%20(1).jpeg)
رواية انا وابن خالتي الفصل الاول 1 الجزء الخامس بقلم عمرو راشد
ممكن بقا تقولي هنخرج من هنا ازاي؟ اتصرف يا مروان لو سمحت
= انا مش عارف احنا فين اساسا،، معتقدش ان في حد هيسمعنا احنا في مكان مهجور
يعني احنا اتحبسنا خلاص؟
" في اللحظة دي بدأت أصرخ بشكل هستيري.. لكن قبل دا كله اكيد عايزين تعرفو ايه اللي حصل،، نبدأ نتعرف الاول ولا حد لسة فاكرنا؟،، انا هند و دا ابن خالتي عبدالله
تعالى يا عبدالله عشان تطلع معايا
" عبدالله قرب وقعد جنبي وبقينا احنا الاتنين قدام الكاميرا
حكايتي انا وابن خالتي بدأت من فترة كبيرة اوي ومرت بأحداث صعبة ومحدش كان يتخيلها وعشان كدا انا حبيت اوثقها عشان نفتكرها دايما ولكن انا مكنتش لوحدي،، كان معايا حبيبي وجوزي و حب عمري كله،، مروان
" ظهر من ورايا وهو حاطط ايده على كتفي و با*س ايدي وابتسم للكاميرا
مروان بقا كان اكتر واحد مظلوم بينا بس هو أكتر واحد كان خايف عليا،، شوية كدا وهبدأ احكي باقي التفاصيل
" قفلت الكاميرا و رجعت قعدت مكاني
على فكرة بقا كان لازم هارون وشاهر يبقو معانا
" عبدالله رد عليا وقال
انتي عارفة ان هارون في بيته مبيخرجش غير للضرورة وشاهر خلاص استقر مع الست شهيرة بتاعته
= انا لحد دلوقتي مش فاهم هو اتجوزها ازاي دي؟
" عبدالله ضحك وكمل كلامه
حب الطفولة
= هو الجن عندهم حب الطفولة زي عندنا كدا
عندهم كل حاجة الا حاجة واحدة بس
= ايه هي؟
النور مستحيل يقطع عندهم
= طب احنا عايزين نروح نزوره
" لفيت وشي وكلمت مروان
ايه رأيك يا مروان؟
= هنزوره ليه يعني يا هند؟ ما نسيبه في حاله
دول صحابنا يا مروان ازاي بقا،، ملكش حق تقول كدا
" عبدالله أكد على كلامي
ايوا ملكش حق تقول كدا
= خلاص يا جماعة نروح نزوره عادي،، قررو عايزين تروحو امتى؟
" رديت عليه انا وقولتله
طب ايه رأيك لو دلوقتي؟
= دلوقتي!!،، أنتي اتجننتي يا هند؟
وفيها ايه يا مروان،، احنا لسة بدري على فكرة،، ايه رأيك نكلم هارون ونتفق ونتقابل هناك؟
" عبدالله اتكلم وقال
انا عن نفسي موافق و هكلم هارون دلوقتي حالا واتفق معاه
" مروان ابتسم لانه عرف اننا خلاص حسمنا قرارنا وفعلا دا اللي حصل،، عبدالله اتصل ب هارون واتفقنا اننا هنتقابل عند شاهر،، قومنا كلنا نلبس وجهزنا نفسنا و روحنا هناك
طب مش كنا دخلنا عليهم بأي حاجة بدل ما احنا رايحين فاضيين كدا؟
" الجملة خرجت من مروان وانا رديت عليه
ما انت عارف شهيرة بتزعل لما بنجيب اي حاجة
= بس برضو يا هند دا من الذوق يعني
" عبدالله تدخل في الموضوع وقال
انا شايف نرن الجرس وندخل نكمل كلامنا جوا عشان لو حد من الجيران شافنا كدا هيفكرنا حرامية
" عبدالله فعلا رن الجرس وبعد ثواني بالظبط شاهر فتح الباب
لا لا لا
" عبدالله بص لينا وقال
ايه الاوفر دا؟
انا بجد مش مصدق ايه المفاجأة الحلوة دي؟
" مروان رد عليه وقاله
