.jpeg)
رواية انا وابن خالتي الفصل الثاني 2 الجزء الرابع بقلم عمرو راشد
قولولي بقا فين المفاتيح اللي معاكم؟
= مفاتيح ايه،، احنا منعرفش بتتكلمي على ايه اصلا
انا مبحبش الكدب يا مروان،، متزعلنيش منك،، يعني انا لو حطيت ايدي في جيبك دلوقتي مش هلاقي حاجة؟
" ساعتها اتكلمت انا وقولت
ما تسبينا في حالنا بقا،، جاية ورانا ليه تاني
= انا مجتش يا هند،، أنتي اللي جيتي لحد عندي،، أنتي اللي جبتيني هنا
وعايزة مننا ايه؟
= مش هعيد كلامي تاني
مفيش مفاتيح يا لوسيندا،، المفاتيح ضاعت من اخر ليلة كنا فيها جوا القصر
= امممم برضو بتكدبو،، انا مش عارفة ليه الناس بقت بتحب الكدب أوي كدا
أنا مبكدبش
= دا على اساس انك رجعتي بالزمن عن طريق الالة الحاسبة
" فجأه سمعنا صوت مجهول المصدر لكنه بعد ثواني ظهر وعرفت هو مين،، واضح ان عبدالله كان عنده حق،، شاهر
مستواكي الكوميدي تطور يا لوسيندا والله
" بعدها بص ل عبدالله وقاله وهو بيضحك
خدت بالك انت بتقولها عن طريق الالة الحاسبة كأنها يعني الة الزمن وكدا
= اه انا ضحكت جدا،، دمها خفيف
لا انا مبكلمكش اسكت
"ّ بعدها شاهر رجع وكمل كلامه مع لوسيندا
بصي يا اخت لوسيندا من غير مشاكل و حرو*ب تاخدي نفسك وتمشي لانك كدا كدا هتختفي عشان وقتك هيخلص وهترجعي زمنك تاني
= انا مش مصدقة انك لسة عايش يا شاهر
مالك مبسوطة أوي كدا ليه،، هو انتي ليكي عندي فلوس؟
= لا بس عشان كل واخد ياخد حسابه،، انا مش هنسا انك انت اللي ضر*بتني بالسيف في ضهري
انا يابنتي!!،، دا انا كنت نازل نص كيلو بسبوسة بالبندق ونص سادة،، اصل هما كانو عاملين عرض،، اصل دا كان يوم الافتتاح بتاعهم كل سنة وانتي طيبة،، أنتي ممكن تاخدي النص اللي بالبندق وتسيبي السادة دا لو مش هيضايقك يعني
= بستغرب اوي لما بعرف انك من أقوى الجان في العالم بتاعك
بس ايه رأيك؟،، اجنن هااا
= فين المفاتيح يا شاهر،، سواء معاك او معاهم ف انا عايزاها
طب ما تقولي من الأول انك عايزة المفاتيح
" شاهر بص ل عبدالله وقاله
اجري بسرعة هتلاقي في المطبخ طقم مفاتيح الماني كنت لسة جايبه
= بس دا غالي أوي يا شاهر،، معقول هتضحي بيه؟
ومش كدا وبس،، معاه مفتاح أنبوبة هدية عشان لو في اي اعطال
= انت ازاي كريم كدا؟
انت اللي ازاي تزعلني كدا؟
= انت اللي ازاي تزعل مني كدا؟
انت اللي ازاي تقول في وشي كدا؟
= انا كنت بهزر وكدا
لا يا حبيبي مش لايقة
= والله لايقة،، بلاش غش يا شاهر
لا مش هتتحسب والله
= لا هتتحسب يا شاهر يإما مش هلعب معاك تاني
كل مرة كدا،، والله هناديلك امي
" مروان زعق ساعتها وقال
انتو بتعملو ايه؟،، السكي*نة على رقبتي حرام عليكم
" شاهر انتبه وبعدها قرب خطوتين وقال
سيبي مروان يا لوسيندا،، خلي كلامك معايا انا،، انا المسؤول عن الناس دي
" عبدالله ساعتها قرب من شاهر وقاله
