رواية موضوع عائلي الفصل الثالث عشر 13 الجزء الثاني بقلم رحاب القاضي
#موضوع_عائلي
"الجميله والشعر الابيض"
_البارت الـ13
ـــــــــــــــــــــــــــــــ
لا اعرف هل وقوفي بجانبك الان شجاعه ام شعور بالذنب😓
_نزل زكريا من البيت اللي كان فيه، وبص للمكان حواليه والناس بتجري وهي خايفه من لما هو ضرب عيار ناري في مكان فاضي، بس الكل خاف من اللي حصل، وهو وماشي قرب من الصحفي اللي كان واقف جنب مراته وابنه وهو قلقان جداً وقاله بصوت واطي..
زكريا
اللي بتحاول تفضحهم دول كتير وانت مش قدهم، كان قصاد اللي بتعمله ده ابنك فخليك في حالك..
_بصله الصحفي بعصبيه وقبل ما يتكلم قال زكريا بحده ونبره جامده..
زكريا
الطلقه اللي جات في الهوا دي كانت هتيجي في ابنك فأكسر الشر..
_ خلص كلامه وسابه ومشي وراح ركب عربيته وطلع موبيله ولقي مكالمات كتير من عزيز، بس ما اهتمش وكلم نعيم اللي شغال معاه وقاله....
زكريا
ايوه يا نعيم في بنت شغاله في المطعم عند ابويا عايزك تعرفلي مكانها فين دلوقتي حالا..
نعيم
اعتبره حصل بس هي اسمها ايه؟..
اتنهد زكريا بضيق وقال
اسمها جهاد روح اسأل رمزي في الطعم عليها الاول...
نعيم
اعتبره حصل يا كبير..
_قال كلامه وغمض عينيه وهو متكئ براسه علي الكرسي وراه..
ـــــــــــــــــــــــ
_ في الوقت ده في بيت نورا..
كانت جهاد قاعده بتعيط ونورا قالت وهي بتلف في حجابها..
نورا
انتي بتعيطي ليه، كنتي فاكره انه هيجي ويتجوزك ويعترف بأبنه مثلاً..
جهاد بحزن
ايوه عشان انا غبيه، بس ما فيش حل غير كده والا..
نورا
اوعي تقولي انك هتنزلي زي الحيوان التاني ده، اتحملي شويه وارضي بقضاء ربنا..
جهاد ببكاء
انا مش هقدر انا لا ليا اهل ولا ليا حد عشان اجيبه واربيه لوحدي وازاي انا لسه 18 سنه، انا.. انا من كام شهر بس كان كل همي في الدنيا الواي فاي ما يخلصش عشان المسلسلات التركيه اللي بتابعها، بس من لما بابا مات وكل حاجه اتغيرت طلعت من حضنه اللي كان كله امان وشوفت الدنيا اللي كلها ناس وحشه وما حدش فيها ممكن حتي اصعب عليه او يشفق عليا....
بان الحزن اكتر علي نبرتها وقالت
حتي اخويا اللي كنت اكتر حد بثق فيه هو خلاني اخاف اثق في اي حد دمرني واكتر حد تعبني هو، اللي كنت بتحامي فيه هو ومجدي كنت فاكره انهم هيبقو ليا اخوات بجد ويعوضوني عن غياب بابا بس كسروني اكتر ده انتي اللي انا غريبه عني مش هاين عليكي تسبيني ، هما كرهوني في كلمة اخوات الامان بتاعهك بقي كابوس بالنسبالي..
قعدت جنبيها نورا وردت عليها بدموع
ربنا كبير وما بيسيبش حق حد يا جهاد، وبعدبن انا مش كل شويه هفضل اقولك ان انا معاكي ومش هسيبك بطلي دلع بقي....
_ كانت ساكته حتي الابتسامه مش قادره تطلعها ولا حتي من غير نفس، فوجعها اكبر من انها تتحكم في مشاعرها.
ــــــ #بقلم_الكاتبه_رحاب_القاضي ـــــــ
_ في بيت يونس الصاوي...
كان بيعوم في حمام السباحه بتاع بيته، وراحت عنده هناااء وقالتله..
هناء
واد يا يونس في بت بره شبه اللي كانو في اعلان خمس خمسات بتاع زمان بتقول عايزااك...
يونس
مين دي؟..
هناء
اسمها دارين..
يونس
اااه طيب خليها تيجي دي موظفه عندي..
هناء بحده
هو انا كنت الخدامه بتاعت اهلك ولا ايه يا ولا، انا هقعد معاها بره وانت استر نفسك وتعالي قابلها واختشي عيب تخلي واحده غريبه تشوفك كده..
يونس بسخريه
لازم تقولي كده ما انتي كنتي بتصيفي علي السطوح بتاع بيتكم..
هناء بغيظ
ولما اضربك بتزعل يا ابن ال...
يونس بضحك
الاتنين الله يرحمهم بلاش طولت لساان..
هناء بغيظ
ارتاحو من تقل دم اهلك ده.. واخلص وتعالي ورايا..
_ سابته هناء وراحت قعدت مع دارين، ويونس راح فعلا غير هدومه ونزل من فوق ولما شافته دارين ابتسمت وقالت..
دارين
انا افتكرتك تعباان عشان كده بقالك فتره مش بتيجي الشركه.
يونس
لا كنت برتاح شويه، وبعدين يوسف قصر في حاجه اكيد لا..
دارين بهدوء
بس انا اتعودت علي وجودك،،، في الشركه يعني..
هناء بسخريه
واد يا يونس هتمشو ولا اعملكم كوبايتين محن..
