الساكن الجديد الفصل الرابع بقلم ياسمين الكيلاني
الفصل الرابع
" اتكلم تميم بقلق وهو بيشيل اللزق من علي بوقها
: روح انتِ كويسه....
" شاورتله بسرعة وهو بيقرب منه واتكلمت برهبه
: تميم حاسب...
" ملحقش يلف ف اتصاب ف ايده جامد ب السكـ.ينة اللي معاه... "
" صرخت روح لما لقته بيقرب منها ب السكـ.ينة لكن تميم مسكة بسرعة وضـ.ربة تاني لحد ما هرب منه وفر بجلده... "
" قرب منها تميم بسرعة وفك ايدها كانت متجمده جداً من اللي شافته فتكلم بقلق
: روح اهدي انا.....
" حضنته بأندفاع وكانت بتعيط جامد كان واقف مصدوم وهي متشبثه فيه برهبه ومش عايزه تسيبه لحد ما اتكلمت بخوف ودموع
: هو كان هيو.متني!! كان عايز يقتـ.لني انا عارفه! قالي انتِ لوحدك و... ومفيش حد وياكي!
" هو معاه حق عشان دايما لوحدي ومحدش معايا يحميني منهم انا... انا.....
_ششش اهدي اهدي يا روح انا جنبك اهو متخافيش اهدي....
" فاقت من شرودها واستوعبت اللي قالته.. "
" بعدت عنه بهدوء ولحظه الد.م اللي ف ايده
: أنت مجروح!
_متخافيش دا جرح سطحي...
_ايوه بس لازم تروح للدكتور عشان يعقمه....
" ابتمسم بهدوء بعدين لاحظ وجعها ف اتكلم باندهاش
: انتِ متاكده إنك كويسه...
" بصت علي رجليها لقتها بتنـ.زف ف اتكلم بأندفاع وصدمه
: تعالي هخدك المستشفى...
" سندها وركبها العربية وطلع بيها علي المستشفى لحد ما غيرت الجرح وهو كمان عقم ايده... "
_هتاخدي من العلاج دا مرتين وبعد يومين تجيلي تاني عشان اعقملك الجرح اما بالنسبة لجوزك ف الجرح سطحي مش هيحتاج تجديد تاني...
" اتجرحت روح جدا وبصتله بارتباك ف اتكلم بهدوء
: يعني مفيش خطر عليها...!
_لا يا فندم باين عليك خايف عليها جداً...
" ارتبك تميم وحط ايده علي شعره بحرج بعدين مسك روح وسندها عشان يوصلها للعربية... "
" رجعوا البيت ووقفت قدام باب الشقة من تاني والخوف رجعلها... "
_متخافيش النهار قرب وانا مش جيلي نوم كده كده وهقعد اخلي بالي كويس ادخلي انتِ وارتاحي...
" اؤمت لي بهدوء لما طمنها وجت تدخل ندي عليها تاني وحط ايده ف شعره بحرج
: روح كنت... كنت... " خد نفس واتكلم بهدوء
: كنت عايز اعتذرلك عن اللي حصل ولما زعقت فيكي حقيقي مكنش قصدي...
" ابتسمت بهدوء ودخلت شقتها وهو رجع لشقته تاني وقعد للصبح من قلقه عليها... "
" ف النهار وصلت مريم وسارة لروح وحكتلهم علي اللي حصل معاها.. "
_يا نهااااار دا كله حصل والواد استحمل كل دا الله يسمحك....
_استني بس يا مريم يعني انتِ عايزه تفهميني أنه لولا أنه جي كان زمان الشخص دا مخـ.لص عليكي....!!
" اتكلمت روح بتنهد
: خلاص يا سارة اللي حصل حصل المهم بحث الكلية معاده قرب وانا لازم اسلمه....
_ولا يهمك هخده معايا دلوقتي معايا انا كده كده عليا سكشن هروح واعتذرلك....
" خرجت سارة ومريم قعدت مع روح
_قوليلي بقا عاملتي اي ف الواد يا روح عشان يتبهدل كده!
" نفخت روح جامد من غيظها وسكتت مريم لما لقتها اتعصبت... "
" خرجت سارة بهدوء عشان تلحق المعاد ف قابلها تميم واتكلم باندفاع وقلق
: هي روح بخير! في حاجه حصلت تاني!
" اتكلمت بهدوء
: اطمن روح كويسة انا بس خارجه بمد عشان الحق السكشن عن اذنك....
