.jpeg)
رواية وكانه فيلم بيتعاد الفصل الثالث 3 بقلم رنا سليمان
_لما فاطمة قالتلي انك اتجوزتي مصدقتهاش
_كُنت فاكر اني هستناك لحد ما ترجع ليا تاني يا فريد!
_مكنتش متخيل انك تتجوزي بالسرعة دي..........كأن اللي بينا مكنش حُب يا رنا
_حُب اية اللي بتتكلم عنه دا يا فريد...........انت مع اول مشكلة حصلت بينا سبتني ومشيت من غير حتي ما تسال فيا ..........انا اكتر واحدة خسرت من العلاقة دي لاني طول الوقت كنت بحاول ارضيك وافرحك ...........وقت ما كنت بتبقي زعلان كنت بحاول اعمل اي حاجة علشان اخفف عنك بس انت.........انت عمرك ما عملت علشاني اي حاجة وكنت انا اخر اهتماماتك يا فريد
_كنت غبي وغلطت يا رنا ..........بس دلوقتي فوقت وندمت علي كل لحظة انا ضيعتها معاكي وجاي علشان نبدا انا وانتي صفحة جديدة وننسي كل اللي فات
_اتاخرت اوي يا فريد……….زي ما انت شايف انا اتجوزت واللي بتقوله دا مبقاش ينفع يحصل
_بس انتي مش بتحبيه يا رنا
_غلطان………انا بحب جوزي اوي يا فريد
_طالما بتحبيه زي ما بتقولي اية اللي جابك علشان تقابليني من وراه!
_……
_ساكتة لية متتكلمي……….انتي بتضحكي علي نفسك ولا عليا يا رنا………..انا وانتي عارفين كويس اوي انك لسة بتحبيني وانك كُنتي مستعدة تستني لحد ما ارجعلك تاني وانك مغصوبة علي جوزك دا
_تبقي غلطان يا فريد
_لا مش غلطان………انتي اللي هتكوني بتغلطي غلطة كبيرة في حق نفسك وفي حق جوزك لو كملتي معاه………اطلبي منه الطلاق وتعالي انا وانتي نبدا صفحة جديدة يا رنا واوعدك اني هعوضك عن كل اللي فات صدقيني
_لا انت اكيد اتجننت
اخدت شنطتي وكنت همشي وقف قدامي وبدا يتكلم
_هستناكي يوم الخميس هنا………في نفس المكان اللي بدا فيه كل حاجة……….انا واثق انك هتيجي لانك لسة بتحبيني
_الغلط غلطي انا لاني وافقت اني اجي واقابلك يا فريد
سيبته وخرجت من الكافيه……….مكنتش مصدقة اللي سمعته منه………..ازاي يطلب مني اني اطلب من اياد الطلاق علشانه ………..دلوقتي بس اتاكدت انه عمره ما حبني لانه لو فعلا كان بيحبني عمره ما كان يطلب مني طلب زي دا……….لقيت نفسي قدام البيت……….مكنش عندي مكان تاني اروحه ولا حد احكيله اللي مدايقني………معنديش غيرها بيسمعني وبيهون عليا……….فتحت الباب وقفل ما افتح سمعت صوت ضحكتها……….لقيت جزمة قدام الباب……….مكنتش بتاعت بابا ولا بتاعت حد من اعمامي……..قفلت الباب ودخلت استغراب لقيته قاعد قدامها وهما الاتنين بيضحكوا اول ما شافتني اتكلمت وهي باصة ليا وبتقوم من مكانها
_اهي رنا جات اهي……….تعالي يا رنا اقعدي مع جوزك لحد ما اعملكم حاجة تشربوها
_شكرا يا تيتة انا مش عايز حاجة خليكي مرتاحة
_ازاي يعني……….انت اول مرة تجيلي هنا……….عايز تقول عليا بخيلة ولا اية
_لا طبعا انا مش قصدي انا
_انا بهزر معاك يا حبيبي مالك اتوترت كدة لية……….هروح اعملك كوباية قهوة ……….واقفة كدة لية يا رنا تعالي اقعدي
روحت وقعدت جمبه وانا ساكتة……….دخلت المطبخ ……….بصلي وبدا يتكلم
_انتي كويسة!
