رواية اميرة الصعيد الفصل الحادي عشر 11 بقلم سما حسين
البارت الحادي عشر
أميرة الصعيد
بقلم : سما حسين
زين فتح الباب ولقي هند
زين : هند
الكل ماكنش عارف مين هند حتي ابو فيروز
الحاج سعيد : مين هند دي
فيروز : دي صاحبتي يا بابا ......مالك يا هند
هند كانت بتعيط
هند : انا اتخانقت مع اهلي ومش عارفة اروح فين
فيروز : اي اللي حصل
هند راحت لفيروز وحضنتها وقالتلها في أذنها : شوفي انا هعمل ايه
هند : اهلي كانوا عايزين يجوزوني واحد غني وانا مش حباه ومش طيقاه حبسوني في الاوضة وانا هربت وملقتش مكان اروح فيه فجيت علي هنا
فيروز : متقلقيش ...... انا هقف جنبك
هند : انا آسفة انا هتقل عليكم
الحاج سعيد : لا ي بنتي ولا هتقلي ولا حاجة ..... فيروز
فيروز : نعم يا بابا
الحاج سعيد : طلعي صحبتك اوضتك تقعد معاكي وخليها تهدي
فيروز : حاضر يا بابا ..... تعالي يا هند
هند راحت مع فيروز اوضتها
في اوضة فيروز
هند : ايه رايك
فيروز : ايه اللي انتي عملتيه ده انا مش فاهمة حاجة
هند : اقعدي وانا هقولك علي كل حاجة
فيروز قعدت : اتفضلي قولي
هند : بصي يا ستي انا قعدت افكر مين اللي هيراقبها جوا البيت ملقيتش حد مناسب غير مين
فيروز : مين
هند : انا طبعا.......ف اخترعت الحكاية دي عشان آجي اقعد معاكم شوية لحد ما نمسك عليها حاجة
فيروز : مغلطش لما قولت عليكي مجنونة
هند : بس ذكية
فيروز : طب يلا يا ذكية تعالي نامي عشان رايحة الجامعة بكرا الصبح
هند : هاخد شاور وهاجي انام
فيروز : يعني انتي سايبة بيتك وجاية تستحمي عندي يا معفنة
هند : اصل الشامبو بتاعي خلص اعملك ايه
وضحكوا هما الاتنين
هند : بقولك ايه كفاية ضحك وقومي هاتيلي هدوم من عندك
فيروز : مش بقولك معفنة
هند : ولا اقولك هقوم انا اختار
هند خرجت من الحمام
هند : ايه اسم الشامبو اللي انتي جيباه ده
فيروز : ليه مالو
هند : عايزة اجيب منه
فيروز : حلو علي شعرك
هند : لا
فيروز : اومال هتجبيه ليه
هند : اصل طعمة حلو
فيروز : تعالي نامي متصحيش تاني
هند : اهون عليكي يا حبي
فيروز : انتي شربتي شامبو عايزة تصحي تاني
علي السرير
هند : فيروز
فيروز : نعم
هند : حازم كان عايز يقابلك بكرة
فيروز : ليه ....... يقابلني بإمارة ايه
هند : انتي غبية هيقولك علي تحركات امك ويديكي اي حاجة صورها أو سجلها مش حبا فيكي يعني
فيروز : ماشي هقابله بكرة بعد الجامعة
هند : ماشي
فيروز : ابقي قوليله
هند : ما اكيد هقوله هو هيشم علي ضهر ايه يعني
فيروز : ممكن سؤال
هند : يا نعم
فيروز : هو انتي ليه مش بتطيقي زين
هند : زين مين
فيروز : اصلا
هند : اه ابن عمك ده
فيروز : اه ليه كل ما بتشوفيه بتتخانقي معاه
هند : هو كده مش عارفة ليه مش بطيقه
فيروز : والله العظيم ده طيب كفاية أنه ساعدني لما كنت عندك وبيساعدني دلوقتي
هند : طيب ده انتي اللي طيبة
فيروز : طب بزمتك لو ماكنش طيب كان زمانه ساعدني
هند : بصي يا فيروز يا بنتي انا عمري ما قولت كلمة عدلة علي حد بس ابن عمك ده طيب ومحترم ودمه خفيف بس انا مش بطيقه
فيروز : بردو .....طب نامي ياختي نامي
هند : انتي اللي قالبالي دماغي من الصبح
بعد ٥ دقايق
فيروز : هند انتي لو اهلك عرفوا الحكاية دي هيكون ايه رد فعلهم
هند قامت وقالت لفيروز : انتم معندكمش اوضة تانية
فيروز : ليه
هند : عشان راسي صدعت يا ستي اسالي كل اسالتك الحلوة دي بكرا
فيروز : لا توجب سؤال اليوم الي الغد
هند : دا انهي جزار اللي قالها دي
فيروز : خلاص متزعليش تعالي نامي
