.jpeg)
رواية انا وابن خالتي الفصل السادس 6 الجزء الرابع بقلم عمرو راشد
المرة اللي فاتت هربتي مني يا هند،، فاكرة؟،، لما كنا في شقة ماما،، المرادي مش هتعرفي تهربي مني أبدا ولا حد هيخرجك من هنا!!
" مروان رد عليها
المفاتيح مش معانا
= مع هارون انا عارفة
طب ما تروحي تاخديها منه،، احنا مالنا
= انتو اللي هتاخدوها من هارون
ونجيبهالك؟
= برافو عليك صح
مستحيل تحصل انا مش هعمل كدا
= امممم كدا انت هتزعلني
" فجأه سمعنا صوت اغنية ل عمرو دياب،، بكلمكم بجد والله
قمرين دول ولا عينين،، قلبي بيسألني عليك اتاريني بفكر فيك
" وفي لحظة شاهر وعبدالله ظهرو في القصر،، شاهر كان بيكلم عبدالله ويقوله
بس مش هي دي الأغنية اللي انا قصدي عليها
= اومال قصدك على ايه؟
التانية بتقول العالم الله قد ايه قلبي و روحي دابو فيك،، دا اللي عيونه دوبوني والله هالله هالله هالله
= ايوا انت قصدك هالله هالله على الفانلة
متفصلنيش بقا،، فانلة ايه دلوقتي
" لوسيندا اتكلمت وقالت
يا اهلا بالضيوف
" شاهر رد عليها
متقوليش كدا دا احنا صحاب بيت عيب
" بعدها لوسيندا بصت ل عبدالله وقالتله
يعني عرفت تهرب من شقة نسرين وعشان انت غبي جاي هنا ب رجلك
" شاهر رد وقال
في الحقيقة انا اللي جبته معايا اصل مكنش ينفع اسيبه لوحده بعد اللي حصل
فلاش باك
" كنت خلاص ادركت ان دي نهايتي وانا شايف المسخ المرعب دا بيقرب مني لحد ما لقيت باب الأوضة اتفتح بقوة وشاهر سحبني ل برا وقفل الباب بسرعة
شاهر..
= يلا بسرعة مفيش وقت،، مروان وهند في خطر
باااك
" عبدالله قالها
انتي انتهيتي يا لوسيندا خلاص
" ساعتها لمحت هارون وهو طاير و وبيحاوط لوسيندا بالنار من كل جانب لحد ما بقت جوا دايرة نار بعدها هارون طار و اتوجه ناحيتنا بسرعة،، ساعتها غمضت عيني وبعد ثواني فتحت لقيت نفسي رجعت البيت تاني،، مروان ساعتها زعق وقال
هو ايه اللي بيحصل هنا؟
" هارون رد عليه وقال
قولت قبل كدا انهم بيحاوطونا من كل مكان
= ولحد امتا،، اومال انتو فايدتكو ايه؟
فايدتنا اننا انقذناكو كتير من لوسيندا ومن دانوم وغيرهم كتير،، احنا لينا فايدة كبيرة اوي
= والله احنا نعرف نحمي نفسنا كويس اوي،، هات انت بس المفاتيح وهتشوف هنعمل إيه في لوسيندا واي حد معاها
انا موافق بس ياترى اللي معاك هيوافقو؟
" اتكلمت انا ساعتها وقولت
لا طبعا
" بعدها بصيت ل مروان وقولتله
كل واحد فينا بيعمل دوره و هارون وشاهر مش مقصرين،، مينفعش تقول كدا
= وهو شاهر دا بيعمل ايه؟
" عبدالله رد وقال
متجبش سيرة شاهر لان شاهر بيعمل كتير أوي و اخرهم لما انقذني من بيت نسرين
" شاهر اتكلم ساعتها
ايوا كدا يا عبدالله قوله
= ما انا بقوله اهو
" عبدالله رجع يكمل كلامه مع مروان
شاهر اللي مش عجبك دا انقذنا بدل المرة الف
" شاهر رد عليه وقال
ايوا قوله
= ما انا بقوله اهو
" عبدالله رجع يكمل كلامه مرة تانية
شاهر دا بيقعد معانا يحمينا لما هارون بيخرج في مهمات،، شاهر عمل كتير أوي لينا يا مروان
" شاهر قاطعه وقال
ايوا قوله
= مانا بقوله،، ما انا بتنيل بقوله اسكت انت بقا
بتعلي صوتك عليا يا عبدالله؟
= بابا انا.. انا..
