رواية دمر حياتي الفصل الثاني 2 بقلم خيال كاتب
الجزء الثاني
دخلت الحمام اخدت دش وبعدين لبست هدومي ونزلت الكوافير اللي جنب بيتنا
كانت البت اللي شغالة فيه اسمها منال وكانت بيني وبين منال صداقة
دخلت وطلبت منها تعملي شعري علشان النهاردة فيه عريس جاي متقدملي وعايزة اكون مميزة في اليوم ده
منال فضلت تزن علي دماغي علشان تعرف مين العريس اللي متقدملي وانا بهزر معاها وبقولها مش قايلة وفضلنا نهزر وفي الأخر طبعا قولتلها
قالتلي الف مبروك قعدتني علي الكرسي وبدأت في تظبيط شعري ووشي وكدة
وبعد ما خلصت .. بسألها علي الحساب رفضت تاخد مني اي فلوس
خرجت من عندها وروحت البيت اللي هو علي بعد كام خطوة من الكوافير
كانت الساعة تقريبآ واحدة الضهر
لقيت اخويا حسن جه من برا وقاعد بيشرب الشاي. واول ما شافني راح مصفر وقالي اش اش ايه القمر اللي دخل عليا ده انتي مين يا جميل
ابتسمت ابتسامة خجل وكسوف. لقيتة قام واخدني في حضنة وقالي ربنا يتمملك بخير يا حبيبتي ويجي اليوم واوديكي بأيدي لعريسك بوست ايد ودماغ اخويا حسن. وقولتلة ربنا ما يحرمني منك يا احلي اخ في الدنيا واشوفك انت كمان جنب عروستك
ودخلت اوضتي
وماما خرجت من الأوضة وراحت وخداني في حضنها وعيونها مدمعة من الفرحة
الساعة سبعة بالظبط كان ميعاد سيد مع اخويا جه وقلبي بقي عمال يدق في انتظار
سيد .
.اخويا كان لابس جلابية بيضة ومكوية ومتشيك علي الاخر وكان في انتظار وصول سيد
مفيش عشر دقايق الباب خبط
قلبي كان بيدق وهيخرج من ضلوعي اول ما سمعت صوت سيد وهو بيسلم علي اخويا
كنت في الأوضة ومواربة الباب وببص عليهم من فتحة صغيرة ما بين الباب والحطية
اخويا وسيد دخلوا اوضة الضيوف وانا خرجت جري وقفت ورا الباب علشان اسمع الكلام اللي بينهم
ماما شافتني وهي في المطبخ وفضلت تضحك وندهت عليا بصوت واطي وشاورت ليا اني اجي اقف معاها في المطبخ علشان انا اللي هدخل الشربات لما اخويا ينده عليا
بعد عشر دقايق اخويا خرج وقال لماما انتي قاعدة هنا ليه مش تيجي تقعدي معانا علشان تبقي حاضرة اتفاقنا علي جواز بنتك.. ماما قالت له يا بني انت اخوها ومربيها واللي هتشوفة وهتوافق عليه انا كمان موافقة عليه ...لكن حسن اخويا اصر علي وجود ماما معاه وتحضر اتفاقة مع سيد وقالها يا امي احنا ملناش لازمة من غيرك وكلمتك اهم من كلمتي
ماما مع اصرار حسن ورغبتة في حضورها الاتفاق بينهم راحت معاه وقعدت معاهم
فضلت انا في المطبخ علي اعصابي وكل شوية ادخل واخرج لغاية ما سمعت ماما بتزغرط
كنت هطير من الفرحة ومبقتش عارفة المفروض اعمل ايه
لقيت ماما خرجت وقالتلي روحي دخلي الشربات لخطيبك
وانا بدخل الشربات كنت حاسة ان الكوبيات هتقع من رجفة ايدي واعصابي اللي كانت سايبة خالص
دخلت وحطيت الصنية علي الطرابيزة. واخويا ضحك وقالي قدمي ل خطيبك الأول يا ناصحة
مسكت الكوباية وايدتها ل سيد خطيبي وبصيت في الأرض لقيت اخويا بيقولي مبروك يا سهام احنا قرينا فتحتك علي سيد والشبكة هتبقي الأسبوع الجاي
انا بسمع كلام حسن اخويا وعيني مش مرفوعة من عالأرض بسبب كسوفي وارتباكي