معلش يا شاهر احنا جايين من غير معاد ولا ترتيب كدا بس انت وحشتنا قولنا نيجي نسلم عليك
= يا جدع عيب الكلام اللي بتقوله دا،، دا المنطقة كلها نورت،، قولي بس تشرب ايه؟
" دخلت انا كمان بينهم وقولتله
والله يا شاهر مفتقدينك جدا بس خلاص بقا يا سيدي العروسة اخدتك مننا
= متقوليش كدا يا هند عيب احنا مع بعض دايما،، قوليلي بس تشربي ايه؟
" عبدالله رد عليه
عارف يا شاهر بقالي كتير حاسس بفراغ كدا من ساعة ما انت اتجوزت لدرجة اني بفكر اجيلك واقعد معاك هنا
= تنور بيت اخوك يا حبيبي،، قولي بس تشرب ايه؟
هو ايه اللي تشربو ايه دا؟،، هو احنا هنشرب على السلم؟
= لا طبعا اتفضلو جوا
مالك يا شاهر؟،، هو في حاجة جوا ولا ايه؟
= لا أبدا دا شهيرة هتفرح أوي،، اتفضلو
" دخلنا واحنا مستغربين من رد فعله،، قعدنا على الكنبة لحد ما شهيرة تخرج،، مروان ساعتها اتكلم وقال
شاهر عمره ما هيعقل أبدا
" رديت عليه
مالو بس يا مروان ماهو كويس اهو
= هو كدا كويس بالنسبالك؟
" عبدالله هو اللي رد المرادي
يا مروان الواحد مننا لازم يكون رايق عشان يستحمل قرف الجواز دا لأنه لو مكنش رايق هيقت*ل مراته يوم الصباحية
= عندك حق والله
" بصيت ل مروان وقولتله
والله؟؟،، قصدك ايه يعني؟ انت مش مبسوط معايا؟
= تخيلي اني مبسوط،، تخيلي كدا
طب تمام حسابنا لما نروح
" مروان بص ل عبدالله وقاله
ما تشوف بنت خالتك يا عم
= هند طالما حاجبها اترفع كدا يبقا تاخدلك ساتر احسن
" فجأه لقينا شاهر داخل علينا وقال
يا ساتر في ايه يا جماعة،، انتو جايين تتخانقو عندي في بيتي وشهيرة جوا
" عبدالله رد عليه
وفيها ايه يعني لما تكون شهيرة جوا؟
= انت مش عارف شهيرة ممكن تعمل ايه؟
هتعمل ايه يعني؟
" لقينا شهيرة ظهرت وسطنا وهي قاعدة على الكنبة وقالت
ولا حاجة دا انتو ضيوف والضيوف بنكرمهم اخر كرم
" ابتسمت وقومت سلمت عليها وبو*ستها
وحشتيني اوي يا شوشو
= وأنتي كمان يا هند،، طمنيني عليكي يا حبيبتي
" عبدالله قطع الكلام واتكلم هو وقال
جماعة انا حاسس اننا جينا في وقت مش مناسب،، انتو متخانقين ولا ايه؟
" شهيرة ردت وقالت
اسأل صاحبك
" شاهر رد عليها
اتكلمي كويس يا شهيرة، اتكلمي كويس عشان انا مش نايم كويس ولما بكون مش نايم كويس بتعصب وبعمل حاجات غريبة
= يا عم اهدى هي قالت اسأل صاحبك،، الست مقالتش حاجة غلط
صوتها بيقول انها غلطت
= طب فهموني بس ايه المشكلة واحنا هنحلها
انا مش هتكلم،، خليها هي تتكلم
" عبدالله بص ل شهيرة وقالها
خلاص قولي انتي يا شهيرة
= اسأل صاحبك
" شاهر رد عليها
ردي كويس يا شهيرة عشان انا لسة صاحي من النوم ولما بكون صاحي من النوم مش ببقى واعي انا بقول ايه
" عبدالله اتكلم وقال
يا جماعة اي حد فيكم يحكي المهم نخلص
" شاهر رد عليه
يرضيك يا عبدالله اقولها ملقوش في الورد عيب تقولي احمر الخدين
= لا لا مينفعش كدا يا جماعة اللي انتو بتتكلمو فيه دا اعراض
اعراض!!
