رواية لحظاتي الاخيرة (كاملة جميع الفصول) بقلم نشوه عادل
- ع جثتى مش هيحصل انى اسمى بنتى خلود وبعدين احنا متفقين من الاول ان انا هسمى البنوتة وانت الولد ي مالك
مالك بضحك: انت ليه محسسانى انى عاوز اسميها ع اسم الاكس بتاعتى ي بنتى ده انا من شدة حبى فيكى عاوز اسميها ع اسمك انتى
خلود: برضه لا انا الاصل وواحدة فقط مليش مثيل وبعدين انا فاهمة دماغك كويس
مالك: فاهمة ايه بقى ان شاء الله ؟!
خلود: انك عاوز تسميها ع اسمى عشان لما تهزق او تشتم واجى انكد عليك تقولى بقول لبنتى مش ليكى
مالك بضحك: مشكلتك انك بتفهمينى للاسف
خلود: طب وحياتك ما هيحصل ومش هسمى خلود ايه رأيك بقى وبعدين مش لما نبقى نتجوز الاول ي اخويا
مالك: طب افهم بس لا ليه ومتقوليلش عشان انا الاصل والكلام الاهبل ده!
خلود بتنهيدة حزن: عشان متاخدش حظى ومتشوفش وتعانى زيى عشان مش عايزة اشوفها حزينة وملمحش ف عيونها دموع القهر عرفت بقى مش عاوزة اسميها ع اسمى ليه!
مالك وهو بيمسك ايدها: مهما شوفتى بحياتك من صعب فتأكدى ان ربنا مخبى ليكى العوض الاحسن ف الدنيا والآخرة وبعدين انا واثق ان بنتى هتكون اكتر بنوتة محظوظة ف الدنيا عارفة ليه؟
خلود: ليه؟
مالك: عشان هيكون ليها اجمل واحن أم ف الدنيا
خلود بابتسامة: وهتشكرنى برضه عشان عرفت اختار ليها اعظم أب انت عوضى الحقيقى ف الدنيا ي مالك
مالك: طب ايه رأيك نضرب اثنين ايس كريم ف الجو النار ده بمناسبة الرومانسية دى
خلود: لا معليش اختلف انا عاوزة اضرب قصب لو سمحت
مالك: احبك انت ي عشوائى
قضوا يوم لطيف وبعدها روحها ع البيت اللى عايشة فيه مع اختها الكبيرة فريدة
فريدة: شكلك راجعة مبسوطة وده معناه انك اكيد اتصالحتى انتى ومالك
خلود بفرحة: ايوة هو عدى عليا بعد الشغل وخرجنى وكان يوم لطيف
فريدة: طب الحمدلله بس اظن ان احنا اتفقنا ان مفيش خروج ف فترة الخطوبة ولا ايه!
خلود: معليش مرة مش هتضر ف حاجة
فريدة: ماشى بس متتكررش
خلود: حاضر ي قلبى مش هتكرر تانى
تانى يوم الصبح فاقت خلود وقامت راحت ع شغلها ف المصنع كالعادة وهناك تعبت وبدأت انفها تنزف دم وكانت ليها صديقة مقربة معاها بالشغل واسمها سمر
سمر: وبعدين بقى ي بنتى لازم تروحى تكشفى الموضوع ده بيتكرر معاكى كتير
خلود: انتى مكبرة الموضوع اوى ع فكرة ده اكيد من الحر بس
سمر: خلود متستعبطيش طب ما انا ضغطى بيوطى باستمرار ومع ذلك مبيحصليش كده لا اسمعى بعد الشغل هنروح نكشف
خلود: ي بنتى ............
سمر مقاطعة: مش هسمع اى مبرر بعد الشغل هنروح نكشف مات الكلام
خلود بضحك: ماشى ي شبح عشان ترتاحى بس
بعد الشغل نزلت خلود مع سمر بعد ما كلمت فريدة ومالك وعرفتهم انها رايحة تكشف مع صاحبتها ولان السكرتيرة ف العيادة كانت قريبة سمر دخلتهم ع طول
الدكتور: اهلا وسهلا خير ايه اللى بيحصل؟!
