.jpeg)
رواية انا وابن خالتي الفصل السابع 7 الجزء الرابع بقلم عمرو راشد
انا شوفت اللي عمري ما كنت اتوقعه،، هارون ابني اللي مكملش سنة واقف في نص الأوضة و باصصلي ومبتسم بطريقة مرعبة،، ولمحته وهو ماسك في ايده سكي*نة،، عايز انطق بس مش عارفة،، صوتي مكتوم،، نفسي اصرخ،، أما هو لسة ماسك السكي*نة وبيلعب بيها و وسط ما هو بيلعب،، خرج لسانه و عمل فيه جر*ح بالسك*ينة بعدها وجه السك*ينة ناحيتي لانه ناوي يرميها عليا،، مكنتش عارفة اتحرك وأنا شايفة السكينة طايرة وعلى بعد ثواني وتستقر جوايا،، قبل ما السك*ينة تدخل فيا بثواني شوفت مروان وهو قايم من على السرير وبيقولي
اصحي يا هند،، اصحي
" فتحت عيني لقيت مروان واقف قدامي،، اتعدلت وقومت
في ايه؟
= مفيش يا حبيبتي بس لقيتك اتأخرتي دخلت اصحيكي،، انتي كنتي بتحلمي ولا ايه؟
تقريبا
= طب استعيذي بالله و قومي يلا عشان تفطري
هو هارون فين؟
= مع مامتك يا حبيبتي ماهو نايم معاها من امبارح
" مروان خرج من الأوضة وأنا بدأت احس اني بتنفس من جديد،، الحلم كان صعب أوي الحمدلله اني صحيت،، قومت غسلت وشي وغيرت هدومي وخرجت،، شاهر أول ما شافني قام وقف وقال
اهي جات وهي اللي هتحكم بينا
" قعدت جنب مروان وقولت
في ايه يا جماعة؟
" عبدالله رد عليا وقال
شوفي البيه عايز يعمل ايه؟
" شاهر بص ل عبدالله وقاله
دي قافية وأنا اكمل عليها يعني،، يعني اقولك مثلا هر*قص باليه
= ايوا وانا اقولك قلبظ بجنيه
مفيش قلبظ ب جنيه
= قلبظ ب 15 جنيه
ايوا بس احنا كدا عندنا فرق عملات
= ايه فرق عملات دا؟ دا زي فرق التوقيت كدا
يا شاهر بالله عليك لو مش عارف قول معرفش وخلاص لكن متجبش كلام من عندك
= اتفضل انت قول يعني ايه فرق العملات؟
فرق العملات دا اداه بنجيبها زي المنظار كدا عشان نكشف بيها على العملات،، اصل ممكن حد يجيبلك عملة مصروفة قبل كدا هتعمل ساعتها ايه
= اكيد مش هاخدها منه،، هو أنا اتجننت ولا ايه عشان امشي ب عملة مصروفة
انا قولت افهمك بس،، وكمان ممكن حد يجيبهالك مضرو*بة هتعمل ايه؟
= مش هنسكت طبعا هناخد حقها وقتي
جاهز انت يعني؟
= جاهز ومعايا الرجالة على القهوة
" مروان ساعتها اتكلم وقال
جماعة هو انتو بتقولو ايه؟
" قاطعت مروان واتكلمت انا
ايوا ياريت تأجلو مواضعكو دي ل بعدين عشان النهاردة انا مصدعة معلش
" عبدالله رد عليا وقال
اعرفي بس الاول شاهر عايز يعمل ايه؟
" بصيت ل شاهر اللي بدأ يتكلم وقال
انا شايف ان اليوم الرابع كدا عدا بنجاح يعني لوسيندا مبقتش موجودة،، ايه المانع لما نعمل احتفال ونطلع الساحل؟
" عبدالله رد قبلي وقال
البيه عايزنا نطلع الساحل وأنا اقسم بالله ما معايا مايوهات
" رديت عليه وقولت
هي دي مشكلتك؟
= لحد دلوقتي اه
طب يا جماعة انا حبيت افكركم اني قولت مش عايزة نفتح مواضيع النهاردة عشان مصدعة ومش فايقة
" هارون اتكلم ساعتها وقال
