.jpeg "رواية ليلي وزين البارت الخامس 5 بقلم ندي زايد")
رواية ليلي وزين الفصل الخامس 5 بقلم ندي زايد
▶5
#الجزء_الخامس
_ هي ماتت ازاي ؟
بصلي بصة كلها ألم وندم بصة حسستني اني عاوزة اخده بين ضلوعي واطبطب عليه او حتي ارجع بالوقت دقيقتين ومسالوش السؤال دا لحد مفاجئني بآخر إجابة ممكن اتوقعها
= انا السبب انا اللي موتها
_ ايه !!!
بصيت عليه لاقيته قعد علي الارض بضعف وسرح بعنيه وكأنه بيحكي احداث شايفها قدامه اتكلم بصوت مخنوق
= امي كانت عنيدة ومبتحبش حد يتحداها ابدا كنت لسه طايش برده وامي كانت جبانة بتخاف من سرعه العربيات هي بتسوق بس بتخاف تسوق بسرعة لحد مافي مرة عندت معاها واتحدتها انها تقدر تسوق بسرعة وحتي مركبتش معاها ....يارتني كنت معاها قالتلي هنعمل سباق ونشوف مين هيكسب وحصل وخرجنا واتحركنا سوي بس هي ....هي خسرت وانا كسبت بس خسرتها للابد هي خافت او يمكن مقدرتش تسيطر علي العربيه من سرعتها انا مفهمتش اي اللي حصل انا فجاه ببص في مرايه عربيتي لاقيت عربيتها بتتقلب مكنتش مستوعب حاسس اني بحلم وصدقيني لحد دلوقتي بتمني لو انه حلم او كابوس افوق منه الاقيها قدامي تاني جريت بيها علي المستشفي وللاسف مكنش فيه اي امل
نزلت دموعه من عنيه وبدا يتكلم وبحة عياطه ظهرت بطريقه وجعت قلبي وكمل
=ماتت ياليلي ماتت قدام عيني وانا السبب ماتت ومقدرتس الحقها ماتت وانا حاضنها وهي بتقولي اخر حاجة كانت مبتسمه ياليلي كانت بتضحكلي قالتلي متسوقش بسرعة تاني هتوحشني بس عاوزاك تجيلي متاخر مش دلوقتي مكنتش عارف ارد مكنتش عارف اعمل اي حاجة مكنتش عارف ....
صمت سكوت عم المكان مكنش فيه غير صوت بكاه صوت يحرق القلب ويوجعه احساس الموت احساس بشع انك تبقي عارف انك مش هتشوف شخص غالي عليك تاني مش هتضحك معاه ولا تشاركه كل حياتك انه خلاص هيوحشك ومش هتبقي قادر حتي تتطمن عليه احساس بالعجز وكانك مشلول مش عارف تتحرك ولا حتي تفكر ومتهيالي لو عندك احساس ولو واحد في الميه انك السبب في ضياع الشخص دا فانت عايش في عذاب لاخر عمرك ....مسحت دمعه خانتني بيها عنيا علي كل كلمة قالها ونزلت قعدت جمبه مكنتش عارفه اقول اي اللي قاله صعب والاصعب اني اواسيه قربت منه في هدوء حضنت ايده بين كفوفي رفعت راسه بهدوء وبدات امسح دموعه واخيرا كسرت صوت صمتنا ومعرفش كنت بقول اي ..
