رواية سمسم والطفلة كوكي الفصل الثالث 3 بقلم اسماعيل موسى
٣
فجأه كوكى توقفت عن الكلام وبصت ناحيت الباب وظلت ناظره على ثقب الباب كأنها ترانى، بعد كده كوكى طلعت على السرير وشدت الغطاء عليها إلى منتصفها واغمضت عينيها والنور انطفاء.
جسمى اتنفض، رعشه قويه سرحت على عمودى الفقرى، ازاى النور انطفى فى غرفة كوكى؟
فتحت الباب بسرعه وولعت النور، كوكى، كوكى، انتى نايمه؟
كوكى مردتش عليا
انا عارف انك صاحيه يا كوكى!؟!
كوكى بصوت ضعيف انا زعلانه منك
طلعت على السرير ونمت جنب كوكى وانا خايف الصراحه، خدتها فى حضنى، زعلانه ليه يا كوكى؟
كوكى بصوت نعسان عشان انت عايز تتخلص من صديقتى
صديقتك مين يا كوكى؟
يوه تانى؟ صديقتك إلى على قطعة المعدن
اتخلص منها ازاى بقا يا ست كوكى؟
قالت كوكى بصوت واهن زعلان، مش انت عايز تبيعها؟
جسمى وقف من الصدمه والخوف، مين قالك كده يا كوكى؟
صحبتى قالتلى وكانت زعلانه، انت ليه عايز تتخلص منها
على فكره هى حذرتنى وقالت ان بعدها عنى فيه خطر عليا
كان لازم اخدها على قد عقلها، سألتها خطر ازاى؟
خطر عليا انا يعنى؟
كوكى قالت لا، انت مش فاهم حاجه، خطر عليا انا، صديقتى قالت لو اخوكى باع العمله مش هيشوفك تانى ولو كان بيحبك متخليهوش يبيعنى عشان مصلحتك
كوكى متعرفش انى هبيع العمله انا متكلمتش قدامها ولا قدام اى شخص
حضنتها اوى، متخفيش يا روحى محدش يقدر يعملك حاجه
القصه بقلم اسماعيل موسى
كوكى بصت عليا، اسكت يا سمسم انت مش عارف حاجه
لو كنت بتحبنى متتخلاش عن العمله خليها معانا هنا فى البيت، انا مش عايزه اموت يا سمسم
اتلخبطت، الكلام إلى بتقوله كوكى أكبر من سنها، كلام حزين خلى قلبى ينقبض
لسانى مكنش عارف يقول ايه، من اول النور ما قطع لحد الكلام المرعب إلى بتقوله كوكى خلانى مش على بعضى
انت عارفه انى بحبك يا كوكى وعمرى ما هسمح لأى حاجه تزعلك او تعملك حاجه
كوكى اديتنى ضهرها، لو بتحبنى وخايف عليا ارجوك ادينى العمله، تخلى عن أفكارك بالتخلص منها وسيبها معايا
والله هى مش مؤذيه، الطفله دى اتعذبت كتير اووى ومش عايزانى اتعذب زيها
