رواية غرام العنقاء الفصل الثاني والاربعون 42 والاخير بقلم داليا احمد
الفصل 32 والأخير
- مبقتش شقتك يا سميحة...مبقتش شقتك قولنا...بقت لواحدة تانية...مرااااتي الجديدة اللي كتبت كتابي عليها قبلك...واحمدي ربنا اني رجعتك بعد ما هي وافقت بالعافية...اخرك معايا اصرف عليكي انتي والعيال وتقعدي مع امي غير كده ملكيش اي حاجة عندي...فااااهمة
صرخت بهستيرية:
- ده ظلم...ظلم ظلم
- مش عاجبك ارجعك لأمك وأخواتك تاني
شهقت بحرقة:
- لا لأ مش عايزة...مش عايزة اطلق لأ
قهقه قائلا بضحكة :
- انتي مشكلتك في الطلاق بس يعني !!
وماله خليكي قاعدة مع امي بس يكون في علمك...اتفاقي معاكي قبل ما ارجعك مش هيتغير... مفيش تليفون...مفيش خروج عند امك ولا عند اي حد... مفيش رغي مع حد
- انت عادي عندك تطلقني تاني!!! عادي عندك؟
هز كتفيه بلا مبالاة:
- مش فارقلي...كده كده مش هعتبر نفسي متجوز واحدة بس !
اقتربت منه وهي تلمسه من ذراعيه :
- ده ازاااي...أنا بس اللي كنت مراتك
دفعها بعنف قائلا:
-متلمسينيش... ابعدي ايدك كده عني
انا راجل ظالم...عاجبك بالعيشة والشروط دي براحتك...مش عاجبك خلاص...قولتلك مش فارقلي
دمعت عيناها بذل:
- رجعتني عشان تذلني صح؟ عشان اهلك يشمتوا فيا تاني
صرخ بغضب :
- انتي ربنا اداكي بدل الفرصة اكتر..وانتي كنتي كل مرة تدوسي عليها وتتنططي عليها...
انتي السبب في كل ده...انتي ليه تكلمي علاء ده من ورا جوزك ! تتحايلي عليه ميجيبش سيرتك ؟
هو اللي عامل حاجة غلط يخاااف؟
اللي واثق من نفسه يقف في وش التخين ويقوله انا صح
لكن انتي لا...من اول ما اخو دنيا وعم سعيد دخلوا بيتنا وعينك كانت مهزوزة..حتى لو معملتيش حاجة غلط وطلعتي بريئة..بس كسرتي حاجة كبيرة اوي يا سميحة...كسرتي الثقة اللي كانت بينا...و الثقة طالما اتكسر منها حتة يبقى خلاص..
ليردف بصرامة قائلا:
- لآخر مرة يا سميحة بخيرك بالوضع عشان متقوليش اني ظالم...انا رجعتك عشان ولادك مش اكتر...عايزة تعيشي بالوضع ده... تمام...مش عايزة من بكرة أطلقك وترجعي لأهلك..
جلست على الأرض صارخة بحرقة:
- انا بكرهك يا عبدالله....بكرهك زيهم بالظبط...كلكم وحشين وحشين اوي....محدش بيحبني...لييييه... ليه بتدمروني...
________
"عاشر بمعروفٍ فإنك راحلً
واترك قلوب الناس نحوك صافية
واذكر من الإحسان كلَ صغيرةٍ
فالله لاتخفى عليه الخافية
لا منصبً يبقى ولا رتب هنا
أحسِن فذكرك بالمحاسن كافية
واكتب بخطك إن أردت عبارة
لاشيء في الدنيا يساوي العافية"
-للشاعر.. أحمد بن زهران العزري
*****
بعد مرور أيام...
كانت جالسة على السرير بتعب .. وبجانبها شقيقتها وهي تناولها الدواء والطعام بتعب
كزت سماح على أسنانها وصرخت وهي تهرول :
- طلع متجوز قبل ما يرجع بنتي الواطي الحقير...منه لله
صاحت بها شقيقتها بضيق:
- تاني يا سماح؟ تاني بتطلعي نفسك من المشكلة وانتي اللي زارعاها بنفسك ؟
دي نتيجة تربيتك...نتيجة كل حاجة وحشة علمتيها لعيالك...انتي مش بس دمرتي نفسك..دمرتي عيالك...وكل حاجة...ظلمتي ناس مالهمش ذنب
غمغمت بنبرة متعبة :
- مكنتش اعرف ان كل ده هيحصل...تعبت...تعبت يا اسماء ونفسي ارتاح... بحلم احلام وحشة اوي...مش عارفة انام...مش قادرة... حتى رجلي مبعرفش انام منها...انا بيجي عليا وقت مقدرش اجيب لنفسي كوباية الماية...كانت بنتي بتجيبلي اشرب..دلوقتي افضل انادي على الواد سميح ولا يعبرني...كان سامح يبص عليا ويشوفتي محتاجة حاجة...دلوقتي ولا بيجيلي حتى
رجلي مبقتش شايلاني زي الاول...انتي عارفة أن انا بجر نفسي...ولولا الاكل اللي بتعمليهولي اهو بسند نفسي لحد ما اسخنه
- لا حول ولا قوة الا بالله... ربنا يشفيكي يا سماح...
همست بنبرة باكية مرتعبة:
- انا خايفة اوي يا اسماء...بقيت لوحدي... لا بنت بتجيلي زي الاول ولا ابن بيسأل فيا وابني التالت ده مع نفسه...بالله عليكي يا اسماء اوعي تقطعي بيا...ده انتي الوحيدة اللي بقيتي واقفة جنبي...حتى رغم اني متخانقة معاكي قبل كده و اذيتك انتي وبنتك...بس رغم كده مهونتش عليكي
- عشان انتي اختي... انا بنتي مقاطعاني بسببك يا سماح بس هعمل ايه...هرميكي يعني زي ما عيالك عملوا فيكي !
