.jpeg)
رواية انا وابن خالتي الفصل الرابع 4 الجزء الرابع بقلم عمرو راشد
انت سيبت عبدالله لوحده في البيت؟
= فيها ايه يعني لما يقعد لوحده؟ هو عيل صغير؟
يااخي حرام عليك بقا،، احنا هنلاقيها منين ولا منين
" بصيت ل هارون وقولتله
هارون احنا لازم نرجع البيت حالا
" لقيت ماما ردت عليا وهي مستغربة وبتقولي
هو في ايه يا هند؟ ايه اللي بيحصل؟
= مفيش يا ماما
" هارون ساعتها جري و حاوطنا كلنا،، مجرد ما فتحت عيني بعدها لقيت نفسي في شقتي وعبدالله كان قاعد قدامي على الكنبة،، جريت عليه وقولتله
عبدالله انت كويس
= كويس اه،، هو في ايه؟
مفيش احنا قلقنا عليك عشان قاعد لوحدك يعني
= وهو ايه اللي هيحصل لما اقعد لوحدي؟
خوفنا تكون لوسيندا جات هنا
= لا محدش جه هنا
انت كويس يعني
= قولتلك ايوا كويس
" بعدها قام و كان هيدخل اوضته،، مروان نده عليه وقاله
مش هتسلم على خالتك يا عبدالله؟
" عبدالله بص ل ماما و رد ب ابتسامة خفيفة
ازيك يا خالتي
" بعدها دخل أوضته،، مروان بص ليا وهو مستغرب تصرفاته،، بس انا معلقتش عشان ماما متحسش ب حاجة،، شاهر ساعتها بص ل ماما وقالها
احنا والله حصلتلنا البركة بزيارتك لينا،، منورة والله ومن كتر نورك الكهربا هتقطع
= ربنا يخليك يا حبيبي دا نورك
تحبي اعملك حاجة تاكليها؟
= لا أنا شبعانة الحمدلله
لا لا انتي عايزة الناس تاكل وشي ولا ايه،، لازم تاكلي حاجة
= طب كمان شوية
لا انتي شكلك عايزة الناس تاكل وشي
= يا حبيبي محدش شايفنا أصلا ولا حد هياكل وشك
" ساعتها انا اتكلمت وقولت
ممكن يا ماما تدخلي اوضتك تستريحي شوية
" وفعلا ماما قامت و دخلت الأوضة،، قفلت عليها و خرجت قعدت مع هارون وشاهر و عبدالله،، هارون اتكلم ساعتها وقال
عبدالله مش مظبوط يا جماعة،، انا مش مطمن
" مروان رد عليه
انا كمان حاسس كدا
" بصيت ل هارون وقولتله
قصدك ان لوسيندا جات هنا يعني؟
= جايز
" شاهر رد عليه
انا من رأيي نروح نسأله احسن ما نقعد نخمن كدا
" هارون رد عليه
هنروح نسأله نقوله ايه بقا؟
= ممكن يعني..
اسكت يا شاهر،، اسكت عشان كلامك غلط واكيد احنا مش هنعمل كدا،، أحسن حل يا جماعة اننا نتعامل معاه بحذر لحد ما نشوف هنوصل ل ايه
" خلاص انا مبقتش عارفة اطمن،، انا السبب في المشكلة دي ومش عارفة هحلها ازاي ولا ضامنة هيحصل ايه بعد كدا،، خايفة وقلقانة من كل حاجة حواليا،، من ساعة ما قومت ودخلت الأوضة وأنا مش عارفة انام،، حاولت اكتر من مرة ومش عارفة،، سيبت مروان نايم وخرجت اقعد في البلكونة شوية،، بعد ما قعدت بثواني لقيت هارون ظهر على الكرسي اللي قدامي
مش عارفة تنامي؟
= لا
قلقانة من ايه؟
= كل حاجة،، مبقاش في حاجة تطمن
اللي يطمنك اننا كلنا حواليكي وجنبك
= دي حاجة تقلقني اكتر لاني هكون خايفة عليكو
هو انتي بجد رجعتي القصر عشاني؟
= عشانك انت وشاهر
متأكدة انه كان عشان شاهر
= انا مكنتش عايزة احس بالذنب أكتر من كدا
سؤالي واضح على فكرة
" سكت تجاهلت سؤاله لحد ما هو اتكلم تاني وقال
هو انتي بتحبي مروان يا هند؟
= ايوا طبعا مروان دا ابو ابني يعني اكيد بحبه
يعني بتحبيه عشان هو ابو ابنك بس؟
= لا عشان حاجات كتير
ومبسوطة معاه؟
= انت بتلمح ل ايه يا هارون؟
انا مش بلمح،، انا كلامي مباشر
= اصل انت اسئلتك غريبة
ولا انتي اللي بتحاولي تتهربي من الموضوع
= وانا هتهرب ليه؟
عشان مش عايزة تتكلمي عن مروان معايا
= لا أنا بتكلم عادي مفيش حاجة
قولتلك قبل كدا انا بعرف اشوف الكذب في عيون البشر
= وهو أنا بكذب؟
انتي فعلا بتكذبي يا هند
" كنت لسة هرد عليه لكن هو اختفى في ثانية،، بعدها انا قومت و دخلت الأوضة تاني اطمنت على هارون الصغير في سريره ولقيته نايم بعدها نمت انا جنب مروان،، صحيت على صوت مروان وهو بيصحيني عشان نفطر
هو هارون فين؟
= مامتك اخدته لانه كان بيعيط وانا مش عايز اقلقك
قومت كانت الساعة 1 الضهر،، غيرت هدومي وخرجت لقيت ماما وهارون وشاهر قاعدين
هو عبدالله فين؟
