعني أنتي مكنتيش جوا دلوقتي؟
جوا ازاي يعني يا مروان؟،، انت شوفت حاجة؟
" سكت ومردتش عليها و دخلت بعدها الأوضة بس معرفتش انام،، طول الليل كنت صاحي بفكر في اللي شوفته وان هما قادرين بكل بساطة انهم يلعبو بعقلك زي ما حصل معايا،، يعني انا كنت قاعد مع هند في الأوضة وبنتكلم وهي اساسا مش هند و الله اعلم هي ايه؟ فضلت صاحي لحد ما الساعة بقت 5 الفجر وهنا كانت عنيا بدأت تقفل و نمت
" كنا قاعدين انا وشاهر جنب الجرس،، شاهر كان نايم وأنا اللي كنت صاحي ومركز تحسباً لو الجرس رن لكن انا كنت كنت قاعد جنب الشباك اللي بيطُل على المدينة من برا وساعتها لمحت نفس البنت اللي شوفتها قبل كدا في اوضتي،، كانت واقفة ومبتسمة ليا،، قومت بهدوء من جنب شاهر و فتحت الشباك
لسة برضو مش عايز تيجي؟
= انا معرفكيش عشان اجيلك
بس انا اعرفك يا عبدالله،، انا اعرفك كويس جدا
= وانا اضمن منين انك مش هتأذ*يني؟
انا مش محتاجة منك غير انك تسمحلي بالدخول،، الناس هنا في القصر عاملين تعويذة بحيث مقدرش ادخل جوا القصر الا لما حد يسمحلي ادخل،، ممكن تسمحلي ادخل؟
" معرفش جيبت الجرأه دي منين وقولتلها
انا شوفت السلسلة اللي في رقبتك وهي دي اللي كانت في أوضة المومياء،، يعني أنتي مستحيل تكوني بني آدمة
" ساعتها ابتسامتها بقت مرعبة وقالتلي بصوت اجش
متبقي ليلة واحدة فقط و عِندها ستكون نهاية الجميع ومنهم انت يا عبدالله
" في نفس اللحظة لقيت حد بيخبط على كتفي،، اتفزعت وبصيت ورايا لقيته شاهر
انت واقف بتعمل ايه كدا؟
" بصيت قدامي مرة تانية ولكن ملقتهاش،، رجعت قعدت مكاني وهو جه ورايا
رد عليا انت كنت واقف عندك بتعمل ايه؟
= مفيش انا كنت مخنوق وقولت افتح الشباك اشم شوية هوا
عبدالله هو انت مخبي حاجة؟
= حاجة زي ايه؟
انت اللي هتقولي دلوقتي
= لا مش مخبي،، هخبي ايه يعني؟
متأكد؟
= في ايه يا شاهر؟
انا عن نفسي مفيش حاجة،، انت بقا في حاجة؟
= انا كمان مفيش حاجة
" نظرته ليا تبين انه شاكك فيا ولكن هو سكت والموضوع عدى
مفيش اي حاجة حصلت وانا نايم؟
= اه في حد سأل عليك من شوية؟
مين دا
= مين ايه يا شاهر؟،، مين اللي هيسأل عليك هنا يعني؟
اه انت بتتريق يعني؟
= بالظبط لأنك تستحق
عيشت لليوم اللي تقولي فيه كدا ومن غير ما تخاف
= بقولك ايه؟ مش ناوي ترجع شاهر بتاع زمان؟
هو انا فيا حاجة وحشة دلوقتي؟
= طب انت مش شايف انك كنت زمان احلى بكتير؟
ماهو دا الجواز يا عبدالله،، مين اتجوز و كمل بنفس شخصيته؟،، الكل بعد الجواز بيُصاب بحالة من الانفطاء والملل،، الحالة دي سببها ايه معرفش
= طب وانت ايه اللي يجبرك على كدا؟
عشان الجواز شئ أساسي لازم نعمله،، الجواز ممكن يكون فيه سلبيات كتير ولكن فيه مميزات برضو،، الفكرة انك تفضل محافظ على نفسيتك عشان تقدر تكمل فيه
= وانت طبعا معرفتش تحافظ؟