" اتنهد بهدوء واتكلم برتياح
: طب الحمدلله.....
" لحظت سارة خوفه عليها وابتسمت ومشيت علي طول راحت الكلية وخلصت كل اللي وراها وسلمت البحث بتاع روح بعدين رجعت تطمن عليها وتطمنها إن البحث اتسلم... "
_الحمدلله انا كنت شايله همه..
_بس في حاجه كده غريبه حصلت قبل ما امشي..
" اتكلمت مريم بحماس
: حاجه اي هه.. حاجه اي...
_يبنتي اتهدي دراعي اتخلع...تميم...
" ارتبكت روح واتكلمت بخوف
: ماله حصل حاجه!!
" اتكلمت مريم بمكر وغمز
: اهوووو.. دا الحوار علي تقيل بقا وانا اقول بتكرّهيني ف الواد ليه اتاري...
" ضـ.ربتها روح بالمخده جامد ف اتكلمت سارة بحب
: لا بس باين إن فيه اهتمام جامد دا قابلني الصبح وسأل عليكي وكان حاله يصعب علي المسجون...
" ارتبكت روح واتكلمت بغيظ
: عادي يعني مهو اللي حصل امبارح دا مكنش كفاية عشان الواحد يترعب كده...
_بجد طب عيني ف عينك كده...
_عيوني يا مريم...
" رشت كوباية الماية ف وشها عشان تبطل اللي بتعمله فضحكت روح وسارة عليها وهي بتتكلم بغيظ
: طيب يا روح انا غلطانه وربنا ماشي...
" عدي اليوم بهدوء وكانت دايما سارة ومريم بيطمنوا عليها لحد ما الباب خبط ففتحت مريم بهدوء لحد ما شافته قصادها
: الله هو انت!! بقولك اي انا بعيد عنك اهو سيبنا ف حالنا الله يخليك..
" مسك الباب واتكلم ببرود
: عايز روح عشــــ.....
_عايز مين يا حيلتها انت...!!
هو انت يا جدع مبتــ.....
" مسكها من قفاها واتكلمت بغيظ
: يبنتي انتِ مش قدي يدوب انفخ فيكي تطيري نادي روح عشان اخدها المستشفى انهارده معاد فك الجرح وإلا انتِ فاهمه...
" اتكلمت مريم بخوف
: من غير وإلا يا باشا أنت تؤمر لو عايز سارة كمان مع روح دليڤري احنا ف الخدمه هدخل اناديهالك هواااااء..
" جريت مريم بسرعة وضحك تميم علي منظرها لحد ما جت روح ف اتكلم بهدوء
: يلا عشان اوصلك للدكتـــــ.....
_لا مهو ملهاش لزوم انا بقيت...
_مفيش حاجه اسمها ملهاش لزوم انتِ تعبانه ولازم نطمن علي الجرح يلا.....
" ابتسمت بهدوء ودخلت لبست ونزلت معاه لحد المستشفى... "
" اطمنت انها بخير وتقدر تمشي عادي خدها معاه وركبها العربية لحد ما وقف فجأة
_وقفت ليه؟
_هنزل اجيب حاجه نشربها وبالمره نتنفس شويه هواء...
" نزل جاب العصير وقعدوا شويه لحد ما اتكلمت روح بهدوء
: تميم اتمني متكنش زعلان مني علي المقلب اللي عملته فيك...
_اعتذارك علي انهي واحد!
_مش فاهمه!
_يعني لما هزقتيني اول يوم ولا لما سلطتي عليا صحابك اللي بلغت عني واللى كانت هتوديني ف داهيه ولا لما دخلتي شقتي وعملتي نفسك الخُط وصحابك مخابـ.رات مصرية...!
" ضحكت روح علي اللي قاله وهو ابتسم عشان افتكر كل دا ومن يومها وهو بيضحك علي اللي عمله... "
_ياااه أنت شايل اوى!! لا يا عم خد حاجتك اهي عشان متجيش بعد كده تقولي عليكي حساب عصير..
" ضحك تميم جامد واتكلم بهزار
: لا وفلوس الاُجره رايح جاي.....
" كانت مبسوطه جدا وهي بتتكلم معاه قعدوا يتكلموا كتير لحد ما رجعوا البيت تاني افتكرت حاجه وجت تتكلم لقته بيبتسم بهدوء
: متخافيش انا قاعد لو حصل حاجه هتلاقيني ف ثانيه جنبك...
