رواية موضوع عائلي الفصل الرابع 4 الجزء الثاني بقلم رحاب القاضي
#موضوع_عائلي
"الجميله والشعر الابيض"
_البارت الرابع
ــــــــــــــــــــــــــــــــــــــــ
_ دخل يونس مكتب مديرة مدرسة ولاده وبص للراجل اللي كان بيزعق في شهد بجمود، وقرب منها ومسحلها دموعها وقالها بهدوء..
يونس
انتي بتعيطي ليه ما فيش حاجه تستاهل بس بقي عشان الولاد ما يخافوش..
قبل ما ترد عليه زعق الراجل اللي واقف وقال
هو ايه اللي ما يستاهلش ابنك يا بني ادم عور ابني في دماغه، انت فاهم يعني ايه..
كمل كلامه بسخريه
لا بس ازاي هتفهم ده الطبيعي والمتوقع من ابن واحد بلطجي وجاهل..
كور يونس قبضة ايده بغضب والمديره قالت
لو سمحت يا استاذ رؤوف ما يصحش كلامك ده في اطفال معانا في الاوضه..
رؤوف بعصبيه
انا ماليش دعوه بحاجه، انا عايز حق ابني والولد ده يطرد من المدرسه والمفروض ما يتعلمش اصلا ده مش متربي..
مسكه يونس من هدومه وقال بغضب
لا يروح امك هو متربي وابوه البلطجي والجاهل هيعلمك تكلمه ازاي كويس بعد كده..
_ خلص كلامه وخبطه براسه في مناخيره وذقه وقعه علي الارض، ويوسف سقف وقال..
يوسف
هييييه شاطر يااا بابا...
_ وبعد شويه دخلت شهد البيت وهي متعصبه وماسكه ايد يزن ويونس دخل وراها ومعاه يوسف اللي كان مبسوط جداً...
يونس بصله وابتسم وقال
انت فرحان ليه يا واد انت؟..
يوسف
عشان ابويا قوي وغلب الشرير اللي خلي ماما تعيط..
بص يونس ليزن وقاله
وانت ضربت صاحبك ليه؟..
بصله يزن بحزن وسكت، فزعق فيه يونس وقال
ما تنطق ياااه..
شهد بحده
بس يا يونس حرام عليك الواد خايف لوحده..
يونس بسخريه
خايف بقي ده يخاف، طفل عنده اربع سنين يفتح دماغ صاحبه وتقوليلي يخااف..
مسك يزن في شهد وكان فعلا خايف وهي قالت
انت تعرف ايه عن ولادك عشان تتكلم اصلا، وبعدين بالراحه وهو هيقولنا اللي حصل...
وقعدت قدام ابنها علي الارض وقالتله
حصل ايه يا يزن قولي في ايه؟..
رد عليه بصوت مقطع
مم مافيش..
شهد بصت لسعاد المربيه وقالتلها
خديه فوق يا دادا سعاد..
سعاد
عينيا يا ست هانم...
_ واخدت سعاد يزن وطلعت فوق، وشهد بصت ليوسف وقالتله..
شهد
ايه اللي حصل مع اخوك يا ابو لسان ونص انت؟..
يوسف
لا انا ما اتعودتش افتن علي حد..
شهد بعصبيه
يا واد متعصبنيش عليك وانطق..
يونس بسخريه
بس يا شهد ده عيل صغير..
شهد بضيق
انطق يا يوسف ايه اللي خلي اخوك عمل كده؟..
يوسف بص لباباه بقلق وقال
اسر فضل يقولنا ان بابا جاهل وبلطجي انا عملت نفسي مش واخد بالي بس يزن ادايق وذقه وقعه علي الارض..
شهد بحزن
طيب اطلع عند اخوك يلا..
يوسف
لا انا قاعد اتفرج عليكم..
شهد بعصبيه
يا واد اطلع فوق اسمع الكلام من اول مره اقوله وبلاش لماضه..
يوسف
يوووه طالع اهو طالع..
يونس بص لابنه وابتسم وقال
الواد ده عنده كام سنه؟..
شهد بحده
ليك نفس تضحك، ولادنا اترفدو من المدرسه يا يونس وانت بتضحك انا مش فاهمه ايه البرود ده..