انا ملحقتش مش معرفتش،، انا فجأه لقيت نفسي وسط عالم البشر ومش عارف اتعامل معاهم ومش عارف اعيش وسطهم،، عالم غريب عني ومعرفش فيه حد غيركم،، فجأه شهيرة ظهرت وقررت أنها تضحي وتقعد معايا في عالم البشر،، قصاد التضحية دي انا معرفتش اعمل حاجة،، كأن ليك واحد صاحبك غني جدا و جابلك في عيد ميلادك هدية غالية أوي بس انت مش معاك ترد ربع من تمن الهدية دي
= بس شهيرة بتحبك وهي اكيد مبتفكرش بنفس طريقتك دي
الانثى هي الانثى في كل العصور وفي أي عالم،، الانثى محتاجة اللي يحميها ويحافظ عليها ويضحي عشانها مش العكس
= وايه الحل؟ هتفضل عايش حياتك بالشكل دا؟
لحد ما أحاول ارجع العالم بتاعي وساعتها يمكن اكون كويس
= دا انا بالشكل دا محتاج اسجد ركعتين شكر اني متجوزتش ملك
انت سيبتها ليه؟
= ابوها كان عايز كفتة في البوفيه وانا صممت ان مفيش غير سندوتش جبنة رومي وواحد بسطرمة
الجوازة كلها اتفشكلت عشان الكفتة؟
= انت عارف الكفتة بكام دلوقتي؟
بكام؟
= لا انا بسألك عارف ولا لأ اصل انا مش عارف
يعني ممكن تكون في حدود مثلا
= اه يعني غالية اهو،، حدود مثلا دي شوف تعمل كام دلوقتي
يعني جوازة كاملة،، انت فاهم انا بقول ايه؟ جوازة كاملة اتفشكلت بسبب الكفتة
= بصراحة مش دا السبب الأساسي
المشكلة انه مينفعش يكون سبب خامس حتى،، دا مش سبب اساسا
= هتسكت وتسمع ولا بلاش احكي؟
لا طبعا اتفضل
= السبب الأساسي اني خوفت اكمل واتجوز و الاقي حياتي اتغيرت،، خايف معرفش اشوف نفسي تاني،، خايف حياتي تختفي وأبقى زيك
للدرجادي سُمعتي وحشة؟
= هو دا اللي أنا فكرت فيه ساعتها
بس انت متنقلتش تعيش في عالم تاني مش بتاعك،، انا بقيت كدا عشان ملقتش اي حاجة تناسبني في العالم دا
= مش شرط،، ناس كتير اتجوزت وحياتها اتغيرت 180 درجة
وانت ليه تفتكر ان التغيير دا هيكون للاسوأ؟،، مش يمكن يكون للاحسن؟
= وهو انا عمري فيه كام سنة عشان اقضي عمري في التجارب؟
لان ربنا بيرزق كل واحد باللي شبهه يا عبدالله وانت طالما كويس وناوي خير يبقا متقلقش من حاجة
= بصراحة مش عارف
بقولك ايه انا زهقت،، عايز تتجوز اتجوز و لو مش عايز خلاص براحتك،، اقفل بقا السيرة دي
= عندك سيرة تانية ولا دي كانت اخر واحدة؟
" لقيته خرج سلسلة من جيبه
دي ايه دي؟،، متقولش ان دي السلسلة اللي امك قالتلك خُدها قبل ما تمو*ت؟
= لا دي من ضمن الحاجات اللي شهيرة جابتها معاها من العالم بتاعنا
يعني امك قالت ل شهيرة توصلها ليك؟
= انت مالك ب امي يا جدع انت؟ امي ملهاش دعوة بالموضوع كله
طمنتني،، بتعمل ايه بقا السلسلة دي؟
" السلسلة كانت لونها موف وفيها كرة ارضية لونها ازرق زي لون السماء
الكورة الأرضية هي العالم كله يعني تقدر تشوف أي حد في اي مكان في أي عالم انت عايزه
= طب ما تاخدني جولة؟
" شاهر نفخ في الكورة الأرضية وهي بدأت تلف وتدور لحد ما وقفها ب صباعه بعدها بثواني وقالي
قرب
= اوعى تكون هتضر*ب
قرب يلا بسرعة
" قربت وبصيت كأنها زي السينما وبتعرضلك فيديو لاي شخص انت عايز تشوفه،، كنت شايف قدامي مجموعة ناس قاعدة في الصحراء وجنبهم جِمال و أحصنة،، شاهر قالي ساعتها
دا العصر القديم،، عصر سيدنا محمد عليه أفضل الصلاة و السلام
