رواية وعد الفصل الخامس 5 الجزء الثاني بقلم عزة العربي
روايه وعد❤️
الجزء الثاني
بعنوان (القلب له واحد)
بقلمي عزه العربي
صاحبه حور : دكتور ادم دكتور ادم
ادم: هاااا نعم
اسراء : اهل حور وصلوا هناك اهم
ادم بوجع بص عليهم
كانت ست وقوره خطوتها سريعه وشها باين عليه الخضه ووراها راجل بس لما قربت اتضح أن الراجل مكنش جاي معاها وفتح اوضه ودخل
حنان بتنهج وبتعيط: بنتي .....بنتي فين انتم زمايلها
اسراء: اهدي يا طنط انا صحبتها في الكليه اللي اخدت تليفون حور وكلمت حضرتك و حضرته دكتور ادم دكتورنا في الكليه هو اللي انقذ حور وجابها عالمستشفي هنا
حنان بدموع: طمني يا بني حور مالها هي فين
ادم: اطمني يا امي هما بيعملولها التحاليل والاشاعات اللازمه وبعدها هنعرف مالها
الدكتور وصل ووجه كلامه لادم: دكتور ادم الحاله الزايده عندها متضخمه واحتمال تنفجر في اي وقت لازم تعمل العمليه حالا
حنان بشهقه: هه عمليه
ادم: تمام جهزوا غرفه العمليات وانا اللي هعملها العمليه انا رايح احضر نفسي عاوز كل حاجه تكون بيرفكت كلموا دكتوره آيه تحضر حالا
وبص لحنان وربط علي كتفها: اطمني حضرتك دي عمليه بسيطه جدا وهتقوم منها زي الفل
حنان: يا رب يا رب
حاولت تتصل بيونس كتير تليفونه مقفول
في بيت يونس .
يونس رجع البيت رن الجرس محدش فتح من يوم ما نور قعدت معاهم في البيت وهو بيخبط وهما يفتحوا عشان ميحرجهاش لو قاعده علي راحتها
كان شايل شنط كتير جدا نزلهم عالارض
طلع مفتاحه وفتح ودخل حطهم عالكنبه : ماما ....حور
انتم فين ملقاش اجابه مسك تليفونه عشان يتصل بيهم لقاه فاصل شحن دخل اوضته حطه عالشاحن وقلع هدومه وكان لابس شورت بس وراح ياخد شاور
نور كانت في الحمام مصدقت البيت فاضي مليت البانيو مايه وقعدت مده طويله فيه وبعد فتره افتكرت انها نسيت تاخد هدومها معاها حمدت ربنا أن محدش في البيت واكيد يونس راح لأخته المستشفى وهو اصلا مش بييجي البيت كتير لفت فوطه علي جسمها وفوطه علي شعرها وخرجت في لحظه دخول يونس الحمام وخبطوا في بعض يونس بلع ريقه وهو بيحاول يبعد نظره عنها ونور مسكت الفوطه بكل قوتها وجريت علي اوضتها ووشها بيطلع نار وبتلعن نفسها مليون مره انها حطت نفسها في موقف زي دا
يونس فضل واقف مكانه لدقايق وبعدها استغفر ربنا ودخل اخد دش وراح اوضته لبس هدومه وسرح شعره ورش برفانه
نور لبست هدومها وصليت فرضها وبتتمني من قلبها متقابلش يونس تاني النهارده حسيت احساس غريب في قرب يونس منها اول مره تشوف لون عيونه من قرب ملامحه جامده بس جواه حنيه متداريه ورا قناع حاد بتحسها في معاملته مع امه واخته وراه حكايه حزينه بيحاول يداريها بس يا تري حكايته ايه
باب اوضتها خبط
وشها زاد احمراره واخدت نفس طويل بتحاول تقوم من علي سجاده الصلاه بس رجلها مش مسعداها
يونس بضيق: انتي يا اسمك ايه انتي افتحي
نور فتحت وهي متعصبه ورفعت صوباعها في وشه: اسمي مؤقتا نور يا ريت تحترم دا
يونس بص عالاسدال اللي لبساه ورفع حاجبه وأتكلم بتريقه: عارفه ربنا اوي وبتصلي
نور: عقبالك لما ربنا يهديك
يونس حب يربكها: اللي يشوفك من شويه
نور بلبخه وافتكرت الموقف اللي كانت فيه من شويه : ايه دا.. ايه.. انت عاوز ايه انت ؟!
يونس وهو بيبص في عيونها: امي
نور بنفس اللبخه: امك
يونس: نعم ؟!
نور بنرفزه :انت عاوز ايه دلوقتي
يونس: قلتلك عاوز امي
نور خبطت دماغها بايدها: اه اه طنط في المستشفى حور تعبت واخدوها المستشفى وبلغوا طنط ونزلت تجري عليها قلتلها استني ألبس قالتلي لا خليكي
يونس بخضه: حور في المستشفى؟! مستشفى ايه ومالها ؟!
نور بحزن: مش عارفه ممكن تاخدني معاك
يونس وهو بيتحرك: لا
نور وهي بتقلده وبتطلع لسانها: لا .....بارد
فتح الباب وبصلها ورفع حاجبه: الشنط دي ليكي وقفل واتحرك
نور فتحت الشنط كان جايبلها لبس كتير كله ماركات منساش اي حاجه ممكن تعوذها حتي الهدوم الداخليه والتوك والرفانات والشوزات كل حاجه كانت واااو ذوقه هايل قلبها دق بطريقه غريبه حطت أيدها علي قلبها وخبطته جامد : لا... لا ...فوقي اللي بتفكري فيه دا استحاله يحصل استحاله تقبلي بالحاجات دي انتي نور متنسيش انتي نووور اللي لازم تكون راجل في كل حاجه لبسها طريقتها أسلوبها معاه فوقي وخليه زي كل مره يستفزك فيها ويقوللك انتي شبه الرجاله فوقي ....فوقي يا ...........نور .