لتنظر إليها سماح بعتاب ... فصححت قائلة بنفاذ صبر:
-يوووه مش قصدي بس يعني انتي عارفة انك ظلمتي بنتي و اتكلمتي عنها قبل كده لحد ما فركشت خطوبتها بسببك وخسرت اللي كانت بتحبه...بس في الاخر انتي اختي...وانا بجيلك من وراها هي وجوزي..ماهو لو عرف هيحصل مشكلة كبيرة دي بنته برضو و زعلان عليها على كسرة قلبها...انتي اتكلمتي وحش اوي عليها...صحيح انا بعامل ربنا دلوقتي..لكن زعلي منك زمان على بنتي لسه محفور في قلبي يا سماح...
ترجتها بتوسل باكية :
- حقك عليا ... سامحيني...وخلي بنتك وجوزك يسامحوني...انا مبقاش ليا حد
ردت بجدية:
- متأخر اوي يا اختي ... متأخر اوي ... في تصرفات صعب يتسامح فيها...عياط بنتي كل ليلة وبحاول اقولها خالتك مكنش قصدها وهي تقولي لا يا ماما...كانت قاصدة كل حرف....سنين بتمر وبنتي لحد دلوقتي فاكرة كل كلمة...يلا انا لازم امشي
لتمسكها من ذراعها برجاء:
- يعني مش هتباتي معايا ؟ انا انا مش عارفة انام صدقيني...بخاف بخاف اوي يا اسماء...بحلم بيه...بحلم بجوزي...و كوابيس تانية مرعبة
- مش هينفع صدقيني... ابقي خلي الواد سميح يبات معاكي...وانا هحاول اشوفلك ممرضة تجيلك..عشان لو معرفتش
لتتركها اختها وحدها...بينما سماح تشهق بتعب وهي تصيح قائلة بتوسل من ربها :
- يااارب رحمتك....ارحمني من العذاب ده... ارحمني من عندك
________
كانت ميادة تتحدث مع زوجة شقيقها بالهاتف، لتنصحها قائلة:
- بصراحة كده يا ميادة انا لو مكانك اخد منه المحلات بتاعته واخلع من البيت كله
هزت ميادة رأسها بنفي :
- لا يا بت..انا مش هسيبه.. راجل بيصرف عليا وعلى امي...و عملي اللي طلبته منه...انا ممكن اكون طمعت اه...لكن مغدرش ابدا يا بت لإيد اتمدتلي..سامح رفعني لفوق...حسسني اني اتساوى بأخته سميحة وأمه عشان ميرفعوش عينهم عليا ولا يذلوني بفقري
- حبيتيه يا ميادة؟
همست ميادة بتلقائية:
- حبيت الراحة... إحساس الراحة بعد عذاب ومرمطة وقرف احلى بكتير من كل اللي فات...هي الواحدة مننا هتعوز ايه غير راجل يصرف عليها وعلى أهلها...هو في راجل يعمل كده !
صحيح سامح محروم من الخلفة اه...بس هعمل ايه..مش بعد اللي عملوا معايا...وبعدين انا عاجبني كده علاقتنا...انا عارفة امشيه صح... ساعات اه بيتعوج بس خلاص يا بت اخدت عليه وهو اخد على طبعي
- طب وهو بيحبك؟
ردت بتلقائية:
- بيحب أمه وأخواته...وانا عشان شخصيتي زيهم وأقوى...عرفت اخليه يحبني زيهم ويسمع كلامي
لكن لو كنت طيبة و هبلة مكنتش عرفت امشي اموري معاه خالص... ولو كنت فضلت اسمع تعليقاته السخيفة على شكلي او اي حاجة فيا من غير ما اعرف ارد عليه كان زماني منهارة نفسياً...بس انا عرفت أخد حقي وامشي اموري معاه صح.. فهمته و فهمني...انا وهو زي بعض ولايقين على بعض...ومش هسيبه..
________
اخذها نديم وحدها وطلب من فاتن اصطحاب دانا معها
لياخذها معه بالسيارة إلى مطعم بداخل قرية سياحية.. يطل على حمام سباحة من الخلف
كان المكان فارغا من اي شخص..
بديكور ابيض
وعلى الأرضية شموع بيضاء على شكل قلب تضيء المكان بطريقة رائعة
ويزين المكان بعض الحرائر تطير بشكل لطيف...
ليأخذها معه ويجلسا على طاولة مخصصة لهم عليها كعكة كبيرة للعيد ميلاد ... بعدة ادوار
وعلى جانب الطاولة باقة زهور حمراء بغلاف ابيض
ليناولها إياها .. شهقت كاميليا بمفاجأة:
- فكرتك هتنسى... عشان كنا مشغولين بفرح فراس امبارح
ابتسم وهو يضمها إلى صدره قائلا:
- ولا عمري انسى حاجة تخصك ابدا
ليضيف برقة :
- كل سنة وأنتِ طيبة يا حبيبة قلبي
همست بحرج:
- وانا اللي قولت اكيد الفترة اللي فاتت مش عجباك أو مبقتش جميلة زي الاول عشان كده نسيت عيد ميلادي
نظر لها بإعجاب رهيب ... هو لا يكذب عليها .. هي فعلا ما زالت جميلة وجميلة بعينيه
نظر لها باستنكار:
-مبقيتش جميلة؟
ليهمس بنبرة خشنة :
-ده الجمال منسيش فيكي هفوة الا وعدى عليها يا كراميلا !
ابتسمت كاميليا وهي تقبله من وجنته بحب :
- مفكرتش تسيبني وتقول أنا مالي بكل ده !
دي بنتي طلعت عينك لي في الاول...وانا كمان !
همس بدون تفكير :
-قدري...حد يهرب من قدره ونصيبه !
ابتسمت كاميليا:
- يا عمري انت..وانت احلى قدر في الدنيا كلها
همس وهو يقبلها بحب:
-بجد اتخانقنا كام مرة.. وحصلنا مهما حصل.. ومكملين مع بعض
ليردف قائلا بغمزة:
-اقتنعت انك نصيبي وقدرى يعنى
اغمضت عيناها قائلة برقة:
- انا مبقتش عايزة حاجة من الدنيا غيرك اصلا
يتبع......
********
طبعا مفيش أسئلة تاني خلاص ولا هقولكم توقعوا😂❤️
ده الفصل الأخير اه، لكن طبعا لسه فيه فصل كمان لـ الخاتمة انتظروه وكده يبقى الرواية خلصت تماما.
