رواية انت قدري الفصل السابع عشر 17 بقلم رحاب القاضي

رواية انت قدري الفصل السابع عشر 17 بقلم رحاب القاضي

 

#انت_قدري

البارت 17

ــــــــــــــــــــــــــــــــــــــــ 

_ كانت رباب قاعده في اوشتها بتعيط وبتقول لمامتها اللي نايمه علي السرير.. 

رباب

نفسي تقومي المره دي وتدافعي عني، خالي ضربني وحالف ليجوزني للمعلم عباس اللي قد ابويا النهارده وكلمت دكتور احمد وهو مسافر وقالي هيتصرف بس مش هيلحق، قومي يا ماما ابوس ايدك ما حدش هيقدر يقفلهم غيرك.. 

سميه اتكلمت وهي مغمضه عنيها وقالت

اللي هيقفلهم جالك يا رباب.. 

رباب ابتسمت بدموع وقالت

ماما يا ماما ردي عليا انا سمعتك بتتكلمي.. 

_ وفي الوقت ده سمعت رباب صوت طارق وهو بيصوت وراحت بصت من البلكونه ولقيت عباس  ماسك طارق وبيتخانق معاه.. 

رباب

يا نهاااار اسود دكتور طاارق، ايه اللي جابه ده.. 

_ ونزلت بسرعه تحت وبعدت عبااس عن طارق ووقفت قداامه وقالت.. 

رباب

انت ايه اللي بتعمله ده الله يخربيتك... 

عباس بحده

خايفه اوووي علي حبيب القلب يا روح امك.. 

بصت رباب بدموع لطارق وقالتله

انت ايه اللي جابك هنا دلوقتي هو انا كنت ناقصه.. 

طارق بخوف

انا مااشي اصلا... 

عباس بحده 

اقف عندك. ياااه، وانتي ياا بت ما كفاكيش العلقه اللي اخدتيها من خالك وعايزه تاخدي غيرها.. 

رباب بدموع والم 

خدك ربنا يا شيخ سيب ايدي... 

فوزي خالها بحده

اديها يا معلم انا مش قادر عليها.. 

_ورفع عباس ايده وجه ينزل علي وش رباب بس كان طارق الاسرع لما مسك ايده وقال بحده.. 

طارق

مش رجوله يا معلم انك تمد ايدك علي واحده ست... 

عباس بعصبيه

انت بتمسك ايدي يااااه انت مش. عارف انا مين... 

طارق حاول يداري خوفه وقال

لا علي فكره واضح ان. انت اللي ما تعرفش انا. مين.. 

 عباس بسخريه

وتطلع مين بقي يا خفيف عشان لما اقطعك حتت اكلم حد من اللي يجي يلم جثتك.. 

_بلع طارق ريقه بخوف وبص لرباب اللي وشها كان فيه كدمات خفيفه وعيونها كلها دموع وباين اووي انها خايفه، وبص لعباس وقال... 

طارق

انا ابقي ابن وزير وخالي لواء وعمي مستشار وولادهم بقي اللي في كلية الشرطه واللي في نياابه يعني مكالمه واحده لحد منهم اقلبها فوق دماغكم... 

وقال بصوت واطي لرباب

يارب يصدقو عشان انا خلاص هعملها علي روحي.. 

ــــــــــــــــــــــــــــــــــــــــ 

_ وفي الغردقه.. 

ابعد مالك احمد عنده وقال بكل هدوء وطريقه مستفزه.. 

مالك

بدل ما تسألني انا عندك. مراتك اسألها هي.. 

ريم بقلق

انتي هتلبسني مصيبه هو انا اعرفك اصلا.. 

مالك 

لا والله هو مش انتي لما كنتي هربانه منه جيتي ركبتي عربيتي، وانا فعلا جاي عشان اشوفك.. 

اتنهد احمد بضيق وقال لريم 

اتفضلي ردي يا هانم... 

ريم بتوتر

مم ما انا وقتها كنت متعصبه منك وما كنتش عارفه بعمل ايه، وبعدين انا مش فاهمه هو بيقول ايه اصلا.. 

طلع مالك ساعه دهب من جيبه وقالها

مش دي بتاعتك وقعت منك في العربيه وانا جيت عشان اشوفك واديهالك واعمل الواجب وامشي.. 