هند : انا عندي استعداد انام في حضن ليلي ومنامش معاكي في اوضة واحدة
فيروز بضحك : خلاص تعالي اوديكي تنامي في الصالة والصبح قبل ما امشي والكل نايم هصحيكي تطلعي تنامي في اوضتي
هند : ماشي يلا .......دا انتي صداع
جه الصبح وفيروز صحت من النوم ولبست ونزلت عشان تروح الجامعة ونسيت هند ونسيت تطلعها الاوضة لأن المكان اللي هند نايمة فيه بعيد عن الباب ف فيروز ما اخدتش بالها ومشت راحت الجامعة
ويشاء القدر.... زين صحي من النوم ومكنش مركز خالص وراح قعد علي الكنبة اللي هند نايمة عليها اول ما قعد هند صرخت بصوت عالي لدرجة أن البيت كله صحي وزين متفاجئ ومصدوم ولسة مش مستوعب اللي حصل الكل نزل
الحاج سعيد : حصل ايه يا بنتي
هند حكت علي كل حاجة وفجأة لقت موبايلها بيرن
هند : الو يا فيروز
فيروز : انتي صاحية
هند : لا نايمة في عز نومي
فيروز : اومال بتتكلمي ازاي
هند : قولي لنفسك
فيروز : المهم معلش بقا نسيت اصحيكي الصبح بما أن انتي صحيتي اطلعي كملي نوم في اوضتي لو حابة
هند : منك لله يا فيروز منك لله
وقفلت السكة في وشها
فيروز : يا بت ال.... بتقفلي السكة في وشي
زين : انا آسف بجد حقك عليا مكنتش واحد بالي
هند : مكنتش واحد بالك ايه ده انت تقيل اوي
زين : انا تقيل
هند : اه تقيل
زين : تقيل ازاي يعني
هند : دمك تقيل ووزنك تقيل انت كام كيلو
زين : انا ٦٠ كيلو
هند : مش بقولك تقيل
زين : معلش انا آسف
هند : اصرفها منين انا آسف دي
زين : طب اعملك ايه طيب
هند : هاتلي بيتزا بالسجق
زين : نعم
هند : هاتلي بيتزا بالسجق وانا اسامحك علطول
زين : عنك ما سامحتيني
الكل واقف يضحك عليهم
زين : بتضحكوا علي ايه
الحاج ابراهيم بضحك : خلاص يا بنتي هجبهالك انا
هند : معلش يا عمو بس هو اللي قعد عليا يبقي هو اللي يجيبلي
زين مشي وهو متعصب
لما كان عند الباب
هند بصوت عالي : هاتها بالحجم العائلي
بعد شوية
زين : اتفضلي يا استاذة يا رب تكوني هديتي
هند : اوي بس انت ايه اللي خلاك تتأخر كده
زين : وانتي مالك
هند : بص أنا دلوقتي لولا أن انا خايفة البيتزا تبرد كنت زعلتك انهاردة
زين بعصبية : لا بالهنا والشفا ومشي
هند :بقولك ايه
زين : نعم
هند : معاك فلوس
زين : اه
هند : طب انا هنام هنا كل يوم ابقي تعالي اقعد عليا وهاتلي اي حاجة اكلها عشان ببقي قاعدة جعانة
زين : ارحمنا يارب
هند : يا رب
زين : دا انتي إنسانة مستفزة اوي
هند : اطلع نام
زين طلع اوضته
وبعد شوية
فيروز جت
فيروز اول ما شافت هند وهي بتاكل البيتزا
فيروز : انتي بتعملي ايه
هند : بلف محشي
فيروز : بلاش استظراف ايه اللي حصل
هند حكت لفيروز علي كل حاجة
فيروز : يا مفترية
هند :بقولك ايه انا جاية هنا اراقب العقربة اللي فوق دي ف خلي ابن عمك ده يبعد عني عشان مزعلهوش
فيروز : يا ستي فكك من زين دلوقتي المهم راقبتيها
هند : لما أفطر هبقي اقوم ارقبها
فيروز: ما انتي لسة آكلة
هند : آكلة ايه
فيروز : انتي مش لسة آكلة بيتزا
هند : لا دي تصبيرة كده لحد ما يحضروا الفطار
فيروز : دايما كده همك علي بطنك
هند : معلش بقا ...... انتي قابلتي حازم
فيروز : لا
هند : ليه
فيروز : اصل انا طلعت من الجامعة تعبانة اوى فقولت اروح و أقابله بعدين ونروح انا وانتي وزين
هند : ماشي اطلعي ريحي وانا هروح آكل اي حاجة اصبر بيها نفسي لحد ما يحضروا الفطار وهطلع اشوف العقربة دي بتعمل ايه فوق
فيروز : تمام ماشي
هند اكلت وطلعت تراقب ليلي بس اتفجات لما لقت شخص قدامها والشخص ده كان .......
يتبع ........
أميرة الصعيد
بقلم : سما حسين