انت ازاي راجل وشهم كدا؟
= انت اللي ازاي طيب كدا؟
انا ازاي بحبك كدا؟
= انت اللي ازاي كدا؟
بحبك عادي يعني زي الاخوات
= انا بقيت شاكك في امرك والله،، ابقا فكرني اكشف عليك
" فجأه مروان صرخ لان لوسيندا كانت عملت جر*ح في كتفه بالسكي*نة اللي في ايدها
كلمة زيادة والجاية هتبقا في رقبته
" شاهر بصلها بغضب شديد وقال
متجيش تحدي عشان انتي مش قدي
" بعدها شاهر مسك ايد لوسيندا بقوة كبيرة جدا اما هي كانت مش قادرة تعمل اي مقاومة،، بدأت تحاول ب ايدها التانية لكن برضو شاهر مسك ايدها بعدها عنيه قلبت للون الأحمر وبدأ يتكلم بنبرة مرعبة
كان من الأفضل أن لا تأتي هنا ولكنك جئتي والآن تحملي نتيجة أفعالك
" شاهر سابها لكن فجأه هارون ظهر وراها ومسكها بقوة كبيرة جدا جدا بعدها نفخ وخرجت منه رياح قوية جدا حركت لوسيندا لحد ما دخلت جوا بعدها كل حاجة رجعت ل طبيعتها و ساعتها هارون بص ليا وقال
استخدمتي المفتاح ليه يا هند؟،، لوسيندا رجعت ومش هتسكت
= كنت بحاول ارجع و انقذكم
رجوعك مكنش هينقذنا،، رجوعك هيد*مر الكل،، أنتي كنتي عايزة تغيري القدر يا هند
" ساعتها سكت ومعرفتش ارد وهو كمل كلامه
انا كان نفسي منتقابلش تاني بس انتو مصممين ترجعونا كل مرة ل نقطة الصفر
" مروان اتكلم وهو حاطط ايده على كتفه بسبب الجر*ح اللي فيه
وانتو بتراقبونا بقا ولا ايه؟
= هو انت متعرفش ان نهايتنا مكتوبة في عالم الجن،، احنا مضطرين نعيش على الارض مش بمزاجنا يعني
" عبدالله قرب واتكلم
طب يا جماعة انا بقول ان الكلام دا مش وقته،، لوسيندا رجعت ومش هتسكت،، آن الأوان اننا نتجمع تاني
" شاهر رد عليه وقال
طب على خير ان شاء الله،، انا بس هنزل عندي مشوار هنا قريب في المريخ هخلصه و ارجع تاني بس محدش يبدأ الحر*ب من غيري
" هارون زعق وقال
شاهر
= عايز ايه من شاهر يا هارون،، شاهر تعب،، بقاله 3 مواسم بيحار*ب،، نفسي استريح بقا
معلش دا اخر موسم
= واخر الموسم ييجي ونلاقي مصيبة جديدة
لا مش هنلاقي حاجة وخليك متفائل شوية
= هو اللي يعرفكو يعرف التفاؤل؟ حرام عليكم
" شاهر مشي و قعد على الكنبة وعبدالله مشي وراه اما هارون شاور ب ايده على كتف مروان وفي ثانية كان الجر*ح اختفى،، بعدها مروان مسك ايدي و روحنا قعدنا كلنا على الكنبة،، عبدالله ساعتها هو اللي بدأ الكلام وقال ل شاهر
قولي بقا يا شاهر عملت ايه في السنة اللي كنت بعيد فيها دي؟
= سافرت ولفيت العالم كله
بجد؟
= روحت مصر والأقصر و اسوان و اسكندرية
ماهو كل دول في مصر اصلا
= و روحت بلطيم كمان
ماهي في مصر برضو
= و روحت الشرقية
يعني هي دي اللي في الكويت؟،، كل دا في مصر يا شاهر
= ياااه مصر ام الدنيا صحيح،، تعيشي يا مصر
انت ياللي واقف في طابور المدرسة انت،، انا سألت سؤال واحد،، عملت ايه في السنة دي؟
= عارف يا دودي..