حسن :: اعملي حسابك هتنزلي انتي وسيد ومامتك يوم الأربع اللي جاي تشتروها
وسيد امكانياتة انة هيجيب دبلة ومحبس وغويشة واحدة
سيد :: ده في الاول بس علشان ظروفي اليومين دول بس لما ربنا يفتح عليا والظروف تتحسن مش هبخل عليكي باي حاجة ولو طولت اجبلها نجمة من السما مش هتأخر
حسن :: اختي يا سيد متربية وبنت ناس وهتتحمل ظروفك طالما هتعاملها كويس وبما يرضي ربنا واكيد مش هتبخل علي بيتك طول ما ظروفك كويسة
سيد وانا هشلها فوق دماغي ومش هخليها تحتاج اي حاجة
حسن :: طب انا هخرج اقعد في الصالة
خليكم انتوا واتكلموا مع بعض
كان نفسي اقوم اخرج جري مع اخويا لاني متعودتش اقعد مع حد كدة واخويا كمان برا
حسن خرج وساب الباب مفتوح وكان قاعد قصادنا وشايفنا من برا
سيد :: ما تيجي تقعدي جنبي انا خلاص بقيت خطيبك
انا قومت وقعدت جنبة وايدي متشبكة في بعضها بين رجلي وباصة علي الطرابيزة اللي قدامي
سيد :: انا مش عايزك تتكسفي مني وبعدين انا اللي اعرفة ان لسانك شبرين مش متعود اشوفك كدة
انا ابتسمت من كلامة ليا وبصيت له وعنيا كلها خجل
سيد:: يخرب بيت جمالك انا مش مصدق اني خلاص خطبتك وهتكوني ليا
انا :: يعني انت مبسوط انك خطبتني
سيد :: مبسوط بس .. انا طاير من الفرحة انك وافقتي عليا .. عارفة لو مكنتيش وافقتي عليا كنت هموت
انا :: بصوت واطي وضربات قلبي حاسة انها بتجري من الكسوف قولتلة يعني انت بتحبني اوي كدة
سيد :: امال انا ايه اللي جابني هنا علي ملا وشي غير قلبي اللي اتعلق بجمالك
فضلنا نتكلم ونحكي ومع الوقت بدأت رهبتي واحساسي بالخوف يتلاشي شوية شوية وبقيت بتكلم معاه بدون خجل او كسوف
ماما دخلت علينا ومعاها طبقين حلويات وكاسين حاجة ساقعة وخرجت .. مسكت طبق حلويات واديتة ل سيد .. قالي انا معايا الحلويات الرباني كلها هيبقي نفسي. للحلويات دي
اتكسفت من حلاوة كلامة ليا وحسيت اني ملكت الدنيا بحالها
شوية لقيت ماما فتحت باب الشقة ووقفت قدام الباب وفضلت تزغرط
الناس والستات بدأت تسأل ماما عن سبب الزغاريط بتاعها وهي قالتلهم سهام عقبال عندكم
مفيش عشر دقايق لقيت نسوان الشارع عندنا في الشقة اللي تزغرط واللي تبارك والليلة بعد ما كانت علي قدنا بقت ولا المولد
حسن اخويا خرج اشتري صندوقين حاجة ساقعة من البقال اللي في شارعنا. وبقي بيفتح للستات الساقع
وشغل اغاني بصوت عالي والليلة قلبت ل فرح حقيقي وبجد
ماما كانت قاصدة تعمل كدة علشان حاجتين
اول حاجة علشان لو سيد وقفني في الشارع محدش يتكلم وبكدة تبقي قطعت لسان الناس وعرفتهم ان سيد خطيبي
الحاجة التانية علشان عارفة ان ده هيحصل وكانت عايزة تفرحني وتعملي ليلة زي ليالي الأفراح
النسوان بقت ترقص. وشدوني علشان ارقص معاهم وفعلا قومت رقصت وكنت كل شوية ابص علي سيد القيه بيبصلي وهو دايب مع حركات جسمي اللي بتتهز قدامة
كانت ليلة عمري ماكنت اتخيل انها هتبقي بالجمال ده وبجد اتحولت مية وتمانين درجة
فضلنا طول الليلة دي بين الرقص والأغاني وزغاريط الستات لغاية الساعة 11 بالليل وكان الكل بقي بيمشي واحدة ورا واحدة
ماما بعد ما الناس مشيت دخلت عملت العشا لينا انا وسيد وحسن اخويا وهي .. اتعشينا وشربنا الساقع
