رواية ليلة ساخنة الفصل الثاني 2 بقلم عمرو راشد
الحقووووني حرااامي
" باب الشقة اتفتح وظهر قدامي
انت مين يا جدع انت
= انتو اللي مين يا حرامية يا ولاد ال***
انت كمان بتشتم ، والله ل ابلغ عنك البوليس
" امي و اخويا صحيو على الصوت و خرجو من اوضتهم
في ايه يا هند ومين الراجل دا
= حرامي يا ماما حرامي ، اطلبي البوليس بسرعة
استني بس يا هند ، حرامي ايه اللي هيدخل من الباب دا
= يا ماما أنتي مش شايفة شكله عامل ازاي
" رد عليا بنبرة حادة جدا
مالو شكلي يا بت انتي ما تحترمي نفسك ، ايه شايفاني واخد في وشي 60 غرزة
" الناس اتجمعت على صوتنا ومنهم صاحب الشقة اللي قال
في ايه بس يا جماعة اهدو شوية
= انت مش شايف يا عم جمال ، حرامي و دخل علينا واحنا ستات قاعدين لوحدنا
يا بنتي حرامي ايه بس ، دا الأستاذ يوسف كان ساكن هنا في الشقة قبلكو
= ولسة معاه المفتاح بيعمل بيه ايه ، اه اكيد عامل نسخة تانية عشان يدخل يسرق اللي هيسكنو في الشقة من بعده
" رد عليا وهو متعصب وصوته كان عالي جدا
يسرق مين يا بت انتي دا انا اشتريكي أنتي و اهلك كلهم ، ما تقولها حاجة يا عم جمال
يا يوسف مينفعش الكلام دا اهدا شوية
#بقلم : #عمرو راشد
بصو يا جماعة الأستاذ يوسف كان ساكن هنا مع والدته بس هو سافر بقاله 6 سنين ولسة راجع
= و امي فين يا عم جمال ، مشيتها من الشقة ليه
والله يا ابني ما مشيتها ، امك تعيش انت البقية في حياتك
= انت بتقول ايه يا راجل يا مجنون انت
عيب يا ابني كدا دا انا قد ابوك
= امي فين يا عم جمال وبلاش تعصبني اكتر من كدا
شد حيلك يا ابني ، والله ما حد عرف يوصلك ولا حد كان عارفلك مكان
" كان واقف مصدوم ، الكلام واقف على لسانه ومبينطقش
امي ماتت!
= اهدا يا يوسف ، اهدا يا ابني ، تعالى طب يا حبيبي اقعد استريح ، دا انت جاي من سفر
" مكنش بيرد على اي حد بل بالعكس سابنا و مشي ، قفلنا الباب واحنا مستغربين من اللي حصل ، اما انا كنت مش عارفة اعمل ايه ، كان صعبان عليا أوي ، شكله كان بيحب مامته ومتعلق بيها ، بس ايه اللي يخليه يسافر طالما بيحبها كدا ، حاسة اني زودتها شوية معاه ، هو انا كنت ناقصة تأنيب ضمير ، دخلت اوضتي و حاولت انام عشان عندي معاد مهم الصبح ، كان من ضمن اللي انا عرفته عن حالة عادل ، كان هي انه لازم يتعرض على دكتور نفسي الاول ، وبالفعل كنت حجزت مع دكتور نفسي ، نمت وصحيت تاني يوم روحنا للدكتور ، دكتور وليد عز الدين ، على عكس ما كنت متوقعة اني هلاقي العيادة زحمة جدا لا بالعكس ملقتش حد خالص ، كنا لوحدنا في العيادة ، دخلنا بسرعة وقعدنا مع الدكتور
متأخرين دقيقتين ونص بس مفيش مشكلة
= احنا اسفين بس دي المواصلات والله
ماهو دا هيأثر على الكشوفات اللي بعدك يا أستاذة هند
= هي فين الكشوفات دي ، احنا لوحدنا في العيادة
كل حاجة هنا بالحجز يا أستاذة هند وكل واحد لييه معاده ، احنا مش زي العيادات التانية
" امممم دكتور شايف نفسه شوية ، اتعرفنا وطلب مني امشي لانه عايز يقعد مع عادل لوحده ، سيبتهم و خرجت ، يارب بس بعد دا كله يجيب نتيجة ، عموما روحت البيت ، يدوبك لسة هقفل الباب لقيت اللي حط رجله عشان يمنعني اقفله
ازيك
" كان يوسف ، بيتكلم ب هدوء على عكس ما كان بيتكلم امبارح
كويسة الحمدلله
= أنا اسف على اللي حصل امبارح ، عم جمال فهمني كل حاجة و زي ما قالك انا كنت مسافر ومعرفش اي حاجة هنا
حصل خير
= حقيقي مش عايزك تزعلي
انا اللي بعتذرلك على طريقتي امبارح بس انت قدر موقفي ، احنا ستات وانت بتفتح علينا الباب الساعة 2 بليل
= انا اسف ، واتفضلي المفتاح اهو
اهه يبقا انت عامل منه نسخة تانية
= تاني أنتي تاني
" ضحكت ، باين عليه انه لطيف فعلا ومش هو الشخص اللي كان بيتكلم امبارح ، تغير غريب جدا بس هو معذور
انا لازم امشي عشان عندي شغل
" قال الجملة وثواني و ظهر قدامي الماضي اللي كان نفسي يسيبني في حالي بس واضح انه هيفضل مطاردني
انت ايه اللي جابك هنا
= أنا جاي ل عادل مش ليكي ، هو فين
وانت مالك ب عادل ، هو انا مش قولتلك ابعد عنه
= أنتي باردة جدا على فكرة ، انا بسألك فين عادل
والله العظيم لو ممشتش يا زياد من هنا ل هصوت و افضحك
" هنا يوسف اتكلم
هو في ايه يا انسة هند
= وانت مالك انت ، ما تخليك في حالك
" للاسف مش انا اللي رديت ، زياد هو اللي رد عليه
دا كان خطيبي و مش عايز يسيبنا في حالنا وكل يوم عاملنا مشاكل زي ما انت شايف كدا
" يوسف مسكه من رقبته
ولااا انت شكلك مش مظبوط اصلا
= حمش أوي يا كابتن ، انا ممكن اسيب عادل عادي جدا على فكرة
ااهه هو انت منهم
= مش مهم بقا منهم ولا مش منهم المهم انك هتتبسط
= لا خلي الانبساط عليا انا يا روح ***
" يوسف ضربه بالبوكس ، مرة واتنين وتلاتة و اربعة ، وش زياد كله بقا د*م ، يوسف بدأ يخنق فيه بكل قوته
يا يوسف هيموت في ايدك ، حد يلحقناااا يا ناس!!!
#عمرو_راشد
#ليلة_ساخنة 2
#يتبع
