رواية ابيض واسود الفصل الثاني 2 بقلم ندي عبد العزيز
البارت التاني
#ابيض واسود
#كتابات
وقفنا البارت اللي فات لحد ما البنت اتعصبت على رهف وضربتها بالقلم
رهف كانت لسه هتردلها القلم بس لما لمحت الأسيستنت جاي عليهم اتراجعت ومثلت العياط
الأسيستنت بعصبيه ل البنت : أي اللي حصل ده انتِ ازاي تضربيها كده انتِ فاكره نفسك في الشارع (اللهم اسيستنت زي ده )
البنت بدموع مصطنعه : حضتك بتزعقلي ليه يا مستر هي اللي بدأت الأول
رهف بس دموعها غلبتها ومش بتمثل : والله هي اللي بدأت الأول وكعبلتني وفي الأخر ضربتني بالقلم
الأسيستنت : اهدي يا رهف انا شوفتها وهي بتضربك ومصدقك (الأسيستنت الحنين رزق ) وبعد كده وجه كلامه للبنت ، وانتِ تاخدي حاجتك وتروحي ومتجيش الحصة الجايه من غير ولي امرك
البنت : يامستر انا معملتش حاجه
الأسيستنت (مالك ) : كل ده ومعملتيش حاجه يلا بدل ما والله ما هتعتبيها تاني يلا بره
البنت مشيت وهي بتتوعد ل رهف
رهف بشكر : مش عارفه أقول ل حضرتك أي والله شكراً
مالك : متقوليش حاجه انتِ معملتيش حاجه وحشه فيها هي اللي بدأت وانا شايفها ، المهم عايزك تركزي وتهتمي بمذاكرتك وكبري دماغك من كل حاجه الناس مبتنفعش انا عايز اشوفك احسن دكتوره
رهف : إن شاء الله عن إذن حضرتك
مالك : اتفضلي
مالك بعد ما رهف مشيت
مالك : قطعه من المارشميلو ( يا دبلة الخطوبة عقبالنا كلنا )
رجعت رهف البيت
رهف : يا اهل الداار انا جييت
جميله (الأم) : أي يابت جايه بدوشتك على طول كده
رهف : أعيش وادوشكوا يا جوجو يا عسل انتِ ، امال فين حوده
جميله : يابت احترمينا شويه أي جوجو وحوده ده احنا ابوكِ وامك والله نفسي اسمعك بتقولي ماما وبابا
رهف بهزار وصدمه مصطنعه : يلهوي ماما وبابا انتِ بتشتميني يا جميله
دخل محمود في الوقت ده وخد رهف ف حضنه
محمود : انا رهفتي تقول اللي هي عايزاه
رهف : ايوه يا حوده يا مدلعنيي
جميله بزعل مصطنع : يعني اطلع منها انا كده
رهف بحب : لا يا جميله يا قمر انتِ احنا نقدر نعيش من غيرك
جميله : ثبتيني انتِ كده
رهف بثقة : امال أي
جميله بضحك : طب يلا يختي عشان نتغدى وتقعدي تذاكري
رهف : يادي النيله أي اللي جاب سيرة المذاكره دلوقتي ، البت ملهاش غير بيت جوزها اصلاً
جميله : بمناسبة ان الواحده ملهاش غير بيت جوزها في عريس متقدملك بس قولنا نأجله لبعد الأمتحانات
رهف بتريقه : عريس مين المرادي اللي عايزني ادخل دبلوم وبيتشرط ولا اللي متجوز ومطلق وانا عاجبه امه
جميله : يبنتي ابقي شوفيه وبعد كده ابقي قرري كده كده هيجي بعد الأمتحانات
رهف : هو عارف اني عندي بهاق يجميله
جميله بتوتر : اه اه عارف ، يلا بقا عشان نتغدى
اتغدوا ورهف دخلت تذاكر
جه تاني يوم ورهف راحت السنتر وهي قاعده في القاعه لقت مالك بيندهلها
رهف راحتله والمستر كان لسه مدخلش
رهف : نعم يا مستر مالك
مالك : تعالي يا رهف عشان نادين جابت ولي امرها وجت ولازم تبقي واقفه
رهف بتوتر : هو انا لازم ابقى موجوده اوي يعني
مالك : انتِ خايفه ليه يا رهف انتِ اللي ليكِ الحق هي اللي لازم تخاف مش انتِ
رهف : انا مش خايفه انا بس متوتره
مالك : لا انا عايزك تهدي ومتتوتريش وعايزك تعرفي ان انتِ على حق ومتخافيش انا هبقى معاكي انا عايزك قويه وتواجهي ومتخافيش من أي حاجه وقولي اللي انتِ عايزاه
