رواية شيخ قتله الجن ( كامله جميع الفصول ) بقلم هبه عبد اللطيف
ياترى عرفت قصة الشيخ اللي قله الجن؟
القصة دي على عهدة من رواها وقالوا حقيقية، وقعت أحداثها في منطقة المحمدية التونسية داخل ولاية بني عروس اللي تبعد عن تونس حوالي عشرين كم.
القصة بيحكيها إمام مسجد البغدادي عن شيخ اسمه عبد المجيد البغدادي واللي شاف أغرب ما حصل له مع الجن
الناس وقتها عرفت القصة دي لكن تم نشرها بعد وفاة الشيخ بطريقة مرعبة. مش معلوم زمن ولا سنة حدوثها.. مش معلوم أية تفاصيل غير اللي هكتبها
القصة بتقول إن الشيخ البغدادي تمت دعوته من أحد الشيوخ أصدقاءه عشان يروح لأحد المنازل القديمة في منطقة المحمدية ودي مدينة أثرية قديمة. الدعوة دي كانت بغرض الرقية الشرعية لأحد سكان المنزل ده واللي بيحصل فيه حاجات ملهاش تفسير خالص
البغدادي راح وشاف المنزل اللي كان واضح عليه الفقر وسوء حال أهله. واللي كانوا عبارة عن سيدة أرملة وولدين شباب. ابنها الكبير فجأة اختفى وغاب سنتين، محدش عرف له طريق كله يدور عليه لكن مفيش أثر لحد ما لقوه مرمي ورا المنزل في أرض فاضية وكان في حالة صرع وفقد عقله يعني بقا مجنون!!
بعد عودة الشاب ده بدأت الأم والإبن التاني يسمعوا أصوات من تحت الأرض.. صوت ناس ماشية بخطوات مسموعه جوه البيت، لحد ما في ليلة شافوا الناس دي ماشيين في البيت لكن مكنش ليهم أقدام.
تاني يوم وجدوا فضلات قذرة وشعر في الأكل، وفي نفس اليوم حد من الجيران كان بيطمن عليهم شاف عندهم ناس عرايا طايرين في الهوا
الولد الصغير ابنها بيقول للشيخ البغدادي إنه في ليلة كان بيصلي المغرب في أوضته ولما خرج لقا قط أسود كبير واقف له في نص الطريق قدام باب الأوضة. القط كانت رقبته عكس جسمه.. الولد ظن أنه القط مات فزقه بعصا خشب عشان يطلعه بره، فجأة لقى القط صاحي!! الولد من خضته ضر. ب القط
القط وقف وبص له بعنيه ويقول كلام مش مفهوم وفجأة اختفى!!
في الليلة دي بالليل والولد نايم سمع خبط شديد على الباب. قام يشوف مين ملقاش حد، الولد مقدرش ينام وفضل صاحي يشوف ايه بيحصل. لحد ماسمع صوت جاي من الدولاب بتاعه، صوت خبط مرعب وفجأة الدولاب اتفتح لوحده وخرج منه راجل عجوز أصلع، نصه الاسفل كله شعر وماشي على ايديه ورجليه زي الحيوانات. المخلوق ده قرب منه وضربه بعصا كانت في ايده، الضربة جت في سنانه كسرتها ونزف
الولد كان بيموت من الرعب وقال أن المخلوق ده قاله أنت ضربتتي النهارده وأنا نايم وفجأة اختفى
اتضح انه كان القط!!
لما الشيخ البغدادي سمع ده من الولد وأمه قال لصاحبه الشيخ الجريدي لازم نقرأ الرقية هنا ونطهر البيت ده.. البيت مسكون وهو سبب كل اللي بيحصل لهم
بدأوا فعلا القراية هم الاتنين عشان تبتدي حرب الجن معاهم. وهم بيقروا الكهرباء قطعت عن البيت وسمعوا صوت خطوات حد ماشي حواليهم. بردو موقفوش قراية لحد ما الكهرباء رجعت تاني عشان يلاقوا في انتظارهم مفاجأة مرعبة. تقدر تقول تهديد جديد
شافوا آثار آقدام ملطخة بالبراز والدم كانت على سقف كل الغرف. فضل الشيخ البغدادي يقرأ هو وصاحبه وقال لهم لازم أبات في البيت ده الليلة دي. وطلبوا من الأم تاخود الولد الكبير وتروح عند الجيران لكن تسيب الولد التاني معاهم
راحت الست وابنها عند الجيران وفضل البغدادي وصاحبه والولد. كان البغدادي بيقرأ الرقية وفجأة وقع الولد على الأرض مغمي عليه وهنا سمعوا صوت مرعب جاي من تحت الأرض. وطى البغدادي على الأرض وقال للصوت أنت مين وعايز ايه
الصوت رد اخرجوا من أرضي. كان الصوت لواحد عجوز بس مرعب. سأله البغدادي أنت مين
الصوت مردش عليه غير بالتهديد يا يمشي ويسبوا البيت يا هيموتوا
البغدادي بص لصاحبه الجريدي وكملوا قرايه
فجأة باب البيت خبط. فتح الجريدي لقا الست صاحبة البيت جايه تدخل الحمام
البغدادي وقف قراية لحد ما الست تطلع وتمشي. فجأة خبط الباب تاني لقوا الست!! أومال مين اللي جت ودخلت الحمام
جري البغدادي ناحية الحمام لقاه فاضي وضلمة!!
