.jpeg)
رواية انا وابن خالتي الفصل الاول 1 الجزء الرابع بقلم عمرو راشد
عبدالله!!
أنا مش فاهمة أنتي إزاي بتقولي كدا ،،عبدالله دا ابن خالتي يعني زي اخويا بالظبط مفيش بينا حاجة وبعدين انا واحدة متجوزة
اصل انا شايفة انكو بتتكلمو كتير الايام دي كأن في بينكو أسرار
" حاجات كتير بنكون مش عايزينها تحصل ولكنها بتحصل،، تفتكر هو دا القدر؟ ولا هي بتكون بعيدة عننا واحنا اللي بنكون سبب انها تحصل؟،، يا ترى حد لسة فاكرني،، انا هند
بقولك ايه يا هند متعرفيش مفتاح النار فين؟
= عايزه ليه يا عبدالله؟
مفيش اصل حمايا معقد الدنيا على الاخر ف انا هروح اتفاهم معاه ولو منفعش هولع في البيت كله
= انت مجنون يا عبدالله،، روح بس انت واتكلم معاه و ان شاء الله خير
بيني وبينك موضوع المفاتيح دا عاجبني اوي،، حياتنا بقت سهلة كدا و مفيش حاجة بقت تقدر تقف قدامنا
= بس في الخير يا عبدالله،، احنا مش عايزين نستعمل المفاتيح في الشر،، كفاية اللي خسرناه لحد دلوقتي
متقلقيش انا واخد بالي كويس،، اومال هو مروان فين؟
" سمعت في اللحظة دي صوت مروان وهو خارج من الأوضة وجه وقف معانا
انا اهو
= عايزك توصلني بقا
اوصلك فين؟
= عند بيت حمايا
ما تاخد تاكسي يا عبدالله وتروح
= يعني يرضيك اركب تاكسي وضهر اخويا موجود
لا بقولك ايه،، انسى انا مش هطير بيك تاني
= ليه بس كدا؟
انت ناسي اخر مرة لما كنا هنقع احنا الاتنين عشان حضرتك كنت مستعجل وعايز تلحق معاد السينما مع الست هانم بتاعتك
= يا مروان خلاص دا انت قلبك اسود أوي،، طب تعالى معايا اخر مرة وخلاص
" ساعتها وقفت انا وسطهم وقولت
هو في ايه يا جماعة؟،، هو احنا حياتنا كلها هتقف عند المفاتيح،، المفاتيح دي بنستخدمها بس للضرورة إنما مش هي اللي هتتحكم في حياتنا
" بصيت ل عبدالله وقولتله
وانت مش لازم تروح للست نسرين طاير يعني
= وليه نعقد الدنيا يا هند طالما المفاتيح موجودة وممكن تسهل علينا حاجات كتير احنا مش هنعرف نعملها لوحدنا
و دي مش طبيعتنا،، احنا متخلقناش ومعانا المفاتيح،، يا جماعة افهموني المفاتيح دي خطر علينا وهتأذ*ينا اكتر ما هتنفعنا،، عشان خاطري مش عايزة ينقص مننا حد تاني دا غير ان بقا عندنا طفل صغير لازم ناخد بالنا منه
" مروان ساعتها رد عليا وقال
متقلقيش يا هند كل حاجة هتكون كويسة،، مفيش اي حاجة هتحصل تاني،، احنا دلوقتي في امان
" سمعت الكلام وسكت،، محدش فيهم عارف يفهم الخوف اللي جوايا برغم ان الموضوع خلص وعدا عليه سنة بس مش عارفة انساه،، مش عارفة انسا اليوم اللي كنا فيه جوا القصر،، مش عارفة انسا هارون وشاهر،، حياتنا فاضية اوي من غيرهم،، ياريت كانو لسة معانا،، ياريت كنت عرفت اعمل اي حاجة انقذهم بيها،، قومت وسيبت مروان و عبدالله قاعدين مع بعض وانا دخلت اوضتي،، فتحت درج الكوميدينو وخدت مفتاح الزمن،، المفتاح دا ممكن يغير حاجات كتير،، غمضت عيني و صفيت ذهني تماما و ركزت على اليوم اللي هرجع فيه،، تحديدا في الليلة اللي كلنا كنا جوا القصر،، بعدها غرزت المفتاح في جسمي،، بدأت احس بسخونية شديدة جدا بتدخل جسمي كله،، كنت دايخة ومش قادرة اتحرك،، حسيت كأن المكان بيتغير،، الحيطان بتتشال وكل حاجة حواليا بتتغير ل ملامح وشكل القصر وفجأة لقيت نفسي فعلا واقفة في القصر وهارون وشاهر بيحاربو لوسيندا و دانوم،، حاليا انا قدامي بالظبط دقيقتين بعدها هرجع تاني للزمن بتاعي،، بس كنت واقفة مش عارفة هعمل ايه،، مكنش في حل غيري انا،، ايوا محدش يستغرب ماهو هند كانت واقفة برضو وبتحاول تسعف مروان لان هما دول النسخة الاصلية،، ساعتها جريت عليها ووقفت قدامها لكن هي كانت مصدومة لما شافتني و دا كان طبيعي لانها شايفة نسخة تانية منها واقفة قدامها