أولا احنا لسة مش متأكدين ان لوسيندا اختفت،، وحتى لو اختفت ف اللي معاها مش هيختفو
" شاهر رد عليه
طب ما نطلع الساحل وبكدا هنكون هربنا منهم
= انت برضو هتقولي نطلع الساحل؟
انا عايز اغير الجو بس
" هارون بص لينا وكمل كلامه
دلوقتي احنا محتاجين نتأكد ونعرف هي لسة موجودة ولا رجعت الزمن بتاعها
" مروان رد عليه وقال
واحنا هنتأكد ازاي؟
" هارون بص ل عبدالله وقاله
هو مش انت قابلت لوسيندا مع نسرين،، ونسرين انها صاحبتها،، يبقا تتصل ب نسرين وتعرف هي لسة موجودة ولا لا
= طب ما تروح انت للقصر بتاعها وأعرف هي لسة موجودة ولا لا
لوسيندا عندها قدرة أنها تشوفنا عادي يعني مش هينفع اروح
= طب ما تتنكر
" شاهر ساعتها كمل على كلام عبدالله و قاله
ايوا بالظبط اتنكر
" عبدالله رجع يتكلم تاني
ممكن تعمل بتاع فل أو الجنايني بتاع القصر وتروح تخبط عليها وتقولها جيبتلك الفل يا ست هانم
" شاهر قاطعه وقال
لا معلش هو ازاي بتاع ورد وهيقولها جيبتلك الفل يا ست هانم؟
= انت مشكلتك فين دلوقتي،، في ست هانم ولا الورد والفل؟
ست هانم هنرجعلها بعدين عشان هي اسمها لوسيندا اصلا و دي اول غلطة في الخطة بتاعتك،، ازاي بقا هيقولها جيبتلك الورد وهو بتاع فل؟
= عادي يا شاهر،، بتاع الورد هو بتاع الفل هو بتاع الياسمين هو بتاع النعناع
لو معاه خضره للمحشي يبقا ياريت عشان احتمال نعمله النهاردة
= لا انا سألته قبل كدا وقال لا عشان بتبوظ منه وبتدبل مبتبقاش حلوة
ممكن يرميها بشوية مياه كل ساعة كدا مثلا
= هيفضل هو بقا طول اليوم يرمي مياه يا شاهر يعني؟
مش هينفع صح؟
= صح طبعا،، المهم بس ان المعلومة تكون وصلت
وصلت ايوا يعني بتاع الفل هو بتاع الورد ويبيع الورد عادي من غير ما حد يكلمه وممكن كمان لو حابب يوسع رزقه يبيع فاصوليا بقا و بسلة عشان دا الموسم بتاعها
= لا الفاصوليا والبسلة هييجو الصبح مش دلوقتي
طب بالله عليك احجزلنا كيلو يا عم عبدالله
= هتيجي تاخدهم يعني؟
جاي طبعا دا احنا زباينك من زمان
" هارون زعق وقال
ايه اللي انتو بتقولوه دا؟
" بعدها بص ل عبدالله وقاله وهو لسة بيزعق
انت تسمع الكلام بالحرف وتنفذه من غير مناقشة،، اتفضل كلم نسرين واسألها عن لوسيندا
" شاهر كمل على كلام هارون وقال
وشوفها كمان لو هتطلع معانا الساحل عشان تبقا عاملة حسابها
" هارون اتعصب جدا وقام وقف
تاني الساحل؟
" مروان اتكلم ساعتها وقال
خلاص يا هارون معلش اهدى
" عبدالله مسك تليفونه وكلم نسرين فعلا ولكن واضح أنها مردتش بعدها عبدالله بص ل هارون وقاله
طبيعي متردش بعد اللي حصل امبارح
" شاهر رد عليه وقال
احسن كدا كدا العربية مش هتكفي هو حلو أوي كدا 5 افراد
" هارون بص ل شاهر وقاله ل استغراب
5 افراد ايه؟
= للساحل
انت لو جيبت سيرة الساحل دي تاني بلاش اقولك هعمل فيك ايه؟
= هتعمل ايه؟
ايوا ما انا بلاش اقولك هعمل فيك ايه
= هتفاجئني يعني؟
وأحلى مفاجأه يا شاهر
" اتكلمت انا ساعتها وقولت
طب هنتصرف ازاي؟
