رواية سر زوجتي الفصل السادس 6 والاخير بقلم مصطفي الصعيدي
اتجهت نحو الفيلا ولكن عندما وصلت لها لم اجد تلك الفيللا التي اراها ليلا بنظافتها وجمالها ومظهرها الاخاذ ولكن وجدت اطلال مكان قديم بدا انه حدث فيه حريق فتحت البوابة المتهالكة الصدئة فاصدرت صوت لم اسمعه من قبل واتجهت نحو سلم المدخل ودفعت الباب فانفتح فوجدت الفيللا مهجورة كان لم يدخلها بشر منذ سنين والفئران تعيث فيها من كل جانب وجدت في البهو غرفة المكتب علي اليمين دخلتها وبحثت فيها عن اي شي يحكي عن اصحاب المكان حتي وجدت اوراق فديمة في درج المكتب اوراق نجت من جحيم الحريق وكان مكتوب فيها
انا سناء لم تعد الحياة ذات قيمة بعد ان فقدت من احب مات حبيبي بعد ان رفضه ابي وامي لم يتحمل فقدي ولا حياة لي بعده بعد ان انتحر بعد ان ياس ان نكون سويا
اطمئن يا حبيبي سنكون سويا سالحق بك الليلة بعد ان انتقم ممن حرمونا الحياة معا
سنلتقي سويا في عالم لا فراق به ولا وداع
لن اتركك تموت وان تشعر اني خنتك
الخيانة ان اعيش من بعدك
الخيانة ان اكون لغيرك يا حبيبي
فجاة طارت الاوراق من يدي وسمعت صوت اتي من اعماق الجحيم يصرخ في
انا مش حذرتك يا عمر انك تيجي هنا في النهار؟
كان صوتها صوت سناء ولكن شكلها كان مرعب بالشعر المنكوش والملامح الشريرة والاسنان المدببة كانت تطير لا تمشي واقتربت مني وانا ثابت ليس خوفا ولكن توقعا لشئ غير منطقي او طبيعي وسالتها في ثقة و قوة
انتي مين وقتلتي عزت ليه؟
ردت عليا انت قريت المذكرات وعرفت قصتي بعد ما ولعت في الفيللا روحي فضلت محبوسة جوة المكان عقاب ليا مع ارواح ابويا وامي اللي قتلتهم بنفسي ماروحتش لحبيبي وفضلت روحي معذبة سنين لحد ما شفتك
كانت بتحكي وعينيها في الارض ولما جابت سيرتي وشها بقا نفس الشكل اللي بتظهرلي بيه من ساعة ما عرفتها
قالتلي فكرتني بحبيبي فيك شبه كبير منه وقلبك طيب
ياستي الله يكرمك وما صارحتنيش ليه بحقيقتك؟
كنت اكيد هاخاف افقدك مش علشان هتخاف مني علشان هاتعاقب اني حبيت وكررت خطأي وانا باتعاقب علي ذنبي من يوم ما انتحرت
بس انتي متجسدة معايا ازاي؟ واتجوزتيني ليه
علشان حبيتك وتعبت من الوحدة كنت راضية بالوقت البسيط اللي هاقضيه معاك
انت مش عارف الحب بيغير معني الحياة ازاي
مش الحياة بتاعتكم حياة القلب اللي اتحرم واتساب وفارق
حياة اللي فقد معني الحياة و ما عرفش معني الحب
ليه يا عمر ما سمعتش كلامي
ليه يا عمر ما سبتنيش احبك
ليه يا عمر انت كنت اخر امل ليا
لقيتها بتتكلم ودموعها بتسيل بتحرق ملامح وشها وكانها بتدوب قدامي
مكنتش فاهم ايه اللي بيحصل سالتها في ايه ايه اللي بيحصل يا سناء؟
ردت عليا وهي بتختفي قدامي وتتحول لخيال باهت
الوداع يا عمر انا لقيت معاك الحب اللي ريح روحي و حررها من سجنها
لكن انت ضيعته لما عرفت الحقيقة
عرفت السر لكن ضيعت الحب يا عمر
واختفت وصوتها بيرج في المكان
الحب ضاع يا عمر
وقفت مذهول مش مصدق اللي حصل
فضلت مكاني لحد ما سمعت صوت اذان المغرب من بعيد
الله اكبر الله اكبر
فقت من شرودي ولميت حزني وخرجت من الفيللا
وابتعدت لخطوات قبل ما احس باضواء بتنور المكان وادور الاقي الفيللا نورت من تاني
وفتاة جميلة قاعدة في الشباك
مستنية عابر سبيل
بيدور علي الحب
ويقدر يحافظ عليه
تمت