كتم يونس ضحكته وقال
لا ماشين يلا يا دارين....
دارين وهي بتاخد شنطتها
باي باي يا طنط ومبسوطه اني شوفت حضرتك..
هناء بضيق
ما تشوفيش وحش يا حبيبتي..
_ ومشي يونس ومعاه دارين وبعد شويه كانو قاعدين في الشركه في مكتب يونس، ودخل يوسف وقال..
يوسف
اخيراً يا عم شوفنا وشك، بطه افتكرت تأخيري في الشغل ده اني بخونها ومتجوز ومخلف في السر انت تتصرف مع اختك فاهم ولا لا..
ابتسمت دارين ويونس قال
سيبك من بطه دلوقتي وتعالي شوف الاستاذه اللي عايزه تمشي..
يوسف
بجد طيب مع السلامه انتي بقي يا دارين..
ادايقت دارين ويونس قال بحده
يا بني ادم انت افهم.. دارين عايزه تسيب الشغل معانا..
قعد يوسف وقالها
ليه كده يا مرات ابويا..
دارين بغيظ
والله بسببك انت فعلا بتعاملني وكأني مرات باباك..
ابتسم يوسف وقالها
والله بهزر وبصراحه ما كنتش الاول حابب وجودك بس بعد كده اتعودنا كلنا في الشركه علي وجودك انتي جدعه اووي وشاطره في شغلك واستفاده كبيره لينا.
يونس
بصي يا دارين انا عارف ان ابوكي عنده شركه كبيره وان من باب اولي تبقي مع اهلك، بس هنا برضو مش وحش احنا كل ما هنكبر انتي هتكبري معانا...
يوسف
علي فكره ممكن تاخدي مكان يونس عادي جدا انا ما عنديش اعتراض..
ضحكت دارين وبصت ليونس وقالت
خلاص يا يونس انا هكمل معاكم، وفي مكتبي مش عايزه مكان حد..
_ في الوقت ده جات رساله ليوسف علي موبيله، ولما فاتحها اتغيرت ملامحه وقال..
يوسف
يونس انا لازم اروح دلوقتي، امي راحت عند بطه..
يونس بتفهم
تمام...
دارين
انا كمان رايحه مكتبي..
يونس
دارين هنتعشي النهارده سوا تمام..
ابتسمت دارين وقالت
اوكي..
_طلعت هي ويوسف اللي كان مدايق، وبصلها بهدوء وقالها...
يوسف
دارين ياريت تفهمي ان لو يونس بيهتم بيكي وبيعاملك كويس فعشان انا وهو شايفينك اخت لينا وبنعاملك علي الاساس ده..
دارين ببرود
يوسف الحق مراتك ومامتك قبل ما تروح تلاقي في حرب في بيتك يا حرام..
بصلها بغيظ وقال
حربايه وعقربه يلدعوكي ياللي في بالي..
_ مشي يوسف وهي ضحكت بهدوء وراحت علي مكتبها...
ــــــ #بقلم_الكاتبه_رحاب_القاضي ــــــ
_ في شركة عمار المنشاوي..
دخلت فيروز عند عز الدين اللي كان قاعد علي مكتبه وحاطط رجليه علي المكتب وماسك موبيله ومندمج فيه، قربت منه وبصتله بأشمئزاز وقالت..
فيروز
عز بيه... عز بيه... عزالدين بيه...
زعقت فيه
انت يا استاذ..
اتنفض عز وقالها
اييييه ما بالراحه.. نعم؟..
فيروز
الملفات دي حضرتك هتشوفها امتي عشان لما نعمل الاجتماع تبقي حضرتك عارف انت هتتعامل مع مين وفي ايه...
عزالدين
حطيها طيب لحد ما اخلص الجيم..
فيروز اتنهدت وقالت
لا ما ينفعش حضرتك لازم تشوفهم دلوقتي.
عزالدين بحاجب
الله هو مين فينا المدير علي التاني..
فيروز بضيق
انا بعتذر لحضرتك بس دي مش طريقة شغل ااا..
_لقيته اندمج تاني في الموبيل،فبصتله بعصبيه وخرجت راحت قفلت النت عن المكتب خالص، وبعد شويه هو خرج عندها وهي عملت نفسها مركزه في اللابتوب قدامها، ابتسم بخبث وراح قعد قدامها وقال..
عزالدين
فايزه..
فيروز بحده
نعممم ايه فايزه دي انا اسمي فيروز..
عزالدين
ايوه صح فيروز. المهم عندك نت في موبيلك..
فيروز
لو سمحت ممكن نخلص الشغل اللي ورانا..
عزالدين بغيظ
والله فيكي شبه منها.
فيروز
مين دي؟..
عزالدين
ابله فايزه مديرة المدرسه بتاعت ابتدائي كانت نفس الشخصيه المعقده..
فيروز بنفاذ صبر
تحب اساعد حضرتك في حاجه في الشغل.
عزالدين
شااي بالنعناع وفي كوبايه مش مج يلاا..
_ قال كلامه بكل جديه ودخل مكتبه، وهي بصتله باستغراب انه في لحظه اتحول من حد بيهزر ومتواضع لحد تقيل كده، وابتسمت بهدوء وطلبتله شاي بالنعناع....
ــــــــ #بقلم_الكاتبه_رحاب_القاضي ـــــــ
_ في مكتب عمار..
دخلت عنده جميله وفي ايدها ورق، بس هو كان مركز في شغله، ابتسمت بهدوء علي هيبته وهو قااعد، وطلعت موبيلها وفضلت تصور فيه فيديو وهو بصلها وقال..
عمار
انتي بتعملي ايه؟..