اخرس،، مراتك هي اللي بتقويك علينا،، حسبي الله ونعم الوكيل،، مكنتش متوقع انه ييجي اليوم اللي اشوف ابني بيعلي صوته عليا
= بابا انا..
اخرس،، انا مش بابا وانت مش ابني
= بابا انا اسف
اسف دي هتصلح ايه ولا ايه،، قلبي اه
= لا يا بابا متسبنيش
خلاص فات الأوان،، بتقولي اسف بعد ايه يا عبدالله،، الايس كريم اللي بيسيح عمره ما يتجمد تاني يا عبدالله
= ما نشتري غيره وخلاص يا بابا بس انت قوم بالسلامة
حاسس اني خلاص..
= لا يا بابا
خلاص..
= لا يا بابا
خلاص..
= لا يا بابا متسبنيش
يابني ابعد عن وشي الله لا يسيئك،، ابعد عن وشي عايز اعطس
" مروان ساعتها بص ليا وقال
هو ايه اللي هما بيعملوه دا ؟
= اصبر بس دي احلى لقطة في الفيلم
فيلم ايه دا؟ انتو مجانين؟
" ساعتها بصيت ل هارون وقولت
طيب احنا دلوقتي محتاجين أولا نبعد ماما وابني خالص عن الصورة عشان مش هينفع يقعدو ويشوفو اللي احنا بنشوفه دا
" عبدالله رد عليا وقال
خلاص احنا نخليها تروح عند عمتك
= دي في الشرقية يا عبدالله
ايوا ماهي هتروح هناك هتقعد عندها لحد ما نخلص من اللي احنا فيه دا
" هارون رد ساعتها وقال
مش هينفع احنا عايزين مكان ميخطرش على بال لوسيندا ولا الجن ذات نفسه
= ايوا ما انا قولت عند عمتي
عمتك مين يا ابني انت،، يعني هو الجن مش هيعرف يروح الشرقية بتاعتك دي
" شاهر ساعتها أتكلم وقال
احنا نشوف مين اللي ماسك خط الشرقية ونتفق معاه ميعديش اي جن ييجي
" هارون بص ل شاهر وقاله
بما يرضي الله انت مقتنع بكلامك دا؟
= بما يرضي الله لا طبعا
يبقا اسكت
" شاهر بعدها بص ل عبدالله وقاله
معندكش حد غير عمتك دي طيب؟
= ستي
ام بابا ولا ام ماما
= لا ام بابا دي ساكنة في منطقة تانية خالص
فين؟
= الشرقية برضو بس مركز ابو حماد
لا مركز ابو حماد ناس جدعان اوي الصراحة،، ناس زي الفل بأمانة يعني
" شاهر بص ل هارون وقاله
ايه رأيك يا هارون،، مركز ابو حماد يعني الرجولة والجدعنة كلها والست هتروح تقعد هناك كأنها قاعدة وسط اهلها اظن مفيش راحة بعد كدا
= هي الراحة اللي بجد هتيجي لما انت تسكت يا شاهر
" شاهر بص ل عبدالله وقاله
بيقولو الفطير في ابو حماد حلو ولا
= لا حلو بس محتاجين نروح الصبح بدري عشان نلحق
خلاص يبقا من بكرا الصبح نطلع على هناك،، انا من زمان نفسي ازور السيد البدوي
" هارون كان باصص ل شاهر بغضب،، وفعلا شاهر سكت بس سمعنا ساعتها صوت جرس الباب،، مروان اتحرك بهدوء و راح عشان يفتح،، والمفاجأة انها كانت نسرين،، مروان رجع وقف جنبي وعبدالله هو اللي قرب منها
