رواية انا وابن خالتي الفصل الرابع 4 الجزء الثاني بقلم عمرو راشد
احنا لازم نخلص من مروان يا هند
= مروان دا جوزي،، انت بتقول ايه؟
جوزك خطر عليكي،، جوزك عايز يتجوز عليكي واحدة تانية ومش اي واحدة،، دي شمس
= برضو لا يا هارون مش هيكون هو دا الحل،، انا مستحيل اكون سبب في أذ*ية مروان
" لقيته سكت وبص في الأرض
افهمني بس،، مروان لحد دلوقتي مش فاهم حاجة،، هو لو فهم مش هيعمل كدا اكيد
= عايزة تفهميه ايه يا هند؟،، هتقوليله أن في جن عايش جواه وبيحبك
اكيد مش هقوله كدا بس انا قصدي يكون فاهم اللي بيحصل حواليه
= مروان لو فهم هيعند اكتر يا هند
عندك حل تاني؟
= زي ما قولتلك
وانا مش هعمل اللي انت بتقول عليه دا ثم اصلا مروان لو ما*ت معناها انك انت كمان هتختفي
= انا اقدر اظهرلك في اي شخص انتي عايزاه،، اقدر اكون في الشكل اللي أنتي تحبيه وبعدين هو مين قال ان مروان هيمو*ت؟
اومال هتعمل فيه ايه
= انا قصدي نبعده شوية اليومين دول،، نخفيه يعني
وبعدين
= هنضيع وسيلة من عند شمس من الوسائل اللي هي بتعرف تدخل بيها ليكي
دا مش حل يا هارون
= اومال ايه الحل بقا عرفيني؟
شمس قالت انك معاك اخر فرصة عشان ترجع معاها
= كملي وبعدين يعني،، عايزاني ارجع؟
انا مبقتش عارفة انا عايزة ايه
= هو انتي فاكرة اني حتى لو رجعت معاهم هيسيبوكي في حالك؟
المفروض اه لانك خلاص بقيت معاهم
= بس انتي كنتي السبب في حر*ق افراد من قبيلتي يعني اسمك اتكتب بالدم عندهم
هيأذ*وني يعني؟
= شئ اكيد بس وحياتك عندي ما حد يقدر يعملك اي حاجة طول ما انا موجود
هتحار*بهم تاني
= وتالت،، انا اعمل اي حاجة عشانك
هتقدر عليهم؟
= لا دا انا اعجبك أوي
يعني هتقدر وتحار*ب وتعمل اكشن وكدا
= اكيد اه
طب بقولك ايه.. خدني على ضهرك وطير بيا بقا
= تاني يا هند!
عشان خاطري يا هارون،، طير بيا لحد الدور الأرضي بس
= اسكتي يا هند
طب لحد التاني طيب وسيبني هناك
= انا داخل انام،، خلي مروان يصحا ويخلصني من اللي انا فيه دا
" لسة كان هيمشي عشان يدخل الأوضة لكن مسكت دراعه بسرعة
استنا،، طب والباب اللي وقع دا مين هيصلحه
= هند انا جن مش نجار
طب ما توريني كدا اي حاجة من اللي انتو بتعملوها دي
= هو ايه الحماس اللي ظهر فيكي فجأه دا؟
طب بقولك ايه،، ما تجرب كدا مرة واحدة بس ومش هطلب تاني والله
" شاور ب صباعه للباب،، الباب اترفع ل فوق و رجع مكانه طبيعي،، حضنته والابتسامة مرسومة على وشي
واو،، طب بقولك ايه طير بيا بقا لحد الدور الأرضي
= انا هجبلك جوزك احسن،، ولا جوزك ليه،، انا هروح ل شمس
طب لحد الدور التاني،، مش بعيد اهو
= انتي كنتي عايزة الباب يتصلح و اهو اتصلح،، ممكن تسبيني بقا
هتروح فين؟