ريم ابتسمت وقالت

بجد شكرا اووي انا كنت زعلانه عليها اوي وفكرتها ضاعت.. 

_ ابتسم مالك وبص بطرف عينه لاحمد بسخريه وهو داخل الحفله، واحمد بص لريم وقالها... 

احمد

هو المفروض انا موقفي يبقي ايه دلوقتي بعد ما اللي حصل ده؟.. 

ريم بقلق؟؟؟ 

_ في الوقت ده شافهم رشاد وهو واقف جنب الهام وصحابها، واستئذن منهم وطلع وقف بعيد عنهم شويه وسمع ريم وهي بتقول لاحمد.. 

ريم 

عادي ما الراجل طلعت نيته خير  اهو.. 

احمد بحده 

انتي عبيطه ولا بتسعبطي، انتي خليتي وشي في الارض دلوقتي بسبب تصرفاتك الزفت دي.. 

ريم بحده 

مش مؤتر علي فكره تستحمل تصرفاتي دي وانا ما عملتش حاحه غلط.. 

احمد 

ايووه قولي كده بقي دلوقتي صوتك بيعلي ما اخوكي وابوكي جنبك.. 

ريم سكتت واحمد قالها

انتي انانيه وبتاعت مصلحتك امبارح كنت حبيبك وبتتمنيلي الرضا ارضي ودلوقتي لا انت مالكش لازمه واللي عملته عشانك كله ولا ليه اي معني عندك صح؟.. 

ريم بدموع

انا ما طلبتش منك تعمل حاجه وترجع تزلني بيها، انت اللي فرضت عليا نفسك بالطريقه دي.. 

احمد

طريقة ايه اني بزعق وبتدايق لما تعرفي راجل غيري سوا طارق او الزفت اللي كان من شويه ده، اي راجل عنده دم المواقف دي هتدايقه، عايزني اسكت واقول معلش ما هو طارق زي اخوها لا مش انا عشان لو وافقت علي حاجه زي دي مش هبقي راجل حتي في نظر نفسي.. 

ريم بحزن 

بتلف وتدور وترجع لموضوع طارق، انت عايز تفهمني انك مش عندك صحاب بنات ولا بتتعامل مع بنات في شغلك وحياتك كلها.. 

احمد

 اتعامل كزمايل مش اكلمهم فون لوحدي واحكي عن اسرار حياتي وهو اصلا يا هانم يا محترمه ولا يقربلك ولا ليكم اي صله ببعض.. 

ريم بحده 

تمام انا كنت غلطانه في حقك في دي رغم اني مش مقتنعه ولا هبطل اكلم طارق بس انت كنت ممكن تكلمني كده الاول مش تحبسني وتاخد مني موبيلي وتخوفني منك.. 

احمد بسخريه

ااااه بدأنا بقي ندور علي شمعاات.. 

ريم بدموع

طول عمري عايشه خايفه من يوم ما شوفت فتحي ابن عمي وهو بيعتدي علي امي قدامي وقتلها وبعدين اللي حصل وهروبي انا واخويا وانا خايفه وكنت فعلا منعزله عن الدنيا كلها لا عندي صحاب ولا قرايب كان عندي ممدوح وبس، وبعد ما انتو فهمتوني انه مات مالقتش قدامي غير طارق اللي حسيت انه حنين زي اخويا انت بقي عملت ايه كنت بتخوفني وقولتلك اكتر من مره اني بخاف من الصوت العالي ومش بحب اتحبس في مكان لوحدي وانت كأنك ما صدقت عرفت اني بخاف من الحاجات دي وعملتها، حتي اليوم اللي قولتلي فيه انك بتحبني قبلها بثواني كان كمال بيهددني خوفت ارفضك تسيبني لوحدي وهو يجي يعمل فيا حاجه ورضيت انك تقربلي عشان كنت خايفه انما انا ولا مره كنت عايزاك بس بسكت وبقول حاضر عشان خايفه منك وبس.. 

احمد بحزن

تمام جدا كده شوفي انتي عايزه ايه وانا هعمله برغم انه واضح انك مش عايزاني... 

قرب منهم رشاد وقال

احمد ممكن بس تسيب ريم شويه دلوقتي.. 