وبعدين سيد خطيبي لما لقي الوقت اتأخر هو كمان استأذن اخويا ومشي
حسن قال لسيد انه بكرا يعمل حسابة انة هيتغدا معانا
سيد طبعآ مرفضش ووافق علي طول
وبعدها مشي
بعد ما كلة مشي لقيت ماما مش قادرة تقف علي رجليها من التعب ومصدقت ما قعدت
روحت ارتميت في حضن ماما وبوست ايديها علي اللي عملتة معايا في الليلة دي وكمان بوست ايد اخويا اللي بجد عمرة ماقصر معايا وديما بيكون ضهري وسندي في الدنيا
وبعدين دخلت اوضتي غيرت هدومي ولبست هدوم البيت وخرجت روقت الشقة وخليت الشقة تمام
ماما دخلت نامت وحسن اخويا كمان دخل نام وفضلت انا سارحة في سيد وفي خطوبتنا والليلة الجميلة بتاعة النهاردة .. فضلت صاحية لغاية الفجر وبعدين دخلت نمت
تاني يوم كنت صحيت وماما مارحتش فرشة الخضار نزلت انا اشتريت حاجات الغدا وجبت لحمة من الجزار
وطلبات الطبيخ ورجعت
خلصنا عمل الغدا علي الساعة 1 كدة وقومت اخدت دش ولبست هدومي وخرجت
ودخلت اوضتي قبل ما سيد ما يجي
جهزت نفسي واتشيكت في الوقت ده كان سيد جه وقاعد مع اخويا في اوضة الضيوف وماما بتجهز الأكل
خرجت وروحت سلمت علي سيد وبعدين روحت اساعد ماما في تجهيز الاكل والأطباق وكدة
اخويا جاب ملاية فرشها علي الأرض وبيقنا انا وماما بنجيب الاكل من جوا واخويا يحطة علي الأرض علشان مكنش عندنا سفرة ولا الكلام ده زي اولاد الزوات وكدة
كنا بناكل علي الأرض والبساط احمدي
حسن بعد ما خلصنا تجهيز الغدا وحطينا كل حاجة دخل ل سيد وندهلة وقعدنا ناكل
بعد ما خلصنا غدا سيد قام غسل ايدو وحسن وبعدين راحو دخلوا تاني اوضة الضيوف وانا دخلت قعدت مع خطيبي
وفضلنا نتكلم وحسن قال ل سيد انت ناوي تيجي يوم الأربع امتي
سيد قالة علي العصر كدة اكون جيت من شغلانة بعملها
نسيت اعرفكم ان سيد خطيبي شغال فني كهربائي
سيد بعد ما خلص قعدتة معانا استأذن اخويا انه عايز يخرجني في يوم
لكن حسن اخويا قالة بعد تلبيس الدبل معندوش مانع لكن دلوقت مش هينفع
وسيد قالوا خلاص مفيش مشكلة ومشي
بعد مرور اربع ايام اخويا جه من الشغل بتاعة بالليل وماما جت بعد منة بحوالي نص ساعة كدة
دخلت حطيت ليهم العشا. واتعشينا
وبعد ما خلصنا عشا ولميت الأطباق ودخلتهم المطبخ .. اخويا حسن ندهلي واداني 1000 جنيه وقالي دول تنزلي بكرا تشتري طقم حلو چيبة وبلوزة كدة حلوين وجزمة جديدة لزوم شبكتك بوست اخويا وقولتلة ربنا يخليك ليا ودخلت شلت الفلوس في الأوضة وخرجت عملت له شاي
تاني يوم لبست ونزلت علشان اشتري الطقم بتاع الخطوبة كنت رايحة اشتريه من مكان يبعد عن البيت ب اربع محطات مترو
روحت محطة المترو وانا واقفة مستنية المترو يجي لقيت اللي حاطط ايدو علي كتفي .. التفت بفزع وخوف ولسة هشتم فوجئت انه سيد خطيبي هو اللي حاطط ايدو علي كتفي وابتسملي وقالي عارفك كنتي لسة هتشتمي
حطيت ايدي علي قلبي وقولتلة اخص عليك يا سيد خضتني
سيد :: معلش يا قلبي مكنش قصدي اخضك
انا :: انت رايح فين كدة
سيد :: رايح معاكي .. انتي اللي رايحة فين ؟؟
انا :: رايح معايا فين ؟ مش هينفع يا سيد اخويا حسن لو عرف هتبقي مشكلة كبيرة
سيد :: انا خطيبك ومتخفيش انا مشيت وراكي من غير ما حد ياخد بالة
