.jpeg)
رواية انا وابن خالتي الفصل التاسع 9 الجزء الرابع بقلم عمرو راشد
متقلقوش على صحابكو هما معانا
= معاكم فين؟ وفين هارون؟
كلهم موجودين يا شاهر متقلقش
= موجودين فين؟
تحت الأرض
= أنتي عايزة تفهميني ان هارون نزل معاكي تحت الأرض
ماهو منزلش ب ارادته،، نزل غصب عنه
= هارون ينزل غصب عنه!!
لو مش مصدقني تعالى شوف بنفسك
" شاهر بص ليا وقالي
هنروح؟
= نروح احنا مش هنخاف يعني
" لوسيندا ساعتها سقفت ب ايدها 3 مرات ورا بعض و بحركة منتظمة،، النور قطع في ثانية،، بدأت احس بسخونة شديدة جدا،، لا دي شديدة جدا جدا جدا،، انا حاسس اني هسيح،، مكنتش قادر اتحمل كأني دخلت فرن،، حتى فرن دي قليلة كأني دخلت جهنم بس المشكلة مش هنا،، المشكلة لما بدأت احس ب دوخة وكأني هفقد الوعي،، ساعتها غمضت عيني،، الدنيا كانت بتلف بيا ولما حسيت ان كل حاجة وقفت فتحت عيني عشان الاقي نفسي فعلا في جهنم،، المكان كله باللون الأحمر،، احمر بلون الدم،، براكين النار في كل الجوانب،، شايف قدامي اشكال شكلها غريب،، وفي ناس طويلة جدا جدا وناس قصيرة جدا كأنهم اقزام لكن الحاجة المشتركة بينهم هو شكلهم،، شكلهم بشع مفيش بشر يتحمله،، وشوشهم فيها شعر زي القرود وفي أنواع تانية وشوشهم زي المسخ،، كنت حاسس ان قلبي هيقف من اللي انا شايفه،، مشيت جنب شاهر ولزقت فيه من الخوف
هو دا العالم بتاعي يا عبدالله
= الناس هنا شكلهم وحش أوي
عشان مخلوقين من النار وغير دا متنساش اننا من نسل ابليس
= يعني هتدخلو الجنة؟
المسلم هو اللي هيدخل،، احنا بنتحاسب بأعمالنا زي البشر بالظبط
= طب هو مش خطر عليك انك ترجع هنا؟
هو خطر بس انا مش هقدر اسيب هارون لوحده هنا
= وهو فين هارون؟
مش عارف والست اللي كانت معانا دي اختفت معرفش راحت فين
= قصدك لوسيندا؟
لوسيندا ولا نسرين مش هتفرق،، انا معرفش انت بتجيب الاشكال دي منين
" كنت شايف ساعتها زي طيف ل بني آدم،، بجد والله شكله بني آدم طبيعي،، بصيت ل شاهر وسألته
هو دا بني آدم اللي هناك دا؟
= بني آدم اه
وبيعمل ايه هنا؟
= ملبوس،، في جن من عندنا جواه وطالما البني ادم موجود هنا يبقا الجن اللي جواه هو اللي ظاهر في عالم الانس دلوقتي
وانتو ليه بتلبسو البني آدمين؟
= الجن اللي ملوش ديانة بس اللي بيعمل كدا
طب والغرض بيكون ايه؟
= أذ*ية البشر عادي
وانتو بتكر*هو البشر؟
= لا عادي مبنحبش ومبنكرهش
يعني ايه؟
= عبدالله مش وقته الكلام دا،، ابقا روح اسمع بودكاست عن عالم الجن،، خلينا نشوف المصيبة اللي احنا فيها دي
طب تفتكر ممكن نلاقي هارون فين؟
= هارون مش هنا اصلا
نعم؟،، اومال فين؟
= هارون واهلك محدش فيهم جه هنا،، لوسيندا ضحكت علينا
وانت عرفت منين؟
= لانهم لو نزلو تحت الأرض كانو هيعدو من الطريق دا،، وطالما هارون معاهم يبقا اكيد كانو مجموعة كبيرة جدا عشان يقدرو على هارون و لو خدت بالك من الأرض تحتك مش هتلاقي اثار خطوات كتير
يعني ايه؟