حاول احمد يبان طبيعي قدامه وقال

حاضر انا اصلا لازم انزل مصر دلوقتي عشان عندي شغل، ممدوح هيكون معاكم بعد اذن حضرتك .. 

رشاد 

اتفضل يا ابني.. 

مشي احمد ووهو متدايق جدا وريم بصتله بحزن، ومسك ايدها رشاد وقالها بحده... 

رشاد 

انا عايز اعرف ايه حكاية طارق ده كلها وايه اللي يخلي جوزك يتدايق منه بالطريقه دي.. 

ريم بخوف

عادي يا بابا يعني.. 

رشاد

استني نشوف اخوكي فين.. 

ـ وجوه  الحفله كانت ساره قاعده جنب ممدوح وقالتله.. 

ساره

ها يا ممدوح خلاص بقي.. 

ممدوح بجمود

عارفه لما تكوني مطلعه حد سابع سما وفجأه بتصرف منه ينزل من نظرك لسااابع ارض ده انتي.. 

ساره بدموع

انت ليه مش حاطط نفسك مكااني انت كنت في الوقت ده مش موجود.. 

ممدوح بحده 

لا حطيت ولو كنتي اتجوزتي في الوقت ده والله ما كنت هلومك ايوه كنت هزعل وهدايق بس اللي مش من حقك انك تستغلي حب حد عشان تنسي حد تاني، لما حطيت نفسي مكااانه استحقرتك وبعد النظره دي ليكي مش هقدر اكون معاكي.. 

مسكت ساره ايده وقالت 

طيب اعمل ايه عشان اصلح صورتي قدامك، انا مش عايزه اخسرك يا ممدوح و.. 

_ في الوقت ده جات رساله علي موبيل ممدوح من كامليا وتلقائيا من غير ما ياخد باله من باقي كلام ساره سابها وقام وقف عند الشباك وفتح الرساله الصوتيه بتاعتها واللي كانت بعتاله فيها.. 

كامليا

"نعم يا ممدوح عايز ايه؟" 

ممدوح

"هكلمك فون ممكن تردي عليا ارجوكي يا كامليا" 

_وفعلا رن عليها وكان متوتر وابتسم اول ما سمع صوتها لما ردت وقالتله.. 

كامليا

نعم؟.. 

ممدوح

انعم الله عليكي، عامله ايه؟.. 

كامليا

مالكش دعوه عايز ايه؟.. 

كتم ضحكته وقالها

عايزك ترجعي مصر.. 

كامليا

دي حاجه ما تخصكش ارجع ولا لا، خليك في حالك يا ممدوح.. 

ممدوح

يعني يرضيكي افضل قااعد عاطل كده بسببك.. 

كامليا

انت عايز ايه بالظبط وبلاش لف ودوران عشان انا عرفاك كويس. 

ممدوح

عايزك ترجعي مصر وتكملي شغلك. لاني متأكد انك مش مرتاحه في الشغل عندك ده اذا كنتي بتشتغلي.. 

كامليا

بتريح ضميرك وكده لا اطمن انا هنا كويسه... 

ممدوح

لا علي فكره انا ضميري مرتاح جدا وخلصت كل مشاكلي وعايزك ترجعي حتي لو ليوم واحد.. 

كامليا بعدم فهم

ليه يعني مش فاهمه؟.. 

ممدوح

لما تيجي هتعرفي ارجوكي با كامليا ارجعي في حاجات كتير ناقصه في حياتي من غيرك.. 

كامليا

زي ايه مثلا.. 

ممدوح بخبث

لما تيجي هقولك هستناكي تقوليلي جايه امتي.. 

كامليا

سلام يا ممدوح... 

_ قفلت كامليا في وشه وممدوح فضل واقف مبتسم وفي باله الف حاجه ناوي عليها، وما كانش واخد باله من ساره اللي سمعت كلامه مع كامليا وطلعت فوق اوضتها من غير ما حد ياخد باله وهي بتعيط.. 

ــــــــــــــــــــــــــــــــــــــــ 

_ وفي بيت رباب.. 

كان قاعد. طارق وفوزي وعباس وعيسوي وصباح مرات فوزي ورباب قاعده جنب طارق وقالتله بصوت واطي.. 