_ مامتك كانت جميلة اوي يازين جميلة لدرجه اني حبيتها من كلامك بس مينفعش تقول انك انت السبب دا قدر ومكتوب ودا عمرها مكنتش هتقدر تمنعه حتي لو مخرجتوش حتي لو معملتوش سباق كان هيحصل دا وهي علي سريرها في حضنكوا لان ربنا امر بدا ليه وعشان اي ملناش نسال دي حكمة اختص بيها سبحانه مامتك ماتت في حضنك وهي مبتسمه وراضيه عنك وصدقني مش كتير حس بالنعمة دي انت معيش نفسك في الماضي وحارم نفسك من حاجات كتير خايف من كل حاجة صدقني هي لو عايشة كانت زعلت علي حالك اكتر من اي حد تاني مبقولكش انساها لانك مش هتقدر تنساها بس انسي اللي حصل عيش يازين افتكرها بالحلو الحلو وبس حافظ علي جنينتها زي مبتعمل حافظ علي تربيتها ليك ..ادعيلها وتصدق علي روحها اعمل حاجات تنفعها وتفيدها صدقني لو فضلنا نندم علي كل حاجة في حياتنا مش هنعيش انت برئ من التهمة اللي موجهها لنفسك يازين
حسيته اهدي كتير عن الاول وكأن هم وشاله من علي قلبه مبقولش انه خلاص نسي وهيعيش بس متهيالي دي هتبقي اول خطوه في ان حياته تتغير حتي لو من غيري
مدتله ايدي وقومته ورجعنا سوي وطلعنا السلالم وكل واحد قرر يروح لاوضته عشان الوقت اتاخر ولازم ننام وقبل ماادخل اوضتي لاقيته قرب وهمسلي في ودني
_=شكرا لانك موجودة تصبحي علي خير ياليلي
مشي من جمبي ومدانيش فرصه حتي للرد فضلت متابعاه لحد مدخل اوضته وكاني بشم الهوا وبحضن ريحته رديت جوايا بهدوء وانا بفتح اوكرة الباب
_وانت من اهله يازين وانت من اهله ياحبيبي
ودي كانت اول مرة اعترف لنفسي انه حبيبي انا فعلا حبيته بس العلاقة دي معقدة انا هفضل افكره بذنب هو معملوش لو مخرجش من الماضي مش هيقدر يحبني وحتي لو حبني مش هيقدر يقرب قررت اسيب الدنيا توريني هتعمل فينا اي وقلت لربنا يختارلي لاني حقيقي مش قادرة اختار غيرت هدومي وحطيت راسي علي مخدتي ومن تعبي نمت محستش باي حاجة .....
صحيت تاني يوم متاخر محستش بحاجة غير خبط علي اوضتي قمت بنومي فتحت بهدوء وقلت اكيد دي دادة هنية
_ ادخلي يادادة صحيت
لاقيته داخل زي مدخلت عليه المكتب قبل كدا بشكل طفولي
= بس انا مش دادة هنية
اتخضيت وشهقة خرجت مني وبصتله بسرعة وكاني شربت كوبايه نسكافيه اول ماشفته فقت وقمت اجري من علي السرير عشان اخرجه واقفل الباب
_ ولما انت مش دادة هنيه ازاي تدخل عليا كدا يلا اخرج
فضل يزق الباب معايا وبيتكلم وهو بيضحك ودي كانت اول مرة اسمع صوت ضحك زين حد يصحي علي القمر دا ياناس
= محدش قالك تنامي دا كله ياكسوله هانم اتاخرت علي شغلي بسببك
_ يسلام وانا مالي بقي حد قالك متروحش يعني
= والفطار ياه
_ ماله ياه
= جاهز ومستنيكي يقمر يلا بسرعه عشر دقايق والاقيكي ورايا
سابني وملحقتش حتي ارد عليه ضحكت من جوايا رحت بصيت للمرايه لاقيت شكلي مبهدل وشعري نصه نازل علي وشي اتكسفت انه شافني كدا ضحكت وخبيت وشي وبعدين دخلت خد دش سريع وخرجت لبست فستاني الازرق الطويل باكمامه الشيفون والحزام الاسود الجلد علي الوسط وسرحت شعري وجبته كله علي اليمين ولبست جذمتي البيضا وحطيت كحل وبصيت لنفسي وحدفتلها بوسة وكنت راضيه جدا عن نفسي نزلت ادور عليه دادة هنيه قالتلي انه في الجنينة خرجت لاقيته حاطط ترابيذه عليها مفرش ابيض وصينينه عليها فطار وكوبايتين عصير ووردة حمره صغيره جمبهم قربت عليه بابتسامة حقيقي شكله وهو فرحان وبيظبط المكان فرح قلبي اوي
_ اي دا كله اي دا كله
= اهلا ياست ليلي عندك تاخير خمس دقايق كاملين
_ والله بقي انا باخد وقتي وبرده اي دا كله بقي زين باشا عامل دا كله عشاني انا
= لا هو بصراحه لواحده كدا خدودها محمره ومنكوشه وشعرها نصه علي عنيها وكانها مستخبيه جواه مشفتيهاش
ربعت ايدي ورفعت حواجبي وبصتله كاني بحذره لاقيته بيبتسم ومسك الورده يقدمهالي
_ متبصيش كدا بس اتفضلي دي بدايه حكايه جديدة ويوم جديد مقطفتهاش علي الفاضي اهو
ابتسمت انه مركز في كل كلامي وبينفذه بعدين شدلي الكرسي وقعدت عليه وبدانا نفطر سوي في هدوء كنت ببصله وبحاول احفظ تفاصيله خايفه تكون نهايه القصة دي الفراق وتكون دي في يوم من الايام مجرد ذكريات .