خلود: دكتور انا دايما انفى بينزف وببقى نايمة واصحى ع كده واوقات بحس بضغط ف دماغى صعب ودوخة مع عدم اتزان
الدكتور: اتفضلى ع السرير كده
بعد الكشف كانت ملامح الدكتور متغيرة ...الدكتور: بصى ده علاج هتاخديه مؤقتاً بس التحاليل والاشعة دى انا محتاجهم ضرورى جدا واول ما يطلعوا تجيبهم ع طول اشوفهم
خلود: ان شاء الله
نزلوا الاثنين ......سمر: فيه معمل كويس قريب من هنا تعالى اعملى التحاليل فيه
خلود: معمل مين ي حاجة انا مش هعمل حاجة من دى ده شكله دكتور ع الله حكايته
سمر: ع الله حكايته ده اكبر دكتور مخ واعصاب اعملى عنه سيرش وانتى تعرفى
خلود: بصى اطلعى من دماغى بقى انتى اجبرتينى اكشف خلاص وهجيب العلاج
سمر: لا بصى انتى بقى لو مجتيش معايا دلوقتى نعمل التحاليل والاشعة انا هكلم فريدة ومالك هما يتصرفوا معاكى
خلود بسرعة: يلا بينا ع المعمل اين هو انا لا اراه
ضحكت سمر عليها وراحوا عملوا التحاليل والاشعة
سمر: حظك حلو والدنيا سهلة ايه رأيك نرجع نوريهم للدكتور!
خلود: لا بكرة بقى لان فريدة زمانها مستنيانى وع آخرها عشان اتأخرت
سمر: ماشى ي سيتى اتفضلى ادامى
خلود: طيب خليهم معاكى عشان انا مفهماهم انك انتى اللى بتكشفى
سمر: طب ليه ي بنتى؟!
خلود: عشان ميقلقوش ع الفاضى ما انتى عارفة انهم بيكبروا الامور
سمر: ي عبيطة بقى حد يلاقى الدلع وميدلعش يلا عشان اركبك باص واروح انا كمان
عدى اليوم وتانى يوم راحت خلود ع المصنع مع سمر اللى جابت معاها التحاليل والاشعة وبعد الشغل راحوا للدكتور اللى اول ما شاف الاشعة ملامحه اتغيرت تماماً
سمر: خير ي دكتور ف ايه؟!
الدكتور بحزن: للاسف شكى طلع ف محله وطلع ورم ف المخ والحالة متأخرة
خلود بصدمة: ورم ف المخ؟! ايه الكلام ده مستحيل انا معنديش حاجة اكيد الاشعة فيها حاجة غلط يا اما حضرتك شخصت الحالة غلط
الدكتور : ي بنتى والله دى الحقيقة ودى حالتك ولو مش مصدقة اسألى اى دكتور تانى
سمر بدموع: طب ..طب والحل ايه ي دكتور؟!
الدكتور: والله ي بنتى الحالة متأخرة جدا وصعب اى عمليات لان نسبة نجاحها تكاد تكون منعدمة بس ممكن يكون فيه امل لو سافرت برة مصر
نزلت سمر وخلود من عند الدكتور ...خلود: اسمعى ي سمر الكلام اللى سمعتيه فوق ده ميتقالش لحد نهائى
سمر: ايه الكلام الفارغ ده لا طبعا لازم اختك وخطيبك يعرفوا
خلود: انا اكيد هعرفهم بس مش دلوقتى سبينى انا اجيبها ليهم بطريقتى واوعدينى دلوقتى ان محدش هيعرف
ترددت سمر ولكن بالاخير استسلمت ووافقت وفى نفس الوقت رن فون خلود وكان مالك
خلود: انت فين؟!
مالك: لسه مخلص شغل اهو ليه؟!
خلود: لازم نتقابل فيه موضوع ضرورى مينفعش يتأجل
مالك بقلق: ف ايه ي بنتى طيب فهمينى؟!
خلود: الكلام مش هينفع ع الفون هسبقك انا ع الكافيه بتاعنا يلا سلام
ودعت خلود سمر وراحت ع الكافيه وبمجرد ما وصلت لقت مالك وصل وباين عليه القلق
مالك: ف ايه ي بنتى مالك؟!
خلود بجمود: بصراحة ي مالك انا مش حابة اكمل الخطوبة دى ووووو....يتبع
#اسكريبت_لحظاتى_الاخيرة الاول
#بقلم_نشوه_عادل