يونس
من دلوقتي نشوفلهم مدرسه تانيه نقدملهم فيها..
شهد بدموع
ما فيش احسن من المدرسه دي واحنا في نص السنه خلاص ازاي بس نقدملهم..
يونس
طيب وانا اعمل ايه، وبعدين يزن ما غلطش ده راجل من صغره..
شهد
والنبي كفايه بقي وبعدين ما فعلا لازم يعمل كده وحضرتك عملت زيه واكتر قدامهم وقدام المديره..
يونس بحده
والله كنتي عايزاني اتشتم واقف اتفرج ليه ان شاء الله؟..
شهد بعصبيه
فتقوم تضرب الراجل قدام ولادك، مليون مره اقولك انت لازم تكون قدوه لولادك...
يونس بغضب
اهو انا كده وده طبعي ودي طريقتي وولادي هيبقو زيي يا شهد، وبعدين ما بقتش عاجبك دلوقتي يا هانم..
شهد بضيق
والله قلة الكلام معاك احسن، انا هكلم هاجر تخلي جوزها يكلم المديره وترجع الولاد..
يونس
لا طبعاً انا مش بحب الراجل ده..
شهد بعصبيه
اومال هنسيب الولاد كده..
اتنهد يونس بضيق وقال
انتي مش ليكي ولادك يرجعو المدرسه، يبقي تسكتي خالص...
شهد
وياريت تاخد بالك من يزن شويه هو بيخاف منك جدا وكمان عنده مشكله في الكلام..
يونس
طيب انا راجع الشغل لو احتاجتي حاجه كلميني..
شهد
وهترجع امتي؟..
رد عليها وهو ماشي
مش عارف..
شهد
انا هروح عند صبري انا والولاد هشوف شقتهم الجديده واحتمال ابات...
يونس
طيب هقول للسواق يوديكي..
_ وطلع بره البيت واتنهدت شهد بضيق وطلعت فوق عند ولادها...
ــــــــ #بقلم_الكاتبه_رحاب_القاضي ــــــــ
_ وفي شركة عمار المنشاوي..
_الكل اتلم عليهم عشان يبارك ليهم، وفي الوقت ده دخلت فريده وجميله اتخبت ورا عمار..
عمار بصوت عالي
باااس الله يبارك فيكم كلكم واكيد كلكم معزومين علي الخطوبه..
وبص للعميل وقال
وانا بشكر حضرتك جدا يا فاروق بيه وان شاء الله هكون اول الحاضرين انا ووو.. وو.. وخطيبتي..
جميله بصوت واطي
ماما عيونها بتطق شرار والله يا عمار روحنا في داهيه..
عمار بصلها بغيظ
كان يوم اسود يوم ما عرفتك يا شيخه....
العميل
طيب همشي انا يا عمار بيه وهستناكم بكره..
جميله
ان شاء الله حضرتك اتكل بقي..
عمار بسرعه قال
جميله قصدها اتفضل حضرتك والله....
ضحك العميل ومشي وقال عمار بصوت عالي
ممكن كل واحد بقي يخليه في شغله..
قربت منهم فريده وقالت
بقي هي دي اصول يا عمار بيه تخطب بنتي وانا مش موافقه..
الموظفين كلهم بصولهم، وعمار قال
بعد اذنك يا مدام فريده ممكن نتكلم مع بعض شويه علي انفرااد في مكتبي..
جميله
عشان خاطري يا ماما اهدي و..
فريده بحده
انتي اخرسي خالص ما اسمعش صوتك وحسابك معايا في البيت..
عمار
ارجوكي يا مدام فريده مش هينفع يبقي في اي كلام في حياتي الشخصيه هنا قدام الموظفين..
فريده
ماشي يا عمار بيه عشان انا بس بفهم في الاصول مش هعملك مشاكل هنا..
جميله
انا جايه معاكم صح؟..
عمار
لا انا عايز مدام. فريده لوحدها يا جميله استني هنا..
فريده بسخريه
انت فاكر انها لو قعدت هنا، هتبقي هاديه دي هتخربلك الدنيا..
جميله بغيظ
يا ماما في ايه بقي والله انا هاديه وكيوت بطلي تشوهي في سمعتي بقي في الطالعه والنازله.
عمار
اتفضلي معايا يا مدام فريده..