" ابتسمت بهدوء ودخلت شقتها وهو دخل بيته... "
" كانت مبسوطه وحاسه انها ف امان،
لأول مره متحسش بالوحده والخوف، وابتسمت لما افتكرت كلامه وهو كمان قعد علي الكنبة بهدوء وابتسم لما افتكر كلامها وشكلها وهي بتضحك... "
" عدي اليوم بهدوء وود لحد تاني يوم
_بجد فرح نور بتهزري!!!
_انا اتفاجئت ذيك كده اللي هو ازاي بس مش مشكله اهو نخرج بقا وننبسط شويه اي رأيك...؟
" ابتسمت روح بهدوء وعلي الساعة 8 كانت مجهزة نفسها... "
_يلا انا جهزت...
_اي دا!!! روح انتِ هتلبسي بجد بنطلون وچاكت ف الخطوبة!
_وفيها اي!!
_يبنتي فيها اي ازاي انتِ مش بتزهقي من لبس الشباب دا....
" خرجت سارة فستان جميل جابته ليها واتكلمت بحب
: دا هيبقي حلو عليكي يا روح جربي...
_ايوه بس انا عُمري ما لبست فستان بقا وهلز والحاجات دي....
_روح الفستان هيبقي حلو فعلاً عليكي وهتبقي ذي القمر جربي بس....
_قولت لا يعني لا يروح كده يقعد احسن....
" بصت سارة ومريم ليها بمكر وقربوا منها وشدوها بالعافية للاوضة... "
" خلصت لبس وكانت ذي الملاك ابتسمت سارة ومريم من شكلها وهي استغربت نفسها جدا كانت فعلاً حلوه... "
_شوفتي قولتلك هتبقي اميرة ف زمانك....
_فعلاً انتِ حلوه اوي يا روح... يلا بقا عشان نلحق انا هنزل اوقف تاكسي....
_تمام خديني معاكي عشان هشتري حاجات قبل ما نمشي هنستناكي تحت يا روح....
" مشيوا ووقفت هي قدام المرايا بتبص لشكلها وملامحها اللي دفنتهم بأيديها من زمان وشعرها الناعم وابتسمتها اللي تسحر لحد ما سمعت صوت العربية.. "
.......................................
" بعد شويه كان تميم لابس بدلة شيك وبيحط اخر تكات البرفان ولبس ساعته بهدوء وخرج لحد ما انتبه لصوت الباب بيتفتح... "
" سمع صوت الكعب وريحة البرفان الجميلة لحد ما لمح طيفها وهي خارجة بشكلها اللي يسحر... "
" وقف بشرود وصدمه لما شافها اتغيرت كتير عن سابق كانت لبسه فستان زهري وسايبه شعرها ووقفه بتقفل الباب وبتحاول تمشي ف الكعب لحد ما ثبتت لكنها اندفعت بسرعة وفقدت توازنها وجت تسند نفسها .... "
" بصت لقت نفسها مسكه فيه جامد وهو سندها ... "
" لمحته لقيته هو!! كان لابس وشكله مختلف عن سابق، لقته بيبصلها بتركيز وتايه ف عيونها مفقتش غير علي نبرة صوته الهاديه
: انتِ كويسة!
" وقفت بثبات وبعدت عنه بهدوء وقالت ببتسامة هاديه
: شكرا...
" جت تنزل ف اتكلم بأندفاع
: انتِ نازله!
_اه عندي مناسبة ف الزمالك....
" اتكلم ببتسامة وحب
: طريقك نفس طريقي تعالي اوصلك...
" اتكلمت بتردد
: لا مهو سارة ومريم جابوا تاكس و....
" اتكلم بتنهد وهدوء
: انتِ لسه تعبانه مش عايزين الجرح يفتح تاني تعالي اوصلك....
" اؤمت لي بهدوء ونزلت معاه فتح باب العربية وركبوا ومشيوا سوي... "
" اتكلمت مريم بصدمه
: مش دي روح!! يالهوي والواد الحليوه معاها...
" ابتسمت سارة بحب
: هي يا شهرزاد يلا بينا بقا عشان نلحق نوصل...
....................................
" كان بيبتسم مع كل نظره بيبصلها بتركيز ف اتكلمت بتساؤل
: بتضحك علي اي؟!