رباب

كنت لازم تفخمها اوووي وتقول انك ابن وزير ما كنت خليتها محافظ اهي تبقي مبلوعه شويه.. 

طارق بغيظ

لا وليكي عين تتكلمي هو انا هنا بسبب مين.. 

رباب

هو انا اللي قولتلك تعالي يعني، الدكتور احمد بيعرف يتعامل معاهم انما انت طري اووي علي الناس دي.. 

طارق بضيق

اخرسي خالص يا رباب.. 

عباس

انتو هتفضلو تتكلمو كده كتير ما تقولولنا تعرفو بعض مين وايه اللي رماك يا ابن الوزير انت عندنا.. 

طارق بثقه

لحظه بس انت ازاي بتتكلم معايا كده قوم اقف وانت بتكلمني.. 

رباب بقلق

ما تظطش اووي انت لو اتكشفت انك كداب هتتعمل كفته.. 

طارق

اسكتي انتي يا رباب لو سمحتي وانت يا عثمان.. 

رباب

اسمه عباس.. 

طارق بحده 

ما انا قولت عثمان وما تقطعنيش تاني.. 

رباب

انت بتزعق لمين ياااه.. 

فوزي 

من الاخر كده انت عايز ايه دلوقتي يا سعادة البيه.. 

حط طارق رجل علي رجل وقال

عايز رباب وامها يجو معايا.. 

رباب بحده 

نعممم يا عوووومرررر.. 

فوزي

انا موافق المهم تدفعلي اكتر من فوزي ونكتب الكتاب عشان الناس ما تقولش علينا حاجه.. 

صباح زغرتت وقالت

لولولولولويييي الف مبروك كلم الماذون يا فوزي

_ وفجأه باب البيت اتفتح ودخلو الجيران وهما ببسقفو وبيغنو، وطارق بص لرباب بخوف ورباب قعدت وحطت ايدها علي خدهة وقالتله.. 

رباب

مش قولتلك انت طري اووي مع الاشكال ولاد الجزمه دول.. 

طارق وقف وقال

يا جماعه اهدو استنو بالله عليكم انا لسه ما وافقتش.. 

فوزي حضنه وقال وهو بيرقص

وناسبنا الحكومه يا عيني وبقينا قرااايب، انا بعد كده هشرب حشيش في الشارع عادي.. 

 ــــــــــــــــــــــــــــــــــــــــ 

_ وفي الفيلا بتاعت احمد اللي في الغردقه... 

كان قاعد رشاد وقدامه ريم وممدوح وقال رشاد بهدوء.. 

رشاد

كويس والست ام احمد دي باتت عند اخوها عشان اعرف اتكلم معاكم براحتي.. 

ممدوح 

اتفضل يا بابا خير ان شاء الله؟.. 

رشاد 

انا يمكن كنت بعيد عنكم اووي الفتره اللي عدت دي، بس انا رجعت خلاص وانتو ولادي والغلط اللي بتعملوه هيكون في وشي وخصوصا انتي يا ريم.. 

ريم. 

انا ما غلطش في. حاجه يا بابا.. 

رشاد

اومال جوزك زعلان ليه؟. 

ممدوح

هو في ايه انا مش فاهم حاجه.. 

ريم 

انت عارف صاحبك راجل نكدي ومتحكم وانا عايزه اطلق اصلا.. 

رشاد

بعد ما خلصت مصلحتك منه عايزه. تطلقي، وعشون طارق.. 

ريم بسرعه قالت

لا لا والله العظيم يا بابا طارق صاحبي وزي اخويا بس وانت لما تشوفه هتحبه اووي.. 

رشاد بضيق

انا لا عايز اشوف حد ولا احب حد، وايه صاحبك دي طول عمرنا بنعرف ان البنت بتصاحب بنت زيها والراجل بيصاحب راجل زيه وده اللي متعلمينه في حيتنا وفي الدين بتاعنا.. 

ريم بضيق

بعيد عن الدين دلوقتي اا.. 

قاطعها رشاد وزعق بيها وقال

اخرسي خالص جاتك كسر رقبتك، هو ايه اللي بعيد عن الدين دي انتي هتكفري انتي مسلمه ودورك الاول في الحيااه تطبقي دينك عشان تعيشي صح واي حاجه بعيد عن الدين هي حراام.. 