_طلعت معاه فريده فوق المكتب، وقعدت قدام عمار اللي ما رضيش يقعد علي مكتبه وقعد قدامها وقال..
عمار
تشربي ايه يا مدام فريده؟.
فريده
شربت بما فيه الكفايه تحت، ممكن افهم بقي ايه اللي حصل تحت ده؟..
عمار
ركزي معايا كده. حضرتك العميل اللي كان تحت ده هو نفس العميل اللي كان في المطعم وقت ما جميله خلتني اطفش معاها العريس..
فريده
ايوه افتكرت برضو كله بسببها هي، انا بجد مش عارفه اعتذر لحضرتك ازاي؟..
عمار
لا حصل خير وانا دلوقتي هوضح كل حاجه للموظفين تحت بطريقتي..
فريده بضيق
وانا هاخد جميله وامشي وبعتذرلك مره تانيه علي اللي حصل ده كله..
عمار بضيق
لا جميله مالهاش ذنب، وهي متفوقه جداً في شغلها..
فريده
معلش طيب النهارده خليها تروح معايا لحد ما حضرتك تصلح سوء التفاهم اللي حصل..
عمار
تمام يا مدام فريده بس هدايق بجد لو جميله ما جاتش الشغل تاني وهعتبر كده ان حضرتك مش مطمنه عليها عندي..
فريده وقفت وقالت
لا ان شاء الله بكره هتيجي، وبجد انت ذوق اووي يا عمار بيه ويسلم ايد اللي ربوك بجد...
وقف عمار قدامها وقال
ده من ذوقك يا مدام فريده، بس ياريت ابقي عمار بس يعني انتو غالين اووي عندي من معاملتي معاكم وكلام مروان عنكم..
_ ابتسمت فريده بس اول ما فتحت الباب بتاع المكتب وقعت جميله علي الارض..
وقفت بسرعه وقالت
في ايه يا ماما ما بالراحه حد يفتح الباب كده..
فريده بغيظ
وحياة امك بس نروح البيت وانا هربيكي يا جميله تعالي ورايا يلا..
مشيت فريده وقربت جميله بسرعه من عمار
اوعي تكون سلمتني ليها يا عموري..
عمار كتم ضحكته وقالها
امشي يا بت من هنا بدل ما اندهلك امك..
جميله بحزن
اخص عليك بس ابقي افتكرها..
_ مشيت جميله وعمار فضل باصص ليها وهي ماشيه مع مامتها وبتحاول تصالحها، وابتسم بهدوء وكان مركز علي كل حاجه فيها من شكلها وشخصيتها اللي قدرت تشغله وتسرق تفكيره بالسرعه دي..
ــــــــ #بقلم_الكاتبه_رحاب_القاضي ـــــــ
_ وفي بيت عماد..
_صحيت جهاد من النوم الصبح وطلعت من اوضتها لقيت بنت لابسه عبايه سمرا وطالعه من اوضة اخوها، فأستغربت جهاد وقربت منها وسالتها..
جهاد بحده
انتي مين يا ست انتي وبتعملي ايه هنا في بيتنا وفي اوضة اخويا؟..
ضحكت البنت وردت عليها بسخريه وقالت
ههههههههه عندك اخوكي يا اختي جوه اسأليه..
_طلعت البنت وراحت جهاد خبطت علي اوضة اخوها فطلع وقالها..
عماد بضيق
عايزه ايه يا جهاد علي الصبح؟..
ردت عليه جهاد بعصبيه وقالت
مين البنت اللي كانت هنا عندك جوه دي يا عماد.؟..
رد عليها ببرود وقال
دي سمااح حلوه مش كده، اتعودي عليها عشان هتجيلي علي طول..
جهاد بعصبيه
ازاي يعني اتعود، اللي انت بتعمله ده حرام و..
زعق عماد. فيها وقال
في ايه يا بت انتي متتكتمي بقي هتعمليلي فيها شيخه، لا فووقي ده بيتي انا اقعد فيه براحتي وعلي مزاجي واجيب اللي عايزه فاهمه ولا لا؟..
عيطت جهاد وقالتله
كتر خيرك يا اخويا، اديني فلوسي وانا همشي واجيب مكان تاني بعيد عن القرف اللي انت عايش فيه ده..