" مروان رد عليا وقال
احنا برضو لازم نبقا عارفين هنعمل مع اللي معاها ايه؟
" عبدالله رد عليه وقال
انا كنت سمعت ان في شيخ بيعالج بالقرآن بس بيقولو انه راجل كويس جدا ومبياخدش فلوس كمان
" هارون رد عليه
وهو الشيخ دا هيعمل ايه زيادة عننا؟
" اتكلمت انا وقولت
برضو الشيوخ يا هارون بيكون ليهم طرق خاصة بتاعتهم
" مروان قاطعني وكمل هو
و اهو يكون حل معانا احسن ما نبقا لوحدنا
" هارون رد عليه بصوت عالي وقال
انت معاك اقوى اتنين في عالم الجن،، أي بني آدم يتمنى بس اننا نظهرله
= انا مقصدش يا هارون بس تنوع الحلول مطلوب برضو
" هارون بص ل عبدالله
وهو الشيخ دا فين ولا اسمه ايه؟
= اسمه الشيخ همام وهو تقريبا موجود في طنطا
تقريبا؟
= تقريبا
" شاهر اتكلم وقال
يبقا نطلع طنطا وبعدها نرجع على الساحل
" هارون بص ل شاهر بغضب وعشان كدا شاهر سكت،، هارون كمل كلامه وقال ل عبدالله
انت هتروح هناك مع شاهر وتجيبو الراجل دا وترجعو وانا كمان عندي فكرة هبدأ فيها
" رديت أنا عليه
فكرة ايه دي يا هارون
= تعويذة اقدر من خلالها احبسهم بيها وميخرجوش تاني أبدا
ازاي دا؟
= لما هوصل ل حل هقولك
" بعدها هارون بص ل عبدالله وقاله
المهم انتو تتحركو دلوقتي وتجيبو الشيخ دا هنا
" اتكلمت انا وقولت
طب استنو الاول انا هروح احضر الفطار ونفطر وبعدها تنزلو
" شاهر رد وهو باصص ل عبدالله
ايوا بس المطبخ دا مش في طريق الساحل
" عبدالله رد عليه
لا دا بعد قصر ثقافة الكبلات علطول
= تقريبا دا على ناصية ابو طارق بتاع الكشري
ماهو احنا هنعدي عليه نجيب كشري ونكمل طريقنا للساحل
" هارون ساعتها اتعصب وقال
محدش هياكل حاجة،، هتتحركو دلوقتي
" عبدالله رد وقال
استنى نشوف هناخد معانا ايه،، دا احنا على سفر
" شاهر رد عليه وقال
أولا اكل و شرب دا اساسي
" عبدالله رد
ايوا بس انا بيجيلي دوار بحر
= حبيبي احنا مش في بحر
لا هي اسمها كدا،، اسمها دوار بحر حتى لو كنت راكب على جمل
= ايه دا؟ المفروض يعملو حاجة تليق على الموقف
معلش هو ابوها قفش على دوار بحر،، أمها كانت عايزة غيبوبة سكر،، أبوها قال مفيش غير دوار بحر
= هي تحكمات الأهالي دي اللي بتجيب مشاكل خلي بالك
عندك حق يا شاهر والله،، المهم هناخد ايه تاني؟
= لب وسوداني دا روح الرحلة معروفة
تمام دا برافو عليك،، ايه تاني؟
= هناخد طبلة دي قلب الرحلة،، الرحلة يعني لازم يكون فيها طبلة معروفة
طب دا قلب و روح الرحلة،، هناخد ايه تاني بقا بروح خالتك؟
= ممكن محشي وشوية مكرونة بشاميل
لا ماهو احنا مش رايحين جنينة الوفاء والأمل وبعدين احنا واخدين اكل كتير
= يا عبدالله المحشي والبشاميل دول ترطيب للمعدة،، لازم نرطب الأول قبل ما ناكل
يعني لازم الترطيب دا؟
= انا الدكتور قالي رطب على قد ما تقدر
لا طالما فيها دكتور يبقا خلاص،، هناخد حاجة تاني ولا كفاية كدا؟
= ممكن كروت شحن عشان لو احتاجنا نكلم حد من هناك