الخاتمة دي بتكون بعد مرور كذا شهر او كذا سنة لحياة الابطال وانا هعملها لاطفال نديم... وبتكون مشهد طويل مستقبلي لحياة الابطال..استنوه لسه بكتبه وهنزله.. بس كده الرواية نفسها خلصت كأحداث
كل اللي كانوا متابعين في صمت بقى يظهروا في البارت ده 😂❤️ لازم اعرفكم كلكم واعرف رأيكم ❤️
شكرا لكل حد تابع الرواية معايا...شكرا لكل حد قال رأيه
شكرا على دعمكم وحبكم للرواية...انا بجد محظوظة بيكم وبحبكم جداً..
شجعوني بقى عشان اكتبلكم الخاتمة بسرعة لأن اخر فصل ده اخد مني مجهود كبير اوي وفقدت الشغف 😭 وبتمنى يارب يعجبكم وبتمنى البارت اللي بعده بتاع الخاتمة تعجبكم
هتوحشوني بجد وهيوحشني تعليقاتكم للرواية❤️
مستنية ريفيوهاتكم و رأيكم بقى إجمالا عن الرواية بما أنها تعتبر أول رواية بنزلها ليكم واول حاجة اكتبها بعد غيابي سنين عن الكتابة
قولولي رأيكم سواء بالايجاب أو السلب و رأيكم في الرواية عموماً..في الشخصيات.. مين حبيتوا نهايته
ايه رأيكم في نهاية كل قصة فيهم
________
الخاتمة...💙👧🏼🧒🏻
يوم ولادة آدم...
في إحدى المستشفيات الكبرى في كندا
كان نديم يحاول الصمود والتماسك بينما زوجته كانت بداخل غرفة العمليات تشعر بالخوف .. لم يكن معه غير والده و زوجته، و زوج اخته
تعالى صوت صراخ خفيض تسلل إلى قلب نديم ، ابتسم وهو يحمد ربه .. بدأ الجميع في التحية عليه قبل أن يخرج الطبيب قائلاً باللهجة الأجنبية:
- مُبارك لكم.. طفل جميل، ويمكنكم رؤية الأم الآن
ثم ذهب نديم إليها بخطوات متسرعة ليجدها مستلقية متعبة ، ثم اقترب من تقبيل جبهتها وتهامس بسعادة:
- مبروك يا حبيبتي...آدم وصل بالسلامة
بعيون متعبة تهمس بصعوبة:
- آدم فين؟
أجاب نديم ، وهو يمر أنفه على خديها ليخفف من حدة تعبها:
- هيجي دلوقتي
ودخل الجميع لتهنئتها ، وبعد بضع دقائق تدخل الممرضة بيدها الطفل, لتناوله لنديم فتضعه بين يديه بالقرب منه، ابتسم ووضع يديه على وجهه لإخفاء الدموع التي تسللت إلى خده و تأمله بدموع الفرح التي شقت طريقها إلى خده وهو يأذن له بصوت جميل متأثر بالقرب منه كما علمه والده من قبلها..
ومن ثم يرفع اقرب بين يديه وهو يحرك أنفه على أنف الطفل بسعادة وتأثر.
لينظر له بكل حب و حنان الأب الذي يجربه لأول مرة.
ليناوله بعدها لزوجته التي دمعت عيناها قليلا من شدة سعادتها به وطفلها الرضيع يقترب من خدها الناعم .. بينما تضع يدها على وجه الطفل ليفتح فمه الصغير لتخرج شهقة صغيرة منه تلاها صراخ طفولي صغير, فطلبت منها الممرضة أن تطعمه ليخرج بعدها والده و زوج شقيقته بعد أن باركوا لها ولنديم.
____________________________
بعد مرور ثلاث سنوات...
هذه الطفلة الصغيرة التي تبلغ من العمر عامين فقط، دخلت بقدميها الصغيرتين إلى غرفة والديها فمن حسن حظها أن كاميليا تركت الباب مفتوحاً بالخطأ ، كانت شبيهة جدًا بأختها دانا في الشكل ، لكن شعرها كان أفتح قليلاً مع خصلات شقراء متوسطة اللون وقصيرة تصل إلى كتفيها ، وعيون زرقاء مثل والدها ، وملامح صغيرة بريئة توحي بالرقة والشقاوة..
لتدخل إلى غرفة الملابس الخاصة بوالديها بكل هدوء حتى لا يسمعها أحد وبالتحديد تتجه نحو الركن الخاص بزاوية أحذية والدتها ، عيناها الزرقاء الجميلة تتساقطان باتجاه حذاء أحمر جميل عالي الكعب يبدو باهظ الثمن ، فتتسع عيناها بسعادة وحماس وهي تركض نحوه لتنتزعه من مكانه بيديها الصغيرتين.
هامسة بانبهار :
- Wow ...
إيه الـ Shoes الحلوة دي !
لتردف بنبرة عابثة متملكة:
- هاخدها وهتبقى تاعتي "بتاعتي"
ومن ثم بدأت في ارتداء حذاء والدتها ذو الكعب العالي والوقوف أمام المرآة الطويلة في الغرفة ، وهي تدور من خلال بيجامتها.
فهي ترتدي بيجاما من قطعتين بحمالات وتنورة قصيرة باللون الأخضر الفاتح عليها نقش بطيخي طفولي جميل
يتناقض تمامًا مع حذاء والدتها الأنثوي المغري
لتتمشي به أمام المرآة مع الحرص التام حتى لا تسقط، وهي تراعي أن الحذاء أكبر بكثير من قدميها بكثير !
ليصدر عنها صوت نقر الحذاء عشوائياً، وهي تضحك بسعادة
يا إلهي.. تريد أن تكبر وقدميها تكبر حتى تستطيع أن تلبس كل تلك الأحذية أو حتى يشتري لها والدها نفس الشيء ، لقد وعدها ذلك.
وهي تثق بكلامه.
بينما في الخارج ...تنام كاميليا بجانب زوجها على السرير الخاص بهم.. كانت نائمة بعمق وهدوء على إحدى ذراعيه وهو يعانقها كالمعتاد معها ، لتشعر به يتململ في نومه وهي أيضًا من تأثير صوت الطرقات والنقر.