لا بقولك ايه انا مش عايز اسمع الاسم دا تاني،، انا دلوقتي واحد داخل على جواز يعني مينفعش نسرين تعرف الاسم دا
= بقا عندك نسرين دلوقتي ونسيتني خلاص
يا عم هو انت مراتي في ايه؟
= بعد اما ارتاحت روحي ليك وعرفت طعم الدنيا بيك،، مشيت خلاص ومقولتليش انا اعمل ايه؟
طب بالله عليك قولي انا اعمل لو حد سمعك وأنت بتقول كدا
= خلاص خلاص شكرا يا عبدالله يا ابن الأصول يا متربي
طب نتكلم بجد بقا،، بصراحة بكرا عيد الحب ومتفقين اننا نتقابل انا و نسرين ومش عارف اجيبلها ايه؟
= ضرة هههه
والله اقوم اسيبك و امشي
= دا لمصلحتك والله على فكرة
خليها بعدين دي هتنفعنا بعد الجواز
" اتكلمت انا ساعتها وقاطعتهم
هو انت لسة مصمم على نسرين يا عبدالله
= مالها نسرين يا هند،، بنت كويسة وبنت ناس وكفاية اني بحبها
أنا عمري ما اطمنت للبنت دي عشان كدا بقولك اهدى شوية لحد ما نشوف اخرها ايه
= هيكون ايه يعني يا هند؟
يابني انا بنت زيها وفاهمة،، نوعية البنات دي عارفاها كويس
= اطمني انتي بس،، انا واخد بالي كويس وعارف انا بعمل ايه
طب انا حذرتك،، خلي بالك منها
" مروان قاطعنا وقال وهو بيضحك
وحتى لو هي عملت حاجة غلط كدا كدا المفاتيح معانا
" هارون رد عليه
لا ماهي المفاتيح مش هتبقا معاكو من النهاردة،، المفاتيح هتبقا معايا كلها،، اكيد بعد ما لوسيندا رجعت هتحاول انها تاخدها بكل الطرق ف عشان كدا لازم تبقا معايا
" مروان رد عليه
ايوا بس احنا نقدر نحميها
= وهو انت فاكر ان لوسيندا هتكون لوحدها؟،، اكيد هتستدعي حد معاها
بس احنا ولاد آدم،، احنا اللي المفروض نكسب
= بس ولاد ابليس مش بالسهولة دي،، انت مفروض تكسب لكن مش اكيد
الخير اللي بينتصر يا هارون مش الشر
= مبقاش في حاجة مضمونة دلوقتي،، عشان كدا بقولك خلي المفاتيح معايا ولما حد يحتاجها يقولي
" اتكلمت انا ساعتها وقولت
أنا بصراحة شايفة ان هارون معاه حق
" عبدالله اتكلم بعدي
وانا كمان
" بعدها شاهر رد
وانا كمان
" هارون رد عليه وقاله
يا شاهر انت اساسا معايا ومتفقين على القرار دا من بدري
= انا قولت نزود عدد مش اكتر
" هارون بص ل مروان وقاله
اسمع كلامي هو دا الصح
" مروان حرك راسه وقال
ماشي يا هارون انا معاك
" عبدالله اتكلم بعدها وقال
طب يا جماعة انتو كدا حليتو مشاكلكو،، مشكلتي انا بقا ايه نظامها؟
" شاهر رد عليه
متقلقش انا هبقا معاك بكرا
= لا انت بالذات لا
متقلقش عيب وبعدين انا اللي هجيبلك الهدية
= بجد يا شاهر؟
بجد
#بقلم : #عمرو راشد
" بعدها ب ساعة بالظبط كلنا قومنا عشان ننام،، عبدالله و مروان سبقوني وانا مشيت اخر واحدة،، بس قبل ما امشي قربت من هارون وقولتله
انا مكنتش عايزة اد*مر حاجة زي ما قولت بس انا كان نفسي نتجمع تاني،، انا مبقتش اعرف اتخيل حياتي من غيرك انت وشاهر،، كنت حاسة بالذنب دايما عشان انا كنت السبب في كل دا عشان كدا معرفتش امنع نفسي من اني استخدم المفتاح
" بعدها قومت و دخلت الأوضة ونمت جنب مروان..