جميله
بصورك يخربيت حلاوتك بجد..
_ابتسم عمار وقام وقرب منها بهدوء ومسك ايدها وخلاها تقعد مكانه وقالها بهدوء..
عمار
ما فيش احلي منك علي فكره..
جميله بتوتر من قربه
ااا احم الملف ده انا مش فاهمه فيه اي حاجه وفيروز مش فاضيه تفهمني، بص انت من حقك ترفدني عادي..
عمار بهدوء
ما تشغليش بالك سبيه وانا هشوفه..
جميله وقفت قدامه وقالت
علي فكره انا بقي شكلي وحش اووي هنا، انا مش قد مسؤلية مكتبك دي والموظفين كلهم عارفين كده وانت برضو مخليني قاعده فيه..
عمار بجديه
انتي عايزه ايه طيب، ايه اللي هيريحك..
جميله بضيق
انا مش هاجي الشغل تاني..
عمار
تمام يبقي تقولي لامك اللي بينا ولو خايفه او مكسوفه انا اقولها عادي..
جميله بسرعه قالت
لا لا لا وبعدين ايه علاقة دي بدي؟..
عمار بنفاذ صبر
يعني لا عارف اكلمك ولا اشوفك غير في الشركه وكمان مش عايزه تيجي، جميله هو ايه الموضوه بالظبط؟..
جميله بهروب
بص انا مش عارفه اكلمك لان ماما بتخليني انام بدري عشان ما اعملش دوشه لايتن وهي بتذاكر..
عمار
بت انتي انا عمار المنشاوي هتضحكي عليا وفكراني هصدق..
جميله بقلق
مش مروان جاي عندنا يذاكر النهارده مع ايتن، ماما هتعملهم كيك شوكلاته حلو اووي هبقي ابعتلك منه معاه..
عمار بجمود
وبعدين؟..
جميله بضيق
بص انت ما تضغطنيش قولتلك بعد امتحانات ايتن هقولها خلاص بقي..
عمار بجمود
تمام بس انا كمان ليا شروط..
جميله بعدم فهم
شروط ايه دي؟..
عمار بحده
وقت ما اكلمك تتصرفي وتردي عليا، ووقت ما اكون عايز اشوفك اشوفك...
جميله بسخريه
ما ينفعش طبعاً، انا بكون في البيت اشوفك ازاي، اقول لماما ايه واكلمك ازاي وهي بتبقي قاعده معايا ديماً..
عمار بعصبيه
خلاص يبقي نقولها، انا شعري ابيض يا روح امك علي جو المراهقين ده..
جميله
مش كله ابيض دول كلهم خصلتين تلاته..
عمار بحده
ما بهزرش يا جميله انا النظام ده زهقت منه، ولو كلامي ما اتنفذش هتلاقيني فوق دماغك وبقول لامك كل حاجه واديني قولتلك..
جميله بحده
ايه ده ايه ده انا ما بتهددش علي فكره..
عمار بجديه
روحي علي مكتبك..
جميله بغيظ
طيب..
جات تمشي بس قالها
استني..
جميله
نعم؟...
عمار بهدوء
هنروح مشوار مهم النهارده بعد الشغل، عايز اعرفك علي حد مهم فقولي لمامتك اننا هنتأخر..
جميله بقلق
طيب افرض قولتلها وما وافقتش، وبعدين هتعرفني علي مين اكيد ابوك صح؟..
عمار
اسمها ابوك برضو وبتزعلي لما اقولك امك، ولا مش ابويا حد تاني، وامك توافق ما توافقش دي تخصك انتي انا قولتلك اهو..
جميله بقلق
ولو قولتلك ما ينفعش؟..
عمار بخبث
هكلم انا امك واخد منها الاذن..
جميله بسرعه
لا لا انا هبقي اتصرف حاضر، بس مش هنتأخر صح..
عمار ببرود
روحي علي مكابك يلاا..
_ طلعت جميله وهي مدايقه، وهو طلع موبيله وكلم المحامي وقاله..
عمار
ايوه يا فارس عايزك تكلم زكريا وتقوله انه لو بكره ما كانش عندي انا هقدم العقد اللي معايا للنيابه..
فارس
تحت امرك يا عمار بيه...
قفل معاه عمار وقال بضيق
اما نشوف اخرتها معاك يا زكريا انت كمان..
ــــــــ #بقلم_الكاتبه_رحاب_القاضي ــــــــ
_ في بيت يوسف..
اول ما وصل هناك لقي مامته قاعده في الصاله وقدامها بطه اللي كان باين عليها الحزن جداً..
يوسف
مساء الخير يا امي نورتي البيت..
ام يوسف بحده
بلا منوره بلا مضلمه يا اخويا، اقعد كده وفهمني احنا لحد امتي هنفضل كده؟..
قعد يوسف جنب بطه وقال
كده ازاي يعني ما احنا زي الفل اهو يا امي...
ام يوسف بغضب
انا قصدي لحد امتي هتفضل عايش مع المعيوبه دي...
نزلت دموع بطه بحزن ويوسف قال بحده
لو سمحتي يا امي ما تقوليش كده علي بطه، بطه بنت ما فيش منها وانا مش هكون سعيد في حياتي من غيرها..
ام يوسف بضيق
ما قولناااااش حاجه اتجوز وهي تفضل علي ذمتك المهم اشوفلك حتت عيل في الدنيا قبل ما اموت..
_بصت بطه بسرعه ليوسف، وكلها خوف انه يوافق علي كلام امه، وهو اتنهد بضيق وقال..
يوسف
بعد الف شر عليكي يا امي، بس انا مش عايز اتجوز.
