.jpeg)
رواية انا وابن خالتي الفصل الثامن 8 الجزء الرابع بقلم عمرو راشد
معاك أيمن عبدالعزيز من مباحث الاداب
= اؤمر حضرتك عايز مين هنا؟
لا يا حبيبي انا مش عايز حد،، انا هاخدكو كلكو كدا
= لا معلش مش هينفع النهاردة اصل عندي معاد
" شاهر بص ليا وقالي
مش كدا ولا ايه؟
= ايوا بالظبط احنا حاجزين دريم بارك وخايفين الدودة تفوتنا،، خليها يوم تاني
" الظابط زعق وقال بصوت عالي
انت هتهزر معايا يا روح امك
" شاهر بص له بغضب وقاله
طب متجيش تحدي عشان انت مش قدي
" ساعتها مسكته بسرعة من الچاكيت بتاعه
انت هتعمل ايه دا ظابط،، انت كدا هتحبسنا
= ولا حاجة،، انا مش هعمل اي حاجة غير كدا
" فجأه لقيت شاهر قرب مني أكتر و في ثواني كانت كل الأماكن اتبدلت ولقيت نفسي في الشارع،، ساعتها بصيتله بغيظ وقولتله
هو انت مجنون ولا انت عايز تعمل فيا ايه بالظبط،، يا شاهر حرام عليك مش كدا يعني
= وانا عملت ايه دا انا انقذتك،، كان زمانك دلوقتي راكب البوكس وواقف قدام وكيل النيابة وبتطلب الاوردر
اوردر ايه اللي هطلبه قدام وكيل النيابة،، هو أنا واقف قدام كاشير الشبراوي
= اومال انت بتطلب ايه؟
بطلب محامي عادي
= وبتطلب ايه من الشبراوي؟
عنده شاورما لحمة بتجنن
= بس انا كدا فهمت انا عايز ايه،، انا عايز اروح اجرب الشاورما اللحمة
يا شاهر ابو*س ايدك،، ياابني انت بتعمل فيا كدا ليه؟
" بصيت للسما ساعتها وقولت
يارب اللهم اني لا اسألك رد القضاء ولكني اسألك اللطف فيه
= الله يفتح عليك،، اقرأ كمان ربع يا شيخنا
لا المرحوم ميستاهلش
= ليه يا اخويا هو عمل ايه؟
تصدق بيقولو انه اكل ورث اخواته
= كله؟
كله
= كان عاجبه اوي كدا يعني؟
هو ايه دا؟
= ورث اخواته
بقولك اكله كله
= بس كدا انا فهمت انا عايز ايه،، انا عايز اروح اجرب ورث اخواته
هو انا مبصعبش عليك يا شاهر يعني مبتحسش بتأنيب ضمير من اللي بتعمله دا؟ يا شاهر احنا عايزين نروح البيت عشان ندخل شقة الراجل ونخلص بقا
= عايزنا نرجع يا عبدالله بعد ما جينا طنطا؟ ايوووه عليك يا جدع تصدق زعلتني منك
يا شاهر افهم ايوووه دي اسكندراني مش بتاعت طنطا خالص،، افهم بقا
= والمرسي ابو العباس انا شاكك انك بتضحك يا ولا
ياابني ماهو دا اسكندراني برضو
= انت بتقول اي كلام على فكرة وهثبتلك دلوقتي وبالدليل،، هي طنطا دي ايه؟
محافظة عادي
= محافظة بحري زيها زي اسكندرية
طنطا محافظة بحري!!!