" نمت في اليوم دا ومحستش بنفسي من التعب ،،صحيت تاني يوم ملقتش مروان جنبي،، قومت وخرجت كانت الساعة 2 لقيتهم كلهم متجمعين في الصالة،، روحت وقعدت جنب مروان
محبتش اصحيكي،، سيبتك تنامي براحتك،، شكلك كان تعبان شوية
= مرهقة بس انا دلوقتي تمام
تحبي اجيبلك فطار؟
= لا أنا شوية وهقوم متتعبش نفسك
" عبدالله وشاهر كانو قاعدين جنب بعض وبيتكلمو
يعني بجد يا شاهر لو انا عملت كدا هي هتحبني
= دي هتمو*ت فيك اسمع كلامي
طب انا مش فاهم ابدأ ازاي او منين
= بسيطة خالص انت لما تقابلها هتقعد معاها عادي جدا،، بعدها بشوية هي هتستأذن تروح الحمام عشان تظبط الميكب بتاعها،، انت عارف بقا حركات البنات دي،، لما تقوم هي ساعتها انت حط المنوم في كوباية العصير بتاعتها ولما هي هتخرج وتشربه هتنام طبعا ساعتها هتسحبها وطبعا عشان محدش يشك فيك هتقولهم ان دي مراتك وجاتلها غيبوبة سكر،، بعدها هتسحبها على شقة فاضية وتقضي أحلى ليلة في حياتك وبعدها هي هتكون حامل و ساعتها هي هتحبك وتعشقك كمان
بس طبعا هنحتاج حاجات في الليلة دي
= دي عليا انا بقا
ايوا هاتلنا بيبسي وشيبسي و شيتوس،، عايزك تجيب كل حاجة
= ايه يا عبدالله دا،، ايه كلام الكفار دا،، استغفر ربنا يااخي،، انت ايه مش بني آدم
أنا عملت ايه غلط طيب؟
= كل دول مقا*طعة
صح انا نسيت،، معلش مخدتش بالي
= هجيبلك انا حاجات من برا المقا*طعة عشان اعملك ليلة حلوة
طب انا هلبس ايه؟
= مش مهم،، انت كدا كدا هتلبسها طول حياتك
يا شاهر أنا بتكلم بجد
= يا دودي البس أي حاجة وبسرعة عشان منتأخرش
منتأخرش ايه؟،، المعاد لسة الساعة 7
= الراجل الجدع الشهم هو اللي يوصل قبل معاده
ب 5 ساعات!!
= ب 5 ساعات
" ساعتها قومت وخدت دش حلو،، و خرجت فضلت ادور على طقم البسه،، مناسبة زي دي لازم اكون لابس كلاسيك وعشان كدا اخترت قميص ابيض وبنطلون اسود
كدا حلو؟
= عنيا بتحبك وقلبي بيحبك يا دودي يا حبيبي،، نسرين كدا هيغمى عليها من الجمال والله
انا خايف ميعجبهاش
= احنا عريسنا قمر مفيهوش حاجة وحشة،، أو مش عاجبهم يروحو يشترو من برا،، وبعدها بيوم اكون مجوزك احلى منها
طب والهدية؟
= في امان معايا
يبقا يلا بينا
" شاهر ساعتها حاوطني وفي ثانية كنت قدام الكافيه اللي المفروض هقابلها فيه،، بعدها دخلنا وقعدنا على ترابيزة
انا نفسي اعرف جايبنا قبلها ب ساعتين ليه؟
= عشان انت راجل جدع والراجل الجدع..
هو اللي بيروح قبل معاده
= طب ما انت عارف اهو يا دودي
يا شاهر ماهو كدا الناس هتفهمنا غلط،، يعني عيد الحب و داخل معاك انت الكافيه
= اي حد يسأل ولا يستغرب قوله في واحدة جاية في الطريق
الواحدة دي هتبقا مراتي على فكرة
" شاهر سكت ثواني وبعدها قالي
هي مش دي نسرين؟
" بصيت ورايا ولقيتها فعلا هي،، هي كمان استغربت لما شافتنا،، قربت مننا وقالت
انت ايه اللي جابك بدري وبعدين جايبلي خالك معاك في يوم عيد الحب؟،، انت عايز تجنني؟
= في ايه يا نسرين؟،، خالي كان عايز يتعرف عليكي
النهاردة؟
= وفيها ايه يعني النهاردة؟
لا يا حبيبي مفيهاش حاجة
" نسرين بصت ل شاهر و ابتسمت ابتسامة مصطنعة وقالت
عامل ايه يا خالو؟
" شاهر رد عليها وهو مبتسم
Happy fu*ckin Valentine's day
" بعدها قربت مني وقالت بصوت واطي
كويس انك جبت خالك اصل انا كمان جايبة صاحبتي
= فين صاحبتك دي؟
المفروض كانت جاية ورايا دلوقتي
" بصيت وراها وهي بتشاور وشوفتها وهي داخلة من باب الكافيه،، ساعتها قومت وقفت وقولت بصدمة
لوسيندا!!!
#عمرو_راشد
#انا_وابن_خالتي 4 " لعنة المفاتيح السحرية " 2
#يتبع