= طبعا أعراض،، طالما وصلنا للنقطة دي مينفعش نكمل كلام بعدها
" شهيرة مسكت كتف عبدالله عشان يلتفت ليها ولما التفت قالتله
ماهو انا اللي غلطانة اني سيبت عالم الجن وجيت عشان اعيش مع بني آدم زي دا
" شاهر رد عليها
دلوقتي بقيت بني آدم يا شهيرة،، لا فووقي انا مش بني آدم،، انا شاهر شهير الشنهوري الشهير ب شاهر شهير الشنهوري
= كان زمان يا شاهر،، كان زمان يا حبيبي،، دلوقتي انت بقيت بني آدم زيك زي اي حد طبيعي
طب بقولك ايه بقا اقفلي الموضوع دا وقومي اعمليلهم حاجة يشربوها
= مش قايمة
هتقومي يا شهيرة وغصب عنك
= وريني هتخليها غصب عني ازاي يا شاهر
" اتكلمت انا ساعتها عشان أحاول احتوي الموقف وقولت
معلش يا شهيرة قومي دلوقتي لحد ما يهدى بس
= تمام انا هقوم عشان خاطرك أنتي بس يا هند،، عشان هند بس سامعني
" شاهر طبعا مكنش ينفع يسكت وقال ساعتها
قومي يارب مصيبة تيجي وتشيلك
= تشيلك انت يا بعيد
تشيلك أنتي واهلك يا جن البلاعات انتو،، بقا انا اتجوز واحدة من جن البلاعات؟
= وانت كنت تحلم تتجوزني؟،، انا اللي وافقت وقبلت اني اعيش معاك على الارض
" قومت وقفت و روحت مسكت شهيرة من ايدها
تعالي معايا يا شهيرة ندخل نعمل اي حاجة
= ماشي،، انا جاية معاكي عشانك انتي بس،، انا هروح مع هند سامعني
" شاهر اتكلم بعد ما مشيو وقال
هي ليه بتعاملني على اني اطرش؟
" مروان قام من مكانه وجه قعد جنب شاهر وقاله
هو ايه اللي حصل بينكم؟،، دا انتو لسة في اول الجواز،، لحقتو تعملو مشاكل مع بعض امتا؟
= انا حاسس اني اتسرعت يا مروان،، انا بفكر اطلقها
ليه بس؟،، هي غلطت في ايه؟
= انا اللي حياتي غلط يا مروان،، انا من ساعة ما بقيت بني آدم وانا مش عارف مالي،، انا مكنتش كدا
حياه البني آدم اكيد مختلفة عن الجن وانت اكيد هتتعود يا شاهر لكن متسيبش شهيرة كفاية أنها قاعدة معاك على الارض
= ماهو دا اللي مخليني مستحمل
انت مبتشوفش هارون خالص؟
= لا،، هارون بقا قافل على نفسه من ساعة اللي حصل،، هو كمان مش قادر يتقبل فكرة انه بقا بني آدم
هو البني آدم وحش أوي كدا ولا ايه؟
" طبطبت على كتف شاهر وقولتله
متقلقش بكرا هتتعود،، انت اصلك لسة جديد في العالم بتاعنا
= جديد ايه.. أنا بقالي سنة
وهي سنة دي مدة كبيرة؟
= اعتقد كدا
لا دا انت لسة في فترة التجربة،، لسة بدري عليك
" قطع كلامنا صوت هند وهي جاية من جوا وبتقول
انا كلمتها وهي هادية دلوقتي،، لما تيجي بقا محدش يكلمها خالص
" جات قعدت على الكنبة وبصت ل شاهر وقالتله
وانت يا شاهر حاول تهدى شوية،، هي بتحبك
وانا كمان بحبها والمصحف
" لقينا شهيرة جات وهي ماسكة صنية وقدمتها قدامنا وقعدت،، شاهر ساعتها ابتسم وقالها
تسلم ايدك يا ملكة جمال العالم السفلي
" المشكلة بقا ان شهيرة ابتسمت هي كمان،، والحمدلله الموقف عدى على خير وشاهر عزم علينا نشرب القهوة اللي كانت قدامنا،، كل واحد فينا مسك الفنجان بتاعه وشرب وبعدها ب ثانية كل واحد فينا بص للتاني وعلى وشه علامات القرف او الاستفهام من طعم القهوة،، شهيرة ساعتها اخدت بالها وسألت
هو في حاجة يا جماعة؟
" عبدالله رد عليها
واضح ان حضرتك نسيتي تحطي سكر
" شاهر رد عليه وهو باصص ل شهيرة ومبتسم