ام يوسف بصت لبطه بعصبيه وقالت
انا خطبتك اخت جوز اختك وقريت الفاتحه معاهم..
يوسف وقف وقال بعصبيه
انتي ايه اللي بتعمليه ده حرام عليكي، انا بحب مراتي ومستحيل اتجوز عليها، واللي بتعمليه ده غلط وانا لايمكن اطاوعك فيه..
وقفت امه قدامه وقالت بزعيق
يبقي خلصت كده يا يوسف لا انت ابني ولا اعرفك، ولا عايزه منك حاجه بيتك اللي جيبته انا هسيبه وارجع اقعد في بيت ابوك شالله يقع علي راسي واريحك...
_وقلعت الدهب اللي في ايدها ورمته في وشه وهي بتعيط..
ام يوسف
ودهبك اهو وحاجتك هسيبهالك، وزعلانه منك يا يوسف وطول ما انت مش مريحني انا عمري ما هرضي عنك..
_ قالت كلامها وسابته ومشيت وهو قعد مدايق جداً، قربت منه بطه وقعدت جنبيه وقالت بدموع..
بطه
انا هعمل العمليه اللي قال عليها الدكتور زمان يا يوسف..
يوسف بحده
انتي اتجننتي عملية ايه دي اللي تعمليها يا بطه ده انتي بتخافي تاخدي حقنه..
بطه ببكاء
هعمل اي حاجه بس نخلف ونجيب بيبي وافرحك بيه واخلي علاقتك بامك تبقي كويسه وما تبوظش بسببي..
يوسف مسك ايدها ورد عليها
الدكتور قال العمليه دي خطر واحتمال الرحم يتشال فيها ونبقي كده خسرنا كل حاجه..
بطه بحزن
ما انا مش بخف من العلاج، انا عندي عيب خلقي ولازم العمليه الجراحية، وافق يا يوسف عشان خاطري.
يوسف بغضب
مستحيل انا مش هخاطر بحياتك عشان اي حاجه حتي لو كانت ايه، وامي انا هعرف اصالحها بس عملياات لا، والا هزعل يا بطه..
_ سكتت بطه بس كان في نيتها حاجه تانيه وناويه انها هتعمل حاجه تاني..
ــــــــ #بقلم_الكاتبه_رحاب_القاضي ــــــــ
_ بالليل في بيت نورا..
كانت جهاد واقفه في المطبخ مع نورا، وكان شكلها مدايق جداً..
نورا
بس يا ستي واول ما روحت هناك لقيت مدير المستشفي بنفسه بيرحب بيا، طبعا هو انا كنت اي حد. شغال هناك ده انا فضلت في المستشفي دي 10 سنين مظبطه الحسابات، المهم طلع في الاخر بيرحب بيا وبس لكن شغل انا كبرت علي الشغل.
جهاد بسخريه
بصراحه حقهم شغل ايه ومرمطه وانتي في العمر ده..
نورا بحزن
قعدتي لوحدي خلتني افكر ان مهما السنين فاتت انا لسه زي ما انا، ما كنتش بشوف حاجه جديده تحسسني ان العمر ضاع، بس اهو حسيت وطلع احساس وحش...
جهاد
انتي مش معاش جوزك معاكي ومكفيكي بس كده ما تشليش هم حاجه تاني، وانا هشوف شغل تاني ومش مهم الجامعه بقي..
نورا بهدوء
اطمني كل حاجه هتتحل وكل حاجه ليها رزقها..
في الوقت ده الباب خبط وقالت نورا
انا هروح افتح ما تتحركيش كتير انتي لحد ما نروح للدكتور بكره ونطمن علي البيبي..
_ قالت كلامها وطلعت تشوف مبن اللي بيخبط، وجهاد قعدت علي الكرسي اللي في المطبخ وحطت ايدها علي بطنها بتوتر وقالت بدموع وعدم تصديق..
جهاد
هو ازاي بقي في طفل في بطني، اكيد في حاجه غلط..
_ اتغيرت تعابير وشها لما سمعت صوت نورا بتزعق برا، فقامت وطلعت بسرعه واتفاجأت بخوف لما لقيت زكريا واقف في نص البيت، ولما شافها بصلها بكل هدوء من فوق لتحت...
نورا
بقولك امشي من هنا بدل ما اخلي اللي ما يشتري يتفرج عليك..
زكريا بحده
ما تسكتي بقي يا حجه انتي..
وبص لجهاد وقال
عايز اتكلم معاكي...
نورا بحده
ما تتكلم هو حد ماسكك..
اتنهد زكريا بضيق وقالها
اتكلم معاها هي لوحدنا، وبعدين الموضوع ما يخصكيش اصلا..
وقفت جهاد ورا نورا وقالتله
لو عايز تقول حاجه قولها هنا وهي معايا، يا اما امشي عشان كلامك مالوش لازمه بالنسبالي..
رد عليها بهدوء وقال
مستنيكي تحت لازم نتكلم وبلاش تقوليلي لا، مستنيكي..
_قال كلامه وفعلا نزل، وجهاد اللي كانت خايفه منه وكل لحظه وحشه شافتها معاه بتتكرر قدامها..
نورا
غيري هدومك وانزلي..
جهاد بدموع
لا... لا انا مش عايزاه واا مش عايزه اسمع منه حاجه، انا بخاف منه بجد ده شيطان والله..
نورا
لا لا هو معاه حق الموضوع يخصكم دلوقتي ولازم تتكلمو، اياً كان هو ايه يا جهاد بس انتي محتجاله عشان اللي في بطنك يتكتب بأسمه، وبلاش تخافي لو فضلتي خايفه هتفضلي تتأذي منه ومن غيره اجمدي كده وانزلي واتكلمي معاه من غير ما تخافي وفهميه ان من حقك انه يكتب اللي في بطنك بأسمه، والا هتتعبي اووي لو ما كانش في نسب يا جهاد..
