رواية الم البداية الفصل الثلاثون 30 بقلم فريدة احمد
الم البداية
الفصل الثلاثون
في المستشفى
حازم كان واقف قدام غرفة العمليات بقلق وخوف
لحد ما الدكتور خرج
حازم بقلق .. طمني يادكتور هي كويسة
الدكتور .. هي دلوقتي محتاجة نقل دم عشان نزفت كتير بس ان شاء الله هتبقي كويسة متقلقش
حازم .. والجنين
الدكتور بأسف .. مقدرناش ننقذه . ربنا يعوض عليكم
عن اذنك هشوف الدم اللي هي محتجاه
الدكتور مشي
وحازم قعد مكانو بحزن وندم علي اللي ريم وصلت ليه بسببو وبسب انانيته وظلمه ليها
بعد وقت كانت ريم اتنقلت في غرفة عادية
ريم فتحت عينيها بتعب لاقت نفسها علي سرير في المستشفى ثواني واتذكرت اللي حصل
علي دخول الممرضة
الممرضة .. الف سلامه عليكي يامدام
ريم هزت راسها بتعب
ريم بتعب .. هو . البيبي
الممرضة نزلت راسها بحزن
ريم .. نزل صح
الممرضه .. ربنا يعوض عليكي
الممرضه .. هبلغ الدكتور انك فوقتي
وخرجت
بره حازم قام وقال للمرضه .. فاقت
الممرضه .. ايوا اتفضل حضرتك
حازم دخل ليها كانت نايمة ودموعها نزله بصمت
حازم قرب منها اول ماشافته لفت وشها بعيد
حازم ميل باسها على راسها
بعد وقالها بحزن .. مش قادر اقوللك سامحيني . لاني مستاهلش انك تسامحيني . بس اسف ياريم .اسف علي كل حاجة عملتها معاكي
ريم كانت باصه الناحية التانيه وبتعيط بوجع
ريم بدموع .. لو سمحت اخرج بره
حازم بص عليها بحزن وخرج بهدوء
حازم كان لسه خارج من الاوضة قابل امجد وشيرين اللي لسه داخلين
شيرين اول ماشافته قالتلتو بغضب وعصبية .. عملتلها ايه يا حازم . سقطها . ليه ليه حرام عليك حرام عليك ياشيخ
حازم كان ساكت ومتكلمش
شيرين بعصبية .. رد عليا عملت كده ليه
امجد بحده .. شيرين . ماينفعش كده .اهدي
شيرين بصت علي حازم بغضب .. واللي هو عملو ده هو اللي ينفع
امجد .. ملوش لازمه الكلام ده دلوقتي و ادخلي شوفيها .يلاا
شيرين بصت عليهم بغضب ودخلت لريم
شيرين ميلت عليها باستها .. الف سلامه عليكي يا حبيبتي
ريم كانت دموعها نازلة شيرين مسحتلها دموعها ومسكت ايدها وقالتها ..متزعليش هو ميستاهلش دموعك دي صدقيني بعد اللي عملو ده
ريم .. انا اللي سقطت نفسي ياشيرين
شيرين بصدمة .. انتي
ريم هزت راسها بصمت
بعد ساعات كان الدكتور دخل كشف عليها وكتبلها علي خروج
...............
بعد وقت كانت ريم رجعت شقتها مع شيرين بعد مارفضت تركب مع حازم عشان يوصلها
...............
عدي اسبوع
ريم اتحسنت شويه وشيرين طول الاسبوع ده كانت قاعدة معاها مكانتش بتسيبها لوحدها ابدا
حازم كان بيطمن عليها من بعيد بس لكن مكانش بيرورح ليها كان سايبها تهدي
انجي اتخطبت ل أدم بعد ماجاب اهلو واتقدمولها رسمي وتمت الخطوبة
الغريب ان ياسين مصدرش منو اي رد فعل وكان هادي جدا للدرجة انهم كانو مستغربين هدوءو ده ومش مطمنين وقلقانين منو
فارس كان عرف باللي حصل لريم وكان بيحاول يستغل ده ويوصلها لأنو كان مغلول من حازم بعد اللي عملو معاه لما بعتلو ناس ضربوه
..........................