لتهمس بنبرة ناعسة:
- إيه الصوت ده ؟
ليسحبها وهو يأخذها نحو صدره بينما مازال يعانقها، همس بنبرة نائمة تمامًا :
- مش عارف...ايه الدوشة دي مش قادر أفتح عيني
كتمت كاميليا ضحكتها مع الانتباه إلى الصوت الذي تعرفه جيدًا :
- ده المنبه الطبيعي بتاعنا...القردة الصغيرة لانا
لتنهض من مكانها وهي تقبله من وجنته بينما هو يتركها بصعوبة
ذهبت إلى غرفة ملابسها لرؤية تلك الفتاة الصغيرة التي أسماها والدها "لانا" حتى يكون قريب من اسم دانا اختها
لتراها تستدير وتقرع بحذائها الغالي بعشوائية وهي تحاول أن تمشي بخطوات صغيرة حتى لا تسقط
شهقت كاميليا بحذر:
- بتعملي إيه ؟ هتقعي يخرب عقلك
ضحكت لانا بشقاوة قائلة بتبرير :
- بلبس الـ Shoes تاعتي يا مامي
زفرت كاميليا بحنق:
- بتاعتك ايه ؟ دي بتاعتي انا
لتصيح وهي تهز رأسها بنفي:
- No دي تاعتي أنا
دعكت كاميليا جبهتها بتعب :
- إقلعي الهيلز بتاعتي حالا وبطلي تتنططي بيها ... دي قدك يا مفعوصة
ليدلف نديم إلى الغرفة نحوهم، بينما صاحت لانا بابتسامة جميلة وهي تناديه باللقب المدلل خاصتها :
- نيدو.... بابي
اقترب منها نديم وهو يقبلها من رأسها برقة, بينما يسألها باستغراب :
- قلب بابي... إيه اللي انتي لابساه ده ؟
سألته الطفلة وهي تشير إلى قدميها الصغيرتين:
- حلوة الشوز الجديدة تاعتي أنا..
ابتسم بإعجاب, وهو يرفع حاجبه بذهول :
- حلوة يا لولي بس مش شايفة انها مقاسك كلك على بعضك...
لتنظر لانا إلى امها قائلة بشقاوة:
- نيدو قالي حلوة....خلاص دي تاعتي أنا
ضحكت كاميليا وهي تهتف بخوف :
- مش هتسكتي غير لما تقعي بيها وانتي ماشية انا عارفة والله اخرتها !
هزت رأسها نافية:
- لأ مس هقلعها أنا هاخدها و امشي بيها
ضحك نديم قائلا بنبرة غامضة:
- و مين قالك اصلا انك محتاجة تمشي ؟
انتي تتشالي كده
فأخذ ابنته بين ذراعيه ليرفعها عالياً والحذاء يسقط من قدميها .. بينما يرفع طفلته إلى الهواء وضحكات الفتاة تتعالى.. وهو يعاود الكرة.. مرة بعد مرة.. حتى ضحكت بسعادة وحماس وأخيرا تستقر على صدر أبيها معانقة إياه.
لتنظر الطفلة إلى قدميها فلم تجد الحذاء :
- نيدو... بابي.. الشوز تاعتي وقعت
- هجيبهالك يا حبيبي
همست كاميليا باعتراض :
- والله !
غمز لها نديم بعبث :
- هجيبلك غيرها يا كراميلا
هتفت كاميليا بحنق وهي تناول طفلتها الحذاء:
- دي استولت على نص الـ heels بتاعتي خلاص !
لتأخذهم طفلته إلى حضنها معانقة إياهم وهي تقبل امها من وجنتها
ضحك نديم وهو يهتف بنبرة ساخرة:
- كفاية Heels بقى يا لولي هتدمري نفسك
صاحت الطفلة ببراءة :
- بحبهم.. بحبهم
ليرن هاتف كاميليا وهي تتجه نحو غرفتها لترد على المربية الخاصة بأطفالها وهي تقول :
- مدام كاميليا... آدم ابن حضرتك مش موجود في أوضته و دورت عليه في كذا مكان مختفي تماماً !
ودانا مش راضية تصحى عشان تروح المدرسة
صاحت كاميليا بضيق وهي تغمض عيناها :
- دي كملت !
ليدخل إليها زوجها ويعرف منها ما حدث، فابنه كعادته هرب منهم لمحاولته في الإخفاء كعادته..
تولى نديم هذه المهمة وذهب للبحث عن ابنه في الطابق الأرضي من الفيلا أثناء الاتصال به. عادة ما يختبئ في ذلك المكان في غرفة المعيشة.
هتف بصوت عال:
- آدم... أنت فين ؟
ليردف بتحذير :
- ما انا هلاقيك في الاخر كده كده
هو كتفيه بلا مبالاة:
- طيب براحتك... بس والله لو ما ظهرت لوحدك؛ لأخدك بنفسي اوديك الحضانة... اصل كده كده انت هتروح
ليظهر فجأة أمامه الطفل البالغ من العمر ثلاث سنوات لديه شعر بني غامق وعينان زرقاوان جميلتان وبشرة بيضاء، يهمس ببراءة طفولية :
- انا مش عاوز اروح الحضانة دي مش بحبها
رفع حاجبه بسخرية :
- اومال بتحب ايه ؟ بابچي !؟
اتسعت ابتسامته بشدة:
- أيوة بحبها اوي
ابتسم نديم قائلا بنبرة شيطانية :
- سهلة دي ... افصلك النت خالص..
صاح الطفل بنبرة حزن شديدة :
- لا لأ يا بابي...
- هتروح الحضانة ولا لأ ؟
اومأ بأدب :
- هروح هروح
- وبعدين لازم تبقى شاطر كده...عشان تبقى راجل و مسؤول عن اخواتك... صح ولا إيه ؟
ابتسم بسعادة قائلا:
- صح..انا عايز ابقى راجل كبير زيك
- خلاص يبقى تروح الحضانة و تخف شوية من أم اللعبة دي
- بس انا بلعب في تيم خالو كمال
صفق نديم قائلا بنبرة ساخطة وهو يحمله على كتفيه :
- ماشاء الله على القدوة
_______
- آدم انا مش قولتلك قبل كده تبطل تهرب و تستخبى مني
صاحت كاميليا به بزعل بعد أن انتهت من إيقاظ دانا وتغيير ملابسها..