_ كلام نورا اقنع جهاد اللي راحت لبست حجابها علي بجامتها الطويله ونزلت تحت لقيته واقف جنب عربيته، والشارع كان هادي جداً...
وقفت قدامه وقالت
نعم؟..
زكريا بجمود
انتي عايزه ايه؟..
سكتت وما ردتش عليه وهو كمل كلامه
ما تقولي عايزه ايه، وليه حامل دلوقتي؟..
ردت عليه من غير ما تبصله وقالت
ليه حامل دي اسأل نفسك فيها لو كنت سيبتني امشي ما كانش كل ده حصل..
اتنهد بضيق وقال
عايزه ايه مني، اللي زيي ما ينفعش يبقي عنده طفل افهمي بقي..
جهاد بسخريه
ودي الحجه بقي اللي هتهرب بيها من مسؤليته وتنكر حقيقة انك قريب اووي هتبقي اب..
زكريا بحده
انا مش بهرب انا بقولك الحقيقه انا مش ضامن عمري وانا واقف قدامك دلوقتي...
اتملت عيونه دموع وكمل كلامه
مش هقدر اوفرلك انتي وهو اماان انا محروم منه..
جهاد بقلق
انا مش فاهمه كلامك، بس انت لازم علي الاقل تكتبه بأسمك ومش عايزه منك حاجه تاني انا هربيه لوحدي....
زكريا بجمود
انتي هتنزليه عشان لا انا ينفع اكون اب ولا انتي في سنك وظروفك دي تنفعي تبقي ام، فبدل ما نشيل ذنبه نزليه وما تسمعيش كلام الست الخرفانه اللي فوق دي....
_قال كلامه وجه يمشي بس هي قربت منه وزعقت فيه بعصبيه وقالت...
جهاد بدموع
انا مش هنزله بالعكس انا ماليش حد بس هو هيبقالي كل حاجه، واللي هيسألني فين ابوه هقولهم واحد جبان ومش قد المسؤليه اتخلي عنه وعني..
نزلت دموعها وتابعت كلامها
وانا لو كنت هنزله الاول فكنت هعمل كده عشان هو من واحد حقير زيك...
_بصلها بغضب وقبل ما يرد عليها سابته وطلعت فوق في شقة نورا، وهو اخد عربيته ومشي، وهي فوق قالت لنورا كل اللي حصل وكانت هاديه جداً ونورا قالتلها..
نورا
ما تزعليش يا جهاد انتي معاكي ربنا اللي فوق الكل..
ابتسمت جهاد وقالت
انا فرحانه اووي بنفسي، انا ما خوفتش منه لا وقفت قدامه ورديت عليه، ومش هسمع كلام اي حد عايز يأذيني تاني..
نورا بهدوء
تعرفي انا ليه مصممه انك ما تنزليش البيبي، عشان انا وجوزي الله يرحمه طلعت عينا عشان نجيب طفل، وفضلت اكتر من عشرين سنه بحاول وربنا ما ارادش، انتي ربنا ادالك نعمه وحاجه كبيره اووي ده عوض ربنا ليكي يا جهاد ربيه او ربيها كويس وابقي ام كويسه وما تستنيش حاجه من حد واللي في بطنك ده هيبقي كل دنيتك والله..
جهاد بهدوء
ان شاء الله يا طنط، يلا بقي نكمل تجهيز الاكل انا جعانه اووي...
ـــــــ #بقلم_الكاتبه_رحاب_القاضي ـــــــ
_ وفي عربية عمار..
وقف بالعربيه قدام بيت عايده، وكانت جميله قاعده جنبيه وهي متوتره جداً وقلقانه..
عمار
وصلنا يلا انزلي..
جميله بقلق
لا لو سمحت روحني يا عمار..
عمار
ليه يعني وبعدين بعد ما جينا هنمشي..
جميله بحده
ايوه هنمشي عشان انا مش عارفه ازاي سمعت كلامك وجيت معاك مكان ما اعرفوش..
عمار اتعدل في قعدته وبصلها وقال
والله هو انتي مفكره ان احنا لو حتي كنا في مكان لوحدنا انا ممكن اذيكي؟....
جميله بضيق
انا ايه يضمنلي ان قريبتك دي فوق اصلا؟..
_ طلع موبيله وكلم عايده اللي ردت عليه بعد شويه وقالها...
عمار بغضب
ايوه يا عايده ممكن تطلعي البلكونه لو سمحتي..
عايده
لي في ايه انا مجهزه العشا ومستناك انت وجميله..
عمار ببعض حده
اسمعي الكلام يلاااا.
_ كانت جميله متابعه كلامه مع عايده، وهي متوتره من عصبيته، وبعدين طلعت عايده البلكونه وقالت..
عايده
اديني اهو يا عمار انا في البلكونه، مستنين ايه اطلعو يلاا..
_بصتلها جميله بهدوء وهي قاعده في العربيه من غير ما تنزل منها، وبعدين بصت لعمار بأحراج وهو بص الناحبه التانيه وقال بجمود لعايده...
عمار
ادخلي جوه يا عايده وانا هوصل جميله وجاي....
عايده
طيب ليه هتمشي انا عايزه اشوفها..
_ ما ردش عليها وقفل الموبيل، وساق العربيه ومشيو من قدام بيت عايده..
جميله بتوتر
انا اسفه يا عمار انا بس ااا..