عند ريم كانت قاعدة مع شيرين
شيرين .. ناويه علي ايه ياريم
ريم بهدوء وهي بصه قدامها .. هتطلق
شيرين .. وتفتكري حازم هيوافق يطلقك بسهولة
ريم بصتلها .. ومين قالك اني هطلب منو يطلقني
شيرين .. مش فاهمه
ريم بجمود .. هخلعو
شيرين .. انتي بتهزري صح
ريم .. بتكلم بجد
شيرين .. لأ ياريم مهما كان حازم مايستهاهلش تعملي معاه كده
ريم .. ميستاهلش بعد كل اللي عملو ده وبتقولي كده
طب لو انتي مكاني كنتي هتعملي ايه . دا انتي عشان شاكه إن جوزك بيخونك شاكه بس مش متأكده شوفي انتي بتعاقبيه الزاي .. وبتقولي ده ميستاهلش
شيرين كانت ساكته مش عارفه تقولها ايه هي عندها حق
ريم كملت بدموع .. طب انا ايه مش كل اللي حصلي ده بسببو
مش هو اللي عمل معايا كدة . كنتي عايزاني يحصل معايا ايه اكتر من كده علي ايده
شيرين .. انا معاكي وحاسه بيكي والله . بس هو مش هيقبل انك تعملي معاه كده انا خايفه عليكي منو
ريم بقوة .. وانا مش خايفه منو ولازم انتقم منو علي كل اللي عملو فيا .مش هسيب حقي وهارد عليه ولازم اكسره واهينه زي ماعمل معايا . لازم اخد حقي منو
.......................
عند ياسين كان قاعد في شقة لوحدو وهو ماسك كاس بيشرب منه
ياسين كان فاتح الفون علي صورة انجي
كان بيبصلها ويقول بإصرار غريب .. مش هيلحق يتهني بيكي صدقيني .انتي ليا وعمرك في حياتك ما هتكوني لحد غيري
......................
عند ريم كانت قاعدة لوحدها
جرس الباب رن قامت تفتح وكان حازم
ريم بجمود .. نعم
حازم .. عامله ايه
ريم .. كويسة
حازم .. ريم انا هجيب اهلي وهتقدملك وهتجوزك قدام الناس كلها
ريم ابتسمت بسخرية وقالت .. بجد
حازم هز راسه وقال .. هعملك اللي انتي عايزاه
ريم .. ومين قالك اني عايزه كده
حازم بهدوء .. امال عايزه ايه
ريم ببرود .. عايزه اطلق
حازم .. مفيش طلاق ياريم
ريم ببرود .. تمام .انا هتصرف
حازم بعدم فهم .. تتصرفي في ايه
ريم .. في موضوع الطلاق
حازم .. انا سايبك تهدي بس انسي انا مش هطلقك
................
تاني يوم ريم لبست ونزلت
راحت لعمر صاحب حازم في مكتبه لأنو محامي
ريم دخلت .. مساء الخير
عمر قام من علي كرسي المكتب بستغراب وقال .. مساء الخير . اتفضلي ياريم
ريم قعدت وهو قعد قصادها
ريم .. طبعا انت مستغرب انا جايه ليه
وقبل ماعمر يتكلم ريم قالت .. انا جايالك في شغل
بصت حواليها وهي بتقول .. مش انت محامي بردو
رجعت بصتلو وكملت .. ان عايزاك ترفعلي قضية
عمر كان لسه مستغرب لكن قال .. قضية اي وعلي مين
ريم .. قضية خلع . علي جوزي اللي هو صحبك
عمر بصدمة كبيرة .. انتي بتقولي ايه ياريم
ريم .. بقول اللي انتا سمعتو . ها قولت ايه .هترفعلي القضية ولا اشوف محامي تاني
عمر .. انا مش فاهم حاجه .. هو حصل ايه حازم عمل ايه
ريم .. انا عايزه اطلق وهو رافض ماقداميش حل تاني
ريم .. هترفعلي الدعوه
عمر .. انتي عايزاني اوفقك وارفع قضيه زي دي علي صحبي
ريم . يعني مش موافق
عمر .. ايوا طبعا استحالة اعمل كده
ريم قامت .. تمام . عن اذنك
وراحت تخرج وقفها عمر
عمر .. استني بس . هتعملي ايه