= يعني احنا لازم نرجع وبسرعة
ازاي طيب؟
" في اللحظة دي لقينا مجموعة بتقرب علينا،، كانو طوال جدا وكل واحد فيهم ماسك سلا*ح في ايده،، قربو علينا ومن غير ما حد فيهم ينطق،، القائد بتاعهم كان ماسك سي*ف وفي ثانية ضر*ب شاهر بيه،، شاهر وقع على الأرض،، جريت عليه بسرعة عشان أحاول أساعده يقوم
متقلقش يا حبيبي انا كويس
= شاهر احنا لازم نمشي دلوقتي
وهو كان مين اللي جابنا؟ اخلص بس الحر*ب دي وهساوي وش امك بالاسفلت
" شاهر قام وقف ولسة هيكمل لكن ساعتها شوفت كائن ضخم جدا كان طاير بسرعة كبيرة جدا جدا وبيقرب علينا،، وفي ثواني فعلا كان وصل وبدأ يلف حوالين المجموعة اللي كانت بتحا*ربنا لحد ما ظهر غبار شديد جدا جدا بعدها اتحرك وقرب علينا وشالنا وطار،، شاهر كان جنبي ولقيته فجأه خرج من الجسم البشري اللي كان فيه ونزل من على ضهر الكائن الضخم وطار جنبه،، بدأت احس بالدوخة في اللحظة دي وعشان كدا غمضت عيني لمدة دقيقة بالظبط ولما فتحت لقيت نفسي في مكان اشبه بالكوخ،، كان حواليا هند و مروان و شوفت الكائن الضخم اللي كنت طاير على ضهره واتضح ان دا هارون،، عرفت دا لما رجع لجسمه البشري تاني هو وشاهر،، هارون ساعتها بص ل شاهر بغضب وقاله
انت رايح هناك تعمل ايه؟
= انا كنت رايح عشان انقذك
تنقذني من ايه بالظبط؟
= انا رجعت البيت ملقتش حد،، لقيت لوسيندا هي اللي هناك وقالتلي انكو تحت الأرض
واحنا من امتا بنصدق لوسيندا؟
= انا كنت قلقان عليك ومفكرتش ساعتها
اتعلمت الخوف من البشر يا شاهر ولا ايه،، انت كنت ممكن تمو*ت هناك لولا انا جيت وانقذتك
= انا متعلمتش الخوف بس انت صاحبي يا هارون ثم وايه يعني لما امو*ت فداك،، المهم مسيبكش لوحدك،، هو دا اللي انا اعرفه
" هند اتكلمت ساعتها وقالت
خلاص يا جماعة حصل خير
" شاهر رد عليها وقال
لا محصلش خير
" شاهر بص ل هارون وقاله
انا مبخافش يا هارون ولا اتعلمت الخوف زي ما بتقول،، انا قادر اهد الدنيا على اللي فيها دلوقتي حالا،، أسأل نفسك سؤال واحد وقول هو ليه شاهر جه معايا و دخل في كل الحرو*ب دي؟،، حرو*ب هو ملوش علاقة بيها اساسا،، دخل كل دا ليه وعشان مين؟،، عشانك انت يا هارون بس،، عشان انت صاحبي
" هند رجعت تتكلم تاني مع شاهر وقالتله
يا شاهر احنا كنا خايفين عليك،، مينفعش حد فينا ينقص،، هارون هو اللي جابنا المكان دا عشان مكنش عايز يسيبنا لوحدنا لانه كان بيدور على التعويذة اللي هيحبس بيها لوسيندا واللي معاها
" مروان دخل في الحوار وقال
بص يا شاهر اللي انتو بتعملوه دلوقتي دا مينفعش في جميع الاحوال،، لوسيندا هي اكتر واحدة مستفيدة لو انفصلنا عن بعض،، احنا بنكسب عشان احنا مع بعض وبنخاف على بعض،، فاهمني
" انا كمان قربت من هارون وقولتله
هارون وشاهر اقوى اتنين في عالم الجن مينفعش يتفرقو،، انتو الاتنين بتحمونا قبل ما تكونو بتحمو بعض،، لازم نفضل مكملين لحد الاخر
" هارون بص ل شاهر وقاله