متخافيش اسمعيني،، احنا الاتنين واحد بس انا جيالك من المستقبل،، حاولي تنقذي هارون وشاهر،، هما الاتنين هيموتو جوا القصر
= طب طمنيني احنا هنكون عاملين ازاي في المستقبل؟
عندك ابن زي القمر اسمه هارون
" بصيت في الساعة اللي في ايدي مكنش فاضل غير دقيقة واحدة بس
انا معنديش وقت ولازم ارجع دلوقتي يإما هتحبس هنا،، خلي بالك من هارون وشاهر
" ساعتها سمعت صوت شاهر وهو بيصرخ وبيقول
هند أنتي استخدمتي المفتاح؟
" كنت لسة هرد عليه لكن لوسيندا ضر*بته بالسيف في ضهره وبعدها ابتسمت ليا ابتسامة مرعبة
" بدأت اجري بسرعة لأن لوسيندا كانت بتجري ورايا،، كان فاضل 20 ثانية بالظبط،، كنت بجري بأقصى سرعة عندي عشان اهرب منها لحد ما خرجت برا القصر،، خلاص الوقت بيعدي وفاضل 5 ثواني،، ساعتها نطيت درجات السلم اللي كان قدامي لكن حسيت ب ايد بتمسك رجلي وأنا بنط!!
" بعد ما هند قامت بصيت ل مروان وقولتله
مش واخد بالك انها خايفة زيادة عن اللزوم
= متبقاش غبي يا عبدالله،، أي حد مكانها لازم يترعب مش يخاف بس،، اللي عدينا بيه مكنش سهل وحتى لو عدا 100 سنة هنفضل فاكرينه لان اللي حصل ميتنسيش
بس خلاص عدا وخلص،، مفيش داعي بقا نفتكره
= مفيش حاجة خلصت يا عبدالله،، انا كأني كنت لسة في القصر امبارح
انت اتعلمت النكد من هند باين عليك
= بكرا تتعلمه انت كمان من الست نسرين
كويس انك فكرتني،، انا هدخل البس بقا عشان اروحلها
= تحب آاجي معاك؟
مش مستاهلة الموضوع بسيط
" دخلت الأوضة وبدأت اغير هدومي،، بس وانا بقفل زراير القميص سمعت صوت حد بيغني،، الصوت كان جاي من الحمام
" بعمل بخت سألتها و رفضتني،، استغربت اومال فين هيبتي،، حبيبي أنا بضحك على خيبتي
" فتحت باب الحمام بحذر وبصيت وشوفته وهو قاعد ومبتسم وبيقول
مساء الانوار يا حبيب قلبي
= كابتن مدحت شلبي!!،، قصدي شاهر!!
بالظبط معاك شاهر
" بعدها قام وخرج من الحمام وقعد على السرير
قولي انت ازاي لسة عايش؟
= قبل ما القصر يتهد كنت هربت انا وهارون
هو هارون كمان موجود؟،، اومال هو فين؟
= ماهو دا السبب اللي احنا جايين عشانه،، عبدالله حبيبي انتو في مصيبة سودا
اعوذ بالله،، مصيبة ايه؟
= قولي بس الاول انت لابس كدا و رايح على فين؟،، نسرين هاا
" قالها ب غمزة وانا شخصيا مفهمتش ايه سبب الغمزة
انت كمان عرفت موضوع نسرين؟
= انا اعرف اي حاجة وكل حاجة وواخد بالي ان ابو العروسة دماغه مقفولة شوية
طب والحل ايه؟
= هاجي معاك عشان انا اللي هتكلم مع الراجل دا
بجد
= ايوا بجد طبعا،، شوف احنا في مصيبة بس هاجي معاك
" لقيته حاوطني وفي ثانية لقيت نفسي قدام شقة نسرين،، بعدها هو رن الجرس وقالي
بقولك ايه ندخل جوا مش عايز اسمع صوتك،، انا اللي هتكلم
= حاضر يا ابيه
" نسرين فتحت الباب ووشها مقفول وبتقولي
متأخر ليه؟
= معلش عقبال ما..