اعتذر لها ادم بأسف:
- سوري يا مامي...بس انتي عارفة مش بحب اروح الحضانة
شدتها تلك الطفلة الصغيرة لانا من ملابسها قائلة بتوسل:
- مامي...ميكي انا أيزة "عايزة" اروح الحضانة زي آدم...او المدرسة زي دانا
زفر آدم برجاء :
- ياريت يا لينو...تعالي نبدل
هزت كاميليا رأسها بنفي :
- مينفعش يا لينو انتي لسه صغيرة
عقدت ذراعيها بعناد :
- لا انا أيزة اروح زيهم يا ميكي...أيزة بدل مع آدم
قبلتها دانا من وجنتها قائلة بتبرير :
- انتي لسه بنوتة صغيرة..كمان سنة هتروحي
أضاف نديم بغمزة عابثة :
- يا لولي حتى عشان تنامي براحتك كده وتلعبي..
صفقت بحماس طفولي:
- انا نام و ألعب..
لتضيف إلى اخواتها بغيظ :
- وانتوا روحوا الحضانة والمدرسة
صاح كلاً من دانا وآدم بنبرة حزينة :
- يا مااااامي دي بتغيظنا !
حذرتها امها بأدب:
- عيب يا لينو ماتغيظيش اخواتك
- اوكيه ميكي
تدخلت المربية في ذلك الوقت قائلة:
- يلا يا ادم عشان الباص زمانه جاي...و انتي يا دانا قومي عشان تفطري...ادم مش هيلحق
- حاضر
ليقبل أمه من وجنتها قائلا:
- مامي انا عايز اكون راجل زي بابي..عشان كده هروح الحضانة
عانقته أمه بسعادة :
- يا روحي...يارب...هتكون احلى راجل في الدنيا
ليقترب من لانا قائلا بحنان طفولي:
- هاتي بوسة يا لينو..
قبلته لانا من وجنته :
- هستناك عسان نلعب يا دومي
- اوكيه
ليردف وهو يتقرب من شقيقته الكبرى :
- دونات...هاتي بوسة
عانقته دانا وهي تقبله من وجنتيه :
- احلى بوسة واتنين يا دومي...بس خليك شطور و اسمع كلام المس بتاعتك
- حاضر
لينادي عليه والده بعتاب لطيف :
- تعالى هنا .. فين البوسة بتاعتي انا
ركض نحوه وهو يمطره بعدة قبلات قبل أن ينزل الى الاسفل مع المربية خاصته.
__________
بعد مرور نصف ساعة..
على طاولة الطعام.. انتهت دانا من الافطار الصباحي الجماعي لهم، نهضت وهي تأخذ حقيبتها الصغيرة، وسلمت على امها ونديم وقبل أن تخرج... هتف نديم بمرح:
- هتمشي قبل ما تاخدي الشوكولاتة البيضا بتاعتك ؟
اتسعت ابتسامتها الجميلة وهي تعود إليه مرة أخرى ليناولها قطعة من الشوكولاتة البيضاء التي تعشقها.. ليردف بعدها وهو يناولة مصروفها الشخصي الخاص به :
- و مصروفك
همست بأدب:
- اخدته من مامي
رفع حاجبه باستنكار :
- انا ماليش دعوة بمصروف مامي...مصروفك مني ده هيفضل أساسي
ابتسمت وهي تقبله من وجنته بنعومة:
- بحبك يا بابا
ضمها إليه بحنان حقيقي قبل أن تودعهم وتخرج :
- وانا بموت فيكي يا حبيبة بابا... ده انتي بنتي الاولى
عقدت لانا ذراعيها حول صدرها بعتاب طفولي :
- انت بتحب دونات اكتر من لولي
ليسحبها من مقعدها ويجلسها على قدميه قائلا بتبرير:
- لا انا بحبكم انتوا الاتنين اكتر من بعض..بس عشان دانا كبيرة وبتسمع الكلام
- وأنا .. انا بسمع الكلام أصلا
قهقه نديم ضاحكا :
- حصل على يدي...
انتهى من إفطاره واطعام طفلته الصغيرة لانا بمساعدته هو و أمها، وضعها على الكرسي بجانبه هامساً برجاء :
- مش عايز شقاوة يا لولي هاه...مش عايز استكشاف في البيت..عارف ان دي موهبتك المفضلة...مش عايز ناني تشتكي منك ولا مامي.. عشان مامي رايحة الشغل بعدي
- اوكيه يا نيدو ... لولي حبيبتك سطورة "شطورة"
- تموتي في الكلام بس..لكن فعل مفيش
ليردف قائلا إلى زوجته بابتسامة:
- خلي بالك من نفسك يا كراميلا...لو حصل أي كوارث لحد ما تمشي كلميني
ضحكت كاميليا قائلة:
- حاضر... انا هروح كمان ساعة الموقع عشان فيه تصميمات من المكتب هاخدها معايا وهبص على حاجات هنا
- ماشي يا حبيبي ... ابقي طمنيني عليكِ وانتي نازلة
ابتسمت كاميليا بفخر قائلة:
- اجمل حاجة فيك انك مش بتقدر تفرق بنتي عن آدم ولانا خالص..ده انت حتى بتعاملها احسن منهم.. وعمرك ما زعلتها
صحح لها قائلا:
- اسمها بنتنا...دانا فعلا بحسها بنتي بجد...بحسها من دمي.. شبههي..مش بس شكل...لا بحسها شبههي في الشخصية في الروح...جميلة و طيبة أوي...
- انت اطيب و احن أب في الدنيا بجد... ده حقيقي على فكرة انت طيب اوي يا نديم...
همس لها بنبرة صادقة وهو يقبل يدها :
- وأنتِ حبيبتي ومراتي وبنتي وصاحبتي وكل حاجة ليا أصلا
اتسعت ابتسامتها بسعادة :
- بحبك أصلا
- متنسيش بالليل هنروح عيد ميلاد سارة
- حاضر وانا عاملة حسابي اروح بدري
- هتروحي الشغل بعربيتك؟ ولا ابعتلك السواق
- لا يا حبيبي هروح بيها انا خلاص اتعودت اسوقها كويس
ابتسمت وهي تتذكر عندما اشترى لها سيارة باهظة الثمن كهدية لها بعد إنجابها آدم كهدية لها
_________
في المساء..