= انا الدكتور قالي طنطا واسكندرية والبدرشين كلهم بحري
طب ولو عايز اروح خط حلوان اعمل ايه؟
= لا انت ايه اللي جابك هنا،، انت كدا هتنزل الشهداء وتغير خطوط
انا خايف بس اتوه اصل انا مش من هنا
= متقلقش انا معاك وعمري ما اسيبك أبدا
هو انت ازاي كدا؟
= انت اللي ازاي كدا؟
انت ازاي حنين كدا؟
= انت اللي ازاي طيب كدا؟
احنا ازاي لايقين على بعض كدا؟
= انت بتتكلم ازاي كدا؟
في ايه يا شاهر؟،، لايقين على بعض ك صحاب يعني
= الحاجات دي مفيهاش صحاب يا عبدالله،، الكلام دا يطير فيه رقاب
طب خلاص ممكن بقا كفاية هزار شوية عشان نشوف هنعمل ايه
= يا عبدالله انت هتكبر الموضوع ليه،، الشيخ موجود والبيت بتاعه عارفينه يبقا خلاص نروحله في اي وقت مش شرط دلوقتي
وهنعمل ايه دلوقتي؟
= احنا نطلع الساحل
انت برضو هتقولي نطلع الساحل؟،، متجبش سيرة الساحل تاني لو سمحت
= يا عم انا بهزر معاك مفيش مواصلات من هنا للساحل أصلا
هو انت عايز تركب مواصلات ليه،، هو انت مش جن وبتطير؟
= انا كنت نسيت دا فعلا سوري
طب هنعمل ايه؟
= احنا نروح ناكل
يا شاهر هو انت معاك فلوس؟
= لا مش معايا بس معايا اللي اغلى من الفلوس
ايه معاك دهب؟
= تعالى ورايا وأنا هفهمك
" فضلنا ماشيين في الشارع لحد ما شوفنا مطعم كبير جدا و ساعتها شاهر شاور عليه وقال
هو دا
= دا اخرنا نشتغل فيه مش ندخل ناكل
قولتلك اسمع كلامي بس
" لقيته خرج نضارة شمس من جيبه ولبسها
دا ايه دا ان شاء الله؟
= حلوة عليا؟
جايبها ليه دي؟
= والله كنت جايبها عشان انت عارف بقا الساحل كله شمس وحر
وكتاب الله احنا مش في الساحل
= امسك ايدي بس وانا هفهمك
امسك ايه؟
= امسك ايدي يا عبدالله في ايه؟
لا يا بيه احنا فقرا اه بس اغنياء النفوس،، انت ازاي تفكر فيا كدا؟،، انت معندكش اخوات ولاد؟
= لا عندي اكرم 9 سنين دلوقتي
ياااه هو اكرم بقا 9 سنين،، شوف الايام بتعدي بسرعة ازاي
= الله يخليك اتفضل،، دلوقتي بقا اسمعني و تفهم اللي اقوله كويس،، احنا هندخل المطعم دا كأننا ناس عادية جدا وانا هعمل دور اني كفيف عشان يمكن يتعاطفو معانا
هيتعاطفو معانا دا اخرهم هيعملو ايه يعني؟
= يمكن يعزمو علينا ب وجبة
هي دي احلامك؟
= هو انت هتخسر ايه لما تسمع كلامي؟ خليك ورايا وهتفهم
" دخلنا المطعم وانا ماسك ايده فعلا و بسنده لكن فجأه هو زعق وقال
هو احنا فين؟
= انت بتزعق ليه يا شاهر؟
ما انا مش شايف،، احنا كدا وصلنا يعني؟
= ايوا وصلنا يا حج خلاص
اوصفلي ياابني المكان اللي احنا فيه دا؟
= مكان كله اخضر في اخضر ومليان عصافير وسمك وفي اطفال لابسة ابيض في ابيض
الله الله الله،، وايه كمان ياابني؟
= وفي راجل كبير اهو هناك ماسك حفيده والناحية التانية سبحة في ايده
" لقيته رد بصوت عالي وقال
يبقا احنا اكيد في مصر
= انا نفسي اعرف انت بتزعق ليه؟
ما انا مش شايف بقا اعمل ايه
" لقيت الويتر فجأه جه وقال
اؤمر يا فندم
" رديت عليه انا وقولت
انا كنت خارج مع والدي وبصراحة لقيته جعان ف دخلنا المطعم هنا
= اهلا بيك يا فندم و بوالد حضرتك
الله يخليك شكرا،، كنا محتاجين ترابيزة بقا
= اتفضل تعالى ورايا
" مشيت وراه وأنا ساحب ايد شاهر لحد ما وصلنا عند الترابيزة وانا شديت الكرسي ل شاهر عشان يقعد