و دا اسمه كلام يا عبدالله؟،، السكر كله موجود اهو ولا ايه يا أسطورة مثلث برمودا؟
= يا عم القهوة مفيهاش سكر،، هو احنا رايحين عزا،، انتو بتعملو معانا كدا ليه؟
طب خلاص استنى
بعدها شاهر بص ل شهيرة و قالها بنفس الابتسامة
يا شوشوو ينفع يا قلبي تعمليلنا قهوة غيرها
= طبعا،، انت تسأل وأنا اجيب
امممم يا شوشووو
" شهيرة فعلا قامت عملت قهوة غيرها وجابتها ولما دوقنا المرادي كان الطعم لا يطاق لانها تقريبا حطت ملح بدل السكر،، المشكلة اني ملحقتش اتكلم لان عبدالله اتكلم قبلي
يا استاذ صابر الرباعي انت،، القهوة فيها ملح،، فين السكر
" شاهر بص ل شهيرة وابتسم
شوشووو
" عبدالله مسك شاهر وقاله
خلاص يا شاهر دي اكيد غلطة مش مقصودة
= استنى انت لو سمحت
" بعدها رجع يكمل كلامه مع شهيرة
ايه يا شووشوو مش عارفة تفرقي بينك وبين السكر؟
= عنيا يا قلبي اعملك قهوة غيرها
امممم يا شوشووو
" شهيرة قامت ودخلت تعمل واحدة غيرها وعبدالله قال ل شاهر ساعتها
انا شايف انك ناشف شوية،، محتاج تهدى يا شاهر،، العصبية مش حلوة عشانك
= هيححح اعمل ايه بقا يا عبدالله،، بكرا لما تتجوز هتعرف
اعرف ايه؟
= هتعرف لما تتجوز
ايوا انا عايز افهم هعرف ايه؟
= هتعرف
" لقينا شهيرة جات وجابت معاها صنية القهوة وقدمتها وبدأنا نشرب لكن مكملناش بسبب الطعم البشع بتاعها ولقينا شهيرة اعتذرت وقالت ساعتها
جماعة انا آسفة تقريبا انا حطيت كزبرة بدل السكر
" شاهر رد عليها وهو مبتسم برضو
امممم يا شوشووو لا احنا كدا بقا ننزل القهوة نشربها تحت احسن
" عبدالله اتعصب ساعتها وقام وقف وقال
لا وننزل القهوة ليه،، انا لو حد حط قدامي كوباية قهوة تاني انا هرميلك شهيرة والقهوة من الشباك،، ما كفاية بقا يا جماعة،، عيب كدا دا احنا ضيوف حتى
" شاهر قام وقف وقال ل عبدالله وهو ماسك فنجان القهوة وقاله
امسك بس كمل الفنجان واقعد ونتفاهم
" عبدالله ابتسم و اخد منه الفنجان و رماه على الأرض
انا مش عايز المح اي فنجان تاني في البيت دا
" جرس الباب رن ساعتها،، وشهيرة فتحت الباب عشان هارون يدخل ويقول
السلام عليكم ورحمه الله وبركاته
" عبدالله اتكلم وقال
اهو جه اللي هياخد حقنا
" هارون دخل وقعد،، شكله كان متغير،، دقنه طويلة،، ملامحه باهتة وكأن الحزن مسيطر عليه،، شاهر قعد جنبه ساعتها وقاله
يرضيك يا هارون عبدالله يرمي القهوة على السجادة،، قوله انا بدفع كام للدراي كلين عشان تغسلهم
= معلش يا شاهر،، خليها عليك المرادي
واخليها عليا ليه؟،، مين اللي هيحاسب الدراي كلين دلوقتي؟
= هحاسبهم انا يا شاهر،، خلاص بقا
" مروان اتكلم وسأل
مالك يا هارون؟
= انا تمام مفيش اي حاجة
شكلك مضايق و بعدين مبتظهرش خالص ولا بتكلم حد فينا
= بحاول اتأقلم على الوضع الجديد
واتأقلمت؟
= للاسف لا
الموضوع صعب انا عارف بس دا كان اختيارك من الاول
= انا بعترف انه كان اختيار غبي
" تدخلت انا بينهم وقولت
ليه بس يا هارون؟،، مالها حياتنا؟
= واقفة مفيش فيها جديد،، حياه منتهية من قبل ما تبدأ
مش احسن من الحروب والقلق اللي كنتو عايشين فيه؟
= وهو احنا كدا مبسوطين؟
بس هتتعود
= امتى،، أنا بقالي سنة ومش عارف
= اكيد هييجي يوم و هتتعود
عقبال ما ييجي اليوم دا اكون انا انتحرت
" عبدالله اتصدم وقال