ارتدت فستان باللون الاحمر طويل، وتركت شعرها منسدلا، بينما ساعدتها المربية بتجهيز أطفالها الثلاثة..
وعلى الجانب الآخر كانت ابنتها الصغيرة لانا واقفة وحدها وهي تعانق حذاء كعب عال باللون الازرق ؛ لترتديه بعدها مصممة أن ترتدي مثل امها تماما ومع منهادات ونقاشات امها وهي لا تسمع لها..
بحق الله ! كيف تذهب هكذا معهم؟
الحذاء كبير جدا عليها
ليأتي بعدها والدها إليها وهو يرتدي قميصاً باللون الابيض يزيده وسامة وبنطاله.. ليقترب منها وهي تركض نحوهه حتى سقطت على ركبتيها بسبب الحذاء الكبير، فحملها بسرعة وهو يهدئها محاولا اسكاتها، فأمها كانت تساعد آدم في انتهاء تجهيزاته هو وشقيقته دانا
وبعد محاولات من تهدئتها والتأكد انها بخير..وضعها على السرير وهو يخرج حقيبة من خلف قدميه بها حذاء صغير ذو كعب قصير باللون الازرق والابيض الشفاف لتتبدل ملامح طفلته من الحزن إلى السعادة وهي تضع يدها الصغيرة على وجهها وتأخد منه الحذاء ويساعدها في ارتدائه لتقترب منه وهو يمسك يدها ويقبلها وكأنها اميرته الصغيرة
- ايه رأيك ؟ احلى من الحاجات الكبيرة عليكي بتاعة مامي
همست بإعجاب :
- حلوة اوي..سبه الكرتون اللي بحبه سندريلا
- شوفتي بقى...انا جايبلك حاجة حلوة ازاي... وشوفتي مامي كان عندها حق لما قالتلك هتقعي في مرة
أجابته بأسف:
- سوري يا بابي...انا مس هاخد حاجة مامي تاني... وهلبس ده
- شطورة يا قلبي انا... وانا كل ما تسمعي الكلام هجيبلك كل اللي نفسك فيه
- اوكيه
- تيجي احطلك مانيكير على ما مامي تخلص
صفقت بسعادة وهو يحضر لها علبة طلاء الاظافر الصغيرة خاصتها و احضر منشفة و مناديل وهو يبدأ بتلوين أظافرها الصغيرة بعناية لتجلس بعدها واضعة يدها بأدب منتظرة حتى يجف... لتدخل بعدها شقيقتها دانا تطمئن عليها فاتسعت ابتسامتها عندما رآتها منتهية من كل شيء
فأخذ نديم يدها ليطلي أظافرها بالطلاء الوردي مثل شقيقتها الصغرى، فهو لا يفرق ابدا بينهم في المعاملة
بعد الانتهاء اخيرا من تلك المهمة...دلفت كاميليا هي و آدم وشعرت بالفخر عندما رأته أنقذ الموقف مع لانا فهو طلب منها الاعتناء بآدم وسوف يتصرف هو مع لانا..
خرجوا سوياً للذهاب إلى حفل العيد ميلاد وما أن وصلوا إلى ڤيلا والده فسارة جهزت الحفل هناك.
حتى طلبت لانا من والدها أن يحملها فنفذ لها طلبها, لتتفاجئ كاميليا بابنها آدم يطلب منها نفس ذات الطلب، فهمست قائلة بنبرة مازحة وهي تحمله:
- انتوا بتعلوا على بعض صح؟
وفي ثوان كان نديم يحمل دانا مثل لانا لتحاول دانا الاعتراض بأدب:
- انا خلاص كبيرة يا ديم
- انتي تكبري براحتك على اي حد بس مش عليا...هتفضلي بنوتي الصغيرة برضو
قبلته دانا من وجنته وما أن دخلوا إلى مكان الحفل حتى نزلت دانا من حضنه وأخذت معها آدم ليأخذهم اسر حتى يلعبوا سوياً
ذهبت فاتن إلى الحفل وهي تسلم على شقيقتها و لانا ومعها ابنها الصغير "محمد"
همست لانا إلى ابن خالتها:
- ازيك يا ميدو
همس الطفل بتلعثم بكلمة واحدة فقط:
-لينو..
هتفت فاتن بحسرة:
- اشمعنا الاسم ده الوحيد اللي بتنطقه وكمان بتدلعها...ده انا امك وبقالك ٣ سنين مش عارف تنطق اسمي حتى !
ضحكت كاميليا قائلة:
- لسه برضو مش عارف يتكلم كويس
- وحياتك لسه.. متأخر اوي في الكلام..مع أنه أكبر من لانا...مش عارفة ليه كده
هزت فاتن رأسها بغيظ:
- مش طالع لأمه لأ...ده انا كنت بتتكلم وأنا لسه في بطن ماما...
قهقت كاميليا ضاحكة, لتردف فاتن بجدية:
- لا بجد انا اتولدت متكلمة على طول...عيالك شكلهم طالعين ليا
- يخرب عقلك يا فاتن.. متقلقيش شوية وهيتكلم...انتي بس شوفي دكتور تخاطب وهيبقى تمام
- اهو قولت لاحمد وهنشوف كده...بس سيبك قوليلي ايه القمر والشياكة دي
- والله انتي اللي قمر يا تونا
لتردف بابتسامة وهي تنظر حولها:
- تعالي نسلم على طنط منى...يلا يا لينو انتي ومحمد
- لا هنلعب سوا جنب بابي
- ماشي يا حبي
__________
على طاولة السيدة منى.. كانت تجلس بجانبها فتاة من أقاربها..اقتربت منها كلا من فاتن وكاميليا وسلموا عليها..
لتهتف فتاة منهم قائلة :
- ايه يا طنط .. حضرتك مش هتقنعي مامي..