ضحك عماد وقالها بخبث
هههههههه كان فيه وخلص يا حبيبة اخوكي ملكيش حاجه عندي..
_ردت عليه جهاد وهي مش مصدقه اللي بتسمعه منه وقالت...
جهاد
يعني ايه انا مش اديتك فلوسي وقولتلك تشيلهم معاك..
عماد ببرود قالها
كان عليا ديون وسددتها بيهم، وبعدين اثبتي انك اديتيني حاجه وانا اديهالك..
جهاد
يعني ايه انت ضيعت فلوسي حرام عليك...
عماد. بعصبيه زعق فيها وقال
بقولك ايه يا بت انتي ما تلمي نفسك بقي وتسكتي، وعجباكي العيشه كده اهلا وسهلا مش عجباكي الباب يفوت جمل وملكيش حاجه عندي...
_دخلت جهاد اوضتها وفضلت تعيط وهي ندمانه انها وثقت فيه، بس مكانتش عارفه تروح فين وهي ملهاش حد غيره فقالت انها هتقعد عنده لحد. ما تلاقي شغل وتعمل مبلغ تقدر تاخد بيه شقه ايجار وتصرف علي نفسها كل التفكير ده برغم سنها الصغير اللي لسه في الـ 18 سنه...
ـــــــــ #بقلم_الكاتبه_رحاب_القاضي ــــــــ
_ وبالليل قدام بيت جميله..
كانت راجعه من بره ولقيت يوسف ابن شهد قاعد علي السلم وبياكل شوكلاته..
جميله
انت قاعد كده ليه صغنن؟..
بص يوسف وراه وقال
انتي بتكلمين اناا يا مزه ؟
ابتسمت جميله وقعدت جنبيه وقالت
هو في صغنن هنا غيرك، ما تجيب حتت شوكلاته دي شكلها غاليه.
يوسف اداها الشوكلاته وقال
خدي بس حته صغيره بس..
جميله بخبث
من عينيا..
_ وبعد اقل من دقيقه فضل يوسف يعيط بصوت عالي وطلعت شهد من شقة اخوها وهي خايفه علي ابنها ومعاها زهره، وكمان فريده وايتن اللي طلعو من شقتهم..
شهد وهي بتمسح دموع يوسف
في ايه يا حبيبي مالك بتعيط ليه؟..
يوسف شاور علي جميله وقال
البت دي اكلت الشوكلاته اللي انتي جيبهالي..
بصو كلهم لجميله اللي قالت بسرعه
وربنا هو اللي ادهالي..
يوسف ببكاء
قولتلك تاخدي حته صغيره مش كلها..
جميله
ما هي طعمها كان حلو اووي بصراحه وما قدرتش امسك نفسي..
شهد بحده
لا والله انتي ازاي تعملي كده وتخلي الواد يعيط بالشكل ده..
جميله
براحه طيب والله ما كنت اقصد..
فريده باحراج
انا اسفه يا مدام والله بس بنتي دي بتحب تهزر، بجد حقكم عليا..
زهره
حصل خير يا مدام فريده، تعالي يا يوسف وانا هجيبلك واحده غيرها..
بص يوسف لجميله وطلع لسانه وقالها
هييه هجيب واحده جديده ومش هديكي منها..
جميله بغيظ
طيب شايفين بيطلع لسانه ازاي وانتو ساكتين..
شهد بسخريه
لا والله كمان هتعملي عقلك بعقله..
جميله
ما بالراحه يا عسل مالك داخله شايطه فيا كده ليه، انا والله كنت بهزر معاه وانا اسفه..
شهد بهدوء
خلاص حصل خير بعد اذنكم..
فريده
لا والله ما تتفضلو عندنا طيب نشرب حاجه سوا..
زهره
مره تانيه يا حبيبتي، بس شهد اخت جوزي جايه تقعد معايا شويه بقالها كتير ما جاتش اصلا..
فريده بهدوء
ربنا يخليكم لبعض واسفه مره تانيه علي اللي حصل..
شهد بهدوء
لا ما حصلش حاجه خلاص..
_ دخلت شهد هي وزهره شقتهم وقفلو الباب، وفريده سحبت جميله من دراعها ودخلو جوه وزعقت فيها وقالت..