= هو انتي مش واخدة بالك اننا في مصيبة؟
ايوا هتعمل ايه يعني
= مفيش غير قاسم،، دا الحل الوحيد اللي قدامنا
و هو قاسم هيساعدنا ازاي؟
= اكيد هيكون عنده حل،، اسمعيني انتي بكرا تروحي عنده وتحكيله اللي حصل وشوفي هيقولك ايه
طب وانت؟
= هحتاج حد يساعدني،، ماهو انا مش هفضل واقف مستني نتيجة كل خطوة،، لازم نمشي في حل واتنين
هتعمل ايه؟
= ممكن استدعي حد من قبيلتي
انت مش بتقول انهم غضبانيك عليك؟
= ماهو دا مش معاهم،، المهم خلي بالك انتي من نفسك ومتقلقيش انا هبقا جنبك دايما مش هسيبك
" بعدها دخلنا احنا الاتنين ننام،، حسيت بيه وهو قايم الصبح و طبعا دا عشان شغله،، بعد ما نزل قومت عشان اشوف الساعة لقيتها 7 الصبح،، كملت نوم لحد ما فوقت الساعة 2 الضهر على صوت جرس الباب،، قومت فتحت،، كانت ماما
ايه يا بنتي انتي فين؟
= ما انا موجودة اهو يا ماما
موجودة ايه بس،، من ساعة ما كنتي عندي مسمعتش صوتك من ساعتها،، هو انتي لقيتي سعادتك ونستيني ولا ايه
= سعادة ايه بس يا ماما،، الظاهر اني عمري ما هشوف سعادة طول حياتي
اعوذ بالله ليه بتقولي كدا يا حبيبتي
= مفيش حاجة بتكمل للاخر،، دايما في حاجة بتخلي فرحتي ناقصة
مش يمكن انتي اللي مختارة طريق غلط أصلا من الأول
= ازاي يعني؟
زي لما تشوفي فستان عاجبك بس ضيق عليكي لكن هو عاجبك جدا وقررتي تشتريه وانتي عارفة انه مش على مقاسك بس اتصدمتي لما روحتي البيت و لقتيه مش مقاسك رغم انك عارفة من الاول انه مش هينفع،، اهي الحياه كدا يا بنتي،، الفستان اللي على مقاسك هتلاقيه جنب الفستان اللي عجبك اوي دا،، واللي على مقاسك حلو برضو بس احنا دايما بنحب نختار الصعب
= انا حاسة اني داخلة على ايام صعبة أوي يا ماما،، جوايا خوف من اللي جاي دايما ومش عارفة ابطل دا
اللي بيخاف بيكون عامل حاجة غلط وخايف من نتيجتها،، انتي عاملة حاجة غلط؟
" سكت ومعرفتش ارد
مفيش بني آدم مبيغلطش يا هند،، احنا بشر يا حبيبتي بس المهم اننا لما نعرف الغلط نروح نصلحه
= مش يمكن لما اصلحه اندم؟
تندمي على تصليح الغلط؟،، دا معناه انك عارفة انك بتعملي حاجة غلط،، معنى كدا انك عارفة النتيجة وعارفة اللي هيحصل،، معنى كدا انك عندك الشجاعة تواجهي نتيجة غلطك دا يبقا ملوش لازمة خوفك دا يا هند
= يا ماما انا تايهة ومش عارفة افكر،، ساعديني انا حاسة ان دماغي واقفة
الغلط اللي أنتي عملتيه يتصلح وأنتي هتبقي كويسة
= هو انتي ليه متأكدة اني عملت حاجة غلط؟
باين عليكي وباين كمان انه غلط كبير
= لا عادي على فكرة،، انا تمام
اتمنى
#بقلم : #عمرو راشد
