رواية عهد الضبع الفصل الثامن 8 بقلم نور محمد
#عهد_الضبع_الفصل_الثامن
وقال: واحد... اتنين... ثلاثه... اربـ....
جرى حازم من قدامه قبل مايخلص عد وضبع بص في اثره بضيق كبير ودخل الغرفه تاني لعهد وقفل الباب خلفه وفجأه وقف بصدمه كبيره لما لقى عهد وافقه عند بلاكونه الغرفه وعاوزه تنط منها
فجرى عليها ضبع برعب وقال:اقفي عندك يامجنونه انتي بتعملي ايه؟!
بصت عليه عهد بضيق وعند وقالت:انا هنط من هنا لو مفتحتش الباب صدقني
قرب منها ضبع بهدووء وهو عاوز يشدها بعيد عن حافه البلكونه وقال:حاضر هفتح الباب والله بس تعالي ياعهد البلكونه دي عاليه اوي وممكن تموتي لو نطتي منها
عهد شافته بيقرب فطلعت بسرعه علشان تنط وقالت:ابعد عني والله هنط بجد من هنا ومش مهم عندي انا مجنونه واعملها
تراجع ضبع بسرعه وخوف وقال:تمام تمام انا هبعد بس انزلي انا مش عاوز اخسرك والله ياعهد
عهد بصت في عنيه بتركيز وشافه لمعه الدموع فيها فتهندت ونزلت بهدووء وقالت:انا نزلت افتح الباب بقى بسرعه
ضبع بص عليها بخبث وفي دقيقه مسكها بقوه وقال:انتي فاكره نفسك شاطره ياحلوه عاوزه تموتي قبل مااخد اللي عاوزه منك الاول
بلعت عهد ريقها منه وقالت:انت كذاب كونت بتضحك عليا بس انا بكر
وقبل ماتكمل جملتها ضبع حط ايدها على شفايفها بسرعه وقال بغضب مكتوم:اوعي تنطقي الكلمه دي تاني على لسانك ياعهد انا بحظرك لو اتعصبت ممكن أزيكي بدون وعي وانا مش عاوز اعمل كده معاكي
زقته عهد بقوه بعيد عنها وقالت:انا مش هخاف منك ومن كلامك ده انا خلاص قررت اجوز حازم علشان هو احسن منك مليون مره
ضبع سمعها وقلبه وجعه اوي من كلامها وضم ايده بغضب رهيب وعهد تراجعت برعب من شكله قدامها بس فجأه لقت ضبع سابها وخرج من الغرفه ودفع الباب خلفه بغضب كبير
وعهد تنفست براحه كبيره بعد ماخرج وطلعت خلفه بسرعه لقت حازم وافق بعيد متخبي من ضبع فنادت عليه بصوت واطي وقالت: بس بس ياحازم انا هنا تعال عاوزك بسرعه
قرب منها حازم بقلق بعد متأكد ان ضبع خرج من القصر كله وقال: انتي كويسه ياعهد ضبع عملك حاجه جوه
هزت عهد رأسها بسرعه وقالت: لا متقلقش مقربش مني ابدا بس انا عصبته شويه والحمد لله انه خرج وسابني في حالي
زفر حازم براحه وقالت: طيب الحمد لله انك بخير ياعهد بس انا عاوز اعرف انتي قولتي كده ليه قدام ماما وضبع؟!