ڤيلا السيوفي.
روح بتتكلم في التليفون في اوضتها ونايمه علي سريرها ووشها احمر
روح: عيب بقي يا فهد
فهد بمكر: انا قلتلك لازم تتعاقبي يا روح وهعاقبك
روح : ودا عقاب برضوا يا ديدو
فهد : انا عقابي كده لو انا غلطت ابوسك ولو انتي غلطتي تبوسيني
روح : اخر مره عاقبتي عمتوا وعد شافتنا وكان شكلي زي الزفت
فهد : وهي أول مرة ماما تقفشنا دي متعوده
روح : اقفل بقي يا فهد انا لازم اقوم ألبس عشان في حاله خطيره في المستشفى ولازم اشوفها
فهد بعصبيه بسيطه: يااادي المستشفى هنرتاح منها اامتي بقي قلتلك خدي اجازه طويله او قدمي استقالتك بقي وريحيني
روح بدلع: يا فهودي انت بتغيير من وانا بيبي دي المره المليون اللي بتخليني اقعد فيها من المدرسه والكليه والشغل صدقني يا ديدو انا لو حسيت اني مش هقدر أوفق بين بيتي وشغلي هاخد القرار فورا اني اقعد وبعدين دا اخر اسبوع ليا وبعدها هاخد اجازه طويله جدا لحد ما تزهق مني
فهد: بس كده اطمنت انك مش هتروحي الشغل تاني
روح: ليه بقى
فهد: عشان عمري ما ازعل منك ابدا قومي بقي إلبسي وانا هوصلك
روح: شكرا يا حبيبي ربنا يخليك ليا
باب اوضتها خبط.
طيب باي دلوقتي وقامت تفتح؛ بااابي
احمد: ايه يا حبيبتي عامله ايه
روح: كويسه جدا الحمد لله
احمد: يا رب دايما كويسه وشك احمر كده ليه
روح بلبخه: ولا حاجه انا بس كنت نازله المستشفى وهلبس هي مامي رجعت من عند خالو يحيي
احمد: لا لسه هي فرحانه باخواتها وسيباني ربنا يخليهم لبعض
روح : يا رب يا بابي
احمد: ماشي يا حبيبتي انا قلت اطمن عليكي هلبس واوصلك
روح بلخبطه: شكرا يا بابي اصل يعني فهد هيوصلني
احمد : ماشي خلي بالك من نفسك
روح: اطمن عليا يا بابي
ڤيلا الديب.
الجو كان ممتع جدا بحضور زين والكل كان فرحان بيه هو وعيلته
رحيل الفرحه مكانتش سيعاها من لمه اخواتها وعيالهم
زين: والله الواحد افتقد اللمه الحلوه دي من زمان
يحيي: انت اللي اخترت تبعد اتحمل بقي
رحيل: مش كفايه كده بعاد يا اخويا وترجع وسطنا ما شاء الله بنتك بقيت عروسه علي وش جواز لازم تفضل مع عيلتها تعرفهم ويعرفوها مش كده ولا ايه يا چودي
چودي: والله انا ياما قلتله نرجع مصر ونسيب فرع الشركه هناك بس هو اللي مصمم
اسيل بلهفه: يا ريت يا عمتوا انا عاوزه اقعد معاكم جدا بجد انا مفتقده جو العيله جدا
احمد دخل من باب الڤيلا : علي بركه الله الكل موافق سمعونا الفاتحه بقي
رعد بص لاسيل بحب وهي رفعت عينها عنه: يا ريت نقرا الفاتحه
فهد نازل عالسلم وغمز لرعد : اقروا الفاتحه يا جماعه وربنا يقرب البعيد
زين: والله ما انا فاهم حاجه بس نقرا الفاتحه
في المستشفى.
يونس دخل جري لقي حنان واقفه قدام اوضه العمليات : ها يا امي لسه مطلعتش
حنان ببكاء: لا لسه بقاللهم ساعتين جوا
الباب اتفتح وادم خرج والدكتوره آيه وراه
حنان بلهفه: طمني يا بني حور عامله ايه
ادم بتعب: الحمد لله العمليه كانت صعبه شويه بس عدت علي خير
يونس: طيب هي كويسه دلوقتي فاقت ولا لسه انا عاوز اشوفها
ادم بلا وعي: انت مين؟!
يونس رفع حاجبه: اخوها
ادم ومد أيده : اممم دكتور ادم الديب
يونس مد أيده: يونس العدوي رجل اعمال
ادم بص لدكتوره آيه: انا ماشي حضرتك هتابعي الحاله لو في اي حاجه حصلت عرفيني فورا عن اذنكم
حنان : ربنا يبارك فيك يا بني شكرا جدا على وقفتك معانا
يونس: شكرا ليك والدتي عرفتني كل اللي عملته
ادم: انا معملتش غير الواجب اعتبروا المستشفى بتاعتكم عن اذنكم
حنان بحب؛ شكله ابن ناس ومحترم
دكتوره آيه بحب: جدا يا طنط دكتور ادم ابن صاحب المستشفى ومحترم جدا جدا
حنان: ربنا يحميه يا رب.
____________يتبع.
بقلمي عزه العربي.
______""_______""_______""____""__
إرضىٰ بما قَسمهُ اللَّه لكَ، قد تكُون أغنَي النَّاس وأنتَ لا تدرِي
قل (الحَمدُللَّه دَآئِماً) 💖✨