عدي عليا شهر في البيت دا الحمد لله جدو بقي احسن وانا زين علاقتنا بقت حلوة اوي بيغير عليا وبغير عليه بحبه وبيحبني ومحدش فينا بيعدي يوم من غير التاني بس احنا مش اكتر من صحاب طبعا ودا مسمي العلاقة اللي زين حاصرني فيه واللي تعبت منه لانه مش صاحبي دا حبيبي والموضوع دا تعب قلبي ومبقتش مستحملاه
_ ها ياجدو متهيالي كدا نفذت وعدي
~ مكنتش متخيل اني هتحرك اخيرا من غير الكرسي وارجع زي زمان
_ انت مفيش احسن منك ياجدو في الدنيا كلها ومتسبش حاجة تاني تاثر فيك كل حاجة بتعدي
قمت وقربت مسكت ايده وحيطتها في ايد تيتة وداد وكملت
_ كل حاجة بتعدي طول ماانتوا مع بعض طول محبكوا مقويكوا متضعفش ابدا يجدو وانت معاك تيتة دي جيشك ودرعك في الحياه دي
باسني من راسي وتيتة حضنتني وانا عيني دمعت لاني بجد حبيتهم اتمنيت لو كان ليا جد وجده زيهم طول عمري كان نفسي في كدا بس انا جدي وجدتي ماتوا من زمان البيت دا هيوحشني اوي
_ لا يجماعه انا قلبي رهيف مش حمل كدا
ابتسمت تيته وخرجتني من حضنها وكملت
° يابت بطلي لماضة يابت
_ طب بما اني خلصت مهمتي في البيت دا متهيالي خلاص كدا مبقاش فيه لازمه من وجودي فانا همشي من البيت بكرا
~ بسرعة كدا يبنتي هتسبينا
_ معلش بقي ياجدو دا انا هنا بقالي شهر بتابع المرضي بالتليفون وبابا كمان لوحده
° دا البيت هينطفي اوي يبنتي
_ البيت منور بيكوا ياتيته وانا ان شاء الله هبقي ازوركوا علي فترات بعد اذنكوا
قمت من المكان كله وهربت علي اوضتي مش متخيله اني هسيبهم بس هقعد تاني ليه حتي علاقتي بزين مش مبرر انا العلاقة دي هتنهك قلبي وانا مش هقدر اداويه لازم ابعد وكفاية لحد كدا .......
كنت قاعد في مكتبي بخلص ورق لاقيت تيتة داخله عليا ودي اول مرة الاقيها تجيلي مكتبي من سنين قمت اتخضيت
= تيتة جدي حصله حاجة فيه حاجة
° لا يازين مفيش حاجة انا بس عاوزاك في كلمتين
قمت خدت ايديها وقعدتها علي الكنبه وقعدت جمبها
= اؤمريني ياست الكل في اي
°عاوزة اسالك سؤال ومتكدبش عليا فيه ممكن ؟
=وانا من امتي كدبت ياتيته اساليني
° حبيتها يازين ؟
= هي مين دي ياتيتة ؟
° ليلي ليلي يازين حبيتها ؟
= ا......
#يتبع
#خواطر
#ليلي_زين
#ندي_زايد
#nada