" نظرة ماما وكأنها عارفة ان فعلا في حاجة مش طبيعية بس طبعا هي مينفعش تعرف حاجة،، مفيش حد شايل الهم دا غيري لوحدي بس دا قراري وعلى رأي ماما طالما دا غلطي يبقا اتحمله،، بعد ما ماما نزلت دخلت لبست بسرعة ونزلت،، وصلت بيت قاسم الساعة 8،، استنيت دوري و دخلت،، على عكس العادة لقيت وشه قافل تماما مش مبتسم زي كل مرة وهو بيقابلني
جاية ليه؟
= انا واقعة في مشكلة كبيرة وعايزاك تساعدني
مشكلتك المرادي ملهاش حل يا هند،، حلها مش عندي
= بس انا فعلا محتاجاك،، انت متعرفش ايه اللي عندي؟
لا عارف،، شمس جاتلك
= وعارف هي عايزة تعمل ايه؟
عارف،، وأنا حذرتك من اللي أنتي هتعمليه و أنتي مسمعتيش كلامي
= طب انا المفروض اعمل ايه؟،، انا خايفة
يا هند انا حذرتك أكتر من مرة وقولتلك مينفعش هارون يرجع،، انتي بالشكل فتحتي على نفسك بوابة جهنم ومش هتتقفل،، انتي متعرفيش شمس دي ممكن تعمل ايه
= ماهو انا جيالك عشان كدا،، ساعدني واعملك اللي انت عايزه،، حتى بص
" طلعت من شنطتي المبلغ اللي كان طلبه مني في موضوع هارون
دا المبلغ اللي اتفقنا عليه وممكن أدفع اكتر بس تساعدني
= الموضوع دا لو انا دخلت فيه هتأذ*ي يا هند،، ربنا يسهلك يا هند وتلاقي حل لان حلك صعب ومش هيكون عندي،، تقدري تتفضلي دلوقتي
" مشيت من عنده وانا فاقدة اخر امل ليا،، مضطرة استنا هارون واشوف هو هيتصرف ازاي،، انا كدا معنديش حد الجأله ولا حد هيعرف يساعدني،، الامل في هارون،، رجعت البيت دخلت اغير هدومي بس وانا بغير في الأوضة سمعت صوت برا في الصالة وأنا عارفة ان البيت مفيهوش حد،، خرجت برا لقيت شمس قاعدة على الكنبة
محدش هيساعدك يا هند متتعبيش نفسك،، كل الطرق مقفولة،، محدش هيوافق يقف قدام شمس
= في ربنا اللي أقوى منك ومن اللي زيك
ربنا!!!!
" بدأت تضحك و رجعت تكمل كلامها
وهو أنتي لما حضرتي هارون كنتي تعرفي ربنا؟،، كان لازم تسمعي كلام الشيخ بتاعك وتفكري كويس قبل ما تعملي اللي عملتيه،، بس تعرفي انا مستمتعة،، بكلمك بجد على فكرة،، اللعبة حلوة واحلى لما تبقي عارفة انك الطرف الاقوى وهتكسبي في الأخر يعني الموضوع محسوم يا هند
= انتي بتقولي اي كلام،، بتحاولي تداري على خوفك
اخاف منك انتي؟،، من بشر
" قامت وقفت وعنيها قلبت للون الأحمر
بنت ابليس تخاف من بشر!!!!!
" صوتها كان مرعب جدا و اجش بعدها عنيها رجعت لطبيعتها و ابتسمت وقالت
طب شوفي مروان هيقولك ايه دلوقتي
= دلوقتي فين؟
" في نفس اللحظة لقيت مروان ليفتح الباب و دخل،، بصتله وأنا مصدومة و رجعت ابص عليها تاني لقيتها بتبتسم و اختفت في ثواني،، مروان دخل وهو باصصلي بإستغراب
مالك؟
= مفيش انا تمام
كويس اني لقيتك صاحية
= خير في ايه؟
انا هتجوز شمس بكرا!!
#عمرو_راشد
#انا_وابن_خالتي 2 "بداية الانتقام " 4
#يتبع