بس دا هيكون اخر موسم ولا ايه يا شاهر؟
= ايوا اخر موسم،، انا ورايا ليالي الحلمية بتتعاد دلوقتي مش هبقا فاضي
مش ليالي الحلمية دي كافيه؟
= ايوا ماهو في الحلمية
" رديت أنا على شاهر و قولت
ايوا دا اللي جنب ام سميرة بتاعت البير*ة
= لا دا اللي قدام ام علي اللي بتعمل ام علي
دا على ناصية عن محروس بتاع البسبوس
= ايه البسبوس دا؟
اللي هي البسبوسة يعني
= لا يا حبيبي متتحسبش
لا والله تتحسب
= متتحسبش يا عبدالله وانا قولت كلمة خلاص
لا والله دا ظلم ومش هلعب معاك تاني،، وهجيب العيال يرمو عليك طوب
" مروان اتكلم ساعتها وقال
طيب يا جماعة بعيدا عن موضوع الطوب احنا عايزين نعرف الشيخ اللي انتو روحتو عنده دا قال ايه؟
" رديت أنا عليه
قال اننا لازم نقفل الباب اللي فتحناه عشان كل حاجة ترجع زي الأول
= يعني ايه؟
" هارون رد
يعني السر كله هيبقا في التعويذة اللي انا بدور عليها لإني لو لقيتها هقدر اقفل الباب دا
" هند ردت عليه وقالت
بس اكيد دا مش قصده،، تقريبا هو قصده على القصر
" رديت عليها
مالو القصر؟
= قصده اننا نهد القصر يعني
لا طبعا
= مش شايفة حل تاني غير كدا
" شاهر اتكلم ساعتها وقال
خلاص احنا بكرا الصبح نبعت نجيب 10 عمال صحتهم حديد ويهدو القصر
" مروان رد عليه
هو مش المفروض انك جن وتقدر تهد القصر دا في ثانية؟
= بس صحتي مش حديد
" قربت انا من شاهر وقولتله
عارف ليه صحتك مش حديد،، عشان مبتاكلش زبادي دانون،، دانون هو الأساس،، دانون هو الاختيار المثالي
= بالفعل لقد كنت اعاني من الكسل والضعف الشديد ولكن بعد أن تناولت زبادي دانون أصبحت اعاني من الكسل والضعف الشديد جدا
" هند اتكلمت وقالت
مفيش حل غيرك يا شاهر،، انت اللي لازم تروح القصر وتهده
= وافرض حد شافني؟
استخبى في الجنينة يااخي عادي
= افرضي حد خرج من القصر وقفشني وأنا مستخبي وقالي بتعمل ايه يالاا في الجنينة بتاعتي
" مروان رد وهو بيزعق
ياعم انت جن،، والله العظيم جن يعني ممكن محدش يشوفك اصلا و بعدين مفيش في القصر كله غير لوسيندا
= انا من رأيي نخليها بكرا
ومين هيستناك ل بكرا؟
" هارون رد عليه وقال
افضل حل يبقا بكرا فعلا عشان محدش هيتوقع اننا نعمل كدا بالنهار
" بصيت ساعتها ل هند باستغراب وقولت
اومال خالتي و هارون الصغير فين؟
= في بيت واحدة قريبتنا،، هارون هو اللي اقترح كدا عشان نبعدهم عن العيون تماما
وهما كدا في امان يعني؟
" هارون رد عليا وقال
نتمنى انهم يبقو في امان
" قعدت على مرتبة كانت في الارض وفردت جسمي عليها،، كنت مرهق جدا جدا ومحتاج انام،، وفعلا مخدتش وقت كبير وكنت نمت،، صحيت تاني يوم على صوت هند وهي بتصرخ،، قومت بسرعة واتنفضت من مكاني
يعني ايه يا ماما؟،، هارون فين؟
" هند قفلت المكالمة و رمت التليفون بعيد وقالت وهي بتعيط
ماما بتقول ان لوسيندا راحت عندها وخط*فت هارون!!
#عمرو_راشد
#انا_وابن_خالتي 4 " لعنة المفاتيح السحرية " 9
#يتبع