فريده
هو انتي كل ما رجلك تعبت بره البيت تحصل مصيبه..
ايتن بضحك
هههههههه والله يا ماما انا من رأيي اا..
قاطعتها جميله وقالت
ما حدش طلب رأيك روحي كلمي حبيب القلب ميروو زمانه بيرن عليكي..
فريده
يلا يا قليلة الادب اختك مش بتاعت الكلام ده..
ايتن بتوتر
قوليلها يا ماما، علي العموم انا داخله اذاكر..
ودخلت ايتن جوه وفريده قالت لجميله
هاا جيبتي الفلوس من عند عمك؟..
جميله بحزن
لا لطعني زي الكلب ساعه وفي الاخر قالولي انه مشي.. وكأني رايحه اشحت منه اشحال ان ما كنتش رايحه اخد ملاليم من حقنا اللي هو غرقان فيه هو وولاده..
فريده بضيق
حسبي الله ونعم الوكيل فيه، بس احنا لازم ناخد منه المصروف بتاع الشهر وكمان يدفع مصاريف مدرسة اختك المتأخره..
جميله بحزن
بكره هروحله تاني وان شاء الله هلاقيه..
فريده
ان شاء الله، بقولك ايه انا هاخد الكيكه اللي في التلاجه دي واحطها في طبق حلو واوديها لجيرانا دول اهو نبرد وشنا بعد الموقف الزفت اللي عملتيه، بقي تاكلي الشوكلاته بتاعت الواد ليه مجوعاكي مش تاكلي ياللي فضحاني..
جميله
يااا اختااااي طفحتوهالي حتة الشوكلاته، خلااص ودي اللي توديه انا داخله انام..
فريده بحده
اهو اللي انتي فالحه فيه طول اليوم ماسكه الموبيل وقاعده علي السرير تاكلي وتنامي ده انا حتي ما بشوفكيش بتروحي الحمام يا بت..
جميله بغيظ
اقفي في الشبااك وقولي احسن وفي الاخر مستغربين انا ما اتجوزتش ليه لحد دلوقتي ما هو من سمعتي اللي بوظتهالي..
_ قالت كلامها وراحت دخلت عند ايتن اللي كانت بتكلم مروان وبتضحك وقالتلها..
جميله
بيقولك ايه الواد الملزق ده ضحكوني معاكم..
فتحت ايتن الصوت وقالت
مروان قولي هو باباك عرف كام واحده من بعد ما طلق مامتك..
مروان
يووووه كتير اخرهم من شهر بس هو مش بيقولي يعني انا بعرف بالطريقه..
جميله بغيظ
خايف علي اخلاقك يا روح امك، وغور ذاكر وما تتكلمش هنا تاني..
مروان
هو انا كنت كلمتك يا رخمه..
جميله
بقي انا رخمه بس اما اشوفك ان ما فليتلك شعرك اللي شبه الشرشوبه ده ما ابقاش انا يا ابو قمله..
مروان بغيظ
شايفه اختك يا ايتن انا هقفل وفعلا مش هتكلم تاني..
قفل مروان وايتن قالت بغيظ.
بقي كده يا جميله والله العظيم لاقول لماما انك معجبه بعمو عمار..
طلعت ايتن بره وجميله جريت وراها وقالت
استني يا خبث ونص انتي هنا خدي ياا بت..
ــــــــ #بقلم_الكاتبه_رحاب_القاضي ــــــــ
_ وفي بيت والدة يوسف..
كان قاعد هناك ومعاهم اخته وجوزها، اللي حطت قدامه طبق الفاكهه وقالت..
منال
اتفضل يا يوسف عرفاك بتحب التفاح الاخضر وجيبالك منه مخصوص..
يوسف
تسلمي يا منوله..
ام يوسف
جيبتلك عروسه وكلمت اهلها..
ساب يوسف التفاح من ايده وقال بجمود
ومين قالك بقي اني عايز عروسه يا امي؟..
محروس جوز اخته
دي اميره اختي اطلقت بقالها ست شهور وكانت حامل وجابت واد ومن النكد اللي كانت فيه مات وهو عنده شهرين..
يوسف
ربنا يهدي سرها او يرزقها بأبن الحلال يا محروس بس بعيد عني..
ام يوسف
يعني ايه الكلام ده انا اديت كلمه للناس..