وبص عليها بخوف وكمل: ده لولا اني اخوه كان قتلني انتي متعرفيش طبع ضبع صعب ازاي ووقت غضبه بيقلب وحش فعلا ومش بيرحم حد
ابتسمت عهد بالامبالاه وقالت: انا عملت كده علشان اساعدك انت وليلي ومش مهم هيحصل ايه فيا بعدين ياحازم لاني بجد شوفت حبك الكبير لها وكمان شوفت عذابها قد ايه لوحدها وانا مستعده اساعدكم بأي طريقه
ابتسم حازم بامتنان كبير وقال: انتي فعلا جميله اوي من جوه وبره كمان ياعهد شكرا اوي بجد
غمزه ليه عهد ببسمه وقالت:لا شكر على واجب ياحزومي انا بصراحه بعد ماسمعتك ارتحت اوي ليك علشان كده هساعدك تعال معايا ندخل نشوف حاله ليلى ايه الاول
تحمس حازم بشده وقال:بجد ياعهد انتي تقدري تفتحي الباب ده وادخل اطمن على ليلى دلوقتي
عهد بصت عليه بشفقه من فرحته الظاهره في عنيه وقالت:اكيد اقدر انا اصلا فتحته قبل كده تعال معايا بس ندخل نطمن عليها بسرعه قبل رجوع ضبع بيه
حازم فرح اوي وبقت ابتسامته كبيره وقال:حاضر ياله بينا
وفعلا عهد اخدته لغرفه ليلى وبعد دقايق فتحت الباب بنفس الطريقه السابقه ودخل حازم للغرفه وقلبه بيدق بعنف
وفجأه عنيه وقعت عليها بصدمه من شكلها الصعب قدامه وقال:ليلى حبيبتي انتي كويسه؟
رفعت ليلى عنيها ليه بدموع اول ماشفته نزلت بغزاره وقالت بترجي:حازم ابوس ايدك طلعني من هنا انا هموت لو فضلت هنا كتير
حازم سمعها وقلبه وجعه اوي عليها وضعف قدام دموعها وشكلها قدامه فجرى عليها بشفقه بس عهد وقفت قدامه بسرعه وقالت:انت عاوز تعمل ايه؟
ترجع حازم بعد مااخد باله وقال:احم انا اسف بس ضعفت قدامها والله انا بتعزب اكتر منها ياعهد وهي قدامي بالحاله دي
قربت عهد منه وطبطبت على كتفه بشفقه وقالت:اصبر وقريب بأذن الله كل حاجه هتبقى تمام اوعدك بس ياله نطلع دلوقتي قبل ماضبع بيه يرجع
حازم هز رأسه بتفهم وعنيه مصوبه على ليلى وقال بدموع:هرجعلك تاني اوعدك باليلى هخلصك من العذاب ده كله قريب اوي
ردت عليه بدموع وألم:وانا هستناك ياحازم بس متتأخرش عليا والنبي
وصل حازم لباب الغرفه وقال بحب:اوعدك ياليلى مش هسيبك ابدا
طلعت عهد وحازم معاها وقالت له:استحمل بس شويه وانا اوعدك هطلعها من هنا وكمان هخلي ضبع يطلقها وترجع ليك انت بس اصبر تمام
رد حازم ببسمه حزن:حاضر ياعهد وشكرا اوي على المساعده
وبعد منتصف الليل عهد كانت قاعده قلقانه على ضبع لانه اتأخر اوي وخايفه يحصله حاجه لانه طلعت متعصب اوي بسببها وفجأه لقت باب القصر اتفتح ودخل منه ضبع وهو مش في وعيه
فجرت عليه عهد بقلق وقالت: ضبع بيه انت كويس؟!!
بص عليها ضبع بسكر وركز مع ملامحها القلقانه عليه وقال ببسمه: انتي خايفه عليا ياعهد؟!
عهد حاولت تسنده لانه مش في وعيه ابدا وقالت: ايوه خايفه عليك انت ليه حالتك بقت كده؟!
ابتسم ضبع بسعاده من كلامها وقرب وجهه منها وقال: انا كويس بس فرحان اوي لانك قريبه كده مني
عهد اخدت بالها من كلامه فبعدت عنه بسرعه وقالت بصدمه: انت شارب حاجه وحشه مش كده ياضبع
صبغ بص عليها وحاول التماسك من حالته الغير متزنه وقال: انا شارب من كأس الحب ياعهد تعالي ساعديني اطلع غرفتني علشان مش قادر اطلع لوحدي معلش
عهد بصت عليه بشك وقالت: لا انا هنادي حازم بسرعه ياجي يساعدك و
قاطعها ضبع بغضب وغيره: انا قولت تعالي ساعديني انتي ياعهد مش عاوز حد يقرب مني غيرك انتي بس
عهد كانت هتسيبه بس لقته هيقع يخبط رأسه في حافت الكرسي جنبه فجرت عليه بخوف وسندته بسرعه وقالت:حاسب انت كويس ياضبع؟
ابتسم ضبع بفرحه كبيره وقال بتمثيل:لا انا تعبان اوي ياعهد ومحتاج مساعده منك عاوز اطلع غرفتي ساعديني ارجوكي
عهد بصت على حالته بشفقه وصعب عليها اوي فقالت:حاضر هساعدك تعال معايا
ضبع ابتسم بخبث وسند عليها وطلع لغرفته وبعد ماساعدته عهد ونام على سريره وقفت علشان تخرج بسرعه بس ضبع شدها ليه بقوه ووقعت عليه فشقهت بصدمه من حركته المفاجئه لها وقالت بخوف:ضبع بيه انت انت بتعمل ايه ابعد عني؟!