انتحار ايه يا هارون؟،، الموضوع مش مستاهل،، فكر شوية وانت ممكن تلاقي ان دا كله تخطيط وحكمة من ربنا
" شاهر رد عليه
للاسف يا جماعة محدش فاهمنا،، احنا فقدنا قوتنا ومش قوتنا بس،، احنا فقدنا كل حاجة،، رجوعنا للارض تاني كان غلط،، احنا كان لازم نرجع العالم بتاعنا ونواجه مصيرنا مهما كان ايه هو
" مروان رد عليه
وانتو معملتوش كدا و رجعتو الارض و دا كان اختياركم يبقا المفروض ترضى بقا
" هارون رد وقال
العجز وقلة الحيلة على اللي كان يمتلك القوة شئ مش سهل أبدا حد يقبله بس مع ذلك انا راضي بس يارب اعرف اكمل وانا راضي،، بعد اذنكم انا ماشي
" هارون انسحب وقام مشي و من بعده احنا،، مبقاش ينفع نكمل قعدتنا خصوصا كمان ان شاهر كان باين عليه الزعل و سكت،، مشينا و رجعنا بيتنا واول ما قعدنا مروان فتح الكلام وقال
حالهم صعب
" رديت عليه
طبيعي لأنهم مش متعودين
= تفتكري فعلا ممكن يفكرو في الانتحار؟
معتقدش
" عبدالله دخل في الحوار وقال
الاكيد انهم دلوقتي هيدورو على حل يرجعو بيه عالمهم
" رديت عليه
ازاي؟
= ممكن شهيرة تساعدهم،، هي كدا كدا من العالم بتاعهم وممكن تتوسطلهم
لو كان ينفع كانو عملو دا من بدري
= اومال ايه الحل يعني؟
مفيهاش حل يا هند
" عبدالله دخل اوضته عشان ينام واحنا كمان دخلنا بعده انا ومروان،، كل واحد غير هدومه و بدأنا ننام وكنت فاكرة ان اليوم خلص على كدا،، لكن قلقت في نص الليل لما حسيت بسخونة شديدة جدا جنب وشي،، فتحت عيني وكانت الدنيا ضلمة ومش شايفة اي حاجة جنبي،، خبطت على كتف مروان عشان يصحى لكنه كان رافض وعايز يكمل نوم،، لمحت عند باب الأوضة عيون،، ايوا عيون لونها احمر وكانت كلها غضب و مركزة عليا انا بس،، في الوقت دا صرخت و ساعتها مروان صحي بسرعة وسألني
في ايه يا هند مالك؟
= في حد كان واقف عند الباب وباصص ناحيتي
حد مين يا حبيبتي مفيش حد في الأوضة
= يا مروان انا متأكدة
" بص ليا لثواني و بعدها قام و شغل النور وابتسم وقالي
مفيش حاجة اهو
" وفعلا مكنش في حاجة و بعدها هو طفى النور تاني وقالي
تحبي اشغله تاني عشان تتأكدي
" والمرادي لما النور اشتغل شوفت كائنات طويلة جدا،، عندهم اكتر من دراع،، وشهم محروق كانو محاوطين الأوضة كلها،، واحد منهم شاور ب ايده على مروان وفي ثانية مروان وقع على الأرض و وزحف ل ورا ناحيتي بسرعة،، ساعتها قعدت أصرخ وأقول بصوت عالي
اعوذ بالله من الشيطان الرجيم،، أعوذ بالله من الشيطان الرجيم،، اعوذ بالله من الشيطان الرجيم
" فجأه لقيتهم اختفو من الأوضة،، قومنا بسرعة انا مروان وخرجنا من الأوضة اللي بمجرد ما خرجنا منها الباب اتقفل ورانا بقوة شديدة جدا،، خرجنا وقفنا في الصالة و ساعتها لقينا عبدالله هو كمان خارج من اوضته بيجري علينا وسماه باين عليه الرعب وقال
رجعو يا هند،، رجعو
" مروان رد عليه وقاله
احنا لازم نسيب البيت حالا
" جرينا خطوتين ل قدام ولكن وقفنا تاني لما لقينا باب الشقة اختفى،، متستغربش،، باب الشقة فعلا اختفى وبقا مكانه حيطة وحتى الشبابيك كلها اختفت،، الشقة كلها عبارة عن حيطان مفيش أي منفذ للخروج منها،، مروان اتقدم خطوتين ساعتها وقال
الرحلة ابتدت!!
#عمرو_راشد
#انا_وابن_خالتي 5 " كنز مدينة النحاس "
#يتبع
