رواية كما تدين تدان الفصل الثاني 2 بقلم زينب رمضان
خرجت هدير وهي متوتره وخايفه من الي هيحصل بس استعانت بالله وبطلت تفكير ودعت ربنا ان اليوم دا يعدي على خير
هدير: السلام عليكم
الكل: وعليكم السلام ورحمة الله وبركاته
ام حسام: اي الجمال دا كله ما شاء الله يابنتي تعالي اقعدي جنبي تعالي
قعدت هدير جنبها بخجل وتوتر ومية سيناريو في دماغها في الي هيحصل لو رفضت حسام يا ترى ممكن يقول لأهلها على الي كان بينهم وانها كانت بتكلمه من وراهم هيفضح حبها ليه قدامهم ولو حصل كدا اهلها هيثقوا فيها تاني ولا هيحصلها ايه كل دا في دماغها ومش واخده بالها هما بيقولوا ايه لحد ما امها قالت عن اذنكم يا جماعه هقوم اعملكم حاجه تشربوها
ام حسام: خديني معاكي يا اختي اساعدك
ام هدير: اتفضلي يا حبيبتي
ابو هدير: معلش ياعيال اتكلموا مع بعض شويه لحد ما اعمل مكالمه وارجعلكم
لسه هدير هتعترض كان ابوها مشي
فضلت هدير مركزه في الفراغ ومش باصه ناحية حسام خالص
حسام برخامه: اي يا عروسه ساكته ليه مش عادتك
هدير بإنتباه: نعم
حسام: نعم الله عليكي يا اختي مكنتش اعرف ان لبس النقاب بيحلي كدا
هدير بإنزعاج: عايز ايه يا حسام عايز مني ايه بعد ما خزلتني وكسرت قلبي وقولت اني منفعكش وانك تستاهل الأحسن مني جاي ليه
حسام: يمكن ملقيتش الأحسن منك
هدير: لا والله قول كلام غير دا بتضحك عليا ولا على نفسك يا حسام انت عمرك ما حبتني بجد
حسام بجديه:
انتي صح انا محبتكيش بجد وإلا كنت حافظت عليكي ومكنتش كلمتك من ورا اهلك لو كنت حبيتك كنت حسيت انك حته مني مكنتش رضيت عليكي الي مرضهوش على اختي بس انتي كنتي تحدي بالنسبه ليا بس للأسف كان تحدي سهل لما وافقتي تكلميني من ورا اهلك كأن الموضوع عادي بالنسبه ليكي وقليتي من نظري بس لما بعدنا عن بعض حاولت احب غيرك بس لقيت نفسي بس بدور على نسخه منك
هدير بإنكسار: حسام انا لما كلمتك مش لإني رخيصه وساهله وبكلم اي حد انا اعرفك من واحنا اطفال بنلعب في الشارع وكنت معجبه بيك وان نكون سوا كان حلم بالنسبه ليا حلم لبنت في فترة مراهقه بتسمع اغاني رومانسيه وتشوف صحابها بيحبوا ويتحبوا وتتمنى تعيش الحب زيهم بس فجأه صحيت من الحلم دا على صوت قلبي وانت بتكسره وانا مش ببرر غلطي انا عارفه اني غلط بس انا توبت ورجعت لربنا وبتمنى يسامحني
حسام بصدق: إن شاء الله يسامحنا انا غلط كتير انا كمان ومعترف بغلطي وكل الي محتاجه منك فرصه تانيه مجرد فرصه تانيه بس في حلال ربنا وهحاول اتغير عشانك
هدير بجديه: ولو موافقتش
حسام: حقك ومليش اقولك لا وهبعد عنك وكأني معرفكيش ولا شوفتك قبل كدا
هدير:......
———————
♡ماما يا ماما
~نعم يا سمر يا حبيبتي في ايه
♡بصي ياست الكل انا عايزاكي تسيبي كل الي في ايدك دلوقت وتروحي ترتاحي عشان تكوني في كامل اناقتك كدا وتقفي جنب مريم النهارده في كتب الكتاب وسيبي الباقي عليا
~يا حبيبتي ربنا يسعدك يارب انتي وجوزك ويرزقكم الذريه الصالحه يارب بس دا هيبقا تعب عليكي
سمر بغصه: يارب يا ماما يارب ادعيلنا انتي بس وبعدين ولا تعب ولا حاجه في ثواني الشغل مش كتير روحي انتي بس ارتاحي وان شاء الله هجهز كل حاجه يالا بقا يا ماما متشيليش هم حاجه وانا موجوده
~ماشي يا حبيبتي ربنا يحميكي من كل شر يارب والله يابنتي انتي بنت حلال وتستاهلي كل خير
سمر:تسلمي يا ماما يارب ها بقا يا ماما العروسه مختفيه فين
مريم من وراها: انا هنا اهو يا قمر بصي بقا انا عايزاكي تشرفي على كل حاجه النهارده انا هسلملك نفسي خالص عايزه اطلع زي القمر النهارده عايزاه ينبهر بيا
سمر بصدق: حبيبتي انتي قمر من غير حاجه اصلا وبعدين هو هينبهر بيكي اكتر من كدا فين يابنتي الشاب ما شاء الله لما بيشوفك عينه بتطلع قلوب
مريم بهيام: بجد يا سمر انتي شايفه كدا
سمر: هو انا بس الي شايفه كدا دا العالم كله شايف كدا وعمي ابراهيم البقال شايف كدا مقولكيش يابنتي هو بيحبك قد ايه
مريم: خلاص يابنتي كفايه دا لو سمعك وانتي بتوصفي في حبه ليا بالطريقه دي هيشوف نفسه عليا بقا وانا مش بعرف اقوله كلمتين حلوين على بعض اصلا
سمر: يابنتي كفايه عيونك بتقول كل حاجه والله ربنا يسعدك يا قلبي ويتمملك على خير
يالا قومي جهزي لبسك وكل حاجه وحطي مسكاتك كدا ودلعي نفسك لحد ما اخلص الي ورايا هنا واجيلك قبل الجماعه ما يوصلوا
مريم: تسلميلي يارب يا سمسم مش عارفه من غيرك كنت عملت ايه والله
----------------
منال بغضب: انا مش عارفه إمتى هخلص من امك دي لا مرتاحه في وجودها ولا عدمه
صبحي: عملتلك ايه امي بس يا منال هي مش سابتلك البيت كله ومشت عايزه منها اي تاني
منال بغضب: هعوز منها ايه يا اخويا تعالى شوف امك الي فضحانا في كل حته عملت ايه
صبحي بإستفهام: فضحانا ازاي يعني
منال: خد يا اخويا التلفون شوفها على الفيس بتتكلم عننا ازاي وهي قاعده في الشارع وسط الشحاتين
خد منها صبحي التلفون وهو بيشوف حالة امه والي وصلتله بسببه بس مش قادر يتكلم ولا يعارض مراته وإلا هيحصل امه
منال: عجبك يا اخويا الي شوفته
صبحي: معلش يا حبيبتي هدي اعصابك بس وقوليلي اعمل ايه انا مش انتي الي قولتي مش مستحملاها ولا عايزاها تعيش معايا مع انها كانت شغاله زي الخدامين في البيت ومريحاكي
منال: نقطني بسكاتك يا صبحي وخليني افكر هنعمل ايه في المشكله دي...
كما تدين تدان
الفصل التاني
للكاتبه زينب رمضان