ضبع قربها منه اكتر وبقى نفسهم واحد وقال:عهد خليكي معايا انا محتاجك اوي
عهد الخوف سيطر عليها وبقت تتحرك بعنف علشان تفلت منه وقالت بحده:ابعد عني ياحيوان انت مش في وعيك فوق بقى وابعد عني
ضبع سمعها وشدها ليه بقوه وقال بخبث: بس انا في كامل وعيي دلوقتي ياعهد انا مش سكران انا فايق اوي
برقه فيه عهد بصدمه كبيره وقالت بحده: انت فعلا حيوان بجد ابعد عني قبل مااصوت وألم عليك الناس كلها
ضبع ابتسم بخبث وهو مركز عنيه في عنيها وقال: تمام انا هسيبك ياعهد بس عاوز اقولك على سر محدش يعرفه عني قبل كده
عهد بصت في عنيه الساحره بتأمل وقالت بتعجب: سر ايه ياضبع بيه؟!!
قرب ضبع وجهه منها اكتر وهمس في ازنها بخبث وقال: انا عمري ما لمـ'ست بنت قبل كده في حياتي ياعهد بس انتي حاجه تاني خالص مش قادر اسيطر على نفسي معاكي
عهد بعدت عنه بصدمه وقالت:انت بتهزر صح
ضحك ضبع على ملامحها المصدومه وقال:لا مش بهزر انتي اول بنت اقرب منها وابقى نفسي فيا بجد ياعهد
عهد ركزت في عنيه بتوهان وضبع بعد ايده عنها وغمز لها وقال:عنيا ساحره مش كده انا عارف عنيا بتبقى زي المغناطيس بتجذب كل البنات ليا
عهد فاقت على كلامه ووقفت باحراج منه وقال:احم لا طبعا مش كده بس انا كونت عاوزه اقول اني بس...
ضبع اتعدل على السرير بهدووء وقال ببسمه:اهدي انتي متوتره ليه مش انا سبتك خلاص
عهد بلعت ريقها منه وقالت:انا مش متوتره بس مصدومه انت ازاي قولت كده؟! طيب والبنات اللي شوفها معاك اول مره دول كانوا ايه؟!!
وقف ضبع قدامها وحط ايده في جيبه بخبث وقال:لا دول حكايتهم معايا كبيره اوي بعدين احكيها ليكي بس دلوقتي انا عاوز احم
قرب منها اكتر وهي مركزه اوي معاه وكمل:عهد انا بجد معجب بيكي اوي وعاوزك تبقى مرا
وقبل مايكمل جملته سمع صوت عالي وضرب نار تحت في القصر فنزل بسرعه البرق ونزلت خلفه عهد
وقف ضبع بغضب وضم ايده بقوه وقال:انتو مين ودخلتوا هنا ازاي؟!!
جرى عليه حازم بخوف وقال:ضبع صدقني انا حاولت امنعهم بالقوه بس مقدرتش عليهم كلهم
ضبع عنيه بقت حمره من الغضب وقرب منهم بتوعد وقال:اخر مره هقول انتوا مين ودخلتوا هنا ازاي؟!