ريم بكل بساطه .. هروح لمحامي تاني
عمر .. وانتي فاكرة إن في اي محامي هيوافق يرفعلك قضية زي دي علي حازم . دا غير انها كده كده هتترفض من المحكمة
ريم .. قصدك ايه
عمر .. انتي مش عارفه حازم يبقي مين . مفيش محامي هيستجرأ يوافق يرفعك الدعوه عليه . دا غير ان لازم يبقي في اسباب قويه علشان الدعوه تتقبل
ريم ابتسمت بوجع من جواها وهي بتقول في نفسها هو في بعد اللي عملو معايا .. بس للأسف مفيش في ايدها دليل يدينه
ريم اتنهدت قالت .. مش مهم . المهم اني ارفع الدعوة عليه وحسسه يالاهانه
عمر .. هو حصل ايه ياريم
ريم . يبقي اسال صحبك عن اذنك
وخرجت
ريم رجعت علي الشقه وهي طالعه اتفاجأت بفارس مستنيها قدام الشقه
فارس بلهفة .. ازيك ياريم
ريم بجمود .. انت اي اللي جابك هنا .وعايز ايه
فارس .. جي اساعدك ياريم
ريم .. تساعدني في ايه
فارس .. تطلقي
ريم .. ومين قالك اني هتطلق
فارس .. دا علي اساس انك مش جايه دلوقتي من عند المحامي عشان ترفعي قضيه علي جوزك
ريم .. انت بتراقبني
فارس .. انا عايز اساعدك ياريم وصدقيني انا هعرف اخلصك منو بس انتي ثقي فيا
فارس .. ريم صدقيني انا مش وحش . انا اضحك عليا كان غصب عني هما اللي شككوني فيكي واكمل بغل .. وجوزك ده بالذات اكتر حد شككني فيكي
ريم بستغراب .. ازاي .انت تعرفو ولا هو يعرفك منين اصلا
فارس اتنهد وقال .. فاكرة يوم ماقولتلك اني شوفتك وانتي رايحة ليه الشقة .. يومها بعد مامشيت رجعت تاني كنت عايز اوجهك و طلعت ليكم ولما رنيت الجرس هو فتحلي ولما سألتو عليكي قالي انك نزلتي بس فهمني انك سلمتيلو نفسك وغلتطي معاه وانا غصب عني صدقت منا شايفك وانتي طالعه مكانش في تفسير تاني اي حد مكاني كان هيصدق
فارس .. احنا اتلعب علينا ياريم سواء من اميرة الو**
او من الحيوان اللي انتي اتجوزتيه
فارس اديني فرصة ياريم . انا مش قادر اعيش من غيرك
ريم بهدوء .. امشي يافارس
فارس .. اديني فرصة ياريم ارجوكي .عارف اني كنت ندل بس غصب عني .اي حد مكاني كان هياخد نفس الموقف
ريم .. اتفضل امشي وابعد عن طريقي احسلك انتو كلكو زي بعض .حيوانات
وفتحت الباب ودخلت وقفلته في وشه
فارس نزل وهو بيقول بردو مش هسيبك ياريم
...............................
عند حازم كان عمر بيحاول يكلمه او يوصله عشان يعرفه باللي ريم ناويه تعمله بس حازم مكانش بيرد علي التليفون
...........................
تاني يوم ريم كانت قاعدة في الشقة وبتعيط بصت علي تليفونها اللي مش مبطل رن بضيق وكان فارس
بس في النهاية ردت
ريم قفلت المكالمة وشردت شويه وبعدين قامت لبست وطلعت علي
بعد وقت وصلت ريم عند فارس في مكتبه
فارس وهو قاعد على كرسي المكتب وباصص علي الشاشه اللي قدامه وهو شايفها داخله
فارس ابتسم بخبث وقفل الاب توب كانت ريم دخلت
فارس قام علي طول من علي كرسي المكتب واستقبلها بحب وقالها .. كنت متأكد انك هتيجي
وقرب منها وبتلقائيه راح حضنها وقالها .. وحشتيني
ريم بعدتو عنها بغضب وقالتلو .. انت الزاي تقرب مني كده ياحيوان
وراحت ضربته بالقلم
يتبع............
