رواية من اجل حبها تغيرت الفصل الثاني 2 بقلم نشوه عادل
دايمون: ها خير كنت محتاجنى فى ايه؟!
فهد: كنت عايزك تساعدنى انى اغير استايلى كله من شعرى ولبسى وكمان كنت عايز اعمل ليزك تصحيح بس هيقعد تلات ايام عشان اقدر اخرج فى النور مش كده؟
دايمون: لا خالص فيه عمليات بعدها بساعة تمشى فى الشارع عادى اسمها فيمتو سمايل انا عاملها بس اشمعنا يعنى ايه اللى غير تفكيرك بالشكل ده؟!
فهد: ولا حاجة حابب اظهر بلوك مختلف يفاجئنى انا شخصيا
دايمون مد له ايده وقال: حيث كده يالا بينا
اخده ع مركز طبى واتفق ان يعمل العملية فى نفس اليوم بليل وبالفعل عملها وبعد ساعتين قدر يفتح ويمشى بالنور عادى ... تانى يوم اخده عند الحلاق وظبط شعره ودقنه وكمان بعدها راحوا ع محل ملابس واشترى كام طقم كاجول ع كلاسيكى قمصان وبناطيل وقف فهد ادام المرايا واتصدم لما شاف شكله الجديد معقول ده هو ده!
دايمون: ها ايه رأيك؟!
فهد: معقول ده انا... ده انا طلعت جامد يخربيت حلاوتى طالع لمامتى😂
دايمون بضحكة عالية: النرجسية مطلوبة بس مش للدرجة دى 😂 وبعدين يسطا انت طول عمرك وسيم وحليوة
فهد: طيب بمناسبة النيولوك بقى انا عازمك ع اى حاجة انت تحبها
دايمون: حيث كده يالا بينا نبدأ سهرتنا
فى فيلا فاروق الهلالى كانت فجر قاعدة ع الفون بتتكلم مع فهد شات وبتطمن عليه لقيت عشق جاية عليها
عشق: ازيك يا فجر قلبت عليكى الدنيا ملقتكيش
فجر: خير فى حاجة ولا ايه؟
عشق: ابدا كنت هسألك ع فهد بتكلميه هو كويس؟
فجر: وانت يهمك فى ايه اذا كان كويس ولا لا خليكى بس انتى بعيدة عنه وهو هيبقى بخير
قامت وقفت وكانت هتمشى لكن عشق وقفتها: انتى بتكلمينى كده ليه يا فجر انتى عمرك ما عاملتينى كده؟!
فجر ببرود: وانتى واخوكى وولاد عمك عندى مش هتبقوا اغلى من اخويا الا مبتضيعوش فرصة عشان تضايقوه وتهينوه وتقللوا منه مفيش الا سيف هو بس اللى يستاهل منى المعاملة الكويسة اما انتى والبقية لازم تتعاملوا بمعاملتكم عن اذنك عشان عايزة انام
سابتها فجر وطلعت ع غرفتها اما عشق فقعدت تعيط كل ده حصل تحت عيون سيف اللى كان قريب منهم وسمعهم راح قعد جنب عشق
سيف وهو بيعطيها منديل: ممكن افهم انتى بتعيطى ليه؟
عشق: عشان انا متخيلتش ان هيجى اليوم اللى فجر تتغير عليا فيه وتعاملنى بالشكل ده
سيف: يعنى اتضايقتى اومال فهد يعمل ايه ده ع كده جبل انه استحملكم العمر ده كله
عشق: والله يا سيف انا مبقصدش اضايقوا طب اقولك ع حاجة ومش هتصدقنى انا مفتقداه اوى اول مرة يسافر ويسيب البيت حاسة ان فيه حاجة كبيرة اوى نقصانى حتى الكلية وانا رايحها بكون مضايقة لانى اتعودت انه هو اللى يوصلنى اى نعم انا كان نفسى اروح لوحدى او مع اصحابى بس معرفش ده معناه ايه بس انا مش هتكسف منك انا حاسة انه وحشنى اوى بجد
سيف بابتسامة: طب ما طالما انتى عايزة تتطمنى عليه اوى كده ما تبعتيله انتى رسالة بدل ما تسألى اخته!
عشق: بصراحة خايفة يحرجنى خصوصا انه مسافر وهو زعلان منى لانى غلطت بحقه
سيف: انتى عارفة ان فهد طيب وبيسامح بسرعة ابعتيله مش هتخسرى حاجة
هزت راسها ومسكت فونها وبعتتله لكن هو كان قافل ..... عدى اسبوعين وفهد مش بيفتح سوشيال نهائى ومشافش مسدجات عشق وفى ليلة كان فاروق قاعد فى الجنينة بيقرأ فى المصحف لقى شخص واقف ادامه
الشخص: السلام عليكم يا حاج
رفع فاروق وشه واتصدم لما شافه وعيونه دمعت وقال بصوت عالى: يحيى ابنى
الشخص بصدمة: جدى انا فهد مش بابا الله يرحمه
فاروق بدموع: فهد انت ازاى اتغيرت كده بقيت نسخة من ابوك الله يرحمه فى شبابه! انا معرفتكش امتى وصلت وليه مقولتش انك جاى؟!
فهد: مفيش يا حبيبى حبيت اعملها ليكم مفاجأة ومكنش فيه داعى انى حد يجى يستقبلنى
فاروق: وارث وسامة ابوك وعيون امك العسلى المخضرة رحمة الله عليهم وع اموات المسلمين جميعا المهم اطلع ارتاح انت دلوقتى ولا تتعشى الاول
فهد: لا عشا ايه الساعة 2 بليل انا شبعان الحمدلله هقوم انام لانى تعبان وانت كمان ادخل استريح
فاروق: هخلص قرأة الجزء وهطلع روح انت استريح يا حبيبى
باس فهد ايد جده وكان طالع بس رجع وقاله: بقولك يا حاج ينفع متقولش لحد انى جيت
فاروق باستغراب: ليه يا ابنى؟!
فهد: مفيش حابب افاجئ الكل زى ما فاجئتك كده😂
ضحك فاروق وقاله: ماشى يا سيدى اللى تشوفه
عدى الليل بطوله وحل الصباح واتجمع الكل ع السفرة الجد واحفاده عشان يفطروا واثناء الفطار شم الجميع برفيوم رجالى فواحة
عدى: الله ايه الريحة الجميلة اللى ع الصبح دى مين فيكم حططها؟
مازن: مش انا
اسد: ولا انا بس دى ريحة برفيوم سوفاچ الاصلية انا اقدر اميزها من وسط الف انت اللى حاططها يا سيف؟!
سيف: لا مش انا
شخص ما من ورا الجميع: انا اللى حاططها يا شباب
التف الجميع لمصدر الصوت واتصدموا من اللى شافوه بما فيهم عشق وفجر وبعد ما استوعب الكل الموقف صرخوا بصوت واحد: فهههههههههد
بما انكم خلصتوا قرأة اذكروا الله وصلوا ع شفيعنا ﷺ🤍
#من_اجل_حبها_تغيرت 2
#يتبع
#بقلم_نشوه_عادل