_اصل اللي يشوف روح ف اول يوم وهي بتتمني مـ.وتي وبتزعق معايا ولا اجدعها راجل!
ميشوفهاش دلوقتي وهي لبسه وهاديه وكمان بتعرف تضحك!
_يااااه انا كنت وحشه اوي كده!
" اتكلم بحب واعجاب
: بالعكس انتِ اجمل بنت شوفتها...
" اتحرجت بعدين اتكلمت بهروب
: تميم خلاص هنا المكان...
_هنا!!!! غريبه
_ اي الغريب فيها!!
_انا معزوم علي خطوبة صحبي هنا برضو!
_دا يظهر نفس الخطوبة خلاص اركن وانزل بقا...
" نزلوا سوي ومسك ايدها بهدوء جت تتكلم لقته بيهمس ليها
: عشان متوقعيش تانى!
" طلعت معاه كانت اجمل واحده ف الخطوبة جي شريف صحبه سلم عليه واتكلم باندهاش وهزار
: اي يبني محدش بيشوفك و....
" انتبه شريف ليها ف اتكلم ب اندفاع
: دي خطبتك!! طب مش كنت تقول كنا عملنا الواجب و....
" نكزه تميم جامد عشان يسكت ف اتكلمت روح بأحراج
: طيب عن اذنكم...
" سابته ووقفت مع البنات اما هو ف اتكلم بغيظ
: أنت علي طول دبش كده!
_اعمل اي يعني منا افتكرتها خطبتك بصراحه كنتوا ليقين علي بعض...
" ابتسم تميم وشرد شويه ف اتكلم شريف بغمز
: يظهر إن الموضوع قريب اوي تعالي تعالي....
" وقفت مع صحابها ف مسكتها سارة ومريم
: تعالي بقا عشان الحكاية وضحت...
_ اي بتشدوني كده ليه هقع...!!
_دا انتِ الخبث كله يقولك يا سيدي قوليلي ازاي جيتي معاه وركبتي العربية وقالك اي و....
_بس بس هو فرح مفيش حاجه هو وصلني عشان بس معرفتش امشي والجرح ميتفتحش...
_اممممم الجرح تمام تمام لينا بيت يلمنا يا روح....
" زقتهم بعيد ووقفت تبارك للعروسة والعريس وقعدوا ينبسطوا... "
" جي الوقت والكُل وقف يرقص رومانسي كانت روح واقفه ومركزه بتبص مع العريس والعروسة وفرحتهم لحد ما سمعت صوت همساته من بعيد... "
" لفت وشها لقته واقف وحاطت ايده ف راسة قربت منه واتكلم بهدوء
: اي موقفك بعيد كده!
_مليش ف الجو دا بصراحه حابب اقف ف الڤراندا تحبي تقفي معايا!
" ابتسمت بهدوء ودخلت معاه،
وقفت تبص علي المنظر الجميل وتتنفس نسمات الهواء المحببه لقلبها.. "
" كان مركز معاها أوي وشارد فيها لحد ما فاق علي صوتها
: تميم بقالي ساعة بكلمك!
_معلش مخدتش بالي روح ممكن اسألك سؤال...؟
_اسأل..
_احكيلي عن نفسك حاسس اني متلغبط فيكي...!
" اتنهدت واتكلمت بهدوء وحزن
: حكايتي كئيبة هنكد كده عليك..!
_مش مهم انا حابب اسمع...
" بدأت تحكيله عن حياتها وحبها لوالدتها ووالدها ومشاكل اخوها وخوفها دايما من حياتها... "
" كان بيسمع ليها وقلبه مجروح لكن محاولش يبين عشان متتجرحش اكتر... "
" مسحت دمعه من عينها واتكلمت ببتسامة
: بس هي دي حكايتي بس تعرف انا طول الوقت بحلم احلام هبله شويه ساعات اتمني لو اروحلهم او هما يجوا يقعدوا معايا!
" وساعات تانيه احس إني محتاجه إن اي شخص يكون جنبي المهم محسش ب الخوف!
" بس خلاص اتعودت علي كده...
" بصت علي الورده اللي موجوده بعيد وابتسمت ف قرب منها وجبهالها وحطها ف شعرها بحب واضح ف عينيه واتكلم بشرود
: خلي دي جنبك عشان شبهك لحد ما ف يوم هرجع اخدها من تاني...
" اتكلمت بعدم فهم
: هي اي الورده!
_لا صحبتها...