ممدوح

بابا معاه حق علي فكره صداقتك بطارق غلط وانا كنت هكلمك في الموضوع ده.. 

ريم بدموع

بس انا برتاح في الكلام معااه وهو كويس وبيعاملني زي اخته والله.. 

ممدوح

بس انتي مش اخته يا ريم هو مهما كان راجل غريب عنك وعمره ما هتفضل نظرته ليكي زي اخته لو كملتو في الصداقه دي.. 

ريم 

يا سلام ما انت عندك كامليا مش دي صاحبتك.. 

ممدوح 

لا انتي فاهمه غلط انا عمري ما قابلت كامليا لوحدنا كنت ديما بكلمها في الشغل قدام الموظفين ولو حصل بينا شات او مكالمة فون بتكون في حدود الشغل... 

واتنهد بضيق وقال

وعلي فكره احمد اللي طلب مني اتكلم معاكي علي موضوع طارق ده وهو ما عندش مشكله في طارق المشكله معاكي انتي وحقه الراجل ان مراته تسمع كلامه.. 

ريم بسخريه 

مراته ليه هو انا موافقه عليه اصلا، انت جوزتهولي من غير ما اعرف وهو بقي فارض عليا نفسه كزوج ليا وبس، انما انا عمري ما كنت هوافق اتجوز احمد.. 

رشاد 

ليه الولد كويس جدا وجدع وبيحبك، ليه رفضاه.. 

ريم بحزن 

مش عارفه مش قادره اتقبل وضع اني اكمل معاه هو حياتي كلها.. 

ممدوح 

براحتك ما حدش هيغصبك علي حاجه، بس طارق مافيش كلام معاه تاني غير لو في الشغل او حاجه زي كده.. 

وقفت ريم وقالت

انا طالعه انام تصبحو علي خير... 

طلعت ريم فوق ورشاد قال

هي ليه كده مش عارفه تاخد قرار ولا حتي تحدد مشاعرها.. 

ممدوح بخبث

سيب الموضوع ده عليا يا حج ويلا بينا تصبح علي خير.. 

ــــــــــــــــــــــــــــــــــــــــ 

_ وبعد شويه في الشقه اللي قدام شقة مامت طارق، دخل طارق ومعاه رباب وامها اللي كانت ماشيه عادي بس ساكته ومش بتتكلم.. 

رباب بضيق

الشقه مش عجبااني انا همشي.. 

طارق

لا اسم الله علي  القصر اللي جايبك منه، ادخلي يا رباب لو سمحتي جوه وخلي امك تنام عشان انا خايف منها بصراحه.. 

رباب

طيب استني عشان هتكلم معاك شويه...

_ ودخلت رباب مع مامتها جوه ورجعت لقيت طارق قاعد علي الكنبه وبيقولها.. 

طارق

الفرش ده قديم علي فكره بتاع شقتنا وبدل ما نبيعه جيبته هنا وسعات باجي اقعد مع نفسي شويه هنا،بس نبقي نغيره علي ذوقك... 

رباب

مالي انا بالحاجات دي بص يا دكتور طارق الف مليون شكر علي انك ساعدتني وانا لو هقعد هنا فتره برضو شكرا وشوف ايجار الشقه دي كام وانا هدفعه وكمان موضوع كتب الكتاب اللي حصل ده ولا ليه اي لازمه تقدر الصبح تطلقني بسيطه جدا.. 

طارق قام وقرب منها وقال

والمهر اللي انا دفعته لخالك تحويشت عمر امي كلها عشان اتجوزك، بصي انا مش هطلق انا كده كده كنت عايز اتجوز بالفلوس دي واديني اهو ضيعت الفلوس واتجوزتك.. 

رباب حطت ايدها في نصها وقالت

يعني ايه ده بقي ان شاء الله؟.. 

طارق

هتفضلي معايا متجوزين لحد ما احوش بقي من جديد نفعنا واستقرينا اهلا وسهلا ما نفعنااش برضو اهلا وسهلا.. 

رباب بسخريه

اااه يعني جوازه علي ما تفرج.. 

طارق

بالظبط كده المهم هسيبك دلوقتي وهروح اقول لماما اللي حصل علي فكره حماتك طيبه اووي ومش بتخوف زي مامتك.. 