" ملحقتش اكمل و ارد عليها لانها سألت وقالتلي
هو مين دا؟
" كنت لسة هرد ولكن شاهر اتكلم و رد عليها وهو بيمد ايده بالسلام ومبتسم
معاكي شاهر
" لكنها بصتلي وقالت
مين الاهبل دا؟
= عيب يا نسرين كدا
ايوا مين دا؟
= دا خالي
خالك؟
" شاهر رد عليها وقال
ايوا بالظبط انا خاله وبعدين هو احنا هنكمل حياتنا على السلم ولا ايه،، مفيش اتفضلو تعالو اشربو شوية شاي
= اتفضلو
" دخلنا انا وشاهر وقعدنا على الكنبة ونسرين قعدت معانا ولقيتها بتشدني وبتقول
انت ازاي متقوليش انك عندك خال؟
= معلش يا حبيبتي نسيت والله،، أصله كان مسافر ولسة راجع امبارح
كان مسافر فين؟
= ليبيا،، كان في ليبيا بقاله 6 سنين
وجاي معاك ليه؟
= يا نسرين ماهو خالي يعني لازم ييجي معايا
" شاهر ساعتها أتكلم وقال
ما تهدي شوية يا حبيبتي،، اولا انا خاله والخال وائل
" قربت منه وقولت بصوت واطي
قصدك والد
= ايوا والد سوري،، وبعدين هو فين ابوكي؟ هو مش المفروض مستنينا
" نسرين ردت وقالت
حالا جاي
" بعدها قامت ومشيت وانا بصتله
الخال وائل هااا؟
= ياابني المهم ان المعنى واصل
طب ممكن بقا نتكلم جد شوية عشان الجوازة تكمل
= على فكرة مش حلوة أوي يعني،، معرفش انت بتحبها على ايه،، البت سوسو كانت احلى منها
ملكش دعوة ب سوسو
= يعني انت بتحب سوسو وبتخونها مع نسرين
مش وقته يا شاهر،، ابوها دلوقتي جاي عايزك بقا تكون هادي وتتكلم معاه كويس عشان دا راجل صعب جدا
= هتنبهر
" بالفعل لقينا ابوها داخل علينا وباين عليه انه مش طايقني كالعادة يعني،، قعد معانا وقال
مين اللي انت جايبه معاك دا؟
" شاهر رد عليه وقال
انا خال عبدالله وجاي معاه عشان نتفق على كل حاجة
= مفيش اتفاق انا قولت ل عبدالله على طلباتنا وهو براحته بقا
يا حاج ماهي دي مش طريقة تفاهم برضو
= دي الأصول والاصول متزعلش حد
انت في ايه ياعم مالك كدا،، داخل مش همك حد وبتزعق،، انت مين انت؟
= انا محمد رشدي
او*سخ ناس يا سيدي،، هتخوفني يعني ولا ايه
" ساعتها مسكت شاهر بسرعة
انت بتقول ايه الله يخربيتك؟
= اسكت انت،، انا عارف الاشكال دى كويس
" و رجع يكمل كلامه مع ابو نسرين
اسمع بقا انتو عليكو الفرح والخطوبة و العفش والشقة و الجهاز وكل حاجة
= وانتو بقا عليكو ايه ان شاء الله؟
ان عبدالله يخليها حامل ههههه
" قربت منه وقولتله بصوت واطي
انت بتقول ايه؟،، الجوازة هتبوظ
= مالك يا عبدالله،، انت مش تمام ولا ايه؟
ياعم تمام والله
= لا كلامك بيقول انك مش تمام
يا شاهر انا كويس ركز مع الراجل
= لو مش تمام عرفني عشان بنات الناس مش لعبة ياابني
ياعم انا كويس و راجل و أعجبك اوي
= المهم تعجبها هي هههه
" ابو نسرين أتكلم ساعتها وقال
اطلعو برا
" شاهر بص له بغضب وقاله
متجيش تحدي عشان انت مش قدي
" وفجأه شاهر قام من مكانه ومسك رقبة ابو نسرين
اسمع يا راجل انت،، انا اتكلمت معاك كتير بالادب بس واضح ان قلة الأدب هي اللي هتنفع معاك،، عبدالله هيتجوز نسرين بالذوق او بالعافية،، هتوافق ب رضاك ولا تحب توافق غصب عنك
