.jpeg)
رواية انا وابن خالتي الفصل الثالث 3 الجزء الرابع بقلم عمرو راشد
جايبلي خالك معاك في يوم عيد الحب؟،، انت عايز تجنني؟
= في ايه يا نسرين؟،، خالي كان عايز يتعرف عليكي
النهاردة؟
= وفيها ايه يعني النهاردة؟
لا يا حبيبي مفيهاش حاجة
" نسرين بصت ل شاهر و ابتسمت ابتسامة مصطنعة وقالت
عامل ايه يا خالو؟
" شاهر رد عليها وهو مبتسم
Happy fu*ckin Valentine's day
" بعدها قربت مني وقالت بصوت واطي
كويس انك جبت خالك اصل انا كمان جايبة صاحبتي
= فين صاحبتك دي؟
المفروض كانت جاية ورايا دلوقتي
" بصيت وراها وهي بتشاور وشوفتها وهي داخلة من باب الكافيه،، ساعتها قومت وقفت وقولت بصدمة
لوسيندا!!!
" بعدها هي قربت مننا لحد ما وصلت للترابيزة بتاعتنا
انتي ايه اللي جابك هنا؟
= نعم؟
" بعدها ضحكت وهي باصة ل نسرين وقالتلها
هو خطيبك مالو؟
" نسرين ردت عليها وقالت
معلش هو بيحب يهزر
" بعدها رجعت تبص ليا تاني وقالت
كان نفسي اتعرف عليك من بدري من كلام نسرين عليك بس برافو باين عليها اختارت صح
" قربت منها وقولتلها بصوت واطي
امشي من هنا يإما اقسم بالله..
" ملحقتش اكمل الجملة لان هي ردت بصوت عالي
طب انا همشي بقا ونبقا نتقابل وقت تاني
" شاهر هو اللي رد عليها ساعتها
ما تمشي بقا يابنتي عايزين نتغدى
" لوسيندا بصت ل شاهر وهي مبتسمة وقالت
لطيف
" بعدها مشيت وخرجت من الكافيه،، فضلت متابعها لحد ما اختفت تماما من قدامي،، مفوقتش غير على صوت نسرين وهي بتقول
انت سرحان في ايه؟
= هو انتي تعرفي البت دي من امتا؟
دي صاحبتي من زمان وكانت مسافرة
= صاحبتك من زمان؟
ايوا يا عبدالله فيها ايه؟
= اصل عمرك ما جبتيلي سيرة عنها
قولتلك عشان هي كانت مسافرة ف طبيعي وش هفتكر يعني
= طب انا عايزك تقطعي مع البت دي،، متتكلميش معاها تاني خالص
دا ليه بقا؟
= من غير ليه؟ اسمعي الكلام وخلاص
لا ماهو انا مش هسمع الكلام بالطريقة دي،، عايزة افهم الاول
= البت دي مش كويسة وانا مش مرتاحلها
لا معلش هو انت تعرفها منين أصلا؟
= ملكيش دعوة اعرفها منين،، أنتي تعملي اللي انا قولته وخلاص
لا ماهو انا مش هعمل حاجة غير لما تقولي الحقيقة
= حقيقة ايه؟
ايه اللي بينك وبين ياسمين؟
= ياسمين مين؟
اللي كانت لسة واقفة دي
= هي ضحكت عليكي انتي كمان وقالتلك ان اسمها ياسمين
اومال هي اسمها ايه بقا ان شاء الله؟
" شاهر ساعتها أتكلم هو وقال
في ايه انتو هتتخانقو قدامي ولا ايه؟
" نسرين ردت عليه
ما تشوف عبدالله،، هو اللي عايز يعمل خناقة بأي طريقة
= طب انا هقوم عشان تعرفو تكملو خناق براحتكو
" نسرين بعدها بصتلي وقالت
وبعدين قولي بقا انت امبارح كنت فين لما كلمتك،، مردتش عليا ليه؟
= كنت مع خالو ف مكنش ينفع ارد طبعا
ليه ان شاء الله؟
" بصيت ساعتها ل شاهر وقولتله
بتقولك ليه؟
" شاهر رد عليها وقال
عشان احنا كنا بنشت*م بعض،، بنقول كلام عيب
= عبدالله بيشت*مك!!
ايوا احنا متعودين نقوم الصبح نشت*م بعض كدا قبل الفطار
= بتشت*مو بعض هااا؟
لا حول ولا قوة الا بالله،، احنا نظام عيلتنا كدا انتي مالك دا أنتي غريبة جدا
= والله؟
" شاهر ساعتها بص ليا وقالي
ايه والله دي هتخوفنا يعني ولا ايه؟
= لا هي كدا بتستعد للنكد،، حاول تاخد ساتر
يا ساتر!!