زعق فيها وقالها
ما اسمعش صوتك خالص، اسكتي..
جميله بدموع
علي فكره انا من حقي اخاف، وايوه خايفه منك ومن الموضوع كله..
عمار بجمود
طيب..
جميله بغيظ
لا رد عليا كويس معلش..
عمار بحده
اسكتي يا جميله عشان لو اتكلمت هتزعلي والموضوع هيكبر..
_ سكتت جميله وهو كان متعصب جدا من فكرة انها مش واثقه فيه، وبعد شويه قبل ما يوصلو البيت جميله هي قالتله..
جميله
معلش استني هنا انا هنزل عشان ماما...
عمار وقف بالعربيه وقالها
ولو شافتنا فيها ايه، مش انتي بتحبيني قوليها لامك وللكل ولا انا فاهم غلط...
جميله بقلق
بص انت متعصب دلوقتي خلينا نتكلم بعدين..
عمار مسك ايدها وقال بحده
هي كلمه يا جميله قدامك يومين بالظبط وهاجي اخطبك ونتجوز...
جميله بضيق
هو انت ليه عايز كل حاجه بسرعه كده، وياتارا بقي محدد مدة الجوازه كمان ولا لسه هتحددها..
عمار ابتسم بسخريه وقالها
اول مره اكون غبي اووي كده عشان صدقت انك بتحبيني، بس الحقيقه كل اللي انتي بتمري بيه ده اعجاب من بعيد انما انتي ما حبتنيش والدليل اننا لما قربنا انتي بتبعدي..
جميله بدموع
لا والله العظيم انت فاهم غلط، انا بس متوتره والموضوع كبير يا عمار، انا مش قادره اخد خطوه جد،و بصراحه وخايفه اكون فتره في حياتك..
عمار بحده
هو انا لو شايفك فتره او عايز كده كنت انا اللي ازن عليكي عشان تبقي كل حاجه رسمي، لا يا جميله انا ما فيش حاجه بعملها غير وانا متأكد منها، فلو كان عندي شك اني مش بحبك عمري ما كنت قولتها او قولت اني عايز اتجوزك..
جميله اتنهدت بضيق وقالتله
انت عايز ايه دلوقتي يا عمار..
عمار بجمود
تكلمي امك في خلال يومين والكل يعرف انك بتحبيني..
جميله بهدوء
حاضر بس ما تزعلش...
مسك ايدها وباسها وقال
انتي حلم كبير يا جميله هيتحقق يوم ما نبقي مع بعض وانتي مراتي ومعايا علي طول..
ابتسمت جميله وسحبت ايدها من ايده وقالت
ان شاء الله وبعدين بطل كلامك ده انا بتوتر، يلا بااي.
عمار ابتسم بهدوء
ماشي انزلي ولما توصلي البيت كلميني.
_ ونزلت جميله ومشيت لحد بيتهم، ولما هو اتأكد انها وصلت البيت رجع عند عايده وقعدو يتعشو مع بعض..
عايده
خلاص مش مشكله يا عمار، هبقي اروحلها انا بيتها ان شاء الله بعد ما تتخطبو..
عمار بجديه
لا هجيبهالك هنا الاول علي فكره هي طيبه جدا..
عايده وهي بتحطله اكل قدامه
ايوه باااين من اولها اهو بتبيع وتشتري فينا، كل كويس بلاش النأنأه دي..
عمار
باكل يا عايده اهو، وبعدين هي لا بتبيع ولا بتشتري بس هي خايفه وانا فاهمها كويس وهعرف اخليها تطمنلي بس اخد راحتي شويه وتبقي بينا حاجه رسمي..
عايده
انت قولت لمروان طيب؟..
عمار بضيق
اتكلمنا في الموضوع من بعيد هو ما رفضش وما وافقش اتكلم عادي..
عايده
برضو اقنعه وخليه يحب الموضوع كفايه اللي بتعمله سميره مش هيبقي ابوه وامه..
عمار
هو انا عملت ايه يا عايده، ما انا ضيعت سنين قافل علي نفسي فيها عشانه بس ما اقدرش اسيب جميله عشانه لانها مش وحشه ومش هتأذيه في حاجه ولا هتخلي حد يتكلم علينا بطريقه مش كويسه زي ما امه بتعمل..
عايده بحده
هو انت حد قالك تسيبها، انا بتكلم في حتت انك تفهم ابنك الموضوع كويس انت اكيد بعد ما تتجوز هتخلفلك عيلين تلاته فمروان لازم يكون قابل الموضوع عشان يقبل اخواته اللي من البنت دي..
ابتسم عمار وقال
تصدقي هتكون حاجه حلوه اووي ان يكون عندي انا وجميله اولاد، لا بنات بنتين ان شاء الله ويكونو شبهها هي بكل تفاصيلها..
ضحكت عايده بهدوء وقالتله
كل يا عمار كل يا حبيبي ده انت دماغك اتلحست خالص...
_ضحك عمار وكمل اكله بهدوء وهو بيتكلم مع عايده عليها هي وبس اللي شغلت قلبه وتفكيره مؤخراً..
ــــــ #بقلم_الكاتبه_رحاب_القاضي ــــــ
_وتاني يوم الصبح..
في بيت عمار المنشاوي، كان قاعد مروان بيفطر ونزل عمار من فوق وقعد يفطر معاه وقاله...
عمار
صباح الخير.
_كان مروان مركز في موبيله وما ردش عليه، فعمار سحب الموبيل من ايده وقاله..
عمار
بقول صباح الخير.
مروان بتوتر
صباح النور يا بابا ممكن الموبيل لو سمحت.