يوسف بحده
وانا عيل صغير بقي عشان تجوزيني بالطريقه دي او حتي بغيرها، هو انا كنت قولتلك عايز اتجوز..
ام يوسف بحزن
ما قولتش بس انا حاسه بيك يا ابني وانت داخل علي الخمسه وتلاتين سنه ولسه ما خلفتش بسبب البنت الفاضيه اللي اتجوزتها..
وقف يويف وقال بعصبيه
لو سمحتي يا امي بطه ست البنات كلهم وما فيش واحده خلقها ربنا هتبقي في نظري زيها، وانا ايوه عايز اخلف وابقي اب بس من مراتي ولو هيكون من واحده غيرها فانا مش عايز، بعد اذنك..
_ قال كلامه وساب امه ومشي، واول ما ركب عربيته رد علي بطه اللي كانت بترن عليه وقالها..
يوسف
ايوه يا بطه انا جاي اهو في الطريق..
بطه
انت كنت عند حماتي مش كده؟...
يوسف بضيق
ايوه وبتسلم عليكي..
بطه بحزن
مدام مدايق كده تبقي امك جابتلك سيرة الجواز تاني..
يوسف
تجيب براحتها يا بطه المهم انا عايز ايه...
بطه بحزن
وانت عايز ايه؟..
يوسف
انتي شايفه ان يوسف ممكن يشوف اصلا واحده غيرك..
بطه بدموع
لا طبعاً...
وتابعت بحده
عشان ورحمة ابويا لو عملتها لاكون معلقااك علي باب العاصمه الجديده واخلي العيال تحدفك بالطوب لحد ما تقول يا بس..
يوسف ابتسم وقال
يالهوي علي حنية اهلك، المهم اجيبلك ايه وانا جاي..
بطه
اي حاجه حلوه..
يوسف
ما فيش احلي منك يا عسل انت..
بطه ضحكت وردت عليه
هههههه كنسل الحاجه الحلوه ويلا تعالي بسرعه...
ــــــــ #بقلم_الكاتبه_رحاب_القاضي ــــــــ
_ في مطعم راقي جداً..
كان قاعد يونس هناك مع دارين اللي كانت بتتكلم في الفون وبتقول..
دارين
تمام يا طنط الهام انا بجد مش عارفه اشكرك ازاي، مع السلامه..
قفلت معاها وقالت ليونس
تقدر تطمن يا يونس، ولادك من بكره هيرجعو المدرسه عادي..
يونس ابتسم وقال
معارفك كتير انتي برضو..
دارين
بالظبط بحب اقدم خدمات كتير لاني هحتاج كل واحد فيهم بعدين وزي ما انت شايف بمكالمة فون واحده حليتلك المشكله بتاعتك..
يونس بهدوء
شكراً واي وقت تحتاجي فيه حاجه انا جاهز للرد..
مسكت ايده وقالت
انت بالذات انا مش عايزه منك رد..
سحب ايده منها وقالها بجمود
قوليلي بقي ايه حكاية عمار المنشاوي ده، وازاي سايب ابوه قااعد في منطقه شعبيه وهو عنده الفلوس دي كلها..
بدات دارين تكمل اكلها وردت عليه
هو مش سايبه بمزاجه، المنشاوي ده اسم بس انما الفلوس اللي عند عمار دي بتاعت مامته مرات المنشاوي الاولي..
يونس بفضول
ازاي يعني مش فاهم؟..
دارين
المنشازي كان راجل فقير ايوه بس جدع اتجوز بنت مديره في الشغل وخلف عمار، بس هي ماتت وهو اتجوز واحده من قرايبه وخلف منها زكريا المنشاوي..
يونس بفضول
زكريا المنشاوي انا اول مره اسمع عنه؟..
دارين
مجرم خطير بيتأجر عشان يخلص اي شغل شمال، وليه عدو واحد في حياته وهو عمار اخوه لان المنشاوي لما عمار كبر خلااه يمسك كل شغل امه وزكريا ابن الست الفقيره طلع من المولد بلا حمص بس زكريا افتكر ان عمار سرق حقه كدب الكدبه ان ليه ورث وصدقها..
يونس بجمود
انا هدخل الصفقه وهكسبها بس مش لوحدي هيكون معايا شريك..