" تليفوني رن ساعتها،، كان رقم غريب معرفوش،، لقيت نسرين بتبصلي بغيظ وبتقول
مين اللي بتكلمك دي؟
= رقم غريب اهو مش متسجل يعني معرفوش اكيد
لا يا حبيبي دي الوا*طية اللي بتخوني معاها وطبعا مش مسجل رقمها عشان انا مشوفوش
" شاهر رد عليها
طب ماهو كان ممكن يسجلو رجب النقاش او عزت الحرا*مي،، انا شخصيا بعمل كدا
= هو حضرتك متجوز؟
لا
" رديت أنا عليها
يا نسرين والله ما اعرف مين اللي بيتصل صدقيني
= طب رد
ماهو خلاص قفل
= اتصل عليها يا حبيبي،، تلاقيها قلقانة عليك
" طبعا عشان انهي المشكلة دي فتحت التليفون واتصلت بالرقم فعلا
الو مين معايا
" بصيت بعدها ل شاهر
دي مراتك يا خالو،، اتفضل
" شاهر ضحك و اخد مني التليفون
ايوا يا حبيبتي،، انا جايلك اهو مش هتأخر،، ايه بتقول عايز مين؟
" شاهر مد ايده بالتليفون ل نسرين وقالها
بيقول عايزك انتي
" نسرين اتعصبت ساعتها و زعقت
انتو هتشتغلوني ولا ايه؟،، انا عايزة افهم في ايه بالظبط؟
" ساعتها انا مسكت ايدها
نسرين انا مستحيل اكلم واحدة تانية غيرك،، انا بحبك انتي وهتجوزك انتي
" شاهر كمل و زود على كلامي وهو باصصلها
حصل والله،، دا حتى لما بيكون ماشي في الشارع وبنت تيجي تسأله على عنوان مثلا بيجري منها علطول،، الناس بقت بتفتكر انه عنده صرع بس الحقيقة هو بيحبك
" نسرين ردت وقالت
طب والهدية؟
= موجودة
" ساعتها خرجت العلبة اللي فيها الهدية من جيبي وقولتلها
كل عيد حب وانتي معايا يا نسرين
" نوعا ما كانت بدأت تهدى وابتسمت ابتسامة خفيفة و اخدت مني العلبة وفتحتها عشان الاقيها اتصدمت وتقولي
دي فلاشة
" شاهر رد عليها وقال
بس عليها كل اغاني الحب والرومانسية،، اسمعيهم واعتبريهم كلهم ليكي
= بجد والله؟
كفاية انه افتكرك بحاجة اصلا،، المفروض تشكريه
" بعدها شاهر بص ليا
دا انا اتمنى ان حد يجيبلي فلاشة زي دي،، انت بجد رومانسي أوي يا عبدالله،، انت ازاي كدا؟
= انت اللي ازاي بتعمل كدا؟
انت اللي ازاي رومانسي كدا؟
= انا اللي ازاي بحبك كدا؟
احنا نخلص المشوار دا و فكرني اكشف عليك،، عشان انا مش ههدى غير لما اطمن
" رجعت ابص ل نسرين لكن اتفاجئت لما ملقتهاش بس شوفتها وهي ماشية قدامي وخارجة من الكافيه،، شاهر ساعتها أتكلم وقال
هي ازاي مشيت كدا؟
= الله يخربيتك يااخي،، منك لله يا شاهر
" كنا قاعدين انا و مروان لوحدنا اما هارون اختفى فجأه من غير ما يقول أي حاجة
تفتكري بعد ما الموضوع دا يخلص ممكن المفاتيح ترجعلنا تاني؟
= مش عارفة بس معتقدش يعني
ليه؟
= عشان هي لو بقت معانا هتأذ*ينا
بس احنا محتاجينها
" اتعدلت و بصتله
محتاجينها في ايه؟
= في حياتنا يا هند،، انا بقيت متعلق المفاتيح كأنها جزء من حياتي
وهو دا صح؟
= وايه الغلط في كلامي؟
كل كلامك غلط،، احنا أقوى من المفاتيح بكتير
= عايزة تفهميني انك تقدري تعملي ربع اللي المفاتيح ممكن تعمله
مروان افهمني انا معاك وفاهمة ان المفاتيح عدلت حياتنا للاحسن و بتمنحنا قدرات خارقة وعظيمة بس في نفس الوقت هي خطر و انت شوفت بنفسك اهو ان لوسيندا مش هتسكت غير لما تاخدهم،، وبعدين تخيل لو مفتاح منهم وقع في ايد بني آدم ممكن يحصل ايه؟
= انا مش هبني قصص وخيالات من لاشئ
كل اللي احنا فيه دا لا شئ،، المفاتيح دي ملعونة واي حد هيملكها هتصيبه اللعنة