ايه يا شاهر دا؟ ماهو اكيد هناك فيه كروت شحن
= هتتحسب علينا مكالمة دولي يا عبدالله كفاية غباء بقا
ايوا صح معلش انا اسف
= وبعدين عايزين نغير مصاري عشان منعرفش سعر السوق هناك عامل كام؟
ايه مصاري دي؟
= فلوس يا غبي،، ماهو لازم نعمل اننا منهم عشان محدش يضحك علينا
هو انت ازاي كدا؟
= انت اللي ازاي كدا؟
" لقيت هارون قام وقف وقال بصوت مرعب
أقسمت بالله لو عدت دقيقة واحدة كمان ولقيت حد فيكم قدامي هرميه في جهنم
" شاهر قام وقف وقال
جاهز يا عبدالله
" عبدالله قام وهو مبتسم وقال
جاهز يا شاهر
" وفي ثانية هما الاتنين اختفو من الشقة...
#بقلم: #عمرو راشد
" فجأه لقيت نفسي في الشارع وسط ناس غريبة معرفهاش،، شاهر كان واقف جنبي وباصص على الناس وبيقول
هي دي بقا طنطا؟
= هي
طب دلوقتي احنا المفروض نعمل ايه
= اول حاجة لازم نعمل اننا من طنطا
اللي انا اعرفه اننا نعمل من بنها،، طنطا دي جديدة عليا
= ركز معايا يا عبدالله احنا هنعمل من طنطا عشان محدش يكشفنا
هو مين اللي هيكشفنا أصلا؟
= هو انت ليه عايز تخرب المود اللي احنا فيه؟
خلاص حقك عليا،، قولي هنعمل من طنطا ازاي؟
= اول حاجة لازم تزود واو بعد اي كلمة،، يعني مثلا هنروحو،، هنجيبو وهكذا يعني
حرف الواو دا لازم يعني يا شاهر؟
= دا اهم حاجة،، هو الدكتور قالي زود حرف الواو و أرفع المضاف إليه
و انصب الخبر بعدها ولا هنعمل ايه؟
= لا هنستخرج من القطعة عشان تبقا كل حاجة ماشية مظبوط
وبعد ما نستخرج؟
= هنعرب ما تحته خط
ولو مفيش خط؟
= انت شكلك عايز تخرب المود،، لو عايز تخربه قولي
والله أبدا انا بحاول اساعدك بس
= متساعدنيش اعمل اللي بقولك عليه وخلاص
طب يلا عشان ندور على الشيخ همام دا
= قولت ايه؟
ندور
= اسمها ندورو على الشيخ همام
انت شكلك عايز تخر*ب المود
= والله ما عايز اخر*ب حاجة
والله وشك بيقول انك عايز تخر*به
= طب احنا هنبدأ ازاي ولا هنعمل ايه؟
تقريبا لازم نسأل حد من الناس اللي في الشارع
" فعلا مشينا في الشارع وسألنا الناس لكن مكنش حد عارفه،، اكتر من ساعتين واحنا ماشيين ومفيش أي نتيجة
"
طب وبعدين هنعمل ايه يا شاهر؟
= انا بقول نرجع تاني ونقولهم انه تايه ومحدش يعرف عنه حاجة
يا شاهر يا حبيبي دا راجل شيخ كبير مش عيل صغير تايه في السوق
= دا لو تاه في السوق فعلا تبقا مشكلة
اكيد ممكن حد ينادي عليه في الجامع اللي جنب السوق
= ممكن برضو
" في اللحظة دي شوفت واحد قاعد على الرصيف،، شاورت ل شاهر عشان نسأله وفعلا قربنا منه،، شاهر اتكلم ساعتها وقال
بقولك ايه يا وحش الكون
" ساعتها بصيتله وقولتله
ايه ياابني اللي انت بتقوله دا؟،، انت كدا صا*يع يعني؟
= ايوا هما بيقولو كدا في الشارع
لا مش كدا طبعا،، ادائك مصطنع جدا
= طب ازاي؟
انت تقوله يسطا حتى لو هو دكتور قوله يسطا عادي
= طب بسرعة بقا عشان انا تعبت أوي والله
غلطة كمان اهي،، متقولش اوي،، دلوقتي اسمها تعبان فش..