تقدم واحد منهم وقال بضيق:احنا عيله الحسيني..وشاور على عهد اللي كانت بتترعش في مكانها بخوف منهم وكمل
:عيله البنت اللي هناك دي واجينا ناخدها هي وولد عمها اللي عندك
ضبع سمعهم ببرود وبص على عهد وهي خايفه منهم بشفقه وقال:طظ فيك انت وفي عيلتك كلها انا مهم عندي حد اخرجوا بره فورا
عيله عهد اتعصبوا اوي من كلام ضبع ووقف عم عهد قدامه بغضب وقال:انت قد كلامك ده انت متعرفش مين هما عيله الحسيني وممكن يعملوا فيك ايه
ضبع بص عليه بسخريه وقرب منه بكل برود وقال:ايوه قد كلامي ونص كمان ومحصليش القرف اني اعرفكم وصدقني انا اقدر ارميكم زي الكلاب دلوقتي من هنا بدم بارد كمان
وهنا تقدم واحد منهم بغضب رهيب ومسك ضبع من هدومه بشر وقال:احفظ لسانك ده احسن اقطعه ليه فاهم
ضحك ضبع بقوه عليه وطلع لسانه قدامه بسخريه وقال:اتفضل اقطعه لو تقدر
الشاب اتوتر من كلام ضبع وبعد عنه بضيق وقال:ياعمي احنا كده بنضيع وقت معاه بس فين معتز ابنك مش قولت انه مع عهد هنا
قرب منه عمه والد معتز بقلق وقال:ايوه انا متأكد انه هنا مع الر*خيصه دي و
وقبل ماكمل حرف تاني ضبع مسكه من رقبته بغضب وشر وقال:عهد خط احمر هنا لو سمعت حرف تاني عليها هقتلكم كلهم هنا بدون تردد حتي سامع
خلص كلامه بغضب رهيب وباقي العيله جرو عليه برعب وحاولوا يبعدوه عن عم عهد بالقوه بس ضبع فضل ماسكه بعنف وخلاص هيطلع روحه في ايده لولا صوت عهد اللي قالت
:لا سيبه والنبي سيبه خلاص ياضبع ارجوك ده هيموت في ايدك كده
ضبع بص على دموعها بشفقه ودفع عمها بعيد وقال بتوعد:اتكتبلك عمر جديد سبب عهد بس لولا ان دموعها دي غاليه عندي كونت طلعت روحك في ايدي دلوقتي فاهم
عم عهد بص عليه بخوف وهو بياخد نفسه بصعوبه ووقف قدامه وقال:تمام فاهم طيب ابني فين انا عاوز ابني بس وهمشي من هنا حالا
قرب منه ضبع ببرود وقال:ابنك عندي في الحفظ والصون بس كان محتاج رباله تاني وانا قومت بالمهمه دي مكانك
عم عهد بلع ريقه بخوف على ابنه وقال:طيب هو فين دلوقتي وعملت فيه ايه؟!!
ضبع سمعه ومشي قدامه بالامبالاه وقال:تعال ورايا لو عاوز تشوفه
خرج ضبع من القصر وخلفه عيله عهد كلها وحازم قرب من عهد بقلق وقال:انتي كويسه ياعهد؟!
مسحت عهد دموعها بحزن وقالت:ايوه كويسه الحمد لله متقلقش انا متعوده على كلامهم ده معايا من زمان
حازم بص عليها بشفقه وقال:طيب تعالي معايا نحضر الفطار سوى لان الشمس خلاص تطلع وده معاك فطور ضبع
ابتسمت عهد لحازم بتفهم انه عاوز يطلعها من حالتها دي وقالت:شكرا اوي ياحازم انت بجد طيب اوي اوي
ابتسم حازم بمرح ومسك ايدها وقال:عارف ياختي اني عسل وطيب كمان بس ياله بينا قبل ماضبع يرجع ياكلنا مكان فطاره انهاردا
ضحكت عليه عهد ومشت معاه للمطبخ بفرحه
وعند ضبع وصل للمخزن القديم بتاعه وفتح الباب ببرود ودخل الاول وخلفه باقي العيله بقلق وفجأه انصدموا من شكل معتز قدامهم
وبباه جرى عليه برعب وحضنه وقال:انت كويس يامعتز ياحبيبي مين عمل فيك كل ده يابني؟!