" ساعتها لقيت عبدالله خارج من اوضته وهيروح يقعد على الكنبة،، شاهر نده عليه
مش هتيجي تاكل يا دودي،، دا انا اللي عامل الفطار النهاردة
= شكرا مباكلش من القرف دا
" كلنا ساعتها بصينا ل عبدالله اللي لبس السماعات في ودنه و مسك التليفون وكأنه مقالش اي حاجة،، بصيت ل شاهر وابتسمت
معلش يا شاهر حقك عليا انا،، الاكل جميل والله
= انتي لسة مكلتيش حاجة،، ايه الكذب دا
بس كفاية انك تعبت نفسك وعملته
= عندك حق والله هو اللي مش بيفهم
ايوا هو الخسران طبعا
= ايوا دا انا اكلي فل،، كل الناس بتحلف بيه
حصل وانا شاهدة على كدا
= لعلمك منى الشاذلي كانت عايزاني اطلع معاها في فقرة بس انا اللي رفضت
و رفضت ليه؟
= جدول اعمالي لا يسمح الصراحة بس دا ميمنعش ان اكلي تحفة
" شاهر بص ل ماما ومد ايده بطبق من اللي كانو موجودين على السفرة
امسكي يا طنط عملتلك بقا طبق الفول دا اقسم بالله هترميه في وشي بعد ما تدوقي منه
= يا حبيبي ما تاكل انت بقا،، انت مبتاكلش خالص
لا ماهو انا مينفعش آاكل معاكو
= ليه مينفعش،، مكسوف ولا ايه؟
اصل انا..،، اصل انا عامل دايت،، الدكتور مانعني من كل الاكل
= وعايش ازاي ياابني؟
قالي اشرب مياه على قد ما تقدر
= وهو في حد عاقل هيعمل كدا؟
يعني هو في جن بيعمل دايت؟
= جن ايه اعوذ بالله
" هارون ساعتها بص ل شاهر وقاله
أنا من رأيي تسكت عشان كلامك مثير للمشاكل
= تصدق انا شايف كدا برضو
" كان شاهر بيحاول يداري على عبدالله بيعمله عشان ماما متاخدش لكن انا كنت واخدة بالي كويس جدا،، بعد ما خلصنا فطار قومت انا و مروان وقعدنا في البلكونة و ساعتها قولتله
عبدالله فيه حاجة مش طبيعية
= طب احنا هنعمل ايه؟
" لقيت هارون وشاهر دخلو علينا وقعدو معانا،، بعدها هارون اتكلم وقال
انا لازم اعرف الاول هو جواه ايه عشان نعرف نتصرف؟
" شاهر رد عليه
دا عمره ما قال على اكلي وحش
" اتكلمت انا وقولت
لوسيندا كانت قالت انها ممكن تستولى على روح حد عشان تعرف تكمل وتعيش في الزمن بتاعنا
" مروان رد عليا
يعني تقصدي انها جواه دلوقتي
= دا اكيد
" هارون رد وقال
لسة مش متأكدين
" مروان رد وقال
طب ولو فعلا هي اللي كانت جواه
= لا وقتها الموضوع هيكون سهل اوي
" شاهر اتكلم وقال
انا عارف هتأكد ازاي
" ملحقناش نرد عليه لانه خرج بسرعة من البلكونة و راح قعد جنب عبدالله،، احنا كمان خرجنا وراه كلنا،، بعدها شاهر شال السماعات من ودن عبدالله
في ايه؟
= هو انت مكلمتش نسرين من امبارح؟
وانت مالك؟
= بطمن عليكو مش اكتر
لا متكلمناش،، عايز حاجة تاني؟
= طب قولي بقا عملت معاها ايه امبارح في عيد الحب
هو انت مش كنت موجود معايا امبارح؟
= انا بسأل بعد ما انت سيبتني ومشيت عملت معاها ايه
معملناش حاجة،، اتمشينا شوية و رجعت على البيت وممكن بقا كفاية أسئلة
= تمام
" عبدالله ساعتها من جنب شاهر و دخل البلكونة،، بعدها شاهر قال بصوت واطي جدا
نسرين امبارح فعلا سابتنا ومشيت بس عبدالله متحركش وراها ورجع معايا
" بصيت ل هارون وقولتله
هنعمل ايه يا هارون؟
= فيه مفتاح ممكن يخرجها منه
بجد،، طب هو فين؟
= مش معايا
يعني ايه مش معاك؟
= المفاتيح مش كلها معانا يا هند،، في مفاتيح لسة في عالم الجن
يعني كدا مش هنعرف نرجع عبدالله
= هدور عليه وهلاقيه
" هارون اختفى في ثانية وانا قومت دخلت اوضتي وسيبت مروان وشاهر برا،، وقفت قدام المراية وفضلت ابص على نفسي لكن فجأه حسيت ب سخونية شديدة في الأوضة،، ضربات قلبي كانت بتدق بسرعة جدا،، لكن المصيبة لما لقيت انعكاس عبدالله واقف ورايا في المرايا،، بصيت ورايا بسرعة،، كان واقف ساكت مبينطقش،، وأنا كنت متجمدة في مكاني مش عارفة اتحرك،، منطقش غير بكلمة واحدة
ساعديني يا هند!!
" بعدها سمعت صوت صريخ جاي من برا،، لما بصيت عليه مرة تانية لقيته اختفى،، خرجت اجري بسرعة من الأوضة،، لقيت عبدالله ماسك رقبة امي وبيخن*قها!!
#عمرو_راشد
#انا_وابن_خالتي 4 " لعنة المفاتيح السحرية " 4
#يتبع