- كنا لسه بنتكلم عن الانفصال..وانا بنصحها بلاش
سألتها كاميليا :
- ليه؟
- عشان وجهة نظرها ناحية الطلاق مش صح.. ومش زي ما مامتها قالتلها تسيبها براحتها وأن دي حريتها..الطلاق مش كده..لازم تبص للنقط التانية...وغير كده في بينهم طفلين وجوزها مش وحش للدرجة.
- انتي ايه رأيك يا كاميليا...بذمتك مش الطلاق حلو...انا حاسة أن هعيش حياة احسن بعد الطلاق
هتفت فاتن بنبرة حاسمة:
- الطلاق يا بنتي مش صورة بنتصورها و احنا واخدين pose ونبين قد ايه مبسوطين و عاملين شعرنا وبنلبس حلو و بنضحك.. انتي فاهمة الطلاق غلط على فكرة
ردت كاميليا بنبرة واقعية:
-الطلاق نهاية احلام حلمناها لنفسنا و اتقلبت كوابيس.. الطلاق بداية مسؤولية و هم تاني خالص مع اولاد صحتهم النفسية المفروض بتكون اول اهتماماتنا في الوقت ده.. ممكن جدا يكون الطلاق احسن قرار في حالات كتير صعبة
اومأت السيدة منى بإيجاب:
-بس أكيد مش حاجة Fun نشجع بعض عليها خالص ونقرر فجأة ننفصل
ردت كاميليا بحكمة:
- الست لما بتنفصل أحيانا بتسيب نفسها لاكتئاب و مهدئات او تغير ستايلها و تغير شخصيتها..الحمد لله انا ماعملتش لا ده و لا ده .. روحت لثيرابيست شاطرة جدا...الحمدلله محتاجتش اي علاج أدوية نهائي مجرد علاج بالفضفضة بس
شغلت نفسي في شغل بدأت من الصفر و طبعا بنتي في حضني و الحمدلله ربنا عوضني بأكتر ما اتمنى في كل حاجة و دي مش شطارة مني و لكن على نياتكم ترزقون
فالحمدلله كل اللي بيشوفني مش بيعرف قد ايه الواحد عافر قد ايه واستحمل قد ايه عشان مهدش البيت بسهولة
بس سبحان الله من كرم ربنا عليّ دلوقتي بحكي قصتي كأني مش انا اللي عيشتها و من رحمة ربنا اني نسيت فعلا معظم الاحداث اللي حصلت وحشة... انا بحكيلك وكأني بفتكر حاجات مكنتش عايزة افتكرها...
بس اللي عايزة اقولهولك أن الست الذكية هي اللي بتفوق لنفسها و حياتها و طموحاتها بعد طلاق و زوج مريض دمر حياتها
لتردف بنبرة قوية:
-الطلاق مش سهل على فكرة ابدا
و مسؤولية ولاد لوحدك مش سهلة
فـ مش شوية مكياچ ولبس وخروج هما اللي بيخلوا الطلاق يتنسي.. لا خالص
انا دلوقتي فخورة وبحمد ربنا على راحة البال و الهم اللي انزاح فعلا عشان احيانا بيكون الطلاق رحمة زي حالتي ...متنخدعيش بجد بالمظاهر
ابتسمت منى بفخر :
-أنا فخورة بيكي يا كاميليا.. فخورة بقوتك قوة الست اللي بجد اللي خليتك تحسي انك احسن من مليون راجل و انك فعلا كنتي قد المسؤولية
ردت فاتن بضيق :
- الطلاق ده بجد ظاهرة تستحق الدراسة!
قاطعتها كاميليا :
- والله الموضوع مش محتاج دراسة ولا حاجة.. الرجالة بقت مش فاهمة الجواز.. مفيش حد بيوعي الراجل، التوعية كلها للست بس، حافظي على بيتك و جوزك و إلبسي له و دلعيه و ربي عيالك
لكن محدش بيقولهم احترمها و قدرها و صونها..
الغلط طالع مع التربية و البيت
اومأت منى موافقة:
- مفيش حاجه اسمها انتي الست فـ لازم تستحملي وتبقي مجبورة على العيشة وتحاربي علشان بس البيت ميتخربش وهو الراجل عادي لو غلط هو ده اصلا اللي بيترتب بعديه الطلاق !
التفتت كاميليا إلى الفتاة قائلة:
- بصي لحياتك وجوزك يا بنتي لو لقيتي اسباب قوية مقنعة اتكلمي مع حد واثقة فيه..واتكلمي معاه هو...مجبش نتيجة خلاص
- طب انتي جوزك كان ايه عيوبه؟
ردت فاتن بنبرة ساخطة:
- ابن امه...وابن أمه ده نقلبه على طول مينفعش نكمل معاه !
- لا هو الحمدلله مش ابن امه ولا بيمد ايده عليا ولا خاين بس بنتخانق كتير ... و مامي بتقولي عادي براحتك وانا زهقت من مشاكلكم
- بصي الطلاق لو فيه أهل ساندينك وفلوس وشغل بيكون الموضوع ارحم شوية اه لكن طبعا فيه تعب نفسي ومعنوي...بس لو مفيش سبب قوي للطلاق يبقى حاولي تصلحي علاقتكم
- بس كل اصحابي بينصحوني بالطلاق وأنه عادي
قالت كاميليا بتنبيه:
- بصي محدش خرب بيته هينصحك انك تصلحي بيتك
كله هيقولك الطلاق جميل ماشاء الله..لكن نصيحة يا بنتي متسمعيش لأي حد ولا تاخدي رأي حد مش ثقة في حياتك..وحاولي تصلحي حياتك معاه لأقصى مجهود عندك وخلي عندك نية انك مش عايزة تخربي بيتك، ربنا وقتها هيساعدك..خراب البيت مش سهل
- شكرا يا كاميليا بجد انتي طلعتي جدعة اوي
- أن شاء الله ربنا هيكتبلك الخير
لتأتي بعدها دانا إلى امها فأخذتها امها عندما تذكرت شيء ما
- دانا يا حبيبتي...عايزة اتكلم معاكي في حاجة..
- اتفضلي يا مامي
- باباكي طلب أنه يشوفك...طلب من المحامي
توترت ملامح الطفلة :
- يشوفني...بس انا خوفت منه اخر مرة
- عارفة...بس ده حقك قولت اقولك وانتي اللي في ايدك الاختيار...انتي حابة أو لا محدش يقدر يجبرك..