دارين بفضول
مين الشريك ده ؟..
يونس بخبث
زكريا المنشاوي...
_ تفتكرو ايه اللي ناوي عليه يونس؟...
ـــــــــ #بقلم_الكاتبه_رحاب_القاضي ـــــــــ
_ وفي بيت المنشاوي...
كان قااعد عمار ومعاه ابنه مروان مع باباه المنشاوي وقاله..
عمار
هو هيتأخر اكتر من كده..
المنشاوي
قالي جاي مش عارف ايه اللي اخره، المهم مروان هيبات عندي النهارده..
مروان
اكيد طبعا يا جدو وانا كمان جيبت معايا شنطة هدومي وهفضل معاك اسبوع بحاله..
المنشاوي
جدع يا حبيب جدك....
_ في الوقت ده دخل زكريا واول ما شاف عمار، اتنهد بضيق وقال..
زكريا
خير جايين عايزين ايه؟..
عمار
بيت ابويا واجي وقت ما انا عايز؟..
زكريا بسخريه
حتي دي كمان عينك فيها انت الطمع لو سابك هيروح لمين بس..
وقف عمار وقاله بحده
واخرتها مليون مره اقولك تعالي واشتغل معايا وهديك مرتب كبير وتبقي بني ادم محترم..
زكريا
اجي اشتغل عندك في حقي، لا انسي انا هاجي شركاتك دي بس وانا المدير بتاعها، ووقتها تيجي انت هنا وتخدم ابوك العاجز ده..
_مسكه عمار من هدومه جامد وذقه علي الحيطه، وحاول زكريا يبعده وقال..
زكريا بعصبيه
اوعي يا عممم..
مروان بخوف
خلاص يا بابا عشان خاطري..
عمار بحده
عارف يا زكريا لو ما احترمتش نفسك مع ابوك هربيك من اول وجديد انا صابر عليك عشانه هو وبس، انما اقسم بالله هتسوق فيها هوصلك لحبل المشنقه بنفسي..
زكريا بحقد
لا ما انا هوصله بس وانا واخد روحك يا عمار..
بصله عمار بحزن وبعد عنه وقال
انا قولتلك اللي عندي فاتظبط احسنلك.. مروان خد بالك من جدك..
_ قال كلامه وسابهم ومشي، وكان راكب عربيته مدايق وفي لحظه جات في باله جميله وتلقائياً ابتسم ومسك موبيله وكلمها..
_وفي بيت جميله كانت مقعده ايتن قدام المرايه وبتسرحلها شعرها..
ايتن بغيظ
كفايه يا جميله ما حدش كان قالك اني اتشليت ومش هعرف اسرح شعري..
جميله
والله ابداً مش انتي منزلي استوري وبتقولي ناقصني اهتمام، انا اهو بهتم بيكي..
ايتن ببكاء
يا ستي ما كنتش اقصد الاهتمام بشعري وما كنتش اقصدك انتي اصلا، ده انا كتبت كده عشان مروان يدخل يكلمني..
جميله باهتمام
يعني انتي لما تكتبي كده هو هيدخل يكلمك، طيب ده بالنسبه للسخطه بتاعتك ابوه بقي اخليه يكلمني ازاي..
ايتن
سيبي المشط ده وتعالي انا هقولك، انتي تتنكي عليه وتتجاهليه الرجاله بتحب البنت التقيله..
جميله بسخريه
لا لا انا ما اعرفش اغير من شخصيتي، ما اعرفش ما اضحكش في وش اي حد بيكلمني او يكلمني وارد عليه بتناكه لا لا ما اعرفش..
ايتن ابتسمت وقالت
انتي طيبه اوووي يا جميله، واصلا تستاهلي حد احسن من عمو عمار..
جميله
فين ده اللي احسن منه انا يا اوختشي مش شايفه احسن منه..
_ في الوقت ده موبيلها رن برقم عمار، وقفت جميله بسرعه وقالت..
جميله
عمار عموري عماميرو بيكلمني..
ايتن
طيب ردي عليه شوفيه عايز ايه؟..
جميله بتوتر
ارد ازاي طيب ما اردش احسن..
_مسكت ايتن الموبيل وردت وفحت الصوت، وعمار قال بهدوء...