" عيني لمعت في الوقت دا و رديت عليه بسرعة
طب هو فين؟،، ينفع اشوفه؟
= للاسف لا،، اللي قدامك دول مجموعة من الصحابة في الزمن القديم
طب ثواني،، هو احنا ليه منجيبش هارون ونشوف هو فين دلوقتي؟
= افهم يا عبدالله،، السلسلة دي المدى بتاعها محدود ومش زي ما انت فاكر،، لو انا اخترقت المدى بتاعها السِحر اللي فيها هيتقلب عليا
ايه اللي ممكن اشوفه تاني فيها؟
= تعالى نجرب
" بدأ يعرض قدامي ظباط وعساكر وشكلهم مش مصريين،، كنت شايف دبابات و باين ان دي كانت حر*ب،، شاهر ابتسم وقالي ساعتها
دي الحرب العالمية الأولى
" كمل لف في الكورة الأرضية لحد ما ظهر قدامي راجل واقف بيتكلم مع حد لكن شاهر قال
لا لا مش وقته خالص دا
= ليه هو مين دا؟
دا صاحب مفتاح الشقة يا عم ولو سيبناه هيقعد يقول انا صاحب مفتاح الشقة وأنا اللي معايا الجنة وكلام كله إلحاد
= لا اعوذ بالله مش ناقصة،، دا من انهي زمن دا؟
مش عارف بس ممكن تسأل عمرو
= عمرو مين؟
عمرو يابني ازاي مش عارفه؟
= انا من رأيي نخلينا في اللي احنا فيه يا شاهر
انا هقفلها خالص عشان ترتاح
" شاهر دخل السلسلة جيبه مرة تانية وكملنا الليلة واحنا قاعدين جنب الجرس،، كان هو ينام شوية وأنا اللي اكون صاحي والعكس لحد ما الشمس ظهرت،، كانت عيني بتقفل ولكن مش هينفع انام و ساعتها لقيت الوزير داخل علينا وقال
مفيش اي اخبار عن هارون؟
= لسة والله بس ان شاء الله يرجع قريب
هارون لازم يرجع قبل ما الشمس تغيب،، النهاردة الليلة الثالثة و دا معناه ان اللعنة هيبدأ ظهورها النهاردة
= ولو هارون مرجعش؟
هيكون مصيرنا الهلاك يا عبدالله
" شاهر قام وقف و اتكلم مع الوزير
طب مينفعش حد فينا ينزل ل هارون تحت؟
= وحتى لو مسموح انك تنزل؟،، افرض هو رجع وانت لا؟،، ايه العمل؟
مش مهم،، المهم ان هارون يرجع بسرعة
= دا قرار مش سهل يا شاهر،، إحنا هننتظر لان هو دا المتاح حاليا
" الوزير مشي و لقينا اللي دخل بعده نفس الغراب اللي شوفناه قبل كدا،، جه ونزل قدامنا على الارض واتحول ل بني آدم وقال
انا ممكن اساعدكم؟
" شاهر رد
صهيب صح؟
= صح
هتساعدنا ازاي؟
= انا اقدر انزل تحت الأرض
وبعدين؟
= هبحث عن هارون
مستحيل هارون يثق فيك و لو شك ب 1% حتى هينهي حياتك
= انا مُتقبل دا وعندي استعداد ان حياتي تنتهي مقابل ان مدينة النحاس تعيش
" في نفس اللحظة لقينا صابرينا دخلت علينا و ردت على صهيب
السلطان نور الدين عنده عِلم بكلامك دا؟
= انا بضحي من أجل المدينة،، من أجل حياه كل الناس ولو السلطان عنده عِلم معتقدش انه هيرفض
تضحيتك ليس لها أي معنى،، مجرد ما اللعنة هتبدأ مش هيكون فيه اي مفر لاي شخص منا،، المو*ت قادم لا محالة
" شاهر رد عليها
ما تهدي يا قمر شوية وخليكي متفائلة،، احنا شوفنا حاجات اصعب من كدا بكتير و لسة عايشين قدامك أهو
= الليلة هي اصعب ليلة ممكن تُمر عليك في حياتك
طب حيث كدا ايه رأيك في الوقت القليل دا نتعرف شوية؟
" ساعتها لقينا شهيرة دخلت وقربت من شاهر ووقفت جنبه وقالت