= دا في خيالك،، كفاية خوف شوية يا هند
انا مش خايفة على نفسي،، أنا خايفة على ابني اللي انت نسيته
= كل اللي أنا بعمله دا عشان ابني،، عشان احميه من اي حاجة ممكن تأذ*يه
وهي المفاتيح هي اللي هتحمي ابنك؟
= ربنا سبحانه وتعالى هو اللي هيحميه
انت متناقض ليه؟
= عشان المفاتيح مجرد سبب مش اكتر
انا مش هاممني المفاتيح يا مروان ومش عايزاها اساسا،، انا عايزة اعيش انا وابني في هدوء
= وهو فين ابنك دا؟
ما انت عارف انه مع ماما،، اخدته يقعد معاها شوية يونسها بدل ما تقعد لوحدها
= تمام أنا عايز الواد يرجع بكرا
من غير ما تقول انا كنت رايحة اجيبه
= برافو
" فجأه عبدالله وشاهر ظهرو وسطنا،، عبدالله كان شكله مضايق جدا،، جه وقعد جنبنا
مالك يا عبدالله
= اسألي البيه اللي مش هيرتاح غير لما نسرين تسيبني
" بصيت ل شاهر ساعتها وقولتله
عملت ايه يا شاهر؟
= هو اللي غبي مش عايز يفهم،، انا كنت بحاول اساعده
تساعده ازاي يعني؟
" عبدالله هو اللي رد عليا وهو بيزعق
البيه قالي هجيبلك أنا هدية ل نسرين عشان تحبك أكتر و تعشقك والكلام الغريب بتاعه دا وانا صدقته و دي غلطتي وفي الاخر يطلع جايبلها فلاشة عليها اغاني رومانسية
" شاهر رد عليه
الفلاشة اللي مش عجباك دي عليها ألبوم حماقي الجديد،، عارف يعني ايه الجديد،، يعني Exclusive وحصري على فلاشتك انت بس
= اولا هي مبتحبش حماقي
ماهو حماقي هيخلص وهيدخل وراه تامر عاشور
= تامر عاشور في عيد الحب،، انت بتفكر ازاي يااخي؟
أنا اللي غلطان عشان عايز اساعدك،، انا غلطان فعلا
" هارون ظهر قدامنا فجأه،، كان بيتابع وباصص على كل واحد فينا في صمت،، شاهر ساعتها بص ل عبدالله وقاله
لو معاك برشا*م حاول تخفيه عشان المراقب دا شكله خطر
" هارون رد عليه
شاهر لو سمحت اسكت
" اتكلمت انا ساعتها وقولت
في ايه يا هارون؟
= يا جماعة في موضوع مهم جدا لازم تعرفوه،، طبعا انتو عارفين ان لوسيندا رجعت بس اللي متعرفهوش أنها مش راجعة لوحدها،، لوسيندا استدعت أكتر من عشيرة في عالم الجن عشان يساعدوها،، الموضوع حاليا صعب جدا وفيه خطر كبير على حياتكو
" مروان رد عليه وقاله
بس لوسيندا جاية من مفتاح الزمن يعني بالظبط قدامها 4 ايام وترجع تاني
= و فات منهم يوم اللي هو امبارح
والنهاردة خلاص هيفوت اهو
= طب هي في ليلة واحدة و استدعتهم يساعدوها تخيل باقي الايام بقا ممكن يحصل فيها ايه؟
و دي ايه حلها؟
" ساعتها هارون بص ليا وقالي
ابنك عند والدتك،، لازم دلوقتي حالا نروح نجيبهم
= ماهي اكيد هتسأل يا هارون وانا مش هعرف ارد
طب اختاري أنتي،، ايه رأيك منروحش عشان هي هتسأل ومش هتعرفي تردي
" عبدالله رد عليه
خلاص يا هارون احنا هنروح
= مش كلنا،، انا وهند ومروان بس اللي هنروح،، خليك هنا انت وشاهر
" بعدها هارون بص ليا و قالي
دلوقتي قومي عشان تجهزي نفسك
" دخلت الأوضة بسرعة عشان اغير هدومي،، كان كل تفكيري في ماما و ابني،، عايزة يبقو في امان عشان مش هتحمل اي حاجة تحصلهم،، خلصت وخرجت لقيت هارون مروان واقفين،، وقفت جنب مروان ومسكت ايده عشان اطمن شوية،، هارون حاوطنا وفي خلال ثواني كنا قدام شقة ماما،، رنيت الجرس وبعد دقايق ماما فتحت الباب و دخلنا