= من غير ما تكمل عارفها دي
" شاهر رجع يبص للراجل وقاله
بقولك ايه يسطا متعرفش بيت الشيخ همام فين؟
= البيت اللي هناك دا على اليمين الدور الرابع
" ساعتها شاهر بص ليا وقالي
وصلنا يا عبدالله،، قولتلك هنوصل،، قولتلك لازم نعمل اللي علينا
= انا مش مصدق نفسي يا شاهر،، مش مصدق،، حاسس اني بحلم
الحلم دا حلمنا
= والحب من حقنا
مين اللي يمنع طير انه يطير في السما؟
= مدحت صالح؟
هو مدحت صالح
= يلا بينا على البيت يا عبدالله
" وصلنا البيت و طلعنا السلم لكن المشكلة اللي قابلتنا هي ان كان فيه شقتين في نفس الدور
طب هندخل انهي شقة؟
= الراجل دا مبروك يا عبدالله يعني اكيد من اهل اليمين،، اتوكل على الله و خبط على اليمين
" خبطت فعلا على الشقة اللي على يميني وبعد دقيقتين الباب اتفتح بس الغريب أن اللي فتحت الباب واحدة وكانت لابسة قميص نوم وبتضحك وقالت
عايزين ايه؟
" شاهر رد عليها
احنا كنا عايزين نجيب الشيخ همام بس دلوقتي احنا عايزين نجيب عيال
" البنت ضحكت ودخلت جوا،، شاهر دخل وراها وأنا اضطريت ادخل وراهم عشان الاقي أكتر من خمس او ست بنات موجودين وكان فيه راجل كبير قاعد على كرسي وبيشرب شي*شة،، قعدنا جنبه وشاهر قاله
هو احنا فين؟
= انت في بيت الدلع
ايوووه انا طول عمري نفسي اروح بيت الدلع دا
" شديت شاهر ساعتها وقولتله
انت بتعمل ايه؟،، شاهر احنا باين علينا دخلنا مكان غلط
= يا عبدالله بيقولك بيت الدلع،، انت عارف الدلع دلوقتي بكام؟
مش هينفع يا شاهر احنا لازم نمشي
= طب انت يرضيك تمشي وتسيب الكنافة بالقشطة اللي هناك دي
" كان بيشاور على واحدة من اللي موجودين في الشقة
ميرضنيش طبعا
= شايف درجة الروچ يا عبدالله؟
لا دا مش روچ،، دا ليب جلوس
= لا لا لا مبحبوش،، بيلزق في سقف الحلق كدا وحش أوي عامل زي الطحينة
طحينة!!
= هو الدكتور قالي ابعد عن الليب جلوس و الحواوشي
شاهر سيبك من الكلام دا،، احنا لازم نمشي من الشقة دي،، لازم نلاقي الراجل عشان نرجع
= طب انت شايف البسبوسة اللي بالمكسرات دي اللي هناك دي؟
" في اللحظة دي باب الشقة اتفتح بقوة كبيرة جدا عشان اشوف عساكر داخلة الشقة وقدامهم راجل ضخم وطويل وعنده شنب كبير جدا،، شاهر قام وقف وقال
مين؟،، سليم الأنصاري؟
" بعدها شاهر قرب من الشخص دا ومد ايده بالسلام وقاله وهو مبتسم
معاك شاهر،، مين حضرتك؟
= انا أيمن عبدالعزيز من مباحث الاداب!!
#عمرو_راشد
#انا_وابن_خالتي 4 " لعنة المفاتيح السحرية " 7
#يتبع