رهف : ماشي يلا وربنا يستر
مالك بأبتسامه : يلا
خرج مالك ورهف راحوا المكتب
(مالك مدير السنتر واسيستنت كمان )
مالك قعد على كرسي المكتب وقال ل مامت نادين تقعد وقال ل رهف تقعد وساب نادين واقفه
مامت نادين (كوثر ) بتكبر : انا عايزه افهم بنتي عملت أي عشان تطردها
مالك : بنتك غلطت ف زميلتها اتريقت عليها وكمان ضربتها بالقلم معملتش احترام لأي حد
كوثر بتكبر: مش يمكن البنت دي هي اللي غلطت انا بنتي مبتغلطش ابداً
مالك بضيق : احكي اللي حصل يارهف
رهف : انا كنت داخله السنتر لقيت نادين مدت رجليها عشان توقعني بس انا مخدتش بالي غير بعد ما وقعت وقومت وقفنا نتكلم واقولها ليه عملتي كده لقيتها اتعصبت وضربتني بالقلم
كوثر بعصبيه وتكبر : انتِ كدابه انا بنتي متعملش كده ابداً انتِ بتتبلي على بنتي
رهف بصت ل مالك ومالك بصلها بنظرة انها ترد عليها وان هو معاها متخافش
رهف : والله حضرتك انا مبكدبش ولا اتبليت على حد
كوثر : انتِ كمان بتردي عليا مش كفايه إدارة السنتر قبلاكي هنا بشكلك ده وكملت ل مالك بتكبر انت ازاي ي مستر مالك تقبل ناس بالشكل ده دي مبقعه
رهف كانت هتعيط بس مسكت نفسها
مالك بعصبيه : أي اللي بتقوليه ده انتِ مالك اصلاً احنا نقبل مين ولا منقبلش مين وبعدين مالها رهف ما هي قمر اهي ولا عشان البهاق اللي ف وشها احب اقولك ان ده بيميزها عن الكل مخليها مختلفه مش عاديه وبعدين الأنسان مش بالشكل الإنسان بروحه ورهف شكل وروح جميله واه رهف مابتكدبش ولا اتبلت على حد انا شوفت كل اللي حصل وكمان راجعت الكاميرات واحب اقولك كمان ان بنتك مش هتدخل السنتر تاني ولا هتعرف تروح أي سنتر غير ده عشان هوصي انها متدخلش أي سنتر واظن حضرتك عارفه ان انا اقدر اعمل كده فعلاً
كوثر : اعلى ما ف خيلك اركبه بنتي وهوديها احسن سنتر واجبلها احسن المدرسسين ف البيت كمان
مالك بثقة : صدقيني مش هتعرفي لأن بتليفون واحد مني مخليش أي مدرس او سنتر يرضوا بيها اصلاً ويبقى مستقبلها ضاع بسببك وبسببها
نادين بعد ما ادركت الموقف : خلاص يا مستر مالك انا اسفه وكمان لو عايزني اتأسف ل رهف هتأسفلها
كوثر بعصبيه : أي اللي انتِ بتقوليه ده يا نادين تتأسفي ل مين
نادين : بعد اذنك يا مستر مالك دقيقة واحده ، تعالي ي ماما معايا
نادين : اهدي ي ماما وفكري كويس انا كده مستقبلي انا اللي هيضيع فكري فيا شويه وبعدين انا غلطت فعلاً
بعد شويه كانت كوثر اقتنعت بكلام نادين وراخوا ل مالك ورهف تاني
كوثر : خلاص يا مستر مالك حقك علينا بس بلاش تفصل نادين وهي هتأسفلك
مالك بأستفزاز : تؤتؤ متتأسفش ليا انا تتأسف ل رهف
كوثر كانت لسه هترد قاطعتها نادين
نادين بسرعه : انا اسفه يا رهف حقك عليا انا غلطانه
رهف بطيبه : خلاص محصلش حاجه
مالك : متأكده يا رهف انك سامحتيها
رهف : ايوه يا مستر مالك سامحتها وكمان حرام ان حضرتك تفصلها ف وقت مراجعه وسنه مهمه زي دي
مالك : ماشي ي رهف يلا روحي على قاعتك هتلاقي المستر دخل
رهف بأبتسامه : تمام شكراً جداً ل حضرتك على وقفتك جمبي دي
مالك : يلا على قاعتك يا رهف قولتلك قبل كده متشكرنيش
رهف بضحك : خلاص انا اسفه مش شكراً
راحت رهف قاعتها وعدا اليوم بسلام
كده البارت خلص أتمنى يكون عجبكوا وتتوقعوا أي للي هيحصل في الأحداث الجايه
#Nada abd elaziz