طب ما تيجي تتعرف عليا انا يا حبيبي
= انتي مش شايفة شكلك؟،، يا شهيرة أنتي في جسم هارون،، الموضوع صعب مش قادر اقبله
بس هارون هيرجع وهستعيد جسمي تاني وساعتها هتندم يا شاهر
= امممم يا شوشو دا بهزر
طب انا داخلة الأوضة،، قدامك دقيقة وتكون ورايا
" شاهر بص في الأرض وقال بصوت واطي
يا بجاحتك،، يا بجاحتك
" لكن شهيرة ردت بصوت عالي
انت سمعتني؟
= سمعت طبعا وجاي حالا
مستنياك يا شاهر،، عقبال ما تيجي هكون لبست الطقم اللي انت بتحبه
" شاهر بص في الأرض مرة تانية وقال
يا بجاحتك،، يا بجاحتك
" شهيرة ردت عليه
متتأخرش بقا
= حالا وهتلاقيني جاي
" شهيرة خرجت وانا قولتله ساعتها
هي مجنونة ولا ايه؟،، هي ناسية انها في جسم حد تاني؟
= انا مش عارف اتصرف ازاي في الموقف دا
اطفي النور وانت مش هتشوف حاجة،، زمان قرأت مقولة بتقول " إن لم ت تسطتع مقاومة الاغتصا*ب ف استمتع به "
= انت كدا بتطمني صح؟
مش عايز اكدب عليك وتدخل جوا تتصدم
" في الوقت دا كنا سامعين وهي بتنادي وبتقول
شاهر انا بقيت جاهزة،، يلا تعالى
= يا بجاحتك،، يا بجاحتك
" شاهر مشي و دخل الأوضة وأنا عارف انه هيعاني كتير أوي دلوقتي،، كنت نسيت ان صهيب وصابرينا لسة واقفين معانا،، صهيب قرب مني واتكلم
ارجوك وافق اني انزل
= انا لو وافقت هكون بعرض حياتك للخطر وأنا مش هقدر اعمل دا
صدقني لو اللعنة بدأت هنمو*ت كلنا
= أنا السبب في ظهور اللعنة دي من البداية بس انا مش هكون السبب انك تخسر حياتك بسببي،، انا مش موافق ولو حاولت تنزل انا هبلغ السلطان
" وشه كان غضبان جدا وفي ثانية اتحول مرة تانية للغراب وطار وخرج من القصر،، وساعتها صابرينا قالتلي
كلامك صحيح لكن الخوف من انه يُمر عليك الوقت وتندم ان كان معاك حل زي صهيب و رفضت تستخدمه
= هبقا خايف فعلا بس هكون مطمن ان مفيش أي ذنب عليا من اني اكون سبب في مو*ت شخص
رد لطيف ولكن محتاج تعيد النظر فيه،، بعد إذنك
" صابرينا مشيت وانا فضلت قاعد لوحدي لحد ما عدا ساعة كمان ولقيت مروان وهند داخلين عليا،، ومروان اتكلم وقال
لسة؟
= مفيش اي حاجة ظهرت لحد دلوقتي
" هند قالت
انا خايفة يكون دخل في معركة مع حد
= دا وارد فعلا
طب وايه الحل؟
= مفيش اي حل غير اننا ننتظر ونشوف هيحصل ايه
" فضلنا قاعدين احنا التلاتة والوقت بدأ يعدي،، الشمس كأنها كانت بتجري و عايزة تغيب بأسرع طريقة وفعلا خيوط الليل بدأت تظهر و ساعتها لقينا الوزير دايم دخل علينا وهو بيزعق
اتحركو بسرعة من اماكنكم
" قومت بسرعة و رديت عليه
في ايه؟
= الليل بدأ يظهر،، وجودكم هنا خطر
وهنروح فين؟
= الوقت مش كافي للمناقشة يا عبدالله
" هند ردت
طب وهارون؟
= احنا فقدنا اي اتصال بيه،، معنديش معلومة اذا كان لسة عايش ولا لا
" مروان رد عليه
انا مش هتحرك من هنا غير لما هارون يرجع
= حياه هارون أعلى من حياتك وحياه زوجتك؟
هارون واحد مننا ومش هنسيبه
= للاسف مفيش وقت اتناقش معاك فيه،، اختار حالا سواء كنت هتنتظر هارون او..