- انتي شايفة ايه يا مامي
- بصي يا قلب مامي...ده براحتك انتي ...بس هو في الاول وفي الاخر هو ابوكي...اسمه للأسف مرتبط بيكي طول العمر...منقدرش نمحي أو ننسى حاجة زي كده ومين عالم يمكن فعلا يكون اتغير وندم عليكي طالما حاول يرفع رؤية.. ويطلب يشوفك..وحتى لو مندمش ..انتي اديله فرصة...لو كان كويس خلاص براحتك...انا علاقتي به اه منتهية لكن علاقته بيكي دي مستمرة مدى الحياة...
- خلاص يا مامي هقعد معاه مرة كمان...بس مش عارفة ليه انا محبتوش...مش عارفة حاجة جوايا كانت خايفة منه ... بس يمكن يكون بقى مؤدب مش نوتي او عصبي زي الاول
- بصي يا حبيبتي انا هنصحك بحاجات تمشي عليها العمر كله ... اوعي تعملي حاجة انتي مش راضية عنها.. اوعي توافقي على حاجة ضد إرادتك و مبادئك و رضاكي و إمكانياتك و طاقتك، اوعي تيجي على نفسك و توافقي على حاجة مش حباها عشان خاطر حد، قولي لا و اتناقشي و اتكلمي و عبري عن اللي جواكي من غير ما تجرحي اللي قصادك.. بس اللي قدامك لازم يعرف انك رافضة.. لأن بعد كدة بيبقى أمر مُسّلم بيه و هتوافقي على حاجات تانية كتير اوي بعد كدة عشان مش هتقدري تغيري رأيك اللي وافقتي عليه و انتي مش راضية اول مرة... و بعد كدة كل الناس و اقرب الناس هتستغربك و تشيلك انتي تمن اختيارك الغلط اللي انتي مش هاتقدري تتحمليه..
صمتت الطفلة دقيقة لترد بعدها :
- انا هديله فرصة كمان...لو اتعصب تاني مش هقعد معاه تاني
- تمام يا حبيبتي اللي تشوفيه
عانقتها طفلتها بحب:
- انا بحبك اوي يا ميكي
- وانا بموت فيكي
________
كانت تحمل ابنها وهي تقبله بينما ادم اشبعها ابنها تقبيلا فهو يحبها بشدة
أتى نديم من خلفهم قائلا لها بعبث :
-طب أبوه قصر في حاجة معاكِ؟
ضحكت كاميليا وهي تنزل آدم إلى الأرض ليذهب حتى يلعب مع الاطفال مرة أخرى:
- أبوه ده الأساس
هتف بنبرة صارمة :
-طب اسمعى بقا الكلمتين دول..عشان الوضع ده مينفعش
توترت من تغير ملامحه، ليردف نديم بنبرة عابثة:
-وحشتيني
ضحكت كاميليا لتضربه ضربة خفيفة في كتفه :
- حرام عليك ... ينفع تخضني كده
ضحك نديم فهو يعشق مشاكستها من الحين الي الاخر .. ليجذبها فتستند على صدره ليحيط خصرها بيديه ... وضعت يدها على يديه لتهمس له بحب:
- ايه الحلاوة دي بجد...
تأملها بحب و عشق قائلا:
-أنتِ اللي حلوة و زي القمر
احمرت وجنتاها خجلا:
- انا بموت فيك اصلا
- عايزين بعد امتحانات دانا أن شاء الله نروح كندا عشان اخلص شغلي وفي نفس الوقت تقضوا الاجازة...
ابتسمت عندما تذكرت من كرم وعوض ربنا لها أن نديم صمم أن تلك كل طفل في كندا حتى يصبح معهم الجنسية الكندية مع المصرية، ومن بعد إنجابها آدم واعتادوا على السفر الى كندا في كل اجازة يتابع نديم عمل والده هناك، بينما يستمتعوا سويا بالاجازة بالخارج لدرجة أنها حصلت على الجنسية الكندية مثلهم
ابتسمت كاميليا بسعادة غامرة:
- دايما هفضل اقولها لك.. لو كنت أعرف أنك أنت اللي مستنيني, عمري في حياتي ما كنت زعلت ولا بكيت ابدا.. ربنا يخليك ليا يا احلى قدر ونصيب وحبيب في الدنيا
قبلها من يدها بحب :
- ربنا يحمينا ويحفظنا لبعض طول العمر يارب..ويبارك في اولادنا
- انا ربنا عوضني بيك بجد... كنت احلى هدية من ربنا ليّ
-ربنا يخليكِ ليّ يا كراميلا.. انا والله بموت فيكي..مهما اقولك اصلا مش كفاية
ليأتي أخيراً من يحمل لكِ الحُب في قلبه وقوله وفعله..
من لا يستطيع الاستغناء عنك لأنك أثمن ما عنده .. من يقدر كل تفاصيل الأشياء الصغيرة التي تسعدك إلى الحد الذي لا حدود له. .. من لا يجعلكِ تتسائلي كل يوم بأسئلة كثيرة تقضي على ما بينكم.. من يحيي تلك المشاعر المدفونة بداخلك ..
من يصعدك من أرض الخيبة إلى سماء الأمان..
من يجعلك تريدي أن تذرفي دموعك بسببه من غمرة العشق !
تـمـت بــحــمــد الله
_________________
يوم مميز بكل معنى الكلمة بالنسبة لي🌎
من اول ما نزلت الرواية وانا منتظرة يوم ما اخلصها
يوم ما اخلص كل افكاري المتعلقة بالشخصيات ومشاعرهم وحياتهم.
والحمد لله قدرت اخلصها على خير معاكم
الرواية دي كتبتها كـ هدية للبنوتة صاحبة القصة الحقيقية لأنها مستوحاة من قصة حقيقية ومعظم شخصيات الرواية حقيقيين.. مع إضافة بعض اللمسات الرقيقة للتخفيف من حدة بعض الأحداث..
المفاجأة أن نديم شخصية حقيقية فعلا...
بتمنى تكونوا راضيين عن الرواية وعن النهاية
تمت