عمار حط الموبيل علي الترابيزه وقاله
بعد ما نخلص اكل تاخده، عامل ايه في المذاكره؟..
مروان
ربنا يستر..
عمار
نعم يا روح امك..
مروان
باكل الكتب اكل والله يا عموري..
ابتسم عمار وقاله
اتلم طيب وعموري دي بتاعت جميله بس..
مروان بضيق
بابا هو انت اشمعنا يعني هتتجوز جميله، مش حرام يعني تتجوز بنت زيها..
عمار بجديه
وليه حرام هو انا وحش؟..
مروان
لا طبعا انت بالنسبالي اعظم شخص في الدنيا، بس جميله صغيره وعلي فكره هي عمرها ما دخلت في اي علاقه عاطفيه يعني بنت بريئه وانا من كلام ايتن عليها توقعت انها هتتجوز واحد يكون في سنها وو.. بصراحه يا بابا انتو مش هتنفعو مع بعض..
_ادايق عمار من كلام مروان، بس ابتسم بهدوء ورد عليه بكل جديه وقاله....
عمار
المهم انك مش معترض علي فكرة انها هتكون مرات ابوك، انما من حتت خوفك اني هتعبها معايا وكده فاطمن انا عارف انا بعمل ايه، وانا بحبها ومستحيل اتعبها ولو انا شايف ان وجودي هيأذيها يا مروان انا من نفسي كنت هبعد..
مروان بقلق
طيب وايتن؟..
عمار
مالها ايتن؟..
مروان
انت وجميله موضوعكم بعيد عننا، عشان والله لو حصلت حاجه تبعدها عني انا هموتلك نفسي لو ايتن بعدت عني..
عمار بغيظ
كمل فطارك يا اهبل وبعدين انا فكرت في موضوع انك تخطبها وانتوو داخلين الجامعه ده..
مروان بحماس
بجد طيب هنروح امتي نتقدم بعد الامتحانات مش كده؟..
عمار بجمود
لما تبطل تاخد مصروفك مني..
مروان بضيق
يعني ايه؟..
عمار
يعني يا حبيب بابا عايز تخطب ايتن يبقي تنزل تشتغل معايا وتتعلم كل حاجه في الشغل بحيث انكم تخلصو الجامعه انت تمسك الشغل كله معايا وتتجوز علي طول، انما لو فاكر اني هروح معاك بيوت الناس واقولهم انك لسه لا بتشتغل وبتاخد مصروفك مني وانا اللي هجوزك فلا ومليون لا..
مروان بغيظ
وانا مش عايز اشتغل معاك اصلاً..
عمار ابتسم وقال
ليه يالا مش اد المقام ولا ايه؟..
مروان بحده
عشان مش عايز ابقي زي عمي، مش عايز اكرهك زيه..
_احتدت معالم وجه عمار بغضب وساب الاكل من ايده وقاله....
عمار بغضب
مدام فيك دماغ وبتفكر اهو ومقرر كمان، يبقي تكبر وتبقي راجل الاول مش عايز تشتغل عندي من اول ما تخلص امتحانات هتنزل شغل في احسن شركه كمان وبعيد عني زي ما انت عايز، وتحلق شعرك ده وتبطل دلع والحاجات اللي كنت بتعملها من ورايا، تبقي راجل نش عيل هتعمل كده هتمطب ايتن مش هتعمل كده انسي حتي اني اسمحلك تشوفها تاني..
مروان بقلق
يا بابا انا اا..
زعق فيه عمار وقاله
خلصناااا ولحد ما امتحاناتك تخلص ما فيش طلوع تاني من البيت غير لو رايح السنتر مفهوم..
مروان بضيق
حاضر.. بعد اذنك..
_ وقام ومشي راح اوضته وعمار بصله بحزن وبعدين موبيله رن برقم جميله، فرد عليها وهو مدايق وقال..
عمار
قولتي لامك..
جميله بغيظ
في ايه انت من امتي كده، وبعدين فين صباح الخير وحشتيني فين الكلام ده ولا احنا كان بيضحك علينا عشان نلبس في الخازوق..
عمار بجمود
خلصتي.. قولتلي لامك ولا لا؟..
جميله بحده
لسه صاحيه والله اهو...
عمار
طيب هتقوليلها امتي؟..
جميله
دلوقتي انا مكلماك اقولك ان مش جايه الشغل النهارده، وهروح اقولها او هفضل بقي ادلع فيها واقول حاضر ونعم لحد ما تحبني واقولها..
ابتسم عمار غصب عنه وقال
طيب ما تتكلميش معايا بقي غير لما تقوليلها يا جميله..
جميله بغيظ
انت رخم علي فكره يا عموري وقمصتك وحشه بجد، اقفل انا اصلا اللي مش عايزه اكلمك اصلا..
_ قالت كلامها وقفلت في وشه وقاامت من علي سريرها وراحت اوضة ايتن اللي كانت بتكلم مروان وبتقوله..
ايتن
طيب عشان خاطري اهدي دلوقتي وبعدين انت ما كانش ينفع تقوله كدن يا مروان ده باباك..
جميله بعدم فهم
هو قاله ايه!....
شاورتلها ايتن عشان تسكت وقالت لمروان
طيب انا هقفل دلوقتي يا ميرو عشان هجهز الفطار مع ماما، وهاجي اكلمك تاني بس عشاني بجد ما تزعلش..
_حطت جميله ايدها في نصها وبصتلها بغيظ، وايتن ضحكت بهدوء وقالت..
ايتن
عيب بقي لم نفسك، واقفل يلا باااي...
قفلت معاه ايتن وقالت لجميله
بتبصلي كده ليه؟..