فضلوا يقروا الرقية والآيات لحد ماتعبوا.. الجن مكنش بينهي الحرب معاهم بالعكس كان بيزودها جدًا
لما تعبوا وقفوا قرايه وناموا. البغدادي شاف حلم غريب، شاف الولد الكبير كان محبوس في سرداب ضيق وضلمه وهو رايح له فيه
فجأة صحي لقا الجريدي بيقوله أنا مش عارف أنام أنا شوفت حلم مرعب، شوفت نفسي في سرداب ضلمة والولد الكبير كان قاعد فيه
البغدادي قاله ده نفس الحلم اللي شوفته
تاني يوم جابوا الست وسألها أنتي لقيتي ابنك فين؟ قالت لقته ورا البيت في حتة أرض زي الصحراء
البغدادي راح المكان هو وصاحبه مشيوا فيه لحد ما لقوا فتحة السرداب، دخلوه بسرعه ورغم المصابيح اللي معاهم إلا أنه كان عتمة
مشيوا فيه لآخره لحد ما لقوا فتحة تانية طلعوا منها على الصحراء، كان البغدادي تعب فوقفوا،، شوية وسمعوا صوت مزمار وأصوات مرعبة وشافوا نار قدامهم وناس عرايا بترقص ملهومش ظل!! الجريدي قاله دول جن
البغدادي فضل يقول بسم الله بسم الله وقعد على صخره جنبه. فجأة اختفوا ولقوا راجل عجوز سمين راكب جمل ورجليه نازلة على الأرض، قرب منهم شافوه كان وشه مرعب وعلى راسه تاج لكن مرصع بالحشرات والزواحف
قال لهم ايه جابكم هنا لأرضي؟؟ المكان ده محرم على البشر دخلتوه ليه؟
البغدادي حكاله قصة الولد المجنون والبيت، رد الجن وقاله مالكم دخل بالولد لأنه عليه ثأر عشان أذى واحد من عشيرتي، ومنزلهم ده ملكنا احنا سكناه قبلهم.. احنا أمم امثالكم ارجعوا ومتدخلوش في القصة دي خالص وإلا الهلاك هيكون من نصيبكم
البغدادي قال.. مقدرناش نعمل حاجه للأسف.. بس قلناله مدخل السرداب مش موجود هنرجع ازاي؟
الجن قال لهم ارجعوا هتلاقوا المدخل ظهر لوحده، وافتكروا كلامي ابعدوا عن الحرب دي
البغدادي قال مشيوا لحد السرداب لقوه الفتحة ظهرت.. دخل البغدادي ووراه الجريدي.. لكن قاله هو احنا فعلا هننفذ اللي قاله ده ونسيب الناس دي؟!
قاله ربك يدبرها بس نخرج من هنا الأول
البغدادي طلع وانتظر الجريدي يطلع للأسف ملوش أثر. اختفى وفتحة السرداب اختفت هى كمان
الناس فضلت تدور عليه كام يوم ملوش أثر.. البغدادي قعد أسبوع حزين على صاحبه اللي الجن خطفه
وبعدها لقوا البغدادي في بيته ميته بطريقة مرعبة.. أطرافه مقطوعة والنمل واكل راسه ومخه
الناس اترعبت وقرروا يهدوا البيت ده وجابوا بيت غيره للست وعيالها، وبنوا مكانه مسجد اسمه مسجد الجريدي
ولولا أن البغدادي حكى للناس اللي حصل قبل موته. والست كمان حكت مكنش حد صدق ده خالص