" قومت ساعتها من مكاني وبدأت أحاول ابعد شاهر عن الراجل
يا شاهر سيب الراجل هيمو*ت في ايدك
= مش قبل ما ينطق
" بعدها شاهر ضغط على رقبته اكتر
هااا موافق ولا لا
= موافق خلاص،، والله موافق
" شاهر ساب رقبته وبص ليا وقالي
مبروك يا عريس
" ساعتها شديت شاهر و خرجنا من الشقة
ايه اللي انت عملته دا؟،، انت اتجننت ولا ايه؟
= اتجننت!!،، الراجل دا نصاب وكان هيخليك تجيب كل حاجة وهو ولا هيتحرك من مكانه،، انا انقذتك المفروض تشكرني
يااخي اشكرك على ايه؟،، انت راجع تبوظ حياتنا ما احنا كنا مرتاحين منك
= شكرا يا عبدالله
" ساعتها ادركت الكلام السخيف اللي انا قولته وكنت لسة هعتذر ولكن كان شاهر اختفى،، انا مكنش ينفع اقوله كدا،، انا غبي،، في اللحظة دي انا افتكرت انه قال ان في مصيبة حصلت وهو دا السبب اللي خلاه يرجع،، جريت بسرعة على الشارع و ركبت تاكسي و رجعت البيت،، دخلت من باب الشقة لقيت مروان قاعد وبيقولي
رجعت بدري يعني؟
= هو انت كويس؟
كويس
= وهند؟
لسة جوا من ساعة ما انت مشيت
= طب ادخل اطمن عليها بسرعة
في ايه يا عبدالله؟
= شاهر قال ان في مصيبة حصلت
شاهر!!!
= شاهر ما*ت يا عبدالله
مما*تش يا مروان،، شاهر كان معايا من شوية،، هارون و شاهر رجعو تاني
" ساعتها هند خرجت من الأوضة وعلى وشها علامات الرعب،، مروان جري عليها وحضنها
مالك يا حبيبتي حصلك ايه؟
" كانت بتبص لينا وكأنها في حالة صدمة،، اتكلمت انا ساعتها وقولتلها
ايه يا هند؟،، مالك؟
= انا استخدمت مفتاح الزمن و رجعت لاخر يوم كنا فيه جوا القصر،، كان نفسي اغير القدر و انقذ هارون و شاهر
= هارون و شاهر عايشين يا هند
" اتصدمت والخوف بان عليها أكتر،، مروان ساعتها قاطعني وقالها
طب وايه المشكلة يا هند،، حصل ايه تاني؟
= ماهو انا مرجعتش هنا لوحدي
يعني ايه؟
" فجأه سمعنا صوت انا عارفه كويس،، الصوت دا انا عمري ما هنساه،، لوسيندا،، وبالفعل لقيناها ظهرت قدامنا
انا يا مروان،، انا اللي جيت معاها،، بجد يا جماعة انا مش عارفة اشكركو ازاي،، طالما انتو لسة عايشين لحد دلوقتي يبقا أنا اللي خسرت في الحر*ب وبيني وبينكم مكنش ينفع الحر*ب تخلص بسرعة كدا،، وعلى حسب اللي انا شايفاه ان هارون وشاهر مش موجودين معاكم
" مروان اتكلم و رد عليها
وقتك قليل هنا يا لوسيندا،، شوية وهترجعي للزمن بتاعك
= ماهو قبل ما ارجع يا مارو،، بس انا اساسا ممكن مرجعش يعني ممكن استولى على روح واحد فيكو و اكمل هنا،، تختارو مين بقا؟
" رديت أنا عليها وقولت
هارون وشاهر موجودين هنا على فكرة
" لقيتها ضحكت ضحكة مرعبة
دا كان زمان يا حبيبي انما من دلوقتي كل اللي جاي بتاعي انا
" بعدها سحبت سكي*نة من رجلها وحطتها على رقبة مروان وقالت
قولولي بقا فين المفاتيح اللي معاكو؟
#عمرو_راشد
#انا_وابن_خالتي 4 " لعنة المفاتيح السحرية "
#يتبع