_الحمدلله
_بردو مش عايزة تحكيلي اللي مزعلك
_بس انا مفيش حاجة مزعلاني
_واضح من شكلك ان مفيش حاجة مزعلاكي فعلا………..رنا انت كنت عايز اتكلم معاكي في موضوع
_اتفضل
_انا عارف ان جوازنا جاه فجاة ويمكن انتي مكنتيش حابة ان كل حاجة تحصل بالسرعة دي بس انا حبيت اننا نكتب الكتاب علشان انا بحبك ومكنتش عايز اننا نعمل اي حاجة تغضب ربنا غصب عننا وكمان بالنسبة لموضوع الفرح……….انا بقول اننا نلغي احسن و دا علشان انا نفسي بفلوس الفرح دا نبدا حياتنا الجديدة بعمرة لبيت الله وتكون بداية كويسة بينا وبعدها نسافر اي مكان انتي عايزاه ونعمل شهر العسل بتاعنا فيه………….انا مُستعد اعمل اي حاجة علشان تكوني مبسوطة وفرحانه يا رنا………فكري في كلامي واللي انتي عايزاه انا هعمله وانا معاكي في اي قرار ………..ودا مفتاح الشقة بتاعتنا ……….استلمته انهاردة وقولت اجي اديهولك وكنت واثق اني هلاقيكي هنا……….ولو عايزة تنقلي في البيت من بكرا معنديش مانع
مسك ايدي واداني المفتاح وقفل ايدي عليه……….باسها وهو مبتسم وقام وقف
_انا لازم امشي علشان عندي شغل بس هكلمك اول ما اخلص علشان اطمن عليكي………..وخلي بالك انا مش ناسي الحكاية الجديدة اول ما اخلص شغل بليل هكلمك علشان تبعتيهالي……….مش هسيبك غير لما تخلصيها
قرب من الباب بصيت عليه وندهت عليه……….وقف وبصلي
_اياد
_نعم
_شكرا
_شكرا ليكي انتي لانك في حياتي
خرج من البيت وقفل الباب وراه………..فتحت ايدي وبصيت للمفتاح ودموعي نزلت……….فضلت اعيط وانا مش عارفة اعمل اية…………فريد عنده حق انا لسة بحبه فعلا ولحد دلوقتي مش قادرة انساه ويمكن سبب من الاسباب إللي خلتني اوافق اني اتجوز اياد اني احاول انسي فريد بس معرفتش بس ………..بس اياد شخص طيب ومينفعش اني اكسر قلبه وانا شايفاه بيحبني كل الحب دا حاولت اني ادي لقلبي فرصة اني احبه بس لا انا كدة بظلمه معايا وغلطت غلطة كبيرة اوي لما اتجوزته وانا قلبي متعلق بغيره
قربت مني وهي بتحط صنية القهوة علي الترابيزة………..بصيت الناحية التانية ومسحت دموعي
_اومال اياد راح فين
_مشي علشان عنده شغل
_هو لحق يجي علشان يمشي………اوعي تكوني قولتيله حاجة زعلته يا بنت ا………اية دا انتي بتعيطي
_عياط اية بس يا تيتة ……….تلاقي في حاجة دخلت في عيني بس
_وانا هصدق الكلام اللي بتقوليه دا مش كدة ………..في اية يا رنا
_مفيش حاجة يا تيتة……….اياد جابلي مفتاح الشقة ………..قالي كمان انه بيفكر اننا بدل الفرح والمصاريف اللي ملهاش لازمة نطلع انا وهو عُمرة وبعدها نسافر في اي مكان نقضي شهر العسل بتاعنا…………طلعنا انا وهو بنفكر زي بعض
_عمالة تبصي في كل حتة ومش عايزة تبصيلي لية يا رنا…………من امتي وانتي بتخبي عني حاجة………..اية اللي حصل خلاكي تكذبي عليا وتخبي……….اوعي تقولي مفيش حاجة لاني اكتر واحدة فاهماكي وعارفاكي
فضلت ساكتة وباصة في الارض……….صوتها بدا يعلي
_في اية يا رنا بقولك
_انا قابلت فريد انهاردة وقالي اني اطلق من اياد وارجعله يا تيتة
...........يتبع........