أنتي جاية ليه؟
= جاية افكرك بيا عشان شكلك نسيتني خالص
انا مش لسة كنت عندك من شوية ولا نسيتي اللي أنتي عملتيه؟
= عندي فين؟
في البيت
= انا قاعدة عند عمتي بقالي يومين عشان تعبانة يعني البيت مفيهوش حد
مفيهوش حد ازاي؟
= زي ما انت سامع كدا ولا يكونش انت اللي بتتلكك بقا
انا مبكدبش يا نسرين،، والله العظيم اللي بقوله دا حصل
" اتكلمت انا ساعتها وقولت
عبدالله مبيكدبش يا نسرين،، هو فعلا جالك البيت
= خليكي انتي ساكتة يا هند،، خليكي في حالك
ايه خليكي في حالك دي،، ما تحترمي نفسك
= انا محترمة غصب عنك
" نسرين ساعتها بصت ل عبدالله وقالتله
انت هتقف كدا ساكت وسايبني اتهزأ
= اضربها يعني ولا اعمل ايه؟
لا متعملش خليك واقف كدا،، انا اللي ماشية
" نسرين مشيت وخرجت من باب الشقة،، عبدالله ساعتها أتكلم وقال
كان لازم أتكلم
" شاهر رد عليه وقال
مش نصيبك يا عبدالله،، نسرين عمرها ما كانت لك
= اسكت
نسرين ما هتبقا ليك،، عارف ليه عشان انا شوفتها وهي بتشرب سحلب من عند ملك المانجا،، وانت عارف ان السحلب اللي بالفواكه غالي واللي زيك ميقدرش على تمنه،، شوفتها وهي قاعدة مع الواد سيد وكنت مخبي عليك الفترة اللي فاتت دي كلها عشان مكنش معايا رصيد اتصل بيك
= كنت اشحن كارت فكة وقولي بس متسبنيش اعمى بالشكل دا
كل حاجة غليت ياابني
" مروان ساعتها اتكلم وقال
يلا يا جماعة عشان ننام ونسيبهم هما مع بعض في المسرحية دي
" دخلت فعلا الاوضة مع مروان بعد ما اطمنت ان امي وهارون نايمين،، نمت لكن منمتش كتير لاني قلقت في نص الليل على صوت مياه مفتوحة،، قومت من جنب مروان بهدوء و خرجت من الأوضة،، كل ما كنت بمشي خطوة كان الصوت بيقرب اكتر،، دخلت المطبخ لقيت كل الحنفيات مقفولة وحتى الحمام مكنش فيه اي حاجة،، رجعت الاوضة تاني عشان اشوف اللي عمري ما كنت اتوقعه،، هارون ابني اللي مكملش سنة واقف في نص الأوضة و باصصلي ومبتسم بطريقة مرعبة،، ولمحته وهو ماسك في ايده سكي*نة،، عايز انطق بس مش عارفة،، صوتي مكتوم،، نفسي اصرخ،، أما هو لسة ماسك السكي*نة وبيلعب بيها و وسط ما هو بيلعب،، خرج لسانه و عمل فيه جر*ح بالسك*ينة بعدها وجه السك*ينة ناحيتي لانه ناوي يرميها عليا،، مكنتش عارفة اتحرك وأنا شايفة السكينة طايرة وعلى بعد ثواني وتستقر جوايا!!
#عمرو_راشد
#انا_وابن_خالتي 4 " لعنة المفاتيح السحرية " 6
#يتبع