أنتي شكلك ما صدقتي اني آاخد الواد يومين ولا ايه
= أبدا والله يا ماما،، احنا بس كنا مشغولين شوية
وايه سبب الزيارة المفاجأة دي؟،، متقوليش انك جاية تاخدي الواد
= في الحقيقة يا ماما انا جاية عشانك أنتي وهارون
يعني ايه مش فاهمة؟
= عايزاكي تيجي تقعدي عندي يومين
اشمعنا؟
= عايزة ابقا مطمنة عليكي وبعدين عشان متقعديش لوحدك
يا هند احنا اتكلمنا في الموضوع دا قبل كدا،، انل مبرتاحش غير في بيتي
" مروان رد عليها
واللي هناك برضو بيتك يا حماتي،، تعالي معانا والله احنا مفتقدينك
= ربنا يخليك ياابني متحرمش منك
طب يلا قومي حضري شنطتك عشان نمشي
" ماما قامت و دخلت اوضتها وانا كنت هقوم وراها عشان اساعدها لكن لفت نظري أن البلكونة كانت مفتوحة وشوفتها وهي واقفة جوا،، لوسيندا،، ساعتها شاورت ل هارون بسرعة اللي قام وبصلها،، هي كانت بتضحك بإستفزاز،، هارون شاور ب ايده عليها لكن ملحقش يعمل حاجة لان لقيت جنز*ير ضخم جدا مسك ايده و ربطها،، بصيت ورايا وشوفت كائنات مرعبة،، وشهم كله مشوه مش باين منهم اي شئ غير عنيهم اللي لونها اسود سواد كاحل،، مفيش أي نقطة بيضا في عنيهم،، كانو كتير،، كتير جدا،، بدأت اصرخ،، هارون كانت ايده مربوطة بالجنز*ير،، الكائنات بدأت تهج*جم على مروان،، وشوفت اتنين منهم وهما بيقربو ليا،، ساعتها هارون بص ل فوق وصرخ بشكل مرعب جدا
شااااهر
" بعدها هارون خرج من الجسم البشري اللي كان فيه،، وقط*ع الجنزير وبدأ يحار*ب الكائنات اللي كانت موجودة ولكن هما كان عددهم أكتر،، حسيت انهم بيتجمعو حوالين هارون لكن فجأه ظهر كائن ضخم وطويل جدا وماسك في ايده سيف،، وقف جنب هارون وبدأ يقت*ل في الكائنات،، عددهم كان بيزيد أكتر بشكل مرعب،، هارون ساعتها بص ليا وشوفت عنيه،، عنيه كان فيها نار لونها احمر،، بعدها هارون دب ب رجله على الارض وفجأة ظهرت كتلة من النار وبدأت تتوزع على مستوى البيت كله،، هارون دب ب رجله مرة تانية وفي لحظة كانت النار مساوية الشقة كلها،، وشوفت جزء من الكائنات وهي بتتحول ل رماد وجزء تاني اختفى،، وفي ثواني كانت كل حاجة سكتت ومبقتش سامعة اي صوت،، مفيش أي حد في الشقة غيرنا،، مروان قام من على الأرض،، كان على وشه جرو*ح من اثر هجو*م الكائنات عليه اما هارون وشاهر رجعو للجسم البشري بتاعهم،، شاهر بعدها اتكلم وقال
هما فتحو فرع من عالم الجن في الشقة هنا ولا ايه،، ايه كل اللي كانو موجودين دول؟
= الموضوع كدا مش هينفع،، مش هينفع نكون رد فعل في كل مرة،، لازم نكون احنا الفعل نفسه
انت مش شايف عددهم يا هارون؟،، دا كتير جدا احنا مش هنعرف نقف قصادهم
= عندك حل تاني؟
وهو انت قولت حل اصلا؟،، انت عايزنا نها*جم وخلاص من غير اي خطة
= كل حاجة في وقتها،، المهم دلوقتي بس..
" لقينا ساعتها امي خارجة وشايلة هارون في ايدها وبتقول
انا جاهزة يا ولاد
" شاهر ساعتها بص ل هارون وقاله
شايف هارون الصغير على ايدها اهو،، شايف حب الناس،، دا ناقص يعملو كوبري ب اسمك
= مش وقته يا شاهر،، بعدين الكلام دا
" بصيت حواليا وفي كل مكان بعدها روحت ل شاهر وقولتله بصدمة
هو عبدالله فين؟
= انا سيبته هناك في البيت
انت سيبت عبدالله لوحده!!
#عمرو_راشد
#انا_وابن_خالتي 4 " لعنة المفاتيح السحرية " 3
#يتبع