رباب 

لا لا انا يارب كنت طول عمري بدعي وبقول مش عايزه اتجوز واحد يقول ماما وبابا والجو ده انا كنت عايزه واحد يسجلني علي الفون الجماعه.. 

طارق

طيب ما وافقتي بعثمان وخلصنا من البهدله دي.. 

رباب

ما هو هاي رأي المثل ما انيل من سيدي الا ستي.. 

طارق

يعني ايه؟.. 

رباب 

يعني انا مش بتاعت جواز وانت هتطلقني تمام وبكره الصبح هاخد امي واقعد في اوضه في اي حته تمام.. 

طارق

تمام براحتك بس ابقي رجعيلي الفلوس من خالك.. 

رباب 

انت بتتكلم جد؟.. 

طارق

ايوه والله يا بنتي انا عايز اتجوز واديني اتجوزت اطلقك ليه.. 

وقرب منها اوي وقال

وبعدين انا خدت بالي انك حلوه ومش بتحطي ميكآب وفي نفس الوقت زي القمر وجسم ملفوف و... 

قبل ما يكمل كلامه ضربته رباب بالقلم وقالت

يلا يا قليل يا اللي اهلك ما عرفوش يربوك.. 

دخلت في الوقت ده سهير وقالت

يا نهار اسود جايب نسوان البيت يا طارق دي اخرة تربيتي ليك يا محترم... 

_ وبعد شويه في شقة سهير كانت عرفت كل حاجه من طارق وقالت بحزن.. 

سهير

يا حول الله يارب بجد صعبت عليا بس مش شايف انه جو افلام اووي انك تتجوزها.. 

طارق 

لا هي تحسيها تدبيسه بس جات في وقتها بنت مقطوعه من شجره مالهاش غيري حالياً ليه لا؟.. 

سهير

هي واخده ايه تعليم طيب؟.. 

طارق

معهد تمريص وطالعه بأمتياز علي فكره.. 

سهير

كويس سنها اد ايه بقي؟.. 

طارق

في سني بالظبط بس بتشتغل من زمان لانها بتشتغل من لما كانت بتدرس.. 

سهير

تعرف انا بعشق البنات المكافحه اللي زي كده، انا الصبح هكلم قرايبنا واقولهم عملنا كتب كتاب علي الدايق والفرح الخميس الجاي.. 

طارق

طيب اصبري يا ست الكل اقنعها الاول.. 

سهير

بعد الجواز مش وقته، يلا تصبح علي خير.. 

طارق 

هو انتو كلكم قلبتو مجانين كده ليه؟.. 

ــــــــــــــــــــــــــــــــــــــــ 

_ وتاني يوم علي بعد المغرب كده.. 

دخلت ريم اوضتها هي واحمد ولقيته نايم بهدومه من امبارح والاوضه كلها مكركبه.. 

ريم

انا مني لله كنت متجوزااه منظم ايه القرف اللي عامله ده.. 

وراحت ناحية اوضة اللبس بس وقفت لما احمد قالها.. 

احمد

انتو جيتو امتي؟.. 

ريم 

صباح الخير مع انها المفروض مساء الخير.. 

احمد بحده 

ردي علي اد السؤال جيتو امتي وما قولتليش ليه.. 

ريم  بجمود

انت مش قولتلي اخد قرار انا اخدته خلاص.. 

احمد وقف وقالها

سامعك؟.. 

ريم بهدوء

انا اسفه علي طريقة كلامي مع طارق بس انت ما عرفتش تقنعني وخلاص بقي موضوع وخلص بس المشكله مش هنا وبس و.. 

احمد بجمود

قرارك ايه؟.. 

ريم بضيق

عايزه اطلق.. 

احمد بهدوء

تحت امرك انتي طالق.. 

_ اتصدمت ريم وكانت فاكره انه هيتمسك بيها او هيرفض في البدايه وانه مش هيوافق بالسهوله دي، واحمد اخد جاكيت بدلته ومشي من غير ولا كلمه.. 

_ تفتكرو بقي ايه اللي هيحصل؟

ــــــــــــــــــــــــــــــــــــــــ 

#بقلم_الكاتبه_رحاب_القاضي

                الفصل الثامن عشر من هنا

لمتابعة باقي الرواية زوروا قناتنا على التليجرام من هنا

تعديل المقال