رواية دمر حياتي الفصل السادس 6 بقلم خيال كاتب
الجزء السادس
...............
تاني يوم برغم اننا مجاش لينا نوم انا وماما
الا اننا الساعة 7 الصبح كنت انا وماما لابسين هدومنا ومستنين احمد يجي علشان ياخدنا ونروح ل حسن اخويا ونشوفو قبل ما يتعرض علي النيابة
الساعة 8 احمد جه ومشينا معاه وتمانية ونص كنا مستنين اخويا يجي من القسم
وفعلا شوفناه وهو متكلبش وجاي علشان يدخل لوكيل النيابة
جريت انا وماما عليه وامي اول ماراحتلة راحت حضناه وهي بتعيط
وحسن بقي عمال يحلف ان الحشيش مش بتاعة. وانه بتاع الأسطي حنفي
العسكري اللي مكلبش اخويا كان بيذعق لينا ويقولنا ممنوع وانا عمالة اقولة معلش احنا بنطمن عليه بس
شوية الأسطي حنفي جه لأن اخويا ذكر اسمة في التحقيق وجاي علشان مطلوب في النيابة
اول ما امي شافتة جريت عليه وكانت هتبوس علي رجليه علشان يقول الحقيقة عند وكيل النيابة
وانا بقيت عمالة احسبن عليه لانه هو السبب في حبس اخويا
شوية اخويا دخل لوكيل النيابة وبعد منه بشوية ندهوا علي حنفي
نص ساعة من التحقيق مع اخويا اللي خرج متكلبش بردو وعرفنا منه انه اخد 15 يوم حبس وان حنفي الريس نفي ان الشنطة بتاعتة وقال في التحقيق ان الشنطة بتاعة اخويا
روحنا البيت واحنا مقهورين وامي تعبت مني ووقعت في الشارع والناس وقفت معايا لغاية ما فوقناها واحمد صاحب حسن فضل معانا لغاية ما روحنا البيت
اول ما دخلت البيت ماما حست ان السكر علي عليها.. جريت بسرعة جبت ليها الدكتور في البيت ... اللي كشف عليها وكتب ليها علي علاج
حالة من الحزن سيطرت علينا وامي مريضة في اوضتها وبقيت عمالة افكر هنجيب فلوس منين علشان نقوم محامي ل اخويا
وافتكرت سيد اللي سابني وطفش .. وكنت محتاجة وقفتة معانا ويكون هو سندنا في المحنة والظروف دي
بعد يومين الساعة 5 بعد المغرب لقيت الباب بيخبط .. قومت فتحت لقيت احمد صاحب اخويا جه علشان يطمن علي ماما
دخلتة وسبت باب الشقة مفتوح وقعدتة في اوضة الضيوف ودخلت لماما اللي نايمة علي سريرها ومش قادرة تقوم وقولت ليها احمد بره عايز يطمن عليكي
ماما :: خليه يدخل يابنتي وانتي روحي اعمليلة الشاي
خرجت وقولت ل احمد .. اتفضل يا احمد ماما في الأوضة ... ودخلتة لماما وروحت انا اعملة الشاي
عملت الشاي ودخلتة ل احمد ... وقعد شوية وبعدين قال لماما رقمي معاكي في الورقة
ولو احتاجتوا اي حاجة رني عليا في اي وقت
بعد ما احمد مشي وقفلت باب الشقة وراه دخلت لماما وسألتها .. اعملك تاكلي
ماما :: لا مش قادرة .. انا لازم بكرة انزل الفرشة
انا :: وانتي تعبانة يا ماما هتنزلي الشغل ؟
ماما :: وانا لو قعدت يابنتي مين اللي هيصرف علينا .. انتي ناسية ان مفيش دخل لينا غير الفرشة بتاعة الخضار واخوكي اللي ربنا يفك ديقتة
انا :: يارب .. بس برضو انتي لسة تعبانة ومينفعش دلوقت خالص تنزلي السوق انتي مش حمل قعدت الشارع طول اليوم
ماما :: لسة مفيش اي اخبار علي خطيبك
انا :: لا يا ماما مفيش
ماما :: ربنا يجيب الخير يابنتي.. بقولك ايه
دلوقت انا مش عارفة ادبر فلوس المحامي ل اخوكي منين
انا :: وانا كمان ياماما عمالة افكر من امبارح ومش عارفة اعمل ايه
ماما :: انا بفكر اروح للمدعوء اللي اسمة حنفي
انا :: ياماما هتروحي لمين وليه ... انتي فاكرة انه ممكن يروح يشيل التهمة عن ابنك ويلبسها لنفسة
ماما :: طب والعمل يابنتي
انا :: مفيش قدامي غير ان ابيع دهبي اهو يمكن يحل ازمة
ماما :: دهبك ؟ لا لا افرضي خطيبك سأل عليهم
انا :: هو فين خطيبي ده بس ياماما ده راح وقال عدولي
ماما :: برضو يابنتي مينفعش
انا :: لا ياماما انا هبيع الدهب واخويا يبقي لما يطلع يجبلي احسن منهم
تاني يوم صحيت الصبح لقيت امي راحت علي فرشة الخضار وانا علي الساعة واحدة الضهر لبست هدومي وروحت علشان ابيع شبكتي علشان اقوم بفلوسها محامي ل اخويا
وانا ماشية كان الزفت رجب قاعد علي القهوة واول ما شافني قام جري من علي القهوة وجالي ووقف قدامي
رجب :: قلبي عندك ياسهام
انا :: نعم ؟ انت بتكلمني انا
رجب :: هو فيه غيرك قدامي ؟ اه بكلمك انتي... ايه مفيش اخبار علي اخوكي
انا :: طب بعد اذنك عايزة امشي