واحنا بنتكلم المترو جه وكان زحمة جدا لدرجة ان مفيش مكان ل قدم فيه
مكنتش ناوية اركب المترو بسبب الزحمة لكن سيد قالي اركبي قبل ما حد يشوفنا ويقول ل حسن
ركبت بالعافية وهو ورايا لازق فيا وايدو حولين وسطي وماسكني من وسطي
بصراحة كنت مش مبسوطة بالوضع ده ولا كنت مرتاحة نفسيآ من لذقة سيد فيا ولكن مش بايدي اني اعترض لاني شايفة الزحمة وعارفة انه غصب عنة
ولكن التصاقة فيا بقي التصاق كامل وكل شوية الناس تزوقة عليا وهو زي ما يكون مستحلي الحكاية وبيجي عليا وبيضغط اكتر
بدأت اشعر بالأثارة وشعوري تبدل من بعد ما كنت مضايقة من لذقتة فيا اتحول الي احساس بلذة ومتعة وشعور بشئ اول مرة اجربة
فضلنا علي الوضع ده لغاية ما جت المحطة بتاعتنا ونزلنا ولقيتة مسك ايدي ... حاولت ابعد ايدي عن ايدو لكنه صمم انه يمسك ايدي واحنا ماشيين وبعد شوية ساب ايدي وحطها علي كتفي
بدأت احس ان الدنيا كلها بتتفرج عليا وانا محرجة ومكسوفة .. لكنة كان مصمم انه ميشلش ايده من علي كتفي
وصلنا للمنطقة اللي كلها محالات ملابس ودخلنا اكتر من محل واشوف وانقي وهو كمان يقولي رأيه لغاية ما اشتريت طقم عجبني وعجبة
بعدين روحنا لفينا بردو علي محلات الجزم واشتريت جزمة بعد ما دخلنا تقريبآ اربع محلات
بعد ما اشتريت كل حاجة نازلة علشانها قالي ما تيجي نقعد شوية في اي مكان نشرب فيه حاجة ونتكلم شوية وبعدين نمشي .. قولتلة لا مش هينفع كدة هتأخر ومش ناقصة ازعل اخويا مني ولا امي
قالي اننا مش هنتأخر متخفيش
اتمشينا وحط ايدي تحت ايدو ( انجشة ) وبقي عمال يحكيلي عن مشاعرة وانه نفسة يغمض عين ويفتح عين ونبقي في بيتنا
وفضل يلمح عن جسمي وكدة بس طبعآ تلميح غير صريح لانه لسة الجرأة اللي بينا متسمحش بكدة
لقيت محل عصير قولتلة انا عايزة اشرب عصير
قالي بس كدة انتي بس تشاوري وتؤمري وانا عليا التنفيذ
حسيت ان بقي ليا ضهر تاني غير ضهر اخويا وفرحت اوي من جوايا بسبب كلامة اللي كان بيخرج من بين شفايفة شهد
دخلنا محل العصير وشربنا اتنين عصير قصب وبعدين اتمشينا شوية لغاية ما لقينا مكان كدة زي كافيه وفيه الشباب والبنات قاعدين عادي
قالي ما تيجي نقعد هنا شوية .. انا بصراحة كنت حاسة ان رجلي هتموتني من كتر اللف علي المحلات. وافقت علي طول
دخلنا المحل وقعدنا وهو طلب شاي وانا جابلي عصير ليمون
وفضل يحكيلي انه كان بيشوفني وانا ماشية في الشارع وانه كان بيبقي نفسة يجري عليا ويعترفلي بحبة
وانا كمان اعترفت له اني كنت معجبة بيه واني كنت بحب معاكستة ليا
وقالي انه اسعد انسان بعد ما عرف اني انا كمان كنت معجبة بيه
ومن هنا اتشال اول حاجز بيني وبين سيد وبدأت اول شرارة الحب من ناحيتي وتحول الأعجاب الي مشاعر حب حقيقية
بعد نص ساعة تقريبا طلبت من سيد اننا نمشي علشان اتأخرت
وفعلا قومنا مشينا بعد ما سيد حاسب
وروحنا لمحطة المترو
ركبنا المترو بس الحمد لله مكنش زحمة المرة دي وقعدت علي كرسي وهو قعد جنبي
والمترو مشي بينا لغاية ما وصلنا لمحطتنا قالي انزلي انتي انا هروح مشوار
نزلت وروحت البيت كان اخويا حسن في البيت فرجتة علي الهدوم وعجبتة جدا
يتبع