" هند بصت ل مروان وقالتله
لازم نمشي يا مروان،، لازم نمشي عشان خاطر ابننا
" كأن دي كانت الوسيلة اللي هند ضغطت بيها على مروان عشان يتحرك وكلنا نمشي من الأوضة اللي كنا فيها،، كنا بنجري لان في الوقت دا كل حاجة في القصر بدأت تتكسر،، حتى الحيطان كانت بتقع،، لحد ما الوزير فتح باب حديد كان موجود في اخر القصر وهنا شوفنا سلم طويل جدا،، بدأنا ننزل السلم واللي كان باين انه ممتد ل تحت الأرض،، كملنا نزول لحد ما وصلنا تحت ولقينا شاهر وشهيرة و لورين وصابرينا،، وقفنا جنبهم وبدأنا نسمع من فوق أصوات مرعبة،، أصوات صرخات عالية جدا،، مروان ساعتها اتكلم وقال
هما مش ممكن يوصلو هنا؟
" الوزير رد عليه
الباب عليه طلسم يمنعهم يدخلو
" كل واحد فينا كان باين على وشه الرعب بما فيهم هند اللي بدأت تعيط وتنهار وكانت بتكرر جملة واحدة بس
" احنا هنمو*ت هنا "
" كنت بحاول اكون متماسك بأقصى درجة بس مكنتش قادر استحمل احساسي بالذنب من اني السبب في كل دا،، لو حصل اي حاجة ليهم هكون أنا السبب فيها،، السكوت كان سائد بينا لحد ما عدى وقت طويل جدا واصوات الصرخات والتكسير لسة مستمرة ولكن فجأه كل حاجة وقفت،، كلنا بصينا لبعض و ساعتها الوزير قال
دي خدعة،، إياكم حد يفكر يفتح الباب
" وفي الوقت دا بدأنا نسمع صوت خبط على الباب،، الخبط كان مستمر لحد ما لقينا الوزير لبس عُقد طويل وقال
العُقد دا عليه نفس نفس الطلسم الموجود على الباب،، انتظروني هنا
" الوزير بدأ يطلع السلم لحد ما وصل وفتح الباب و ساعتها سمعناه بيقول
اتبعوني
" بصينا لبعض بإستغراب وكل واحد متردد انه يطلع لكن مروان اخد القرار اول واحد وطلع السلم ومن بعده انا وكان ورانا هند وصابرينا ولورين،، وصلنا فوق وكان الوزير دايم واقف منتظرنا وهو مبتسم،، مروان سأله وقال
في ايه؟
" في نفس اللحظة لقينا هارون ظهر وسطنا،، شاهر ساعتها جري وقرب منه وبدأ يحضنه
حمدالله على سلامتك يا هارون
" وهند قالتله
انت قلقتنا عليك،، انت كنت فين؟
" وحتى شهيرة قالت
قبل اي كلام احنا محتاجين دلوقتي نبدل اجسامنا وكل حاجة ترجع زي ما كانت
" وفي وسط كل دا الا انه كان مركز عليا انا ونظراته ليا انا وبس،، بعدها قرب مني وفي لحظة ضر*بني بالبوكس،، وقعت على الأرض ساعتها ومروان جري عليه وبدأ يتخانق معاه وقاله
انت اتجننت!!،، ايه اللي انت عملته دا؟
" ولكنه برضو قرب مني وقال
انت ليه مقولتش انك شوفتها؟
" بلعت ريقي بصعوبة ومردتش لكن هو صرخ فيا وقال
رد
" شاهر قاله
في ايه يا هارون ما تفهمنا؟
" هارون رد عليه وقال
عبدالله شاف ستفرونايت يا شاهر باشا،، شافها ومقالش لحد فينا
" شاهر ساعتها قالي
انت شوفتها بجد؟
" قومت وقفت و رديت عليه
انا كنت خايف احكي والله مش قصدي حاجة
" هارون كمل كلامه وقال
طيب ستيفرونايت تبقا بنت ملك الجان الأحمر و هو وعدني انه هيوقف اللعنة دي في مقابل حاجة واحدة بس
" مروان رد عليه وقاله
ايه هي الحاجة دي؟
= هند هتتجوز ملك الجان الأحمر مقابل اننا نخرج من هنا!!
#عمرو_راشد
#انا_وابن_خالتي 5 " كنز مدينة النحاس " 8
#يتبع