رجب :: بقي كدة ... مسيرك تحني يا بطل انت
مشيت وروحت بعت الدهب وعديت علي ماما قعدت معاها شوية وكانت تعبانة علي الأخر وحاولت اخدها معايا البيت لكنها رفضت
روحت البيت وبعدين افتكرت احمد صاحب اخويا .. دخلت الأوضة بتاعة ماما ودورت علي الورقة اللي كان سايب فيها رقمة وفعلا لقيتها تحت مخدة ماما اخدتها وروحت الأوضة بتاعتي واتصلت بيه وطلبت منه انه يدور علي محامي يكون كويس وفي نفس الوقت يكون حنين في الأتعاب ده لو مش هيضايقة
رد عليا انه هيشوف ويرد عليا علي الرقم اللي بتصل عليه منه
قفلت مع احمد ... وبعدين قولت اجرب اتصل ب سيد يمكن يرد . لكن تليفونة كالعادة مغلق
بالليل بعد ما ماما جات وكانت تعبانة علي الأخر عملت ليها الأكل واديتها العلاج وبعدين غسلت رجليها بمياه سخنة وعرفتها اني اتصلت بااحمد صاحب حسن اخويا وطلبت منه يشوف محامي
تاني يوم احمد اتصل بيا وقالي انه هيعدي عليا بعد المغرب علشان هنروح انا وهو نقابل محامي قالوا عليه واحد صاحبة وقالي انه بيقولوا انه محامي شاطر وكمان الأتعاب بتاعتة مش كبيرة
روحت لماما الفرشة بتاعة الخضار وعرفتها باللي قالوا احمد وماما قالت انها هتيجي معانا
وفعلا قبل المغرب بساعة ماما لمت الفرشة وروحت وعلي المغرب احمد جه البيت وانا وماما لبسنا واخدنا تاكس وروحنا للمحامي
المحامي بقي عمال يسألنا اسئلة احنا منعرفش عنها حاجة .. زي اتمسك ازاي والشنطة كانت معاه ولا كانت جنبة والحرز قد ايه بالظبط واقوالة كانت ايه في المحضر وفي النيابة
وقال انه هيروحلة بكرة ويعرف منه بعض التفاصيل وبناء علي اللي هيشوفة في محضر القسم والنيابة هيشوف الخطوات اللي المفروض هيعملها
انا :: طيب احنا محتاجين نزوره
المحامي :: حاضر هعملكم اذن بالزيارة
مشينا من عند المحامي روحنا بيتنا واحمد روح علي بيته
بعد يومين المحامي اتصل بيا وطلب مني اروحلة المكتب علشان يديني اذن الزيارة
اللي عملة ليا ول ماما
لبست هدومي وروحت للمحامي المكتب اخدت منه التصاريح ومشيت
وانا راجعة كانت الساعة التاسعة بالليل شوفت الزفت اللي اسمة رجب واقف علي ناصية الشارع هو وشلة الصيع اللي علي طول بيقف معاهم
عديت من جنبة ووشي في الأرض وهو راح موطي جنب وداني وانا معدية وقالي
اموت وابل القرموط ... يابختك يا سيد
مشيت بسرعة وانا من جوايا مخنوقة اوي منة وعارفة انه بيلقح بالكلام عليا
روحت البيت لقيت ماما مرمية علي الأرض
اول ما شوفتها روحت راقعة بالصوت
لقيت جارتي اللي فوق مني وجوزها عم محسن نزلوا جري علي صويتي وانا بحاول افوق ماما
عم محسن في ايه ياسهام يابنتي مالها مامتك
انا :: معرفش يا عم محسن انا رجعت من برا لقيت ماما مرمية علي الأرض كدة
نصرة :: اجري يا بنتي هاتي من المطبخ بصلة بسرعة
جريت علي المطبخ جبت بصلة وقطعتها بالسكينة وخالتي نصرة بقت عمالة تشمم ماما البصلة
عم محسن :: هي مامتك عندها السكر ؟
انا :: وانا عمالة اعيط ايوة ياعم محسن
عم محسن :: روحي يا نصرة بسرعة هاتي باكوا عصير من سليمان البقال اللي بره
نصرة جريت علي الشارع وجابت باكو العصير بسرعة وانا قعدت تحت راس امي ورفعتها لفوق شويه وخالتي نصرة بقت بتحط الشفاطة بتاعة العصيرة في بوق ماما وتضغط علي العلبة بأيدها علشان العصير
ينزل في بوقها ومعدتها
مفيش عشر دقايق ماما بدأت تفوق وجسمها اللي كانت متخشب فك
ماما :: هو فيه ايه
عم محسن :: حمدللة على سلامتك
انا :: حمدللة على سلامتك يا حبيبتي
انا وخالتي نصرة سندناها دخلناها اوضتها
ماما :: هو ايه اللي حصل
انا :: معرفش يا حبيبتي انا رجعت من عند المحامي لقيتك مغمي عليكي ولولا عم محسن ربنا يستره هو ومراته خالتي نصرة انا مكنتش عارفه اعمل ايه ولا اروح لمين
ماما :: ربنا يخليكي يا نصرة ياختي ويقعدلكم في عفيتكم وصحتكم ونقف معاكم في الفرح
نصرة :: يخليكي يارب وتقومي بالف سلامة
يلا بقي فتكم بالعافية انا
انا :: استني يا خالتي اعملكم الشاي طيب
نصرة :: معلش يابنتي انا سايبة الأكل علي النار ونزلت جري انا وعمك محسن لما سمعت صويتك... عقبال ما نشرب شربات فرحك انتي وسيد يا حبيبتي....
يتبع.....