جميله بفضول
هو الواد ده قالك ايه بالله عليكي قوليلي..
ايتن بخبث
عيب لما تكبري هقولك..
ـ قالتلها كده وراحت قعدت علي سريرها وجميله قالتلها بغضب..
جميله
هي مين دي اللي لما تكبر يا ام بامبرز انتي..
ايتن
في ايه يا جميله جايه عايزه مني ايه علي الصبح.
جميله قعدت قدامها وقالت بقلق
انا قررت اقول لماما كل حاجه بيني وبين عمار واخلص من الموضوع ده...
ايتن بجديه
لاااا الموضوع مش هيخلص يا جميله، الموضوع هيبدأ يا حبيبتي ليه لان دي حياه جديده هتبتدي بينك وبينه فقبل ما تكلمي ماما لازم تكوني انتي متاكده من مشاعرك..
جميله بضيق
مش عارفه بقي يا ايتن بس انا خايفه اخسر عمار، وبعدين انا حياتي هتكون حلوه اووي معاه انا لقيت حد بيحبني وكمان حلو وكويس وهتجوز قبل ما ابور وو..
ايتن بحده
بااس مادام انتي بتفكري كده يبقي مش هتقتنعي بكلامي يا جميله، بس اللي بتعمليه ده مش هيريحك..
قامت جميله وقالت
لا يا ايتن انا عارفه نفسي انا بعمل ايه كويس، هطلع انا اكلم ماما ولو سمعتيني بصوت..
ايتن
هاجي الحقك واحوشها عنك حاضر..
جميله بخوف
لا انتي كلمي الاسعاف علي طول، استودعك الله..
_ طلعت جميله بره وسابت ايتن بتضحك عليها، وقعدت جنب مامتها في الصاله اللي كانت قاعده بتتفرج علي التلفزيون وهي بتشرب شاي....
جميله
هو انتي فطرتي يا ماما من غيرنا ولا ايه.؟..
فريده
لا يا حبيبتي انا بس صاحيه نفسي في كوباية شاي، دقيقه هقوم اجهز الفطار..
جميله
لا استني انا هجهزه النهارده عشان مش رايحه الشغل ادوني اجازه..
فريده بقلق
بت الحنيه دي بتقول امك عامله مصيبه انطقي..
جميله بتوتر
لا لا ربنا ما يجيب مصايب، بصي هو حاجه حلوه اا انا.. انا جالي عريس يا ماما..
فريده بأهتمام
بجد طيب مين ده بقي وشافك فين ويعرفك منين وقالك ازاي انه عايز يتقدم..
جميله راحت قعدت بعيد عنها وقالت
هو يعني قالي انه بيحبني وعايز يتجوزني، وانا كمان يعني اا يعني لو حضرتك موافقه يعني انا كمان بحبه..
فريده بجمود
امممممم مين هو بقي برضو وتعرفيه من فين؟
جميله قامت قعدت في مكان ابعد شويه
مم من الشغل هو موجود في الشغل...
فريده بحده
انتي عارفه لو اتحركتي تاني هقوم اجيبك من شعرك، اترزعي مكانك واتكلمي علي طول مين ده؟..
جميله بخوف
بصي هو معايا في الشغل وابن ناس لا هو راجل عاقل كده وكاريزما وابن ناس ومرتاح مادياً ومحترم..
فريده
هو زميلك في الشغل يعني، شغال ايه هناك طيب؟..
جميله بتوتر
احمم مدير شغال مدير..
فريده
مدير الحسابات ولا مدير الفرع ولا مدير ايه؟..
جميله بقلق
لا هو مديرهم كلهم؟..
فريده
ازاي يعني ما تتكلمي علي طول خليني اكلم عمار بيه واسأله عليه ونخليه يقف معانا في الموضوع ده بما ان العريس شغال عنده..
جميله ضحكت بخوف وقالت
هههههه ازاي يا ماما، اذا كان العريس يبقي عمار بيه بذات نفسه..
وقفت فريده وقالت بصدمه
مين يا اختي؟..
_ تفتكرو فريده هتعمل ايه؟....
ـــــــ #بقلم_الكاتبه_رحاب_القاضي ــــــ
_ وقدام مدرسة ولاد يونس..
نزلت شهد من التاكسي ومعاها يوسف اللي ماسك ايدها ويزن نزل علي الارض يربط الكوتشي بتاعه...
شهد
استني يا يوسف هربط الرباط لاخوك..
يوسف بخبث
انا بطني وجعاني وعايز اروح معاكي والنبي يا ماما...
شهد بنفاذ صبر
ارحمني بقي فيها حاجه لو بقيت تحب المدرسه زي ما بتحب النسوان الكبيره مثلا؟..
يوسف بهيام
يا ماما هو في زي النسوان الكبيره هييح..
شهد ضربته علي دماغه وقالت
هيح ايه يا ولد عيب كده..
وبصت ليزن وقالت
يلا يا حبي....
_اتصدمت لما لقيت في عربيه سودا بتقرب من يزن وبسرعه نزل واحد واخده جوه العربيه ومشيت من قدامهم...
سابت شهد يوسف وجريت ورا العربيه وهي بتصوت وبتنادي علي ابنها بخوف فوق الوصف، ولما اختفت العربيه من قدامها فضلت تعيط ورجعت بسرعه ليوسف اللي كان واقف خايف، وطلعت موبايلها وكلمت يونس وحصل؟؟..
_ نلتقي البارت القادم وهنعرف مين اللي خطف يزن؟...
ـــــــــــــــــــــــــــــــ
#بقلم_الكاتبه_رحاب_القاضي