قرب منه ضبع بكل برود وقال:انا اللي عملت فيه كده ولسه حقه مخلصش معايا
والد معتز بص عليه بصدمه وقال بغضب:انت ازاي تعمل فيه كده انت مجنون ده مفيش حته بقت سليمه فيه منك لله ياشيخ منك لله
ضبع بص عليه بضيق وهو بيشاور على معتز بقرف وقال:إحمد ربك انك لقيت فيه نفس اصلا دنا كونت ناوي اموته لولا عهد اترجتني اسيبه عايش
باقي العيله سمعوه بصدمه وغضب كبير ووقف والد معتز بتوعد لضبع وقال:صدقني هتندم على اللي عملته في ابني مبقاش اسمي مصطفي الحسيني لو مأخدتش حقه منك
ضبع ابتسم بسخريه من كلامه وطلع المسدس بتاعه من جيبه ببرود وقرب منه وقال:اتفضل خد حق ابنك مني امسك المسدس وابقى راجل واضربني بيه هنا في صدري خد حق ابنك وانا واقف قدامك اهو
مصطفي بلع ريقه بتوتر من نظره ضبع المرعبه وتراجع بتوتر وخوف وقال:لا انا هخلي ابني بنفسه ياخد حقه بأيده منك اوعدك
ضحك ضبع بقوه عليه وحط مسدسه تاني في جيبه بسخريه وقال:وانا اقول الولد ده طالع خروف لمين دي طلعت جينات وراثيه بقى في العيله كلها
خلص كلامه وكمل ضحكته بصخب ومصطفي بص عليه بضيق وقرب يسند ابنه معتز علشان يخرج من هنا
بس وقف على صوت ضبع اللي قال بحده:على فين لسه الحساب مخلصش ياجماعه
كلهم بصوا عليه بصدمه وعدم فهم وضبع قرب من مصطفي بشر وقال:لسه حق عهد مرجعش منكم انتو اجيتم هنا بمزاجكم بس الخروج منه بمزاجي انا
بلع مصطفي ريقه بخوف من ضبع وقال:قصدك ايه انا مش فاهم حاجه منك؟!
بعد ضبع عنه وابتسم بخبث وقال:لا انت فاهم كويس انا بتكلم عن ايه ورث عهد اللي اكلته انت واهلها منها لازم يرجع لها الاول
رد مصطفي بحده وقال:لا مستحيل احنا معندناش بنات بتورث حاجه ده حقنا احنا في اخويا عماد الله يرحمه
ضبع سمعه وعنيه بقت حمره من الغضب وضم ايده بتوعد وقال:انت عاوز تاكل حقها اللي قال عليه ربنا والشرع والدين
وبعد عنه بغضب رهيب وقال بحده:طيب مفيش خروج من هنا قبل ماعهد يرجعلها حقها في ورث ابوها وكامل كمان وانا قد كلامي ده
خلص كلامه ونادي بصوت عالي:عصااام تعال بسرعه
دخل عصام بتوتر وقال:تحت امرك ياضبع بيه
بص ضبع عليهم كلهم بتوعد وغضب وقال:اطلع من هنا وتقفل المخزن ورايا بالشمع الاحمر ومش عاوز دبانه تطلع من هنا تمام
رد عصام بطاعه:حاضر ياضبع بيه علم وينفذ حالا
ضبع هز رأسه ببرود وتوجه للباب بس وقف على صوت مصطفي اللي بيترعش بخوف وقال:لا استني عندك انت مستحيل تعمل كده انت عارف عقوبه كلامك ده ايه؟
ضحك ضبع بصوت عالي وقال بسخريه:طبعا عارف عقوبته ايه انت متعرفش اني القانون هنا في البلد دي
كلهم بصوا عليه برعب وضبع وقف قدام باب الخروج وقال:معاكم لبكره باليل هاجي ومعايا كل الورق المطلوب مضيتم عليه هتخرجوا من هنا بسلام رفضوا تمضوا يبقى تفضلوا هنا لحد ماتتعفنوا في المكان ده وكده خلص كلامي معاكم سلام
خرج ضبع بكل برود وقفل الباب خلفه وسمع صوتهم وهما بيصرخوا برعب من المكان وقال بضيق:عالم كلاب بصحيح وعاوزين الحرق كلهم
وبعدها توجه للقصر تاني والشمس كانت خلاص طلعت دخل القصر بهدووء لقى المكان هادئ جدا فقرر يطلع يرتاح شويه فوق في غرفته لانه تعبان اوي بس فجأه وقف على صوت ضحك عالي من المطبخ
فتوجه بسرعه للمطبخ ودخل وكانت هنا الصدمه بجد وقف بصدمه والدم غلي في عروقه من الغيره لما لقى عهد قاعده على رخامه المطبخ وقدامها حازم بيقطع الخضار وبيهزر معاها وهي منسجمه اوي معاه وبتضحك من قلبها عليه وحازم قريب اوي منها بطريقه خلت عروق ضبع برزت من شده الغضب والغيره وضم ايده بتوعد لحازم وقرب منهم ووووو
يتبع....بقلمي نور محمد
