رواية يوميات عروسة في بيتها الجديد الفصل الرابع 4 بقلم عادل عبد الله
الحلقة الرابعة
دخلنا نشوف مين اللي بيتصل بمحمود .شوفنا حاجة مستحيل حد يتوقعها ...
بنبص في موبايل محمود لقينا رقمي بيرن عليه وموبايلي جنبه عامل اتصال عليه !!!!!!!!!!!!
قعدنا احنا الاتنين بنبص لبعض ومش عارفين نلاقي تفسير .
تليفوني اتصل بتليفون محمود لوحده والتليفونين موجودين في اوضة فاضية واحنا الاتنين قاعدين مع بعض .
بعد تفكير طويل محمود قالي متخافيش يا ريهام احنا يمكن علشان مش شغلنا قران في البيت .لازم نشغل قران .
فعلا شغلنا قران وفعلا قعدنا بعدها عدة ايام مفيش اي حاجة غريبة حصلت .وكانت ايام حلوه لدرجة اني بدأت انسي الموضوع شوية .
بعد ٦ ايام من الجواز محمود اخدني وسافرنا مصيف عشر ايام .
عدت ايام المصيف علي خير والحمد لله ومحصلش اي حاجه غريبة لحد ما رجعنا بيتنا تاني .
لما رجعنا البيت سمعت جرس الباب .استغربت لان انا عارفة ان العمارة كلها مفيش حد قاعد فيها واحنا اول ناس نعيش فيها .اغلبها شقق ناس اشترتها ولسه مش سكنوا فيها علشان المنطقة لسه جديدة .
المهم فتحت باب الشقة لقيت سيدة في بداية الثلاثينيات بتقولي : انا اسفة اني ازعجتك .انا جارتك الجديدة هنا في الشقة اللي قدامك لسه جاية من يومين كنت عاوزة منك كبريت لو سمحتي علشان الوقت اتاخر ومش عاوزه انزل دلوقتي .
قلتلها اهلا وسهلا انا كمان لسه ساكنه هنا جديد .ثواني اجيبلك الكبريت .دخلت جبتلها الكبريت واديته لها وبعدين هي راحت لباب شقتها ولكن انا لاحظت حاجة غريبة قبل ما تدخل .....
لاحظت ان شقتها من جوه فيها ضوء بيتحرك زي ما يكون ضوء شمعة !!!
فكرت ليه هي بتسأل علي كبريت وعندها شمع مولع جوه ؟
بعد تعجب واندهاش وتفكير قلت يمكن تكون عاوزه تتعرف عليا وبتعملها سبب للتعارف .
دخلت شقتي ومحمود سألني مين اللي كان علي الباب حكيت له اللي حصل محمود اندهش بردو لنفس السبب .
محمود قالي طب سيبك من جارتنا دلوقتي تعالي عاوزك في موضوع مهم .ضحكنا احنا الاتنين ودخلنا غرفتنا ونمنا ونسينا موضوع جارتنا .
تاني يوم كان اول يوم محمود يروح شغله بعد اجازة الجواز .
جهزتله لبسه ولبسته وكان زي القمر وبعدين علي الباب مسك ايدي وقالي هتوحشيني اوي يا قلبي قولتله وانت اكتر يا حبيبي .
خرج محمود وراح لشغله وانا قعدت رتبت البيت وبدات اجهز الاكل اللي بيحبه علشان لما يرجع من شغله .
كانت الشقة ساكته خالص مفيش صوت .روحت مشغلة اغاني رومانسية من اللي بحب اسمعها وبعدين فتحت التليفزيون علي برامج المطبخ علشان اتعلم اكلات حلوه علشان محمود حبيبي.
عليت صوت التليفزيون علشان اسمعه وانا في المطبخ لكن فجأة الصوت سكت وسمعت جرس الباب في نفس الوقت .
ببص علي التليفزيون لقيته اتقفل لوحده استغربت لان معني ان الجرس شغال ان الكهربا مش قطعت .
فتحت باب الشقة لقيت جارتي بتقولي انتي كنتي فين كل ده انا برن عليكي جرس الباب من بدري .
قولتلها : معلش اعذريني صوت التليفزيون كان عالي .
: ايوه فعلا كان عالي اوي كنت سمعاه من بره الشقة .
: تعالي اتفضلي .
: لا شكرا يا حبيبتي .كنت عاوزة اشكرك علي موقفك معايا البارح .
: لا شكر علي واجب وبعدين انا معملتش حاجه .تعالي اتفضلي .
: لا علشان الحق اعمل اكل للاولاد قبل ما يرجعوا من المدرسة .
ابتسمتلها وقولتلها : ربنا يخلهوملك .انا عموما هنا لو احتجتي اي حاجة انا في الخدمة .حضرتك اسمك ايه ؟
: انا اسمي ريهام .
: معقولة !!! انا كمان اسمي ريهام .
ضحكنا احنا الاتنين وبعدين مشيت جارتي ودخلت شقتها .
رجعت ابص علي التليفزيون اشوفه اطفي ليه لقيته شغال بس صوته ضعيف اوي .
مش عارفه ازاي اطفي واشتغل لوحده وصوته ازاي قل لوحده .
دخلت المطبخ تاني وبعدين سمعت صوت خبط جامد اوي في مطبخ جارتي .قلت في بالي يمكن اولادها رجعوا من المدرسة .
ايه ده !! مدرسة ايه !! ده احنا في اجازة الصيف !! هو في مدارس الايام دي !!!!!
قلت لازم اروح لجارتي واسألها عن سبب الخبط واسألها عن موضوع الاولاد اللي في المدرسة ده .
روحت اخبط علي جارتي .الصوت سكت لكن جارتي مش رديت عليا خالص .قلت يجوز تكون نزلت ويكون الصوت ده مش من الشقة .
عدا باقي اليوم عادي لحد محمود رجع من شغله .كان وحشني اوي .اخدته في حضني وكنت فرحانه كأنه كان غايب من فترة طويلة .
قعد محمود وحكالي عمل ايه في شغله وبعدين حكيت لهاللي حصل للتليفزيون ومع جارتي الغريبة .
وفي عز واحنا نايمين قبل الفجر بشوية صحيت من النوم علي صوت خبط جامد اوي علي باب الشقة وصوت صراخ رهيب .
حاولت اصحي محمود من النوم ولكن محمود مش كان عاوز يصحي لحد ما اتفاجأت بان محمود قام وقف مكانه وبص لي بصة مرعبة وقرب عليا اوي علشان يخنقني .