عمار
الو... جميله..
جميله بتوتر
ايوه نعم..
كتمت ايتن ضحكتها وعمار قال
عامله ايه؟..
جميله
خش في الموضوع علي طول عشان كده كتير عليا وانا ممكن ااا.. كويسه الحمد لله انت عامل ايه؟..
عمار ابتسم وقال
انا كويس، ااا كنت هسألك بس انتي جايه بكره الشركه..
جميله
ايوه ليه بتسأل؟..
عمار
يعني قلقت لتكون مامتك رفضت تخليكي تيجي بسبب اللي حصل الصبح..
جميله
لا لا الموضوع خلص خلاص بس يارب يكون خلص في الشركه كمان..
عمار
انا اتصرفت والكل بقي عارف ان ما فيش بينا حاجه وانك قريبتي وبس...
جميله بضيق
امم طيب كويس..
عمار بهدوء
طيب انتي عايزه حاجه؟..
جميله
ايوه عايزه..
ابتسم عمار وقال
عينيا ليكي اؤمريني..
جميله
قولي في جنبك اي سوبر ماركت؟..
بص عمار حواليه وقال
ايوه في واحد هناك اهو؟..
جميله
طيب بص روح معلش هاتلي انا وايتن اتنين شيبسي من ابو خمسه جنيه واتنين شوكلاته ولا بلاش هاتيلي ايسكريم شوكلاته اللي هو مش تبع المقاطعه ده..
اتصدمت ايتن وعمار ابتسم وقال
حاضر ياجميله هجيبلك اللي عايزااه، بس اجيبهملك البيت ازاي بقي..
جميله بحماس
انت بس هاتهم وتعالي عندنا واول ما توصل البيت قولي وانا هنزل اخدهم منك..
ايتن بصوت واطي
لا لا مش هينفع ماما لو شافتك هتنفخك..
جميله
بقولك تعالي بس انت وكلمني وانا هتصرف..
عمار وقف بعربيته قدام السوبر ماركت وقال
حاضر يا جميله عايزه حاجه تاني غير الشيبسي والايسكريم..
جميله
لا لا دول علي اد الميزانيه اللي معايا..
_ قفلت معاه جميله وبعد شويه كلمها لما وصل تحت بيتها وقالها..
عمار
انا اهو تحت البيت، هتنزلي؟...
جميله
لا مش هينفع عشان ماما لو شافتني هتنفخني، هنزلك السابت..
عمار
نعممم؟!..
جميله
قولي بس حساب الحاجات اللي جيبتها كام عشان احطلك الحساب بالمره..
بص عمار للفون بغيظ وقال
خلاص يا جميله مش مهم..
جميله
هو انت هتبأشش عليا هاا كام؟..
عمار بهدوء
450 جنيه..
جميله بعصبيه
نعممم يا عمر انت هتنصب عليا ولا ايه؟..
عمار بغيظ
خلاص يا جميله تعالي خديهم ومش عايز حاجه..
جميله
لا الحق حق انا طلبت اتنين شيبسي بعشره جنيه واتنين ايسكريم الواحده بأربعين جينيه تقريباً يعني كده 90 جنيه..
عمار ابتسم بقلة حيله وقال
تمام انزلي بقي عشان لو حد شافني واقف هنا هيبقي شكلي مش لطيف..
جميله
يا ابني استني قولت هنزلك السابت..
_ قفلت معاه وبعد كام ثانيه لقاها فعلاً نزلت السابت من فوق، نزل من العربيه وهو بيبص حواليه لحد يشوفه، وحطلها الحاجه بس هي قالت من فوق..
جميله
خد الفلوس الاول..
ضحك غصب عنه وقال
يا بنت المجنونه..
_ واخد الفلوس وهي رفعت السابت وجه يمشي بس اتصدم لما لقي في وشه يونس نازل من عربيته وبيبصله وبيبص لفوق بأستغراب وقال..
يونس
هو انت هو ولا حد شبهه؟؟...
عمار بص لجميله لفوق وبعدين بص ليونس وقال وهو متوتر من الموقف اللي بقي فيه؟؟...
_ تفتكرو هيحصل ايه؟
ــــــــــــــــــــــــــــــــــــــــ
#بقلم_الكاتبه_رحاب_القاضي