اتفضل اقعد يا والدي
= هو انت مين ياابني؟
انا محمد يا والدي
= انت اللي ساحبني وراك من الصبح؟
ايوا يا والدي انا
=استنى انت ابن مين بقا؟
انا ابن فايزة
= انت مبتجيش ليه يا ولا،، محدش بيزورني لا انت ولا اخواتك
معلش يا والدي بقا مشاغل هنبقا تيجي،، اتفضل اقعد
" قعدنا انا وشاهر بعدها الويتر قال
هتطلبو ايه يا فندم ولا اجيب المنيو؟
" شاهر اتكلم ساعتها وقال
استنى هو مين اللي بيتكلم دا؟
= دا الويتر يا والدي
ايه ويتر دا لا انا معرفوش،، هو أنا بقيت بنسى؟
= لا يا والدي انت زي الفل
اومال في ايه طيب؟
" بصيت للويتر ساعتها وقولت
طيب احنا ممكن ناخد 2 شاورما لحمة سوري
= للاسف والله يا فندم مفيش لحمة،، اللي موجود فراخ بس
يعني ايه مفيش لحمة
= اعذرني والله يا فندم حضرتك ممكن تطلب فراخ
" شاهر اتكلم ساعتها وقال
هو في ايه ياابني؟
= مفيش يا والدي
هو مفيش شاورما لحمة ولا ايه؟
= لا فيه كله موجود يا والدي
هو انتو بتخبو عني الاخبار الوحشة؟
= لا دا انت الخير والبركة يا حاج
بتقول ايه؟،، عايز باتيه ب حبة البركة
= هنجيب يا حاج،، هنجيب باتيه ب حبة البركة و قرص بالعجوة والشوفان
شوفان!! انتو بتعملو دايت من ورايا؟
= لا يا والدي والله ما حصل
هو أنا خلاص بقيت بنسى؟
= يا والدي انت زي الفل متقولش كدا
" بصيت للويتر بعدها وقولتله
خلاص هات 2 شاورما فراخ
#بقلم : #عمرو راشد
" بعد نص ساعة بالظبط الاكل نزل وأكلنا احنا الاتنين،، خلصنا ولقينا الويتر جاب الشيك عشان ندفع الحساب
2 شاورما فراخ ب 3000 جنيه ليه؟
" شاهر ساعتها قال
انت خدت قرض مع الشاورما يا محمد؟
= لا يا بابا متقلقش انا عامل حسابي،، المبلغ بسيط
ياابني انا سامعه بيقول 3000،، هو انتو بتخبو عني الاخبار الوحشة يا محمد؟
= يا بابا مفيش حاجة والله متتعبش نفسك انت بس
" ساعتها قومت وبصيت في عين الويتر وقولتله
انا عايز اقولك على حاجة مهمة،، شايف بابا اللي قدامك دا
= مالو يا فندم
مريض بمرض خطير جدا،، عارف عنده ايه؟
= ايه؟
لا انا بسألك عارف عنده ايه؟
= معرفش يا فندم انا معرفوش أصلا
انت شوفت مسلسل حاله خاصة
= اللي هو بتاع طه دسوقي
ايوا بتاع نديم احمد ابو سريع
= مالو يا فندم
بابا اللي قدامك دا يبقا ايهاب وجدي ابو سمير
= مالو يعني يا فندم؟
لا انا قولت اقولك اسمه بس مش اكتر
= يا فندم انا عايز الحساب
" شاهر رد عليه وقال
ياابني بالله عليك خليه يمشي،، دا انا راجل كبير مش قادر اقف
" بعدها قالي
وانت يا محمد خلص ياابني بسرعة عشان تلحق تجيب التموين والعيش
= يا بابا معلش انا مش قادر النهاردة
يابني خليك حنين على اخواتك
" ساعتها الويتر قال
خلاص يا فندم ممكن تمشو عادي
= انت بتتكلم بجد؟
" شاهر رد وقال
خلص ياابني عايز اروح اتفرج على المال والبنون
= تعالى يا والدي انا معاك اهو
انت معايا؟
= انت بتزعق ليه؟
ما انا مش شايف اعمل ايه؟
= امسك فيا يا والدي
استنى انت ابن مين؟
= انا ابن سامية
سامية الرقا*صة
= لا الخياطة
ماهي كانت بتقولنا كدا وتروح تر*قص
= ماهي كانت بتر*قص للزباين
انت مبتجيش تسأل عليا ليه؟
= معلش يا بابا مشغولين شوية
لا انت ولا اخواتك كدا يعني ينفع
" خرجنا من المطعم بدون أي مشاكل الحمدلله،، شاهر ساعتها قل*ع النصارة وقالي بغمزة
يلا نروح ناكل الحلو بقا؟
= ادائك مصطنع جدا،، و بعدين انت صوتك كان عالي ليه؟
ما انا مش شايف بقا اعمل ايه؟
= انت لسة مكمل في الدور برضو؟
طب وبعدين هنعمل ايه؟
= نروح للراجل بقا،، احنا عملنا كل حاجة الا الحاجة اللي احنا جايين عشانها اصلا
ما انا بتفسح بقالي كتير مشوفتش الشارع،، وانت واخواتك سايبني لوحدي كدا محدش بيزورني
= انت عجبك الدور؟
الصراحة جدا
= طب ممكن نخلص بقا
عايز تروح يعني؟
= ايوا اومال انا بقول ايه من الصبح
" شاهر مسك ايدي وفي ثواني لقيت نفسي قدام الشقة،، كنت شامم ريحة بخور قوية جدا خارجة من جوا،، خبطت على الباب اللي اتفتح بمجرد ما حطيت ايدي عليه،، دخلت جوا مكنش فيه اي حد،، شاهر ساعتها أتكلم وقال
دلوقتي بقا هنلاقي راجل بدقن قاعد وقدامه مبخره
= دي كدا مسخر*ة،، ايه اللي انت بتقوله دا؟،، انت بتتفرج على افلام كتير؟
لا والله انا اخر مرة روحت السينما كانت من 2004
= وكنت مبسوط وقتها؟
" في اللحظة دي لقينا راجل كبير خارج من جوا،، وشه كان بشوش جدا وشكله طيب،، خرج وهو مبتسم لينا وقال
اتفضلو
" شاهر ساعتها قال
هو دا شيخ العرب همام؟
= ياعم دا مسلسل اللي انت بتقول عليه دا،، دا الشيخ همام بس
مش هيتعرض يعني؟
= انا من رأيي تسكت احسن
" الشيخ اتكلم وقال
خير
" رديت عليه وقولت
خير يا شيخ همام،، انا كنت جايلك عشان احنا واقعين في مشكلة ومحتاجينك تساعدنا
= للاسف ياابني حل مشكلتك مش عندي
طب هو انت عرفت ايه هي المشكلة الاول؟
= ايوا طبعا عارف،، من اول ما بتدخل من باب الشقة بعرف كل حاجة
طب احنا محتاجينك يا شيخ همام،، محتاجينك معانا
= مش هقدر ياابني سامحني،، دا موضوع كبير ولو دخلت فيه هتأ*ذي
طب ساعدنا قول اي حاجة
= كل اللي اقدر اقولهولك انك لازم تقفل الباب اللي دخلو منه
باب ايه انا مش فاهم حاجة؟
= دور على الباب اللي دخلو منه واقفله ولو ملقتوش حاول تعمل انت الباب دا
انا مش فاهم حاجة
" الشيخ بص ل شاهر وقالي
اسأل شاهر وهو هيقولك
" بعدها بص ليا وقالي
هو دا كل اللي عندي
= ارجوك فهمني طيب
بعد إذنك يابني انا محتاج استريح
" خرجنا انا وشاهر من البيت ووقفنا في الشارع بعدها بصيتله وقولتله
هنعمل ايه؟
= اعتقد اننا لازم نرجع ونقول ل هارون عشان نشوف هنتصرف ازاي او ايه هو الباب اللي لازم يتقفل دا؟
" شاهر مسك ايدي و بعدها بثواني لقيت نفسي رجعت البيت تاني بس مكنش فيه اي حد موجود،، البيت كان ساكت تماما،، دخلنا انت وشاهر ندور عليهم لكن مفيش اثر لأي حاجة،، خرجت تاني للصالة عشان اتفاجئ و اشوف نسرين واقفة قدامي
بتدور على حاجة يا بودي؟
= انتي دخلتي هنا ازاي؟
الباب كان مفتوح
= هند و مروان فين يا نسرين؟
= بس انا مش نسرين
" عنيها قلبت للون الأحمر وقالت
انا لوسيندا
" شاهر ساعتها جه وقف جنبي وهي كملت كلامها
متقلقوش على صحابكو هما معانا
" شاهر رد عليها وقال
معاكم فين؟ وفين هارون؟
= كلهم موجودين يا شاهر متقلقش
موجودين فين؟
= تحت الأرض!!
#عمرو_راشد
#انا_وابن_خالتي 4 " لعنة المفاتيح السحرية " 8
#يتبع